Kapitali 1

Atuuffia aamma taaguutinik nassuiaatit

 

  § 1.  Naalakkersuisut inuussutissarsiutinik ilinniartitsinernik inuussutissarsiutinillu ilinniartitsinerup iluani pikkorissaanernik ataqatigiissakkanik aaqqissuussissapput, Naalakkersuisut inuussutissarsiutinut suliffissaqartitsiniarnermullu politikkikkut anguniagaat naapertorlugit namminersortut pisortallu suliffissaqartitsiffii assigiinngitsut eqqarsaatigalugit.

  Imm. 2.  Ilinniartitsinernik aaqqissuussinerit, tak. imm. 1, aaqqissuuneqassapput sapinngisamik annertunerpaamik makkununnga naapertuuttunngorlugu:

1)  inuusuttut ilinniarnissamut kaammattorneqarnissaat, aamma inuusuttut inuussutissarsiutinik ilinniagaqarumasut imaluunniit inuussutissarsiutinik ilinniartitsinermut tunngasutigut pikkorissarumasut tamarmik piviusunik periarfissaqarnissaasa qularnaarnissaat aamma ilinniakkat pikkorissarnerilluunniit amerlanerusut akornanni toqqaasinnaanissaat.

2)  inuusuttunik siunissami sulillutik inuunissaannut, ingerlaqqittumik ilinniagaqarnissaannut, Kalaallit Nunaanni namminermi aamma avataani, inuttut inerikkiartornissaannut aamma inuiaqatigiinnik ineriartornerannillu paasinninnissaannut tunngavissiisumik ilinniartitsinissaq, aamma

3)  suliffissaqartitsiffiit inuussutissarsiutini sulianut tunngasutigut nalinginnaasumillu piginnaasariaqartutigut pisariaqartitaasa piviusunngortinnissaat - inuussutissarsiutitigut inuiaqatigiinnilu ineriartornermut naleqqiullugit, tamatumunnga ilanngullugit inuussutissarsiuteqarnerup ilusiligaanermigut ineriartornera, suliffissaqartitsiniarnermi pissutsit ineriartornerat, suliffiit aaqqissugaanermikkut, nutaaliornikkut teknikkikkullu ineriartornerat.

 

  § 2.  Tunngaviusumik inuussutissarsiutinik ilinniartitsineq tassaavoq paarlakaattumik ilinniarneq, sungiusarluni sulinerup ilinniarfimmiinnerullu paarlakaaffigisaat. Tunngaviusumik inuussutissarsiutinik ilinniartitsinermut ilaapput tunngaviusumik atuartitsissutit, atuartitsissutit suliamut tunngasut, atuartitsissutit immikkut ittut aamma atuartitsissutit nammineq toqqagassaajunnartut.

  Imm. 2.  Inuussutissarsiutinik ilinniartitsinerit allat tassaapput atuagarsornertut ingerlanneqarnerusut. Ilinniakkani taamaattuni sungiusarluni sulinerit sivikinnerusut ilaatinneqarsinnaapput.

 

  § 3.  Qitiusumik ilinniarfik tassaavoq ilinniartitaanernik ingerlatsivik, inuussutissarsiutinut ilinniartitsiviusoq, ulluinnarnilu forstanderimit aqunneqartoq, Namminersorlutik Oqartussani suliassaqarfimmut akisussaasumut nalunaartartumit.

 

Kapitali 2

Inuussutissarsiutinik ilinniartitsinerup aqunneqarnera

 

Siunnersuisoqatigiit aamma ataatsimiititaliat

 

  § 4.  Naalakkersuisut pisariaqartitsineq naapertorlugu siunnersuisoqatigiinnik ataatsimiititalianillu pilersitsisinnaapput, inuussutissarsiutinik ilinniartitsinermut tamatumunngalu atatillugu suliffissaqartitsiffinni inuussutissarsiutitigullu ineriartornermut tunngasunik suliaqartartussanik. Naalakkersuisut aalajangiussinnaavaat ataatsimiititaliaq Inatsisartut inatsisaat naapertorlugu aalajangiisinnaatitaassasoq apeqqutini aalajangersimasuni.

  Imm. 2.  Naalakkersuisut siunnersuisoqatigiit ataatsimiititaliallu siunertaat, suliassaat, katitigaaneri, piffissap atuuffiusussap sivisussusissaa, akissarsiassaat, allaffeqarfimmiit sullinneqarnissaat suleriaasissaallu pillugit malittarisassiorsinnaapput.

 

Pilersitsineq, aaqqissuussineq aamma ilinniakkanik atorunnaarsitsineq

 

  § 5.  Naalakkersuisut ilinniakkanik nutaanik pilersitsisinnaapput ilinniakkanillu atorunnaarsitsisinnaallutik.

  Imm. 2.  Aammattaaq Naalakkersuisut qitiusumik ilinniarfiit ilinniartitsinermut pilersaarutaat akuersissutigisassavaat, ilinniartitsinermut pilersaarummik akuersissutigineqarsimasumik utertitsisinnaallutik, pisussaaffiliisinnaallutik qitiusumik ilinniarfimmut ilinniartitsinermut pilersaarutinik suliaqarnissamik, imaluunniit ilinniartitsinermi pilersaarummik pioreersumik allannguuteqartitsinissamik.

  Imm. 3.  Naalakkersuisut imm. 1 aamma 2-mi pissutsit, tassunga ilanngullugit ilinniartitsisut piginnaasarisariaqagaat, pillugit malittarisassanik aalajangersaasinnaapput.

 

  § 6.  Naalakkersuisut ilinniakkat pillugit nalinginnaasunik aalajangersaasinnaapput, tamatumani aamma ilinniartitaanerit ataasiakkaat pillugit, aamma ilinniartitaanernik atorunnaarsitsisarnernut.

 

Nakkutilliineq

 

  § 7.  Naalakkersuisut ilinniakkat ilinniartitsinerillu nakkutigissavaat, Inatsisartut inatsisaat manna, malittarisassallu taanna malillugu aalajangersarneqartut naapertorlugit.

 

Kapitali 3

Ilinniartitaanernut isersinnaaneq aamma tiguneqartarneq

 

  § 8.  Inuussutissarsiutinik ilinnialernissamut piumasaqaatit ilinniarfiit ilinniartitsinermut pilersaarusiaanni aalajangersarneqassapput, taamaattoq tak. imm. 2-5.

  Imm. 2.  Kinaluunniit akuerisaasumik inuussutissarsiummik ilinnialernissamut piareersaataasumik, naammaginartumik angusaqarluni ingerlatsisimasoq, tunngaviusumik inuussutissarsiummik ilinnialersinnaavoq, taamaattoq tak. imm. 3 aamma § 11.

  Imm. 3. Inuussutissarsiutinut tunngaviusumik ilinniartitsinernut tiguneqartarnermi piumasaqaataavoq qinnuteqartup tiguneqannginnermi ilinniartutut (lærlingitut) ilinniagaqarnissamut isumaqatigiissuteqarsimanissaa atsiukkamik imaluunniit ilinniagaqarnissamut isumaqatigiissuteqarsimanissaa piumasaqaataavoq, taamaattoq tak. § 9.

  Imm. 4.  Naalakkersuisut aalajangersagaliorsinnaapput ilinniagaqartut ilinniakkamut isernissamut pikkorissarnermik immikkut ittumik angusillutik naammassisaqarsimanissaannik inuussutissarsiutinut ilinniakkami tunngaviusumi aallartissinnaanissamut imaluunniit ingerlaqqissinnaanissamut.

  Imm. 5.  Ilinniartut qanoq piginnaasaqareerlutik toqqaannartumik inuussutissarsiummik ilinnialersinnaanerat pillugu malittarisassanik Naalakkersuisut aalajangersaasinnaapput.

  Imm. 6.  Naalakkersuisut inuussutissarsiutinik ilinniakkani allani ilinnialernissamut piumasaqaatit pillugit malittarisassanik aalajangersaasinnaapput.

 

  § 9.  Qitiusumik ilinniarfiit inuussutissarsiutinik ilinniartitsinerni tunngaviusumik ilinniakkanut qinnuteqartut ilinniartussatut tigusassavaat, lærlingitut isumaqatigiissuteqarnissamik piumasaqaat imaluunniit ilinniagaqarnissamik isumaqatigiissut naammassineqarsimanngikkaluarpalluunniit, tak. § 8, imm. 3, naammassineqarsimanngikkaluartoq, imaappat:

1)  sungiusaammik ilinniartitaaneq ilinniarfimmi namminermi ingerlasussaappat, tak. § 13, imaluunniit:

2)  Naalakkersuisut akuersissutigisimappassuk ilinniagassanik pilersaarummi ilinniakkamut pineqartumut atatillugu, tak. § 5, imm. 2, aamma § 36, imm. 1, aalajangersagaappat ilinniakkamut qinnuteqartunik tigusaqartoqarsinnaasoq, naak qinnuteqartoq lærlingitut isumaqatigiissuteqanngikkaluartoq imaluunniit ilinniagaqarnissamut isumaqatigiissuteqanngikkaluartoq piffissami tiguneqarfiusumi.

  Imm. 2.  Naalakkersuisut aalajangersagaliorsinnaapput piumasaqaasiorsinnaallutillu ilinniartitaanermut pilersaarummik akuersissuteqartarnermut tunngatillugu, siumoortumik piumasaqaateqartoqassanngitsillugu lærlingitut isumaqatigiissuteqareernissamik imaluunniit ilinniagaqarnissamut isumaqatigiissuteqarnissamik, matumani aamma akuersissuteqarnermi aallaaviusarmat sungiusaammik suliffissamik isumaqatigiissuteqareersimaneq, kingusinnerusukkut ilinniagaqarnerup ingerlanerani sungiusaammik sulinissamut, imaluunniit allatut aaqqissuussamik ilinniagaqartut tiguneqarsimasut assingusumik ingerlatsinissaannut tunngatillugu, assersuutigalugu ilinniarfimmi namminermi sungiusaammik sulinissamik.

 

  § 10.  Qitiusumik ilinniarfiit, inuussutissarsiutinik ilinniartitsinerit neqeroorutigisamik iluanni pisussaaffigaat, qinnuteqartut akuerisaanissamut piumasaqaatinik, tak. §§ 8 aamma 9 piviusunngortitsisut tamaasa ilinniartunngortissallugit, imaluunniit isumagissallugu qitiusumik ilinniarfimmi allami assinganik ilinniartitsiffiusumi ilinniartunngortinneqarnissat, taamaattoq tak. § 11.

  Imm. 2.  Naalakkersuisut makku pillugit malittarisassaliorsinnaapput

1)  ilinniarfiit akunnerminni suleqatigiinnerat,

2)  ilinniarfinni ataasiakkaani ilinniakkat neqeroorutigineqarsinnaasut, aamma

3)  ilinniarfiit arlallit assigiinnik ilinniagaqarfiusut akornanni ilinniartut agguaanneqarnerat.

 

  § 11.  Naalakkersuisut suliffissaqartitsiniarnermi periarfissat imaluunniit inissaqartitsinikkut immikkut ittumik ajornartorsiutit tunngavigalugit, ilinniakkanut ataasiakkaanut ilinniartunngortitsisinnaanermik killiliisunik malittarisassaliorsinnaapput.

 

Kapitali 4

Ilinniakkat neqeroorutaasut ilusaat

 

  § 12.  Naalakkersuisut akuerisinnaavaat inuussutissarsiutinik ilinniartitsinerit ilinniarfinni suliffeqarfinnilu allani ingerlanneqartarnissaat.

 

  § 13.  Aaqqissuussisoqarsinnaavoq sungiusarluni sulinerit ilinniarfimmi ingerlanneqartussanngorlugit.

  Imm. 2.  Naalakkersuisut ersarinnerusunik malittarisassiorsinnaapput ilinniarfimmi sungiusaammik sulisarnermut, tak. imm. 1.

 

  § 14.  Naalakkersuisut makkua pillugit malittarisassiorsinnaapput:

1)  ilinniakkani ataasiakkaani ilinniartitsinermut pilersaarummut sinaakkutissat, tassunga ilanngullugit ilinniarnerup sivisussusia, ilusaa, atuartitsissutit katitigaanerat assersuutigalugu tunngaviusumik atuartitsissutinut, atuartitsissutinut suliamut tunngasunut immikkullu atuartitsissutinut il. il. naleqqiullugit, ilinniartunngorsinnaasut amerlassusissaat, sungiusarluni sulinermut atatillugu suliffeqarfinnit piumasaqaatit, nalilersuinermut pilersaarutit, suliffeqarfinni ilinniartitsineq, suliffeqarfinnik akuersisarneq aamma

2)  ilinniarfimmiilluni sungiusarlunilu sulilluni ilinniarnerit agguaannerat, aamma inuit immikkut ilinniakkatigut sulinikkullu piginnaaneqareersut, ilinniakkat immikkoortuisa ilaannit sivikillisaanneqarsinnaanerat pillugu malittarisassat.

 

  § 15.  Naalakkersuisut suliat imminnut assingusut iluanni ilinniakkat ataatsimoortissinnaavaat.

  Imm. 2.  Ilinniakkami ilaasinnaapput faginik ilinniagassat imminnut qanittut arlaqartut.

 

  § 16.  Ilinniakkat ataasiakkaat suliaasartunut ingerlanneqartartunullu naleqqiullugu tamatigoorluartumik aaqqissuunneqassapput, ilinniaqqinnissamut tunngavissaqarnissaq siunertaralugu, tassunga ilanngullugu ingerlaqqiffiusumik ilinniaqqissinnaanissaq.

 

  § 17.  Naalakkersuisut tapertaliussatut pikkorissartitsisarnernut aaqqissuussinerit akuersissutigisinnaavaat, ilinniagaqartut inuussutissarsiutinik ilinniartitaanernut allanut ikaarsaarnissanut atasunik aaqqissuussaasartut, aallartikkaluakkamut suliffigisimasamulluunniit taartaasussat.

 

  § 18.  Ilinniarfimmiinneq akeqanngilaq, taamaattoq tak. imm. 3-4 aamma § 19.

  Imm. 2.  Ilinniartitsinermut atortut nalinginnaasut ilinniartitsinermullu pisariaqartut, qitiusumik ilinniarfinnit aamma inuussutissarsiutinik ilinniarfinnit akeqanngitsumik ilinniartunut atugassanngortinneqassapput, taamaattoq tak. imm. 3.

  Imm. 3.  Naalakkersuisut aalajangersinnaavaat ilinniartut killilimmik namminneerlutik ilinniartitsinermi atortussanik piniartarsinnaanerat.

  Imm. 4.  Inuussutissarsiutit sammiviata § 12 naapertorlugu inuussutissarsiutinik ilinniartitsinernik neqerooruteqartup, imm. 1-3-mi aalajangersakkat apeqqutaatinnagit, ilinniarnermut peqataaneq il.il. akiligassiissutigisinnaavaat. Tamannali taamaallaat atuuppoq, ilinniarfik, tak. § 12 qitiusumik ilinniarfiit akuerisaasut allat assinganik Namminersorlutik Oqartussanit tapiiffigineqartanngippat.

 

  § 19.  Naalakkersuisut § 18-imi aalajangersakkat apeqqutaatinnagit immikkut pisoqartillugu akuerisinnaavaat, aningaasartuutit namminersortut aningaasaliussaannit ilaatigut akilerneqassasut.

  Imm. 2.  Naalakkersuisut aningaasartuuteqartarnerit pillugit malittarisassanik erseqqinnerusunik aalajangersaasinnaapput.

 

Kapitali 5

Ilinniakkat imarisaat

 

Ataatsimut aalajangersakkat

 

  § 20.  Ilinniakkat imarisaat, § 1, imm. 2-mi siunertat taaneqartut aamma malittarisassat § 5, imm. 3 aamma § 6, tunngavigalugit aalajangersarneqartut mianeralugit aaqqissuunneqassapput, sungiusarluni sulineq ilinniarfimmilu ilinniarnerit ataqatigiittunngorlugit.

  Imm. 2.  Ilinniakkat imarisaat suliffeqarfiit maanna siunissamilu pisinnaasariaqartutigut pisariaqartitaannut naapertuutissapput.

  Imm. 3.  Ilinniakkat imarisaat ilinniartut inuussutissarsiummi suliamut tunngasutigut, ilinniarnissamut piareersimassutsikkut inuttullu piginnaasaannik inerisaaqataassapput, suliffeqarfiit pisariaqartitaannut, suliamut tunngatillugu nikeriarsinnaassuseqarnermut aamma ilinniartup atuagarsornikkut suliamullu tunngasutigut pisariaqartitaanut naleqqiullugit. Aammattaaq ilinniakkat imarisamikkut ilinniartup nammineerluni isummersinnaanissaanut, suleqateqarnissaanut attaveqaateqarsinnaanissaanullu peqataassapput aamma suliamut tunngasutigut inooqatigiissutsikkullu ajornartorsiutinik qaangiiniarsinnaassuseqarnermik, aallarnisaasinnaassuseqarnermik, eqaassuseqassutsimik aamma pitsaassutsimik malussarsinnaassuseqarnermik siuarsaassallutik.

  Imm. 4.  Naalakkersuisut imm. 1-3-mi pissutsit pillugit malittarisassanik erseqqinnerusunik aalajangersaasinnaapput.

 

  § 21.  Ilinniakkat ersarinnerusumik imarisaat ilinniartitsinermut pilersaarusiaanni ersissapput.

 

Ilinniarfimmi ilinniarneq

 

  § 22.  Ilinniarfimmiilluni ilinniarnerup ingerlanerani tamarmi ilinniarneq ataatsimoortumik isiginneriaaseqarluni tigussaasunik atuagarsornernillu ilaqartinneqassaaq, ilinniartut nalinginnaasunik immikkullu ittunik piginnaanngorsarnissaat siunertaralugu, tamatumunnga ilanngullugit:

1)  ilinniartut sulianik, ilinniakkat siunnerfigisaannik, isumaginninnissamut tunngavississallugit, tassungalu atatillugu teknologii naapertuuttoq pillugu pisariaqartutigut ilisimasaqalersissallugit atuisinnaalersissallugillu,

2)  ilinniartut namminneerlutik aamma ilinniaqqinnerit ilinniagaqaqqinnerillu aqqutigalugit piginnaasaminnik annertusaanissaannut tunngavississallugit, tassunga ilanngullugit ilinniagaqaqqinnissamut tunngavissiinerit,

3)  ilinniartut inuttut inerikkiartornerannut peqataanissaq, aamma

4)  ilinniartut inuiaqatigiit ineriartornerallu pillugit paasinnilersissallugit, annermik suliffeqarfiit sulisullu nalinginnaasumik inuussutissarsiornikkut inuiaqatigiinnullu atatillugu inissisimanerat pillugu aamma suliffissaqartitsiniarnermi pissutsit suliffinnilu avatangiisinut tunngasut pillugit paasinnilersissallugit.

 

  § 23.  Ilinniartitsinerup aaqqissuunnerani sapinngisamik ilinniartut atugarisaat aallaavigineqassapput, anguniarneqassaarlu ilinniartut ataasiakkaat piginnaasaat aallaavigalugit ilinniartitsinissaq, ilinniartut piginnaariigaasa soqutigisaasalu aallaaviginerisa nassatarisaat.

  Imm. 2.  Qitiusumik Ilinniarfiit ilinniartunut ilinniakkamik inuussutissarsiummillu toqqaanissaq pillugu ilitsersorneqarnissamik neqerooruteqartassapput.

  Imm. 3.  Tamanna pillugu Naalakkersuisut malittarisassanik erseqqinnerusunik aalajangersaasinnaapput, pissutsini imm. 1 aamma 2-mi eqqaaneqartuni.

 

  § 24.  Ilinniartitsineq pingaarnertut tunngaviusumik aaqqissuunneqartassaaq ilinniarfimmiinnermi siullermi imaluunniit ilinniarfinniinnerni siullerni qulequttat ilinniakkani tamani ataatsimoorussaasut ilaatinneqarlutik, taamaalillunilu ilinniarfimmiinnerit sinnerini suliamut atatillugu immikkut sammivinnut piginnaanngorsarneq ingerlanneqartarluni.

 

  § 25.  Naalakkersuisut malittarisassiorsinnaapput makkunnga tunngasuni:

1)  atuartitsissutit siunertaat,

2)  imarisaat,

3)  ilinniarnermut ilitsersuutaasunik piffissaliussaasunut, aamma

4)  naliliinermi piumasaqaataasussat pillugit malittarisassanik.

 

  § 26.  Atuartitsissutinut tunngaviusunut ilaassapput tigussaasunik atuagarsorlunilu ilinniartitsineq, inuussutissarsiutinik ilinniartitsinernit suliamut tunngasutigut tamatigoortuunissamut peqataatitsiviusut. Ilutigisaanik tunngaviusumik atuartitsissutit siunertarissavaat inuttut inerikkiartornerup siuarsarnissaa, ilinniarnermik piginnaanngorsaaqataanissaq aamma inuiaqatigiinnik inuiaqatigiillu ineriartornerannik paasititsinissaq.

  Imm. 2.  Suliamut atatillugu atuartitsissutinut ilaassapput tigussaasumik atuagarsorlunilu ilinniartitsineq, ilinniakkamut pineqartumut immikkut attuumassutilik, nalinginnaasumik immikkuullarissumillu ilinniartumik piginnaaneqalersitsiffiusoq.

  Imm. 3.  Atuartitsissutinut immikkut ittunut ilaassapput inuussutissarsiummik ilinniarnermi suliamut tunngatillugu killiffimmi qaffasinnerpaami tigussaasumik atuagarsorlunilu ilinniartitsinerit, ilinniakkami immikkuullarissutaasut, ilinniartullu inuussutissarsiummi immikkut ittumik piginnaaneqalissutigisai. Ilinniartut atuartitsissutinik immikkut ittunik, ilinniakkami pineqartumi akuerisaasut akornanniittunik, toqqaasassapput.

 

  § 27.  Atuartitsissutit toqqagassat ilinniartup soqutigisaanut naapertuutissapput.

  Imm. 2.  Ajornartinnagu atuartitsissutit ilinniagaqaqqinnissamut aamma ilinniagaqaqqiffinni ilinnialernissamut pingaaruteqartut neqeroorutigineqassapput, taamaattoq tak. imm. 3.

  Imm. 3.  Atuartitsissutit toqqagassat ilinniakkap nalinginnaasumik killiffianut nallersuussinnaasut neqeroorutigineqarsinnaapput, sumiiffinni aalajangersimasuni piginnaasatigut pisariaqartitsinerit suliffissatullu periarfissat eqqarsaatigalugit.

 

Sungiusarluni sulilluni ilinniarneq

 

  § 28.  Lærlingit sungiusarlutik sulinerat suliffeqarfimmi arlalinniluunniit pissaaq, sungiusaammik suliffissanik ataqatigiissaarinermik aaqqissuussisartut inassuteqarnerisigut qitiusumik ilinniarfiup forstanderiani akuerisaasumi, tak. § 33, imm. 2, nr. 1.

  Imm. 2.  Tunngaviusumik inuussutissarsiutinik ilinniartitsinermi ilinniartoq suliffeqarfillu lærlingitut imaluunniit ilinniartinneqarnissamik isumaqatigiissummik atsioqatigiissapput.

Inuussutissarsiutinik ilinniartitsinerni allani sungiusarluni sulinissamik isumaqatigiittoqassaaq, sungiusarluni sulisarnissat ilinniarnermut ilaappata.

  Imm. 3.  Sungiusarluni sulineq tamarmi ilaaluunniit atuaatigaluni sungiusarnertut pisinnaavoq, tak. § 13, ilinniagaqartup sungiusaammik suliffissatut innersuunneqartoq itigartissimanngippagu, tamatumani aamma illoqarfimmi allami ilinniartup aalajangersimasumik najugaqarfiginngisaani.

  Imm. 4.  Naalakkersuisut qinnuteqartoqarneratigut imm. 3-miittumi piumasaqaatip sanioqqunneqarsinnaaneranik akuersissuteqarsinnaapput, inuttut inuunermut immikkut ittumik atugassarititaasunik uppernarsarneqartunillu isumaginnittoqarfimmiit tamanna pillugu tunngaveqartumik, aamma ilinniagaqartumut namminermut tutsinneqarsinnaanngitsunik pissuteqartunik ilinniagaqartup sungiusaammik suliffissatut innersuunneqartoq tigusinnaanngippagu. 

  Imm. 5.  Qitiusumik ilinniarfimmi forstanderip sungiusaammik suliffissanik ataqatigiissaarinermik aaqqissuussisartut inassuteqarnerisigut, tak. § 33, imm. 2, nr. 3, aalajangertassavaa sungiusaammik suliaqarneq nunani allani sulinikkut pisoq imm. 1 aamma 2 naapertorlugit sanilliunneqarsinnaanersoq sungiusaammik sulinertut nalinginnaasutut.

 

  § 29.  Sungiusaammik ilinniakkamut atatillugu suliffeqarneq inuussutissarsiutinut ilinniarfinnut atasumik ingerlanneqartassaaq nalinginnaasumik sungiusaammik sulisarnermut pilersaarutaasut qitiusumik ilinniarfiup forstanderianut akuerisaasut naapertorlugit, tak. § 33, imm. 2, nr. 2.

 

  § 30.  Sungiusarluni sulinermut pilersaarutini allassimassapput ilinniakkap anguniagai, taakkualu tunngavigalugit suliffissat suliassallu sungiusarluni sulinerup ilagisassai allaaserineqarlutik.

  Imm. 2.  Sungiusarluni sulinermut pilersaarutit imaqartinneqassapput, ilinniarfimmiilluni ilinniarneq sungiusarlunilu sulineq siunertamut naapertuuttumik tapertariissinnaanngorlugit. Taakku ilinniarfiup, ilinniartup suliffeqarfiullu akornanni attaveqatigiittarneq pillugu malittarisassanik imaqassapput.

 

Ilinniartunik naliliinerit, misilitsinnerit aamma svendinngussalluni misilitsinnerit

 

  § 31.  Ilinniartut ilinniakkap naammassineranut uppernarsaammik pissapput, tassunga ilanngullugit ilinniarfimmiilluni ilinniarsimaneq naammassisaq aamma sungiusarluni sulilluni ilinniarneq naammassisaq pillugit uppernarsaatit. Ilinniartut ilinniarnerminnik unitsitsisut, ilinniakkap ilaanut naammassisaminnut uppernarsaammik pinissartik pisinnaatitaaffigaat.

  Imm. 2.  Ilinniakkani ataasiakkaani ilinniartut soraarummeertarnerat aamma ilinniarnerup ingerlanerani nalilerneqartarnerat pisassaaq, naliliinissamik pilersaarut naapertorlugu, ilinniartitaanermut pilersaarummi, tak. § 5, imm.2. Qitiusumik ilinniarfeqarfiit malittarisassaanni svendinngussalluni misilitsissinnaaneq naliliinissamik pilersaarummi allassimavoq.

  Imm. 3.  Qitiusumik ilinniarfimmi forstanderip aalajangersinnaavaa ilinniakkamut atatillugu sungiusaammik suliffeqarneq naggaserneqassasoq svende-tut misilitsinnermik, tak. § 33, imm. 2, nr. 4.

  Imm. 4.  Naalakkersuisut ersarinnerusunik maleruagassiorsinnaapput nalilersuisarnermik pilersaarusiortarnermut nalinginnaasumut aamma uppernarsaatinut malittarisassanik, matumani aamma uppernarsaatit qanoq iluseqarnissaannik tunniunneqartarnissaannillu.

  Imm. 5.  Naalakkersuisut soraarummeernerit aamma misilitsinnerit pillugit malittarisassaliorsinnaapput, taakkununnga ilaatigut ilanngullugit suliassiissutinik suliaqarneq, naliliinerit, censoreqarnermut, soraarummeertut kikkuunerinik aalajangiinerit, tamanut ammasuutitsinissaq, karakteerit taakkulu soraarummeernerni angusani oqimaaqatigiissinnerat, soraarummeernermut uppernarsaatinut, soraarummeernermut peqataassagaanni piumasaqaatit, soraarummeernissamut peqataasinnaannginneq, soraarummeernissamut pilersaarusiornerit, ikiuutissanik atortoqarneq, napparsimalluni soraarummeerneq, soraarummeeqqinnerit, soraarummeernermit peersitaanerit, maalaaruteqarneq imaluunniit maalaaruteqarnissamut piffissaliussat pillugit aalajangersakkat

 

Kapitali 6

Qitiusumik ilinniarfiit

 

Siunertaq suliassallu

 

  § 32.  Qitiusumik ilinniarfiit, tak. § 3, suliassaraat inuussutissarsiutinik ilinniartitsinernik neqerooruteqarnissaq, tak. § 2, siunertat § 1-imi taaneqartut aallaavigalugit, aamma inuussutissarsiutitigut suliffissaqartitsiniarnikkullu politikkeqarnermut atatillugu ilinniartitsinertigut suliniutinik inerisaanermut peqataanissaq.

  Imm. 2.  Aammattaaq qitiusumik ilinniarfiit, Naalakkersuisut akuersereernerisigut, ilinniarnertuunngorniarluni ilinniakkanik neqerooruteqarsinnaapput, tamanna pillugu malittarisassat atuuttut naapertorlugit.

  Imm. 3.  Aammattaaq qitiusumik ilinniarfiit siunertaannut ilaapput ilinniartitsinermut atatillugu allaffissornikkut suliassat erseqqinnerusumik aalajangersaaffigineqartut suliarinissaat.

  Imm. 4.  Aammattaaq qitiusumik ilinniarfiit Naalakkersuisut akuersereernerisigut ilinniartunut inissaqartitsinermik ingerlatsisinnaapput, ilinniartunut inissiat pillugit Inatsisartut inatsisaat naapertorlugu.

 

  § 33.  Qitiusumik ilinniarfikkaartumik sungiusaammik sulisitsisarnermut ataqatigiissaarinermik ingerlatsinermik pilersitsisoqassaaq, orniguttarnikkut sungiusaammik suliffissanik pilersitsiortorfiusumik.

  Imm. 2.  Qitiusumik ilinniarfiup forstanderiata sungiusaammik sulisitsisarnermut ataqatigiissaarinermik ingerlatsinermiit inassuteqaatinik tunngaveqartumik aalajangiiffigisassavai:

1)  suliffeqarfiit sungiusaammik ingerlatsiviusussat akuerineqartarneri, tak. § 28, imm. 1,

2)  akuersissutigisassavai sungiusaammik sulinermik ilinniartitsinermi pilersaarusiat, tak. § 29, imm. 1,

3)  nunani allani sulisinnaaneq akuersissutigisassallugu, tak. § 28, imm. 5,

4)  inaarutaasumik soraarummeersitsisarnerit – svendeprøve ingerlattassallugit, tak. § 31, imm. 3,

5)  ilinniagaqartut sungiussaammik sulinermi ilinniartitaanerup ilaanik ingerlatsinnginnissaannik akuersissuteqartarneq.

6)  isumaqatigiissup akuerineqarnera, piffissaq ilinniakkap sivisussusaa piffissamit peqanngiffigisimasamit sivisunerusumik sivitsorneqarpat, tak. § 48, imm. 2, aamma

7)  Ilinniartup suliffeqarfiullu akornanni isumaqatigiinngissimasoqartillu piffissap ilinniagaqarfiusup sivitsornissaa, tak. § 48, imm. 3.

 

  § 34.  Qitiusumik ilinniarfiit ilinniartitsinernut atasumik, tak. § 32, imm. 1, allanik suliaqarsinnaapput, ilinniarfiup inuussutissarsiutinik ilinniartitsinermut atasumik, suliamut tunngatillugu sammisaasartunik immikkut ilisimasaasa atorluarnissaat siunertaralugu, tassunga ilanngullugu siunnersuinernik sullissinernillu allanik akilerneqartussanik neqerooruteqarneq.

  Imm. 2.  Qitiusumik ilinniarfiit allatigut ingerlatsinerat unammilleqatigiinnermi atugassarititaasartut naapertorlugit ingerlanneqassaaq. Qitiusumik ilinniarfiit pikkorissaanernik ingerlatanillu allanik isertitsiffiusussatut neqerooruteqarnerminni, nittarsaassinermi pissuserissaarnertut ileqquusut malissavaat, allanillu akitigut unammillernermik kusananngitsumik atugaqalersitsissanatik.

  Imm. 3.  Naalakkersuisut qitiusumik ilinniarfiit allatigut ingerlatsinerat pillugu malittarisassanik aalajangersaasinnaapput, tamatumunnga ilanngullugit allatigut ingerlatsinissamut killilersuutit amerlanerit.

 

  § 35.  Naalakkersuisut atorfinitsittarlugulu soraarsittarpaat qitiusumik ilinniarfimmi forstanderi.

  Imm. 2.  Qitiusumik ilinniarfimmi forstanderi inuussutissarsiutinik naleqquttunik aamma ilinniakkanik naleqquttunik tunuliaqutaqassaaq.

  Imm. 3.  Qitiusumik ilinniarfiup forstanderiata ulluinnarni ilinniartitsineq perorsaanermullu tunngasut akisussaaffigai aammalu ulluinnarni ilinniarfimmi allaffissornikkut aningaasaqarnikkullu aqutsineq isumagissallugu.

  Imm. 4.  Qitiusumik ilinniarfiup forstanderiata nakkutigissavaa:

1)  ilinniakkat malittarisassat atuuttut naapertorlugit ingerlanneqarnerat.

2)  ilinniartitsinermi pissutsit isumannaatsuunissaat.

3)  ilinniarfiup aningaasartuutissanut missingersuusiaasa eqqortillugit malinneqarnissaat.

4)  ilinniarfiup allatigut ingerlatsinerata siulersuisut aalajangiussaat tunaartarisassiaallu naapertorlugit pinera.

5)  sungiusaammik suliffissanut atatillugu aaqqissuussinerup suliassani § 30 naapertorlugu ingerlatsinera.

  Imm. 5.  Qitiusumik ilinniarfiup forstanderia ilinniarfiup sulisuinik atorfinitsitsisuullunilu soraarsitsisarpoq, tassunga ilanngullugit ilinniarfiup pisortai allat.

 

  § 36.  Qitiusumik ilinniarfiup forstanderiata susassaqartunik naleqquttunik isumasioreernikkut ilinniartitaanernut pilersaarutit ilinniakkanut tamanut tunngasut siunnersuusiortassavai.

  Imm. 2.  Pissutsit § 33, imm. 2-mi eqqaaneqareersut saniatigut qitiusumik ilinniarfiup forstanderiata tamanna pillugu makkua aalajangiiffigisassavai:

1)  qitiusumik ilinniarfiup piginnaanngorsarfiusuinik ilinniartitaanernik neqeroorutai, aamma ilinniartitaanernut sammisunik suliniutissai, kiisalu suliatigut aningaasanik isaatitsissutaasartutigut ingerlatassat, naleqquttunillu allatigut ingerlatassat aamma

2)  ilinniariikkanik ilinniakkamut allamut nuutsisinnaanerit akuerisarneri imaluunniit piffissap ilinniagaqarfiusussap sivitsorneqarnissaa, aamma ilinniartut ilinniarfimmi ilinniartitaanerup ilaani peqataannginnissaasa akuerisarnera allatigut ilinniagaqarnermik tunngaveqartumik.

 

Qitiusumik ilinniarfiit aningaasalersugaanerat

 

  § 37.  Qitiusumik ilinniarfiit ingerlatsinerat Nunatta karsia aqqutigalugu tapiissutitigut aamma allatigut ingerlatsinermit isertitatigut aningaasalersorneqassaaq, isertitaqarfiusumik ingerlatsinerit ilanngullugit.

  Imm. 2.  Nunatta karsianit ukiumoortumik tapiissutit, ukiumut aningaasaliiffiusumut tullermut aningaasanut inatsisip akuersissutigineqarneranut atatillugu Inatsisartut aalajangertassavaat.

 

Kapitali 7

Sungiusaammik suliffiit

 

  § 38.  Sungiusaammik suliffissat qitiusumik ilinniarfinniit isumagineqartarput, tak. § 33, imm. 1. 

  Imm. 2.  Naalakkersuisut malittarisassiorsinnaapput aaqqissuussisarnernut suleqatigiinnernik aamma paasissutissiisarnernik, siunnerfigalugu sungiusaammik suliffissanik naammattunik peqalernissaa.

 

  § 39.  Sungiusaammik suliffissat pillugit ataqatigiissaarinermik aaqqissuussinerup forstanderimut inassuteqaatai, tak. § 33, imm. 2, nr. 1, suliffeqarfimmik sungiusaammik suliffissatut akuersissuteqartarneq pillugu, ingerlanneqartarpoq naliliinernik tunngaveqartumik, suliffeqarfiup sungiusaammik ilinniakkamut atatillugu sulisitsinermik naammassinnissinnaaneranik nalileereernermik, sungiussaammut sulinissamut pilersaarusiaasut naapertorlugit aaqqissuussaasumik, § 29, tunngavigalugu aalajangersagaasunik, aammalu suliffeqarfiup naammaginartumik ilinniartunik ilinniartitsisinnaaneranik tunngaveqartunik.

  Imm. 2.  Naalakkersuisut malittarisassiorsinnaapput akuersissutinik suliaqartarnermut tunngatillugu, tamatumani aamma malittarisassanik suliat ingerlattarneranni piffissalersuinernut tunngatillugu.

  Imm. 3.  Naalakkersuisut immikkut ilisimasalimmit inassuteqaammik tunngaveqartumik ilinniakkanut atatillugu sungiusaammik suliffissanik qitiusumik ilinniarfimmut atasuunngitsuni akuersissuteqarsinnaapput.

 

  § 40.  § 33, imm. 2, nr. 1, aamma § 28, imm 1, naapertorlugit suliffeqarfiup sungiusaammik suliffittut akuerineqarsinnaannginneranik aalajangiinerit, Naalakkersuisunut saqqummiunneqarsinnaapput.

 

Kapitali 8

Ilinniartunut inatsisitigut atugassarititaasut

 

  § 41.  Tunngaviusumik inuussutissarsiummik ilinniagaq naammassineqassappat piumasaavoq, ilinniartup aamma suliffeqarfiup ataatsip amerlanerilluunniit akornanni lærlingitut imaluunniit ilinniagaqarnissamut isumaqatigiissuteqartoqarsimanissaa, tak. taamaattoq imm. 6 aamma § 13.

  Imm. 2.  Lærlingitut isumaqatigiissut imaluunniit ilinniagaqarnissamik isumaqatigiissummi ilaassapput ilinniakkami sungiusarluni sulinissat ilinniarfimmiittarnissallu tamarmik, tassunga ilanngullugit svendinngussalluni misilitsinnerujunnartut. Naalakkersuisut tamatumunnga qitiusumik ilinniarfimmiit qinnuteqartoqarneranik tunngaveqartumik immikkut akuersissuteqarsinnaapput, ilinniarfik sungiusaammik sulisitsinissamut pisariaqartunik atortulersugaappat, uppernarsarneqarsinnaappallu ilinniagaqartoq sungiusaammik sulinermik ilinniarfimmi namminermi ingerlatsisinnaasoq.

  Imm. 3.  Ilinniartut ilinniarfimmi ilinniagaqarnissamut isumaqatigiissuteqanngitsut, tamatumani aamma ilinniarfimmi namminermi sungiusaammik sulinissamut, isigineqassapput inuussutissarsiutinut ilinniartitaanerni tunngaviusunik ilinniagaqartutut, sulisitsisumiit akissarsiaqartinneqanngitsutut.

  Imm. 4.  Suliffeqarfiit arlallit isumaqatigiissummut peqataappata, isumaqatigiissummi ersissaaq, ilinniarfimmiinnerit sungiusarlunilu sulinerit suut suliffeqarfiit ataasiakkaat peqataaffigineraat.

  Imm. 5.  Suliffeqarfik isumaqatigiissuteqarnikkut imminut pisussaaffilersinnaavoq ilinniartup ilinniarnerata ilaa suliffeqarfimmi allami ingerlanneqarsinnaasoq, imaluunniit ilinniarfimmi sungiusaammik sulinertut ingerlanneqarsinnaasoq.

  Imm. 6.  Inuussutissarsiutinik ilinniartitsinerit Naalakkersuisunit akuerisaasut, lærlingitut ilinniartinneqarnissamilluunniit isumaqatigiissuteqarnissamik piumasaqaateqarfiunngitsut aamma atuaatigaluni sungiusarluni sulineq, imm. 1-5-imi ilaatinneqanngillat.

 

  § 42.  Ilinniarnerup naammassinissaanut piumasaqaataavoq, ilinniartup ilinniarfimmi ilinniartitsinermut peqataanissaa, ilinniarfiup pineqartup, ilinniarnermut malittarisassat naapertorlugit aalajangersagai malillugit.

  Imm. 2.  Naalakkersuisut ilinniartunik ilinniarfimmut aggersaanermi periusissat pillugit malittarisassanik aalajangersaasinnaapput.

 

  § 43.  Ilinniartut ilinniarfimmi ilinniartitsinermut takkutinngitsoortut imaluunniit ilinniarfiup pissuserissaarnissamik malittarisassaanik annertuumik unioqqutitsisut, annikinnerusumik kinguneqartumik iliuuserineqarsinnaasut iluaqutaanngitsumik atorneqareersimappata, ilinniartitsinermut ilaatitaajunnaarsinneqarsinnaapput. Ilinniartitsinermut ilaatitaajunnaarnissaq ilinniarfiup forstanderianit taamaallaat aalajangerneqarsinnaavoq.

  Imm. 2.  Naalakkersuisut pissuserissaarnissamik, pinngitsoorani takkuttussaaneq aamma ilinniartitsinermut ilaatitaajunnaarsinnaaneq tamatumanilu suliat suliarineqartarnissaat pillugit malittarisassanik erseqqinnerusunik aalajangersaasinnaapput.

 

  § 44.  Lærlingitut aamma ilinniartinneqarnissamik isumaqatigiissutit allaganngorlugit suliaassaaq, kingusinnerpaamillu isumaqatigiissutip atuutilernerani atsiorneqarsimassallutik. Isumaqatigiissut atsiugassiami suliaareersimasumi - formularimi - qitiusumik ilinniarfinnik tusarniaareerluni Naalakkersuisunit akuerisaasumi isumaqatigiissutigineqassaaq.

  Imm. 2.  Naalakkersuisut akuersiteqqaartinnagit immersugassap isumaqatigiinnermut atatillugu imarisai allanngorneqarsinnaanngillat ilaneqarsinnaanatillu.

  Imm. 3.  Lærlingitut ilinniartinneqarnissamillu isumaqatigiissummi ilinniartup sungiusarluni sulinermi nalaani akissarsiat tigusartagassai allassimassapput.

  Imm. 4.  Naalakkersuisut lærlingitut ilinniartinneqarnissamillu isumaqatigiissutip imarisassai nalunaarsornissaalu pillugit malittarisassanik erseqqinnerusunik aalajangersaasinnaapput.

 

  § 45.  Inuussutissarsiummik ilinniartoq isumaqatigiissutit atuuttut naapertorlugit akissarsiaqarsinnaatitaavoq, ilinniartuunersiallu pillugit Inatsisartut inatsisaat naapertorlugu immikkut tapisiaqarsinnaatitaalluni. Sungiusarluni suliffik ataatsimoorluni isumaqatigiissusiorsimanermut ilaanngippat, ilinniartoq minnerpaamik pisortatigoortumik sulisitsisumi isumaqatigiissuteqarsimanermut ilaasumi ilinniartutut, akissarsiamigut atorfininnermigullu atugassaqartinneqassaaq.

  Imm. 2.  Naalakkersuisut aalajangersinnaavaat, tassungalu ilaatillugu malittarisassiorsinnaallugu, ilinniartup inuussutissarsiummik ilinniarnini tamaat ilaaniluunniit akissarsiaqarnermut taarsiullugu ilinniartuunersiaqarfigissagaa.

 

  § 46.  Piffissami isumaqatigiissuteqarfiusumi aalajangersakkat, ataatsimoorussamik isumaqatigiissuteqarnikkut imaluunniit inatsisitigut sulisut atorfinittarnerinut sulinermilu atugarisassaannut il.il. aalajangersarneqarsimasut atuutissapput, Inatsisartut inatsisaat manna naapertorlugu ilinniakkamut akerliunngikkunik.

  Imm. 2.  Sulisitsisup qaqutiguuissumik ilinniartoq ilinniarnissamik siunertaqanngikkaluamik suliakkersinnaavaa, aatsaallu taamaaliorsinnaalluni ilinniakkami anguniakkat anguneqarsinnaappata.

 

  § 47.  Ilinniartut siusinnerusukkut ilinniarsimanertik sulisimanertilluunniit pissutigalugu ilinniakkamut, lærlingitut imaluunniit ilinniartinneqarnissamik isumaqatigiissummi pineqartumut immikkut piginnaasaqareersut, qitiusumik ilinniarfimmi forstanderimit ilinniarnermut isumaqatigiissuteqarnermut atatillugu kingusinnerusukkulluunniit ilinniarnerup sivikillineqarnissaa pillugu aalajangiivigineqarsinnaapput.

 

  § 48.  Ilinniartoq suliffeqarfillu sungiusarluni sulinerup sivitsornissaanik isumaqatigiissuteqarsinnaapput, ilinniartoq

1)  napparsimaneq pissutigalugu suliffeqarfimmi ilinniarfissatut piffissaliussap 10 procentia sinnerlugu peqanngissimappat,

2)  tapertaliussaasumik atuarneq pissutigalugu suliffeqarfimmit peqanngissimappat,

3)  naartunermut, erninermut meeravissiartaarnermulluunniit atatillugu, tamanna pillugu inatsisit naapertorlugit sulinngiffeqarpat imaluunniit

4)  pissutsit immikkut ittut pissutigalugit piffissap ilaannaa sulisarpat sulinngiffeqarpalluunniit.

  Imm. 2.  Imm. 1 naapertorlugu piffissaq ilinniagaqarfiusoq sivisussusaa piffissamit peqanngiffigisimasamit sivisunerusumik sivitsorneqarpat, isumaqatigiissut aatsaat atuutissaaq qitiusumik ilinniarfimmi forstanderip tamatumunnga inassuteqartoqarneranik tunngaveqartumik, sungiusaammik suliffeqartitsisarnermut ataqatigiissaariffimmiit inassuteqaat akuerippagu.

  Imm. 3.  Qitiusumik ilinniarfimmi ilinniartup suliffeqarfiullu akornanni, piffissaq peqanngiffiusoq pissutigalugu imm. 1-imi taaneqartutut sivitsuinissaq isumaqatigiinngissutigippassuk qitiusumik ilinniarfimmi forstanderip sungiusaammik suliffeqartitsisarnermut ataqatigiissaariffimmiit tamatumunnga inassuteqaat tunngavigalugu, illuatungeriinniit piffissap ilinniagaqarfiusup sivisussusaa sivitsorsinnaavaa.

 

  § 49.  Pissutsit §§ 47-48-ini taaneqartut saniatigut qitiusumik ataatsimiititaliaa imaluunniit qitiusumik ilinniarfiup forstanderiata pissutsit immikkut ittut atuutsillugit piffissap ilinniagaqarfiusup sivikillinissaa aalajangiiffigisinnaavaa.

 

  § 50.  Lærlingitut aamma ilinniartinneqarnissamik isumaqatigiissutit isumaqatigiissuteqartunit atorunnaarsinneqarsinnaanngillat, taamaattoq tak. imm. 2 aamma § 51.

  Imm. 2.  Sungiusarluni sulinermi qaammatit siulliit 3 misiliiffittut isigineqassapput, taassumalu ingerlanerani illuatungeriit arlaata isumaqatigiissut atorunnaarsissinnaavaa - patsisitaliinngikkaluarluni siumoortumillu nalunaaqqaanngikkaluarluni. Ilinniarfimmiinnerit piffissamut misiliiffimmut ilaatinneqassanngillat.

  Imm. 3.  Ilinniartoq § 48, imm. 1-imi taaneqartunik peqquteqarluni sungiusarluni suliffimminit piffissami misiliiffimmi qaammat 1 sinnerlugu peqanngippat, piffissaq misiliiffik peqanngiffiup sivisoqataanik sivitsorneqassaaq.

 

  § 51.  Isumaqatigiissuteqartut arlaata pisussaaffini annertuumik sumiginnarpagit, aappaata isumaqatigiissut atorunnaarsissinnaavaa.

  Imm. 2.  Paasinarsippat isumaqatigiissuteqarnissamut piumasaqaataasoq piumasaqaataasulluunniit arlaqartut pingaarutilik eqqunngitsoq, kingusinnerusukkulluunniit atuukkunnaarpat, illuatungeriit isumaqatigiissummik atorunnaarsitsisinnaapput.

  Imm. 3.  Imm. 1 imaluunniit imm. 2 malillugu atorunnaarsitsineq pissaaq, illuatungeriinni atorunnaarsitsisup atorunnaarsitsinissamut pissutaasumik paasinninneraniit, imaluunniit nalinginnaasumik sissuernikkut paasinnissinnaagaluarneraniit qaammatip ataatsip qaangiutinnginnerani.

  Imm. 4.  Ilinniartup tapertaliussaasumik atuarnera atorunnaarsitsinermut peqqutigineqarsinnaanngilaq.

 

  § 52.  Ilinniartoq ilinniartitsinermit ilaatitaajunnaarpat, tak. § 43, imaluunniit ilinniartup soraarummeernerit misilitsinnerilluunniit pisariaqartut angusaqarfiginissaannut periarfissani atoreersimappagit, lærlingitut ilinniartinneqarnissamilluunniit isumaqatigiissut atorunnaassaaq.

 

  § 53.  Akerleriissuteqarneq ilinniartup aamma sungiussaammik suliffiusup akornanni suliassanngortinneqarsinnaavoq sungiusaammik suliffissaqartitsinermut ataqatigiissaarisunut, illuatungeriinnik isumaqatigiissitsiniartuusussamut.

  Imm. 2.  Akissarsiatigut atorfininnermilu atugassarititat ilinniartup sungiusaammik suliffiusullu akornanni suliassaraat, aammalu isumaqatigiissut atuuttoq naapertorlugu aalajangiiffigineqartassapput qitiusumik ilinniarfiup akuleruffiginngisaanik.

  Imm. 3.  Taarsiivigineqarnissamik piumasaqartoqassagaluarpat qitiusumik ilinniarfiup aalajangiineranut tunngatillugu, tamanna taamaallaat eqqartuussivinnit aalajangiivigineqarsinnaavoq.

 

  § 54.  Ilinniartut lærlingitut ilinniartinneqarnissamilluunniit isumaqatigiissummut ilaasumik ilinniarfimmiinnerminni sulisilluni ajoqusersinnaanermut sillimmasiisarneq pillugu aaqqissuussinermut, Kalaallit Nunaanni sulisilluni ajoqusersinnaanermut isumannaarineq pillugu inatsisip atortuulersinneqarneranik peqqussut naapertorlugu sungiusarluni sulinermut atuuttumut ilaapput.

  Imm. 2.  Ilinniartunut atuaatigalutik sungiusartillutik imaluunniit imm. 1-imi taaneqartut avataatigut ilinniarfimmiitillutik ajoqusertunut, Kalaallit Nunaanni sulisilluni ajoqusersinnaanermut isumannaarineq pillugu inatsit assinganik atuutissaaq, suliffimmut assingusuni ilinniartitsisoqartillugu ajoqusertoqarsimappat. Ajoqusernernut taamaattunut aningaasatigut akisussaaffik Namminersorlutik Oqartussaniippoq.

 

  § 55.  Naalakkersuisut ilinniartut suliffeqarfiillu inatsisitigut atugassarisaat pillugit malittarisassanik erseqqinnerusunik aalajangersaasinnaapput.

 

Kapitali 9

Nakkutilliineq aamma pitsaassusissanik ineriartortitsineq

 

  § 56.  Naalakkersuisut qulliullutik akisussaaffigaat nakkutigisaralugulu ilinniartitsineq, sungiusaammik suliffeqarneq, misilitsittarnerit aamma soraarummeertarnerit, Inatsisartut inatsisaat manna naapertorlugu ingerlanneqarnerat.

  Imm. 2.  Naalakkersuisut qularnaassavaat qitiusumik ilinniarfinni tamani ingerlaavartumik pitsaassusissanik ineriartortitsisoqartarnissaa, angusanillu nalilersuisoqartarnissaa, ilinniartitaanermi atuartitsinermilu, tamatumalu qularnaarneqarnissaanut atatillugu avataaneersunik nalilersuisitsisinnaallutik.

  Imm. 3.  Naalakkersuisut forstanderimut peqqussuteqarsinnaapput perorsaanermut, allaffissornermut aamma aningaasaqarnermut tunngasuni. 

 

  § 57.  Naalakkersuisut pisariaqarunik paasissutissanik qitiusumik ilinniarfinniit piniarsinnaapput ilinniartitaanernut, ilinniagaqartunut aamma sulisunut tunngasuni, tamatumanilu aamma qitiusumik ilinniarfinnut pulaarsinnaallutik nakkutilliinermik ingerlatsiumallutik, aammalu kisitsisinik paasissutissanik suliaqartitsiumallutik.

  Imm. 2.  Naalakkersuisut malittarisassiorsinnaapput ersarinnerusunik imm. 1-imi eqqaaneqartut pissutsit pillugit. 

  Imm. 3.  Naalakkersuisut malittarisassanik aalajangersaasinnaapput elektroniskiusumik attaveqaqatigiittarnerit qitiusumik ilinniarfiit aamma Naalakkersuisut akornanni pillugit, tamatumani aamma taakkua ilusissaat aaqqissuussaanissaallu paasissutissat tunniunneqartarnerannut atasuni. Kiisalu Naalakkersuisut aamma piumasaqaatinik aalajangersagaliorsinnaapput nakkutilliinernut sillimaniarnernullu tunngasuni.

 

Kapitali 10

Misiliisarnerit aamma ineriartortitsinikkut suliat

 

  § 58.  Naalakkersuisut immikkut ittutigut inatsimmi aalajangersakkanit allaanerusunik iliuuseqarsinnaapput misiliilluni ingerlatsinernut atasuni, perorsaanermut ineriartortitsinermi suliniutit, inuussutissarsiutinik ilinniartitaanerni immikkut toqqarneqarsimasuni suliniutini pissutsinik aalajangersimasunik siuarsaajumallutik, taamatut aaqqissuussinikkut ilinniartut Inatsisartut inatsisaat maanna naapertorlugu pisinnaatitaaffii ajornerulersinneqanngippata.

 

Kapitali 11

Inuussutissarsiutinik ilinniartitaanerni pikkorissartitsisarnerit

 

  § 59.  Aningaasanut inatsimmi aningaasaliissutissatut aalajangiunneqartut iluanni, inuussutissarsiutinik ilinniartitsinermut tunngasutigut pikkorissaanerni angalanermut aningaasartuutinut najugaqarnernullu tapiissuteqartoqarsinnaavoq. 

  Imm. 2.  Aammattaaq inuussutissarsiutini immikkut ittuni siuarsagassatut kissaatigineqartuni, pikkorissarnernut aningaasartuutinut matussutissanik qaavatigut tapiissuteqartoqarsinnaavoq, peqataasunut imm. 1-imi taaneqartunut.

  Imm. 3.  Pikkorissarnerit qitiusumik ilinniarfinnit isumagineqassapput, tamanullu ammasumik neqeroorutigineqassallutik, taamaattoq tak. imm. 4 aamma 5.

  Imm. 4.  Taamaattoq imm. 3-mi aalajangersagaq apeqqutaatinnagu inuussutissarsiutinik ilinniartitsinermut tunngasutigut pikkorissaanernut, neqerooruteqartartunit allanit neqeroorutigineqartunut tapiissuteqartoqarsinnaavoq, pikkorissarnerit assingusut Kalaallit Nunaanni inuussutissarsiutinik qitiusumillu ilinniarfinnit neqeroorutigineqanngippata.

  Imm. 5.  Aammattaaq imm. 3-mi aalajangersagaq apeqqutaatinnagu, inuit ataasiakkaat pikkorissarnernut, qitiusumik ilinniarfinnit neqeroorutaanngitsunut, peqataanerinut tapiissuteqartoqarsinnaavoq.

  Imm. 6.  Suliffimmi sinniisit pikkorissarnerinik ingerlatsinermut taakkununngaluunniit peqataanermut tapiissuteqartoqarsinnaanngilaq.

 

  § 60.  Ilinniarfik inuussutissarsiutinik ilinniartitsinermut tunngasutigut pikkorissaanernik neqerooruteqartoq peqataanermut akiliisitsisinnaavoq.

  Imm. 2.  Naalakkersuisut makku pillugit malittarisassat aalajangersinnaavaat: pikkorissaanerit tapiiffigineqarsinnaasut siunertaat, peqataasut akiliutaat, tapiissutisinissamut piumasaqaatit, tapiissutinik qinnuteqarnermi malittarisassat, tassunga ilanngullugit tapiissutit annertussusaat tunniunneqartarnerilu, tassunga ilanngullugit ullormut akit aalajangersimasut aamma pikkorissaanernut nalinginnaasumik tunaartarisassat.

 

Kapitali 12

Maalaaruteqarneq

 

  § 61.  Inatsisartut inatsisaat manna naapertorlugu aalajangiinerit pillugit maalaarutit, aalajangiinerup tiguneraniit sapaatip-akunneri 4 qaangiutsinnagit Naalakkersuisunut imaluunniit maalaarfissatut Naalakkersuisut pisinnaatitaannut saqqummiunneqarsinnaapput, taamaattoq tak. § 53. Tamannali qitiusumik ilinniarfiit fagitigut aalajangigaanni atuutinngilaq.

  Imm. 2.  Naalakkersuisut maalaarfiusartussat pillugit malittarisassanik aalajangersaasinnaapput, tassunga ilanngullugit maalaarsinnaanermut killiliinerit aamma maalaaruteqarnermi periusissat.

 

Kapitali 13

Atuuttuulersitsinermut, ikaarsaariarnermut atorunnaarsitsinermullu aalajangersakkat

 

  § 62.  Inatsisartut inatsisaat atuutilerpoq 1. januar 2025.

  Imm. 2  Ilutigisaanik atorunnaarsinneqarpoq Inuussutissarsiutinut ilinniartitsinerit inuussutissarsiutinullu pikkorissartitsisarnerit pillugit Inatsisartut inatsisaat nr. 10, ulloq 19. maj 2010-imeersoq. 

  Imm. 3.  Malittarisassat Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut inatsisaanni nr. 10, ulloq 19. maj 2010-imeersumi aalajangersagaasut atuutiinnassapput, Inatsisartut inatsisaat manna Inatsisartulluunniit inatsisaat allat tunngavigalugit taarserneqarnissamik atorunnaarsinneqarnissamilluunniit tungaannut. Taamaattoq atorunnaarsinneqarput:

1)  Qitiusumik ilinniarfiit aqunneqarnerat pillugu Namminersornerullutik Oqartussat nalunaarutaat nr. 29, 19. november 1998-imeersoq atorunnaarsinneqarpoq.

2)  Inuussutissarsiorneq piginnaasallu ineriartortinnissaat pillugit Namminersornerullutik Oqartussat nalunaarutaat nr. 10, ulloq 15. april 2008-meersoq atorunnaarsinneqarpoq. 

3)  Qitiusumik Ilinniarfiit siulersuisuisa aningaasarsiassaat aningaasartuutinullu taartisiassaat pillugit Namminersorlutik Oqartussat nalunaarutaat nr. 25, ulloq 23. december 2010-meersoq.

4)  Qitiusumik ilinniarfinni angusaqarnissamik isumaqatigiissutit pillugit Namminersorlutik Oqartussat nalunaarutaat 26. december 2010-meersoq atorunnaarsinneqarpoq.

 

  § 63.  Forstanderit Inatsisartut inatsisaata matuma atortuulernerani qitiusumik ilinniarfinni atorfeqartut § 35, imm. 1 naapertorlugu atorfeqarnertik ingerlatiinnassavaat.

 

 

Kalaallit Nunaanni Namminersorlutik Oqartussat, ulloq 3. juuni 2024

 

 

Múte Bourup Egede (atsior.)

Naalakkersuisut Siulittaasuat