Inuussutissarsiutinut ilinniartitaanerit aamma inuussutissarsiutinut ilinniartitaanerit iluanni pikkorissarnerit pillugit Inatsisartut peqqussutaat nr. 10, maj 2010-meersumi § 34, imm. 7 naapertorlugu aalajangersarneqarpoq:

Akissarsiat

§ 1.  Qitiusumik ilinniarfinni siulersuisut suliaminnut ukiumut akissarsiaqassapput ukiumi aningaasaliissuteqarfimmi qaangiuttumi kingulliusumi Qitiusumik ilinniarfinni ataasiakkaani aningaasaliissutit aamma isertitanik matussusiilluni suliaqarneq aallaavigalugit annertussusaat aalajangersarneqartassallutik.
Imm. 2.  Qitiusumik ilinniarfinni ukiumi aningaasaliissuteqarfimmi qaangiuttumi kingulliusumi aningaasaliissutit aamma isertitanik matussusiilluni suliaqarneq aallaavigalugit katillugit minnerpaamik 40 millionit kr.-iusunut, siulersuisuni siulittaasup ukiumut akissarsiarissavai 40.000 kr. Siulittaasup akissarsiaasa 75 %-ii siulittaasup tulliata akissarsiassarissavai, siulersuisunilu ilaasortat allat akissarsiarissavaat siulittaasup akissarsiaasa 25 %-ii. Siulersuisunut ilaasortat taasisinnaatitaanatik aalajangeeqataasinnaanngitsut akissarsiaqassanngillat.
Imm. 3.  Qitiusumik ilinniarfinni ukiumi aningaasaliissuteqarfimmi qaangiuttumi kingulliusumi aningaasaliissutit aamma isertitanik matussusiilluni suliaqarneq aallaavigalugit katillugit 40 millionit kr.-it ataassisunut, siulersuisuni siulittaasup ukiumut akissarsiarissavai 30.000 kr. Siulittaasup akissarsiaasa 75 %-ii siulittaasup tulliata akissarsiassarissavai, siulersuisunilu ilaasortat allat akissarsiarissavaat siulittaasup akissarsiaasa 25 %-ii. Siulersuisunut ilaasortat taasisinnaatitaanatik aalajangeeqataasinnaanngitsut akissarsiaqassanngillat.

§ 2.  Akissarsiat tunniunneqartassapput qaammatikkaartumik, ukiumut aqqaneq-marloriarluni tunniunneqartassallutik.
Imm. 2.  Siulersuisunut ilaasortaq qaammatip ingerlanerani ilaasortanngussappat siulersuisunut ilaasortap ullut atuuffii aallaavigalugit ullormut akissarsiaqassaaq, akissarsiat § 1, imm. 2-mi imaluunniit 3-mi aningaasat amerlassusaasa taaneqartut 1/365-erutaannik. Taamatut assinganik atuuppoq siulersuisunut ilaasortaq qaammatip ingerlanerani ilaasortaajunnaarpat.

Aningaasartuutinik taartisiaqarneq

§ 3.  Aningaasartuutit, tassaallutik angalanernut, nerisaqarnermut ineqarnermullu, qitiusumik ilinniarfimmi pineqartumi akilerneqarsimasut, Kalaallit Nunaanni Namminersorlutik Oqartussani atorfilinnut atuuttut malittarisassat malillugit siulersuisunut ilaasortanut taartigineqartassapput.

Atuutilerneq

§ 4.  Nalunaarut una atuutilerpoq 1. januaari 2011.

Namminersorlutik Oqartussat, ulloq 23. december 2010

Mimi Karlsen

/

Lise Lennert Olsen