Inuussutissarsiutinut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussutaanni nr. 16, 28. oktober 1993-imeersumi § 1, imm. 3, naapertorlugu aalajangersarneqarput:

 

Siunertat il.il.

§ 1. Umiartornerup aalisarnerullu iluani tunngaviusumik inaarutaasumillu pikkorissartitsisarnerni siunertarineqarpoq ilinniartut Kalaallit Nunaanni umiartornerup aalisarnerullu iluani suleqataasutut inuussutissarsiutinik pineqartunik ingerlatsinnaalersinnissaat. Ilinniartut inuussutissarsiutinik pineqartunik nunami sumiluunniit ingerlatsisinnaalernissaat qulakkeerneqaqqullugu tunngaviusumik inaarutaasumillu pikkorissartitsisarnerit naammassisimassavaattaaq piumasarisat Danmarkimi Søfartsstyrelsip ilinniartitaanerit assingusut pillugit aalajangersarsimasai.
Imm. 2. Pikkorissartitsinerit ilaat uppernarsaaserneqartussat aaqqissuunneqassapput najoqqutassianut Danmarkimi ilinniartitaanernut assingusunut sukkulluunniit piumasarisaasunut naapertuuttumik.

§ 2. Ilinniartitsineq ingerlanneqassaaq umiartornermut aalisarnerraullu ilinniarfimmi Kultureqarnermut, Ilinniartitaanermut Ilisimatusarnermullu Pisortaqarfimmit akuerisaasumi.

 

Tiguneqarnissamut piumasarisat.

§ 3. Umiartornermut aalisarnermullu ilinniarfiup umiartornermut aalisarnermullu ilinniartitsissutinik pikkorissarnissamut qinnuteqartut tigusarsinnaavai taakku meeqqat atuarfianni 11. klaasimeereersimagaangata tassanngalu naammaginartumik oqaaseqaateqarfigineqarsimagaangata.
Imm. 2. Qinnuteqartut inuussutissarsiortutut sulisimanermikkut, allamik ilinniagaqarsimanermikkut, ilinniaqqaagassanik inuussutissarsiutinut tunngasunik assigisaannilluunniit pikkorissarsimanermikkut immikkut piukkunnaateqalersimasut ilinniartitaanermut ataatsimiititaliap inassuteqarnera malillugu ilinniartussatut tiguneqartarsinnaapput.

§ 4. Qinnuteqartut umiarsuarmi assistentinut inaarutaasumik pikkorissarnermut tiguneqarsinnaassagunik umiartornermut aalisarnermullu ilinniartitsissutinik tunngaviusumik pikkorissarnermi angusisimasariaqarput aammalu umiarsuarmi assistentitut sungiussisimanngitsutut qaammatini 18-ini umiartorsimasariaqarlutik.

§ 5. Qinnuteqartut aalisarnermi assistentinut inaarutaasumik pikkorissartitsinermut tiguneqarsinnaassagunik umiartornermut aalisarnermullu ilinniartitsissutinik tunngaviusumik pikkorissarnermi angusisimasariaqarput aammalu aalisarnermi assistentitut sungiussisimanngitsutut qaammatini 12-ini umiartorsimasariaqarlutik.

 

Pikkorissartitsinerit aaqqissugaanerat.

§ 6. Tunngaviusumik pikkorissarneq ingerlanneqartarpoq atuagarsornermik kingornatigullu, § 4 aamma § 5 naapertorlugit, umiarsuarni ingerlaartuni umiartornermik.
Imm. 2. Tunngaviusumik ilinniartitsinermi suliassanut tunngasunik atuartitsinerup saniatigut ilinniagassat nalinginnaasut atuartitsissutigineqartarput.
Imm. 3. Tunngaviusumik ilinniartitsinermut atatillugu pikkorissartitsisoqartarsinnaavoq ilinniaqqitsitsisoqartarsinnaallunilu, taamaattorli takuuk § 1, imm. 2.

§ 7. Umiartornermut aalisarnermullu ilinniartitsissutinik tunngaviusumik pikkorissartitsineq sap. akunnerinik 42-nik sivisussuseqarpoq. Tunngaviusumik pikkorissartitsineq ingerlanneqartarpoq ilinniarfimmi atuartitsinermik umiarsuarmillu sungiusarfimmik, ilinniarfimmit akuerisaasumik, sungiusarluni angalaartarnernik.
Imm. 2. Tunngaviusumik pikkorissartitsinerup siunertarai:
1) Ilinniartut piginnaanitik, piginnaassutsitik soqutigisatillu tunngavigalugit inuussutissarsiutiginialigassaminnik aalajangiinissamut ajunnginnerpaamik tunngavissaqalersinnissaat kiisalu paasinnitsinnissaat inuussutissarsiutigineqartut assingusut paasiniagassartaqarnerannik.
2) Ilinniartut ilinniartitsissutigineqartup ilisimasariaqartortaanik pigiliussisilluarneqarnissaat, tassa ilikkavissinnaaqqullugit sakkunik taaguutinillu ilinniartitsissutaasumi atorneqartartunik sulinermilu periaatsinik, taamaalillutik piginnaanngorsarluaqqullugit umiarsuarni niuffagiutini aalisariutinilu inuttaanissaminnut.
3) Ilinniartut avataaniitilluni sulitillunilu isumannaatsuunissamut tunngasunik ilisimasaqarlualersinnissaat.
4) Ilinniagassanik nalinginnaasunik atuartitsinikkut ilinniartut tunngavissaqalersinnissaat inuiaqatigiinni innuttaasunut allanut naleqqiullutik namminneq qanoq inissisimanerminnik aammalu nunaminni inuussutissarsiornerup qanoq inissisimaneranik kiisalu ilinniaqqinnissaq eqqarsaatigalugu meeqqat atuarfianni ilikkarsimasaasa patajaallisarnissaat.

§ 8. Umiartornermut aalisarnermullu ilinniarfik umiarsuarni aalisarnermilu assistentinut inaarutaasumik pikkorissartitsisarpoq pikkorissartitsinissanut najoqqutassat Danmarkimi Søfartsstyrelsip akuerisimagaangagit, § 1, imm. 2. naapertorlugu

 

Ilinniarfimmi atuartitsineq.

§ 9. Tunngaviusumik pikkorissartitsinermi atuartitsinermi lektionit 1680 miss. atorneqartarput, taakkunannga 25%-iisa miss. nalinginnaasunik atuartitsinermut atorneqartassallutik.
Imm. 2. Tunngaviusumik pikkorissartitsinermi, Danmarkimi Søfartsstyrelsimit allakkat kaajallaasitat malillugit ingerlanneqartumi, ilaatigut atuartitsissutigineqartarput umiartorneq, umiartornermi isumannaatsuunissaq, ikuallattunik qatserineq, motoorilerineq sakkuutilerinerlu, sumiissusersiorneq, umiartornermi maleruagassat, kalerrisaarineq, aalisarnermik ilinniutit, immamik ilinniutit ilinniartitsissutillu nalinginnaasut. Ilinniartitsissutinik nalinginnaasunik atuartitsissutinut ilaapput danskit oqaasii, tuluit oqaasii, matematikki, fysikki aamma kemii.

§ 10. Umiarsuarni assistentinut inaarutaasumik pikkorissartitsinermi lektionit 500 miss. atorneqartarput sungiusarluni angalaarnerit ilanngunnagit.
Imm. 2. Inaarutaasumik pikkorissartitsinermi, Danmarkimi Søfartsstyrelsimit allakkat kaajallaasitat malillugit ingerlanneqartumi, ilaatigut atuartitsissutigineqartarput umiartornermi isumannaatsuunissaq, sulitilluni ajoqusernaveersaarnissaq, ikuallattunik qatserineq, pigaartuuneq, sumiissusersiorneq, umiartornermi paasisimasassat nalinginnaat, umiarsuup qaavaniittunik maskiinamillu aserfallatsaaliuineq, maskiinalerinermik innaallagissamullu tunngasunik ilinniarneq, iluarsaasarfimmut tunngasunik ilisimasaqarneq kiisalu peqqinnissamut tunngasunik ilinniarneq.

§ 11. Aalisarnermi assistentinut inaarutaasumik pikkorissartitsinermi lektionit 760 miss. atorneqartarput sungiusarluni angalaarnerit ilangunnagit.
Imm. 2. Inaarutaasumik pikkorissartitsinermi ilaatigut atuartitsissutigineqartarput aalisarnermut sakkuutit sannaat, sakkuutit immap iluani qanoq iliortarneri, aalisarnermut sakkuutinut atortut, atortussiarineqartartunik ilinniarneq, qalulerineq, sakkut titartarnerinik nassuiaaneq, suliamut tunngasunik kisitsineq, suliffimmi aningaasanik ingerlatsineq kiisalu aalisarnerup pinngortitat inuunerannut sunniutai inatsisiliornerlu.

 

Pikkorissarnernik naggasiineq.

§ 12. Tunngaviusumik pikkorissarneq naggaserneqassaaq misiliinermik. Ilinniarsimaneq atuarfimmit uppernarsaaserneqassaaq.
Imm. 2. Misilitsinnernut uppernarsaaserneqartussanut ilinniarfik uppernarsaasiissaaq.

 

Ilinniarnermi siunnersuineq.

§ 13. Ilinniartut ilinniarfimmit siunnersorneqassapput ilinniagassamik aalajangiiniarnermik, aamma umiartorsimanissamik, inuussutissarsiutissamik kiisalu ilinniartunut namminernut tunngasunik.

 

Immikkut akuersineq naammagittaalliornerlu.

§ 14. Kultureqarnermut, Ilinniartitaanermut Ilisimatusarnermullu Pisortaqarfiup ilinniartitaanermut ataatsimiititaliap inassuteqarnera malillugu nalunaarummi uani aalajangersarneqartut sanioqqunneqarallarnissaat akuersissutigisinnaavaa tamanna misiliinertut imaluunniit pikkorissartitsisarnernik ineriartortitsiniarnertut isigalugu.

§ 15. Umiartornermut aalisarnermullu tunngasunut ilinniartitaanermut ataatsimiititaliaq nalunaarut manna malillugu pikkorissartitsinernut ilinniartitaanermut ataatsimiititaliaavoq.

§ 16. Nalunaarut manna malillugu pissutsit ilinniarnermut tunngasut pillugit ilinniarfiup aalajangiinerinut naammagittaalliuutit ilinniartitaanermut ataatsimiititaliamut suliassanngortinneqarsinnaapput aalajangiinerup tiguneranit sap. ak. sisamat qaangiutsinnagit.
Imm. 2. Nalunaarut manna malillugu pissutsit allat ilinniarnermut tunngasuunngitsut pillugit ilinniarfiup aalajangiinerinut naammagittaalliuutit Kultureqarnermut, Ilinniartitaanermut Ilisimatusarnermullu Pisortaqarfimmut suliassanngortinneqarsinnaapput aalajangiinerup tiguneranit sap. ak. sisamat qaangiutsinnagit.

 

Atulerfissaa.

§ 17. Nalunaarut una atortuulissaaq aggustip aallaqqaataani 1994-imi.
Imm. 2. Ulloq taanna atorunnaassaaq umiartornermut aalisarnermullu tunngasut pillugit Namminersornerullutik Oqartussat nalunaarutaat nr. 2, 27. marts 1984-imeersoq.

Namminersornerullutik Oqartussat, 12. september 1994

Marianne Jensen

/

Aqigssiaq Møller