Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10-mi, 19. maj 2010-meersumi, Inatsisartut inatsisaatigut nr. 3, 4. juni 2012-imeersukkut allanngortinneqartumi § 22, § 27, imm. 4 aamma 5 aammalu § 63, imm. 2 naapertorlugit aalajangerneqarput:

Kapitali 1
Nassuiaatit

 

§ 1.  Soraarummeerneq imatut paasineqassaaq tassalu misilitsinnermi inaarutaasumik nalilersuineq, tassani soraarummeertitsisoq avataaneersoq nalilersueqataassalluni, misilitsinnerullu nalilerneqarnera ilinniartup soraarummeernermini angusaasa katinnerinut ilanngullugu naatsorsorneqassalluni ilinniartullu soraarummeernermut ilinniarnermullu uppernarsaataanut allanneqassalluni.
Imm. 2.  Allattariarsorluni soraarummeerneq imatut paasineqassaaq tassalu suliassat ilinniarfimmit saqqummiunneqartut imaluunniit noqqaassutigineqartut ilinniartup allattariarsorluni akisassai.
Imm. 3.  Oqaluttarissamik soraarummeerneq imatut paasineqassaaq tassalu suliassat ilinniarfimmit saqqummiunneqartut imaluunniit noqqaassutigineqartut ilinniartup oqaluttariarsorluni akisassai.
Imm. 4. Ataasiakkaarluni soraarummeerneq imatut paasineqassaaq tassalu soraarummeerneq, ilinniartut ataasiakkaarlutik saqqummiiffigisaat.
Imm. 5.  Eqimattakkaarluni soraarummeerneq imatut paasineqassaaq tassalu ilinniartut eqimattatut ataatsikkut soraarummeernerat, ilinniartut eqimattakkaatut peqatigiillutik saqqummeeqatigiiffigisaat, ilinniartut ataasiakkaatut angusarisanik nalilersuiffigineqaraluarpataluunniit nalilersuiffigineqanngikkaluarpataluunniit.
Imm. 6. Napparsimalluni soraarummeerneq imatut paasineqassaaq tassalu nutaamik soraarummeerneq, nakorsamit allagartaqarluni napparsimaneq pissutigalugu ilinniartoq soraarummeernerup aallartinnissaanut naammassinissaanulluunniit periarfissaqarsimanngippat.
Imm. 7. Soraarummeeqqinneq imatut paasineqassaaq tassalu tamakkiisumik ilaannakuusumilluunniit soraarummeerluni misilitseqqinnissamut periarfissaq, saniatigut misilitseqqinnertut naatsorsuutiginagu.

 

§ 2.  Soraarummeernermut ullorsiutit imatut paasineqassapput tassalu ukiumi atualerfiusumi aallarteqatigiinnut tamanut pilersaarutit, soraarummeernerit qaqugukkut ingerlanneqarnissaannut piffissat, soraarummeernermi suliassat il.il. aallartinnerinut naammassinissaannullu ullussaliussat pillugit kiisalu napparsimasoqassappat soraarummeernissaasa piffissaannut ataatsimut pilersaarutit.
Imm. 2. Soraarummeernerit allattorsimaffiat imatut paasineqassaaq tassaasoq allakkatigut uppernarsaat, soraarummeernerup qanoq ingerlanneqarneranik nassuiaasoq.
Imm. 3. Angusarisanut allattuiffik imatut paasineqassaaq tassalu soraarummeernermi angusarisanut allattuiffik ilinniartunut soraarummeernermi pineqartumi angusarisimasanut takussutissiaq.

 

§ 3.  Inuussutissarsiummik ilinniarnermut pineqartumut ilinniarnermut pilersaarut ilinniarfinnut ataasiakkaatut atuutsinneqartoq naapertorlugu angusanik piumasaqaatinillu aalajangersakkat malillugit ilinniartup soraarummeernermini qanoq angusaqarsimatigineranut uppernarsaataassaaq.

 

§ 4.  Ilinniarfik imatut paasineqassaaq tassalu qitiusumik ilinniarfik imaluunniit inuussutissarsiutinik ilinniarfik, tamanna Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaanni § 3 naapertorlugu.

Kapitali 2
Soraarummeernernik aaqqissuussinerit

 

§ 5.  Ilinniartitaanermut Naalakkersuisoqarfik soraarummeernernut pingaarnertut akisussaasuuvoq nakkutilliisuullunilu. Soraarummeernerit ingerlanneqarnerini atugassarititaasut Ilinniartitaanermut Naalakkersuisoqarfiup aalajangersassavai.
Imm. 2.  Ilinniarfimmi soraarummeernerit ingerlannissaannut ilinniarfik akisussaasuuvoq.

 

§ 6.  Soraarummeernermi suliassat ilinniarfimmit saqqummiunneqassapput, inuussutissarsiornermik ilinniarnermut pineqartumut ilinniarnermut pilersaarummi allamik aalajangersaasoqarsimanngippat.
Imm. 2.  Soraarummeernerit suut taakkulu qassiunissaat inuussutissarsiutinik ilinniarfinni ataasiakkaani ilaatinneqartut inuussutissarsiutinik ilinniarfiit ataasiakkaatut ilinniartitsinermut pilersaarutaanni imaluunniit tamanna pillugu maleruagassatut aalajangersagaanni allassimassapput, tassani soraarummeernerit imminnut pingaaruteqassusii ilinniarnerullu naammassinera pillugu uppernarsaammik tunniussinissamut piumasaqaatit aamma allassimassallutik.
Imm. 3.  Ilinniarfiit, ilinniarnernik assigiinnik neqerooruteqartut, suliassanik saqqummiussisinnaapput ilinniarfinnut pineqartunut ataatsimoorussaasunik.

 

§ 7.  Angusassat piumasaqaatillu soraarummeernernut pingaaruteqartut suunerinik ilinniartut ilisimatinnissaannut ilinniarfik pisussaaffeqarpoq aammalu soraarummeernerit ingerlannerinut maleruagassat pillugit ilinniartut peqataasullu allat ilisimatinnissaannut, tamanna imm. 2 aamma 3 naapertorlugit.
Imm. 2.  Soraarummeernerni peqataasinnaanermut piumasaqaatit assersuutigalugit ilinniartitsinermi peqataanissaq, soraarummeernerni misilitsinnernilu allani angusisimanissaq, suliassanik tunniussisarnissaq, soraarummeersitseriaatsit misilitsitseriaatsillu kiisalu taakku nalilersornerinut tunngavigisat inuussutissarsiornermik ilinniarfiit ataasiakkaatut ilinniartitsinermut pilersaarutaanni allassimassapput.
Imm. 3.  Ilinniarfik soraarummeernermut malittarisassaliussaaq taannalu tamanut saqqummiullugu, tassani makku allassimassallutik:
1) Nalunaarnissaq, tamanna toqqaannartumik pissanngippat, soraarummeernissanut siunnersuutit peqataasinnaannginnermillu nalunaarutaasinnaasut, napparsimanermi peqataasinnaannginnermik nalunaarnerit aammalu nakorsap uppernarsaataanik piffissaq eqqorlugu tunniussinissaq ilanngullugit.
2) Soraarummeersitseriaatsit, ilinniartup soraarummeersitseriaatsit arlaqartut akornanni toqqaasinnaanera aammalu akissuteqarnermi ilusissanik piumasaqaatit ilanngullugit.
3) Ilinniarnermik suliat aamma suliassanik suliniutinillu il.il. tunniussisarneq pillugit piumasaqaatinik naammassinninneq, tamanna soraarummeernermi peqataanissamut piumasaqaataasoq, tamanna § 7, imm. 2 naapertorlugu.
4) Tunngaviusumik soraarummeerutissap soraarummeernermi ingerlanneqarnera, tassunga ilanngullugit suliassanut, suliniutinut, naalisakkanut pisortatigoortumik piumasaqaatigineqartut ilinniartup suliarisassai.
5) Soraarummeernerup nalilersorneranut tunngaviusoq.
6) Iluaqusersuutinik atuineq.
7) Soraarummeernermi oqaatsit atorneqartut.
8) Soraarummeernermi atugassarititaasut immikkut ittut.
9) Nammineq allallu suliaannik atuineq.
10) Pissusissamisuunngitsumik pisoqarnerani suleriaaseq.
11) Naammagittaalliortoqarnerani suleriaasissaq, tassunga ilanngullugu naammagittaalliuutit sumut ingerlatinneqartassanersut.
12) Soraarummeertut kinaanerisa uppernarsarneri.
Imm. 4. Imm. 3, nr. 4-mi atortussatut taaneqartut ilinniartunit eqimattakkuutaanit suliarisaappata, pisortatigoortumik piumasaqaatit naammassinissaannut ilinniartut ataatsimoorlutik akisussaasuupput. Piumasaqaatit naammassineqanngippata, ilinniartut pineqartut arlaannaalluunniit soraarummeersinnaanngilaq, pissutsit immikkut ittut eqimattakkaani ilinniartut ilaannit arlalinnilluunniit nutaamik misilitsinnissamut tunngavilersuutaasinnaasut pineqartinnagit.
Imm. 5. Paasissutissat imm. 1-4-mi taaneqartut ilinniarfiup nittartakkamigut tamanut saqqummiutissavai.

 

§ 8.  Ilinniarfik ukiut tamaasa soraarummeernissamut ullorsiusiortassaaq tamanullu saqqummiullugit, tamanna § 2, imm. 1 naapertorlugu.
Imm. 2.  Soraarummeernerup ingerlanneqarnissaanut atatillugu suliassaalunnut suleriaatsinullu tunngasut ilinniarfiup tamanut saqqummersissavai.
Imm. 3.  Ilinniartut immikkut ataasiakkaarlugit eqqarsaatigalugit piffissanit, soraarummeernerit angusiffiginissaannut imm. 1-imi aalajangersakkanit immikkut akuerineqarsinnaapput, erninermik, ilungersunartumik napparsimanermik imaluunniit pissutsinik allanik ilinniartumut pisuussutaangitsumik tunngavilersorneqarpat.

Kapitali 3
Soraarummeersinnaaneq

 

§ 9.  Soraarummeernissanut tamanut  peqataanissamut peqataasinnaannginnermullu nalunaarnissat qaqugu pinissaannut piffissaliinerit ilinniarfiup aalajangersassavai tamanullu saqqummiullugit.
Imm. 2.  Peqataasinnaannginnermut nalunaarnissamut killissaliisoqarsimanngippat, soraarummeernerup aallartinnerani peqataasinnaannginneq nalunaarutigineqarsinnaavoq.
Imm. 3.  Ilinniarfiup ilinniartitsinermut pilersaarummi aalajangersarsinnaavaa, peqataanissamut pisussaaffimmik naammassinninneq aammalu sulianik immikkullu suliamik il. il. tunniussinerit soraarummeernissamut piumasaqaataassasut.
Imm. 4. Ilinniarfiup imm. 3 malillugu piumasaqaatinik avaqqussisinnaavoq erninermik, ilungersunartumik napparsimanermik, uppernarsaasikkamik innarluuteqarnermik imaluunniit pissutsinik pingaaruteqartunik, ilinniartumut pisuussutaanngitsunik tunngavilersorneqarpata.

 

§ 10.  Soraarummeerneq angusiffiusoq uteqqinneqarsinnaanngilaq.
Imm. 2.  Soraarummeernerit kittaartumik soraarummeernernik immikkoortortaqarpata, soraarummeernermi immikkoortoq angusiffiunngitsoq, uteqqinneqarsinnaanngilaq, tamakkiisumik soraarummeernermi angusisimagaanni.
Imm. 3.  Maleruagassat imm. 2-mi aalajangersarneqartut atuutissanngillat, ilinniartitaanermut pineqartumut ilinniartitsinermut pilersaarummi allamik aalajangersaasoqarsimappat imaluunniit ilinniartitaanermut tamanna pillugu maleruagassanik immikkut ittunik aalajangersagaqarpat.
Imm. 4.  Soraarummeerutaasumi angusisoqanngippat, ilinniartoq soraarummeernissamut suli nalunaarsimasutut isigineqassaaq, taamaalilluni ilinniartoq soraarummeerutissap taassuma assingata ingerlanneqarnissaanut nalunaarsoreersimassalluni, taamaattoq imm. 5 naapertorlugu.
Imm. 5.  Ilinniartoq amerlanerpaamik pingasoriarluni soraarummeerutaasup assinganik misilitsissinnaavoq.
Imm. 6.  Imm. 5-imi maleruagassanit ilinniarfik immikkut akuersissuteqarsinnaavoq, tamanna erninermik, ilungersunartumik napparsimanermik imaluunniit pissutsinik utoqqatsissutaasinnaasunik allanik, ilinniartumut pisuussutaasinnaanngitsuni tunngavilersuutissaqarpat.

 

§ 11.  Ilinniartoq, allakkatigut uppernarsaateqartumik napparsimaneq pissutigalugu imaluunniit naatsorsuutiginngisat allat pissutigalugit soraarummeernermi najuunnissaminut ingerlannissaanulluunniit ilinniartup pisuussutiginngisaanik akornuserneqarpat, soraarummeernerup napparsimasutut soraarummeernertut ingerlannissaanut piaarnerpaamik periarfissinneqassaaq.
Imm. 2.  Soraarummeerneq ilinniarnerup immikkoortuanut kingullermut inissinneqarsimappat, ilinniartup piffissaliunneqartumi tassani imaluunniit taassumunnga sivitsuutaasumi napparsimasutut soraarummeersinnaanera periarfissaassaaq.
Imm. 3.  Ataatsimoortumik soraarummeernermi soraarummeernerit immikkoortut arlaqarpata, immikkoortumut soraarummeerneq, allakkatigut uppernarsaaserlugu napparsimaneq pissutigalugu naammassineqanngitsoq, ataatsimoortumik soraarummeerneq angusiffiuppat, uteqqinneqarsinnaanngilaq. Taamaattoq tamanna atuutissanngilaq, ilinniakkamut pineqartumut ilinniartitsinermut pilersaarummi allatut aalajangersaasoqarsimappat imaluunniit tamanna pillugu ilinniartitaanermut maleruagassanik immikkut ittunik aalajangersagaqarpat.

 

§ 12.  Ilinniarnerup ingerlateqqinnissaanut soraarummeernermi angusinissaq piumasaqaataasoq ilinniartitaanermi ilinniartitsinermut pilersaarummi imaluunniit ilinniartitaaneq pillugu maleruagassatut aalajangersakkani allassimassaaq.

 

§ 13.  Soraarummeernermi angusat pissutigalugit ilinniartup ilinniarnini ingerlateqqissinnaanngikkaangagu, ilinniartoq ilinniarfimmit angerlartinneqassaaq, ilinniartup ilinniarnerup ingerlanneqartup uteqqinnissaanut ilinniarfiup akuerinngippagu.
Imm. 2.  Ilinniartup ilinniarfimmit taamaatinnerani ilinniarnerup ingerlateqqinnissaanut periarfissanik naleqquttunik allanik ilinniarfiup ilinniartoq taassumunngalu angajoqqaajusutut oqartussaasut ilitsersuussavai, ilinniarnermut allamut imaluunniit ilinniarnermut inuussutissarsiornermulluunniit aallarniutitut pikkorissarnermut nuussinnaanermut periarfissat ilanngullugit.

Kapitali 4
Soraarummeeriaatsit nalilersuinerillu

 

§ 14.  Ilinniarnermut pineqartumut ilinniartitsinermut pilersaarummi imaluunniit ilinniarneq pillugu maleruagassani aalajangersarneqassaaq, ilinniarnernut immikkut ataasiakkaanut atatillugu soraarummeernerit eqqarsaatigalugit soraarummeeriaatsit suunersut, allattariarsornermik, oqaluttariarsornermik, ataasiakkaarluni eqimattakkaarluniluunniit soraarummeernerit pineqarnersut ilanngullugit.
Imm. 2.  Soraarummeernermi suliassat ilusissaannut piumasaqaataasinnaasut ilinniarnerit immikkut ataasiakkaarlugit ilinniartitsinermut pilersaarutaanni aalajangersarneqassapput.
Imm. 3.  Akissut piumasaqaatit malillugit suliarineqarsimanngippat, ilinniarfiup akissut akueriumanngissinnaavaa. Taamatut pisoqartillugu akissut nalilerneqassanngilaq ilinniartorlu soraarummeernermik misiliinermik ataatsimik atuisimasutut isigineqassalluni, tamanna § 10, imm. 5 naapertorlugu.

 

§ 15.  Soraarummeerneq eqimattakkaatut soraarummeernertut aaqqissuussaagaangat, eqimattakkaatut soraarummeernerni ataasiakkaatut ilinniartut peqataasut amerlanerpaaffissaat, ilinniartitsinermut pilersaarummi aalajangerneqassaaq aammalu ilinniartoq ataasiakkaatut soraarummeersinnaanersoq.
Imm. 2.  Eqimattakkaatut soraarummeernerni aammalu ilinniartut kisimiillutik soraarummeernerini ilinniartut nammineerlutik naammassisaat nalilerneqassapput.

 

§ 16.  Oqaluttariarsorlutik eqimattakkaatut soraarummeernerni, ilinniartut ataasiakkaatut soraarummeersinneqassapput, taamaalilluni ilinniartup nammineerluni naammassisaasa nalilersornissai qulakkeerneqarlutik.
Imm. 2.  Oqaluttariarsorlutik eqimattakkaatut soraarummeernissat piareersarnerini  piffissap nalilersuinermi atugassanngortinneqartup ilinniartut nalilersuinermi peqataasut amerlassusiinut naleqquttuunissaa qulakkeerneqassaaq.
Imm. 3.  Allattariarsorluni eqimattakkaatut soraarummeernerni ilinniartup immikkut tunniussaqarnera qularnaarneqarsinnaappat, aatsaat ataasiakkaanik nalilersuisoqarsinnaavoq. Immikkut pinnittarnissaq qanoq pisassanersoq ilinniartitsinermut pilersaarummi allassimassaaq.
Imm. 4.  Allattariarsorluni eqimattakkaanik soraarummeersitsinermi ilinniartut ataasiakkaarlugit nalilersorneqassanngippata, suliassamut akissut oqaluttariarsorluni soraarummeernermi tulliuttumi nalilersuinermut ilanngunneqarsinnaavoq.

 

§ 17.  Angusarisat tulleriiaarnerat nalilersuinerillu allat pillugit nalunaarummi maleruagassat malillugit nalilersuineq pissaaq.
Imm. 2.  Angusarisat nalilersuinermi tunniunneqartut angusarisat allattorsimaffiannut, soraarummeersitsisumit nalileeqataasumillu atsiorneqarlutik uppernarsaaserneqassapput.
Imm. 3.  Ilinniartumik oqaluttariarsorluni misilitsinnerup naliliiffigineqarnera ilinniartumut ingerlaannaq nalunaarutigineqassaaq.
Imm. 4.  Allattariarsorluni misilitsinnerit nalilerneri suliassap akineranit kingusinnerpaamik sapaatit akunneri arfinillit qaangiunneranni ilinniartumut nalunaarutigineqareersimassapput.

Kapitali 5
Soraarummeernerup ingerlanneqarnera

 

§ 18.  Oqaluttariarsorluni soraarummeernerit aamma soraarummeernerit suliaqarluni akissuteqarfiusut tamanut ammasuupput.
Imm. 2.  Imm. 1-imi aalajangersagaq ilinniarfiup avaqqussinnaavaa aamma init soraarummeerfiusussat killiliiffigisinnaallugit, tamatumuuna immikkut ittumik pissutissaqartillugu aamma ilinniartoq eqqarsaatigineqartussaatillugu imaluunniit inissaqarneq eqqarsaatigalugu.
Imm. 3.  Imm. 2-mi aalajangersagaq apeqqutaatinnagu, soraarummeernerup ingerlanneqarneranut atatillugu eqqissisimanissaq qulakkiissallugu pisariaqarsorinarpat inuit ataasiakkaat ininut soraarummeerfiusunut isernissaat itigartitsissutigineqarsinnaavoq.
Imm. 4.  Oqaluttariarsorluni soraarummeernermi, tassani ilinniartut eqimattakkaatut sulinerminni naammassisaat tunngavigalugit ilinniartumik naliliisoqartillugu, eqimattakkaani ilinniartut allat namminneq naliliiffigineqartinnatik inimi najuussinnaanngillat.
Imm. 5.  Soraarummeernerup nipitaanik immiussinerit assiliinerlu inerteqqutaapput, immiussinerit nalilersuinerup ingerlanneranut immikkoortutut ilanngunneqassanngippata. Taamaattoqassappat immiussinerit ilinniarfiup suliarissavai.
Imm. 6.  Suliaqarluni oqaluttariarsorlunilu soraarummeernerit, suliniutinik oqaluttariarsorluni illersuinerit ilanngullugit, nalilersornerinut atatillugu oqaluuserinninnermi soraarummeersitsisoq nalileeqataasorlu kisimik najuussinnaapput.
Imm. 7.  Imm. 5-imi aalajangersagaq apeqqutaatinnagu ilinniarfik aalajangiisinnaavoq soraarummeersitsisup nalileeqataasullu naliliinermik oqaluuserinninnerat soraarummeersitsisartunngortussat isiginnaarsinnaagaat.

 

§ 19.  Ilinniakkami oqaatsit ilinniartitsissutaasut atorlugit soraarummeernerit ingerlanneqassapput.
Imm. 2.  Ilinniartup qinnuteqarnera malillugu ilinniartitsinermit oqaatsit allat atorlugit soraarummeerneq ilinniarfiup ingerlatissavaa, nalileeqataasup paasippagu nalileeqataasoq, soraarummeersitsisoq ilinniartorlu ilinniartitsinermi oqaatsinit atorneqartunit allamik oqalussinnaasut.
Imm. 3.  Imm. 1 aamma imm. 2-mi aalajangersakkat ilinniartitsinermut pilersaarummi ilinniarfiup avaqqussinnaavai.
Imm. 4.  Pissutsit periarfissiippata torrutiinnarlugu oqalutseqarnissaq ilinniarfiup neqeroorutigisinnaavaa, pingaartumillu oqalutsimik pisariaqartumik ikiorsiisinnaasumik ilinniarfik piareersimasoqarpat soraarummeernerullu pitsaassusia neqeroorutip ajornerulersinngippagu.
Imm. 5.  Ilinniartut, oqaatsinik ilinniartitsissutaasunit allaanerusumik ilitsoqqussaminnik oqaasillit, tak. imm. 1. soraarummeernerup piareersarnissaanut, soraarummeernermut ilitsersuinissamut aamma allattariarsorluni soraarummeernerup ingerlannissaanut piffissaliunneqartup 25 procentianik ilallugu immikkut piffissalerneqassapput.
Imm. 6.  Imm. 2. malillugu ilinniarfiup aalajangiinera aamma imm. 4. malillugu neqeroorutaa, soraarummeernerup ingerlannissaa kingusinnerpaamik ullut 14-it sioqqullugit tamanut saqqummiunneqassapput.
Imm. 7.  Ilinniarfiup aalajangiinera imaluunniit neqeroorutaa nalileeqataasup, soraarummeersitsisup imaluunniit torrutiinnarlugu oqalutsip pisinnaannginnera pissutigalugu naammassineqarsinnaanngippat, soraarummeerneq ilinniartitsinermi oqaatsit atorlugit ingerlanneqassaaq.

 

§ 20.  Soraarummeernerit  ingerlanneqarnerinut, allattariarsorluni soraarummeernerni ilinniartut nakkutigineri ilanngullugit, ilinniarfik malittarisassiussaaq.
Imm. 2.  Soraarummeernerup ingerlanneqarneranut malittarisassat suliarineqassapput ilinniartut innarluutillit aamma ilinniartut perorsaanermi immikkut ittumik iliuuseqarfigineqartussat immikkut ittumik atugassaqartitaallutik soraarummeersinnaanngortillugit.

 

§ 21.  Soraarummeernerit ingerlanneqarnerini ilinniartut sulinerminni naapertuuttunik atugassaqarnissaat ilinniarfiup qulakkiissavaa.
Imm. 2.  Soraarummeernerup ingerlanneqarnerani ilinniartut eqqunngitsumik iluaqutissat anguniarlugit attaveqarsinnaannginnissaat ilinniarfiup qulakkiissavaa.

 

§ 22.  Soraarummeernermut atatillugu iluaqutissat, iluaqutissat innaallagissamoortut ilanngullugit, ilinniartitsinermut pilersaarummi, soraarummeernermi suliassami imaluunniit maleruagassani ilinniartitaanermut atuuttutut allassimasut malillugit akuerisaapput.
Imm. 2 Iluaqutissat innaallagissamoortut atorneqarsinnaaneri assersuutigalugu piginnaasat eqqarsaatigalugit tamatumani atuinissaq ilinniarfiup aalajangersinnaavaa.

 

§ 23.  Suliassat, piareersarluni atortussat imaluunniit suliassap qulequtaa ilinniartumut agguaanneqarpata imaluunniit soraarummeernermut tunngasumik ilinniartoq apeqqutigineqartussamik ilisimatinneqareerpat soraarummeerneq aallartittutut isigineqassaaq.
Imm. 2.  Ilinniartoq, allattariarsorluni soraarummeernermut inortuisoq taamaallaat soraarummeernermi peqataasinnaavoq, ilinniartoq suliassaq pillugu paasissutissanik tigusaqarsimanngitsutut ilinniarfiup isigippagu aammalu kinguaattoornermut ilinniartoq pisuussuteqarsorinngippagu.
Imm. 3.  Ilinniartoq, oqaluttariarsorluni soraarummeernissamut inortuisoq, ilinniarfiup pisuussuteqarsorinngippagu, oqaluttariarsorluni soraarummeernermik nutaamik neqeroorfigineqarsinnaavoq.

 

§ 24.  Ilinniartup allattariarsorluni akissutip tunniunnerani atsiornerminik, digitaliusinnaasumik, uppernarsassavaa akissut eqqunngitsumik ikiorneqarani suliarineqartoq aammalu nalilerneqartussatut kissaatigineqartut ilinniartup suliani tamakkerlugit tunniukkai.

 

§ 25.  Ilinniartoq soraarummeernermini suliassap akinissaanut unioqqutitsilluni ikiortissarsiorsimappat imaluunniit ilinniartumik allamik ikiuisimappat, ilinniarfiup ilinniartoq soraarummeerfimmiit peersissavaa.
Imm. 2.  Soraarummeernerup ingerlannerani kingornaluunniit ilinniartoq eqqunngitsuliorluni ikiortissarsiorsorineqarpat imaluunniit ikiuisimasorineqarpat, allap suliaanik saqqummiisimasorineqarpat imaluunniit innersuussinani siusinnerusukkut suliaminik nalilerneqareersumik atuisimasorineqarpat, ilinniarfiup pisussaaffigaa tamanna misissussallugu. Pisimasorisaq uppernarsarneqarpat iliuuserisarlu naliliinermut pingaaruteqartuuppat pingaaruteqarsinnaalluniluunniit ilinniarfiup ilinniartoq soraarummeerfimmiit peersissavaa.
Imm. 3.  Soraarummeernerup nalaani ilinniartoq akornusersuippat ilinniarfiup ilinniartoq soraarummeerfimmiit peersissavaa. Pisuni ilungersunannginnerusuni ilinniarfiup ilinniartoq mianersoqqussummik tuneqqaassavaa.
Imm. 4.  Imm. 1-3 malillugit anisitaanerit malitsigissavaat, soraarummeernermi pineqartumi angusarisat atorunnaarnerat aammalu ilinniartup soraarummeernermik misilitsinnermik ataatsimik atuisimanera, tamanna § 10, imm. 5 naapertorlugu.

 

§ 26.  Ilinniarfiup pisuni § 25-mi taaneqartuni, sukannernerusumik pisoqartillugu aalajangersinnaavaa ilinniartoq ilinniarfimmit sivikinnerusumi sivisunerusumiluunniit anisitaassasoq.
Imm. 2.  Imm. 1 malillugu ilinniartumik anisitsineq pippat, uteqqiinerup ataavartumik anisitaasinnaanermik malitseqarsinnaanera pillugu ilinniartoq allakkatigut mianersoqqussummik tunineqassaaq.

 

§ 27.  Soraarummeernerup nalaani paasineqarpat, soraarummeerneq kukkuneqartoq amigaateqartorluunniit, iluarsiineq qanoq pissasoq ilinniarfiup aalajangissavaa, soraarummeerneq taamaatinneqassanersoq piffissamilu allami ingerlanneqassanersoq ilanngullugu. Tamanna sioqqullugu periarfissaqarpat ilinniarfiup naliliisussat isumasiussavai.
Imm. 2.  Iluarsiineq imatut pissaaq, ilinniartut atugassaqartinneqassallutik, nalinginnaasumik soraarummeernermi atugassaasunut pitsaanerpaamik sanilliunneqarsinnaasunik.
Imm. 3.  Ilinniarfiup nalilerpagu, imm. 1 malillugu kukkuneq ilinniartut naammassisaannut pingaaruteqartoq, ilinniartut eqqorneqartut soraarummeeqqinnissamik neqeroorfigineqassapput, tamanna immikkut soraarummeernermik misiliinertut naatsorsornagu.
Imm. 4.  Soraarummeeqqinneq ingerlanneqassappat tassani karakteerit anguneqartut karakteerit siullermik anguneqartut taarsissavaat, karakteerit nutaat karakteerinit siullermik anguneqartunit appasinnerussagaluarpataluunniit.
Imm. 5.  Imm. 1 malillugu kukkuneq pingaaruteqartuusoq ilinniarfiup nalilerpagu, pisup ingerlanera ilinniarfiup Ilinniartitaanermut Naalakkersuisoqarfimmut nalunaarutigissavaa, taassuma aalajangersinnaallugu soraarummeerneq atorunnaarsinneqassasoq nutaamillu taarserneqarluni.
Imm. 6.  Suliassat kukkuneqartut Ilinniartitaanermut Naalakkersuisoqarfimmit atugassanngortitaappata imissutigineqarlutilluunniit, suliassat 1 - 3-mi taaneqartut naalakkersuisoqarfiup isumagissavai.
Imm. 7.  Kukkuneqarsinnaanera apeqqutaatinnagu soraarummeernerup naammassineqarnissaa aalajangerneqarpat, soraarummeernermi kukkunerit amigaatilluunniit pillugit nalileeqataasoq ilisimatinneqassaaq.

Kapitali 6
Naliliisut

 

Nalileeqataasut

 

§ 28.  Nalileeqataasussat ilinniarfik alla peqatigaluguluunniit ilinniarfiup soraarummeernermut atatillugu nalileeqataasussat toqqassavai tamanna § 17 malillugu.
Imm. 2.  Nalileeqataasoq ilinniarfimmi soraarummeernermik ingerlatsisumi atorfeqarsinnaanngilaq aammalu ilinniartunik ilinniartitsinermi peqataasimassanani.

 

§ 29.  Ilinniarneqartumut pineqartumut pisumi piumasaqaataasut, anguniagaasut periusaasullu, ilinniarneqartup atornissaanut periarfissaasut ilinniarsimasumillu pisariaqartitsisup pisariaqartinneqartut ilisimalluassavai aammalu ilinniarsimasatigut ataatsimut nalileeqataasup nalileeqaataaffissaminik qaffasinnerusumik piginnaaneqassalluni.
Imm. 2.  Nalileeqataasoq kalaallisut danskisullu oqallorissuussaaq.
Imm. 3.  Imm. 2-mi aalajangersakkap malinnissaanut ilinniarfik periarfissaqanngikkuni, tassannga immikkut akuersissut pillugu Ilinniartitaanermut Naalakkersuisoqarfik ilinniarfiup qinnuteqarfigissaavaa.
Imm. 4.  Imm. 3 malillugu immikkut akuersissutit pillugit najoqqutassat Ilinniartitaanermut Naalakkersuisoqarfiup aalajangersinnaavai.

 

§ 30.  Soraarummeernerup ingerlanneqarnissaa sioqqullugu ilinniarnermut maleruagassat atuuttut pillugit ilinniarfiup nalileeqataasussaq ilisimatissavaa aammalu soraarummeernerup ingerlannissaanut kingusinnerpaamik sapaatip akunnera sioqqullugu atortunik nalileeqataanermut pingaarutilinnik nalileeqataasussaq pilersorlugu.
Imm. 2.  Nalileeqataasoq suliassat suliarineqartarnerat pillugu inatsimmik malinnittussaavoq, suliamut attuumassuteqarneq nipangiusimasussaatitaanerlu pillugit maleruagassat ilanngullugit.

 

§ 31.  Nalileeqataasussaq tassanngaannartumik pisinnaajunnaarpat imaluunniit pissutsinik nalileeqataasussap soraarummeernermut anngussinnaaneranut aporfiusunik pisoqarpat, paarlatsitut nalileeqataasussamik ilinniarfik toqqaasinnaavoq, nalileeqataasussaq ilinniarfimmi soraarummeernermik ingerlatsisumi atorfeqartoq ilanngullugu.
Imm. 2.  Paarlatsisut nalileeqataasussap nalileeqataasunut piumasaqaatit sapinngisamik aamma naammassissavai, tak. § 29.

 

§ 32.  Nalileeqataasup nakkutigissavaa, periarfissaqartillugulu
1) ilinniartut piginnaanerisa nalilernissaat eqqarsaatigalugu misilitsinnerit ilinniarsimasatigut naleqquttumik tunngaveqarlutik naammassineqarnissaat, tak. § 1, imm. 1,
2) misilitsinnerit maleruagassat atuuttut malillugit naammassineqarnissaat, aammalu
3) ilinniartut assigiiaartumik, naapertuuttumik tutsuiginartumillu, ilinniarnermut maleruagassanut naapertuuttumik, ilinniartitsinermut pilersaarummi aamma karakteeriliisarneq pillugu nalunaarummi maleruagassat ilanngullugit, nalilerneqarnissaat.

 

§ 33.  Nalileeqataasoq soraarummeersitsisoq aqutsisoralugu ilinniartumut apeqquteqarsinnaavoq.

 

§ 34.  Nalunaarusiorsinnaanermut imaluunniit naammagittaalliornermik suliaqarsinnaanermut nalileeqataasoq soraarummeersitsinerup nalaani allattuissaaq. Allattukkat minnerpaamik ukioq ataaseq toqqorneqassapput.

 

§ 35.  Nalileeqataasoq soraarummeernermi pissutsinik isornartoqarsorinnikkuni, nalileeqataasoq nalileeqataanermik nalunaarusiussaaq, Ilinniartitaanermut Naalakkersuisoqarfimmut assilillugu ilinniarfimmut nassiunneqartussamik.
Imm. 2.  Suliassaq pillugu ilinniarfik nassuiaasiussaaq, Ilinniartitaanermut Naalakkersuisoqarfimmut nassiunneqartussamik.
Imm. 3.  Ilinniartitaanermut Naalakkersuisoqarfiup qinnuteqarnera malillugu soraarummeernerup ingerlanneqarnera aamma soraarummeernermi angusat pillugit nalileeqataasoq Naalakkersuisoqarfimmut nalunaaruteqassaaq.

Soraarummeersitsisut

 

§ 36.  Soraarummeersitsisussaq, soraarummeersitsinermik aqutsisussaq aamma soraarummeernermi uppernarsaatit eqqortumik immersornissaannik qulakkiisussaq ilinniarfiup toqqassavaa, tak. § 2, imm. 2.
Imm. 2.  Pissutsit immikkut ittut atuutinngippata, soraarummeersitsisoq tassaavoq ilinniartitsisoq, ilinniartunik fagimi soraarummeerutaasumi ilinniartitsisimasut akornanniittoq.

 

§ 37.  Soraarummeersitsisoq ilinniarfimmut nalunaarutaasinnaasumut atuagassanik soraarummeersitsinerup nalaani allattuissaaq. Allattukkat minnerpaamik ukioq ataaseq toqqorneqassapput.

 

§ 38.  Ilinniarfiup qinnuteqarnera malillugu soraarummeersitsisoq soraarummeernerup ingerlanneqarnera pillugu ilinniarfimmut nalunaaruteqassaaq.

Kapitali 7
Uppernarsaasiisarneq

 

§ 39.  Soraarummeernerit ingerlanneqarnerisa kingorna piaarnerpaamik soraarummeerneq angusiffiusoq pillugu soraarummeernermik uppernarsaat, kalaallisut danskisullu oqaasertaligaq ilinniartup tigussavaa. Ilinniartup tamanna pillugu qinnuteqarneq malillugu imaluunniit tamassuma maleruagassat allat malippagit soraarummeernermik uppernarsaat tuluttut suliaritissinnaavaa.
Imm. 2.  Uppernarsaatit ilusissaat ilinniarfiup aalajangissavai aammalu Ilinniartitaanermut Naalakkersuisoqarfimmit oqartussaaffinnillu naleqquttunit akuerineqartussanik uppernarsaatinut skabeloniliorluni.
Imm. 3. Ilinniartoq faginik allami soraarummeerutigisaqaruni, soraarummeernermik uppernarsaammi naqinneq M allanneqassaaq.

 

§ 40.  Ilinniartumit tamanna pillugu qinnuteqarneq malillugu, ilinniartumut soraarummeernermi angusinngitsumut uppernarsaat ilinniarfiup tunniutissavaa.
Imm. 2.  Ilinniartitsinerup naammassineqartup annertussusia, ilinniartup ilinniarsimasatigut qaffasissusia pillugit paasissutissanik, tamakkua saqqummiineri malillugit, uppernarsaat imaqassaaq, ilinniartup ilinniarsimasatigut qaffasissusianik naliliinermut iluaqutaasinnaasut.

 

§ 41.  Soraarummeernermut ataatsimut uppernarsaat siulleq taamaallaat ataaseq nassaassaassaaq tunniunneqarlunilu.
Imm. 2.  Ilinniarfiup tamanna pillugu ilinniartumit qinnuteqarneq malillugu soraarummeernermik uppernarsaatip assilinera tunniussinnaavaa. Assilisap piviusuunera ilinniarfimmit uppernarsarneqassaaq.

 

§ 42.  Paasissutissat, uppernarsaatinik tunniussinermut tunngaviusut, soraarummeernerup naammassinerata minnerpaamik ukiut 30 kingorna ilinniarfiup toqqorsimassavai.
Imm. 2.  Ilinniarfik atajunnaarpat, imaluunniit arlaannik peqquteqartumik imm. 1 naapertorlugu uppernarsaatit ilinniarfiup toqqorsinnaanngippagit, allami isumannaatsumik toqqorsinissaq ilinniarfiup qulakkiissavaa.

Kapitali 8
Soraarummeernerit pillugit naammagittaalliuutit

 

§ 43.  Soraarummeernermut atatillugu ilinniarsimasanut tunngasut pillugit soorlu suliakkiunneqartoq, soraarummeernerup ingerlanera imaluunniit nalilernera ilinniartup tunngavilersorlugu naammagittaalliutigisinnaavaa.
Imm. 2.  Ilinniartoq angajoqqaatut oqartussaaffigineqarpat, angajoqqaatut oqartussaasut imm. 1 malillugu aamma naammagittaalliorsinnaapput.
Imm. 3.  Imm. 1 imaluunniit imm. 2 malillugu naammagittaalliut allakkatiguussaaq taavalu qitiusumik ilinniarfiup siulersuisuinut imaluunniit inuussutissarsiornermik ilinniarfimmi qitiusumik ilinniarfiup ataatsimiititaliaanut soraarummeernermi angusat pisarnertut nalunaarutiginerisa kingusinnerpaamik sapaatit akunneri 2 kingorna tunniunneqassaaq.
Imm. 4.  Naammagittaalliornermik suliassamut atugassanngorlugu ilinniartup imaluunniit angajoqqaatut oqartussaasut tamanna pillugu qinnuteqarneq malillugu suliakkiutaasup assilineranik aammalu allattariarsorluni soraarummeernerni ilinniartup akissutaasa assilinerinik tunineqassapput.
Imm. 5.  Ilinniarfiup naammagittaalliortoq naammagittaalliornermut ilitsersuutissavaa, nutaamik naliliisoqarnera imaluunniit nutaamik soraarummeertoqarnera karakteerinik appasinnerusunik inerneqarsinnaanera ilanngullugu.

 

§ 44.  § 43 naapertorlugu aalajangiineq allakkatiguussaaq tunngavilersorneqarlunilu, siunertarineqarsinnaalluni
1)  nutaamik naliliinissamik neqeroorneq,
2)  nutaamik soraarummeernissamik neqeroorneq, imaluunniit
3)  naammagittaalliut akuerineqanngitsoq.
Imm. 2.  Imm. 1 malillugu ilinniarfiup aalajangernerata kingorna ilinniartoq imaluunniit angajoqqaatut oqartussaasut erniinnaq ilinniarfiup ilisimatissavai.
Imm. 3.  Aalajangiineq nutaamik naliliinissamik imaluunniit nutaamik soraarummeernissamik malitseqarpat, aalajangiinerup tiguneranit sapaatit akunneri marluk iluini ilinniartup aalajangiineq allakkatigut akuerissavaa. Taamaanngippat nutaamik naliliisoqassanngilaq imaluunniit nutaamik soraarummeertoqarani karakteerilu siullermik anguneqartoq aalajangiusimaneqarluni.

 

§ 45.  Nutaamik naliliinissaq imaluunniit nutaamik soraarummeernissaq pillugu aalajangiisoqarpat, tak. § 44, ilinniarfik piaarnerpaamik nutaamik naliliisitsissaaq imaluunniit nutaamik soraarummeersitsilluni naliliisussanillu nutaanik toqqaalluni.
Imm. 2.  Nutaamik soraarummeerneq napparsimasumik soraarummeersitsinermut atatillugu aaqqissuunneqarsinnaavoq, tamannalu soraarummeernerit nalaanniissinnaalluni.
Imm. 3.  Naliliisussat nutaat tassaasut soraarummeersitsisoq nalileeqataasorlu naammagittaalliornermik suliassap takussutissartai pillugit ilisimatinneqareersimassapput nutaamillu naliliineq tunngavilersugaassalluni.
Imm. 4.  Nutaamik naliliinermi karakteerit anguneqartut karakteerit siullermik anguneqartut taarsissavaat, karakteerit nutaat karakteerinit siullermik anguneqartunit appasinnerussagaluarpataluunniit.
Imm. 5.  Siullermik naliliisut nutaamik naliliineq taassumalu tunngavilersuutaa pillugit ilisimatinneqassapput.

 

§ 46.  Soraarummeernermut atatillugu ilinniarfiup imaluunniit naliliisut aalajangiinerinut tunngatillugu naapertuutsitsinermut apeqqutit ilinniartup Ilinniartitaanermut Naalakkersuisoqarfimmut naammagittaalliutigisinnaavai, soraarummeernermik aaqqissuussinermut ingerlanneranullu maleruagassat malinneqarsimanersut ilanngullugit aamma suliassat suliarineqartarneri pillugu maleruagassat malinneqarsimanersut pillugu.
Imm. 2.  Ilinniartoq angajoqqaatut oqartussaaffigineqarpat, imm. 1 malillugu angajoqqaatut oqartussaasut aamma naammagittaalliorsinnaapput.
Imm. 3.  Naammagittaalliortoq pissutsinik naammagittaalliutigineqartunik ilisimatinneqarneranit kingusinnerpaamik sapaatit akunneri marluk kingorna naammagittaalliut ilinniarfimmut tunniunneqassaaq.
Imm. 4.  Imm. 1 imaluunniit imm. 2 malillugu naammagittaalliortoqarpat, naammagittaalliut suliassallu takussutissartai kiisalu ilinniarfiup suliassami nassuiaatai ilinniarfiup erniinnaq Ilinniarnermut Naalakkersuisoqarfimmut nassiutissavai. Suliassap qanoq aalajangiiffigisariaqarneranut inassuteqaammik ilinniarfiup nassuiaataa imaqarsinnaavoq.
Imm. 5.  Imm. 1 imaluunniit imm. 2 malillugu naammagittaalliornermik suliami naalakkersuisoqarfik aalajangiiguni Ilinniarnermut Naalakkersuisoqarfiup ilinniarfik aamma naliliisut ilisimatissavai.

 

§ 47.  Naammagittaalliutip suliarinerani ilinniartup ilinniarnini ingerlatiinnarsinnaavaa, tak. 46, ilinniartitsinermut pilersaarummi imaluunniit ilinniarneq pillugu maleruagassani allamik allassimasoqanngippat.

Kapitali 9
Atuutilersitsineq

 

§ 48.  Nalunaarut 1. maj 2015-imi atuutilerpoq.

 

 

Namminersorlutik Oqartussat, ulloq 18. marts 2015

 

 

Nivi Olsen

/

Mikael Kristensen