Inuussutissarsiutinik ilinniartitsinerit aamma inussutissarsiutinik pikkorissartitsinerit pillugit Inatsisartut peqqussutaanni nr. 2-mi 31. maj 1999-imeersumi § 4, imm. 2, § 7, imm. 1, § 8, imm. 4, § 12, imm. 2 aamma § 46 tunngavigalugit aalajangersarneqarput:

Inersimasunik ilinniartitsisarneq

§ 1. Inuussutissarsiutinut tunngaviusumik ilinniartitaanerit iluanni qitiusumik ilinniartitaanernut ataatsimiititaliat Ilinniartitaanermut Pisortaqarfiup akuersineratigut aalajangiisinnaapput inunnik ilinniagaqarnermikkut imaluunniit suliffeqarnikkut immikkut tunngavissaqartunik inersimasunut ilinniartitsineq pilersinneqassasoq.

Tiguneqarneq

§ 2. Qinnuteqartoq 30-nik ukioqalereersimasuussaaq, inuussutissarsiornermullu tunngasutigut naleqquttunik misilittagaqartuussalluni sivikinnerpaamik ukiuni pingasuni piffissaq tamaat sulisarnikkut misilittakkanut imaluunniit inuussutissarsiornikkut sivikinnerpaamik ukiuni sisamani piffissaq tamaat sulisarnikkut misilittakkanut naapertuuttunik. Inersimasunik ilinniartitsineq aallartinneqarsinnaassappat qinnuteqartut suliassaqarfimmi tassani suliffeqarfimmut akuerisaasumut ilinniartuunissaq pillugu isumaqatigiissuteqarsimassapput.
Imm. 2. Tiguneqarnissamut ilinniartuunissarlu pillugu isumaqatigiissuteqarnissamut tunngaviuvoq qinnuteqartoq ilinniarfiup naliliinera malillugu piffissap ilinniarfiusussap iluani ilinniarfimmi atuartitaanermik naammassinnissinnaasutut isigineqartoq, pisariaqarpat atuartitsinerup ilaanut ilaannginnissamik akuerineqarnerup kingorna.
Imm. 3. Pisuni immikkut ittuni imm. 1-imi ukioqqortussusissamik sulisimanissamillu piumasaqaatit atuutsinneqannginnissaat qitiusumik ilinniartitaanernut ataatsimiititaliat immikkut akuersissutigisinnaavaat.

§ 3. Qinnuteqartunik tigooraaneq qitiusumik ilinniarfimmit ilinniartitaanermik neqerooruteqartumit isumagineqassaq.

Sivisussusia ilusilersugaaneralu

§ 4. Suliamut pineqartumut qitiusumik ilinniartitaanermut ataatsimiititaliap inersimasunik ilinniartitsinerup ilusilersugaanera sivisussusialu aalajangersassavaa, ilinniartup suliatigut minnerpaamik inuusuttutut ilinniartup pisinnaasassaanik pisinnaasaqalernissaa, taamalu soraarummeernermi/misilitsinnermi (svendeprøve) angusaqarsinnaaneranut tunngaviusunik pisinnaasaqalernissaa isiginiarlugu.
Imm. 2. Qitiusumik ilinniarfiup, ilinniartup mesterillu suleqatigiillutik ilinniarnerminni ingerlanissaat aalajangersarsinnaavaat, taannalu ilinniartitaanermut ataatsimiititaliamut susassaqartumut akuerisassanngortillugu saqqummiunneqartassaaq.
Imm. 3. Ilinniartitsinerit ataasiakkaat ingerlanerinik naliliinermi siusinnerusukkut ilinniagarisimasaq suliffigisimasarlu sapinngisamik annertunerpaamik isiginiarneqartassapput, taamaattorli ilinniagaqarsimanerinnaq sulisimanerinnarlu ilinniartup massakkut ilinniagaata ilaanut naapertuuttut kisiisa pingaartillugit isiginiarnagit, aammali ilinniagaq tassunga assingusoq inuussutissarsiutinik ilinniartitaanerit avataanniissinnaasoq aamma suliffik tamatumunnga pissusiviusutigut sanilliunneqarsinnaasoq isiginiaatigalugit.

§ 5. Inersimasunik ilinniartitsinerit suliffeqarfinni nalinginnaasumik aallarnerneqartarput, tamatumalu kingorna ilinniarfimmi ilinniartitsineq sulinermillu ingerlatsineq paarlagaanneqartassallutik.

Ilinniartup suliffeqarfiullu inatsisitigut inissisimanerat

§ 6. Sulinermik ingerlatsineq atuarnermillu ingerlatsineq sulisitsisut inuussutissarsiutinik ilinniartitsinernut akileeqataassutigisartagaat pillugit Inatsisartut inatsisaanni pineqartunut ilaatinneqanngillat. Taamaattumik inuussutissarsiutinik ilinniartitsinerit aamma inuussutissarsiutinik pikkorissartitsinerit pillugit Inatsisartut peqqussutaanni § 36 ilinniartunut inersimasunut sunniuteqanngilaq.
Imm. 2. Ilinniartunut inersimasunut ilinniarfimmiittunut sulinikkut akissarsianut annaasanut taarsiissuteqartoqartassaaq, inuussutissarsiutinik pikkorissartitsinerit pillugit malittarisassat tunngavigalugit, kiisalu ilinniarfimmut ilinniarfimmiillu angalanermut aningaasartuutit aamma ilinniarfimmiinnerup nalaani ilinniartut illoqarfimmi ilinniartitsinerup ingerlanneqarfiani najugaqanngitsut najugaqarnerat akilerneqartassapput.
Imm. 3. Ilinniartut sulinermik ingerlatsinerminni suliffeqarfimmit akissarsiaqartinneqartassapput.

Atortuulersitsineq

§ 7. Nalunaarut manna 1. august 2000 aallarnerfigalugu atortuulersinneqarpoq.

Namminersornerullutik Oqartussat, ulloq 7. december 2000.

Lise Lennert

/

Karl Kristian Olsen