Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaat nr. 2, 31. maj 1999-imeersoq, § 7, imm. 2 aamma § 49 naapertorlugit aalajangersarneqarpoq:

§ 1. Naalakkersuisut inuussutissarsiutinik ilinniartitaanermi piginnaasat ineriartortinnissaat pillugit Naalakkersuisunut siunnersuisussanik pilersitsisapput, suliffeqarnermi inuussutissarsiutinullu ilinniartitaanermi suliassaqarfiit ineriartortinneqarnissaat siunertaralugu, aammalu inuussutissarsiutini ineriartortitsineq, suliffeqarnermi ineriartortitsineq inuussutissarsiutinullu ilinniartitaanerup iluani ineriartortitsinermi suliniutit ataqatigiissaarneqarsinnaaqqullugit.
Imm. 2. Siunnersuisoqatigiit inassuteqaateqartassapput suliassani Naalakkersuisunit saqqummiunneqartuni. Siunnersuisoqatigiit nammineerlutik suliassani suliassaqarfimminnut attuumassuteqartutut isigisaminni suliaqarsinnaapput.
Imm. 3. Siunnersuisoqatigiit inassuteqarnerminni tikkuaasinnaapput pissutsinut atuuttunut misissueqqissaarnissamik takussutissiortitsinissamillu pisariaqartitsiviusuni, tamatumunnga ilanngullugit ajornartorsiutit piffinni ataasiakkaani nunallu immikkoortuini pisut.
Imm 4. Siunnersuisoqatigiit ukiumoortumik kingusinnerpaamillu 1. april Naalakkersuisunut suliniutitik pillugu aammalu suliassaqarfimmi iluani ineriartorneq pillugu nalunaaruteqartassapput.

§ 2. Siunnersuisoqatigiit sulinerminni:
1) Ingerlatseqataassapput ataqatigiissaareqataallutillu, suliffeqarnermi illuatungeriit akornanni, inuussutissarsiornerup, suliffeqarnerup inuussutissarsiutinullu ilinniartitaanerup suliniuteqarfigineqarnerani.
2) Inuussutissarsiornerup uummaarissup pilersinneqarnissaata ineriartortitsinikkullu suliffeqarnerup eqaatsumik ingerlasuunissaasa aqqutissiuunneqarnissaat anguniassavaat, aammalu inuussutissarsiutinik ilinniartitaanerup immikkuullarissumik nalinginnaasumillu piginnaasanik ineriartortitsinermik eqqanaarisup pilersinneqarnissaa aqqutissiuutissallugu.
3) Suliffeqarnermi ilinniartitaanermilu piffissami sivikitsumi atuuttussanik siunissarlu ungasinnerusoq eqqarsaatigalugu piginnaasanik ineriartortitsinissamik pisariaqartitsinerup aaqqiivigineqarnissaa anguniassavaat, tassungalu ilanngullugit piginnaasat ineriartortinnissaanni tulleriiaarinissamut siunnersuuteqartassallutik.
4) Suliniutinik inatsisiliornikkullu ilusilersuinernik siunnersuusiortassapput, taakku aqqutigalugit sulianik ingerlatsinermi illuatungeriit pisortallu piginnaasat ineriartortinneqarnissaannut pisariaqartitsiffiusuni aningaasaleeqataanissaannik kajumilersinneqaqqullugit.
5) Siunnersuinerminni inuuneq naallugu ilinniarnermik oqartarnerup naleqquttumik pilersitsinikkut imaqartinneqarnissaa anguniassavaat.
6) Nunami tamarmi inuussutissarsiornikkut ineriartortitsineq, inuussutissarsiutinik ilinniartitaanermi suliffeqarnermilu suliniutit malittarissavaat, aammalu inuussutissarsiutit ineriartortinneqarneranni killiliussassanik aqqutissiuussisassallutik, suliffeqarnerup inuussutissarsiutinullu ilinniartitaanernut eqaatsumik iluseqartinneqarnissaat aqqutissiuutissallugu, sulisullu piginnaasaannik ineriartortitsinissaata eqqanaarneqarnissaa peqataaffigissallugu.
7) Inuussutissarsiutinik ilinniartitaanerup ineriartortinneqarnera malittarissavaat, ilinniartitaanerillu pitsaassusaat, ineriartortinneqarnerat, naleqqussarsinnaassuseqarnerat ilinniakkallu ataasiakkaat immikkoortuini ataqatigiissaarineq pillugu innersuussisassallutik.
8) Ilinniartitseqqittarnerni piginnaasallu ineriartortinnissaat inuussutissarsiornikkullu ineriartortitsineq pillugu pilersinneqartut ilusilersorneqarsimanerisa nakkutigineqarnerat peqataaffigissavaat siunnersuiffigisassallugulu.
9) Ineriartortitsineq pilersitsiortornerlu pillugit siuarsaataasinnaasut aaqqiissutit ilaatinneqarnissaat isumagissavaat, suliniutinik ilinniartitaanermi aammalu suliffeqarnermi inuussutissarsiutinillu siuarsaanermut attuumassuteqartuni.
10) Sumiiffinni ataasiakkaani, nunallu immikkoortuini attuumassuteqartut peqatigalugit, inuussutissarsiornerup ineriartortinneqarnerani, suliffeqarnermi aammalu inuussutissarsiutinut ilinniartitaanermi suliniutit aaqqissuunneqarnerannut siunnersuuteqartassapput, aammalu piffinni ataasiakkaani nunallu immikkoortuini suliniutit nuna tamakkerlugu suliniutinut tulluarsarneqarnerat peqataaffigissallugu. 

Siunnersuisoqatigiit inuttalersugaanerat inissitsiternerallu

§ 3. Siunnersuisoqatigiit ilaasortaqarput siulittaasumik Naalakkersuisunit toqqarneqartumik aammalu matuma kinguliani taaneqartunit kattuffinnit pisortaqarfinniillu sinniisumik kingoraartissamillu toqqarneqartunik:
1) NUSUKA.
2) Sulisitsisut peqatigiiffiat (GA).
3) ILIK.
4) Sulinermik Inuutissarsiuteqartut Katuffiat (SIK).
5) KANUKOKA (Ikaarsaariarnermut ataatsimiititaliat 1. maj 2008 pilersinneqarnissaasa tungaannut, tamatuma kingorna kommunit sisamaasut tamarmik sinniisaannik).
6) Sanaartornermik Ilinniarfimmi forstanderit, kiisalu ilinniarfiit teknikimik ingerlatsiffiusut sinnerlugit Saviminilerinermik Ilinniarfik.
7) Inuussutissalerinermik ilinniarfiit sinnerlugit ATI-p aamma INUILI-p forstanderii.
8) Niuernermik, kiffartuussinermik, aqutsinermik IT-millu ingerlatsiffiit sinnerlugit Niuernermik Ilinniarfiit forstanderii.
9) Takornariaqarnermut Inuussutissarsiornermullu siunnersuisoqatigiit.
10) Teknikikkut siunnersuisartut peqatigiiffiat.
Imm. 2. Immikkoortoq 1-mi pineqartut ilaasortat saniatigut Inuussutissarsiornermut Naalakkersuisoq pisinnaatitaavoq ilaasortamik siunnersuisoqatigiit suliaannut attuumassuteqartunik ilisimasaqartumik toqqaanissaminut.
Imm. 3. Ilaasortat imm. 1, nr. 6-8-mi pineqartut brancheudvalgiini siulittaasut imaluunniit ilinniarfiit forstanderiisa akornannit toqqarneqartassapput.
Imm. 4. Siunnersuisoqatigiinni ilaasortat toqqarneqatassapput qinigaaffimmut ukiunik sisamanik sivisussuseqartumut.
Imm. 5. Siunnersuisoqatigiit akunnerminni siulittaasumut tulliusussamik toqqaasassapput. Siunnersuisoqatigiit siulittaasuata peqanngiffiini siulittaasup tulliata ataatsimiinneq aquttassavaa.
Imm. 6. Siunnersuisoqatigiit suliassaqarfinnit ukunannga ataatsimeeqataasartumik ilaqartinneqassapput:
1) Aningaasarsiornermik ingerlatsiviit.
2) Kalaallit Nunaanni takornariaqarnermi inuussutissarsiornermilu siunnersuisoqatigiit.
3) Greenland Venture.
4) Kalaallit Nunaanni naatsorsueqqissaartarfik.
5) Inuussutissarsiornermut, Suliffeqarnermut Inuussutissarsiutinullu Ilinniartitaanermut Naalakkersuisoqarfik.
Imm. 7. Siunnersuisoqatigiit imm. 6-imi taaneqartut ataatsimeeqataasartut saniatigut ataatsimeeqataasartussanik toqqaasinnaapput, ataatsimiinnermi immikkut oqaluuserineqartunut ilisimasalinnik.

Ataatsimiinnerit

§ 4. Siunnersuisoqatigiit ukiumut minnerpaamik sisamariarlutik ataatsimiittassapput.
Imm. 2. Siunnersuisoqatigiit immikkut ittumik ataatsimiittassapput;
1) Naalakkersuisut piumasarippassuk,
2) siulittaasup pisariaqartippagu, imaluunniit
3) ilaasortat amerlanerussuteqartut siunnersuutigippassuk.

Suleriaasissaq

§ 5. Naalakkersuisut siunnersuisoqatigiit suleriaasissaat aalajangersassavaat.

Allattoqarfik

§ 6. Inuussutissarsiornermut, Suliffeqarnermut Inuussutissarsiutinullu ilinniartitaanermut Naalakkersuisoqarfiup siunnersuisoqatigiit allaffissornikkut sullinneqarnerat isumagissavaat.

Aningaasalersorneqarnera

§ 7. Siunnersuisoqatigiinnut ilaasortaaneq akissarsiaqarfiunngilaq. Siunnersuisoqatigiit suliaannut aningaasartuutit Inuussutissarsiornermut, Suliffeqarnermut Inuussutissarsiutinullu Ilinniartitaanermut Pisortaqarfimmit akilerneqartassapput. Kisiannili angalanernut najugaqarnernullu aningaasartuutit ilaasortanik ataatsimeeqataasartunillu toqqaasimasut aningaasartuutigisassavaat, Naalakkersuisut immikkut ittumik ataatsimiittoqarnissaanik piumasaqaateqarsimanngippata.

Atortuulersitsinermik atorunnaarsitsinermillu aalajangersakkat

§ 8. Nalunaarut 1. maj 2008-mi atuutilersinneqarpoq.
Imm. 2. Ilutigitillugulu Namminersornerullutik Oqartussat nalunaarutaat Piginnaasat pillugit siunnersuisoqatigiit pillugit nr. 3, 8. marts 2007-imeersoq atorunnaarsinneqarpoq.

Namminersornerullutik Oqartussat, ulloq 15. april 2008

Siverth K. Heilmann

/

Bent A. Sørensen