Kapitali 1
Siunertaa atorneqarfissaalu

§ 1.  Inatsisartut inatsisaanni siunertaavoq suliffeqarfinnut atuisunullu iluaqutaasumik sunniuteqartumik unammilleqatigiinnikkut inuiaqatigiinni sunniuteqarluartumik isumalluutinik atuinissamik siuarsaanissaq.

§ 2.  Inatsisartut inatsisaanni inuussutissarsiorluni suliaqarneq sunaluunniit kiisalu inuussutissarsiorluni suliaqarnissamut pisortat aningaasaatai atorlugit tapersiisarneq pineqartunut ilaapput.
Imm. 2.  Unammilleqatigiinnermik killiliineq pisortat maleruagassiinerisa toqqaannartumik malitsigisimappagu imaluunniit pisariaqartumik malitsigisariaqarsimappagu, kapitali 2-imi, 3-imi aamma 4-imi maleruagassat atuutissanngillat. Unammilleqatigiinnermik killiliineq kommunalbestyrelsimit aalajangersarneqartoq, kommunalbestyrelsip inatsisit naapertorlugit suliassanik naammassinnissinnaanissaanut pisariaqarsimappat aatsaat toqqaannartumik imaluunniit pisariaqartumik tamanut maleruagassiinerup malitsigisimassavaa.
Imm. 3.  Aalajangiineq kommunit ataatsimoorlutik aalajangigaat, takuuk inuussutissarsiornikkut suliaqarnermut il.il. aningaasaliinikkut inuussutissarsiornermik ineriartortitsinissamut iluaqusiinissamut kommunit periarfissaqarnerat pillugu Inatsisartut inatsisaat, aalajangiinernut kommunalbestyrelsimit aalajangerneqartunut sanilliunneqassaaq, takuuk imm. 2.
Imm. 4.  Unammilleqatigiinnermut ataatsimiititaliaq isumaqarpat tamanut maleruagassiineq imaluunniit tapersiisarnermut aaqqissuussaq unammilleqatigiinnermut ajoqusiisumik sunniuteqarsinnaasoq imaluunniit allatigut inuiaqatigiinni isumalluutinik sunniuteqarluartumik atuinissamut akornusiisinnaasoq, Unammilleqatigiinnermut ataatsimiititaliaq unammilleqatigiinnermut ajoqusiisumik sunniuteqarnerinik uparuaalluni Naalakkersuisunut tunngavilersukkamik oqaaseqaateqarsinnaavoq kiisalu suliassaqarfimmi unammilleqatigiinnissamik siuarsaasussanik siunnersuuteqarsinnaalluni. Naalakkersuisut Unammilleqatigiinnermut ataatsimiititaliap oqaaseqaataata tiguneranit kingusinnerpaamik sapaatit akunnerisa 4-it qaangiunneranni Unammilleqatigiinnermut ataatsimiititaliap oqaaseqaataanut akissuteqassapput. Unammilleqatigiinnermut ataatsimiititaliap piffissaliussaq sivitsorsinnaavaa.

§ 3.  Inatsisartut inatsisaanni aningaasarsianut sulinermullu pissutsit pineqartunut ilaanngillat. Taamaattoq Unammilleqatigiinnermut ataatsimiititaliap suliaqarnerminut atugassatut kattuffinnit suliffeqarfinnillu aningaasarsianut sulinermullu pissutsit pillugit paasissutissat piumasinnaavai.

§ 4.  Kapitali 2-imi aalajangersakkat suliffeqarfiup imaluunniit suliffissuup ataatsip iluani isumaqatigiissutinut, akuersinernut aamma suleriaatsinut ataqatigiissitanut atuutinngillat.
Imm. 2.  Naalakkersuisut Unammilleqatigiinnermut ataatsimiititaliap oqaaseqaataanik piniareernermini imm. 1-ip atorneqarnera pillugu maleruagassanik aalajangersaasinnaapput, ilanngullugit suliffeqarfiup imaluunniit suliffissuup ataatsip iluani isumaqatigiissutit, akuersinerit aamma suleriaatsit ataqatigiissitat qanoq paasineqassanersut pillugu maleruagassat.

§ 5.  Inatsisartut inatsisaat manna malillugu niuerfiit attuumassuteqartut killissalersorneqarnerat piumanninnermut aamma neqeroortitsinermut taarsiisarnermik aamma unammilleqatigiinnissamut periarfissaqarneranik misissuinerit tunngavigalugit pissaaq. Unammilleqatigiinnissamut periarfissaqarnera misissorneqassaaq, suliffeqarfiit akuusut niuerfimmi attuumassuteqartumi inissisimanerat uppernarsarneqarsimagaangat, aammalu inissisimaneq taanna Inatsisartut inatsisaat unioqqutinneqarsimanersoq nalornissuteqalersitsisimagaangat.
Imm. 2.  Unammilleqatigiinnermut ataatsimiititaliaq imm. 1 malillugu naliliinermut atugassatut sulianik ilisimasalinnik avataaneersunik peqataatitsisinnaavoq.

Kapitali 2
Unammilleqatigiinnermik killilersuisumik isumaqatigiissuteqarnissamut inerteqquteqarneq

§ 6.  Suliffeqarfiit isumaqatigiissutinik toqqaannartumik imaluunniit toqqaannanngitsumik unammilleqatigiinnermik killiliinissamik siunertaqartunik imaluunniit malitseqartussanik isumaqatigiissuteqarnissaat inerteqqutaavoq.
Imm. 2.  Imm. 1 malillugu isumaqatigiissutit assersuutigalugu imarisinnaavaat:
1)  pisinissamut imaluunniit tunisinissamut akiusunik imaluunniit allanik niuernermut tunngavissarititaasunik aalajangersaanerit,
2)  tunisassiornerup, tunisisarnerup, teknikkikkut inerisaanerup imaluunniit aningaasaliinerit killilersornissai imaluunniit nakkutigineqarnissai,
3)  niuerfiit imaluunniit pilersuiffiit aggulunnissaat,
4)  niuernermi suleqatinut sullississutinut assigiimmik naleqartunut naligiinngitsumik atugassarititaasussanik atuinissaq, taamaaliornikkut unammilleqatigiinnermik ajornerulersitsisussaq,
5)  isumaqatigiissuteqaqatigineqartup tapiliussatut sullississutit pissusissamisoornerminni imaluunniit niuernermi pissusiusartut malillugit isumaqatigiissummut attuumassuteqanngitsut akuerisassagai, isumaqatigiissuteqarnermut atugassarititaasussatut piumasaqaatigineqassasoq,
6)  suliffeqarfiit marluk amerlanerusulluunniit, suliassanut aalajangersimasunut suleqatigiiffimmik pilersitsinermikkut, unammilleqatigiinnikkut pissusilersornerminnik ataqatigiissitsinerat, imaluunniit
7)  tuniseqqinnerni akiusunik saneqqunneqarsinnaanngitsunik aalajangersaanerit imaluunniit allatut iliornikkut niuernermi suleqataasup ataatsip arlallilluunniit tunisinermi akiusussanut ilitsersuinernik saneqqutsisinnaanngitsinniarneri.
Imm. 3.  Imm. 1 aamma suliffeqarfiit kattusimaffiata iluani akuersinernut aammalu suliffeqarfiit akornanni ataqatigiissitamik suleriaaseqarnernut atuuppoq.
Imm. 4.  § 6, imm. 1-imik unioqqutitsinerit unitsinniarnissaat siunertaralugu, Unammilleqatigiinnermut Ataatsimiititaliaq peqqusissuteqarsinnaavoq, takuuk § 28. Imm. 1-imut atatillugu Unammilleqatigiinnermut Ataatsimiititaliap nangaanartoqartitsinera sillimaffiginiarlugu, ataatsimiititaliap aamma suliffeqarfiup neriorsuuteqarneri saneqqunneqarsinnaanngitsutut inississinnaavai, takuuk § 29.
Imm. 5.  Isumaqatigiissutit akuersinerillu imm. 1-3 malillugit inerteqqutaasut, taakkua § 7 malillugu ilaatinneqanngitsunut ilaasimanngippata, § 8 malillugu atuutsitsiviunngitsunut ilaasimanngippata, § 9 malillugu nalunaarummi pineqartunut ilaasimanngippata imaluunniit § 10 malillugu ataatsimoortunik pineqartunut ilaatitsinnginnermi ilaasimanngippata, atuuttussaanngillat.

§ 7.  § 6, imm. 1-imi inerteqquteqarneq atuutissanngilaq:
1)  isumaqatigiissut suliffeqarfiit niuerfinni kalluarneqartuni unammilleqatigiittut imaluunniit unammilleqatigiilersinnaasut akornanni isumaqatigiissuteqarneq pisimappat, niuerfinni arlaanniluunniit attuumassuteqartuni isumaqatigiissummi kalluarneqartuni isumaqatigiissuteqarnermi suleqataasut ataatsimut katillugu niuerfimmiititaat 10 procentimit annertunerunngippata, taamaattoq takuuk imm. 2 aamma 3,
2)  isumaqatigiissut suliffeqarfiit niuerfinni kalluarneqartuni unammilleqatigiinngitsut imaluunniit unammilleqatigiilersinnaanngitsut akornanni isumaqatigiissuteqarneq pisimappat, niuerfinni arlaanniluunniit attuumassuteqartuni isumaqatigiissummi kalluarneqartuni isumaqatigiissuteqarnermi suleqataasut ataatsimut katillugu niuerfimmiititaat 15 procentimit annertunerunngippata, taamaattoq takuuk imm. 2 aamma 3, imaluunniit
3)  isumaqatigiissummi suleqataasut ataatsimut katillugu kaaviiaartitaat 5 millioner koruuninit amerlanerunngippata, taamaattoq takuuk imm. 2 aamma 3.
Imm. 2.  imm. 1-imi ilaatitsinnginneq atuutissanngilaq, suliffeqarfiit imaluunniit suliffeqarfiit kattuffiata isumaqatigiissutigippagu, ataqatigiissippagu imaluunniit akuerippagu:
1)  nioqqutissanik imaluunniit kiffartuussissutinik tunisinermut imaluunniit akiusut, iluanaarutissat il.il.,
2)  tunisassiornermik imaluunniit tunisinermut killilersuinissaq,
3)  niuerfinnik imaluunniit sullitanik agguluineq, imaluunniit
4)  sioqqutsisumik neqeroorutinik iluarsiinissaq, neqerooruteqarnissamut ammaassinissamut tunngavissarititaasunik aalajangersaaneq, neqeroorutinik kinguartitsineq, neqeroorutinik sioqqutsisumik nalunaaruteqarneq imaluunniit neqerooruteqarnissaq sioqqullugu qanorluunniit ilusilimmik suleqatigiinnissaq.
Imm. 3.  § 6, imm. 1-imi inerteqquneqarneq atuutissaaq, imm. 1-imi suliffeqarfiit akornanni isumaqatigiittoqarnera, suliffeqarfiit kattuffiata iluani akuersineq aamma suliffeqarfiit akornanni suleriaatsinik ataqatigiissitsineq apeqqutaatinnagu, taakkua isumaqatigiissutit, akuersinerit imaluunniit suleriaatsinik ataqatigiissitsinerit assingusut, unammilleqatigiinnermik killiliisimappata.
Imm. 4.  Isumaqatigiissut unammilleqatigiit akornanni imaluunniit unammilleqatigiinngitsut akornanni isumaqatigiissutaasoq immikkoortikkuminaassimappat, killissaliussatut naliusoq 10 procentiusoq atuutissaaq.
Imm. 5.  Imm. 1-imi ilaatitsinnginneq atuutissaaq, nr. 1-imi aamma  2-imi niuerfimmiititat killissaliussamut naliusunit 10 procentiusumit 15 procentiusumillu, qaammatisiutit malillugit ukiuni tulleriinni marlunni 2 procentpointinik 2-init annertunerusumik annertunerusimanngippata.
Imm. 6.  Naalakkersuisut Unammilleqatigiinnermut Ataatsimiititaliamit oqaaseqaateqaqqusereernermik kingorna,  imm. 1, nr. 3 malillugu kaaviiaartitanik naatsorsuisarneq pillugu maleruagassanik, kiisalu imm. 1, nr. 1-imi aamma 2-imi, takuuk imm. 5, niuerfimmiititat annertussusissaannik annikinnerusumik qaangiinermi ilaatitsinnginnermut maleruagassanik aalajangersaasinnaapput.

§ 8.  Unammilleqatigiinnermut Ataatsimiititaliap nalunaaruteqartoqarnerata kingorna suliffeqarfiit akornanni isumaqatigiissutit, suliffeqarfiit kattuffiata iluani akuersinerit imaluunniit suliffeqarfiit akornanni suleriaatsinik ataqatigiissitsinerit § 6, imm. 1-imi inerteqquteqarnermi ilaatinngissinnaavai, Unammilleqatigiinnermut Ataatsimiititaliaq naliliiguni tamanna:
1)  tunisassiornerup imaluunniit nioqqutissanik imaluunniit kiffartuussissutinik siammarterinerup sunniuteqarluartumik ingerlanerata pitsanngorsarnissaanut iluaqutaasoq imaluunniit teknikkikkut aningaasaqarnikkulluunniit ineriartornermik siuarsaasoq,
2)  taamaaliornermi atuisartut pisisartullu iluaqutissartaasunik naleqquttumik pissarsinissaat qulakkeerneqartoq,
3)  suliffeqarfinnut siunnerfiusut taakkua angunissaannut pisariaqanngitsumik killilersuisunik pisussaaffiliinngitsut, aamma
4)  nioqqutissat imaluunniit kiffartuussissutit pineqartut ilaannut annertuumut unammilleqatigiinnissamik mattussinissamik suliffeqarfinnut periarfissiinngitsoq.
Imm. 2.  Isumaqatigiissummik, akuersinermik imaluunniit suleriaatsimik ataqatigiissitamik pineqartumik imm. 1 malillugu ilaatinneqannginnissamik piumasaqarluni nalunaaruteqarneq Atuisartoqarnermut Unammilleqatigiinnermullu Aqutsisoqarfimmut tunniunneqassaaq. Unammilleqatigiinnermut Ataatsimiititaliaq nalunaaruteqartarneq pillugu maleruagassanik aalajangersaassaaq, ilanngullugu immikkut nalunaaruteqarnermi immersugassanik atuinissaq.
Imm. 3.  Imm. 1 malillugu aalajangiinerni allanneqassaaq ilaatitsinnginneq piffissami sumi atuunnersoq. Ilaatitsinnginneq siusinnerpaamik piffissamit nalunaaruteqarnerup pineranit atuutilersinnaavoq. Ilatitsinnginneq atugassarititaasussat tunngavigalugit akuerineqarsinnaavoq.
Imm. 4.  Nalunaaruteqareernerup kingorna Unammilleqatigiinnermut Ataatsimiititaliaq naliliippat imm. 1-imi tunngavissarititaasut suli piusut, Unammilleqatigiinnermut Ataatsimiititaliap ilaatitsinnginneq sivitsorsinnaavaa. Imm. 3 taamatuttaaq atuutissaaq.
Imm. 5.  Unammilleqatigiinnermut Ataatsimiititaliap imm. 1 imaluunniit imm. 4 malillugu aalajangiineq allanngortissinnaavaa imaluunniit utertissinnaavaa, imaattoqarpat:
1)  aalajangiinermut immikkoortumi pingaaruteqartumi pissusiviusut allannguuteqarsimasut,
2)  isumaqatigiissummi, akuersinermi imaluunniit suleriaatsimi ataqatigiissitami peqataasut, atugassarititaasussat malinngippasigit, imaluunniit
3)  aalajangiineq isumaqatigiissummi, akuersinermi imaluunniit suleriaatsimi ataqatigiissitami peqataasunit paasissutissat eqqunngitsut imaluunniit uukapaatitsisut tunngavigalugit pisimappat.

§ 9.  Unammilleqatigiinnermut Ataatsimiititaliap suliffeqarfimmit imaluunniit suliffeqarfiit kattuffiannit nalunaaruteqareernerup kingorna nalunaarutigisinnaavaa, isumaqatigiissut, akuersineq imaluunniit suleriaaseq ataqatigiissitaq pissutsit Unammilleqatigiinnermut Ataatsimiititaliap ilisimasai malillugit  § 6, imm. 1-imi inerteqquteqarnermi pineqartunut ilaanngippata, taamaattumillu § 6, imm. 4 malillugu peqqusissuteqarnissamut tunngavissaqanngitsoq. Unammilleqatigiinnermut Ataatsimiititaliaq nalunaaruteqartarneq pillugu maleruagassanik aalajangersaassaaq, ilanngullugu nalunaaruteqarnermi immikkut immersugassamik atuinissaq pillugu maleruagassat.

§ 10.  Naalakkersuisut Unammilleqatigiinnermut Ataatsimiititaliamit oqaaseqaateqaqqusereernermi kingorna  isumaqatigiissutinut, akuersinernut imaluunniit suleriaatsinik ataqatigiissitanut ataatsimoortunut § 8, imm. 1-imi tunngavissarititaasunik naammassinnittunut § 6, imm. 1-imi inerteqquteqarnermi ilaatitsinnginnissaq pillugu maleruagassanik aalajangersaasinnaapput.
Imm. 2.  Suliffeqarfinnut kattuffiup iluani isumaqatigiissutit, akuersinerit imaluunniit suleriaatsit ataqatigiissitat, ataatsimoortumik ilaatitsinnginnermi  imm. 1 malillugu akuerineqarsimasumi pineqartunut ilaasut, pisumi aalajangersimasumi § 8, imm. 1-imi tunngavissarititaasunut naapertuutinngitsumik sunniuteqarsimappata, Unammilleqatigiinnermut Ataatsimiititaliap suliffeqarfinnut isumaqatigiissummi akuusunut ataatsimoortumik ilaatitsinnginneq atorunnaarsissinnaavaa.

Kapitali 3
Pissaaneqarnerusumik inissisimanermik atornerluisarneq

§ 11.  Suliffeqarfimmut ataatsimut arlalinnulluunniit pissaaneqarnerusumik inissisimanermik atornerluinissaq inerteqqutaavoq.
Imm. 2.  Imm. 1 malillugu atornerluineq assersuutigalugu pisimasinnaavoq:
1)  toqqaannartumik imaluunniit toqqaannanngitsumik pisinermi imaluunniit tunisinermi akiusunik naapertuutinngitsunik imaluunniit allanik niuernermi tunngavissarititaasunik naapertuutinngitsunik pinngitsaaliissuteqarnermi,
2)  tunisassiornermi, tuniniaanermi imaluunniit teknikkikkut inerisaanermi atuisartunut pisisartunullu ajoqutaasumik killilersuinermi,
3)  niueqatigisanut sullississutinut assigiimmik naleqartunik atugassarititaasunik naligiinngitsunik atuinermi, taamaaliornermilu unammilleqatigiinnermi ajornerusumik inissisimatitsilernermi, imaluunniit
4)  isumaqatigiissuteqarnermut atugassarititaasussatut, isumaqatigiissuteqaqataasup tapiliussatut sullississutit, pissusissamisoornerminni imaluunniit niuernermi pisartut malillugit isumaqatigiissummi ilaasunut attuumassuteqanngitsut, akuerissagai piumasaqaateqarnermi.
Imm. 3.  Imm. 1-imik unioqqutitsinerit unitsinnissaat siunertaralugu Unammilleqatigiinnermut Ataatsimiititaliaq § 28 naapertorlugu peqqusissuteqarsinnaavoq. Unammilleqatigiinnermut Ataatsimiititaliap imm. 1-imut tunngatillugu nangaanartoqartitsinera sillimaffiginiarlugu, ataatsimiititaliap aamma neriorsuutit suliffeqarfiup tunniussimasai saneqqunneqarsinnaanngitsunngortissinnaavai,  takuuk § 29.
Imm. 4.  Unammilleqatigiinnermut Ataatsimiititaliaq suliffeqarfimmit ataatsimit arlalinniilluunniit nalunaaruteqareernerup kingorna nalunaaruteqarsinnaavoq, pissusilersorneq aalajangersimasoq, pissutsit Unammilleqatigiinnermut Ataatsimiititaliap ilisimasai malillugit imm. 1-imi pineqartunut ilaanngitsut, taamaattumillu imm. 3 malillugu peqqusissuteqarnissamut tunngavissaqanngitsoq.
Imm. 5.  Unammilleqatigiinnermut Ataatsimiititaliap apeqquteqartoqarneratigut nalunaaruteqassaaq, suliffeqarfik ataaseq arlallilluunniit pissaaneqarnerusumik inissisimanermik atuinersut. Unammilleqatigiinnermut Ataatsimiititaliaq nalunaaruteqarpat, suliffeqarfik pissaaneqarnerusumik inissisimanermik atuinngitsoq, Unammilleqatigiinnermut Ataatsimiititaliap taassuminnga utertitsinissaata tungaanut nalunaaruteqarneq allanngortinneqarsinnaanani atuutissaaq.
Imm. 6.  Unammilleqatigiinnermut Ataatsimiititaliaq najoqqutassat imm. 4 imaluunniit 5 malillugit aalajangiinissamut atugassat pigineqartussat pillugit maleruagassanik aalajangersaasinnaavoq.

Kapitali 4
Unammilleqatigiinnermik equtitsisumik tapersiisarneq

§ 12.  Unammilleqatigiinnermut Ataatsimiititaliaq peqqusissuteqarsinnaavoq, inuussutissarsiornermi suliaqarnernut aalajangersimasunik iluseqartunut iluaqutaasumik pisortat aningaasaatai atorlugit tapersiissuteqarneq unitsinneqassasoq imaluunniit utertinneqassasoq.
Imm. 2.  Peqqusissuteqarneq nalunaarutigineqarsinnaavoq, tapersiissutaasoq:
1)  toqqaannartumik imaluunniit toqqaannanngitsumik unammilleqatigiinnermik equtitsinissamik siunertaqarpat imaluunniit malitseqarpat, aamma
2)  pisortat maleruagassiisarnerat naapertorlugu inatsisinut naapertuutinngippat.
Imm. 3.  Tapersiissuteqarnerup utertinneqarnissaa pillugu peqqusissuteqarneq, inuussutissarsiornermik suliffeqarfinnut namminersortunut, sullissivinnut imminut pigisunut kiisalu suliffeqarfinnut tamakkiisumik ilaannaasumilluunniit pisortanit pigineqartunut ingerlatseqatigiiffittut ingerlanneqartunut, sammitinneqarsinnaavoq. Tapersiissuteqarnerup utertinneqarnissaa pillugu imm. 1 malillugu peqqusissuteqarneq aamma suliffeqarfinnut tamakkiisumik ilaannaasumilluunniit pisortanit pigineqartunut, ingerlatseqatigiiffinnut assigusumik iluseqartumik ingerlanneqartunut, erseqqinnerusumik aalajangerneqartunut sammitinneqarsinnaasoq pillugu maleruagassanik Naalakkersuisut aalajangersaasinnaapput.
Imm. 4.  Unammilleqatigiinnermut Ataatsimiititaliap pisortanit tapiissutit utertinneqarnissaannik peqqusissuteqarnissamut piginnaatitaanera, tapersiissutit tunniutereernerisa kingorna, maleruagassat nalinginnaasut malillugit pisoqalisassaaq. Piffissaliussaq atorunnaarsinneqarsinnaavoq, Unammilleqatigiinnermut Ataatsimiititaliap nammineerluni suliniuteqarnermigut imaluunniit naammagittaalliortoqarnera tunngavigalugu suliamik aallartitsinera aallarnerfigalugu aammalu ataatsimiititaliap aalajangiinissaata tungaanut. Unammilleqatigiinnermut Ataatsimiititaliaq kingusinaartumik akiliuteqarnermi il.il. ernialiussat pillugit inatsit malillugu, utertitsillugit akiliuteqarnermut atatillugu ernianik naatsorsuissaaq, ilanngullugu unammilleqatigiinnermik equtitsisumik tapersiissutip tunniunneqartup ernialersorneqarsinnaanera.
Imm. 5.  Unammilleqatigiinnermut Ataatsimiititaliaq nalunaaruteqartoqareernerata kingorna nalunaaruteqarsinnaavoq,  pissutsit Unammilleqatigiinnermut Ataatsimiititaliap ilisimasai malillugit pisortanit tapersiissutit imm. 2, nr. 1-imi aamma 2-imi pineqartunut ilaanngitsut, taamaattumillu peqqusissuteqarnissaq tunngavissaqanngitsoq. Unammilleqatigiinnermut Ataatsimiititaliaq nalunaaruteqartarneq pillugu maleruagassanik aalajangersaasinnaavoq, ilanngullugu nalunaaruteqarnermi immikkut immersugassamik atuinissaq pillugu maleruagassat.

§ 13.  Namminersorlutik Oqartussat, kommunit il.il. inuussutissarsiornermik suliaqarnermik taamaattumik inatsimmi § 2, imm. 1-imi taaneqartumik ingerlataqarnerat unitseqqullugu Unammilleqatigiinnermut Ataatsimiititaliaq peqqusissuteqarsinnaavoq, suliaqarneq taanna:
1)  niuerfimmi pineqartumi sunniuteqarluartumik unammilleqatigiinnissamut tunngaviusunik equtitsippat, imaluunniit equtitsisinnaappat, imaluunniit
2)  sunniuteqarluartumik unammilleqatigiinnissamut tunngaviusut piunerannik imaluunniit ineriartortinneqarnerannik kigaalaqusersuippat, imaluunniit kigaalaqusersuinissatut atuussinnaappat.
Imm. 2.  Inuussutissarsiornermik suliaqarneq inatsimmi tunngaveqartumik ingerlanneqarpat peqqusissuteqarneq nalunaarutigineqarsinnaanngilaq.
Imm. 3.  Allatut aalajangiisoqanngippat peqqusissuteqarneq ingerlaannaq atuutilissaaq.

§ 14.  § 13-imi maleruagassat atuupput suliffeqarfinnut, peqatigiiffinnut, aningaasaateqarfinnut il.il. pisortani oqartussaasut toqqaannartumik imaluunniit toqqaannanngitsumik piginnittuunermikkut, aningaasalersuinermi peqataanermikkut, maleruagassani atuuttuni imaluunniit allatut ittumik immikkoortortamut aalajangiisuusumik sunniuteqarfigisaannut.

Kapitali 5
Suliffeqarfiit kattunnerannik nakkutiginninneq

§ 15.  Kapitalimi matumani aalajangersagaq atorneqassaaq, suliffeqarfiit peqataasut ataatsimut katillugu ukiumut Kalaallit Nunaanni minnerpaamik 100 mio. koruuninik kaaviiaartitaqarpata, aammalu suliffeqarfinni peqataasuni minnerpaamik marluk tamarmik immikkut ataatsimut katillugu ukiumut Kalaallit Nunaanni minnerpaamik 50 mio. koruuninik kaaviiaartitaqarpata.
Imm. 2.  Kattunneq suliffeqarfiup ataatsip arlallilluunniit ilaannik pisinikkut pilersimappat, tunisisumut imaluunniit tunisisunut tunngatillugu imm. 1-imi kaaviiaartitanik naatsorsuinermi taamaallaat kaaviiaartitat pigisanut tiguneqartunut tunngasut eqqarsaatigineqassapput.
Imm. 3.  Taamaattoq imm. 2-imi pineqartutut pisinerit marluk arlallilluunniit, inuit imaluunniit suliffeqarfiit taakkua akornanni ukiut marluk iluanni pisut, kattunnertut ataasiinnartut piffissami kingullermik akiliinermi pisimasutut isigineqassapput.
Imm. 4.  Naalakkersuisut Unammilleqatigiinnermut Ataatsimiititaliap oqaaseqaateqaqquneqareernerata kingorna imm. 1 malillugu kaaviiaartitanik naatsorsuisarneq pillugu maleruagassat erseqqinnerusut aalajangersassavaat, ilanngullugu suliffeqarfinnut aningaasanik suliaqartunut kaaviiaartitanut killissaliussat taaneqartut nalillit allat tunngavigalugit naatsorsorneqartassasut pillugu maleruagassat.

§ 16.  Kattunneq Inatsisartut inatsisaanni matumani paasineqarpoq tassaasoq:
1)  suliffeqarfiit marluk imaluunniit arlallit maannamut imminnut attuumassuteqarsimanngitsut suliffeqarfimmut ataasiinnarmut ataatsimuulersinneqarpata, imaluunniit
2)  inuk ataaseq imaluunniit inuit arlallit, minnerpaamik suliffeqarfimmik ataatsimik imaluunniit suliffeqarfimmik ataatsimik arlalinnilluunniit nakkutigisaqareersut, piginneqataassutinik pisiortornikkut imaluunniit pigisanik isumaqatigiissuteqarnikkut allatulluunniit suliffeqarfimmi ataatsimi arlalinniluunniit allani tamakkiisumik imaluunniit ilaannik toqqaannartumik imaluunniit toqqaannanngitsumik nakkutiginnilerpata.
Imm. 2.  Suliffeqarfiit akornanni inuussutissarsiornermi suliassami suleqatigiinnissamik pilersitsineq, ataavartussamik tunngaveqartumik inuussutissarsiornermi suliassap atuuffiinik tamaginnik namminersortumik isumaginniffiusussaq, imm. 1, nr. 2 malillugu kattunneruvoq.
Imm. 3.  Inatsit manna malillugu suliffeqarfimmut nakkutiginninneq, pisinnaatitaaffitsigut, isumaqatigiissutitigut imaluunniit allatut iluseqartumik, ataasiakkaarlugit imaluunniit ataatsimoortillugit suliffeqarfiup ingerlanneqarneranut aalajangiisuusumik sunniuteqarnissamut periarfissaqalersitsisumik anguneqartarpoq.
Imm. 4.  Imm. 1 naapertorlugu kattunneq pisanngilaq:
1)  taarsigassarsiniartarfiit, suliffeqarfiit aningaasalersuisartut imaluunniit sillimmasiisarfiit, pappiaqqanik aningaasanik nalilinnik nammineq akilikkaminnik imaluunniit allat akiligaannik aningaasanik nuussisarnermik niuernermillu ilaqartumik nalinginnaasumik suliaqartut, tuniniaaqqinnissaq siunertaralugu piginneqataassutinik suliffeqarfimmi pisiarisimasaminnik pigisaqarallartuuppata, suliffeqarfiup unammilleqatigiinnikkut pissusilersorneranik aalajangersaanissaq siunertaralugu piginneqataassutinut taakkununnga atasumik taasisinnaatitaanerminnik atuinatik imaluunniit suliffeqarfiup taassuma imaluunniit taassuma pigisaanik imaluunniit piginneqataassutinik taakkuninnga tamakkiisumik ilaannaasumilluunniit tuninissaanik piareersaanissaq siunertaralugu taasisinnaatitaanermik taassuminnga atuillutik  aammalu tunisineq pigisaqalernerup kingorna kingusinnerpaamik ukiup ataatsip qaangiunnerani tunisineq pilluni,
2)  nakkutiginninneq inummit akiliisinnaajunnaartarneq il.il. pillugu inatsit malillugu suliffeqarfimmik pigisaqarsinnaasumik pigineqalerpat, imaluunniit
3)  imm. 1, nr. 2-imi aningaasanik nuussinerit taaneqartut ingerlatseqatigiiffinnik piginnittunit tamatuma saniatigut namminersorlutik inuussutissarsiornermi suliaqarnermik ingerlatsinatik taamaallaat suliffeqarfinnik allanik piginnittuusunit ingerlanneqarpata, taamaattoq taasisinnaatitaanerit piginneqataassutinut atasut pigisaat, pingaartumik suliffeqarfinni piginneqataassuteqarfiusuni pisortatut oqartussaasussani aamma nakkutilliinermik oqartussaasussani ilaasortassanik toqqaanermut atatillugu, aningaasaliinerit taakkua tamakkiisumik nalingannik attassiinnarnissamut taamaallaat atorneqarnissaat aammalu toqqaannartumik imaluunniit toqqaannanngitsumik suliffeqarfinni taakkunani unammilleqatigiinnikkut pissusilersornermik aalajangiinissamut atorneqannginnissaat killilersuutigineqarluni.
Imm. 5.  Unammilleqatigiinnermut Ataatsimiititaliap piumasaqartoqarneratigut imm. 4, nr. 1-imi piffissaliussaq sivitsorsinnaavaa, taarsigassarsiniartarfiup, suliffeqarfiup aningaasalersuisartup imaluunniit sillimmasiisarfiup uppernarsarpagu, piffissaliussatut aalajangersagaasup iluani tunisinissamut naleqquttumik periarfissaqarsimanngitsoq.

§ 17.  Kattunneq Inatsisartut inatsisaanni matumani pineqartunut ilaasoq, kattunnissamut isumaqatigiissutip atsiorneqareernerata kingorna, tigusinissamut neqeroorutip tamanut ammasumik saqqummiunneqareernerani imaluunniit piginneqataassutaasoq nakkutiginnitsitsisoq pisiarineqareeraangat aammalu taassuma piviusunngortinneqannginnerani Atuisartoqarnermut Unammilleqatigiinnermullu Aqutsisoqarfimmut nalunaarutigineqassaaq.
Imm. 2.  Atuisartoqarnermut Unammilleqatigiinnermullu Aqutsisoqarfiup kattunnissaq nalunaarutigineqarsimasoq tamanut ammasumik saqqummiussinnaavaa. Tamanut ammasumik saqqummiussinermi ilaassapput kattunnermi peqataasut atii, kattunnerup suussusaa aammalu aningaasaqarnikkut suliassaqarfiit kalluarneqartut.
Imm. 3.  Naalakkersuisut Unammilleqatigiinnermut Ataatsimiititaliamut oqaaseqaateqaqqusereernermik kingorna kattunnernik nalunaarutiginnittarneq pillugu maleruagassanik erseqqinnerusunik aalajangersaasinnaapput, ilanngullugit nalunaarutiginninnermi immersugassanik immikkut ittunik atuinissaq pillugu maleruagassat, aammalu kattunnissamik nalunaarutiginninnermik isertuussassaanngitsutut ilusilimmik nassiussisarneq pillugu.

§ 18.  Naalakkersuisut kattunnermik nalunaarutiginninnermut akiliummik aalajangersaasinnaapput.
Imm. 2.  Akiliutit nalunaarutiginninnermut peqatigitillugu Atuisartoqarnermut Unammilleqatigiinnermullu Aqutsisoqarfimmut akilerneqassapput. Akiliinermut uppernarsaat nalunaarutiginninnermut ilanngunneqassaaq. § 23, imm. 1-imi piffissaliussaq ulloq aqutsisoqarfiup nalunaarutiginninnerup tamakkiisup saniatigut akiliummik akiliisimanermut uppernarsaammik tigusinerata aallarnerfigalugu aallartissaaq.
Imm. 3.  Kattunneq nalunaarutigineqarsimasutut isigineqassanngilaq, imm. 2 malillugu piumasaqaateqartoqaraluartoq akiliut akilerneqarsimanngippat.
Imm. 4.  Imm. 2 malillugu akiliummut akiliutaareersoq utertillugu akilerneqassanngilaq, imaattoqarsimanngippat:
1)  aningaasanik nuussineq nalunaarutigineqartoq nalunaarutigineqartussaatitaanngitsoq,
2)  nalunaaruteqarnerup tamakkiisuunissaa sioqqullugu nalunaaruteqarneq tunuartinneqartoq, imaluunniit
3)  § 22, imm. 1 imaluunniit 7 malillugu aalajangiisoqarnissaa sioqqullugu nalunaaruteqarneq tunuartinneqartoq, aammalu tunuartitsinermut oqartussaasup allap suliffeqarfiit kattunnermik nalunaarutiginninnermi ilaasut ataatsimoortilernissaannut itigartitsisimaneranik pissuteqartoq.

§ 19.  Unammilleqatigiinnermut Ataatsimiititaliaq aalajangiissaaq kattunneq akuerineqarsinnaanersoq imaluunniit inerteqquteqarfigineqassanersoq, taamaattoq takuuk imm. 7.
Imm. 2.  Kattunneq unammilleqatigiinnerup sunniuteqarluarnissaanik, pingaartumik pilersitsinerup malitsigisaanik imaluunnit pissaaneqarnerusumik inissisimanermik nukittortitsisumik, annertuumik akimmisaartitsinngitsoq akuerineqassaaq. Kattunneq unammilleqatigiinnerup sunniuteqarluarnissaanik, pingaartumik pilersitsinerup malitsigisaanik imaluunniit pissaaneqarnerusumik inissisimanermik nukittortitsisumik, annertuumik akimmisaartitsisoq inerteqquteqarfigineqassaaq.
Imm. 3.  Suliassanut suleqatigiilernermik pilersitsisoqartillugu § 16, imm. 2 malillugu kattunnerusumik, aammalu suliffeqarfiit imminnut attuumassuteqanngitsut unammilleqatigiinnermi pissusilersornerisa ingerlaannarnissaannik siunertaqartumik imaluunniit ataqatigiissitsisumik, ataqatigiissitsineq taanna aningaasanik nuussineq akuerineqarsinnaanersoq aalajangersinnaajumallugu  §  6, imm. 1-imi aamma § 8, imm. 1-imi tunngavissarititaasut malillugit nalilersorneqassaaq.
Imm. 4.  Imm. 3 malillugu nalilersuinermi Unammilleqatigiinnermut Ataatsimiititaliap pingaartumik mianerissavai:
1)  ataatsikkut suliffeqarfiit marluk amerlanerusulluunniit pilersinneqartut, suliassanut suleqatigiilernermi pineqartumisuulli malunnarluartumik niuerfimmiilernersut imaluunniit niuerfimmut tassunga imaluunniit niuerfimmut tassunga assingusumut niuerfimmut tassunga qanittumik atasumut tunngatillugu niuerfimmi suliaqarnerup siornaniilernersut imaluunniit kingornaniilernersut, aamma
2)  suliffeqarfiit peeqataasut suliassanut suleqatigiilernermik pineqartumik pilersitsinermik toqqaannartumik pissuteqartumik ataqatigiilernerminni, nioqqutissat imaluunniit kiffartuussissutit pineqartut annertunersaannut unammilleqatigiinnissamut akornusiinissamut periarfissaqalernersut.
Imm. 5.  Kattunneq Inatsimmi matumani pineqartunut ilaasoq, nalunaarutigineqareersimanngikkuni imaluunniit Unammilleqatigiinnermut Ataatsimiititaliaq imm. 1 naapertorlugu akuersissuteqareersimanngippat, piviusunngortinneqassanngilaq. Tamanna kattunneq piaartumik Atuisartoqarnermut Unammilleqatigiinnermullu Aqutsisoqarfimmut nalunaarutigineqarpat aammalu pisisup taasisinnaatitaanerit pappiaqqanut nalilinnut pineqartunut atasut atunngippagit imaluunniit aningaasaliinermi nalingata tamakkiisup  pigiinnarnissaa siunertaralugu aammalu Unammilleqatigiinnermut Ataatsimiititaliap immikkut ittumik saneqqutsinissamut akuersissuteqarneratigut, takuuk imm. 6, tamanut ammasumik tigusinissamut neqeroorummik imaluunniit pappiaqqani nalilinni tulleriissaartumik aningaasanik nuussinermik piviusunngortitsinissamut akornutaanngilaq, ilanngullugit taamaattut, allanut pappiaqqanut nalilinnut allanngortinneqarsinnaasut, niuerfimmi aningaasanut niuerfittut ittuni tunineqarsinnaasut, taamaaliornikkut tuniniaasunit assigiinngitsunit nakkutiginninnermik pisisoqartarluni, takuuk § 16.
Imm. 6.  Unammilleqatigiinnermut Ataatsimiititaliaq imm. 5-imi aalajangersakkap saneqqunneqarnissaanut immikkut ittumik akuersissuteqarsinnaavoq aammalu tassunga atatillugu unammilleqatigiinnerup sunniuteqarluartuunissaata qulakkeerneqarnissaa siunertaralugu atugassarititaasussanik ilanngussisinnaalluni imaluunniit peqqusissuteqarsinnaalluni.
Imm. 7.  Atuisartoqarnermut Unammilleqatigiinnermullu Aqutsisoqarfiup imm. 1 apeqqutaatinnagu, suliassanik suliarinninneq pisariillisagaasoq malillugu kattunneq akuerisinnaavaa, aqutsisoqarfik isumaqaruni kattunneq paasissutissat pigineqartut tunngavigalugit aqutsisoqarfiup tungaaniit akerliliissuteqarnissamut pissutissaqalersitsinngitsoq.

§ 20.  Nalunaarutiginninnerup tamakkiisup tigunerata kingorna kingusinnerpaamik ulluinnaat 40-it qaangiunneranni, taamaattoq takuuk § 18, imm. 2, kattunneq akuerineqarsinnaanersoq aalajangiisoqassaaq, ilanngullugu kattunneq suliassanik suliarinninneq pisariillisagaasoq malillugu akuersissuteqarfigineqarsinnaanersoq. Piffissaliussap taassuma iluani kattunneq immikkut misissuiffigineqassanersoq pillugu aalajangiisoqarsinnaavoq.
Imm. 2.  Kattunnerup immikkut misissuiffigineqarnera aallartinneqarpat, takuuk imm. 1, oqaaseqatigiit aappaat, imm. 1-imi piffissaliussap taaneqartup naareernerata kingorna kingusinnerpaamik ulluinnaat 90-it qaangiunneranni kattunnissaq pillugu akuersissuteqarnissaq imaluunniit inerteqquteqarnissaq pillugu aalajangiisoqassaaq.
Imm. 3.  Suliffeqarfiup peqataasup ataatsip arlallilluunniit neriorsuut nutaaq imaluunniit iluarsisaq siunnersuutigippassuk, imm. 2-imi piffissaliussaq ulluinnaat 20-it tikillugit sivitsorneqassaaq. Piffissaliussaq taamaallaat sivitsorneqassaaq piffissami neriorsuummik tunniuissiffiusumi imm. 2 malillugu aalajangiisussaagaluarnermit ulluinnat 20-init ikinnerusut sinnerussimappata, taamaalillunilu neriorsuut nutaaq imaluunniit iluarsisaq tunngavigalugu kattunnermik nalilersuinissamut ataatsimut katillugit ulluinnaat 20-iullutik.
Imm. 4.  Aammattaaq imm. 2-imi piffissaliussaq Unammilleqatigiinnermut Ataatsimiititaliap aalajangiineratigut sivitsorneqarsinnaavoq, tunngavissarititaalluni suliffeqarfik imaluunniit suliffeqarfiit nalunaarutiginnissimasut tamatuminnga piumasaqarsimassasut imaluunniit taamaattoqarnissaanik akuersisimallutik. Sivitsuineq ulluinnarnit 20-init sivisunerusinnaanngilaq.
Imm. 5.  Piffissaliussat imm. 1-4 malillugit piffissaliunneqartut iluanni aalajangiisoqarsimanngippat, tamanna kattunnermik akuersilluni aalajangiisimanertut isigineqassaaq.

§ 21.  Unammilleqatigiinnermut Ataatsimiititaliaq kattunnermut akuersissuteqarnermut, takuuk § 19, imm. 2, atugassarititaasunik ilanngussisinnaavoq imaluunniit peqqusissuteqarsinnaalluni, ilanngullugu suliffeqarfiit peqataasut kattunnerup ajoqutaasumik sunniuteqarnissaa peerniarlugu neriorsuummik Unammilleqatigiinnermut Ataatsimiititaliamut tunniussimasaminnik naammassinninnissaasa qulakkeerneqarnissaa.
Imm. 2.  Atugassarititaasut imaluunniit peqqusissuteqarneq ilaatigut tassaasinnaapput suliffeqarfiit peqataasut:
1)  suliffeqarfik, suliffeqarfiup ilaa, pigisat imaluunniit allat piginnittut soqutigisaat tunissagaat,
2)  allanik isersinnaasoqassasoq nassuerutigissagaat imaluunniit
3)  allanik sunniuteqarluartumik unammilleqatigiinnermik siuarsaasinnaasunik iliuuseqassasut.
Imm. 3.  Kattunnerup akuersissuteqarfigineqareernerata kingorna Unammilleqatigiinnermut Ataatsimiititaliaq suliffeqarfiit peqataasut ataatsimiititaliamut neriorsuutaannik piffissaq eqqorlugu aammalu eqqortumik naammassinninnissaasa qulakkeernissaannut pisariaqartumik peqqusissuteqarsinnaavoq, takuuk imm. 1.

§ 22.  Unammilleqatigiinnermut Ataatsimiititaliap kattunnermik akuersissuteqarneq utertissinnaavaa:
1)  Unammilleqatigiinnermut Ataatsimiititaliap aalajangiinera annertuumik annertussusilimmik paasissutissanik, suliffeqarfiit peqataasut ataatsip arlallilluunniit pisuussutigisaanik, eqqunngitsunik uukapaatitsisunillu tunngaveqarsimappat, imaluunniit
2)  suliffeqarfiit peqataasut atugassarititaasumik imaluunniit peqqusissutaasumik malinninngippata, takuuk § 21, imm. 1.

§ 23.  Unammilleqatigiinnermut Ataatsimiititaliaq § 19, imm. 1 malillugu kattunnermik piviusunngortinneqareersimasumik inerteqquteqarnissaq pillugu aalajangiinermigut, suliffeqarfiit imaluunniit pigisat tiguneqartut imaluunniit kattussimasut aggulunnissaannik imaluunniit ataatsimoorullugu nakkutiginninnerup imaluunniit allap suulluunniit sillimaniarnermut maleruagassap unitsinneqarnissaanik peqqusissuteqarsinnaavoq, sunniuteqarluartumik unammilleqatigiinnermik pilersitseqqissinnaasussamik.

Kapitali 6
Tamanut ammatitsineq aamma allagaatinik takunnissinnaaneq

§ 24.  Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat Inatsisartut inatsisaat manna malillugu sulianut atuutinngilaq, tassani ilaanatik § 4, imm. 2, § 7, imm. 6, § 8 imm. 2, oqaaseqatigiit aappaat, § 9, oqaaseqatigiit aappaat, § 10, imm. 1, § 11, imm. 6, § 12, imm. 3, oqaaseqatigiit aappaat aamma imm. 5, oqaaseqatigiit aappaat, § 15, imm. 4, § 17, imm. 3, § 26, imm. 3, aamma § 34, imm. 3 malillugit aalajangersakkanik aalajangersaanissaq pillugu suliat. Taamaattoq pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni § 4, imm. 2, aamma § 6 atuutissapput. Paasissutissat Inatsisartut inatsisaat manna malillugu pissarsiarineqarsimasut ingerlatsivimmut oqartussamut allamut tunniunneqarsimappata oqaaseqatigiit siulliit aamma oqaaseqatigiit aappaat aamma atuutissapput.
Imm. 2.  Unammilleqatigiinnermut Ataatsimiititaliap oqaaseqaataa tunngavilersugaasoq aamma Naalakkersuisut § 2, imm. 4 malillugu akissuteqaataat, kiisalu Unammilleqatigiinnermut Ataatsimiititaliap Inatsisartut inatsisaat malillugu aalajangiineri tamanut ammasumik saqqummiunneqassapput. Aammattaaq aalajangiinerit Unammilleqatigiinnermut Ataatsimiititaliaq sinnerlugu Atuisartoqarnermut Unammilleqatigiinnermullu Aqutsisoqarfimmit aalajangiunneqartut, aalajangiineq Inatsisartut inatsisaata atorneqarneranik paasinninnissamut pingaaruteqartutut imaluunniit allatigut tamanut ammasumik soqutiginaateqartutut nalilerneqarpat, tamanut ammasumik saqqummiunneqassapput. Suliani § 38 innersuussutigalugu akileeqqusissuteqarnermik pineqaatissiisoqartillugu imaluunniit aalajangiisoqartillugu, pineqaatissiineq, akileeqqusissuteqarnermik akuersineq imaluunniit taassuma naalisarnera tamanut ammasumik saqqummiunneqassaaq.
Imm. 3.  Unammilleqatigiinnermut Ataatsimiititalia suliaqarnera aammalu nalinginnaasumik nassuiaasiai pillugit paasissutissat Unammilleqatigiinnermut Ataatsimiititaliap tamanut ammasumik saqqummiussinnaavai.
Imm. 4.  Imm. 2 aamma 3 malillugit tamanut ammasumik saqqummiinermi pissutsit teknikkimut tunngasut, ilanngullugit ilisimatusarneq, tunisassioriaatsit, tunisassiat kiisalu ingerlatsinermi niuernermilu isertuussassat, pillugit paasissutissat, inummut imaluunniit suliffeqarfimmut paasissutissanik peqarfiusumut aningaasaqarnikkut annertuumik pingaaruteqarsimappata, tamanut ammasumik saqqummiunneqassanngillat. Aammattaaq suliffeqarfinni Aningaasaqarnermut nakkutilliisoqarfimmit nakkutigineqartuni sullitat ataasiakkaat pillugit paasissutissat tamanut ammasumik saqqummiunneqassanngillat.
Imm. 5.  Unammilleqatigiinnermut Ataatsimiititaliamut paasissutissanik tunniussisussaq, ataatsimiititaliap siulitaasuanut piumasaqarsinnaavoq, paasissutissat imm. 4 naapertorlugu tunniuteqqusaanngitsut imaluunniit tamanut ammasumik pissarsiarineqarsinnaasussaanngitsut, aamma ataatsimiititaliami ilaasortanut tunniunneqassanngitsut. Siulittaasup inaarutaasumik aalajangissavaa paasissutissat qanoq annertutigisumik aammalu qanoq iluseqartumik tunniunneqartariaqaraluarnersut.

§ 25.  Pisortat ingerlatsineranni suliassat suliarineqartarnerat pillugu Inatsisartut inatsisaat Inatsisartut inatsisaat manna malillugu suliani atuuppoq. Suliani pisortat ingerlatsineranni suliassat suliarineqartarnerat pillugu Inatsisartut inatsisaat malillugu suliami akuusumut tusarniaaffiusussaasuni, aalajangiinissamut missingiut tamaat suliamut akuusumut tusarniaassutigineqarnissaa pineqartunut ilaavoq. Oqaaseqaateqarnissamut piffissaliussaq minnerpaamik sapaatit akunnerinik 3-inik sivisussuseqassaaq, tamatumani suliaq Unammilleqatigiinnermut Ataatsimiititaliamut saqqummiunneqareersimanngippat.

Kapitali 7
Unammilleqatigiinnermut oqartussaasoq, aaqqissuussaaneq aamma piginnaatitaaffiit

§ 26.  Unammilleqatigiinnermut Ataatsimiititaliap Inatsisartut inatsisaata matuma aammalu peqqussutit Inatsisartut inatsisaat manna malillugu aalajangersarneqartut malinneqarnissaat nakkutigissavaa. Unammilleqatigiinnermut Ataatsimiititaliap suliassaq nammineerluni suliniuteqarnermigut, nalunaarutiginnittoqarnerani imaluunniit naammagittaalliuutaasoq tunngavigalugu suliarisinnaavaa. Unammilleqatigiinnermut Ataatsimiititaliap aalajangissavaa suliami misissuinissamut imaluunniit aalajangiinissamut naammattumik pissutissaqarnersoq, ilanngullugu suliassamik suliarinninneq utaqqiisaasumik imaluunniit inaarutaasumik unitsinneqassanersoq. Taamatuttaaq suliffeqarfiit siusinnerusukkut § 29 malillugu neriorsuuteqareersimappata, Unammilleqatigiinnermut Ataatsimiititaliaq aalajangersinnaavoq suliassaq suliariniarnagu.
Imm. 2.  Atuisartoqarnermut Unammilleqatigiinnermullu Aqutsisoqarfik Inatsisartut inatsisaat manna malillugu suliani Unammilleqatigiinnermut Ataatsimiititaliamut allattoqarfiuvoq aammalu Unammilleqatigiinnermut Ataatsimiititaliaq sinnerlugu Inatsisartut inatsisaannik ulluinnarni allaffissornikkut aqutsineq isumagisaralugu. Atuisartoqarnermut Unammilleqatigiinnermullu Aqutsisoqarfik sulinermini  Unammilleqatigiinnermut Ataatsimiititaliaq assigalugu arlaannaannulluunniit attuumassuteqanngitsumik atuuppoq.
Imm. 3.  Unammilleqatigiinnermut Ataatsimiititaliap suleriaasissaa aammalu Unammilleqatigiinnermut Ataatsimiititaliap aamma Atuisartoqarnermut Unammilleqatigiinnermullu Aqutsisoqarfiup sulinerannut maleruagassat erseqqinnerusut Unammilleqatigiinnermut Ataatsimiititaliamut ilaasortassanik inassuteqartarnermut toqqaasarnermullu, Unammilleqatigiinnermut Ataatsimiititaliap siulittaasuanit inassuteqaateqarnikkut piffissap atuuffissaasup naanissaa sioqqullugu ataatsimiititaliami ilaasortanik soraarsitsisarnermut maleruagassat kiisalu Unammilleqatigiinnermut Ataatsimiititaliami ilaasortat Inatsisartuni Naalakkersuisunilu il. il. ilaasortat aningaasarsiaqartitaanerat il. il. pillugit Inatsisartut inatsisissaannut naapertuuttumik aningaasarsiaqartinneqarnissaat pillugu maleruagassat Naalakkersuisut aalajangersassavaat.

§ 27.  Unammilleqatigiinnermut Ataatsimiititaliaq siulittaasoqarpoq aammalu 6-inik ilaasortaqarluni. Siulittaasoq aamma ilaasortat piffissamut ukiut 4-it tikillugit sivisussusilimmut Naalakkersuisunit toqqarneqassapput. Unammilleqatigiinnermut Ataatsimiititaliaq pisortani namminersortunilu inuussutissarsiornermi suliffeqarfinnut tamatigoortumik ilisimasaqassaaq, ilanngullugu pissutsit inatsisilerinermut, aningaasaqarnermut, aningaasalersuisarnermut aamma atuisartoqarnermut tunngassuteqartut. Siulitaasoq aamma Unammilleqatigiinnermut Ataatsimiititaliami ilaasortat pingasut inuussutissarsiornermi atuisartoqarnermilu soqutigisaqarnermut attuumassuteqassanngillat. Ilaasortaq ataaseq inuussutissarsiornermut kattuffinnit ataatsimoortunit inassuteqarnerat malillugu, ilaasortaq ataaseq atuisartoqarnermut kattuffinnit ataatsimoortuni inassuteqarneq malillugu aamma ilaasortaq ataaseq immikkut pisortat inuussutissarsiornermik ingerlatsinerannik ilisimasaqartoq Naalakkersuisut aamma KANUKOKA-p ataatsimoorlutik inassuteqarnerat malillugu Naalakkersuisut toqqassavaat. Unammilleqatigiinnermut Ataatsimiititaliami ilaasortat inuttut suliatigullu piginnaasaqarnerat tunngavigalugu toqqarneqassapput, aammalu sulinerminni arlaannaannulluunniit attuumassuteqanngitsumik atuutissallutik.

§ 28.  Peqqusissuteqarnerit Unammilleqatigiinnermut Ataatsimiititaliap unammilleqatigiinnermi killilersuinerni ajoqutaasumik sunniutaasut unitsinneqarnissaat siunertaralugu § 6, imm. 4, oqaaseqatigiit siulliit, imaluunniit § 11, imm. 3, oqaaseqatigiit siulliit malillugit nalunaarutigisinnaasaat, ilaatigut tassaasinnaapput:
1)  tamakkiisumik imaluunniit ilaannaasumik isumaqatigiissutit, akuersinerit, niuernermi tunngavissarititaasut atorunnaarsinneqarneri,
2)  akiusut imaluunniit iluanaarutit allassimasut qaangerneqaqqusaanngitsut, imaluunniit akiusunik imaluunniit iluanaarutinik naatsorsuinermi naatsorsuinermut maleruagassat aalajangersimasut atorneqassasut peqqusissuteqarneq,
3)  suliffeqarfiit pineqartut ataaseq arlallilluunniit tunisinermut assingusumut suliffeqarfiup nalinginnaasumik atugassarititaatitai atuuttut malillugit pisisartunut erseqqinnerusumik allassimasunut tunisisarnissamik pisussaaffeqartut. Taamaattoq suliffeqarfik tamatigut aningaasanngorlugit akiliisarnissaq imaluunniit toqqissisimanartumik qularnaveeqqusiisarnissaq piumasarisinnaavaa,
4)  attaveqarnermi atortorissaarutinik, nioqqutissamik imaluunniit kiffartuussissummik neqerooruteqarsinnaanissamut pisariaqartunik atuisinnaatitsisoqassasoq peqqusissuteqarneq, imaluunniit
5)  peqatigiilluni niuernermut tunngavissarititaasut nalinginnaasut Atuisartoqarnermut Unammilleqatigiinnermullu Aqutsisoqarfimmut nalunaarutigisarnissaannik pisussaaffeqartut.
Imm. 2.  Imm. 1, nr. 5 malillugu peqqusissuteqarneq, piffissamit aalajangiinerup inaarutaasumit pineranit ukiuni marlunni atuuppoq.

§ 29.  Neriorsuutit suliffeqarfinnit tunniunneqartut aammalu Unammilleqatigiinnermut Ataatsimiititaliap § 6, imm. 1-imut, imaluunniit § 11, imm. 1-imut tunngatillugu nalorninartoqartitsinerinik naammassinnittut, ataatsimiititaliamit suliffeqarfinnit saneqqunneqarsinnaanngitsinneqarsinnaapput. Neriorsuut piffissamut killiligaasinnaavoq.
Imm. 2.  Neriorsuutip saneqqunneqarsinnaanngitsinneqareernerani, takuuk imm. 1, Unammilleqatigiinnermut Ataatsimiititaliaq neriorsuutip tunniunneqartup piffissaq eqqorlugu aammalu eqqortumik naammassineqarnissaata qulakkeerneqarnissaanut pisariaqartumik peqqusissuteqarsinnaavoq.
Imm. 3.  Unammilleqatigiinnermut Ataatsimiititaliap imm. 1 malillugu aalajangiineq utertissinnaavaa, imaattoqarpat:
1)  pissusiviusut aalajangiinermut immikkoortumi pingaaruteqartumi allannguuteqarsimappata,
2)  isumaqatigiissummi, akuersinermi imaluunniit suleriaatsimi ataqatigiissinneqartumi peqataasut, neriorsuummut tunniunneqartumut akerliusumik iliuuseqarpata, imaluunniit
3)  aalajangiineq isumaqatigiissummi, akuersinermi imaluunniit suleriaatsimi ataqatigiissitami peqataasunit paasissutissat eqqunngitsut imaluunniit uukapaatitsisut tunngavigalugit pisimappat.

§ 30.  Unammilleqatigiinnermut Ataatsimiititaliap paasissutissat pissutsit Inatsisartut inatsisaanni aalajangersakkani pineqartunut ilaanersut naliliinissamut pisariaqartut tamaasa piumasarisinnaavai.
Imm. 2.  Unammilleqatigiinnermut Ataatsimiititaliap ilanngullugu naatsorsuutit, naatsorsuutinut najoqqutassat, atuakkanit pappialanngortitat, niuernermi pappiaqqat allat aamma nalunaarsuutit elektroniskimik toqqortarineqartut saqqummiunneqarnissaat piumasarisinnaavaa.

§ 31.  Atuisartoqarnermut Unammilleqatigiinnermullu Aqutsisoqarfik  Unammilleqatigiinnermut Ataatsimiititaliap suliaqarneranut atugassanik nakkutiginnilluni misissuisinnaavoq, Atuisartoqarnermut Unammilleqatigiinnermullu Aqutsisoqarfiup suliffeqarfiup imaluunniit kattuffiup inaataannut aamma assartuussissutaanut paasissutissanik sunilluunniit ilisimannilernissaq imaluunniit assilinerinik tigusinissaq siunertaralugu isersinnaalernissamik kinguneqartumik, ilanngullugit naatsorsuutit, naatsorsuutinut najoqqutassat, atuakkat allallu niuernermi pappiaqqat, paasissutissanut saqqummersitsiviusup ilusaa apeqqutaatinnagu. Nakkutiginnilluni misissuinermut atatillugu Atuisartoqarnermut Unammilleqatigiinnermullu Aqutsisoqarfiup ilisimannilernissaa aammalu pisariaqarpat taakkua assilinerinik tigusisinnaanissaa siunertaralugu, Atuisartoqarnermut Unammilleqatigiinnermullu Aqutsisoqarfiup oqaasiinnartigut nassuiaanissaq piumasarisinnaavaa, kiisalu inuit nakkutiginnilluni misissuinermi pineqartunut ilaasut kaasarfimmik, taskimik ilaalu ilanngullugit imaani takutitsinissai piumasarisinnaallugu.
Imm. 2.  Suliffeqarfiup imaluunniit kattuffiup paasissutissaatai avataani qarasaasiamik suliaqartartumi paarineqarpata imaluunniit suliarineqarlutik, Atuisartoqarnermut Unammilleqatigiinnermullu Aqutsisoqarfik paasissutissanik ilisimannilernissaq aammalu assilinerinik tigusinissaq siunertaralugu avataaneersumut qarasaasiamik suliaqartartumut isersinnaalersinnaavoq. Isersinnaalernissamut tunngaviussaaq Atuisartoqarnermut Unammilleqatigiinnermullu Aqutsisoqarfik paasissutissanik pineqartunit toqqaannartumik suliffeqarfimmit imaluunniit kattuffimmit nakkutiginnilluni misissuiffigineqartunit pissarsisinnaanera ajornartoq.
Imm. 3.  Imm. 1 malillugu misissuinermut atatillugu paasissutissanik sunilluunniit ilisimannilernissaq aammalu assilinerinik tigusinissaq siunertaralugu Atuisartoqarnermut Unammilleqatigiinnermullu Aqutsisoqarfik sulisut namminneerlutik angerlarsimaffiini misissuiniarluni isersinnaalersinnaavoq, ilanngullugit naatsorsuutit, naatsorsuutinut najoqqutassat, atuakkat allallu niuernermi pappiaqqat, paasissutissanut saqqummersitsiviusup ilusaa apeqqutaatinnagu.
Imm. 4.  Atuisartoqarnermut Unammilleqatigiinnermullu Aqutsisoqarfiup imm. 1-3 malillugit nakkutilliilluni misissuineri taamaallaat Kalaallit Nunaanni Eqqartuussivinnit eqqartuussinermi aalajangiinermik piniareernerup kingorna aammalu peqqissaartumik kinaassutsimut uppernarsaammik takutitsilluni pisinnaavoq.

§ 32.  § 31 malillugu nakkutilliilluni misissuinermut atatillugu Atuisartoqarnermut Unammilleqatigiinnermullu Aqutsisoqarfik elektroniskimik paasissutissaasivinni paasissutissat imarisaannik nakkutilliilluni misissuinermi pineqartunut ilaasunik tarrarsuisinnaavoq, aammalu najoqqutassat tarrarsukkat tamatuma kingorna misissornissaat siunertaralugu nassarsinnaallugit. Atuisartoqarnermut Unammilleqatigiinnermullu Aqutsisoqarfiup suliffeqarfiup imaluunniit avataani qarasaasiamik suliaqartartup inaatai imaluunniit sulisup angerlarsimaffia qimappagit, najoqqutassat tarrarsukkat ammarnaveerlugit matuneqassapput. Suliffeqarfik imaluunniit tassanngaaniit aallartitaasoq, najoqqutassat ammarnaveerlugit matusimasut ammarneqalerpata aammalu Atuisartoqarnermut Unammilleqatigiinnermullu Aqutsisoqarfiup najoqqutassat tarrarsukkat misissulerpagit najuussinnaatitaavoq, sulisut angerlarsimaffimminni misissuiffigitittut taamatut aamma pisinnaatitaaffeqarput. Atuisartoqarnermut Unammilleqatigiinnermullu Aqutsisoqarfiup nakkutilliilluni misissuinerup kingorna kingusinnerpaamik ulluinnaat 40-it qaangiunneranni, paasissutissanit assilillugit tigusat, Atuisartoqarnermut Unammilleqatigiinnermullu Aqutsisoqarfiup najoqqutassanit tarrarsukkanit tigusimasinnaasai ataatsimoortut, nakkutilliilluni misissuiffigineqartumut tunniutissavai. Najoqqutassat tarrarsukkat misissorneqarnerat naammassippat, najoqqutassat tarrarsukkat ammarnaveerlugit matusimatillugit uninngasuutigineqassapput. Atuisartoqarnermut Unammilleqatigiinnermullu Aqutsisoqarfik naliliippat suliaq unammilleqatigiinnermut maleruagassanik unioqqutitsinermut uppernarsaatitaqanngitsoq, najoqqutassat tarrarsukkat nunguterlugit piiarneqassapput. Atuisartoqarnermut Unammilleqatigiinnermullu Aqutsisoqarfiup suliamik ingerlatitseqqinnissaq aalajangiuppagu,  suliaq inaarutaasumik aalajangiiffigineqareerpat najoqqutassat tarrarsukkat nunguterlugit piiarneqassapput.
Imm. 2.  Suliffeqarfimmi imaluunniit kattuffimmi pissutsit pissutaallutik, ulloq taanna nakkutilliilluni misissuinermik ingerlatsiviusoq, paasissutissanik pissarsinissaq imaluunniit assilillugit tigusinissaq Atuisartoqarnermut Unammilleqatigiinnermullu Aqutsisoqarfimmut ajornarsimappat, Atuisartoqarnermut Unammilleqatigiinnermullu Aqutsisoqarfiup niuerfimmi init paasissutissallu attuumassuteqartut tamatuma kingorna ulluinnaat pingasut tikillugit ammarnaveerlugit matusinnaavai.
Imm. 3.  Imm. 2-imituulli piumasaqaatitaqartumik Atuisartoqarnermut Unammilleqatigiinnermullu Aqutsisoqarfiup uppernarsaalluni atsiornertalimmik,  paasissutissat imaluunniit paasissutissaasivik paasissutissat inissisimaffigisaat, assilillugit tigusinissaq siunertaralugu nassarsinnaavaa. Najoqqutassat Atuisartoqarnermut Unammilleqatigiinnermullu Aqutsisoqarfimmit nassarneqartut assilillugit tiguneqartunut allattuiffik ilanngullugu, aammalu paasissutissat assilineri ataatsimoortut  Atuisartoqarnermut Unammilleqatigiinnermullu Aqutsisoqarfiup erseqqinnerusumik misissuinissamut atugassatut tigusimasai, suliffeqarfimmut imaluunniit kattuffimmut nakkutilliilluni misissuereernerup kingorna kingusinnerpaamik ulluinnaat pingasut qaangiunneranni utertillugit tunniunneqassapput.
Imm. 4.  Atuisartoqarnermut Unammilleqatigiinnermullu Aqutsisoqarfiup immikkut pisoqartillugu imm. 1-3-imi piffissaliussat sivitsorsinnaavai.

§ 33.  Politiit Atuisartoqarnermut Unammilleqatigiinnermullu Aqutsisoqarfimmut § 31, imm. 1, 2 aamma 3, aamma § 32, imm. 1-3 malillugit piginnaatitaanernik atuinerani ikiuutissapput.

§ 34.  Atuisartoqarnermut Unammilleqatigiinnermullu Aqutsisoqarfiup nunani allani unammilleqatigiinnermut oqartussaasunut, suleqatigiinneq apeqqutaatillugu, paasissutissat   Atuisartoqarnermut Unammilleqatigiinnermullu Aqutsisoqarfiup nipangiussisimasussaatitaanerani pineqartunut ilaasut, aammalu nunat taakkua unammilleqatigiinnermut inatsisaannik atuutsitsinissamik siuarsaanissamut pisariaqartut ingerlateqqissinnaavai, ilanngullugit Kalaallit Nunaata Naalagaaffeqatigiinnerup iluani suleqatigiit marluk akornanni imaluunniit suleqatigiit arlallit akornanni pisussaaffiinik naammassinninnissaq siunertaralugu.
Imm. 2.  Nunani allani unammilleqatigiinnermut oqartussaasunut paasissutissanik ingerlatitseqqilluni tunniussinissamut Atuisartoqarnermut Unammilleqatigiinnermullu Aqutsisoqarfiup ingerlatitseqqilluni tunniussinissamut piumasaqaatitalersinnaavaa, paasissutissat:
1)  tigusisumi taamatuttaaq nipangiussisimasussaatitaaneq atuutissasoq,
2)  suleqatigiit marluk imaluunniit suleqatigiit arlallit isumaqatigiissutaanni atuuttumi siunertamut aalajangersarneqartumut, paarlaasseqatigiinneq taanna malillugu pisimappat, taamaallaat atorneqassasut, aamma
3)  taamaallaat Atuisartoqarnermut Unammilleqatigiinnermullu Aqutsisoqarfimmit erseqqissumik akuersissutitaqartumik ingerlateqqinneqarsinnaasut aammalu taamaallaat siunertamut akuersinermi pineqartunut ilaasumi.
Imm. 3.  Atuisartoqarnermut Unammilleqatigiinnermullu Aqutsisoqarfiup paasissutissanik Inatsisartut inatsisaanni nipangiussisimasussaatitaanermi pineqartunut ilaasunik nunanit allamiunut oqartussanut ingerlatitseqqilluni tunniussisarneq pillugu maleruagassanik erseqqinnerusunik Naalakkersuisut aalajangersaasinnaapput.

Kapitali 8
Naammagittaalliuuteqartarneq

§ 35.  Unammilleqatigiinnermut Ataatsimiititaliap Inatsisartut inatsisaat malillugu aalajangiineri allaffissornikkut oqartussaasumut allamut suliakkiissutigineqarsinnaanngillat.
Imm. 2.  Unammilleqatigiinnermut Ataatsimiititaliap Inatsisartut inatsisaat malillugu aalajangiineri Kalaallit Nunaata Eqqartuussivianut siullertut oqartussaasumut suliakkiissutigineqarsinnaapput.
Imm. 3.  § 24, imm. 4 malillugu aalajangiinerit suliakkiissutigineqarneri, kinguartitsinermik sunniuteqassapput. Aalajangiinernik allanik suliakkiissuteqarnerit Unammilleqatigiinnermut Ataatsimiititaliamit imaluunniit Kalaallit Nunaata Eqqartuussivianit kinguartitsinermik sunniuteqartinneqarsinnaapput.

§ 36.  Aalajangiinerit Kalaallit Nunaata Eqqartuussivianut suliakkiissutigineqarnerat, pineqartumut aalajangiinerup nalunaarutigineqareernerata kingorna, kingusinnerpaamik sapaatit akunneri 4 qaangiutsinnagit pissaaq. Tunngaviusut immikkut ittut tunngavissaqartippassuk, Kalaallit Nunaata Eqqartuussiviata suliakkiissuteqarnissamut piffissaliussap qaangertinneqarnera akuerisinnaavaa.

Kapitali 9
Pineqaatissiisarnermut aalajangersakkat il.il.

§ 37.  Naalakkersuisut imaluunniit Naalakkersuisunit tamatumunnga piginnaatitaasoq, ullut tamaasa imaluunniit sapaatit akunneri tamaasa pinngitsaaliissumik akileeqqusissummik pisussaaffiliisinnaapput:
1)  paasissutissanik Unammilleqatigiinnermut Ataatsimiititaliap Inatsisartut inatsisaat manna malillugu piumasaqaatigisinnaasaannik tunniussinngitsunut,
2)  atugassarititaasumik imaluunniit peqqusissutaasumik Inatsisartut inatsisaat manna malillugu nalunaarutigineqartumik malinninngitsunut, imaluunniit
3)  neriorsuummik saneqqunneqarsinnaanngitsinneqartumik malinninngitsunut, takuuk § 29.

§ 38.  Akileeqqusissummik pineqaatissinneqarsinnaavoq piaaraluni imaluunniit sakkortuumik mianersuaalliorluni:
1)  § 6, imm. 1-imik unioqqutitsisoq,
2)  § 8, imm. 3, oqaaseqatigiit pingasuat, imaluunniit imm. 4, oqaaseqatigiit aappaat naapertorlugit atugassarititaasussamik nalunaarutigineqarsimasumik unioqqutitsisoq imaluunniit malinninngitsoq,
3)  § 11, imm. 1-imik unioqqutitsisoq,
4)  § 12, imm. 1 malillugu peqqusissummik unioqqutitsisoq imaluunniit malinninngitsoq,
5)  § 13, imm. 1 malillugu inerteqquteqarnermik malinninngitsoq,
6)  § 17, imm. 1 naapertorlugu kattunnermik nalunaarutiginninngitsoortoq,
7)  § 19, imm. 2 naapertorlugu tamatuminnga inerteqquteqartoqareeraluartoq kattunnermik piviusunngortitsisoq, § 19, imm. 5, oqaaseqatigiit siulliit naapertorlugit tamatuma akuersissuteqarfigineqannginnerani kattunnermik piviusunngortitsinissamik inerteqquteqarnermik unioqqutitsisoq, § 19, imm. 6, imaluunniit § 21, imm. 1 imaluunniit 3 malillugit atugassarititaasussamik imaluunniit peqqusissummik malinninngitsoortoq, imaluunniit § 23 naapertorlugu peqqusissummik nalunaarutigineqartumik malinninngitsoortoq,
8)  § 28 malillugu peqqusissummik unioqqutitsisoq imaluunniit malinninngitsoortoq,
9)  neriorsuummik § 29, imm. 1 malillugu saneqqunneqarsinnaanngitsinneqartumik unioqqutitsisoq imaluunniit malinninngitsoortoq,
10)  § 29, imm. 2 malillugu peqqusissummik unioqqutitsisoq imaluunniit malinninngitsoortoq,
11)  § 30 malillugu piumasaqaammik malinninngitsoortoq, imaluunniit
12)  paasissutissanik eqqunngitsunik imaluunniit uukapaatitsisunik Unammilleqatigiinnermut Ataatsimiititaliamut imaluunniit Atuisartoqarnermut Unammilleqatigiinnermullu Aqutsisoqarfimmut tunniussisoq imaluunniit paasissutissanik suliamut paasissutissanik piniarfigineqarsimasumut pingaaruteqartunik nipangiussiinnartoq.
Imm. 2.  Imm. 1, nr. 1, piffissamit isumaqatigiissutip, suliffeqarfiit kattuffiata iluani akuersinerup imaluunniit suleriaatsip ataqatigiissitap § 8, imm. 1 imaluunniit imm. 4 malillugit Unammilleqatigiinnermut Ataatsimiititaliamut nalunaarutigineqarneranit, aammalu Unammilleqatigiinnermut Ataatsimiititaliap § 8, imm. 1 imaluunniit imm. 4 malillugit aalajangiinerminik nalunaaruteqarnissaa tikillugu atuutissanngilaq.
Imm. 3.  Peqqussutini Inatsisartut inatsisaat manna malillugu aalajangersarneqartuni iliuusissanik aalajangersaasoqarsinnaavoq Kalaallit Nunaanni pinerluttulerinermut inatsit malillugu akileeqqusissutitut iluseqartunik.
Imm. 4.  Inatsisartut inatsisaat imaluunniit peqqussutit Inatsisartut inatsisaat malillugu aalajangersarneqartut akileeqqusissummik aalajangersaanissamik tunngavissaqartitsippata, akileeqqusissut Kalaallit Nunaanni pinerluttulerinermut inatsimmi maleruagassat malillugit pisussaatitaasoq pisinnaatitaasorlu akileeqqusissummik pisussaaffilerneqarsinnaavoq.
Imm. 5.  Akileeqqusissutit imm. 1 aamma imm. 3-4 malillugit pisussaaffiliunneqartut Nunap karsianut tutsinneqassapput.
Imm. 6.  Unioqqutitsineq piaarineruppat aammalu pingaartumik unioqqutitsinerup annertussusaa imaluunniit ajoqusiisumik sunniuteqarnera malitseqarsinnaasoq tunngavigalugit sakkortuumik iliorneruppat, § 6, imm. 1-imut akerliusumik niuernikkut unammilleqatigiinnermik annikillisitsisumik isumaqatigiissuteqartumut iliuusissat Kalaallit Nunaanni pinerluttulerinermut inatsit malillugu aalajangersarneqarsinnaapput. Oqaaseqatigiit siulliit malillugit niuernikkut unammilleqatigiinnermik annikillisitsisumik isumaqatigiissuteqarneq paasineqassaaq tassaasoq isumaqatigiissut, suleriaaseq ataqatigiissitaq imaluunniit suliffeqarfiit assigiimmik kaaviiaartitatigut inissisimasut akornanni akuersinerit makkua pillugit:
1)  tunisinermut imaluunniit nioqqutissanik imaluunniit kiffartuussissutinik tuniseqqinnermi akiusut, iluanaarutit assigisaalluunniit,
2)  tunisassiornermi imaluunniit tunisinermi killilersuutaasut,
3)  niuerfinnik imaluunniit sullitanik agguluineq, imaluunniit
4)  neqeroorutinik ataqatigiissaarineq.
Imm. 7.  § 6, imm. 1-imut akerliusumik, immikkut sukannersunik pisoqartillugu immikkut annertussuseqartumik niuernikkut unammilleqatigiinnermik annikillisitsisumik isumaqatigiissuteqartut, Kalaallit Nunaanni pinerluttulerinermut inatsit malillugu iliuuseqarfigineqarsinnaapput. Immikkut sukannersumik pisoqarneri pingaartumik unioqqutitsineq annertoorujussuarmik annertussuseqarluni imaluunniit annertoorujussuarmik ajoqusiinermik malitseqarsinnaalluni pisutut isigineqarpoq.

§ 39.  Niuernikkut unammilleqatigiinnermik annikillisitsisumik isumaqatigiissuteqarluni § 6-imut akerliusumik iliuuseqartoq, akileeqqusissummut imaluunniit paarnaarussaanissamut unammilleqatigiinnermik annikillisitsinermi peqataanerminut pineqartup pisussaaffigisussaagaluagaanut eqqartuunneqannginnissamik angusaqarsinnaavoq, qinnuteqartoq siulliulluni oqartussaasunut saaffiginnikkuni, aammalu unammilleqatigiinnermik annikillisitsineq pillugu paasissutissanik oqartussaasut qinnuteqarnerup nalaani pigisarinngisaannik saqqummiussilluni. Paasissutissat makkua pineqartuussapput:
1)  pissutsit pineqartut pillugit oqartussaasut nammineerlutik nakkutiginninnermi misissuinnginnerminni imaluunniit ornigullutik misissuinnginnerminni, oqartussaasut pissutsit pineqartut pillugit nakkutiginninnermi misissuinermik, ornigullutik misissuinermik imaluunniit politiinut nalunaarutiginninnermik aallartitsinissamut pissutaasoq aalajangersimasoq oqaatigissavaat, imaluunniit
2)  pissutsit pineqartut pillugit oqartussaasut nakkutiginninnermi misissuereerneranni imaluunniit ornigullutik misissuereerneranni, oqartussaasut niuernermi unammilleqatigiinnermik annikillisitsisumik suliaqarnertut iluseqartumik unioqqutitsinermik paasisaqarsinnaalersimassasut.
Imm. 2.  Unnerluutiginninnginnissaq aatsaat anguneqarsinnaavoq, qinnuteqartoq:
1)  suliap suliarineqarnera tamaat oqartussasunut suleqataappat,
2)  kingusinnerpaamik qinnuteqaatip tunniunneqarnerani niuernermi unammilleqatigiinnermik annikillisitsisumik peqataanerminik unitsitsippat, aamma
3)  allanik niuernermi unammilleqatigiinnermik annikillisitsisumik peqataanissamut pinngitsaaliisimanngippat.
Imm. 3.  Qinnuteqartup unnerluutiginninnginnissamut tunngavissarititaasut imm. 1, nr. 1-imi imaluunniit 2-imi taaneqartut qinnuteqartup naammassisimanngippagit, qinnuteqaat akileeqqusissummik annikillisitsinissamik qinnuteqaatitut isigineqassaaq, takuuk § 40, imm. 1.

§ 40.  Niuernermi unammilleqatigiinnermik annikillisitsisumik isumaqatigiissuteqarluni § 6-imut akerliusumik iliuuseqartoq, akileeqqusissutip pineqartup niuernermi unammilleqatigiinnermik annikillisitsisumik isumaqatigiissuteqarnermi peqataanermini pisussaaffigiligassaraluata annikillineqarnissaanik angusaqarsinnaavoq:
1)  qinnuteqartoq niuernermi unammilleqatigiinnermik annikillisitsisumik isumaqatigiissummut tunngatillugu paasissutissanut oqartussaasut pigeriigaannut naleqqiullugu annertuumik naleqarnerulersitsisunik paasissutissanik  saqqummiiguni, aamma
2)  qinnuteqartup § 39, imm. 2-imi tunngavissarititaasut allassimasut naammassisimagunigit.
Imm. 2.  Qinnuteqartumut siullermut imm. 1-imi tunngavissarititaasunik naammassinnittumut akileeqqusissummik annikillisitsineq, akileeqqusissutip pineqartup niuernermi unammilleqatigiinnermik annikillisitsisumik isumaqatigiissuteqarnermi peqataanermini pisussaaffigiligassaraluata 50 procentiatut annertussuseqarpoq. Qinnuteqartup aappaanut imm. 1-imi tunngavissarititaasunik naammassinnittumut akileeqqusissummik annikillisitsineq 30 procentiuvoq. Qinnuteqartunut taakkua kinguliiniittunut imm. 1-imi tunngavissarititaasunik naammassinnittunut, akileeqqusissummik annikillisitsineq 20 procentit tikillugit annertussuseqarpoq.

§ 41.  Unnerluutigineqannginnissamik imaluunniit akileeqqusissummik annikillisitsinissamik qinnuteqaat Atuisartoqarnermut Unammilleqatigiinnermullu Aqutsisoqarfimmut tunniunneqassaaq. Suliani inuit imaluunniit suliffeqarfiit unnerluutigisaappata, imaluunniit Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisoq niuernermi unammilleqatigiinnermik annikillisitsisumik isumaqatigiissuteqarluni unioqqutitsinermik pasitsaanneqartumik misissuinermik aallartitsisimappat, pineqaatissiissutinik qasukkartitsinissamut qinnuteqaat aamma Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisumut tunniunneqarsinnaavoq.
Imm. 2.  Imm. 1 malillugu qinnuteqaat, suleriaaseq manna malillugu suliarineqassaaq:
1)  Oqartussaasoq qinnuteqaammik tigusaqartoq, takuuk imm. 1, taassuma tigusimaneranut uppernarsaassaaq.
2)  Oqartussaasoq aalajangiisussaasoq, takuuk § 42, imm. 1, neriorsuutaagallartumik tunisissaaq, § 39, imm. 1-imi imaluunniit § 40, imm. 1-imi tunngavissarititaasut naammassineqarsimanersut, aammalu piffissami tassani qinnuteqaatip itigartinneqarnissaanut tunngavissaqarsimanersoq, pissutigalugu § 39, imm. 2-imi tunngavissarititaasut naammassineqarsimanngitsut naliliisoqarmat, paasissutissanik imaqartumik.
3)  Suliami paasissutissat nalilersuinerlu inaarutaasumik naammassereerpata, oqartussaasoq aalajangiisussaq, takuuk § 42, imm. 2, qinnuteqartup § 39, imm. 2-imi tunngavissarititaasut naammassisimanerai nalunaaruteqassaaq, aammalu taamaattoqarsimappat neriorsuutaagallartumut nr. 2 malillugu qinnuteqartup pissarsiarisimasaanut naapertuuttumik unnerluussinnginnissaq imaluunniit akileeqqusissummik annikillisitsineq nalunaarutigissallugu.

§ 42.  Neriorsuutaagallartoq oqartussaasumit § 41, imm. 1-imut naapertuuttumik qinnuteqaammik tigusisimasumit tunniunneqassaaq. Oqartussaasup § 41, imm. 2, nr. 2 malillugu neriorsuutaagallartumik tunniussinissaa sioqqullugu, neriorsuut Atuisartoqarnermut Unammilleqatigiinnermullu Aqutsisoqarfiup aamma  Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisup akornanni oqaluuserineqarsimassaaq. Akileeqqusissutip atorunnaarsinnissaanut neriorsuutaagallartoq taamaallaat tunniunneqarsinnaavoq, oqartussaasut taakkua tamanna isumaqatigiissutigippassuk.
Imm. 2.  § 41, imm. 2, nr. 3 malillugu unnerluutiginninnginnissamik nalunaaruteqarneq, Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisumit Atuisartoqarnermut Unammilleqatigiinnermullu Aqutsisoqarfimmut tusarniaareernerup kingorna unnerluutiginninnginnissatut iluseqartumik nalunaarutigineqassaaq. § 41, imm. 2, nr. 3 malillugu akileeqqusissummik annikillisitsinissaq pillugu nalunaaruteqarneq, Atuisartoqarnermut Unammilleqatigiinnermullu Aqutsisoqarfimmut tusarniaareernerup kingorna Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisumit, suliami aalajangersimasumi tassani akileeqqusissuteqarsimasumit imaluunniit suliamik eqqartuussivinnut tunniussisimasumit, nalunaarutigineqassaaq.

§ 43.  Suliffeqarfinnit assigiinngitsunit qinnuteqaatit, qinnuteqartut suliffissuarmi ataatsimoorlutik atasimanngikkunik aammalu qinnuteqaammi immikkut allassimappat ingerlatseqatigiiffiit sorliit qinnuteqaammi pineqartunut ilaanersut, pineqaatissiinerit qasukkartinnissaat pillugu ataatsimoortumik qinnuteqaatitut tunniunneqarsinnaanngillat, aammalu qinnuteqaat.
Imm. 2.  Suliffeqarfimmit imaluunniit kattuffimmit qinnuteqaammi ingerlaannartumik maannakkut siusinnerusukkullu siulersuisuni ilaasortat, sulisut aqutsisuneersut imaluunniit atorfillit allat pineqartunut ilaapput, tunngavissarititaalluni pineqartup § 39, imm. 2-imi tunngavissarititaasut naammassisimassagai. Suliami paasissutissat nalilersuinerillu inaarutaasumik naammassineqareerpata, Immikkut Aningaasaqarnikkut aamma Nunani tamalaani Pinerluttuliornermut Naalagaaffimmi eqqartuussissuserisup, takuuk § 42, imm. 2, nalunaarutigissavaa inuup § 39, imm. 2-imi tunngavissarititaasut naammassisimanerai, taamaattoqarsimappallu neriorsuutaagallartumik suliffeqarfiup imaluunniit kattuffiup § 41, imm. 2, nr. 2 malillugu pissarsiarisimasaanut naapertuuttumik, unnerluutiginninnginnissaq imaluunniit akileeqqusissummik annikillisitsinissaq nalunaarutigissallugu.

Kapitali 10
Atuutilersitsinermut ikaarsaariarnermullu aalajangersakkat il.il.

§ 44.  Inatsisartut inatsisaat ulloq 1. juli 2014 atuutilerpoq.
Imm. 2.  Peqatigisaanik unammilleqatigiinneq pillugu Inatsisartut inatsisaat nr. 16, 19. november 2007-imeersoq atorunnaarsinneqarpoq.
Imm. 3.  Nalunaarutit unammilleqatigiinneq pillugu Inatsisartut inatsisaat nr. 16, 19. november 2007-imeersoq malillugu atuutilersinneqartut, maleruagassanit Inatsisartut inatsisaat manna malillugu aalajangersarneqartunit taarserneqarnissamik imaluunniit atorunnaarsinneqarnissamik tungaanut atuutiinnassapput:
1)  Unammilleqatigiinnermut Ataatsimiititaliap suleriaasia aamma ingerlatsinera pillugu Namminersornerullutik Oqartussat nalunaarutaat nr. 2, 1. februar 2008-imeersoq.
2)  Suliffeqarfinnut pisortanit pigineqartunut aalajangersimasunut tutsinneqarsimasunik tapiissutit utertillugit akilernissaat pillugu Namminersornerullutik Oqartussat nalunaarutaat nr. 18, 27. juni 2008-imeersoq.
3)  Unammilleqatigiinneq pillugu inatsisartut inatsisaanni kaaviiaartitat ilaalu ilanngullugit naatsorsortarnerannut Namminersornerullutik Oqartussat nalunaarutaat nr. 22, 1. juli 2008-imeersoq.

Namminersorlutik Oqartussat ulloq 15. maj 2014

Aleqa Hammond