Unammilleqatigiinneq pillugu Inatsisartut inatsisaat nr. 1, 15. maaji 2014-imeersumi § 4, imm. 2 naapertorlugu, aamma unammilleqatigiinnermut ataatsimiititaliap oqaaseqareerneratigut, aalajangersarneqassaaq:

 

  § 1.  Unammilleqatigiinnermut inatsimmi kapitali 2-mi aalajangersakkani suliffeqarfiup imaluunniit ingerlatseqatigiiffissuup ataatsip iluani isumaqatigiissuteqarnerit, aalajangersakkat aamma suleriaatsit ataqatigiissitat unammilleqatigiinnermik killilersuisut atorneqanngillat.   

 

§ 2.  »Suliffeqarfiup imaluunniit ingerlatseqatigiiffissuup ataatsip iluani isumaqatigiissutit, aalajangersakkat aamma suleriaatsit ataqatigiissitat« nalunaarut manna malillugu ilaatinneqarput: 
1)  Unammilleqatigiiffiunngitsumik ingerlatseqatigiiffissuit peqatigiillutik isumaqatigiissuteqarneri, takuuk § 3, naatsorsuutigineqarpat, ingerlatseqatigiiffiutit niuerfimmi ingerlanissamik aalajangersarnissaanut nammineersinnaanngivissut,
2)  Ingerlatseqatigiiffissuit unammilleqatigiissut akornanni isumaqatigiissuteqarnerit, takuuk. § 4, imaluunniit
3)  Suliffeqarfiit piginneqatigiiffiusut iluanni isumaqatigiissutit, taakkua killilerneqarsimappata, suna pisariaqarnersoq piginneqatigiilluni suliffeqarfiup ingerlannera naammaginartumik qularnaarnissaanut aamma ilaasortat soqutigisatik piginneqatigiiffimmut piffissami killilimmi isumagisassanngortippatigit, takuuk § 5.

 

§ 3.  »Unammilleqatigiiffiunngitsumik ingerlatseqatigiiffissuit peqatigiillutik isumaqatigiissuteqarneri« matumani nalunaarummi imatut paasineqassaaq isumaqatigiissutit il.il. suliffeqarfiit, suliffeqarfiup  piginnittup ingerlatseqatigiiffiutigisap imminnut ataqatigiittut, akornanni isumaqatigiissutit. 
  Imm. 2.  Suliffeqarfik suliffeqarfimmut piginnittuuvoq, imaakkuni: 
1) ingerlatseqatigiiffimmi aktiaateqarfiusumi piginneqatigiiffimmiluunniit taasisinnaatitaanikkut amerlanerussutilinnik pigisaqarleruni,
2)  ingerlatseqatigiiffimmi aktiaateqaruni imaluunniit piginneqataassuteqaruni kiisalu piginnaatitaalluni ingerlatseqatigiiffiup siulersuisuini ilaasortanik toqqaasinnaanermut imaluunniit ingerlatseqatigiiffiup siulersuisuinik amerlanerussuteqartunik tunuartitsisinnaaguni imaluunniit tamatumani piginneqatigiiffik siulersuisoqanngippat, qullersaqanngippat,
3)  aktiaateqaruni piginneqataalluniluunniit piginnaatitaallunilu ingerlatseqatigiiffimmut aalajangiisuusumik sunniuteqarluni ileqqoreqqusat isumaqatigiissutilluunniit tunngavigalugit kiisalu,
4)  aktiaateqaruni piginneqataalluniluunniit aamma aktiaatilinnik piginneqataasunilluunniit allanik isumaqatigiissuteqarneq tunngavigalugu imaluunniit ingerlatseqatigiiffimmi taasisin-naatitaassutit amerlanerussuteqartut oqaasissaqarfigigunigit, imaluunniit
5)  ingerlatseqatigiiffimmi aktiaateqaruni piginneqataassuteqarluniluunniit tamatumunnga aalajangiisuusumik sunniuteqartumik.
  Imm. 3.  Suliffeqarfik, suliffeqarfimmut piginnittuusoq imm. 2-mi taaneqartunut atatillugu, ingerlatseqatigiiffiutigisamut attuumassuteqarpat.
  Imm. 4.  Taasisinnaatitaanerit naatsorsornerinut aamma pingaarnertut suliffeqarfimmut taassumalu suliffeqarfinni piginnittuusumi ingerlatseqatigiiffiutigisaanilu ilaasortanik  ilaasortanngortitsinernut  ilaasortaajunnaarsitsinernullu pisinnaatitaaffiit ilaatinneqarput.
  Imm. 5.  Suliffeqarfimmi ingerlatseqatigiiffiutigisumi taasisinnaatitaanerit naatsorsorneranni aktianut piginneqataassutinulluunniit attuumassuteqartut ingerlatseqatigiiffiutigisamut imaluunniit taassuma ingerlatseqatigiiffiutigisaanut taasisinaatitaanerit naatsorsuutigineqartanngillat. 
Imm. 6.  »Namminersuinneq« nalunaarummi matumani paasineqassaaq, ingerlatseqatigiiffiutigisat suliffeqarfiup piginnittup ilitsersuinermut pisinnaatitaaffiisa ataanniinngitsut.

 

§ 4.  »Ingerlatseqatigiiffissuit unammilleqatigiissut akornanni isumaqatigiissuteqarnerit« nalunaarummi matumani imatut paasineqassapput suliffeqarfiit marluk amerlanerusulluunniit akornanni isumaqatigiissuteqarneri il. il., allaganngorlugit isumaqatigiissuteqarnikkut imaluunniit suliffeqarfiit malittarisassaanni aalajangersakkat naapertorlugit ataatsimoorussamik siulersorneqarneq imaluunniit tassannga aalajangiisuusumik sunniuteqarfigineqarneq, tunngavigineqarlutik,
1)  suliffeqarfiit niuerfimmi peqataasut ataatsimoorussamik siulersorneqarnerat ataqatigiissaariffigissavaat,
2)  suliffeqarfiit peqataasut ataatsimoorussamik siulersorneqarnernit aqunneqassapput, aamma
3)  niuernerpalaartumik nalorninartoqarsinnaasut aningaasaqarnikkullu inernerit agguataarnerannut aaqqissuussisoqarsimassaaq.

 

§ 5. »Piginneqatigiilluni suliffeqarfiit« nalunaarummi matumani imatut paasineqassapput piginneqatigiilluni suliffeqarfimmi peqataasut tamarmik nammineq inuttut inatsisitigut akisussaassuseqartut (interessentskaber), piginneqatigiiffimmi peqataasut tamarmik nammineq inuttut inatsisitigut akisussaassuseqartut, kisianni peqataasut ilai ingerlatseqatigiiffiup pisussaaffiinut killilimmik akisussaassuseqarlutik (kommanditselskaber) imaluunniit suliffeqarfiit killilimmik akisussaassuseqartut, siunertaat tassaalluni, peqataasut ataatsimoorussamik soqutigisaat suliffeqarfimmit peqataanermikkut pisisartutut, pilersuisutut imaluunniit allatut periuseqartutut, aamma suliffeqarfiup iluanaarutai siuarsassallugit, nalinginnaasumik aningaasat aningaasaliissutaasut imminut akilersinnaassusiat ilanngunnagu, kaaviartitanit piginneqataassutaannut naleqqiullugu ilaasortani agguarneqarsinnaapput imaluunniit suliffeqarfimmi uninngasuutigineqarsinnaapput.   
  Imm. 2.  »Suliffeqarfiup iluani isumaqatigiissutit« nalunaarummi matumani imatut paasineqassapput piginneqatigiilluni suliffeqarfiup taamatut taassumalu ilaasortaasa akornanni isumaqatigiissutit il. il. imaluunniit ilaasortat imminnut isumaqatigiissutaat il. il. soorlu ilaasortat akiliisussatut pisussaaqatigiinnerat, taasinerit aamma piginneqatigiiffimmut sinniisoqatigiinneq, aamma allanut malunnanngitsumik ilaasortanut piginneqatigiiffimmullu taamaallaat.     
  Imm. 3.  »Piginneqatigiilluni suliffiup ingerlanneqarnera naammaginartoq« nalunaarummi ma-tumani imatut paasineqassaaq suliffeqarfiup naammassisinnaassusianik nalinginnaasumik atuineq.    
  Imm. 4.  »Atsiornikkut isumaqatigiissutikkut imaluunniit isumaqatigiissuteqarnikkut nukittussusiata atatinnera« nalunaarummi matumani paasineqassaaq ilaasortat pisisartutut pilersuisutulluunniit soqutigisatik piffissami killilikkap iluani piginneqatigiiffik aqqutigalugu isumagitissallugit  pisussaapput. Piginneqatigiilluni suliffeqarfiit salliuniartuunngippata, piffissaq taanna sivisunerpaamik ukiunik marlunnik sivisussuseqassaaq. Piginneqatigiilluni suliffeqarfiit salliuniartutut inissisimappata, piffissaq taanna sivikinnerujussuussaaq.

 

  § 6.  Nalunaarut ulloq 1. apriili 2016-imi atuutilerpoq.   

 

 

Namminersorlutik Oqartussat, ulloq 10. martsi 2016

 

 

Vittus Qujaukitsoq

/

Jørn Skov Nielsen