Unammilleqatigiinneq pillugu Inatsisartut inatsisaanni nr. 1, 15. maj 2014-imeersumi § 26, imm. 3 naapertorlugu aalajangersarneqarpoq:

 

Kapitali 1
Atuisoqarnermut Unammilleqatigiinnermullu Aqutsisoqarfiup sulinera

 

§ 1.  Atuisoqarnermut Unammilleqatigiinnermullu Aqutsisoqarfik Unammilleqatigiinnermut Ataatsimiititaliamut allatsitut atuuppoq unammilleqatigiinnermullu inatsisip aqunneqarnerani Naalakkersuisunut attuumassuteqarani.
  Imm. 2.  Atuisoqarnermut Unammilleqatigiinnermullu Aqutsisoqarfik pisortamit Atuisoqarnermut Unammilleqatigiinnermullu Aqutsisoqarfiup sulineranut pingaarnertut akisussaasumit aqunneqarpoq. Taassuma peqannginnerani tullissortaasoq qaninneq paarlatsitut aqutsisuussaaq.

Kapitali 2
Piginnaatitaaffiit

 

  § 2.  Atuisoqarnermut Unammilleqatigiinnermullu Aqutsisoqarfiup suliassat Unammilleqatigiinnermut Ataatsimiititaliap suleriaasia aamma ingerlatsinera pillugu Namminersorlutik Oqartussat nalunaarutaanni §§ 4-6 malillugit Unammilleqatigiinnermut Ataatsimiititaliap suliarisassai aalajangiiffigisassaalu imaluunniit Atuisoqarnermut Unammilleqatigiinnermullu Aqutsisoqarfiup  Unammilleqatigiinnermut Ataatsimiititaliamut saqqummiunneqartariaqartutut isigisai Unammilleqatigiinnermut Ataatsimiititaliamut saqqummiutissavai.
  Imm. 2.  Malittarisassanut missingiut Unammilleqatigiinnermut Ataatsimiititaliap unammilleqatigiinnermut inatsit naapertorlugu aalajangiiffigisassaa Atuisoqarnermut Unammilleqatigiinnermullu Aqutsisoqarfiup Unammilleqatigiinnermut Ataatsimiititaliamut saqqummiutissavaa.
  Imm. 3.  Unammilleqatigiinnermut Ataatsimiititaliap aalajangiiffigisai Atuisoqarnermut Unammilleqatigiinnermullu Aqutsisoqarfiup suliarissavai ulluinnarnilu unammilleqatigiinnermut inatsimmik aqutsineq pillugu ataatsimiititaliaq ilisimatittassallugu.

 

§ 3.  Atuisoqarnermut Unammilleqatigiinnermullu Aqutsisoqarfiup Unammilleqatigiinnermut Ataatsimiititaliaq sinnerlugu suliassat § 2, imm. 1-imi 2-milu ilaatinneqanngitsut, Unammilleqatigiinnermut Ataatsimiititaliap suleriaasia inassuteqaataalu naapertorlugit aalajangiiffigissavai. Aamma Atuisoqarnermut Unammilleqatigiinnermullu Aqutsisoqarfiup Unammilleqatigiinnermut Ataatsimiititaliaq sinnerlugu suliassat § 2, imm. 1-imi 2-milu ilaatinneqartut piareersarneqarnissaannut atugassat aalajangiiffigissavai.
  Imm. 2.  Tamatuma saniatigut Atuisoqarnermut Unammilleqatigiinnermullu Aqutsisoqarfiup pisortaata Unammilleqatigiinnermut Ataatsimiititaliaq peqatigalugu suliassat ataatsimiititaliap ataatsimiinnissaanut utaqqisinneqarsinnaanngitsut aalajangiiffigissavai.
  Imm. 3.  Atuisoqarnermut Unammilleqatigiinnermullu Aqutsisoqarfiup imm. 1 aamma 2 malillugit aalajangiiffigisai pillugit nalunaarut Atuisoqarnermut Unammilleqatigiinnermullu Aqutsisoqarfiup pisortaata Unammilleqatigiinnermut Ataatsimiititaliap tullissaani ataatsimiinnerani saqqummiutissavaa.

 

§ 4.  Atuisoqarnermut Unammilleqatigiinnermullu Aqutsisoqarfiuptamatumunnga atatillugu unammilleqatigiinnermut inatsisip aqunneqarnera aamma aqutsisoqarfiup sulinera pillugit paasissutissat kiisalu unammilleqatigiinnermi pissutsinut tunngatillugu nalinginnaasumik nassuiaatit allat tamanut saqqummiussinnaavai.

 

  § 5.  Atuisoqarnermut Unammilleqatigiinnermullu Aqutsisoqarfiup pisortaata aalajangissavaa, unammilleqatigiinnermut inatsisip unioqqutinneqarneranut unnerluussummik qaqitsinissaq siunertaralugu unammilleqatigiinnermut inatsimmi § 38 naapertorlugu akileeqqusissutissap annertussusissaanut imaluunniit allatut pineqaatissiisoqarnissaanik inassuteqaatitalerlugu unnerluussisussaatitaasunut saaffiginnittoqassanersoq.
  Imm. 2.  Atuisoqarnermut Unammilleqatigiinnermullu Aqutsisoqarfiup pisortaata aalajangissavaa, unammilleqatigiinnermut inatsimmi § 37 naapertorlugu suliffeqarfiit ullut tamaasa imaluunniit sapaatip akunneri tamaasa pinngitsaaliissummik akiliisinneqartassanersut .

Kapitali 3
Aalajangiinerit

 

  § 6.  Atuisoqarnermut Unammilleqatigiinnermullu Aqutsisoqarfiup aalajangiiffigisai allaganngorlugit nalunaarutigineqassapput, imarissavaalu pissutsit isummallu aalajangiinermut aalajangiisuusimasut.
  Imm. 2.  Aalajangiinerit Kalaallit Nunaanni Eqqartuussivimmut suliassanngortinneqarsinnaasut Kalaallit Nunaanni Eqqartuussivimmi suliassanngortinneqarnissaannut ilitsersuummik ilaqartinneqassapput naammagittaalliorsinnaanermut ilitsersuutitalerlugit, tassuuna nalunaarlugit naammagittaalliortarfik naammagittaalliussagaannilu qanoq iliortariaqartoq immaqalu aamma ullut qassit qaangiutsinnagit naammagittaalliortoqartariaqartoq.

Kapitali 4
Nalunaarutit apeqquteqaatillu

 

  § 7.  Unammilleqatigiinnermut inatsimmi § 2, § 8, § 9, § 11, § 12, § 13 aamma § 14 naapertorlugit nalunaarutit apeqquteqaatilluAtuisoqarnermut Unammilleqatigiinnermullu Aqutsisoqarfimmut tunniunneqassapput.

Kapitali 5
Paasissutissat

 

  § 8.  Atuisoqarnermut Unammilleqatigiinnermullu Aqutsisoqarfik Unammilleqatigiinnermut Ataatsimiititaliaq sinnerlugu paasissutissanik tamanik piumasaqarsinnaavoq, taakkununnga ilanngullugit naatsorsuutit, naatsorsuutinut atortussat, allattuiffiit assilineri, niuernermi pappiaqqat allat aamma nalunaarsuutit elektroniskimik toqqortarineqartut sulinermi pisariaqartutut isigineqartut imaluunniit pissutsit inatsisartut inatsisaani aalajangersakkanut ilaanersut aalajangiiffigineqarnissaannut pisariaqartutut isigineqartut, tak. unammilleqatigiinnermut inatsimmi § 30.

Kapitali 6
Nipangiussisussaatitaaneq

 

  § 9. Atuisoqarnermut Unammilleqatigiinnermullu Aqutsisoqarfimmi sulisut pisortat ingerlatsineranni suliassat suliarineqartarnerat pillugu inatsisartut inatsisaanni nipangiussisussaatitaaneq pillugu malittarisassat malillugit nipangiussisimasussaatitaapput.

Kapitali 7
Atortuulersitsineq

 

  § 10.  Nalunaarut manna atuutilissaaq ulloq 1. apriili 2016.

 

 

Namminersorlutik Oqartussat, ulloq 10. martsi 2016

 

 

Vittus Qujaukitsoq

/

Jørn Skov Nielsen