Unammilleqatigiinneq pillugu Inatsisartut inatsisaanni nr. 1, 15. maj 2014-imeersumi (unammilleqatigiinneq pillugu inatsit) § 17, imm. 3 aamma § 18, imm. 1 naapertorlugit aamma Unammilleqatigiinnermut Ataatsimiititaliaq oqaaseqaateqartereerlugu aalajangersarneqarpoq:

 

  § 1.  Unammilleqatigiinneq pillugu inatsimmi § 17, imm. 1 malillugu suliffeqarfiit kattunnerat suliffeqarfimmit ataatsimit arlalinnilluunniit kattunnermi peqataasunit Atuisartoqarnermut Unammilleqatigiinnermullu Aqutsisoqarfimmut nalunaarutigineqassaaq.
  Imm. 2.  Atuisartoqarnermut Unammilleqatigiinnermullu Aqutsisoqarfimmut qarasaasiakkut nalunaaruteqartoqartoqarsinnaavoq. Taamaattoqarpat  ilanngussat 1 aamma 2 naapertorlugit immersugassami kattunnermik nalinginnaasumik pisariitsumillu nalunaaruteqarnermut atugassami inuup nammineq atsiornera elektroniskimik atsiornerup taarsissavaa. Uppernarsaatit assilineri ilanngunneqarsinnaapput.

 

  § 2.  Kattunneq nalinginnaasumik pisariitsumilluunniit nalunaarutigineqarsinnaavoq.
  Imm. 2.  Kattunnermik nalinginnaasumik nalunaaruteqarnermi taassuma assinga isertuussassaanngitsoq ilanngunneqassaaq aammalu paasissutissanik uppernarsaatinillu immersugassami ilanngussaq 1 naapertorlugu kattunnermik nalinginnaasumik nalunaaruteqarnermut atugassami allassimasunik imaqassalluni.
  Imm. 3.  Kattunnermik pisariillisakkamik nalunaaruteqarnermi taassuma assinga isertuussassaanngitsoq ilanngunneqassaaq aammalu paasissutissanik uppernarsaatinillu immersugassami ilanngussaq 2 naapertorlugu kattunnermik pisariitsumik nalunaaruteqarnermut atugassami allassimasunik imaqassalluni.

 

  § 3. Kattunnermi immikkoortut uku pisariillisamik nalunaarutigineqassapput:
1) Kattunnerit suliffeqarfiit marluk arlallilluunniit joint venturenik Kalaallit Nunaanni niuernermi ingerlatsiviusussaanngitsumi annikitsuinnarmilluunniit ingerlatsiviusussami ilimagi-neqartumilluunniit ataatsimut aqutsivigisaanni. Tamanna imatut pisoqarpat atuuppoq:
a) joint venturemi kaaviiaartitat imaluunniit ingerlatani nuunneqartuni kaaviiaartitat Kalaallit Nunaanni 50 mio. koruunit ataappagit, aamma
b) pigisat imaluunniit pigisat atorlugit kaaviiaartitat joint venturemut nuunneqartut Kalaallit Nunaanni katillugit 50 mio. koruunit ataallugit naleqarpata.
2) Suliffeqarfik suliffeqarfimmik suliffeqarfik ataaseq arlallilluunniit peqatigalugit oqartussaaffigisaminik kisimiilluni oqartussaalerluni kattunnerit.
3) Suliffeqarfiit marluk arlallilluunniit kattunnerat imaluunniit suliffeqarfiup ataatsip arlallilluunniit suliffeqarfimmi ataatsimi allami kisimiillutik ataatsimoorlutilluunniit oqartussaalernerat, aamma:
a) kattunnermi peqataasut arlaannaalluunniit niuerfimmi ataatsimi tunisassianik niuerfimmi nunallu ilaani niuerfimmi ataatsimi ingerlataqanngitsut imaluunniit niuerfimmi kattunnermi peqataasup ataatsip allap tunisassianik niuerfimmut ingerlaqqarfigisaanut tunngatillugu tamassuma siorna tamassumaluunniit kingorna tunisassianik niuerfimmi ingerlataqanngitsut,
b) kattunnermi peqataasut marluk arlallilluunniit tunisassianik niuerfimmi nunalluunniit ilaani niuerfimmi ataatsimi Kalaallit Nunaanni niuernermut tamarmiusumut sanilliullugit katillugit 15 procentit ataallugit annertugisut, imaluunniit
c) kattunnermi peqataasoq ataaseq arlallilluunniit tunisassianik niuernermi kattunnermi peqataasup allap ingerlatsiffigisaanut tunngatillugu tunisassianik niuerfimmi tamassuma siorna tamassumaluunniit kingorna ingerlatsisut, siusinerusukkut kingusinnerusukkulluunniit niuerneranni ataasiakkaarlutik katillutilluunniit Kalaallit Nunaanni kaaviiaartinneqartartunut sanilliullugu kaaviiaartitaat 25 procentinik amerlanerusunilluunniit annertussuseqanngippata.
  Imm. 2.  Kattunneq imm. 1-imi immikkoortumut ataatsimut ilaagaluarpalluunniit kattunnerup nalinginnaasumik nalunaarutigineqarnissaa Atuisartoqarnermut Unammilleqatigiinnermullu Aqutsisoqarfiup piumasarisinnaavaa, tak. § 2, imm. 2.

 

  § 4.  Kattunneq § 2, imm. 2 naapertorlugu nalinginnaasumik nalunaarutigineqarpat, nalunaarut tamakkiisuunersoq nalunaarutip tiguneranit kingusinnerpaamik ulluinnaat qulit qaangiunneranni Atuisoqarnermut Unammilleqatigiinnermullu Aqutsisoqarfiup nalunaarutigissavaa. Nalunaarut tamakkiisuunngitsutut Atuisoqarnermut Unammilleqatigiinnermullu Aqutsisoqarfik isigalugu aalajangerpat, suut paasissutissiissutigineqassanersut aqutsisoqarfik piffissarititap taassuma naannginnerani tamanna pillugu nalunaaruteqassaaq. Nalunaarut aatsaat ullormi Atuisoqarnermut Unammilleqatigiinnermullu Aqutsisoqarfiup paasissutissanik piu-maneqartunik tigusiffigisaani tamakkiisuulissaaq.
  Imm. 2.  Kattunneq § 2, imm. 3 naapertorlugu pisariillisakkamik nalunaarutigineqarpat nalunaarutip tiguneranit kingusinnerpaamik ulluinnaat qaangiuppata nalunaarut tamakkiisuusutut isigineqassaaq, kattunnerup nalinginnaasumik nalunaarutigineqarnissaa tamassuma siorna annertunerusunik paasissutissiinissaanik pillugu Atuisoqarnermut Unammilleqatigiinnermullu Aqutsisoqarfiup ilisimatitsissutigisimanngippagu. Atuisoqarnermut Unammilleqatigiinner-mullu Aqutsisoqarfiup nalunaaruteqartoq ulluinnaat qulit taakku iluanni qinnuivigisinnaavaa. Taamaattoqarpat nalunaarut ullormi paasissutissat tiguneranni, tamakkiisuulissaaq, kisiannili pisariillisakkamik nalunaarutip tiguneranit kingusinnerpaamik ulluinnaat qulit qaangiunneranni.
  Imm. 3.  Nalunaaruteqarnermi immersugassami paasissutissat allassimasut ilaat paasissutissiissutigineqarsimanngikkaluartut, § 2, imm. 2 aamma 3 malillugit tamakkiisumik nalunaaruteqarnerup assigissagaa nalunaaruteqartup qinnuteqaatigisinnaavaa. Taamatut qinnuteqaate-qarnermi paasissutissat kattunnerup nalilersorneranut pisariaqannginnerannik tunngavilersuut ilanngunneqassaaq.
  Imm. 4.  Pisariillisakkamik nalunaarut tamakkiisutut isigineqaraluartoq, kattunneq suli akuerineqarsimatinnagu, kattunnerup § 2, imm. 2 naapertorlugu nalinginnaasumik nalunaarutigineqarnissaa Atuisoqarnermut Unammilleqatigiinnermullu Aqutsisoqarfiup piumasarisinnaavaa.

 

  § 5.  Kattunnerup pisariillisakkamik nalunaarutigineranut akitsuutit 50.000 kr. Akilerneqassapput.
  Imm. 2.  Kattunnerup tamakkiisumik nalunaarutigineqarneranut akitsuutit suliffeqarfiit peqataasut Kalaallit Nunaanni kaaviiaartitaasa 0,015 procentiinik annertussuseqartut akilerneqassapput, annerpaamili 1,5 mio. kr.

 

  § 6.  Unammilleqatigiinnermut Ataatsimiititaliaq isumaqarpat, ingerlatsineq nalunaarutigineqartoq unammilleqatigiinneq pillugu inatsimmi § 16-imut, tak. §15, imm. 1, ilaanngitsoq ataatsimiititaliap nalunaaruteqartoq tamanna pillugu nalunaarfigissavaa. Tamassuma kingorna kingusinnerpaamik sapaatit akunneri sisamat qaangiunneranni nalunaarutigineqartup unammilleqatigiinneq pillugu inatsimmi § 8, imm. 1, oqaaseqatigiit siulliat, § 9, imm. 1, oqaaseqatigiit siulliat, § 11, imm. 4, imaluunniit § 11, imm. 5, oqaaseqatigiit siulliit malillugit suliarineqarnissaa qinnuteqaateqartoq Unammilleqatigiinnermut Ataatsimiititaliamut qinnuteqaate-qarsinnaavoq.
  Imm. 2.  Ingerlatsineq unammilleqatigiinneq pillugu inatsimmi § 8, imm. 1, oqaaseeqatigiit siulliat, § 9, imm. 1, oqaaseqatigiit siulliat, § 11, imm. 4, oqaaseqatigiit siulliat imaluunniit § 11, imm. 5, oqaaseqatigiit siulliat malillugit nalilersorneqarnissaanut tamanna pisariaqarpat nalunaaruteqarneq paasissutissanik ilaneqassasoq Unammilleqatigiinnermut Ataatsimiititaliap piumasarisinnaavaa. Taamaattoqarpat piffissami ingerlatsinerup kattunnertut nalunaarutigineqarnerata tigunerani nalunaarut tiguneqartutut isigineqassaaq.

 

  § 7.  Nalunaarut manna atuutilissaaq ulloq 1. aprili 2016.

 

 

Namminersorlutik Oqartussat, ulloq 10. martsi  2016

 

 

Vittus Qujaukitsoq

/

Jørn Skov Nielsen