Unammilleqatigiinneq pillugu Inatsisartut inatsisaat nr. 1, 15. maaji 2014-imeersumi (unammilleqatigiinnermut inatsit) § 26, imm. 3, kingullermillu inatsisartut inatsisaat nr. 55, 25. novemberi 2024-meersumi allannguuteqartinneqartoq naapertorlugu, imatut aalajangeersaasoqarpoq:

Kapitali 1

Unammilleqatigiinnermut Ataatsimiititaliaq

  § 1.  Unammilleqatigiinnermut Ataatsimiititaliap unammilleqatigiinnermut inatsisip taassumalu malitsigisaanik maleruagassat aalajangerneqarsimasut aqunneqarnissaat pingaarnersaallutik akisussaaffigai.

  Imm. 2.  Unammilleqatigiinnermut Ataatsimiititaliaq unammilleqatigiinnermut inatsisip aqunnerani Naalakkersuisunut attuumassuteqanngilaq. 

  § 2. Unammilleqatigiinnermut Ataatsimiititaliaq inuussutissarsiornermik ingerlataqartut atuisartullu soqutigisaannut attuumassuteqanngitsumik siulittaasup tullianik toqqaassaaq.

  Imm. 2.  Ilaasortaq toqqarneqarnermini inuussutissarsiornermik ingerlataqartut atuisullu soqutigisaannut attuumassuteqanngitsoq, piffissami atuuffigisamini inuussutissarsiornermi suliffeqarfinnut, inuussutissarsiornermi kattuffinnut imaluunniit atuisartut kattuffiinut taama attuumassuteqalissagaluaruni, taamaalillunilu arlaannut attuumassuteqannginnissamut piumasaqaat eqquutikkunnaarlugu, ilaasortaq Unammilleqatigiinnermut Ataatsimiititaliamit tunuassaaq. Taamaalereerpat ilaasortaagaluartup piffissap atuuffissaraluata sinneranut Naalakkersuisut ilaasortamik allamik toqqaassapput.

  Imm. 3.  Nalunaarut manna malillugu ilaasortaq § 10 naapertorlugu nipangiussisimasussaatitaanerminik pisussaatitaaffimminiksumiginnaasimappat imaluunniit pisussaaffimminik annertuumik sumiginnaasimappat tunuartinneqarnissaa pillugu siulittaasoq Naalakkersuisunut inassuteqarsinnaavoq.

  Imm. 4.  Kattuffiit ilaasortanik innersuussisinnaatitaasut, ilaasortassanik Unammilleqatigiinnermut Ataatsimiititaliamut innersuussinerminni unammileqatigiinnermut inatsimmi ilaasortat piginnaasai pillugit piumasaqaatit taaneqartut tungaasigut eqquutsitsisinnaasutut tunngavilersuuteqarlutik ilaasortanik innersuussissapput. 

Kapitali 2

Piginnaatitaanerit aamma aalajangiinerit

  § 3.  Unammilleqatigiinnermut Ataatsimiititaliaq, Naalakkersuisunit peqquneqarnermigut, unammilleqatigiinnermut inatsit malillugu maleruagassanik aalajangiinissamut atatillugu oqaaseqaateqartassapput.

  § 4.  Unammilleqatigiinnermut Ataatsimiititaliaq sammisat tunngavissaqarluartut imaluunniit immikkut ittumik pingaaruteqarluinnartut pillugit aalajangiissaaq.

  Imm. 2.  Unammilleqatigiinnermut Ataatsimiititaliap unammilleqatigiinnermut inatsit malillugu aalajangigai ilaasortat kikkut suliap sammineqarnerani peqataasimanersut pillugit paasissutissanik imaqassapput.

  Imm. 3.  Ataatsimiititaliap suliaqarnera pillugu nassuiaatit paasissutissallu Atuisartunut Unammilleqatigiinnermullu Aqutsisoqarfiup tamanut saqqummiussinnaavai.

  § 5.  Unammilleqatigiinnermut Ataatsimiititaliaq suliamik sammisaqarnissamik kinguartitsinissaq pillugu aalajangersinnaavoq, paasissutissanik amerlanerusunik pissarsiornissamut pisariaqarpat, taamattaaq Unammilleqatigiinnermut Ataatsimiititaliap sulianik immikkut ilisimasaqartut Unammilleqatigiinnermut Ataatsimiititaliap suliarinninneranut taaseqataanissaminnut pisinnaatitaaffeqartinnagitpeqataaqqullugit qinnuigisinnaallugit.

  Imm. 2.  Sulianik ilisimasaqartut suliffeqarfinnut imaluunniit suliffeqarfinnut kattussimasunut suliamik suliarinninnerminni peqataaffigisaminnut attuumassuteqassagunik soqutigisaqassanngillat imaluunniit attuumassuteqarfeqassanngillat.

Kapitali 3

Unammilleqatigiinnermut Ataatsimiititaliap allattoqarfia

  § 6.  Unammilleqatigiinnermut Ataatsimiititaliap allatseqarnikkut suliai Atuisartunut Unammilleqatigiinnermullu Aqutsisoqarfimmit isumagineqartarput.

  § 7.  Unammilleqatigiinnermut Ataatsimiititaliap ataatsimiinneri tamanut ammasuunngillat.

  § 8.  Unammilleqatigiinnermut Ataatsimiititaliap aalajangiinerani pineqartoq imaluunniit pineqartut, Unammilleqatigiinnermut Ataatsimiititaliap suliami aalajangiinnginnerani Unammilleqatigiinnermut Ataatsimiititaliamut oqaasiinnartigut naatsumik ilanngussisinnaatitaapput. Ilanngussinerup sivisussusaata, siulittaasoq aalajangiisartut suleriusiat naapertorlugu allatut aalajangersaasimanngippat, minutsit 10-it qaangissanngilai. Oqaasiinnartigut ilanngussaqarniartoq allanit sinniisoqarsinnaavoq imaluunniit ikiorneqarsinnaalluni.

  Imm. 2.  Ataatsimiinnermit Unammilleqatigiinnermut Ataatsimiititaliap suliami aalajangiinissaanik naatsorsuutigineqartumit, Unammilleqatigiinnermut Ataatsimiititaliap aalajangiinerani pineqartoq imaluunniit pineqartut takkutinngitsoorpata, Unammilleqatigiinnermut Ataatsimiititaliaq tunngavissat pigineqartut tunngavigalugit suliami aalajangiisinnaavoq.

  Imm. 3.  Unammilleqatigiinnermut Ataatsimiititaliap aalajangiinerani pineqartoq imaluunniit pineqartut, taamaallaat oqaasiinnartigut ilanngussaqarnissamut imaluunniit ilanngussaqarnissanut, aammalu tassunga atatillugu apeqqutissaasinnaasunut atatillugu Unammilleqatigiinnermut Ataatsimiititaliami ataatsimiinnerup nalaani najuussinnaatitaapput.

Kapitali 4

Arlaannut attuumassuteqarneq

  § 9.  Unammilleqatigiinnermut Ataatsimiititaliamut ilaasortaq suliap sammineqarnerani, pisortat ingerlatsineranni sulianik sammisaqartarneq pillugu inatsisartut inatsisaat malillugu ilaasortaq suliami arlaannut attuuumassuteqaruni aalajangiisinnaatitaanngilaq, aalajangiinermi peqataasinnaanngilaq imaluunniit suliap sammiuneqarnerani arlaatigut peqataasinnaanani.

  Imm. 2.  Ilaasortaq pissutsinik nammineq suliamut arlaatigut attuumassuteqarsinnaanerminut nalornissutaasinnaasoq pillugu ilisimaleruniuk tamanna pillugu piaarnerpaamik Atuisartunut Unammilleqatigiinnermullu Aqutsisoqarfik nalunaarfigissavaa.

  Imm. 3.  Ilaasortaq pineqartoq peqataatinnagu taanna arlaanut attumassuteqarnersoq pillugu Unammilleqatigiinnermut Ataatsimiititaliaq aalajangiissaaq.

Kapitali 5

Nipangiussisimasussaatitaaneq

  § 10.  Unammilleqatigiinnermut Ataatsimiititaliamut ilaasortat, aalajangiisartullu suliaannik suliarinneqataasoq, pisortat ingerlatsineranni sulianik sammisaqartarneq pillugu inatsisartut inatsiaani maleruagassat malillugit nipangiussisimasussaatitaanermik malinnittussaapput.

  Imm. 2.  Nipangiussisimasussaatitaanermut ilaapput paasissutissat suulluunniit, pineqartut Unammilleqatigiinnermut Ataatsimiititaliami atuunnerminnut atatillugu ilisimalersimasaat, assersuutigalugu tamakkununnga ilaallutik suliffeqarfiit aningaasarsiornikkut niuernikkullu atugaat pillugit paasissutissat, kiisalu paasissutissat allat suliffeqarfimmut pineqartumut pingaaruteqartut.

Kapitali 6

Atuutsinneqalerfissaa

  § 11.  Nalunaarut manna ulloq 4. februar 2025-mi atuutsinneqalissaaq.

Namminersorlutik Oqartussat, ulloq 3. februar 2024

Naaja Nathanielsen (atsior.)

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq

/ Jørgen T. Hammeken-Holm (atsior.)