4. november 2007 UKA 2007/12
UPA 2007/50
Tusagassiuisarnermi akisussaassuseqarneq pillugu Inatsisartut inatsisissaattut siunnersuut
pillugu
Inatsisartut Kultureqarnermut Ilinniartitaanermullu Ataatsimiititaliaata
ISUMALIUTISSIISSUTAASiunnersuutip aappassaaneerneqarnerani saqqummiunneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Kristian Jeremiassen, Atassut, siulittaasoq
Inatsisartunut ilaasortaq Ruth Heilmann, Siumut, siulittaasup tullia
Inatsisartunut ilaasortaq Doris Jakobsen, Siumut
Inatsisartunut ilaasortaq Juliane Henningsen, Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Otto Jeremiassen, Siumut (sinniisussaq)
Inatsisartunut ilaasortaq Johan Lund Olsen, Inuit Ataqatigiit (sinniisussaq)
14. marts 2007-imi siullermeerinerup kingorna inatsisissatut siunnersuut ataatsimiititaliap misissorpaa makkuninngalu oqaaseqaateqassalluni:
Siunnersuutip imarisaaKalaallit Nunaanni tusagassiuisarnermi akisussaanermut apeqqutit pillugit maleruagassiorsinnaanermut oqartussaassuseq Namminersornerullutik Oqartussat 2000-imi tiguaat. Tusagassiuisarnermi akisussaaffik pillugu Inatsisartut inatsisissaattut siunnersuummik Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq maanna saqqummiussivoq. Taamaalilluni tusagassiuisarnermut tunngatillugu nunatsinni maleruagassiaq siulleq danskit inatsisaannut atuuttumut taartaasussaq siunnersuutikkut saqqummiunneqarpoq.
Tusagassiuisarnermi akisussaassuseqarneq pillugu maleruagassanik aalajangersaanermi kiffaanngissuseqarluni oqaaseqarsinnaatitaanerup, innuttaasut ilisimatinneqartussaatitaanerisa aammalu oqartussaaqatigiinnerup aqqani aalajangiisarnermi tusagassiuutit inissisimanerisa taamalu inuup innarlerneqannginnissamut illersugaanerata sapinngisamik oqimaaqatigiissaarnissaat siunnersuummi aallaavigineqarput. Tusagassiuuteqarneq sulianik toqqammavilik, isornartorsiuerpalaartoq inuiaqatigiinnilu kiffaanngissuseqartumik inissisimasoq inuiaqatigiinni kulturikkullu mianerisassanut ataqatigiissillugu Naalakkersuisunit isiginiarneqarsimavoq.
Tusagassiuutitigut saqqummiussaqarnermut atasumik innuttaasut ataqqinassusiat innarlerneqartillugu kina akisussaasuunersoq tusagassiuisarnermi akisussaassuseqarneq pillugu inatsisissatut siunnersuutikkut naqissuserneqarpoq aammalu oqaaseqaatinut tusagassiuutitigut saqqummersunut kiap akisussaanerata nalornissutigineqarsinnaannginnissaa Inatsisartut inatsisaatigut siunertarineqarluni. Tamatumani tusagassiuutitigut kiffaanngissuseqarluni oqaaseqarsinnaatitaanerup sapinngisamik pitsaanerpaamik atugassaqartinneqarnissaata qulakkeerneqarnissaa siunertarineqarluni.
Siunnersuut naapertorlugu Kalaallit Nunaanni Tusagassiuisarneq pillugu Aalajangersaasarfimmi ilaasortassanik toqqaasussat tassaapput Naalakkersuisut. Tusagassiornermi ileqqorissaarnissamik innersuussutit unioqqutillugit avammut saqqummiussisoqarsimanersoq Tusagassiuisarneq pillugu Aalajangersaasarfiup aalajangiiffigisassavaa.
Kiisalu digital atorlugu nutaarsiassaqartitsivinnik ingerlatsiviit saqqummerarnerisa malitsigisaanik digital atorlugu nutaarsiassaqartitsivinnik ingerlatsiviit inatsimmi ilanngunneqarsinnaanerannut periarfissat pitsaanerulersinneqarnissaat inatsisissatut siunnersuummi siunnersuutigineqarpoq. Tassunga atatillugu digital atorlugu nutaarsiassaqartitsivinnik ingerlatsiviit sorliit inatsisip ataani inissisimassanersut Tusagassiuisarneq pillugu Aalajangersaasarfiup aalajangiiffigisassagaa siunnersuutigineqarpoq.
Inatsisissatut siunnersuutip tusarniaassutiginera.Tusarniaaneq pillugu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup allakkiaa malillugu tusarniaaneq 12. december 2006-imit 12. januar 2007-imut ingerlanneqarpoq. Tusarniaaffigineqartut pillugit inatsisissatut siunnersuummut nalinginnaasumik nassuiaatit innersuussutigineqarput. Kalaallit Nunaanni Eqqartuussisuunerup tusarniaanermut akissuteqaataa 12. april 2007-imi ataatsimiititaliamit aatsaat tiguneqarmat ataatsimiititaliamit matumuunakkut erseqqissaatigineqassaaq. Tusarniaanermut akissut kingusinaartumik nassiunneqarpoq, taamaattorli Kultureqarnermut, Ilisimatusarnermut Ilageeqarnermullu Pisortaqarfimmit ulloq 29. marts 2007-imi tiguneqarsimalluni. Tusarniaanermut akissut ingerlaannartumik ingerlatseqqinneqarsimanngimmat ataatsimiititaliamit ajuusaarutigineqarpoq. Tusarniaanermi akisut isummersuutinik paasissutissanillu pingaarutilinnik nutaanillu imaqarpoq (Ilanngussaq 1).
Siunnersuut pineqaatissiissutissanut aalajangersakkanik aammalu taarsiissuteqarnissamut akisussaaneq pillugu aalajangersakkanik imaqartoq inatsisissatut siunnersuutip tusarniaassutigineqarneranut ataatsimoortumik akissummi Nunatta Eqqartuussiviata Tusagassiuisarnerlu pillugu Aalajangersaasarfiup tikkuarpaat. Pisinnaatitsissummik inatsimmi Folketingimit akuersissutigineqarsimasumi erseqqissumik tunngavissinneqarsimanngippat maleruagassanik taamaattunik Inatsisartut atuussinnaassuseqartumik aalajangersaasinnaanerat Nunatta Eqqartuussivianit Tusagassiuisarnerlu pillugu Aalajangersaasarfimmut qularineqarpoq. Apeqqutip tamatuma erseqqinnerusumik misissorneqarnissaa Nunatta Eqqartuussiviata Tusagassiuisarnerlu pillugu Aalajangersaasarfiup kaammattuutigaat. Tusagassiuisarnermi akisussaassuseqarneq pillugu inatsimmi pineqaatissiisinnaanermut aalajangersakkat inatsimmik tunngaveqanngissinnaanerannik, taamaalillutillu atuussinnaassuseqanngissinnaanerannik apeqqummut tunngasut qularutigineqaqqunagit apeqqummut Inatsisinik Atortitsinermut Ministerip naliliineranik inatsisissatut siunnersuummik aappassaaneerinissaq sioqqullugu piniaqqullugit Naalakkersuisut ataatsimiititaliamit 23. juli 2007-imi allakkakkut qinnuigineqarput (Ilanngussaq 2). Ataatsimiititaliaq akissummik suli tigusaqanngilaq.
Ataatsimiititaliap siunnersuummik suliarinninneraSiullermeerinermi siunnersuut partiinit amerlanerussuteqartunit tunngaviusumik taperserneqartoq Inatsisartut Kultureqarnermut Ilinniartitaanermullu Ataatsimiititaliaata maluginiarpaa.
Ataatsimiititaliap suliarinninneranut atatillugu apeqqutit arlallit qulaajaaffiginissaat siunertaralugu ataatsimiititaliaq Kulturimut, Ilinniartitaanermut, Ilisimatusarnermut Ilageeqarnermullu Naalakkersuisumut saaffiginnissuteqarsimavoq. Ataatsimiititaliap allagaa 22. marts 2007-imeersoq kiisalu Naalakkersuisunut ilaasortap akissutitut allagaa 27. marts 2007-imeersoq isumaliutissiissummut matumunnga ilanngussatut 3-tut ilanngunneqarput.
Tusagassiuisarnermi akisussaassuseqarnermut paatsuugassaanngitsunik sinaakkutissaqarnissaq ataatsimiititaliamit pingaartinneqarpoq. Taamaattumillu tusagassiuisarnermi akisussaassuseqarneq pillugu Inatsisartut inatsisissaattut siunnersuut ataatsimiititaliamit tikilluaqquneqarpoq. Immikkoortoq taanna pillugu nunatsinni namminerisatsinnik inatsiseqalernissatsinnut piffissanngortoq Naalakkersuisut assigalugit ataatsimiititaliaq isumaqarpoq.
Ineriartorneq taanna pissusissamisoortutut ataatsimiititaliamit isigineqarpoq. Kalaallit Nunaata nammineerneruleriartornissaanik ilungersuuteqarnerput aamma eqqarsaatigalugu tusagassiuisarnermi akisussaassuseqarneq pillugu nunatsinni namminerisatsinnik inatsiseqarnissarput pisariaqartipparput. Innuttaasut taamatullu tusagassiorfiit tatiginnissinnaanerannut qulakkeerinnittussatut Tusagassiuisarneq pillugu Aalajangersaasarfiup arlaannaanulluunniit attumassuteqannginnissaa ataatsimiititaliamit pingaartinneqarpoq.
Peqatigiiffiup saaffiginnissuteqarnera tunngavigalugu Kalaallit Nunaanni Tusagassiortut Peqatigiiffiat ataatsimiititaliamut ulloq 11. april 2007-imi sassartitsivoq (Ilanngussaq 4). Tamatuma kingorna The World Association of Newspapersimut allaqatiginnissutit nuutinneri (Ilanngussaq 5) Naalakkersuisunit ataatsimiititaliap tiguai kiisalu Danskit Tusagassiortut Peqatigiiffiannit saaffiginnissummik (Ilanngussaq 6) ataatsimiititaliaq tigusaqarpoq. Ilaatigut tamanna tunngavigalugu immikkoortup aappassaaneerneqarnissaata Inatsisartut 2007-imi ukiakkut ataatsimiinnissaannut kinguartinneqarnissaa ataatsimiititaliap qinnutigaa. Kingullertut Kalaallit Nunaanni Tusagassiuisarneq pillugu Aalajangersaasarfiup Naalakkersuisunut ilaasortamut 16. august 2007-imi saaffiginnissutaata nuutinnera (Ilanngussaq 7) ataatsimiititaliamut ilisimatitsissutigineqarpoq. Tusagassiuisarneq pillugu Aalajangersaasarfiup siulittaasuata inatsisilerinermik ilinniagaqartuunissaata siunnersuutaaqqaartumi allassimannginnera ataatsimut pingaarnertullu uparuarneqarpoq. Kiisalu siulittaasup Naalakkersuisunit toqqarneqartarnissaa assut isornartoqartinneqarpoq, taamaalillunimi aalajangersaasartut naalakkersuinikkut ingerlatsisunut attuumassuteqannginnerat apeqquserneqarsinnaammat. Taamaalillunilu assersuutigalugu Tusagassiuisarneq pillugu Aalajangersaasarfiup siulittaasua ima erseqqissaateqarpoq: "Inatsisinut tunngasumik ilisimasaqarnerup, siulittaasup piginnaasaqarfigisariaqagaata, saniatigut siulittaasoq aamma attaviitsuusariaqarpoq. Siulittaasoq attaviitsuuginnarani aammali qinerseriaaseq aalajangersimasoq naapertorlugu qinigaasimasariaqarpoq, taamaalilluni siulittaasup ilumut attaviitsuunera inuit ataasiakkaat tusagassiutillu tatiginiassammassuk. Naalakkersuisut pisariaqanngitsumik isornartorsiortinnissaq politikkikkullu akuleruttutut pasillerneqarnissaq pinngitsoortinniarlugu pisortaqarfik attaviitsoq siulittaasunngortinneqartussamik innersuussuteqartissavaat. Eqqartuussiveqarfiit, Inatsisartunut Naalakkersuisunullu attaveqanngitsut, taamatut attaviitsuunissamik qulakkeerinninnissamut piukkunnarnerpaajupput." (Ilanngussaq 7).
Naalakkersuisunut ilaasortap allagaanik ataatsimiititaliaq ulloq 2. oktober 2007-imi tigusaqarpoq, tassani aappassaaneerinissaq sioqqullugu inatsisissatut siunnersuummut allannguutissatut siunnersuuteqarnissaq naatsorsuutigineqarsinnaasoq paasissutissiissutigineqarpoq (Ilanngussaq 8). Apeqqutit erseqqissaatigineqartut eqqarsaatigalugit allannguutissatut siunnersuuteqarnissaq ataatsimiititaliamit ilassilluarneqarpoq. Taamaattumillu Tusagassiuisarneq pillugu Aalajangersaasarfiup siulittaasuata inatsisilerituujunissaa allannguutissatut siunnersuutiminni Naalakkersuisut erseqqissaatigilersaarmassuk ataatsimiititaliap nuannaarutigaa.
Taamaalilluni Tusagassiuisarneq pillugu Aalajangersaasarfiup siulittaasuata inatsisilerituujunissaa ataatsimiititaliap isumaqatigiittup taperserpaa.
Aalajangersaasarfiup arlaannaannulluunniit attuumassuteqannginnissaa qulakkeerumallugu tusagassiortut peqatigiiffianit tusagassiuutillu aaqqissuisoqarfiannit ilaasortatut toqqagassat affaannanngortinneqartariaqartut ataatsimiititaliaq isumaqatigiittoq isumaqarpoq. Ilaasortat katitigaanissaannut siunnersuut naapertorlugu tusagassiuutit sinniisaat aalajangersaasarfimmi amerlanerussuteqassapput, tamannalu annertuumik ajornartorsiutissartaqartutut ataatsimiititaliamit isigineqarpoq.
Pinngaartumik Tusagassiuineq pillugu Aalajangiisartunut allattoqarfimmullu aningaasartuutit pillugit, tak. Inatsisissatut siunnersuummi § 52
Inatsisissatut siunnersuummi § 52, imm. 3-mi allassimavoq, Naalakkersuisut aalajangersinnaagaat, Tusagassiuutit pillugit Aalajangiisartut, tassungalu ilanngullugu allattoqarfik, sulinerinut atatillugu aningaasartuutit tusagassiuutinit Tusagassiuutit pillugit Aalajangiisartut suleriaasiat malillugu agguataagaasumik akilerneqartassasut. Suleriaaseq taanna aalajangersarneqassaaq Naalakkersuisut aalajangersagaat imm. 1 malillugu.
Aaqqiinerli taanna naapertuuttutut Kultureqarnermut Ilinniartitaanermullu Ataatsimiititaliamit isumaqarfigineqanngilaq.
Tusagassiuineq pillugu Aalajangiisartut ingerlanneqarnerannut tusagassiuutit aningaasartuuteqartinneqarnissaannut tunngavissat atorluarneqarnissaat maannakkorpiaq Naalakkersuisut eqqarsaatiginngikkaat isumaliutissiissummi ilanngussaq 3-mi takuneqarsinnaasutut Naalakkersuisut ilisimatitsissutigaat. Inatsisinik aalajangersaanissaq inissaminiinngitsoq tunngaviusumik ataatsimiititaliaq isumaqarpoq, atorluarnissaanut najoqqutassianik ersarissunik ilanngullugu Naalakkersuisut tamatuma peqatigisaanik ersersitsinngimmata.
Tassunga ilanngullugu Tusagassiuutit pillugit Aalajangiisartuni allaffissornikkut sipaarutaalerumaartunut atatillugu aningaasartuutit matussusiivigeqqullugit peqquneqarnissaanut tunngavissamik pissarsinissaq atortariaqaraa aqutsinermut maannakkut ilusilerneqarnermini pissusissamisuunngitsumik kajumilersitsissasoq ataatsimiititaliaq isumaqarpoq.
Tusagassiuisarnermi akisussaassuseqarneq pillugu inatsit danskit inatsisaat maliinnangajavillugu allataavoq. Danskit tusagassiuutaannut aningaasatigut ingerlalluartunut Tusagassiuineq pillugu Aalajangiisartut atuunnerinut aningaasartuutit matussuserneqarnissaannut malunnaatilimmik sunniuteqarnissaa ilimananngilaq. Tusagassiuinerli pillugu Aalajangiisartut ingerlanneqarnerannut aningaasartuutaajumaartussat kalaallit tusagassiuutaannut aningaasaqarnikkut pissakinnerusumut aningaasatigut pitsaanngitsumik kinguneqarnissaa ilimanartorujussuusoq ataatsimiititaliaq isumaqarpoq, matumani ilanngullugit piffinni TV-qarfiit, piffinni aviisit il.il.
Aalajangersakkap ilusilersorneqarnera ataatsimiititaliamit ataatsimoortumit taperserneqarsinnaanngilaq. Illuatungaatigulli Tusagassiuineq pillugu Aalajangiisartut qaninnerusoq ungasinnerusorlu isigalugu aningaasatigut namminersorluni ingerlanissaa inatsisikkut qulakkeerunneqartariaqartoq ataatsimiititaliaq isumaqarpoq.
Tamanna tunngavigalugu inatsisissatut siunnersuummut allannguutissatut siunnersuut Kultureqarnermut Ilinniartitaanermullu Ataatsimiititaliap isumaqatigiittup saqqummiuppaa. Allannguutissatut siunnersuut ilanngussaq 9-ivoq.
Allannguutissatut siunnersuut akuersissutigineqassasoq Kultureqarnermut Ilinniartitaanermullu Ataatsimiititaliap isumaqatigiittup inassutigaa.
TUSAGASSIUISARNEQ PILLUGU AALAJANGERSAASARFIUP SIULITTAASUATusagassiuisarneq pillugu Aalajangersaasarfiup siulittaasussaa Naalakkersuisunit toqqarneqartassasoq ataatsimiititaliami amerlanerussuteqartut, Siumumeersut Atassummeersut, Inuit Ataqatigiillu isumaqarput.
Siulittaasup arlaannaannulluunniit attuumassuteqannginnerata apeqquserneqarsinnaassannginnissaa ataatsimiititaliami ikinnerussuteqartunit aalajangiisuusutut isigineqarmat siulittaasup Naalakkersuisunit toqqarneqartarnissaa ataatsimiititaliami ikinnerussuteqartut, Demokraatit akuersaarsinnaanngilaat. Naammagittaalliuutinik arlaannaannulluunniit attuumassuteqanngitsumik aalajangersaasarfiup suliarinnittarnissaa qulakkeerneqarsinnaaqqullugu nunatta eqqartuussisuunerata Tusagassiuisarneq pillugu Aalajangersaasarfimmi siulittaasuusussaatitaanissaa ikinnerussuteqartunut aalajangiisuusumik pingaaruteqarpoq.
TUSAGASSIUUTIT SORLIIT INATSIMMI ILAATINNEQASSANERSUTTusagassiornermut tunngasut sukkasuumik allanngoriartorfiunerat eqqarsaatigalugu Tusagassiuisarneq pillugu Aalajangersaasarfiup qarasaasiakkut tusagassiuutit sorliit inatsimmi ilaatinneqarnissaat pillugu eqaatsumik aalajangiisinnaassuseqartinnissaa naapertuuttuussasoq ataatsimiititaliami amerlanerussuteqartut, Siumumeersut, Atassummeersut Inuit Ataqatigiinneersullu isumaqarput. Taamaalillunilu aalajangiinerit aalajangersimasut, ataatsimoortumik naliliinermigut, Tusagassiuisarneq pillugu Aalajangersaasarfiup aalajangiiffigisassavai. Tusagassiuutit nutaarsiassanik ingerlatitseqqiinertut iluseqassapput assersuutigalugulu partiit nittartagaannut tunngatillugu Naalakkersuisut ataatsimiititaliamut akissuteqaamminni oqaatigaat nittartakkap "piginnittaa" isummerfigineqanngimmat. Taamaalillunilu nittartagaq suliffeqarfimmut, inunnut ataasiakkaanut partiimulluunniit atanersoq apeqqutaatinnagu nittartakkap tusagassiuisarnermi akisussaassuseqarneq pillugu Inatsisartut inatsisaannut ilaatinneqarnissaa Tusagassiuisarneq pillugu Aalajangersaasarfiup toqqarsinnaavaa. Naalakkersuisut naliliipput internetikkut nalinginnaasumik oqalliffinni qarasaasiakkulluunniit allaqatigiittarfinni oqaaseqaatit inatsisiliuunnissaat pisariaqartinneqanngitsoq, tassa ilaatigut pineqartut nalinginnaasumik inatsisini ilaatinneqareermata, taakkununngalu ilaavoq pinerluttulerinermi inatsit. Tamanna pillugu Naalakkersuisut nassuiaataat ataatsimiititaliami amerlanerussuteqartunit tusaatissatut tiguneqarpoq.
Tusagassiuisarneq pillugu Aalajangersaasarfiup inassuteqarnerat tunngavigalugu qarasaasiakkut tusagassiuutit sorliit inatsimmi ilaatinneqassanersut pillugu nalunaarummik Naalakkersuisut nassiussisarnissaat ataatsimiititaliamit amerlanerussuteqartunit naatsorsuutigineqarpoq. Tamanna innuttaasut inatsisitigut illersugaanerisa qulakkeerneqarnissaanut aalajangiisuusutut isigineqarmat.
Tusagassiuisarnermi akisussaassuseqarneq pillugu inatsisip ukiuni kingullerni amerlasuuni tusagassiuutitigut ineriartorsimanermut naapertuuttuunissaa aalajangiisuusumik pingaaruteqartoq ikinnerussuteqartut Demokraatit isumaqarput, taamaaliornikkut peqatigiiffiit, kattuffiit partiillu nittartagaat inatsimmut ilanngunneqarsinnaaqqullugit. Taamaattumik internetikkut oqallittarfinni atuisut kinaassutsiminnik taasinatik allagaannut nittartakkanik taakkuninnga piginnittut akisussaatinneqarsinnaasariaqarput, taamaalillutillu Tusagassiuisarneq pillugu Aalajangersaasarfimmut suliassanngortinneqarsinnaasariaqarlutik.
Kingullertut taaneqartoq pillugu Naalakkersuisut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamut akissuteqaamminni immikkoortoq pillugu inatsisiliorniannginnertik paasissutissiissutigimmassuk immikkoortumut tunngatillugu Naalakkersuisut iliuuseqarnissaannik amerlanerussuteqartut inassuteqaataat naammattutut ikinnerussuteqartunit isigineqanngilaq. Pineqartoq pillugu Naalakkersuisut inatsisiliornissamik peqquneqartariaqarput. Saqqummiussat inunnut malersuinertut ilusilerneqarsimasut politiinut unnerluutigineqaannartarnissaat naapertuutinngitsoq ikinnerussuteqartut isumaqarput. Tamanna Tusagassiuisarneq pillugu Aalajangersaasarfimmi ajornanngitsunnguamik aalajangiiffigineqarsinnaagaluartoq eqqartuussiveqarfimmi artukkersorneqareeqisumi nukinnik atuilussinnarnermik kinguneqarsinnaavoq.
§ 8, imm. 1-imi aalajangersagaq, missingiilluni naliliineq tunngavigalugu Tusagassiuisarneq pillugu Aalajangersaasarfiup inatsisip atuuffianik killiliinissaanik periarfissiisoq, ataatsimiititaliami ikinnerussuteqartut assut apeqquserpaat. Pisinnaatitaaffimmik annertussusissaannik oqartussaasut namminneq aalajangersaasarnerat ileqquunngilaq. Inatsisip atuuffissai inatsisiliortup nammineq aalajangersagassarai, immikkorluinnarluunniit pisoqartillugu Naalakkersuisut nalunaarutikkut aalajangersarsinnaallugit. Ingerlatassalli § 8, imm. 1-imi pineqartut eqqarsaatigalugit Tusagassiuisarneq pillugu Aalajangersaasarfik inatsisiliortutut aammalu atuutsitsisutut/eqqartuussisutut ataatsikkut pisinnaatitaaffilerneqarsinnaanngilaq. Taamatut periaaseqarnikkut innuttaasut inatsisitigut illersugaanerat annertuumik annikillisinneqarpoq, taakkumi maleruagassat suut malittussaanerlugit inatsimmi takusinnaajunnaassammassuk. Taamaattumik § 8, imm. 1-imut allannguutissatut siunnersuummik saqqummiusseqqullugit Naalakkersuisut ataatsimiititaliami ikinnerussuteqartunit kaammattorneqassapput, taanna malillugu Tusagassiuisarneq pillugu Aalajangersaasarfiup inassuteqarneratigut ingerlatassat sorliit, § 1, nr. 3-mi tusagassiuutinit taaneqartunit saqqummiunneqartartut, Inatsisartut inatsisaanni ilaatinneqassanersut pillugu maleruagassanik Naalakkersuisut aalajangersaasassallutik.
Ataatsimiititaliap inassuteqaataiAtaatsimiititaliaq isumaqatigiittoq allannguutissatut siunnersuummik saqqummiussivoq.
Tamatuma saniatigut Naalakkersuisut allannguutissatut siunnersuutitut saqqummiutissalugu neriorsuutigisaat akuersissutigineqassasoq ataatsimiititaliami amerlanerussuteqartut Siumumeersut, Atassummeersut, Inuit Ataqatigiinneersullu inassutigaat.
Ataatsimiititaliami ikinnerussuteqartup Demokraatineersup siunnersuut itigartitsissutigineqassasoq inassutigaa.
Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.
Kristian Jeremiassen,
siulittaasoqRuth Heilmann
Otto Jeremiassen
Johan Lund Olsen
Lene Knüppel
Ilanngussaq 5b (kalaallisut)
Ilanngussaq 5b (tuluttut)
Ilanngussaq 5c (kalaallisut)
Ilanngussaq 5c (tuluttut)