Nutsernera:

Pineqartoq: Tusgassiuisarnermi akisussaassuseqarneq pillugu inatsit

 

Asasakka mr. O´reilly aamma mr. Brock,

Allakkassinni 12. april 2007 ullulerneqartuni World Association of Newspapers aamma World Editors Forum sinnerlugit Tusagassiuisarnermi akisussaassuseqarneq pillugu inatsisissatut siunnersuut pillugu ernummatisi oqariartuutigaasi, isumaqarassi Tusagassiuutit pillugit Aalajangersaasartuni politikikkut isummertaatsit aalajangiisarnerni tunngaviuallaalissasut.

Ilumoorpoq maanna Kalaallit Nunaat danskit Tusagassiuuteqarnermi akisussaassuseqarneq pillugu inatsisaata immikkut Kalaallit Nunaannut atugassanngortitaasup ataaniimmat, aamma Kalaallit Nunaanni Tusagassiuisarnermi akisussaassuseqarneq pillugu inatsisissatut siunnersuut siuliani pineqartumut sanilliullugu allannguutissanik arlaqartunik imaqarmat. Siunnersuummut ilaapput Tusagassiuutit pillugit Aalajangiisartut tassaassasut siulittaasoq, tusagassiortut marluk, aaqqissuisut marluk pisortanillu toqqakkat marluk. Tusagassiuutit pillugit Aalajangiisartut maanna inuttarivaat siulittaasoq aamma siulittaasup tullia - tamarmik inatsisilerituujusut imaluuniit eqqartuussisuusut – kiisalu tusagassiuisarfinnit assigiinngitsunit ilaasortaatitat amerlaqatigiit.

Isumaqatigaassi oqarassi Tusagassiuisarnermi akisussaassuseqarneq pillugu inatsit nutaaq malunnaatilinnik allannguuteqartussaammat, tassanilu pingaarnersaalluni inatsit tassaassammat Kalaallit Nunaanni Tusagassiuisarnermi akisussaassuseqarneq pillugu inatsit danskit inatsisaannut maanna atuuttumut illuatungiliuttoq. Uagut namminerisatsinnik tusagassiuutit pillugit inatsiseqarnissarput Kalaallit Nunaata namminersorneruleriartornerani alloriarneruvoq pingaarutilik. Tassunga atatillugu pingaartuuvoq Tusagassiuisarnermi akisussaassuseqarneq pillugu inatsisip Kalaallit Nunaanni pissutsinut inuiaqatigiinnullu kalaallinut naleqquttussanngorlugu ilusilernissaa. Inatsisissaq siulliuvoq siunissami pissutsinut naleqqussartuartussaq.

Tunngavilersuut Tusagassiuutit pillugit Aalajangiisartut katiterneranni ersarippoq, tassanimi piumasaqaataajunnaarpoq siulittaasup inatsisilerituujunissaa. Kalaallit Nunaanni innuttaasut 57.000-iusut akornanni inatsisilerituutut ilinniagallit ikittuinnaapput, naapertuuttumillu siulittasussarsiornissaq ajornakusuussalluni. Tusagassiuisarnermi akisussaassuseqarneq pillugu inatsisissatut siunnersuut naapertorlugu siulittaasup piginnaaneqarfigisassai allat qissiminniarneqarput, soorlu Kalaallit Nunaat Kalaallit Nunaannilu tusagassiuutit pillugit ilisimasaqartuuneq. Kisiannili tamanna imaanngilaq Tusagassiuutit pillugit Aalajangiisartut siulittaasuat inatsisilerituujusinnaanngitsoq imaluunniit eqqartuussisuusinnaanngitsoq.

Kallaallit Nunaanni Tusagassiuutit pillugit Aalajangiisartut tassaapput – tassaajuassallutillu arlaannaannulluunniit attuumassuteqanngitsumik suliaqartuusut.

Tusagassiuutit pillugit Aalajangiisartut allattoqarfeqarfiannut tunngatillugu oqaatigineqassaaq Tusagassiuisarnermi akisussaassuseqarneq pillugu inatsisip atuuttup ataani Tusagassiuutit pillugit Aalajangiisartut siulittaasuata tamanna isumagisarimmagu. Periuseq tamanna ingerlaannassaaq. Kalaallit Nunaata eqqartuussiveqarneq oqartussaaffigilerpagu tamanna naapertuuttuussanersoq maannakkorpiaq oqaatigineqarsinnaanngilaq.

Qularinngilara akissutip matuma Kalaallit Nunaanni Tusagassiuisarnermi akisussaassuseqarneq pillugu inatsisissamut tunngatillugu ernummatigisasi annikillisissagaat.

Ikinngutinnersumik inuulluaqqusillunga

 

Hans Enoksen
Naalakkersuisut siulittaasuat