Naalakkersuisut siulittaasuat Hans Enoksen
Namminersornerullutik Oqartussat
Box 1015
3900 Nuuk

 

12. april 2007

 

Asasarput Naalakkersuisut siulittaasuat Enoksen,

World Association of Newspapers (Nunarsuarmi aviisiliornermik ingerlatsisut peqatigiiffiat) aamma World Editors Forum (Nunarsuarmi saqqummersitsisartut kateriffiat) sinnerlugit allappugut, taakkua nunani 102-ni saqqummersittakkat 18.000-it tunuliaqutarivaat, oqaatigiumallugu annertuumik ernummatigigatsigu, Tusagassiuisarnermi akisussaassuseqarneq pillugu inatsisissatut siunnersuut piviusunngortinneqassappat Tusagassiuutit pillugit Aalajangiisartuni politikkikkut isummertaatsip aalajangiisarnermi tunngaviuallaalernissaa.

Maannakkorpiaq Kalaallit Nunaat danskit tusagassiuisarnermi akisussaassuseqarneq pillugu inatsisaata ataaniippoq, tassanilu aalajangersaqqavoq kikkut tusagassiuutit imarisaannut akisussaanersut, Kalaallit Nunaannilu Tusagassiuutit pillugit Aalajangiisartut pilersinneqarlutik. Tusagassiuutit pillugit Aalajangiisartut piginnaatitaapput tusagassiuutit imarisaannik uparuaanissamut imaluunniit tusagassiuutitigut pissuserissaarnissamut tunngatillugu akerliliissuteqarsinnaallutik, tusagassiuutinillu naqqiissuteqaqqusisinnaatitaallutik, paasissutissat saqqummiunneqartut aningaasaqarnikkut allatigulluunniit annertuumik ajoqusiisinnaatillugit.

Kalaallit Nunaanni Naalakkersuisut Tusagassiuisarnermi akisussaassuseqarneq pillugu inatsisissaq nutaaq eqqunniarlugu aalajangersimapput. Inatsisissatut siunnersuut danskit inatsisaannit annertuumik sunnigaavoq, aammali allannguutinik ersarissunik arlalinnik ilaqarluni. Pingaarnersaalluni Tusagassiuutit pillugit Aalajangiisartut inuttarilissammatigit siulittaasoq, tusagassiortut marluk, aaqqissuisut marluk pisortallu toqqagaat marluk. Maannamut siulittaasoqarlunilu siulittaasoq tulleqarsimavoq, taakkualu tamarmik inatsisilerituujunngikkunik eqqartuussisuullutik; ulluinnarni imaassimavoq siulittaasoq tassaalluni Kalaallit Nunaanni Eqqartuussivimmi eqqartuussisoq.

Ernummatigaarput siunnersuut maanna saqqummiunneqartoq malillugu Aalajangiisartut toqqagaasarnerat, taamaalillunilu aalajangiisarnerat politikkikkut isummertaatsimik sunnigaavallaalissasoq. Ataqqinnilluta eqqaasitsissutigaarput pingaaruteqartorujussuummat Tusagassiuutit pillugit Aalajangiisartut kiffaanngissuseqartutut isikkoqaannaratik ilumut kiffaanngissuseqartuunissaat. Tamatuma nassatarisaanik qinnuigaatsigit maannamut suleriaasiusimasoq inatsisitigullu immikkut ilisimasaqassusermik tunngaveqartoq ingerlatiinnaqqullugu, tamatuma kiffaanngissuseqassuseq tamanillu tatigineqarneq qularnaarmagu.

Tusagassiuutit pillugit naammagittaalliutit immikkut allattoqarfiliornissamut ikippallaaqimmata aammattaaq siunnersuutigaarput, suliffeqarfiup pioreersup Tusagassiuutit pillugit Aalajangiisartut taamatut sullinneqarnerat isumagissagaa. Kalaallit Nunaanni Eqqartussiviata allaffissornikkut ingerlatsiviat siunertamut taamaattumut naleqqulluartutut isikkoqarpoq, annermik pissutigalugu Namminersornerullutik Oqartussat eqqartuussiveqarnermut akisussaaffik ukiualunnguit ingerlaneranni tigusussaammassuk.

Ataqqinnilluta qinnuigaatsigit sapinngisaq tamaat naapertorlugu Tusagassiuutit pillugit Aalajangersaasartunut toqqaasarnerup aalajangersaanermilu suleriaatsip politikkimut attuumassuteqanngittuarnissaat qularnaaqqullugu maannalu ilusiusoq – kikkunnit tamanit tatiginninnermik ataavartitsisoq – attatiinnaqqullugu.

Periarfissaqarniariarussi tusarfiginissarsi qilanaaralugu,

Inussiarnersumik inuulluaqqusivugut

Gavin O´Reilly George Brock
Siulittaasoq Siulittaasoq
World Association of Newspapers World Editors Forum

WAN tassaavoq nunarsuaq tamakkerlugu aviisinik saqqummersitsinermik suliaqartut kattuffiat, pisortatigoortumik Naalagaaffinni Peqatigiinni, UNESCO-mi EU-milu sinniisuutitaqartoq. Kattuffimmut ilaasortaapput aviisit 18.000-it nunani 102-ni, tusagassaqartitsiviit 11-t aamma tusagassiuuteqarfiit nunat immikkoortuini qulingiluaniittut nunarsuarlu tamakkerlugu tusagassiisartut ataatsimoorfii. WAN naalakkersuisunut arlaannaannulluunniit attuumanngilaq aningaasannanniarfiunanilu.

 

Allakkat nuunneri ukununnga ingerlatinneqarput: Mr. Jonathan Motzfeldt, Inatsisartut siulittaasuat, Box 1015, 3900 Nuuk

Atassut, Box 399, 3900 Nuuk
Siumut, Box 357, 3900 Nuuk
Demokraatit, Box 164, 3900 Nuuk
IA, Box 321, 3900 Nuuk
KNR, Box 1007, 3900 Nuuk
AG, Box 39, 3900 Nuuk
Sermitsiaq, Box 150, 3900 Nuuk