Kommunini suliassaqarfiit aaqqissuuteqqinneqarnerat pillugu Inatsisartut inatsisaat nr. 14, 19. november 2007-imeersoq

 

Kapitali 1
Kommuneqarfinnut agguataarineq

§ 1. 1. januar 2009-miit Kalaallit Nunaat kommuneqarfinnut sisamanut aggorneqarpoq.
Imm. 2. Avannaani kommunimut siunissami ilaapput:
1) Qaanaap kommunia
2) Kommuneqarfik Upernavik
3) Uummannap kommunia
4) Ilulissat kommuniat
5) Qeqertarsuup kommunia
6) Qasigiannguit kommuniat
7) Aasiaat kommuniat
8) Kangaatsiap kommunia
Imm. 3. Qeqqani kommunimut siunissami ilaapput:
1) Sisimiut kommuniat
2) Maniitsup kommunia
Imm. 4. Tunup/Kitaata kommunianut siunissami ilaapput:
1) Nuup kommunia
2) Paamiut kommune
3) Ivittuut kommuniat
4) Ittoqqortoormiit kommuniat
5) Ammassallip kommunia
Imm. 5. Kujataani kommunimut siunissami ilaapput:
1) Qaqortup kommunia
2) Narsap kommunia
3) Nanortallip kommunia

 

Kapitali 2
Qinersineq il.il.

Kommunalbestyrelsinut qinersineq

§ 2. Kommunalbestyrelsinut nutaanut siullermeersumik qinersinerit 8. april 2008-mi pissapput. Qinersineq pissaaq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni §§ 1-imiit 35-mut naapertorlugit. Kujataata kommuniani Qeqqatalu kommuniani kommunalbestyrelsit 15-inik ilaasortaqarput. Avannaani aamma Tunup/Kitaata kommuniani kommunalbestyrelsit 21-nik ilaasortaqarput. Ileqquusumik kommunalbestyrelsinut qinersinerni, 2008-p kingorna pisussani, kingusinnerpaamik ukiup qinersiffiusussap siuliata naannginnerani kommunalbestyrelsi aalajangersinnaavoq Kujataani kommunimi aamma Qeqqani kommunimi ilaasortat amerlassusaat 15-inik ikinnerussasut aamma Avannaani aamma Tunup/Kitaata kommuniani 21-nik ikinnerussasut. Ilaasortat amerlassusaat akunnattuussapput aqutsinermilu malittarisassatigut aalajangersarneqarsimassallutik.
Imm. 2. Qinersinermi taasanik kisitsineqassaaq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni §§ 36-miit 40-mut naapertorlugit.
Imm. 3. Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaat tunngavigalugu maleruagassiat inatsisartut inatsisaat manna malillugu qinersinernut taamatulli atuutsinneqarput.

§ 3. Kommuniusimasuni qinersinermik siulersuisut taaguinermi siulersuisunit naatsorsukkat inerneri tigoreerunikkit kommunimi qinersinerup tamakkerluni inernera naatsorsussavaat.
Imm. 2. Naatsorsuinermi taasinerit ataatsimut naatsorsorneqassapput makkununnga agguataarlugit
1) Partiit ataasiakkaat taakkulu qinigassanngortitaat
2) Kattusseqatigiit ataasiakkaat qinigassanngortitaat
3) Kisimiillutik qinigassanngortittut ataasiakkaat.

§ 4. Kommunimi qinersinerup inerneri qinersinermik siulersuisunit Qinersinermut Ataatsimiititaliamut nassiunneqassapput, taassumalu kommunimi kattunneqartumi taasinerit naatsorsussavai makkununnga agguataarlugit
1) partiit ataasiakkaat taakkualu qinigassanngortitaat
2) kattusseqatigiit ataasiakkaat qinigassanngortitaat
3) kisimiillutik qinigassanngortittut ataasiakkaat
Tamanna tunngavigalugu kommunimi nutaami inerneq tamarmiusoq Qinersinermut Ataatsimiititaliap naatsorsussavaa. Ilaasortaaffiit Qinersinermut Ataatsimiititaliap d’Hondtip periaasaa malillugu agguataassavai, tassa partiit immikkuutaarlutik ataasiakkaat, kattusseqatigiit immikkuutaarlutik ataasiakkaat aamma kisimiillutik qinigassanngortittut ataasiakkaat taasinerit pissarsiaat 1-imik, 2-mik 3-mik il.il. kommunalbestyrelsimi ilaasortat qinerneqartussat amerlassusaat tikillugit agguarneqassallutik. Tamanna pereerpat ilaasortaaffik siulleq tutsinneqassaaq partiimut, kattusseqatigiinnut imaluunniit kisimiilluni qinigassanngortittumut kisitsimmik agguaanerup inerneranik qaffasinnerpaamik pissarsisumut, ilaasortaaffiup aappaa partiimut, kattusseqatigiinnut imaluunniit kisimiilluni qinigassanngortittumut kisitsimmik agguaanerup inerneranik qaffasinnerpaap tullianik pissarsisumut ilaasortaaffiit tamarmik agguataarneqarserlugit. Kisimiilluni qinigassanngortittoq ilaasortaaffimmik ataasiinnarmik pissarsisinnaavoq.
Imm. 2. Kommuniusimasuni kommunimi nutaami ilaasuni ataasiakkaani tamani kommunip nutaap kommunalbestyrelsiani ilaasortat ilaat ataaseq nunami sumiiffiup sinniisaatut qinigaassaaq.Kommuniusimasut ilaata nunami sumiiffiup sinniisuutitarissavaa partiit anginersaata imaluunniit kattusseqatigiit qinigassanngortitaat amerlanerpaanit taaguunneqarsimasoq. Kisimiilluni qinigassanngortittoq kommunimi partiit imaluunniit kattusseqatigiit taaguisuinit amerlanernit taaguunneqarsimaguni nunami sumiiffiup ilaasortaaffissaa kisimiilluni qinigassanngortittumit pineqartumit ilaasortaaffigineqassaaq. Partiit, kattusseqatigiit imaluunniit kisimiillutik qinigassanngortittut arlallit amerlaqatigiinnit taaguunneqarsimappata tannermoortitsinikkut aalajangerneqassaaq kia arlaata ilaasortaaffik pissarsiarissaneraa. Tannermoortitsineq qinersinermut ataatsimiititaliamit isumagineqassaaq.
Imm. 3. Ilaasortaaffiit partiimit imaluunniit kattusseqatigiinnit ilaasortaaffigineqalertussat partiip imaluunniit kattusseqatigiit qinigassanngortitaanut agguarneqassapput siulliullutik ilaasortanngussallutik qinigassanngortitat kommuniusimasumi nunami sumiiffiup sinniisuutitaatut ilaasortaaffissamik pissarsisimasut. Ilaasortaaffiit allat siulliit pissarsiarineqassapput partiip imaluunniit kattusseqatigiit qinigassanngortitaannit nunami sumiiffiup sinniisuutitaatut qinigaasimanngitsunit kommunimi kattunneqartumi amerlanerpaanit taaguunneqarsimasunit, ilaasortaaffiup aappa pissarsiarineqassalluni qinigassanngortitamit amerlanerpaanit taaguunneqarsimasumut tulliuttumit, ilaasortaaffiit tamarmik qinigassanngortitanut agguaanneqarserlugit. Partiit, kattusseqatigiit imaluunniit kisimiillutik qinigassanngortittut arlallit amerlaqatigiinnit taaguunneqarsimappata tannermoortitsinikkut aalajangerneqassaaq kia arlaata ilaasortaaffik pissarsiarissaneraa. Tannermoortitsineq Qinersinermut Ataatsimiititaliamit isumagineqassaaq.
Imm. 4. Nunami sumiiffiup sinniisuutitaqarfiunerata kingunerisaanik ilaasortaaffiit partiimit, kattusseqatigiinnit imaluunniit kisimiilluni qinigassanngortitamit pissarsiarineqartut amerlassusaat naatsorsuineq tamarmiusoq, tak. imm. 2, tunngavigalugu amerlaneruppata ilasortaaffiit amigaataasut naatsorsuineq tamarmiusoq tunngavigalugu agguaanneqartunit kingullernit tiguneqassapput.
Imm. 5. Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni §§ 50-imit 52-imut maleruagassat kommunini kattunneqartuni Ikaarsaariarnermi Ataatsimiititalianut aamma kommunini nutaani kommunalbestyrelsinut ilaasortanut taamatulli atuutsinneqarput.
Imm. 6. Qinigassanngortitat qinigaanngitsut ilaasortap peqquteqavilluni tunuarneratigut imaluunniit tunuarallarneratigut sinniisussatut ingerlasinnaapput. Kia sinniisussatut ilaasortaalernissaa aamma ilaasortaaffiup atorunnaartutut qaqugukkut naatsorsuunneqarnissaa pillugit maleruagassanik Naalakkersuisut aalajangersaasinnaapput.
Imm. 7. Qinersinermut Ataatsimiititaliap sinniisussanut nalunaarsuiffik suliarissavaa. Nalunaarsuiffimmi allattorneqassapput qinigassanngortitat qinigaasimanngitsut, kisiannili imm. 5-imi maleruagassatut aalajangersakkat malillugit sinniisussatut Ikaarsaariarnermi Ataatsimiititaliamut aamma kommunalbestyrelsimut ilaasortaasinnaatitaasut.
Imm. 8. Qinersinermut Ataatsimiititaliap qinersinermik allattaavimmut allassavai kikkut ilaasortassatut qinigaasutut isiginerini, taavalu qinigaasoq imaluunniit qinigaasut qinigaanerannik allaffigissallugit.

§ 5. Kommuniusimasuni ataasiakkaani immikkuutaartuni qinersineq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisanni §§ 44-miit 47-mut allassimasutut qinersinermik siulersuisunit akuerineqassaaq.

§ 6. Kommunalbestyrelsip kommunimi nutaami Ikaarsaariarnermi Ataatsimiititaliatut piffissaq atuuffia tassaavoq 1. maj 2008-miit 31. december 2008 tungaanut.
Imm. 2. 1. januar 2009-mi Ikaarsaariarnermi Ataatsimiititaliaq kommunimi nutaami kommunalbestyrelsitut atuutilissaaq atuutissallunilu 2013-imi aprilimi kommunalbestyrelsinut qinersinerup tungaanut.
Imm. 3. Kommuniusimasuni kommunalbestyrelsit 31. december 2008 tunuassapput.


Ilagiit sinniisaannut qinersinerit

§ 7. Ilagiit sinnissaannut nutaamik qinersineq ingerlanneqassaaq kommunini nutaani kommunalbestyrelsinut 8. april 2008-mi qinersineq peqatigalugu.
Imm. 2. Ilagiit sinniisaannut qinersineq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni §§ 62-imiit 71-imut malillugit ingerlanneqassaaq.
Imm. 3. Ilagiit sinniisaat nutaamik qinigaasut 30. april 2013 tungaanut atuutissapput.


Nunaqarfinni aqutsisut

§ 8. Ataatsimoorussanik nunaqarfinni aqutsisunik qinersisoqassaaq. Kommunip ataatsip iluani ataatsimoorussamik nunaqarfinni aqutsisut minnerpaamik nunaqarfiit marluk ilaassapput. Nunaqarfiit sorliit ataatsimoorussamik nunaqarfinni aqutsisoqassanersut ilaasortallu qassit qinerneqassanersut kommunalbestyrelsimit aalajangiiffigineqassapput. Tamanna pillugu aalajangiineq ataatsimoorussamik nunaqarfinni aqutsisunik qinersinissap ukiup siuliata naannginnerani aalajangerneqassaaq. Ataatsimoorussamik nunaqarfinni aqutsisunik qinersineq siulleq 2009-mi aprilimi ingerlanneqassaaq.
Imm. 2. Nunaqarfiit avinngarusimavissut nunaqarfiilluunniit inuttuut pillugit imm. 1-mi, oqaaseqatigiit aappaanni piumasaqaammut atatillugu Naalakkersuisut immikkorluinnaq pisuni immikkut akuersissuteqarsinnaapput. Naalakkersuisut aalajangiinerminni kommunalbestyrelse pineqartoq nunaqarfinnit marlunnit amerlanerusunik nunaqarfeqarpat qanoq annertutigisumik ataatsimoorussamik nunaqarfinni aqutsisuliisimanersut pingaartissinnaavaat.
Imm. 3. Ataatsimoorussamik nunaqarfinni aqutsisunik qinersineq pissaaq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni malittarisassat naapertorlugit. Ataatsimoorussamik nunaqarfinni aqutsisunik qinersinermi, imm. 1 naap., ataatsimoorussamik nunaqarfinni aqutsisunut ilaatinneqartut nunaqarfiit qinersivittut ataasiusutut isigineqassapput.

 

Kapitali 3
Ikaarsaariarnermi Ataatsimiititaliaq

§ 9. Ikaarsaariarnermi Ataatsimiititaliami ilaasortaq ukiumigut utoqqaanertaq inissitsiterluni ataatsimiinnissamut ataatsimiigiaqqusissaaq. Ikaarsaarianermi Ataatsimiititaliaq kommunalbestyrelsit, nunaqarfinni aqutsisut il.il. pillugit inatsisartut inatsisaanni §§ 6-8-mut malillugit inissitsiterluni ataatsimiissaaq, taamaattoq inissitsiterluni ataatsimiinneq kingusinnerpaamik 1. maj 2008 ingerlanneqarsimassaaq.
Imm. 2. Ikaarsaariarnermi Ataatsimiititaliaq kommunalbestyrelsit, nunaqarfinni aqutsisut il.il. pillugit inatsisartut inatsisaanni §§ 8 aamma 9 malillugit siulittaasumik, siulittaasup tullianik aamma siulittaasup tulliata aappaanik qinersissaaq.
Imm. 3. Ikaarsaariarnermi Ataatsimiititaliami siulittaasumik qinersinerup ingerlanneqareernissaata tungaanut Ikaarsaariarnermi Ataatsimiititaliap ataatsimiinnera ilaasortamit ataatsimiigiaqqusisimasumit siulersorneqassaaq

§ 10. Kommunimi nutaami aqutsinissamut ileqqoreqqusaq suleriaasissarlu Ikaarsaariarnermi Aataatsimiititaliap suliarissavaa kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi § 2 malillugu.
Imm. 2. Ikaarsaariarnermi Ataatsimiititaliap pilersissavaa aningaasaqarnermut ataatsimiititaliaq ataatsimiititalianillu allequtaasunik pilersitsisinnaalluni kommunalbestyrelsit, nunaqarfinni aqutsisut il.il. pillugit inatsisartut inatsisaanni §§ 18-imiit 31-mut malillugit.

§ 11. Ikaarsaariarnermi Ataatsimiititaliap siulittaasua kommunimi nutaami borgmesteritut, siulittaasup tullia borgmesterip tulliatut aammalu siulittaasup tulliata aappaa borgmesterip tulliata aappaatut ingerlaqqissapput.

§ 12. Ikaarsaariarnermi Ataatsimiititaliani ilaasortat akissarsiaqartinneqassapput kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 17 aamma 37, aammalu kommunalbestyrelsinut, nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu nalunaarummi nr. 35, 5. oktober 2001-imeersumi aalajangersakkat malillugit.

§ 13. Ikaarsaariarnermi Ataatsimiititaliap aningaasanut missingersuusianut siunnersuutaa Ikaarsaariarnermi Ataatsimiititaliap siulittaasuata suliarissavaa saqqummiutissallugulu kingusinnerpaamik 14. juli 2008-mi.
Imm. 2. Aningaasanut missingersuusiaq kommunalbestyrelsit, nunaqarfinni aqutsisut il.il. pillugit §§ 39-mi aamma 40-mi aalajangersakkat malillugit ikaarsaariarnermi Aataatsimiititaliamit suliarineqarlunilu akuersissutigineqassaaq kingusinnerpaamik 14. august 2008.
Imm. 3. Aningaasanut missingersuusiaq inaarutaasumik aalajangiivigineqariitsiarpat aningaasanut missingersuusiaq pillugu nassuiaat naatsoq Ikaarsaariarnermi Ataatsimiititaliamit tamanut saqqummiunneqassaaq.

§ 14. Ikaarsaariarnermi Ataatsimiititaliaq nammineq aningaasaateqarpoq. Aningaasaatit tassaapput Ikaarsaariarnermi Ataatsimiititaliap Namminersornerullutik Oqartussanit tapiissutisiarisimasinnaasai. Ikaarsaariarnermi Ataatsimiititaliap sulineranut aningaasartuutit, Namminersornerullutik Oqartussat tapiissutaasa saniatigut, kommuninit kommunimi nutaami ilaasuni akilerneqassapput. Aningaasartuutit kommuninut agguataarneqarnissaat Ikaarsaariarnermi Ataatsimiititaliamit aalajangiiffigineqassaaq.
Imm. 2. Kommunimi nutaami kommunalbestyrelsit allaffissornikkut Ikaarsaarianermi Ataatsimiititaliamut sullississapput.

§ 15. Ikaarsaariarnermi Ataatsimiititaliap kingusinnerpaamik 1. august 2008-mi aalajangiiffigissavaa kukkunersiuinermi sulianut piginnaasaqarluartoq sorleq Ikaarsaariarnermi Ataatsimiititaliap 2008-mut naatsorsuutaanik kukkunersiuisuussanersoq. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 45 aamma 46 kiisalu nalunaarummi nr. 29, 18. december 1995-imeersumi §§ 9-miit 12-imut taamatulli atuutsinneqassapput.
Imm. 2. Ikaarsaariarnermi Ataatsimiititaliap 2008-mut ukiumoortumik naatsorsuutai kommunimi nutaami aningaasaqarnermut ataatsimiititaliaamit kommunalbestyrelsimut saqqummiunneqassapput, taamaalillutik ukiumoortumik naatsorsuutit kukkunersiuisunut kingusinnerpaamik 1. juni 2009-mi saqqummiunneqarsinnaaqqullugit.

 

Kapitali 4
Ikaarsaariarnermi Ataatsimiititaliap aamma kommunalbestyrelsip pisussaaffii piginnaatitaaffiilu

§ 16. Ikaarsaariarnermi Ataatsimiititaliap suliassaasa pingaarnersaraat kommunit kommuninut nutaanut kattunneqarnissaasa piareersarneqarnera, § 1 naap. Inatsisini oqartussaaffigisassatut aalajangersarneqarsimasut januarip aallaqqaataanit 2009-imiit atuutilersumik kommuninit nutaanit isumagineqarnissaannut pisariaqartut Ikaarsaariarnermi Ataatsimiititaliamit aalajangersarneqassapput.
Imm. 2. Kommunip nutaap taaguutissaatut ilisarnaatissaatullu atorusunneqartut suunissaat Ikaarsaariarnermi Ataatsimiititaliamit aalajangerneqassapput.

§ 17. Ingerlatsiviit timitaasa siunissami sumi inissisimanissaat Ikaarsaariarnermi Ataatsimiititaliamit aalajangerneqassapput.
Imm. 2. Kommunip nutaap aqutsivigineqarnissaa Ikaarsaariarnermi Ataatsimiititaliap piareersassavaa aqutsiviillu ineriartortinneqarnissaannut allaffissornermi aqutsivinni pisortaasussat pisariaqartinneqarnermissut amerlatigisut atorfinitsissallugit. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 21-mi aamma 65-imi aalajangersakkat taamatulli atuutsinneqassapput.
Imm. 3. Ingerlatsiviit timitaasa sumi inissisimanissaat allaffissornikkullu aqutsinermi pisortat atorfinitsinneqarnissaat kingusinnerpaamik 31. december 2008-mi aalajangiiffigineqarsimassapput.

§ 18. Kommunimi nutaami 2009-mut aningaasanut missingersuusiaq Ikaarsaariarnermi Ataatsimiititaliap akuersissutigissavaa. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 39-miit 42-mut aamma kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit nalunaarummi nr. 29, 18. september 1995-imeersumi §§ 1-imiit 4-mut taamatulli atuutsinneqassapput.
Imm. 2. Kommunimi nutaami siunissami ingerlatsinerup qanoq qaffasissuseqarnissaani pingaarnertut siunniussassat Ikaarsaariarnermi Ataatsimiititaliap suliarissavai. Isertitanit akileraarusiinissaq, akigititassat aamma kommunimi nutaami kiffartuussinerup qaffasissusissaa Ikaarsaariarnermi Ataatsimiititaliamit aalajangersarneqassapput.

§ 19. Kommunip nutaap isertitanit akileraarusiisarneq akigititallu 1. januar 2009-miit nalimmassassavai.

§ 20. Kommuniusimasut 1. maj 2008 kingornatigut taamaallaat aningaasartuutigisinnaavaat 2008-mut aningaasanut missingersuusiani akuersissutigineqartuni ilanngunneqarsimasut.
Imm. 2. Kommuniusimasumi kommunalbestyrelsip 1. maj 2008 kingornatigut ilassutitut aningaasaliissutit inatsisit malillugit aningaasartuutissanut tunngasuunngitsut Ikaarsaariarnermi Ataatsimiititaliaq sioqqutsisumik aatsaat akuersiseqqaarlugu akuersissutigisinnaavai.
Imm. 3. Kommuniusimasuni atorfiit nutaat pilersinneqartut inuttaleqqinneqartullu piffissami 1. maj 2008-miit 31. december 2008-mut Ikaarsaariarnermi Ataatsimiititaliamit sioqqutsisumik akuersissutigineqarsimanissaat piumasaqaataavoq.

§ 21. Kommunini nutaani kommunalbestyrelsit kommunit aningaasaqarnerata ingerlarnga pillugu Ikaarsaariarnermi Ataatsimiititaliaq ingerlaavartumik paasissutissitasssavaat.
Imm. 2. Piffissami 31. december 2008 tungaanut kommuniusimasut aningaasatigut iliuusissaannut maleruagassat Naalakkersuisut aalajangersassavaat.

§ 22. Kommuniusimasut atsiueqatigiilluni isumaqatigiissutaat, isumaqatigiissutigisaat aamma allatigut pisussaaffigilersimasaat tamaasa Ikaarsaariarnermi Ataatsimiititaliap misissuataassavai aalajangissallunilu 1. januar 2009 kingornatigut piffissaq taanna nallertinnagu sorliit atorunnaarsinneqassanersut imaluunniit allanngortinneqassanersut.
Imm. 2. Pisussaaffiit pisinnaatitaaffiillu, kiisalu kommuniusimasut pigisaat nalillit akiligassaallu tamaasa 1. januar 2009-mi kommunip nutaap tigussavai.

 

Kapitali 5
Sulisorisat

§ 23. Tjenestemandit kattunnermi kommunini ilaasuni atorfeqartitaasut ulloq 1. januar 2009-mi maannamut atugassarisaminnut naleqquttunik atugassaqartitaallutik kommunimi nutaami atorfeqartitaalissapput. Tamatuma kingorna atorfinitsitsisarnermi oqartussaasoq tassaalissaaq kommunalbestyrelsi kommunilu nutaaq atorfeqartitaaffiulissalluni.

§ 24. Sulisorisat isumaqatigiissutit imaluunniit inummik ataatsimik isumaqatigiissuteqarneq naapertorlugit atorfeqartitaasut kommuniusimasumi atorfeqarfigisimasami atugassarisat atuuttut assingi atugassaralugit suliassatik suliassaralugit nuunnissaminnik

 

Kapitali 6
Naatsorsuutinik tunniussineq

§ 25. 2008-mut naatsorsuutit kommunip nutaap aningaasaqarnermut ataatsimiititaliaanit kommunalbestyerlsimut saqqummiunneqassapput.
Imm. 2. Kommunimi nutaami kommunip pineqartup naatsorsuutai kommunalbestyrelsimit kukkunersiuisunut saqqummiunneqassapput.
Imm. 3. Kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20, 3. november 1994-imeersumi §§ 45 aamma 48 aammalu kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit nalunaarummi nr. 29, 18. september 1995-imeersumi §§ 6-imiit 8-mut naatsorsuutinik saqqummiussinermi taamatulli atuutsinneqassapput.

§ 26. Kukkunersiuineq ingerlanneqassaaq kommunip pineqartup naatsorsuutiminik kukkunersiuisussatut toqqagaanit, tamannalu maleruagassaqartitaavoq kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20, 3. november 1994-imeersumi §§ 46-mi aamma 48-mi aammalu kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit nalunaarummi nr. 29, 18. september 1995-imeersumi §§ 9-miit 12-imut.

 

Kapitali 7
Aalajangersakkat allat

§ 27. Ikaarsaariarnermi Ataatsimiititaliap sulinera pisortat ingerlatsineranni maleruagassat, matumanittaaq pisortat ingerlatsinerat pillugu paasitinneqarsinnaatitaaneq pillugu inatsisartut inatsisaat nr. 9, 13. juni 1994-imeersoq aamma pisortat ingerlatsineranni suliassat suliarineqartarnerat pillugu inatsisartut inatsisaat nr. 8, 13. juni 1994-imeersoq, pineqartunut ilaavoq.

§ 28. Ikaarsaariarnermi Ataatsimiititaliaq kommuniusimasut ilaannit kommunalbestyrelsit allagaataannik pisariaqartitsiguni, allagaatillu taakku pisortat ingerlatsinerat pillugu inatsit aamma pisortat ingerlatsineranni suliassat suliarineqartarnerat pillugu inatsit naapertorlugit nammineq atugassatut iluseqarpata allagaatit ingerlateqqinneqarnerminni nammineq atugassatut iluseqarnertik atuinnassavaat.

§ 29. Borgmesterit tunuartut piffissami 2009-mi 1. januarimiit 30. aprilimut akissarsiaqartitaassapput kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 17-imi aamma 37-mi kiisalu kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu namminersornerullutik oqartussat nalunaarutaanni nr. 35, 5. oktober 2001-imeersumi aalajangersakkat malillugit.
Imm. 2. Tamatuma peqatigisaanik borgmesterinut tunuartunut borgmesterit qinigaajunnaarnersiutaat pillugit nalunaarummi nr. 23, 12. september 1997-imeersumi piffissamut atuuffimmut aalajangersakkat sanioqqunneqassapput. Sanioqqutsineq taamaallaat pissaaq borgmesteri tunuartoq kommunimi kattunneqartumi borgmesteritut ingerlaqqissanngippat.
Imm. 3. Kiisalu piffissap atuuffiup qaammatinik sisamanik sivikinneruffiani borgmesterit akissarsiaannut aningaasartuutissat namminersornerullutik oqartussanit akilerneqassapput.

§ 30. Kommunini nutaani kommunalbestyrelsinut, tak. § 2, imm. 1, aamma ilagiit sinniisaannut , tak. § 7, qinersinerit ingerlanneqarnerannut aningaasartuutit Namminersornerullutik Oqartussat aamma kommuniusimasut akornanni agguarneqassapput, taamaalillutik kommunit aningaasartuutigissallugit kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi §§ 73-imi aamma 75-mi aningaasartuutit taaneqartut.

 

Kapitali 8
Inatsisiliani allani allannguutit

§ 31. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi makku allannguutigitinneqassapput:
1. § 5 oqaasertalerneqassaaq imatut:
" § 5. Inatsit manna kommunini nutaani, tak. pisortat ingerlatsiviisa aaqqissuuteqqinneqarnerat pillugu inatsisartut inatsisaat, Ikaarsaariarnermi Ataatsimiititalianut atuuppoq. Pisortat ingerlatsiviisa aaqqissuuteqqinneqarnerat pillugu inatsisartut inatsisaanni Ikaarsaariarnermi Ataatsimiititaliap sulinera pillugu erseqqissunik imaluunniit erseqqissaataasunik maleruagassanik peqarpat maleruagassat taakku inatsimmi matumani maleruagassianit salliutillugit atorneqassapput.
Imm. 2. Tamatumunnga tunngatillugu kommunit kommunalbestyrelsillu pillugit maleruagassat Ikaarsaariarnermi Ataatsimiititalianut atuuttutut aamma borgmesterit, borgmesterit tullii aamma borgmesterit tulliisa aappaat pillugit maleruagassat Ikaarsaariarnermi Ataatsimiititaliap siulittaasuanut, siulittaasup tullianut aamma siulittaasup tulliata aappaanut atuuttutut isigineqarput.
Imm. 3. Suliassat § 18, imm. 3-mi taaneqartut Ikaarsaariarnermi Ataatsimiititalianit isumagineqassanngillat."

§ 32. Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi allannguutigitinneqassapput makku:
1. § 6 atortuujunnaarsinneqarpoq

2. §§ 41-miit 43-mut atortuujunnaarsinneqarput

3. § 65 atortuujunnaarsinneqarpoq

 

Kapitali 9
Atortuulersitaanera

§ 33. Inatsisartut inatsisaat ulloq 1. december 2007 atortuulerpoq.
Imm. 2. Kalaallit Nunaata nunap immmikkoortuinut kommuneqarfinnullu aggorneqarnera pillugu inatsisartut inatsisaat nr. 11, 30. oktober 1998-imeersoq 31. december 2008-miit atortuujunnaarsinneqarpoq.




Namminersornerullutik Oqartussat ulloq 19. november 2007




Hans Enoksen

/

Kaj Kleist

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)

Isumaliutissiissut (Pingajussaaneerinninneq)

Pingajussaaneerinninnermut allannguutissatut siunnersuut (akuerineqartoq)