UKA2007/30
Inatsisissatut siunnersuummut nassuiaatit
Nassuiaatit nalinginnaasut1. Aallarniut
2006-imi ukiakkut ataatsimiinnermi Aaqqissuussaanermut Isumalioqatigiissitap inassuteqaataasa suliarineqarnerisa ingerlateqqinneqarnissaat Inatsisartut akuersissutigaat. Aaqqissuusseqqinnerup ilaatigut nassataraa kommuninik iluarsaaqqinnissap ingerlanneqarnissaa, tamatuma kingunerissallugu kommunit maannakkut 18-iusut sisamanut kattutsinneqarnissaat.
Aammattaaq aaqqissuusseqqinneq pisortat ingerlatsinerannik tunngaviusumik allanngortitsissaaq, taamaalilluni aaqqissuusseqqinnerup kingorna kommunit innuttaasunut toqqaannartumik tunngasut suliarilissallugit taamaalillutik pisortat ingerlatsinerannut innuttaasunut suliffeqarfinnullu aqqutaalissallutik.
Kommunini nutaani kommunalbestyrelsit sulinerminni pitsaanerpaanik atugaqarnissaat qulakkeerniarlugu kommunini nutaani Ikaarsaariarnermi Ataatsimiititalianut qinersinissamut inissitsiternissamullu inatsisitigut sinaakkutissat pisariaqartinneqartut pilersinniarlugit Naalakkersuisut inatsisissatut siunnersuut saqqummiuppaat.
Ikaarsaariarnermi Ataatsimiititaliat suliassaraat kommunit kommuninut nutaanut ikaarsaariarnissaasa piareersarneqarnissaa.
Inatsisissatut siunnersuutip Ikaarsaariarnermi Ataatsimiititaliat sulinerannut immikkuualuttut maleruagassiuiffigineqarnerisa saniatigut aamma imarissavai kommunit kattunnissaat pillugu aalajangersakkat. 2007-mi upernaakkut ataatsimiinnermi Inatsisartut aalajangiiffigaat kommunit sorliit kattunneqassanersut (inatsisartut 11. april 2007-mi aalajangiinerat UPA 2007/26) inatsisissatullu siunnersuutip aalajangiineq taanna malippaa.
Piffissami ikaarsaariarfiusumi qinersinerit ingerlanneqarneri qinersisarnerit pillugit maannakkut inatsisaasumut naleqqiullugu allannguuteqassapput, taamaattumik qinersinerit ingerlanneqarnissaat pillugit aalajangersakkat erseqqinnerusut inatsisissatut siunnersuutikkut Naalakkersuisut aalajangersarniarpaat. Inatsisissatut siunnersuutikkut aalajangersarneqassapput kommunalbestyrelsini nutaani taamalu Ikaarsaariarnermi Ataatsimiititaliani sisamani ilaasortat amerlassusissaat.
Piffissami ikaarsaariarfiusumi 1. maj 2008-miit 1. januar 2009-mut kommunimi kommunalbestyrelsit marluussapput, taamaattumik Ikaarsaariarnermi Ataatsimiititaliap aamma kommunalbestyrelsit atuuttut kommuni sinnerlugu iliuuseqarnissaminnut sunik piginnaatitaaffeqarnissaat pillugu aalajangersakkat Naalakkersuisut aalajangersassavaat. Piffissami ikaarsaariarfiusumi kommunit aningaasaqarnerat taassumalu kingorna akileraarutit, akigititat nalimmassarneqarnissaat kattunnermullu atatillugu sullissinerup qaffasissusissaa inatsisissatut siunnersuutikkut aamma maleruagassaqartitaassapput.
Piffissami ikaarsaariarfiusumi inatsisissatut siunnersuutikkut kommunini aqutsinissamut inatsimmi aamma qinersisarnerit pillugit inatsimmi maannakkut atuuttuni aalajangersakkat arlaqartut atorunnaarsinneqassapput, aammattaaq kommuneqarfinnut agguataarineq pillugu inatsisartut inatsisaat inatsisissatut siunnersuutikkut atorunnaarsinneqassaaq.
Inatsisissatut siunnersuutikkut kommunit pillugit paasinnittariaatsit marluk assigiinngitsut isummerfigineqassapput. Oqaatsikkut "kommuniusimasoq" eqqarsaataapput kommunit inatsisissatut siunnersuutip saqqummiunneqarnerani ilusaat (oqaatsit tassunga eqqaanartut "maannakkut kommuniusut" piffissami ikaarsaariarfiusumi isumamut paasiuminaallisaataassapput). Oqaatsini "kommunit nutaat" pineqarput Ikaarsaariarnermi Ataatsimiititaliat piffissami atuuffianni kommunit kattunnermi ilaasut. Kommunit taakku kommunalbestyrelsiminnit suli aqunneqassapput, kisianni immikkut maleruagassaqartitaallutik Ikaarsaariarnermi Ataatsimiititalianut naleqqiullugu piginnaatitaaffinnik killiliiffiusut. Aammattaaq "Kommunimi nutaami" pineqarput kommunit kattunnerup kingunerisaanik Ikaarsaariarnermilu Ataatsimiititaliat kommunalbestyrelsitut atuutilernerisigut piulersut. Tamatumuuna oqaatsit "kommuni nutaaq" siunissami kommunit pineqaleraangata taaguutaalernissaa isumagineqanngilaq. Tunngavissaatitaavoq kommunit pillugit taaguutit tamarmik aamma Ikaarsaariarnermi Ataatsimiititaliat pisortat ingerlatsineranni inatsisiliornikkut maleruagassani pineqartunut ilaassasut, tak. siunnersuutip § 27-a.
2. Inatsisissatut siunnersuummut tunuliaqutaasut
Aaqqissuussaanermut Isumalioqatigiissitaq december 2003-mi Naalakkersuisunit pilersinneqarpoq, taassuma suliassaralugit pisortat ingerlatsivianni tamarmi suliassanik naammassinnittarnermut sinaakkutaasut allanngortinneqarnissaannut aalajangiinissamut tunngavissamik teknikikkut suliatigullu nassuiaasersuinerup pigineqalernissaa.
Aaqqissuussaanermut Isumalioqatigiissitap tunngaviusumik pingaartitassatut naleqartitat aallaavigalugit pisortat suliffeqarfiisa allatut ilusilerneqarnissaasa pitsaaqutai pitsaanngequtaalu naliliivigissavai taakkulu tunngavigalugit ukiorpassuarni atasinnaasunik allannguutissanik kaammattuuteqassalluni. Kommunit killeqarfii pioreersut akimorlugit suleqatigiinnissanut assigiinngitsunut kiisalu kommunit kattunnissaminnik aallartitsinissaannut periarfissanut ikorfartuutaasussat misissueqqissaarnerit ingerlanneqassapput siunnersuutillu saqqummiunneqassallutik.
Tamatumunnga atatillugu Aaqqissuussaanermut Isumalioqatigiissitaq piumaffigineqarpoq pisortat ingerlatsineranni nammagassat suliassallu agguataarneranni allannguutissanut periarfissat assigiinngitsut pitsaaqutaat pitsaanngequtaallu naliliivigeqqullugit. Periarfissat assigiinngitsut aallaavigalugit nunap suatungaaniinnermut innuttaqassutsimullu tunngasut suut, matumanittaaq kommunit qanoq angitiginissaat, siunissami kommuninik aaqqissuussinissamut tunngaviutittariaqarnersut naliliivigeqqullugit siunnersuusiorfigeqqullugillu. Siunnersuummut aallaaviussaaq kommunit suliassaminnik aaqqissuussinerat naammassinninnerallu qanimut oqartussaaqataanermut ikiorfartuutaassasoq innuttaasullu nunaqarfinni illoqarfimmilluunniit najugaqarpata pitsaasumik sullinneqarnissaannut qularnaarissalluni. Aammattaaq siunnersuut tunngaviussaaq kommunit suliassaatiminnik pitsaasumik naammassinninnissaanni anguniakkatut aalajangiussimasat pitsaanerpaamik akikinnerpaamillu anguneqarnissaat pineqassalluni, tunngavissaatitaapputtaaq kommunip aaqqissuussaanerata suliffittut kajuminnartuunissaa, piginnaasatigut ineriartornissamut qulakkeerisuunissaa sulisunillu sivisunerusumik suliffiusinnaanissaa.
Aaallaaviussaaq innuttaasut nunammi sumi najugaqaraluarunilluunniit imminnut tunngasunik suliaritaqartut pisortani oqartussaasumit sorlermit sullinneqaraluarunilluunniit assigiimmik pineqartussaatitaassasut, mianerineqassapputtaaq kommuninik iluarsaaqqinnermik suliaqarnermi tunngaviulluinnartariaqartut inatsisitigut innarlitsaalineqarnissaq assigiimmillu pineqartussaatitaanissaq, aamma aalajangeeqataasinnaatitaasannginnerup ajornartorsiutaasarnera ilanngullugu. Naalakkersuinikkut allaffissornikkullu kommunini ilusiliinerup misissueqqissaarfigineqarnerani paasissutissiisarnermi teknologiip annertunerusumik atorneqarnera ilanngunneqassalluni.
Aaqqissuussaanermut Isumalioqatigiissitaq sulinermini pisussaatitaavoq suliani pillugit Inatsisartunut, Naalakkersuisunut, kommuninut innuttaasunullu paasissutissiisarnissamut. Aaqqissuussaanermut Isumalioqatigiissitaq naalakkersuinikkut aalajangiisartut naalakkersuinikkut tunaartassatut tikkuagaat naapertorlugu sulisinnaajumalluni naalakkersuinikkut piginnaatitaanissaminik ujartuisassaaq. Tamanna tunngavigalugu 2004-mi Aaqqissuussaanermut Isumalioqatigiissitap sulinera pillugu nassuiaat Inatsisartunut saqqummiunneqarpoq 2005-imilu upernaleqqaarnerani Aaqqissuussaanermut Isumalioqatigiissitap Ulrik Kjær, Syddansk Universitetscenterimeersoq, tamat oqartussaaqataanerat pillugu nalunaarusiamik suliaqartippaa. Nalunaarusiaq tunngaviuvoq kommunit nutaamik aaqqissuunneqarnissaannut, pisortat sullissinerannut sumiiffinnilu oqartussaaqataanermut siunnersuutit apeqqutillu pillugit paasissutissatut quppersakkamut.
Kiisalu Aaqqissuussaanermut Isumalioqatigiissitat piffissami 2004-miit 2005-imut sinerissami innuttaasunik ataatsimiisitseqattaarpoq. Aaqqissuussaanermut Isumalioqatigiissitaq aamma borgmesterit kommunaldirektørillu ataatsimiinnerini kiisalu kommunit aallartitaasa piffissami tassani ataatsimiittarnerini peqataasarpoq.
2005-imi ukiakkut Aaqqissuussaanermut Isumalioqatigiissitap kaammattuutini Naalakkersuisunut tunniuppai 2006-imilu upernaakkut ataatsimiinnermi kaammattuutit Inatsisartut tusaatissatut tiguaat.
2006-imi ukiakkut ataatsimiinnermi Inatsisartut aalajangerput aaqqissuusseqqinnermik sulineq Aaqqissuussaanermut Isumalioqatigiissitap kaammattuutai aallaavigalugit ingerlaqqissasoq, taamatuttaaq aalajangiunneqarpoq kommuniusimasut 18-iusut sisamanut kattutsinneqassasut. Kattussuunnermi aallaaviatigut mianerineqassapput nunap suatungaaniinnermut tunngasut kommunillu nutaat sapinngisamik 8.000-inik innuttaqassallutik.
Tamanna tunngavigalugu Naalakkersuisut siulittaasuat kommuninut tamanut allagaqarpoq qinnutigalugu 31. december 2006 nallertinnagu nalunaarutigineqassasoq kommunit sorlernut kattunnissartik kissaatiginerlugu.
Kommunit kissaataat kommuninut sisamanut agguataarinissamut inatsisissatut siunnersuummut aallaaviupput.
3. Inatsisissatut siunnersuutip imarisai
3.1 Kommuninut agguataarineq
Maannakkuugallartoq siunertarineqanngilaq kommuneqarfinnut agguataarineq pillugu inatsisip allanngortinneqarnissaa, inatsisissatullu siunnersuutip kapitali 1-iani siunissami kommuniulersussat Inatsisartut aalajangigaat 1. januar 2009-miit suunissaat inatsisikkut tunngavilerneqarpoq:
Avannaa: Qaanaaq, Upernavik, Uummannaq, Ilulissat, Qeqertarsuaq, Qasigiannguit, Aasiaat aamma Kangaatsiaq.
Qeqqa: Sisimiut aamma Maniitsoq.
Tunu/Kitaa: Nuuk, Paamiut, Ivittuut, Ittoqqortoormiit aamma Ammassalik
Kujataa: Qaqortoq, Narsaq aamma NanortalikIkaarsaariarnermi Ataatsimiititaliat piffissami ikaarsaariarfiusumi kommunit nutaat ilaatigut taaguutissaat ilisarnaatissaallu aalajangiiffigissavaat.
Aalajangiiffigisassat taakku aalajangiiffigineqareerpata kommuneqarfinnut agguataarineq pillugu inatsisiliortoqarnissaa Naalakkersuisut atorluarsinnaanerpaasoraat.
3.2 Qinersinerit
2007-mi upernaakkut ataatsimiinnermi Inatsisartut aalajangerput Ikaarsaariarnermi Ataatsimiititalianut sumiiffiup sinniisuutitaqarnissaanik isuma tunngaviusoq tunngavigalugu qinersinissaq pillugu inatsisissatut siunnersuummik saqqummiussinissamik Naalakkersuisut peqquneqassasut (inatsisartut aalajangernerat UPA 2007/27).
Siunnersuutigineqarpoq Ikaarsaariarnermi Ataatsimiititalianut 8. april 2008-mi qinersinerit kommunalbestyrelsinut nalinginnaasumik qinersisarnernit allaasumik ingerlanneqassasut. Siunnersuutip kapitaliisa aappaanni qinersinissap taassuma ingerlanneqarnissaanut aalajangersakkat erseqqinnerusut aalajangersarneqarput. Aammattaaq nunaqarfinni aqutsisunut ilagiillu sinniisaannut qinersisarnerit piffisssaat kommunalbestyrelsinut il.il. qinersisarnerit pillugit inatsimmut naleqqiullugu allanngortinneqassapput. Tamannattaaq siunnersuutip kapitaliisa aappaanni maleruagassiuiffigineqarpoq.
Ikaarsaariarnermi Ataatsimiititalianut qinersinerit ingerlanneqarnissaat pillugu aalajangersakkat kommunalbestyrelsinut qinersisarnerit pillugit inatsimmi aalajangersakkat pioreersut aalajangersakkallu nutaat malillugit ingerlanneqassaaq.
Ikaarsaariarnermi Ataatsimiititalianut qinersinerit kommuniusimasuni ingerlanneqassapput, qinigassanngortitat, qinersisussat allattorsimaffiisa akuersissutigineqarnerat qinersinermillu siulersuisut maleruagassaqartitaassapput inatsit maannakkut atuuttoq malillugu. Qinersisarnerit pillugit inatsisip §§ 1 – 5-imut, §§ 7 – 19-imut, §§ 21 – 40-mut, §§ 44 – 47-mut taamaatsillugit atorneqassapput.
Kommuniusimasuni ataasiakkaani tamani nunami sumiiffiup sinniisuutitarissavaa partiit anginersaata imaluunniit kattusseqatigiit qinigassanngortitaat amerlanerpaanik taagorneqasimasoq.
Maannakkut kommuniusut taaguinerit partiinut, kattusseqatigiinnut aamma kisimiillutik qinigassanngortittunut agguataareerpatigit kommunini ataasiakkaani qinersinerit inerneri nassiunneqartut aallaavigalugit Qinersinermut ataatsimiititaliap Ikaarsaarianermi Ataatsimiititaliani ilaasortaasussat kinaassusersissavai. Kommunimi kattunneqartumi inernerit tamarmiusut aallaavigalugit sinniisuutitassat kinaassusersineqassapput ilaasortaaffissallu agguataarneqassapput d´Hondtip amerlassutsit imminnut naleqqiunnerisigut kisitsisinngornera tunngavigalugu periaasaa malillugu. Nunami sumiiffiup sinniisuutitaa tutsinneqassaaq partiimut imaluunniit kattusseqatigiinnut kommuniusimasumi amerlanerpaanit taaguunneqarsimasumut aamma kommunimi nutaami qinersinerup inernera aallaavigalugu qinigassanngortitamut nammineq amerlanerpaanit taaguunneqarsimasumut.
Nunami sumiiffiup sinniisuutitaata sinniisussaatut Qinersinermut ataatsimiititaliap toqqassavaa partiip imaluunniit kattusseqatigiit qinigassanngortitaat amerlanerpaamut tulliulluni taagorneqarsimasoq. Qinigassanngortitaq taanna Ikaarsaariarnermi Ataatsimiititaliamut qinerneqareersimappat ilaasortaasussaq nr. 3 il.il. toqqarneqassapput.
Siunnersuutigineqarpoq Nunaqarfinni Aqutsisut piffissaq atuuffiat 2009-mi aprilip naaneranut sivitsorneqassasoq. Piffissap taamaalinerani kommunimi tamat oqartussaaqataanerat eqqarsaatigalugu ataatsimoortumik naammassinninnissaq kommunit nutaat aalajangiiffigisimassagaat naatsorsuutigineqarpoq.
Ilagiit sinnissaannut qinersisarnerit kommunalbestyrelsinut il.il. qinersisarnerit pillugit inatsisartut inatsisaat malillugu kommunalbestyrelsip piffissaq qinigaaffia malippaa, taamaattumik siunnersuutigineqarpoq ilagiit sinniisaannut qinersinissaq ukiumik ataatsimik siuartinneqassasoq taamalu Ikaarsaariarnermi Ataatsimiititalianut 8. april 2008-mi qinersineq peqatigalugu ingerlanneqassasoq. Isumamut tassunga Biskoppi isumaqataavoq. Tamatuma kingorna ilagiit sinniisaat qinigaarlaat 2013-imi upernaanerani kommunalbestyrelsinut ilagiillu sinniisaannut qinerseqqittoqarnissaata tungaanut atuutissapput.
Maannakkut kommunalbestyrelsiusut piffissaq qinigaaffiat qaammatinik sisamanik sivikillineqassaaq Ikaarsaariarnermilu Ataatsimiititaliat/kommunalbestyrelsit nutaamik qinigaasut piffissaq atuuffissaat ukiut tallimaassaaq. Ikaarsaariarnermi Ataatsimiititaliat piffissaq qinigaaffiat 1. maj 2008-miit 31. december 2008-mut ingerlassaaq. Tamatuma kingorna kommunimi nutaami Ikaarsaariarnermi Ataatsimiititaliaq kommunimi nutaami kommunalbestyrelsitut atuutilissaaq. Kommunimi nutaami kommunalbestyrelsimut ileqquusumik qinersineq siulleq pissaaq april 2013-imi.
Siunnersuut malillugu ilagiit sinniisaat april 2008-mi qinigaasut ilagiit sinniisaattut 2013-imi aprilip naalernerata tungaanut atuutissapput.
3.3 Ikaarsaariarnermi Ataatsimiititaliat
Ikaarsaariarnermi Ataatsimiititaliat kommuniusimasut kommunerujussuit nutaat sisamat piareersaaffigineqarnerannut pingaaruteqarlutik inissisimassapput. Siunnersuutip kapitaliisa pingajuata imarai Ikaarsaariarnermi Ataatsimiititaliat ilaasortaasa amerlassusissaat, inissitsiternerat kiisalu kommunalbestyrelsiusimasunut naleqqiullugu piginnaatitaaffii pillugit aalajangersakkat.
Ikaarsaariarnermi Ataatsimiititaliat, soorlu taaguutaatigut takuneqarsinnaasoq, kommunit 18-iniit sisamanngortinneqarneranni piffissami ikaarsaariarfimmi atuutissapput.
Kommunini nutaani Ataatsimiititaliat periuseq immikkut ittoq malillugu qinerneqassapput, tamatumuuna qularnaarneqassalluni kommuniusimasut ataasiakkaat tamarmik Ikaarsaariarnermi Ataatsimiititaliami sinniisuutitaqarnissaat. Ikaarsaariarnermi Ataatsimiititaliani sinniisuutitat allat d´Hondtip periusaa nalinginnaasoq malillugu kommunini nutaani qinigassanngortitat tamarmiusut akornanni qinerneqassapput.
Kommunini nutaani qinersivinni tamani Ikaarsaariarnermi Ataatsimiititaliani aamma kommunalbestyrelsini ilaasortassat 17-it qinerneqassapput. Nunami sumiiffiit sinniisuutitaasa amerlassusissaannut soorunami apeqqutaassaaq kommunit kommunimi nutaami qassit ilaanerat, kisianni nunami sumiiffiit sinniisuutitaat Ikaarsaariarnermi Ataatsimiititaliami ilaasortanut 17-iusunut ilaassapput. Siunnersuutigineqarpoq Ikaarsaariarnermi Ataatsimiititalianut 8. april 2008-mi qinersinerit ingerlanneqassapput.
Ikaarsaariarnermi Ataatsimiititaliat inissitsitissapput kommunalbestyrelsit, nunaqarfinni aqutsisut il.il. pillugit inatsisartut inatsisaanni §§ 6-imiit 8-mut malillugit. Ikaarsaariarnermi Ataatsimiititaliami ilaasortat ukiumigut utoqqaanersaat aqutsinissamut inatsimmi aalajangersakkat malillugit inissitsitissalluni ataatsimiinnissamut ataatsimiigiaqqusissaaq, taamaattoq kingusinnerpaamik 30. april 2008-mi.
Ikaarsaarianermi Ataatsimiititaliaq siulittaasumik, siulittaasup tullianik aamma siulittaasup tulliata aappaanik qinersissaaq aqutsinissamut inatsisip §§ 8-mi 9-milu aalajangersakkat malillugit. Kommunit 1. januar 2009 kattussuutereerpata Ikaarsaariarnermi Ataatsimiititaliaq kommunimi nutaami kommunalbestyrelsitut ingerlaqqissaaq. Kommunimi nutaami Ikaarsaariarnermi Ataatsimiititaliap siulittaasua borgmesteritut, siulittaasup tullia borgmesterip tulliatut aammalu siulittaasup tulliata aappaa borgmesterip tulliata aappaatut ingerlaqqissapput. Ikaarsaariarnermi Ataatsimiititaliap piginnaatitaaffii Ataatsimiititaliap ulluinnarni sulinerata saniatigut piffissami ikaarsaariarfiusumi kommunimi nutaami sulinera siunissamut sammitinneqassaaq.
Kommunimi nutaami aqutsinissamut ileqqoreqqusaq suleriaasissarlu kommunalbestyrelsit nunaqarfinnilu aqutsisut pillugit inatsisartut inatsisaanni § 2 naapertorlugu suliarineqassapput.
Ataatsimiititaliat allequtaasut inatsisartut inatsisaata kapitali 3-a malillugu pilersinneqarsinnaapput.
Siunnersuutigineqarpoq Ikaarsaariarnermi Ataatsimiititaliat akissarsiaqartinneqassasut aqutsinissamut inatsimmi § 17-imi aamma § 37-mi aamma nalunaarummi nr. 35, 5. oktober 2001-imeersumi aalajangersakkat malillugit. Ataqatigiissaarinermi ilanngaatissaq aalajangersarneqassaaq, taamaalillutik Ikaarsaariarnermi Ataatsimiititaliami ilaasortat kommuniusimasuni kommunalbestyrelsimi ilaasortaareersut Ikaarsaariarnermi Ataatsimiititaliani sulinermut taamaallaat 50%-imik akissarsiaqartinneqassallutik kommunalbestyrelsimi sulineq maannamutut akissarsissutigineqartassasoq.
Ikaarsaariarnermi Ataatsimiititaliani ilaasortat amerlassusissaat Aaqqissuussaanermut Isumalioqatigiissitap kaammattuuteqarneratut 17-inut aalajangerneqarpoq.
Siunnersuutigineqarpoq Ikaarsaariarnermi Ataatsimiititaliap aningaasanut missingersuusiaa Ikaarsaariarnermi Ataatsimiititaliap siulittaasuata suliarissagaa saqqummiutissallugulu kingusinnerpaamik 1. juli 2008-mi. Aningaasanut missingersuusiaq Ikaarsaariarnermi Ataatsimiititaliamit tamarmiusumit kingusinnerpaamik 1. august 2008-mi suliarineqarlunilu aalajangiunneqassaaq. Aningaasanut missingersuusiaq Ikaarsaariarnermi Ataatsimiititaliamit inaarutaasumik aalajangiivigineqariitsiarpat aningaasanut missingersuusiaq pillugu nassuiaat naatsoq tamanut saqqummiunneqassaaq. Aningaasanut missingersuusiaq kattussuunnerup piareersarneranut atatillugu immikkut aningaasartuutaassaaq Namminersornerullutillu Oqartussat Ikaarsaariarnermi Ataatsimiititaliap sulineranut aalajangersimasumik tapiissuteqassapput. Siunnersuutigineqarpoq kommunit kommunimi nutaami ilaasut allaffissornikkut Ikaarsaariarnermi Ataatsimiititaliamut sullississasut, kisianni Namminersornerullutik Oqartussat tapiissutaasa aalajangersimasut saniatigut aningaasartuutit kommunit akisussaaffigaat, Ikaarsaariarnermi Ataatsimiititaliamit aalajangiunneqartussat.
Ikaarsaariarnermi Ataatsimiititaliap kingusinnerpaamik 1. august 2008-mi aalajangiiffigissavaa kukkunersiuinermi sulianut piginnaasaqarluartoq sorleq Ikaarsaariarnermi Ataatsimiititaliap 2008-mut naatsorsuutaanik kukkunersiuisuussanersoq. Kukkunersiuineq aqutsinissamut inatsimmi § 45-mi, § 46-mi aamma nalunaarummi nr. 29, 18. december 1995-imeersumi §§ 9-miit 12-imut maleruagassaqartitaavoq.
Siunnersuutigineqarpoq Ikaarsaariarnermi Ataatsimiititaliap 2008-mut ukiumoortumik naatsorsuutai kommunip nutaap aningaasaqarnermut ataatsimiititaliaanit kommunalbestyrelsimut saqqummiunneqassasut, taamaalillutik ukiumoortumik naatsorsuutit kukkunersiuisunut kingusinnerpaamik 1. juni 2009-mi saqqummiunneqarsinnaaqqullugit.
3.4 Pisussaaffiit piginnaatitaaffiillu:
Ikaarsaariarnermi Ataatsimiititaliap pisussaaffii piginnaatitaaffiilu kapitalit sisamaanni maleruagassiuiffigineqarput.
Kommunip nutaap taaguutissaa ilisarnaatissaalu Ikaarsaariarnermi Ataatsimiititaliamit aalajangerneqassapput.
Ingerlatsiviup siunissami sumi inissisimanissaa aalajangersarneqassaaq. Ingerlatsiviup sumiiffimmi ataatsimi katersorneqarnissaa pisariaqanngilaq kommuninili nutaani illoqarfinnut agguarneqarsinnaalluni. Ingerlatsiviit ataasiakkaat sumi inissisimanissaat Ikaarsaariarnermi Ataatsimiititaliap aalajangiiffigissavai, aammattaaq kommunip nutaap aqutsivigineqarnissaa Ikaarsaariarnermi Ataatsimiititaliap piareersassavaa aqutsiviullu ineriartortinneqarnissaanut allaffissornermi aqutsivinni pisortaasussat pisariaqartinneqarnermissut amerlatigisut atorfinitsissallugit. Naatsorsuutigineqarpoq sulineq tamanna naammassineqarsimassasoq kommunit kattussuunneqarnerisa 1. januar 2009-mi piviusunngortinneqarnissaa sioqqullugu. Kommunimi nutaami 2009-mut aningaasanut missingersuusiaq Ikaarsaariarnermi Ataatsimiititaliap akuersissutigissavaa. Missingersuusiortarneq pillugu aqutsinissamut inatsisip §§ 39, 40, 41 aamma 42 atuutsinneqassapput. Aammattaaq missingersuusiorneq maleruagassaqartitaavoq missingersuusiortarneq pillugu nalunaarummi nr. 29, 18. september 1995-imeersumi §§ 1-imiit 4-mut aalajangersakkatigut.
Tamatuma saniatigut kommunimi nutaami tamarmi akileraarusiisarnerup, akigititat kiffartuussinerullu pitsaassusiata pilertortumik assigiisilernissaat pingaaruteqarpoq. Siunnersuutikkut periarfissiisoqarpoq piffissap sivikitsup ingerlanerani akigititat kiffartuussinerullu pitsaassusiata assigiinngisinneqarnissaannut, tamannali pinngitsoorniartariaqarpoq. Kommunimi nutaami siunissami ingerlatsinerup qanoq qaffasissuseqarnissaani pingaarnertut siunniussassat piffissami ikaarsaariarfimmi kingusinnerpaamillu 1. januar 2009 nallertinnagu Ikaarsaariarnermi Ataatsimiititaliamit akuersissutigineqassapput.
Kommunini kommunalbestyrelsit tunngaviatigut marluusussaanerannut atatillugu pingaartorujussuuvoq inatsisiliornikkut kommunalbestyrelsip aamma Ikaarsaariarnermi Ataatsimiititaliap piginnaatitaaffiisa ersarissumik aalajangersarneqarnissaat isumaqatigiinngissuteqarsinnaanerit pinngitsoorniarlugit.
Siunertaavoq maannakkut kommunalbestyrelsiusut 1. maj 2008 kingornatigut taamaallaat ingerlatsinermut tunngasut iliuuseqarfigisinnaassagaat Ikaarsaariarnermi Ataatsimiititaliat 1. januar 2009 kingornanut sunniuteqartussat iliuuseqarfiginissaannut piginnaatitaassasut.
Suliniutit siunissamut sammisititat tamaasa Ikaarsaariarnermi Ataatsimiititaliamit aalajangiunneqassapput imaluunniit akuersissutigineqassallutik. Aammattaaq piffissami ikaarsaariarfiusumi ingerlatsivimmi atorfiit inuttaleqqinneqarneri aamma atorfiit nutaamik pilersitat inuttalerneqarnissaat Ikaarsaariarnermi Ataatsimiititaliamit sioqqutsisumik akuersissutigineqassapput. Aammattaaq 2008-mut aningaasanut missingersuusiani aningaasaliissutit akuersissutigineqareersimasut ikililiivigineqarnissaasa akuersissutigineqarnissaa Ikaarsaariarnermi Ataatsimiititaliap piginnaatitaaffigaa.
Kommuniusimasuni kommunalbestyrelsiusut aningaasaqarnikkut iliuutsit tamaasa pillugit Ikaarsaariarnermi Ataatsimiititaliamut ingerlaavartumik paasissutissiissutigisassavaat.
Kommuniusimasut atsiueqatigiilluni isumaqatigiissutaat, isumaqatigiissutigisaat aamma allatigut pisussaaffigilersimasaat tamaasa Ikaarsaariarnermi Ataatsimiititaliap misissuataassavai aalajangissallunilu sorliit ingerlatiinnarneqassanersut sorliillu atorunnaarsinneqassanersut.
Siunnersuutigineqarpoq piffissami ikaarsaariarfiusumi aningaasatigut iliuusissanut aalajangersakkat erseqqinnerusut aalajangersarnissaannut Naalakkersuisut piginnaatinneqassasut.
Naatsorsuutigineqarpoq piginnaatitsissut taanna piviusunngortinneqassasoq piffissami ikaarsaariarfiusumi kommuniusimasut aningaasaqarnerisa immikkuualuttutigut maleruagassiuiffigineratigut, tamatumuunalu kommunerujussuarnut nutaanut tunngatillugu kommuniusimasuni kommunalbestyrelsiusut aningaasaqarnikkut pitsaanngitsumik iliuuseqaratarsinnaanerat pinngitsoortinniarneqarpoq.
Kommuniusimasut siusinnerusukkut pisussaaffii pisinnaatitaaffiilu, kiisalu pigisaat nalillit akiligassaallu tamaasa 1. januar 2009-mi kommunerujussuit nutaat tigussavaat.
3.5 Sulisorisat
Siunnersuutip kapitaliisa tallimaanni sulisorisat aaqqissuusseqqinnermi kalluarneqartussat atorfeqartitaanerannut tunngasut maleruagassiuiffigineqarput. Sulisorisat aallaaviatigut suliassanut malinnaassapput.
Siunnersuutigineqarpoq tjenestemandit kommunini nutaani maannamut atugassarisaminnut naleqquttunik atugassaqartitaallutik atorfeqartitaalissasut.
Nunami sumiiffimmiit sumiiffimmut allamut sulisunik nuutsitsinermut atatillugu nuttarnerulersitsisinnaanermut periarfissiissutit innersuutigineqassapput.
Sulisorisat isumaqatigiissutit imaluunniit inummik ataatsimik isumaqatigiissuteqarneq naapertorlugit atorfeqartitaasut kommunimi atorfeqarfigisimasami atugassarisat atuuttut assingi atugassaralugit suliassatik suliassaralugit nuunnissaminnik neqeroorfigineqassapput.
Nuunnissaq ima piaartigisumik nalunaarutigineqassaaq sulisorisaq nuunnissaq sioqqullugu soraarniuteqarnissamut nalunaaruteqarnissaq nalinginnaasoq atorlugu soraarniuteqarsinnaasunngorlugu.
3.6 Naatsorsuutinik tunniussineq
Ikaarsaariarnermi Ataatsimiititaliat piffissami ikaarsaariarfiusumi naatsorsuutinik tunniussinissaat kukkunersiuinerlu pillugit aalajangersakkat siunnersuutip kapitaliisa pingajuanni aalajangersarneqarput.
Kapitalit arfernanni kommuniusimasut naatsorsuutinik tunniussinissaat kukkunersiuinerlu pillugit aalajangersakkat aalajangersarneqarput. Naatsorsuutinik tunniussinissaq aqutsinissamut inatsisip §§ 45-miit 48-mut aamma kommunit missingersuusiortarnerat il.il. pillugit nalunaarummi nr. 29, 18. september 1995-imeersumi §§ 6-imiit 8-mut maleruagassaqartitaavoq. Kommunit nutaat sorliunerat apeqqutaatillugu siusinnerusukkut kommuniusimasut marluk arfineq-pingasullu akornanniittut naatsorsuutinik saqqummiussissapput.
Kommuniusimasup naatsorsuutai kommunimi nutaami aningaasaqarnermut ataatsimiititaliamit saqqummiunneqassapput. Kommunimi nutaami kommunalbestyrelsip siusinnerusukkut kommuniusimasup pineqartup naatsorsuutai kukkunersiuisunut saqqummiutissavai. Kukkunersiuineq ingerlanneqassaaq kommuniusimasup kukkunersiuisussamisut toqqagaanit, tamannalu maleruagassaqartitaavoq aqutsinissamut inatsisip § 46-ani aamma nalunaarummi nr. 29, 18. september 1995-imeersumi §§ 9-miit 12-imut.
3.7 Aalajangersakkat allat
Siunnersuutip kapitaliisa arfineq-aappaanni apeqqutit ataasiakkaat arlallit maleruagassiorneqarput.
Siunnersuutigineqarpoq pisortat ingerlatsineranni suliassat suliarineqartarnerat pillugu inatsit aamma pisortat ingerlatsineranni paasitinneqarsinnaatitaaneq pillugu inatsit Ikaarsaariarnermi Ataatsimiititaliat sulinerannut atuutsinneqassasut. Ikaarsaariarnermi Ataatsimiititaliaq kommuniusimasut ilaannit allagaatinik pisariaqartitsiguni, allagaatillu pisortat ingerlatsineranni paasitinneqarsinnaatitaaneq pillugu inatsit aamma pisortat ingerlatsineranni suliassat suliarineqartarnerat pillugu inatsit naapertorlugit nammineq atugassatut iluseqarpata allagaatit ingerlateqqinneqarnerminni nammineq atugassatut iluseqarnertik atuinnassavaat.
Siunnersuutigineqarpoq borgmesterit tunuartut 2009-mi piffissami 1. januarimiit 30. aprilimut akissarsiaqartitaassasut aqutsinissamut inatsimmi §§ 17-imi aamma 37-mi kiisalu akissarsiaqartitaaneq pillugu nalunaarummi nr. 35, 5. oktober 2001-imeersumi aalajangersakkat malilllugit. Tamatuma peqatigisaanik qinigaajunnaarnersiutinik katersineq amigaataalersoq borgmesterinut tunuartunut immikkut akuersissuteqarfiussaaq, taamaalillutik borgmesterit qinigaajunnaarnersiuteqarsinnaatitaassallutik nalunaarummi nr. 23, 12. september 1997-imeersumi aalajangersakkat naapertorlugit. Immikkut akuersissuteqarneq taamaallaat atuutissaaq borgmesterinut kommunimi nutaani borgmesteritut ingerlaqqinngitsunut taamalu qinigaajunnaarnersiusinik katersisinnaajunnaartunut.
Kiisalu piffissap atuuffiup qaammatinik sisamanik sivikillineqarfiani borgmesterit akissarsiaannut aningaasartuutissat Namminersornerullutik Oqartussanit akilerneqassapput.
Ikaarsaariarnermi Ataatsimiititaliat akissarsiaqartinneqassapput aqutsinissamut inatsimmi § 17-imi aamma § 37-mi aammalu nalunaarummi nr. 35, 5. oktober 2001-imeersumi aalajangersakkat malillugit. Naatsorsuutigineqarpoq Namminersornerullutik Oqartussat Ikaarsaariarnermi Ataatsimiititalianut ataasiakkaanut immikkuutaartunut 2 mio. kr.-inik aalajangersimasunik tapiissuteqassasut. Aningaasat taakku saniatigut aningaasartuutit kommuniusimasunit akilerneqassapput.
Qinersinerit ingerlanneqarnissaannut aningaasartuutit Namminersornerullutik Oqartussat aamma kommuniusimasut akornanni agguarneqassapput, taamaalillutik kommunit aningaasartuutit qinersisarnerit pillugit inatsimmi §§ 73-imiit 75-imut taaneqartut akilissallugit.
3.8 Inatsisiliat allat kingunerisaannik allannguutit
Kommunalbestyrelsit nunaqarfinnilu aqutsisut pillugit inatsisartut inatsisaanni nr. 20, 3. november 1994-imeersumi § 5 allanngortinneqassaaq, taamaalilluni kommunini aqutsinissamut inatsimmi qassikattannguit ilanngunnagit Ikaarsaariarnermi Ataatsimiititaliat tassanilu ilaasortat sulinerat maleruagassiuiffigineqassalluni.
Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi § 6, §§ 41-miit 43-mut atortuujunnaarsinneqarput.
Ilanngullugu siunnersuutigineqarpoq inatsisartut inatsisaanni nunaqarfinni aqutsisunut qinersisarnerit pillugit kapitali 2 aamma ilagiit sinniisaannut qinersisarnerit pillugit kapitali 3-mi § 65 atortuujunnaarsinneqassasut.
Kalaallit Nunaata nunap immmikkoortuinut kommuneqarfinnullu aggorneqarnera pillugu inatsisartut inatsisaat nr. 11, 30. oktober 1998-imeersoq 31. december 2008-miit atortuujunnaassaaq.
3.9 Atortuulersitaanera
Siunnersuutigineqarpoq inatsisartut inatsisaat ulloq 1. december 2007 atortuulissasoq.
4 Aningaasaqarnikkut allaffissornikkullu pisortanut kinguniusussat
Aaqqissuusseqqinneq pillugu inatsisissatut siunnersuutip nassatarissavaa allaffissornerup oqilisaavigineqarnera, tamatumuuna kommunit anginerusut nutaat kommunit suliassaataannik sunniuteqarnerusumik naammassinnissinnaalissallutik suliassallu naammassineqartarnerat qaffasinnerusumik pitsaassuseqalissalluni.
Aaqqissuusseqqinnerup aammattaaq nassatarissavaa Naalakkersuisut allaffissornikkut oqilisaavigineqarnerat, tassa aaqqissuusseqqinnerup kingornatigut kommunit suliassaatiminnik isumaginninnerat pillugu oqartussaasut ikinnerit saaffigineqartalissammata.
Aaqqissuusseqqinnerup kingunerissavaa allaffissornerup annertuumik allanngornissaa kommunit kattunneqarnerannut atatillugu aammalu suliassat allanngornerannut aamma Naalakkersuisut kommunillu akornanni nammagassat agguataarnerisa allanngornerinut atatillugu.
Piffissami ikaarsaariarfiusumi kommunit arlalitsigut aningaasartuuteqarnerussapput Ikaarsaariarnermi Ataatsimiititaliat (kommunalbestyrelsit nutaassat) pilersinneqarnerannut atatillugu. Aaqqissuusseqqinnerup naammassineqarnissaanut aningaasanik pisariaqartinneqartunik kommunit qulakkeerunneqarnissaannut Namminersornerullutik Oqartussat peqataanissaat Naalakkersuisut pitsanerpaasoraat. Naatsorsuutigineqarpoq 2008-mut Aningaasanut inatsimmi Ikaarsaariarnermi Ataatsimiititalianut kommunit aningaasartuutissaannut katillugit 8 mio. kr.-it Namminersornerullutik Oqartussanit immikkoortinneqassasut. Ilanngullugu inassutigineqarpoq Ikaarsaariarnermi Ataatsimiititalianut qinersinerit ingerlanneqarnissaannut aningaasanik nuussisoqassasoq.
Ikaarsaariarnermi Ataatsimiititaliani ilaasortat akissarsiaqartitaanissaat kiisalu siulittaasut akissarsiaqartitaanissaat kommunalbestyrelsini maannakkut ilaasortanut aalajangersakkat aallaavigalugit aalajangersarneqassapput. Taamaattoq akissarsiat tamarmiusut taamaallaat tunniunneqassapput ilaasortanut kommunalbestyrelsiusuni ilaasortaariinngitsunuinnaq. Ikaarsaariarnermi Ataatsimiititaliani ilaasortanut kommunalbestyrelsinut qinigaareersunut akissarsiat angissusissaattut 50% tunniunneqartarnissaat siunnersuutigineqarpoq.
Naatsorsuutigineqarpoq Ikaarsaariarnermi Ataatsimiititaliani sisamani ilaasortat amerlasuut kommunalbestyrelsiusimasuni aamma ilaasortaariissasut. Ikaarsaariarnermi Ataatsimiititaliani ilaasortat tamarmiusut kommunalbestyrelsimi ilaasortaariissappata aningaasartuutissat 6,8 millioner kr.-it 50%-ii katillugit 3,4 mio. kr.-iussapput qummut iluarsisat. Siunnersuutigineqarpoq 2008-mut Aningaasanut inatsimmi 4 millioner kr.-it Ikaarsaariarnermi Ataatsimiititaliani siulittaasut ilaasortaasullu akissarsiassaannut tapiissutitut immikkoortinneqassasut.
Ataqatigiissaarisunik allatullu allattoqarfeqarnikkut ikiuuttussanik Ikaarsaariarnermi Ataatsimiititaliat atorfinitsitsinissaannut tapiissutitut 2008-mi 4 millioner kr.-it imaluunniit Ikaarsaariarnermi Ataatsimiititalianut ataasiakkaanut immikkuutaartunut 1 million kr.-it tapiissutitut immikkoortinneqarnissaat siunnersuutigineqarpoq. Aningaasat taakku Ikaarsaariarnermi Ataatsimmiititaliani sisamani taakkunani AC-fuldmægtigit 2,5 ukioq kaajallallugu sulisussanut naapertuupput.
Ikaarsaariarnermi Ataatsimiititaliat angalanerinut aningaasartuutissat ikilisingaatsiarneqarsinnaapput Ikaarsaariarnermi Ataatsimiititaliat IT-mik videokkullu ataatsimiissutinik atuinerisigut. Ataatsimiititaliat IT videokkullu ataatsimiissutit atorlugit ataatsimiittarnissaat periarfissinniarlugu kommuniusimasut sisamat (4) ataasiakkaarlutik IT-nik videokkullu ataatsimiissutinik pisinissaannut katillugit 1,6 millioner kr.-inik Namminersornerullutik Oqartussanit qulakkeerunneqassasut.
2009-mut Aningaasanut inatsimmi qinersinissanut aningaasartuutissanut katillugit 1 million kr.-it immikkoortinneqarnikuupput. Naatsorsuutaavoq aningaasaliissutitigut kommunalbestyrelsinut, ilagiit sinnisaannut aamma nunaqarfinni aqutsisunut qinersinernut, Inatsisartunut qinersinermut aamma Folketingimut qinersinernut aningaasartuutissat matussutissinneqassasut.
Siunnersuutigineqarpoq aningaasaliissutinit taakkunannga 550.000 kr.-it 2008-mut Aningaasanut inatsimmut siuartinneqassasut 2008-mi Ikaarsaariarnermi Ataatsimiititalianut qinersinissanut aningaasartuutissanut matussutissatut.
Ilanngullugu Naalakkersuisut naatsorsuutigaat 2008-mut Aningaasanut iantsimmi naalakkersuinikkut suliniaqatigiiffinnut tapiissutissanut 1,55 millioner kr.-it aningaasaliissutitut immikkoortinneqassasut. Aningaasaliissutitigut Ikaarsaariarnermi Ataatsimiititalianut qinersinissaq sioqqullugu naalakkersuinikkut sulinermi peqataanermut aningaasartuutit matussuserneqassapput. Aningaasaliissutissat taamatut amerlatigisut Aaqqissuusseqqinneq aallartinneqarsimanngikkaluarpat 2009-mi kommunini nalinginnaasumik qinersinermut atatillugu aningaasartuutissanut immikkoortinneqarsimassagaluarput.
5 Aningaasaqarnikkut allaffissornikkullu inuussutissarsiutinik ingerlataqartunut il.il. kinguniusussat:
Siunnersuut aningaasaqarnikkut allaffissornikkullu inuussutissarsiutinik ingerlataqartunut il.il. kinguneqassanngilaq.
6 Avatangiisinut pinngortitamullu kinguniusussat:
Siunnersuut avatangiisinut pinngortitamullu kinguneqassanngilaq.
7 Allaffissornikkkut innuttaasunut kinguniusussat:
Aaqqissuusseqqinnissamut siunnersuut pisortat ingerlatsinerannik tunngaviusumik allanngortitsissaaq, taamaalilluni aaqqissuusseqqinnerup kingorna kommunit innuttaasunut toqqaannartumik tunngasut suliarilissallugit taamaalillutik pisortat ingerlatsinerannut innuttaasunut aqqutaalissallutik.
Tamanna oqartussaasunut naleqquttunut innuttaasut ataasiakkaat apuussinnaanissaannik kinguneqassaaq kiisalu sulisunit suliatigut piginnaasaqarluartunit suliassanik suliarinnissinnaasunit sukkanerusumik eqaannerusumillu sullinneqarnissamik kinguneqassalluni taamalu innuttaasut ataasiakkaat inatsisitigut innarlitsaalineqarnerat annertunerulissalluni.
Pisortat sullissinerat ataatsimut isigalugu innuttaasunut suliffeqarfinnullu pisariinnerulersinneqarlunilu ataqatigiinnerulersinneqassaaq. Tamanna kommuninut isumaqarpoq kommunit ikinnerusut, anginerusut imminnullu napatissinnaanerusut siunissami qularnaassammassuk kommunit sullissinerisa ataatsimoornerulluni ataqatigiinnerullunilu sumiiffinni tamat oqartussaaqataanerisa nukittorsarnissaanut sumiiffimmilu naalakkersuinikkut ingerlatsinermi nakuunerullutik inissisimalernissaannik. Aaqqissuusseqqinneq pisortat sullissinerisa suliassallu agguataariffigineqarnerat siunissamut qulakkeerisumik aaqqissuussinerussaaq. Kommunit pingaarnerullutik inississapput tamatumalu peqatigisaanik nutaamik inissisimalissallutik innuttaasullu pisortanut isaariaat pingaarneq pilersissallugu. Tamakku saniatigut aaqqissuusseqqinneq siammarterinermut takussutissaassaaq innuttaasullu inatsisitigut innarlitsaalineqarnerannik nukittorsaataassalluni.
8 Kinguniusinnaasut allat pingaaruteqarnerit:
Siunnersuut allanik pingaaruteqarnernik kinguneqassanngilaq.
9 Naalagaaffeqatigiinnermut namminersornermullu tunngasut:
Aaqqissuusseqqinneq Nunatta naalagaaffeqatigiit iluanni namminersornissaanut suliaqarnermi pingaarutilerujussuartut Naalakkersuisut isigaat. Namminersorneq pillugu isumalioqatigiissitat 2003-mi isumaliutissiissumminni oqaatigaat:
"Pisortat ingerlatsiviata inuiaqatigiinni atugassarititaasorpassuit ullumikkut tigummivai. Pisortat ingerlataqarfiannik annikinnerusumik, eqaannerusumik pisariinnerusumillu pilersitsinissaq pisariaqartinneqarpoq. Tamanna pisortat ingerlatsivianni atugassarititaasunik atuinerup pitsanngorsarneqarnerani pingaaruteqarpoq, taamaalillutik atugassarititaasut taakku ilaat annertusaanermi inuussutissarsiutinut nutaanut atorneqarsinnaalersinnaaqqullugit. Inuiaqatigiit sulisumik affaannik innuttaasunik kiffartuussinermut atuisut ilusilersuinermikkut annertuunik ajornartorsiuteqarput."
Namminersorneq pillugu isumalioqatigiissitatulli Naalakkersuisut isumaqarput pisortat ingerlatsiviata aaqqissuuteqqinneqarnissaa pisariaqartoq namminersornermut ingerlaqqissagutta. Aaqqissuusseqqinnerup immini namminersornermi aningaasaqarnikkut tunngavissat pilersissinnaanngilai, kisiannili ilapittuutaasinnaalluni suliniutinut Namminersorneq pillugu isumalioqatigiissitat kaammattuutai malillugit aallartinneqareersunut aammalu nunap aningaasaqarnerata inuttatigullu isumalluutaasa qulakkeerneqarnissaat nukittorsarneqarnissaallu eqqarsaatigalugit. Aaqqissuusseqqinneq suliniutit allat ilagalugit aningaasarsiornikkut imminut napatinnissamut Kalaallit Nunaatalu ataatsimoortumik tapiissutinik pisariaqartitsinnginnerulernissaanut naalagaaffiullu tapiissutaasa inuiaqatigiinnut sunniutai pisortat ingerlatsiviinut aningaasartuutinik ikinnerulersinneqarnissaannut ilapittuttaassapput.
Aaqqissuusseqqinneq sipaaruteqarfioqataassaaq nunami ineriartortitsinerup pilersinneqarnissaanut atorneqarsinaasussanik, kisianni tamatuma peqatigisaanik tamat oqartussaaqataanerannik nukittorsaataassalluni. Inatsisitigut innarlitsaalineqarneq assigiimmillu pinninnissaq tunngaviussapput. IT-mik atuineq pisortat innuttaasunik illoqarfimmi nunaqarfimmiluunniit najugaqarpata sullissinerannut nukittorsaataassaq.
10 Oqartussaasunik kattuffinnillu il.il tusarniaaneq:
Siunnersuut Kanukokamut, kommuninut, GA-mut, SIK-mut, AK-mut, PIP-mut, PIP-mut, DJØF-imut, IMAK-imut, ASG-mut, AP-mut KIIIP-mut, SP-mut aamma biskoppimut ulloq 18. maj 2007-imi tusarniaassutitut nassiunneqarpoq akissuteqarnissamut piffissaliunneqarluni 22. juni 2007. Aammattaaq siunnersuut Akileraartarnermi Pisortaqarfimmut ulloq 20. juni 2007-imi tusarniaassutitut nassiunneqarpoq akissuteqarnissamut piffissaliunneqarluni 6. juli 2007.
Akissuteqarnissamut piffissaliussap naanerani tiguneqarsimapput Kanukoka-mit, kommuninit Upernavik, Kangaatsiaq aamma Ivittuut pinnagit, kiisalu SIK-mit, AK-mit, PIP-mit, IMAK-imit, DJØF-imit, GA-mit aamma Akileraartarnermi Pisortaqarfimmit akissuteqaatit.
Akissuteqarnissamut piffissaliussap naareernerani tusarniaanermut akissuteqaatit Sulisoqarnermut Pisortaqarfimmiit aamma Aningaasaqarnermut Pisortaqarfimmiit tiguneqarsimapput.
Sulisoqarnermut Pisortaqarfik oqaaseqaatissaqarsimanngilaq.
AK-p misissuataarereerluni oqaatigaa inatsisissatut siunnersummi aalajangersakkanut ataasiakkaanut nassuiaatit oqaasertalerneqarnerisa ilaat allanngortinneqartariaqartut.§ 23-mut.
AK isumaqarpoq inatsisissatut siunnersuutip § 23-anut nassuiaatit oqaasertalernerata issuarneqartup inatsisiliani allani aalajangersakkat atortuujunnarsikkaat. Taamaaliortoqarsinnaanngilaq, matumanimi pineqarmata tjenestemandit pisussaaffii minnerunngitsumillu pisinnaatitaaffii. Taamaattumik § 23-mut nassuiaatini iluarsiisoqartariaqarpoq, taamaalilluni taanna Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaanni nr. 21, 18. december 2003-meersumi aalajangersakkanut naapertuutilissalluni. AK-p immikkut innersuussutigai §§ 15, imm. 1, 33 aamma 42.
Inatsisip § 15, imm. 1-ianut nassuiaatini allassimapput: "atorfiup annertussusiani imarisaanilu allannguutit atorfeqarnerup qanoq ittuussusianut allannguutaanngitsut naleqquttutullu isigineqartut tjenestemandip akuerissavai. Allannguutit suut tjenestemandip akuerissanerai ataasiakkaani nalilerneqartariaqarpoq."
§ 23-mut nassuiaatit aamma qulaani issuaanerup akornanni naapertuutinngitsoqanngitsoq Naalakkersuisut isumaqarput taamaattumillu isumaqarlutik saqqummiunneqartoq tunngavigalugu oqaasertaani allannguisoqarnissaa pissutissaqanngitsoq.
§ 33-mi pineqarpoq soraarsitsineq taannalu tassunga atatillugu naleqquttuusorineqanngilaq siunertarmi tassaammat sulisut atorfeqartooreersut allamut nuutinneqarnissaat, taamalu soraarsitsinissat pinngitsoorniarneqarnerat.
§ 42-mi pineqarpoq atorfinitsitsinermi oqartussaasup allanngornera, tassa kommunimiit Namminersornerullutik Oqartussanut imaluunniit kommunit akornanni.
Inatsisissatut siunnersummi § 23-mi pineqarpoq pisoq asseqanngitsoq, tassalu atorfinitsitsinermi oqartussaasup maannakkutut iluseqarluni atorunnaarnera, taamaammat qularnaarniarneqarpoq kommunip kattunneqartup pisussaaffigigaa atorfinitsitsinermi oqartussaasup "nutaanngitsup" atugassarititai atugassaralugit tjenestemanditut atorfeqartut atorfeqaannarnissaminnik neqeroorfigineqarnissaat.
Pisumi immikkut allaaserisami immikkut inatsisiliamik allannguinissaq imaluunniit inatsisiliamik allamik atortuujunnaarsitsnissaq inatsisitigut nalinginnaasumik innarlitsaalineqarnissamut katigutsitsisoqarsinnaanngitsoq Naalakkersuisut isumaqarput.
§ 24-mut
AK-p naammagisimaarpaa kommunimi kattunneqartumi ingerlatsiviit timitaasa siunissami sumi inissisimanissaat Ikaarsaariarnermi Ataatsimiititaliap aalajangiiffigisassarimmagit, matumanittaaq sulisorisat sorliit sumi inissinneqarnissaat kiisalu atorfeqartitat ingerlaavartumik ilisimatinneqartarnissaat pilersaarusiussammagit.
DJØF-ip isornartorsiorpaa sulisorisanut tjenestemanditut atorfeqartunut atorfiup allap naleqquttuunerata naliliivigineqarnissaani nunami sumiiffik ilaatinneqanngimmat.Isornartorsiuineq Naalakkersuisut tusaatitut tiguaat § 23-mullu nassuiaatini ilanngullugu.
Sulisut agguataarneqarnissaanni periusissaq eqqarsaatigalugu DJØF-ip kajumissaarutigaa periuseq pilersinneqassasoq qularnaarisoq inuit ataasiakkaat atorfinnut soqutigisaminnut piginnaasaqarfigisaminnullu qinnuteqarnissamut periarfissillugit inuillu ataasiakkaat kissaatigisaat pingaartinneqassasut atorfiillu ammasumik naligiimmillu pinnilluni inuttalerneqassasut.
DJØF-ip ilanngullugu naatsorsuutigaa pisortat ingerlatsineranni suliassat suliarineqartarnerat pillugu inatsisartut inatsisaanni maleruagassat malinneqassasut, matumanittaaq suliami peqataasunik tusarniaaneq, paasitinneqarsinnaatitaaneq aamma tunngavilersuineq, taamaalilluni qularnaarneqassalluni suliaq naammattumik paasinarsitinneqassalluni aalajangiisoqannginnerani taamalu eqqortunik tunngaveqarani aalajangiisoqassanani.
Naalakkersuisut isumaqarput siunnersuut atorluarsinnaasuusoq, kissaatigisimanaguli ajornartorsiutit taaneqartut aalajangersimasumik pissuseqarluni qaangerniarnissaannut inatsisiliornikkut kommuninut killiliinissaq.
Naalakkersuisut isumaqarput suliassaqarfimmi isumaqatigiissutit inatsisillu pisortat ingerlatsineranni malitassat iluanni, matumanittaaq suliassanik suliarinnittarneq pillugu inatsimmi, allaffissornikkut ingerlalluartumik peqarnissaq.
Sulisitsisut pitsaanerpaasoraat § 1, imm. 2-mi kommunit nutaat sumut killiffeqarnissaat aalajangersarneqarpat. Siunnersuummi allaaserisap oqariartuutigaa maannakkut kommuniusut kommunerujussuarni nutaani atatiinnarneqarnissaat.Naalakkersusut § 1, imm. 2-mut nassuiaatini oqaatigineqartutut kissaatigaat kommunit nutaat killeqarfii aatsaat sumiiffilersorneqassasut kommunip nutaap taaguutaa ilisarnaatissaalu Ikaarsaariarnermi Ataatsimiititaliamit aalajangiiffigineqareerpata.
§ 31-mi "pisortat suliassaqarfiit" allanngortinneqartariaqarpoq uunga "kommunit suliassaqarfii".
??????
IMAK-ip oqaatigaa aqutsinissamut ileqqoreqqusat aamma missingersuusiat Ikaarsaariarnermi Ataatsimiititalianit aalajangersaavigineqarnissaannut piffissaliussaq sivikitsuararsuusoq.Oqaatigineqartut Naalakkersuisut tusaatitut tiguaat piffissaliussallu qaammammik ataatsimik allanngortillugit.
Atorfeqartitaaffiup allanngornerata inunnut ataasiakkaanut kingunerisassaanut itisileraluni nassuiaatit amigaatigineqarput.
Naalakkersuisut siunertarisimanngilaat sulisorisanut ataasiakkaanut kinguniusussat allaaserineqarnissaat. Taamaallaat siunertaavoq kattussuunnermut atatillugu sulisorisat atugassaasa tikkuunneqarnissaat. Kattussuunnermut atatillugu immikkuualuttut pillugit apeqqutit isumaqatigiissutit pineqartut malillugit iluarsineqartariarput.
Kattussuunnerup meeqqat atuarfiannut kingunerisassaasa allaaserineqarnissaat amigaataavoq.
Sullissinerit nalimmassarneqarnissaannut atatillugu suliassaqarfinni ataasiakkaani kinguniusussat itisileraluni allaaserineqarnissaat Naalakkersuisut siunertarisimanngilaat.
Naalakkersuisut kissaatigaat kommunit suliassaasa tulleriiaariffigineqarnissaat suliassaqarfiillu assigiinngitsut iluanni sullissinerit qaffasissutissaasa aalajangersarneqarnissaat kommunalbestyrelsinit ataasiakkaanit kiffaanngissuseqarfigineqarnissaat.
§§ 17-imut aamma 18-imut
Ingerlatsiviit aaqqissuunneqarnissaat, timitaasa inissisimaffissaat kiisalu pisortaasussanik atorfinitsitsinissat 31. december 2008 nallertinnagu Ikaarsaariarnermi Ataatsimiititaliat aalajangiiffigeriissavaat.
Tamanna eqqumiiginarpoq, tassami § 18-imi atuarneqarsinnaammat 2009-mut aningaasanut missingersuusiat kingusinnerpaamik 30. september 20089-mi saqqummiunneqareersimassasut kingusinnerpaamillu 30. november 2008-mi akuersissutigineqareersimassasut atuarneqarsinnaammat.
Tunngavissaatitaasut ilisimanngikkaanni qanoq iliorluni aningaasanut missingersuusianik aalajangersaasoqarsinnaagami.
Qulaani taaneqartut ilisimaqqissaanngikkaluarlugit aningaasanut missingersuusianik aalajangersaanissaq Naalakkersuisut ajornartorsiutaasorinngilaat.
§ 23-mut
Nassuaatini atuarneqarsinnaasariaqarpoq atorfiup, taanna suliatigut atorfeqartitaaffigisap avataaniippat, allap naleqquttuunerata akuersissutigineqarnissaani kattuffiit peqataassasut, tak. Tjenestemandit pillugit inatsisartut inatsisaanni nr. 21/2003-mi § 15, imm. 2.
Oqaatigisat tusaatitut tiguneqarpuit.
§ 23-mut 24-mullu
IMAK-ip isumaqatigiinniuteqarfigisagaasa iluanni atuarfinni ataasiakkaani isumaqatigiissuteqartoqarsimavoq atorfeqartitaanermut tunngasunik arlalinnik tunaartassanik aalajangersaasunik.
Taakku atuutissapput illuatungeriit arlaanniit atorunnaarsinneqarnissamik tungaanut.
"Atorfeqartitaaffiup allanngornerata il.il. "-mut oqaatigisat takukkit.
Sulisorisap atorfeqartitaaffiata annertusineranut atatillugu qularnaarneqassaaq sulisorisat ataasiakkaat kommunimi maannakkut atorfeqarfigisap kattunneqarfiani maannakkut atorfeqarnermut tunngatillugu sulinermut tunngasuni uparuaataasimasinnaasut pappiaqqaniittut tunngaviulinnginnissaat.
Atorfeqartitaaffiup annertusineqarnera pineqanngilaq, taamaallaalli kattunnerup kingunerisaanik atorfinitsitsisutut oqartussaasup atorunnaarnera.
Naalakkersuisut kissaatigaat sulisorisat maannakkut atorfeqartitaanerisa kingunerisaanik pisinnaatitaaffiit pisussaaffiillu allannguuteqaratik kommunit kattutereerpata allannguuteqassanngitsut, taamaattumik qanoq sivisutigisumik atorfeqarsimanermut sulinermullu tunngatillugu uparuaataasimasinnaasunut uppernarsaatissat piunnarnissaat ajornassaaq.
Pisussaaffiit pisinnaatitaaffiillu imminnut malittarissapput.
KANUKOKA-p siunnersuut Kalaallit Nunaanni kommuninut tamanut tusaniaassutigisimavaa. Tusarniaanermut akissuteqaatit tiguneqarsimapput kommuninit makkunannga:Qaanaaq
Uummannaq
Qeqertarsuaq
Ilulissat
Aasiaat
Qasigiannguit
Sisimiut
Maniitsoq
Nuuk
Paamiut
Qaqortoq
Nanortalik
Narsaq
Ammassalik
IttoqqortoormiitTusarniaanermut akissuteqaatit taakku ilanngussatut nassiunneqartut tunngavigalugit KANUKOKA imaattunik saqqummiussaqarpoq:
Aallarniutitut oqaatigineqassaaq kommunini nutaani kommunalbestyrelsit sapinngisamik pitsaanerpaanik sulinerminni tunngavissaqarnissaannik inatsimmi anguniagaasoq Kattuffiup isumaqatigigaa.
Inatsisissatut siunnersuummi aalajangersakkanut ataasiakkaanut oqaatigiumasat:
§ 3 aamma § 4 Qinersineq
§ 3, imm. 1-imut nassuiaatit naapertorlugit kommunit kattunnermi ilaasut tamat ataasiakkaat qinersivik ataatsitut isigisariaqarput.
Tamanna pitsanngitsumik kinguneqarsinnaavoq, ilaatigut innuttaasut partiimik aalajangersimasumik, partii taanna kommuniusumasumi qinigassanngortittumik inuttaqanngippat, taasinissaminnut periarfissaqanngillat.
Kattuffik isumaqarpoq kommunip nutaap kattunneqarsimasutut isigineqarnissaanut tunngavissaatitatut isigisariaqartoq kommunimi innuttaasut taasinerminnik atuinissamut assigiimmik periarfissinneqarnerat.
Qinersiviit 18-it atatiinnarneqarnissaannut pissutaasorineqarpoq kommuniusimasuni tamani sumiiffiup ilaasortaatitassaata qinerneqarnissaa. Kommuniusimasut killeqarfiisa iluanni taasinerit kisinnqeassappata tamanna kommunini nutaani tamani qinersiviup ataasinnaanissaanut akornutaasorinanngilaq.
Taamaattumik kattuffiup siunnersuutigaa ikaarsaariarnermi ataatsimiititalianut qinersinerit ingerlanneqassasut kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsimmi aalajangersakkat pioreersut aallaaviussasut.
Maleruagassalli taakku malillugit kommuniusimasoq ikaarsaariarnermi ataatsimiititaliami ilaasortaatitaqanngitsuussappat ilaasortaaffiit nunngutaat sumiiffiu sinniisuanut tutsinneqartariaqartoq.
Inatsisissatut siunnersuut aaqqissuunneqarpoq imaalillugu qinersiviit suli 18-iussallutik, periarfissaassallunili kommunerujussuarmi nutaami partiit kattusseqatigiillu kommunerujussuup qinersiviini tamani qinigassanngortittut tamarmik taaneqarsinnaassallutik.
§ 8-mut Nunaqarfinnni aqutsisut
Inatsisissatut siunnersuutip § 6-iani kommuniusimasuni kommunalbestyrelsit piffissaq atuuffiat 31. december 2008-mi naasussaasoq aalajangersarneqarpoq, taamaakkaluartoq § 8-mi aalajangerneqarpoq nunaqarfinni aqutsisut piffissaq atuuffiat 31. december 2009-p tungaanut sivitsorneqartoq.
Taamaattorli nunaqarfinni aqutsisut oqartussaatitaanerat kommuniusimasut kommunalbestyrelsiiniit tunniussaavoq. Taamaalilluni nunaqarfinni aqutsisut oqartussaatitaanerat aamma 2008-p naanerani atorunnaassaaq.
Taamaattumik ingerlatsinermi oqartussaanerup tunniunneqartarnerani tunngaviit nalinginnaasunut tulluartuusorineqaranilu akerliusorineqarpoq nunaqarfinni aqutsisut oqartussaaffimmik naareerneratigut atuutiinnarnissaat.
Taamaattumik isuma taanna tunngavigalugu nunaqarfinni aqutsisut piffissaq atuuffiat kommuniusimasuni kommunalbestyrelsit atorunnaarfiat ilutigalugu atorunnaartariaqarpoq, tassa 2008-p naanerani, tamannalu kommuninit arlalinnit assersuutigalugu Qasigiannguit, Sisimiut aamma Narsap, taperserneqarpoq.
Kisianni Paamiut kommuniata aamma Nanortallip kommuniata kaammattuutigisimavaat nunaqarfinni aqutsisut atatiinnarneqassasut. Isuma tamanna aaqqissuusseqqinneq pillugu KANUKOKA-p immikkut ataatsimiititaliaata tapersersorpaa.
Nunaqarfinni aqutsisut oqartussaatitaanerat kommunalbestyrelsinit tunniussaammat ilumoorpoq, oqartussaatitaanermilli tunniussineq kommunit aqutsinissaannut inatsimmi aalajangersagaavoq taamaattumillu kommunalbestyrelsimut aalajangersimasumut pituttugaanani.
Oqartussaatitaaneq 2008-p naanerani atorunnaassammat aamma ilumoorpoq, Naalakkersuisulli akornutissaqartinngilaat oqartussaatitsinerup Ikaarsaariarnermi Ataatsimiititaliamit 2009 kingorna ingerlateqqiinnarneqarnissaa. Naalakkersuisut kissaatigaat tamat oqartussaaqataanerat qanoq ilillugu ingerlateqqinneqassanersoq komunerujussuup kommunalbestyrelsia periarfissaqarfigisariaqaraa.
Naalakkersuisut isumaqarput piffissami ikaarsaariarfiusumi aamma kattunnerup kingorna qaammatini siullerni allanik suliassarpassuaqassasoq aamma aaqqitassanik, taamaattumik Naalakkersuisut pisariaqarsoraat kommunimi tamat oqartussaaqataanerisa siunissami aaqqissuussivigineqarnissaanut suli piffissaqarnerunissaq pisariaqartoq.
§ 9 Ikaarsaariarnermi Ataatsimiititaliap inissitsiterluni ataatsimiinnera
§ 9, imm. 1-imi atuarneqarsinnaavoq Ikaarsaariarnermi Ataatsimiititaliaq kingusinnerpaamik 1. maj 2008-mi inissitsiterluni ataatsimeeriissasoq.
Ikaarsaariarnermi Ataatsimiititalianut 8. aprilimi qinersinerit ingerlanneqartussaanerat aamma qinigaasinnaassuseq pillugu ataatsimiititaliap kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni § 53 naapertorlugu sulinissaminut piffissaqarnissaa eqqarsaatigalugit KANUKOKA isumaqarpoq inissitsiterluni ataatsimiinnissap ingerlanneqarnissaanut piffissaliussaq piviusorsiunngitsumik sivikippallaartoq.
Taamaattumik kattuffiup kaammattuutigaa piffissaliussaq kinguartinneqassasoq taamaalillutik ikaarsaariarnermi ataatsimiititaliap kingusinnerpaamik 1. juni 2008-mi inissitsiterlutik ataatsimeeriissallutik.
Inatsisissatut siunnersuummut ilanngunneqarpoq.
§ 10-mut Ataatsimiititalianik pilersitsineq
§ 10, imm. 2-mut nassuiaatini atuarneqarsinnaavoq ataatsimiititalianik pilersitsinissamik ikaarsaariarnermi ataatsimiititaliap aalajangernera kommunimi kattunneqartumi kommunalbestyrelsimut atuuttoq.
Eqqarsaatigineqarsinnaavoq piffissami ikaarsaariarfiusumi ataatsimiititalianik 31. december 2008 tungaannaanut suliassaqartussanik pilersitsinissaq atorluarsinnaassasoq, taamaattumik ataatsimiititaliap taamaattup kattussuunnerup piviusunngoreerneratigut ingerlaannarnissaa tulluartuusorineqanngilaq.
Immaqa nassuiaatini erseqqissarneqarsinnaavoq ataatsimiititaliat ataavartut kisimik ingerlaqqissasut.
Inatsisissatut siunnersuummut ilanngunneqarpoq.
§ 13-imut Ikaarsaariarnermi Ataatsimiititaliap aningaasanut missingersuusiai.
§ 9 pillugu Kattuffiup oqaatigiumasai innersuutigalugit kaammattuutigineqarpoq aningaasanut missingersuusiap saqqummiunneqarnissaannut piffissaliussaq qaammammik ataatsimik sivitsorneqassasoq. Taamaalilluni Ikaarsaariarnermi Ataatsimiititaliap siulittaasua kingusinnerpaamik 1. juli 2008-mi aningaasanut missingersuusianut siunnersuummik saqqummiussissalluni.
Inatsisissatut siunnersuummut ilanngunneqarpoq.
§ 14-imut Ikaarsaariarnermi Ataatsimiititaliap aningaasaatai.
§ 14-imut nassuiaatini atuarneqarsinnaavoq Ikaarsaariarnermi Ataatsimiititaliat tamarmik immikkuutaarlutik Namminersornerullutik Oqartussanit 2008-mi 2 millioner kr.-inik tapiiffigineqarnissartik naatsorsuutigisinnaagaat aammalu Ikaarsaariarnermi Ataatsimiititaliap sulineranut aningaasartuutit Namminersornerullutik Oqartussat tapiissutaasa saniatigut kommuninit kommunimi nutaami ilaasunit akilerneqassasut.
Kisianni § 14, imm. 1-imi oqaaseqatigiinni kingullerni atuarneqarsinnaavoq aningaasartuutaanerusut taakku kommuninut ataasiakkaanut agguataarneqarnissaat Ikaarsaariarnermi Ataatsimiititaliap aalajangiiffigissagaa.
Kommunalbestyrelsit suli atasut avaqqutiinnarlugit aningaasanik amerlanerusunik, taamalu assigiinngitsunik pinnittoqaratarsinnaalluni, aningaasartuutit kommuninut ataasiakkaanut agguataarneqarnissaannik Ikaarsaariarnermi Ataatsimiititaliat aalajangiisinnaatitaanissaat tulluartuusorineqanngilaq.
Ikaarsaariarnermi Ataatsimiititaliat sulinerannut aningaasanik amerlanerusunik pisariaqartitsisoqalissappat tamanna Namminersornerullutik Oqartussanit aningaasartuutaasariaqarpoq.
Naalakkersuisut isumaqarput aningaasat tapiissutissatut immikkoortinneqartut Ikaarsaariarnermi Ataatsimiititaliat sulinerannut aningaasartuutinut matussutaasinnaasut.
Taamaakkaluartoq Naalakkersuisut paasisinnaavaat piffissami ikaarsaariarfiusumi Ikaarsaariarnermut Ataatsimiititaliat allatut suleriuseqarnissamik kissaateqarsinnaanerat taamaattumillu amerlanerusunik pisariaqartitsisinnaanerat.
Ikaarsaariarnermi Ataatsimiititaliaq kommunerujussuanngortussami siunissami kommunalbestyrelsiussaaq taamaattumillu naatsorsuutigisariaqarluni kommunerujussuup aningaasaqarneranut tunngasunik ilisimasaqarnissaa taamaalillunilu aningaasat qanoq ililluni atorneqarnissaannut tulleriiaarisinnaassalluni.
§ 15-imut Kukkunersiuisunik toqqaaneq
§ 9-mut aamma § 13-imut Kattuffiup oqaatigisai innersuutigalugit § 15 taakku kingunerisaannik iluarsineqartariaqartoq, taamaattumik kaammattuutigineqarpoq kukkunersiuisumik toqqaanissaq qaammammik ataatsimik 1. august 2008-mut kinguartinneqartariaqarpoq.
Inatsisissatut siunnersuummut ilanngunneqarpoq.
§ 16-imut Kommunip taaguutaa ilisarnaataalu.
§ 16, imm. 2 naapertorlugu kommunip nutaap taaguutissaatut ilisarnaatissaatullu kissaatigineqartut Ikaarsaariarnermi Ataatsimiititaliap aalajangiiffigissavai. Taamaakkaluartoq nassuiaatini atuarneqarsinnaavoq taaguutissaa ilisarnaatissaalu inatsisartut inatsisaatigut aalajangersarneqassasut.
Taamaattumik inatsisissatut siunnersuutip tassungalu nassuiaatit akornanni naapertuuttoqanngilaq.
Inatsisissatut siunnersuutip nassuiaatillu akornanni naapertuuttoqanngitsoq Naalakkersuisut isumaqarput.
§ 17-imut Ingerlatsiviit siunissami sumi inissiimanissaat allaffissornermilu pisortat
§ 17, imm. 2-mi aalajangersarneqarpoq aqutsiviit ineriartortinneqarnissaannut allaffissornermi aqutsivinni pisortaasussat pisariaqartinneqarnermissut amerlatigisut Ikaarsaariarnermi Ataatsimiititaliap atorfinitsissagai.
Ikaarsaariarnermi Ataatsimiititaliat aallaaviatigut allaffissornermut aammalu Ikaarsaariarnermi Ataatsimiititaliami ilaasortanut akissarsiaqartitsinissamut killilinnik atugassaqarmata qularnaarniartariaqarpoq allaffissornikkut pisortat nutaat kommunimi nutaami aatsaat 1. januar 2009-mi sulilernissaat.
Nassuiaatinut ilanngunneqarput.
Tamatuma saniatigut oqaatigineqarpoq inatsisissatut siunnersuummmi § 17, imm. 2-mut kukkusumik innersuussisoqarsimagunartoq. Matumani innersuutigineqarput aqutsinissamut inatsimmi §§ 31 aamma 65. Akerlianik nassuiaatini innersuutigineqarlutik §§ 21 aamma 65, taakkulu eqqortuusorineqarput.
§ 17, imm. 3 naapertorlugu ingerlatsiviit timitaasa sumi inissisimanissaat allaffissornikkullu aqutsinermi pisortat atorfinitsinneqarnissaat kingusinnerpaamik 31. december 2008-mi aalajangiiffigineqarsimassapput.
Inatsisissatut siunnersuummi iluarsineqarpoq.
Ingerlatsiviit timitaasa sumi inissisimanissaat allaffissornikkullu aqutsinermi pisortat atorfinitsinneqarnissaat aningaasanut missingersuusiornermi sunniuteqassapput, kisianni 2009-mut aningaasanut missingersuusiat siunnersuutip § 18-ia naapertorlugu suliarineqarlutillu akuersissutigineqassapput, tamatumalu nassataraa aningaasanut missingersuusiap inaarutaasup kingusinnerpaamik 30. november 2008-mi saqqummiunneqarsimanissaa.
Taamaattumik § 17, imm. 3-mi piffissatut aalajangersakkap aamma aningaasanut missingersuusiat suliarineqarnissaasa akuersissutigineqarnissaasalu piffissaasa akornanni naleqquttoqanngilaq.
Kattuffiup kaammattuutigaa aalajangiinerit § 17, imm. 3-mi taaneqartut aningaasanut missingersuusiat akuersissutigineqarnerannut atatillugu aalajangiunneqassasut.
?
Sulinerup qaqugukkut naammassineqarnissaanut piffissaliisoqarnissaa Naalakkersuisut kissaatigisimavaat taamaattumik aalajangiinerit siusinnerusukkut pinissaannut akornutissaqanngilaq.
§ 19-imut akileraarutit akigititallu nalimmassarneqarnerat.
§ 19-imi atuarneqarsinnaavoq isertitanit akileraarusiisarneq akigititallu 1. januar 2009-miit nalimmassarneqassasut, taassumali sanioqqunneqarnissaa Naalakkersuisut akuerisinnaagaat.
Sanioqqutsinissamut Naalakkersuisut akuersippata kommunip nutaap iluani akileraarutit procentii assigiinngitsut arlaliusinnaapput kommunit killeqarfigisimasaannik killillit.
Pisuusinnaasoq taanna akileraarutit pillugit inatsimmi naatsorsuutigineqariinngilaq, taamaattumik sanioqqutsinissamut periarfissiissut taanna pissutigalugu tulluartuunngereerpoq.
Tamatuma saniatigut Kattuffiup oqaatigissavaa aaqqissuusseqqinnermi siunertat tassarpiaasut sullissinerit nalimmassarneqarnissaat, matumanittaaq akileraarutit akigititallu nalimmassarneqarnissaat.
Naalakkersuisut isumaqarpata akileraarutit akigititallu 1. januar 2009-mi nalimmassarneqareersinnaanngitsut isumaliutigisariaqarpoq sanioqqutsisinnaatitsinerup atulersinneqarnissaanut taarsiullugu aaqqissuusseqqinnerup atuutilerfissaa kinguartinneqarsinnaannginnersoq, tak. § 6.
Sanioqqutsinissanut periarfissiissut inatsisissatut siunnersuummiit peerneqarpoq.
§ 20-mut piffissami 31. december 2008 tungaanut aningaasartuutit.
§ 20, imm. 1-imi aalajangersarneqarpoq kommuniusimasut 1. maj 2008 kingornatigut taamaallaat aningaasartuutigisinnaagaat 2008-mut aningaasanut missingersuusiani akuersissutigineqartuni ilanngunneqarsimasuinnaat.
Tamanna aqutsinissamut inatsimmi § 39-mi aamma § 40 tunngavioreerpoq, taamaattumik aalajangersagaq pisariaqanngilaq peerneqartariaqarlunilu.
§ 20, imm. 3 (2 ?)-kkut peqqusissutigineqarpoq kommuniusimasumi kommunalbestyrelsip 1. maj 2008 kingornatigut ilassutitut aningaasaliissutit inatsisit malillugit aningaasartuutissanut tunngasuunngitsut Ikaarsaariarnermi Ataatsimiititaliaq sioqqutsisumik aatsaat akuersiseqqaarlugu akuersissutigisinnaagai.
KANUKOKA-p kaammattuutigaa ilassutitut aningaasaliissutit tamarmik Ikaarsaariarnermi Ataatsimiititaliamit sioqqutsisumik akuersissutigineqaqqaartassasut. Tamatuma kingunerisaanik § 20, imm. 2 (3 ?) atorunnaartariaqarpoq.
§ 20, imm. 4 (?) naapertorlugu atorfiit nutaat pilersinneqartut Ikaarsaariarnermi Ataatsimiititaliamit sioqqutsisumik akuersissutigineqarsimanissaat piumasaqaataavoq. Aalajangersakkamut nassuiaatini atuarneqarsinnaavoq atorfinnik pioreersunik inuttaleeqqittoqarsinnaasoq, tamannali pisariaqartoq Ikaarsaariarnermi Ataatsimiititaliaq isumasioqatigereerlugu.
Kommunimut nutaamut pitsaasuunngitsumik atorfinitsitsinissat pinngitsoortinniarlugit atorfinnik pioreersunik inuttaleeqqinnerit aamma Ikaarsaariarnermi Ataatsimiititaliamit akuersissutigineqarnissaat piumasaqaataasariaqarpoq.
Oqaatigisat inatsisissatut siunnersuummi ilanngunneqarput.
§ 21-mut Aningaasaliissutinik akuersissutigineqareersunik atorunnaarsitsineq imaluunniit ikililerineq.
Kommuniusimasuni 2008-mut aningaasanut missingersuusiani aningaasaliissutit akuersissutigineqareersimasut atorunnaarsinneqarnissaat imaluunniit ikililiivigineqarnissaat Ikaarsaariarnermi Ataatsimiititaliap akuersissutigisinnaavai, tak. § 21, imm. 2.
Kisianni oqaatigineqassaaq aningaasaliissutinik atorunnaarsitsineq imaluunniit ikililiineq kommunip atsiueqatigiilluni isumaqatigiissuteqarsinnaanermut pisussaaffilernissaanut akornusiisinnaanngitsoq. Taamaalilluni aalajangersakkakkut "karsip imaarnissaa"-nik taasaq pinngitsoortinneqarsinnaanngilaq, tamannalumi aalajangersakkap siunertarigunaraluarpaa.
Taamaattumik aalajangersagaq peerneqartariaqarpoq, Naalakkersuisulli "karsip imaarnissaa" pinngitsoortinniarlugu maleruagassanik erseqqinnerusunik aalajangersaanissartik kissaatigigunikku § 21, imm. 4-mi piginnaatitsissut atorneqartariaqarpoq.
Oqaatigineqartut aallaavigalugit inatsisissatut siunnersuummi allannguinissaq Naalakkersuisut pissutissaqartinngilaat.
§ 23-mut Tjenestemandit.
Tjenestemandit kattunnermi kommunini ilaasuni atorfeqartitaasut ulloq 1. januar 2009-mi maannamut atugassarisaminnut naleqquttunik atugassaqartitaallutik kommunimi nutaami atorfeqartitaalissapput, tak. § 23.
Nassuiaatit naapertorlugit aalajangersakkap kingunerissavaa atorfinitsitsinermi oqartussaasoq tassaasoq kommunimi kattunneqartumi kommunalbestyrelsi kommunilu kattunneqartoq atorfeqartitaaffiulluni. Tamanna inatsimmi immini atuarneqarsinnaasariaqarpoq nassuiaatini inatsisiliornissaq pinngitsoorniarlugu.
Inatsisissatut siunnersuummi ilanngunneqarpoq.
Taakku saniatigut Kattuffik isumaqarpoq pitsaassagaluartoq nassuiaatini erseqqissarneqarpat kommunimut nooriarneq aamma atorfeqartitaaffiup allanngornera atorfinitsinneqarnermut nutaamik allagarsinermik imaluunniit atorfinitsinneqarnermut allakkap pioreersup ilassuserneqarneranik nassataqassanngitsoq. Kalaallit Nunaanni Namminersornerullutik Oqartussani kommuninilu tjenestemandit pillugit inatsisartut inatsisaanni nr. 21, 18. december 2003-meersumi § 11, imm. 1 naleqqiuinneqassaaq.
Tamakku saniatigut Kattuffiup kaammattuutigissavaa aaqqissuusseqqinnerup kinguneranik tjenestemandit pillugit inatsimmi akuerisaasunit peqqusissutinillu sippuisunik atorfinni atugaasunik allannguinernik naammaginnittariaqarnerat pillugu aalajangersakkamik ilanngussisoqarnissaa.
Pingaartumik avanaani kommuniulersussami nutaami aarleqqutigineqarsinnaavoq tjenestemandinik soraarsitsinerit annertuumik aningaasartuutaanissaat, tassami amerlasuut naleqquttumik atorfissarsiuunnissaat ajornakusoorluinnarsinnaammat, tassa kommuniusimasuni atorfiit 8-kkaartut (kommunaldirektørit 8, meeqqanut kulturimullu immikkoortortani pisortat 8 il.il.) piusussaammata.
Inatsisissatut siunnersuummi ilanngunneqarpoq.
Taamaattumik aaqqissuusseqqinnerup kingunerisaanik tjenestemandinik isumaqatigiissutillu malillugit atorfeqartitanik soraarsitsinernut aningaasartuutaasinnaasut Namminersornerullutik Oqartussanit aningaasalersorneqartariaqarput.
Qinigassap aappaatut ajornartorsiut aaqqinneqarsinnaavoq tjenestemandit, pingaartumik sulisut soorlu direktøritut immikkoortortanilu pisortatut atorfeqartut, soraarnissaat pillugu aaqqissuusseriiaasissanik isumaqatigiissuteqartoqarsinnaavoq. Taamatut aaqqissuussineq Namminersornerullutik Oqartussanit aningaasalersorneqartariaqarpoq aaqqissuusseqqinneq Namminersornerullutik Oqartussanit peqqussutaammat.
Kommuninut amerlanerusunik tapiissuteqarnissaq Naalakkersuisut pissutissaqarsorinngilaat. Kattussuutsitsinermut atatillugu aaqqissuusseqqinnerup immikkut aningaasartuutaarujussuannginnissaa kommunit suliassarisariaqarpaat.
§ 29-mut Akissarsiat borgmesterillu qinigaajunnaarnersiutaat.
§ 29, imm. 1-imi aalajangersarneqarpoq borgmesterit tunuartut, borgmesterit ikaarsaariarnermi ataatsimiititaliamut qinigaanngippata taamalu kommunimi nutaami kommunalbestyrelsimi ingerlaqqinngippata, piffissami 2009-mi 1. januarimiit 30. aprilimut akissarsiaqartitaassasut.
Qinikkat tamarmik pissutissaqarlutik neriuutigisimavaat piffissami qinigaaffimminni ilaasortaaginnarnissartik.
Taamaattumik Kattuffiup paatsuunganartippaa Namminersornerullutik Oqartussat – pissutissaqanngikkaluarlutik – borgmesterit qinikkallu allat akornanni assigiinngisitsinissamik kissaateqarnerat.
Taamaattumik Kattuffiup kaammattuutigissavaa § 29, imm. 1 allanngortinneqassasoq, taamaalilluni aalajangersakkami taamaallaat borgmesterit pineqarunnaassallutik qinikkalli tamarmik kommunalbestyrelsit, nunaqarfinni aqutsisut il.il. pillugit inatsisartut inatsisaat naapertorlugu akissarsiaqartinneqassallutik.
§ 29, imm. 2 eqqarsaatigalugu ilanngunneqartariaqarpoq borgmesterit qinigaajunnaarnersiutaat pillugu nalunaarummi nr. 23, 12. september 1997-imeersumi piffissamut piumasaqaammik sanioqqutsinermut atatillug aningaasartuutit Namminersornerullutik Oqartussanit akilerneqassasut.
Naalakkersuisut aalajangiusimavaat borgmesterit tunuartut kisimik piffissap atuuffiup naanneruneranut taarsiiffigineqarsinnaassasut.
Immikkut oqaatigiumasat:
Kommunit arlallit, matumani Nuup, Paapiut, Ammassallip, Ittoqqortoormiit aamma Qasigiannguit, kaammattuutigisimavaat siunnersuutip § 2-ani ilaasortat amerlassusissaat 17-imiit 21-nut amerlineqassasut.
Aaqqissuusseqqinnerup siunertaraa ileqqaaruteqarnissaq, taamaattumik kommunalbestyrelsini ilaasortaalersussat amerlassusissaasa 21-nut amerlineqarnissaat pitsaasuunavianngilaq ileqqaarutissatut naatsorsuutigineqartunik annikinnerulersitsisussaammat.
Aaqqissuusseqqinnermut tamarmiusumut piffissamut pilersaarut eqqarsaatigalugu Sisimiut, Maniitsup, Qeqertarsuup aamma Nanortalli kommuniisa piffissamut pilersaarutip malinneqarsinnaanera nalorninartortaqartippaat. Sisimiut, Qeqertarsuup aamma Nanortallip kommuniisa sakkortuumik kaammattuutigaat aaqqissuusseqqinnermut piffissamut pilersaarut ukiumik ataatsimik kinguartinneqassasoq.
Kommunit nutaamik ilusiligaanerisa piaarnerpaamik inissinneqarnissaa Naalakkersuisut kissaatigaat, taamaalilluni suliassanik Namminersornerullutik Oqartussaniit kommuninut nuussuineq aallartinneqarniassammat.
Suliassanik nuussuinissamut tunngavissaatitaavoq kommunini suliassat naammassineqarsinnaanerat aaqqinneqariissasoq suliassanik nuussuinerup aallartinneqannginnerani.
Taakku saniatigut kommunit arlallit oqaatigaat aqutsinissamut inatsimmi § 65 kommunit nutaat pisariaqartitaannut naleqqussarneqartariaqartoq, taamaalillutik kommunit nutaat isumaqatigiinniutigisinnaalissammatigit akissarsiat atorfeqarnermilu atugassarisat.
Aqutsinissamut inatsisip § 65-iata allanngortinneqarnissaa maannakkuugallartoq Naalakkersuisut kissaatiginngilaat.
Kattuffiup naggataatigut oqaatigiumavaa inatsisissatut siunnersuummi oqaatsit "kommunit kattunneqartut" atorneqartut paatsuunganarsaataasut, tassami oqaatsit nassuiaatit malillugit innersuussinerummata kommuninut suli kattunneqarsimanngitsunut.
Inatsisissatut siunnersuummi iluarsineqarpoq.
Akileraartarnermi Pisortaqarfik tusarniaanermut akissuteqarluni allappoq:Pill.: inatsisissatutsiunenrsuutip § 19-ia.
Akileraartarnermi Pisortaqarfiup assorujussuaq isumakulunnartippaa siunnersuutigineqarmat Naalakkersuisut maleruagassanik isertitani akileraarutit pillugit inatsisartut inatsisaatigut aalajangersarneqartunik allannguisinnaatitaanissaat, soorluttaaq kommunip ataatsip iluani akileraarutit procentiisa assigiinnginnerisa nassatarisinnaagaa suliariniagassat akileraartarnermik aaqqissuussinerup iluani imaaliinnarlugit qaangerneqarsinnaanngitsut.
Kiisalu siunnersuutip piumasarissavaa isertitanit akileraarutit pillugit inatsisartut inatsisaanni suli amerlanernik allannguuteqartitsineq, taamaattumik Nunami Namminermi Pissutsinut Allaffik qinnuigineqarpoq inatsisissatut siunnersuummi § 19-itut siunnersuutigineqartoq isumaliutigeqqeqqullugu.
Inatsisissatut siunnersuutip aqutsinermi persaqutaalersinnaanerinnaa pissutigalugu kommunimi nutaami akileraarutinut procentit assigiinngitsuusinnaanngorlugit sanioqqutsisinnaatitsissutip § 19-ip peerneqarnissaa Naalakkersuisut naammassorinngilaat.
Taamaattoq tusarniaaffigisat allat malugeqqusimavaat sanioqqutsisinnaatitsissut § 19-imiittoq pitsaavallaanngitsoq, tassami aalajangersakkap nassatarisinnaammagu kattussuutsitsiniarnerup kinguarsarneqarnera.
Taamaattumik sanioqqutsitsisinnaatitsissut § 19-imiittoq Naalakkersuisut peerpaat.
Siullermik SIK’p tungaaniit inatsisissatut siunnersuut tamanut tunngatillugu oqaaseqarfigissavaarput imaattunik:"Kapitali 2-p § 3-ani atuarneqarsinnaavoq ilaasortanngortussaq tassaasoq partiimut imaluunniit kattusseqatigiinnut taaguisuni amerlanerpaanit taaneqarsimasoq.
Kapitali 2-p § 4-ni atuarneqarsinnaavoq tulliullutik qinigaasussat d’Hondtip periaasia malillugu agguataarneqassasut partiinut, kattusseqatigiinnut imaluunniit kisimiilluni qinigassanngortitttumut taasisut amerlassusii malillugit, tassa inaarutaasumik naatsorsuineq pissalluni taasinerit 1-imik, 2-mik aamma 3-mik agguarnerisigut ilaasortassat 17-issaata kinaassusersineqarnissaata tungaanut.
§ 6-imi atuarneqarsinnaavoq kommunalbestyrelsi ikaarsaariarnermi ataatsimiititaliatut taaneqarluni 12. maj 2008-miit 31. december 2008-mut atuutissasoq.
1. januar 2009-miit kommunimi nutaami ikaarsaariarnermi ataatsimiititaliaq kommunalbestyrelsiulissaaq april 2013-illu tungaanut ingerlassalluni kommunalbestyrelsip nutaap qinigaanissaata tungaanut.
§ 8-mi atuarneqarsinnaavoq nunaqarfinni aqutsisut 31. december 2009 tungaanut atuutissasut taassumalu kingorna nuanqarfinni aqutsisut atuukkunnaassallutik.
SIK’p tungaaniit tikkuarusupparput aaqqissuusseqqinneq tamat oqartussaaqataanerannut pitsaanngitsunik sunniuteqarsinnaasoq, tamannalu inatsisissatut siunnersuummi atuarneqarsinnaanngilaq. Isumaqarpugut inatsisissatut siunnersuummi atuarneqarsinnaasoq tamat oqartussaaqataanerput killiliiffigineqassasoq nunaqarfinni aqutsisut atorunnaarsinneqarnerat pissutigalugu.
Tamat oqartussaaqataanitta innarlerneqannginnissaanik paasisitsiniaasoqarnissaanik nalunaarutit suli pisimanngillat.
Innuttaasut akunnerminni oqallinnissaat pissusissamisoorsorinarpoq inatsisissap suliarineqarnerata nalaani.
Takutinneqartariaqarpoq aaqqissuusseqqinneq qitiusumik oqartussaasut ungasinnerulernissaannik pilersitsissanngitsoq – taamaaliortoqanngippat innuttaasut ingiinnarlutik assamminnik sarliarnissaat erngummatigisariaqarpoq.
Tusarniaanermut akissut allassimavarput sammineqartup oqallisigineqarnerunissaa anguniarlugu.
Kommunimi tamat oqartussaaqataanerisa qanoq ingerlaqqinnissaa kommunerujussuup kommunalbestyrelsianit sukumiisumik isumaliutigineqarnissaa periarfissaqarfiussasoq Naalakkersuisut kissaatigaat.
Naalakkersuisut isumaqarput piffissami ikaarsaariarfiusumi kattussuunnerullu kingorna piffissaq aamma suliassarpassuaqarfiusoq aamma aaqqinneqartariaqartunik, taamaattumik kommunimi tamat siunissami oqartussaaqataanissaasa aaqqissuussivigineqarnissaanut ukiumik ataatsimik piffissaliinissaq Naalakkersuisut pisariaqarsorinngilaat.
AP-p tusarniaanermut akissuteqaataa:Nassuiaatini qupp. 6-imi imaattunik oqaaseqatigeeqarpoq:
"Tamatuma saniatigut kommunimi tamarmi akileraarusiisarnerup, akigititat ataatsimoorussamillu kiffartuussinerup pitsaassusiata pilertortumik assigiisilernissaat pingaaruteqarpoq."
Kommunimi, soorlu Avannaata Kommuniani 8-nik illoqarfeqartumi, kiffartuussinerup pitsaassusiata assigiisilerneqarnissaa angujuminaassaaq. AP isumaqarpoq oqaatsit "kiffartuussinerup pitsaassusiata assigiisilernissaa" allanngortinneqartariaqartoq soorlu uunga: "kiffartuussinerup pitsaassusia nalimmassarneqartariaqarpoq".
Iluarsineqarpoq.
Aalajangersakkanut ataasiakkaanut nassuiaatit
§ 1-imut2006-imi upernaakkut Naalakkersuisut kattussuunnissamut kommunit ataasiakkaat kissaataat pillugit apeqquteqarfigaat. Kommuniniit ataasiakkaanit akissuteqaatit tunngavigalugit Naalakkersuisut siunnersuutigaat Avannaata kommuniani 1. januar 2009-miit ilaassasut maannakkut Qaanaap, Upernaviup, Uummannap, Ilulissat, Qeqertarsuup, Qasigiannguit, Aasiaat aama Kangaatsiap kommunii. Qeqqata kommuniani ilaapput maannakkut Sisimiut aamma Maniitsup kommunii, Tunup/Kitaata kommunianut ilaapput maannakkut Nuup, Paamiut, Ivittuut, Ittoqqortoormiit aamma Ammassallip kommunii, Kujataatalu kommuniani ilaapput maannakkut Qaqortup, Narsap aamma Nanortallip kommunii.
Ikaarsaariarnermi Ataatsimiititaliat suliassaasa siulliit ilagaat kommunit nutaat siunissami atissaasa ilisarnaatissaasalu aalajangiiffigineqarnissaat. Atissatut ilisarnaatissatullu aalajangiunneqartut Ikaarsaariarnermi Ataatsimiititaliap Naalakkersuisunut inassutigissavai kingorna agguataarinermut inatsisissamut nutaamut kommunit aqqi ilisarnaataallu ilanngullugit inatsisissatut siunnersuummik saqqummiussaqarumaartunut. Kommunit kattussuunneqarnissaasa Inatsisartunit oqaluuserineqarnerani aamma oqaluuserineqarpoq kommunit maannakkut killeqarfigisaasa atorluarsinnasuunerat, taamaattumik oqallinnerup inaarneqariinnginnerani Naalakkersuisut kissaatiginngilaat sumiiffilersuilluni kommunit aggornerinut nutaamut inatsisissatut siunnersuummik saqqummiussinissaq.
§ 2-mutOqaatigineqassaaq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaata § 6-iani kommunalbestyrelsimut ilaasortat ukiuni sisamani ilaasortassatut qinigaanissaat qinersinerlu ullormi qinersinermut ataatsimiititaliap aalajangigaani ingerlanneqassasoq atorunnaarsinneqarmata, tak. siunnersuutip § 33-ia.
Imm. 1-imut
Siunnersuutigineqarpoq Ikaarsaariarnermi Ataatsimiititalianut qinersinerit ingerlanneqassasut 8. april 2008-mi. Qinersineq ingerlanneqassaaq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi aalajangersakkat naapertorlugit, taamaattumillu maannamut qinersisarnernit allaassuteqassanani. Ikaarsaariarnermi Ataatsimiititalianut qinersisinnaatitaaneq qinigaasinnaatitaanerlu pillugit §§ 1-imiit 6-imut taamatulli atuupput. Taamaaqataanik §§ 7-miit 20-mut qinersinerit piareersarneqarnerannut aamma §§ 21-miit 24-mut qinersisussat allattorsimaffii maleruagassaqartitaapput. Ullormi qinersiviusumi taaguineq immini §§ 25-miit 28-mut maleruagassaqartitaavoq pappiaqqanillu taasivinnik nassiussinikkut taasinerit §§ 29-miit 35-mut aalajangersakkatigut maleruagassaqartitaalluni. Aaqqissuussaanermut Isumalioqatigiissitat kaammattuutaat naapertorlugit kommunini nutaani Ikaarsaarianermi Ataatsimiititaliani aamma kommunalbestyrelsini ilaasortat amerlassusissaat 17-inut aalajangersarneqarpoq.
Aaqqissuusseqqinnermut Ataatsimiititaliap kaammaattuutai naapertorlugit kommunimi nutaami Ikaarsaariarnermi Ataatsimiititaliami kommunalbestyrelsimilu ilaasortat 17-inut amerlassusilerneqarput.
Imm. 2-mut
Qinersinerup inerneri siullermik taasiartorfinni ataasiakkaani kisinneqassapput kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi §§ 36-miit 40-mut aalajangersakkat naapertorlugit.
Imm. 3-mut
Tamanna isumaqarpoq Namminersornerullutik Oqartussat nalunaarutaata nr. 1, 24. januar 2005-imimeersup atuutiinnarneranik, tassani aalajangersakkat inatsisissatut siunnersuummi atorsinnaagaangata. Taamaattumik siunertaanngilaq taasiartorfinni taaguinernik kisitsinermi allannguuteqartitsinissaq, kisianni nalunaarutip § 2-a siunissami pingaarutaaruttutut isigisariaqarpoq. Tamanna pillugu maleruagassanik nutaanik Naalakkersuisut aalajangersaasinnaanerat ataannarpoq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugi inatsisartut inatsisaanni tunngavittut aalajangersakkat inatsisissatut siunnersuutikkut atortuujunnaarsinneqanngimmata.
§ 3-mutImm. 1-imut
Taaguinermik siulersuisut inernerit qinersinermi siulersuisunut nassiutissavaat, taakkulu qinersivimmi qinersinerup inernera tamarmiusoq kisissavaat. Tassunga atatillugu kommunit kattunnermi ilaasut tamarmik immikkuutaarlutik qinersivik ataatsitut isigineqarput, tak. kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisip § 5-iani imm. 1.
Imm. 2-mut
Kisitsineq nalinginaasumik ingerlanneqassaaq partiinut taakkulu qinigassanngortitaannut, kattusseqatigiit qinigassanngortitaannut ataasiakkaanut aamma kisimiillutik qinigassanngortittunut taaguinerit katillugit kisinnerisigut.
§ 4-mutImm. 1-imut
Kommunimi qinersinerup tamakkerluni inernera qinersinermik siulersuisunit Qinersinermut Ataatsimiititaliamut nassiunneqassaaq. Kommunimi nutaami inernerit tamaasa Qinersinermut ataatsimiititaliap tigoreerunigit partiinut, kattusseqatigiinnut kisimiillutillu qinigassanngortittunut taaguinerit katillugit kisinnerisigut Qinersinermut ataatsimiititaliaq ilaasortaaffiit ataasiakkaat agguataarneqarnissaannut tunngavissaqalissaaq. Naatsorsuineq taanna qinersinermut siulersuisunit taaguinernik kisitsinermut atatillugu ingerlanneqartaraluarpoq, kommuninili nutaani qinersinermut siulersuisoqanngimmat tamanna Qinersinermut Ataatsimiititaliamit isumagineqassaaq. Qinersinermut Ataatsimiititaliap taasinernik kisitsinissaa tunngavissaatitaanngilaq (naaatsorsuutigineqanngilaq). Tamanna qinersinermut siulersuisunit suli isumagineqassaaq. Taaguinerit tamarmik, aamma qinersivimmi nunami sumiiffiup sinniisuutitaanut taasinerit, taasinernik kisitsinermi ilaatinneqassapput. Kommunini kattunneqartuni tamani qinigassanngortitat 17-it qinerneqassapput. Tassa imaappoq nunami sumiiffiup sinniisuutitaata saniatigut Avannaata kommuniani qinigassanngortitat 9, Qeqqata kommuniani qinigassanngortitat 15, Tunup/Kitaata kommuniani qinigassanngortitat 12 Kujataatalu kommuniani qinigassanngortitat 14 qinerneqassapput. Tamatuma kingorna kommunimi kattunneqartumi ilaasortaatitassat periuseq nalinginnaasoq aamma kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni § 41 atortuujunnaartussatut siunnersuutigineqartumi malillugit Qinersinermut ataatsimiititaliap agguataassavai.
Imm. 2-imut
Qinersinermik siulersuisut taasinerit katillugit kisereerunikkit qinersivimmi nunami summiiffiup sinniisuutitassaa qinersinermik siulersuisut kinaassusersissavaat. Nunami sumiiffiup sinniisuutitarissavaa partiip imaluunniit kattusseqatigiit qinigassanngortitaat amerlanerpaanik taaguunneqarsimasoq. Nunami sumiiffiup sinniisuutitassaa tassaassaaq partiip imaluunniit kattusseqatigiit qinigassanngortitaat amerlanerpaanit taaguunneqarsimasoq. Qinersivimmi kisimiilluni qinigassanngortittoq partiit imaluunniit kattusseqatigiiffiit taaguisuinit amerlanerusunit taaguunneqarsimaguni nunami sumiiffiup sinniisuutitaatut inississaaq.
Taaguinerit amerlaqatigiissimappata qinigassanngortitat akornanni tannermoortitsinikkut nunami sumiiffiup sinniisuutitassaa kinaassusersineqassaaq.
Imm. 3-mut
Aalajangersakkakkut qularnaarneqarpoq qinigassanngortitat nunami sumiiffiup sinniisuutitaasut ilaasortaaffimmik pissarsisut siulliullutik salliullutillu partiip imaluunniit kattusseqatigiit ilaasortaaffissaannik pissarsinissaat. Peqatigisaanik pinngitsoortinneqassaaq qinigassanngortitap nunami sumiiffiup sinniisuutitaatut ilaasortaaffimmik pissarsisup kommunalbestyrelsimi ilaasortaaffinnik marlunnik pissarsinnginnissaa.
Imm. 4-mut
Inernerup tamarmiusup naatsorsorneqareerneratigut (d´Hondtip) ilaasortaaffiit partiimit, kattusseqatigiinnit imaluunniit kisimiilluni qinigassanngortitamit pissarsiarineqartut amerlassusiat aamma nunami sumiiffiup sinniisuutitaanut partiip, kattusseqatigiit imaluunniit kisimiillutik qinigassanngortittut ilaasortaaffiit pissarsiaat imminnut naleqqiunneqassapput. Nunami sumiiffiup sinniisuutitaat malillugit ilaasortaaffiit amerlassusaat naatsorsuineq tamarmiusoq tunngavigalugu amerlaneruppata ilasortaaffiit amigaataasut naatsorsuineq tamarmiusoq tunngavigalugu agguaanneqartunit kingullernit tiguneqassapput. Tamatumuuna qularnaarneqassaaq kommuniusimasut tamarmik Ikaarsaariarnermi Ataatsimiititaliami kommunillu nutaap kommunalbestyrelsiani ilaasortaaffimmik ikinnerpaamik ataatsimik qulakkeerunneqarnissaat.
Imm. 5-mut
Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsimmi §§ 50-imiit 52-imut maleruagassat taamatulli atuutsinenqassapput.
Imm. 6-imut
Aalajangersakkakkut tassuuna Naalakkersuisut periarfissinneqarput kommunimi nutaami Ikaarsaariarnermi Ataatsimiititaliami imaluunniit kommunalbestyrelsimi ilaasortaaffiup qinigassanngortitap peqquteqavilluni tunuarneratigut qaqugukkut allamut tunniunneqarnissaanut, kimit tiguneqarnissaanut aamma ilaasortaaffiup qaqugukkut atorunnaartutut isigineqarnissaanut maleruagasssanik sukumiisunik saqqummiussinissaminnut. Taamaattumik aalajangersakkap oqaaseqatigiivini siullerni maleruagassaq pinngitsoorani malinneqartussaanngilaq. Maleruagassat aalajangersagaq taanna malillugu aalajangersarneqartut qularnaartariaqarpaat ilaasortaq peqquteqavilluni tunuarpat taassuma partiiata imaluunniit kattusseqatigiiffiata Ikaarsaariarnermi Ataatsimiititaliami kommunalbestyrelsimilu sunniuteqaannarnissaata qulakkeerunneqarnissaa.
Maleruagassat ilanngullugu qularnaartariaqarpaat nunami sumiiffiup Ikaarsaariarnermi Ataatsimiititaliani aamma kommunalbestyrelsini sinniisuutitaqarnissaa.
Oqaaseqatigiit aappaanni piginnaatitsissut ilassutaasumik qinersinissap periarfissaanera aamma imaraa.
Imm. 7-imut
Suliassaq taanna nalinginnaasumik qinersinermut siulersuisunit isumagineqartarpoq, kommuninili kattunneqartuni qinersinermut siulersuisoqanngimmat suliassat tamanna Qinersinermut Ataatsimiititaliamit isumagineqassaaq.
Imm. 8-imut
Kommunimi nutaami ilaasortaaffiit ataasiakkaat Qinersinermut Ataatsimiititaliap agguataareerunigit kommunimi nutaami qinersinermik allattaavimmut allassavai kikkut qinigaasutut isiginerini kiisalu kommuniusimasuni ataasiakkaani qinigassanngortitaq sorleq nunami sumiiffimmi sinniisuutitatut qinigaasutut isiginerini. Qinersinermut Ataatsimiititaliap qinigassanngortitat qinigaasut qinigaanerannik allaffigissavai, soorluttaaq qinersinerup inernera kommuniusimasuni ataasiakkaani tamani qinersinermik siulersuisunut nalunaarutigissallugu. Suliassaq taanna nalinginnaasumik qinersinermut siulersuisunit isumagineqartaraluarpoq, maleruagassalli atuuttut malillugit kommunimi kattunneqartumi qinersinermut siulersuisunik toqqaasoqarsinnaanngimmat siunnersuutigineqarpoq suliassaq tamanna Qinersinermut Ataatsimiititaliamit isumagineqassasoq.
§ 5-imutTamatuma kingorna qinersivinni ataasiakkaani qinersineq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisanni §§ 44-miit 47-mut allassimasutut qinersinermik siulersuisunit akuerineqassaaq.
§ 6-imutImm. 1-imut
Siunnersuutigineqarpoq kommunimi nutaami kommunalbestyrelsi qinigaarlaaq piffissami 1. maj 2008-miit 31. december 2008 tungaanut Ikaarsaariarnermi Ataatsimiititaliatut atuutissasoq. Ikaarsaariarnermi Ataatsimiititaliap inissitsiternissaa suliassaalu kapitalini 3-mi aamma 4-mi allaaserineqarput. Kommunimi nutaami kommunalbestyrelsitut qinigaasut 1. januar 2009-mi atuutilersussaammata kommunalbestyrelsit kattunnermi ilaasut piffissaq atuuffissaat nalinginnaasoq qaammatinik sisamanik sivikinnerulersinneqarpoq.
Imm. 2-mut
Siunnersuutigineqarpoq Ikaarsaariarnermi Ataatsimiititaliaq kommunimi nutaami 1. januar 2009-mi kommunalbestyrelsitut atuutilissasoq atuutissallunilu 2013-imi aprilimi kommunalbestyrelsinut qinersinerup tungaanut. Taamaalilluni kommunimi nutaami kommunalbestyrelsip piffissaq atuuffia qaammatinik sisamanik sivitsorneqassaaq.
Imm. 3-mut
Siunnersuutigineqarpoq kommuniusimasuni kommunalbestyrelsit tunuassasut 31. december 2008-mi Ikaarsaariarnermi Ataatsimiititaliap kommunalbestyrelsitut atuutilernerata peqatigisaanik, tak. imm. 2.
Tassa imaappoq kommuniusimasuni maannakkut kommunalbestyrelsiusut piffissaq atuuffiat qaammatinik sisamanik sivikinnerulersinneqassaaq.
§ 7-imutImm. 1-imut
Soorlu ullumikkut taamaattoq ilagiit sinniisaannut qinersineq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaat naapertorlugu kommunalbestyrelsinut qinersineq peqatigalugu ingerlanneqassaaq, tamatumalu allanngortinneqarnissaa Naalakkersuisut pissutissaqartinngilaat. Taamaattumik siunnersuutigineqarpoq ilagiit sinniisaasa maannakkut atuuttut piffissaq atuuffigisaat allanngortinneqassasoq, taamaalilluni ilagiit sinniisaannut nutaamik qinersineq ingerlanneqassalluni 8. april 2008-mi kommunimi nutaami kommunalbestyrelsimut qinersinerup ingerlanneqarnissaa peqatigalugu.
Oqaatigineqassaaq kommunalbetyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni § 65-i siunnersuutip § 33-atigut atortuujunnaarsinneqassasoq siunnersuutigineqartoq.
Imm. 2-mut
Siunnersuutigineqarpoq ilagiit sinnisaannut qinersineq periuseq nalinginnaasoq malillugu ingerlanneqassasoq aammalu kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni §§ 62-imiit 71-imut malillugit ingerlanneqassasoq.
Imm. 3-mut
Imm. 1-imi peqqutigineqartut assigalugit siunnersuutigineqarpoq ilagiit sinniisaasa qinigaarlaat piffissaq atuuffiat sivitsorneqassasoq. April 2013-imi kommunalbestyrelsinut qinersinerit peqatigalugit ilagiit sinniisaannut qinersinerit ingerlanneqassapput.
§ 8-mutKommunalbestyrelsit nutaat kommunini nutaani tamat oqartussaaqataanerata piareersarneqarnissaanut pitsaasumillu aaqqiiffigineqarnissaanut piffissaqartitaassapput. Taamaattumik nunaqarfinni aqutsisut piffissaq atuuffissaat 30. april 2009 tungaanut sivitsorneqassasoq siunnersuutigineqarpoq.
Naalakkersuisut naatsorsuutigaat piffissap taamaalinerani tamat oqartussaaqataanerat pillugu kommunit sulinerminni ima angusaqartigisimassasut nunaqarfinni aqutsisut atorunnaarsinneqarsinnaanngorsimassallutik. Taamaattumik siunnersuutigineqarpoq kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaata kapitaliisa 2-anni § 32 atortuujunnaarsinneqassasoq.
§ 9-mutImm. 1-imut
Kingusinnerpaamik 1. juni 2008-mi Ikaarsaariarnermi Ataatsimiititaliat inissitsitersimassapput. Ikaarsaariarnermi Ataatsimiititaliami ilaasortaq ukiumigut utoqqaanertaq inissitsiterluni ataatsimiinnissamut ataatsimiigiaqqusissaaq, taassumattaaq aalajangissavaa ataatsimiinneq sumi ingerlanneqassanersoq. Ikaarsaariarnermi Ataatsimiititaliaq kommunalbestyrelsitut nutaamik qinikkatut inissitsitissaaaq, taamaaqataanillu kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi § 6-imi imm. 2 aamma §§ 7-8-mi aalajangersakkat taamatulli atuutsinneqassallutik.
Imm. 2-mut
Ikaarsaariarnermi Ataatsimiititaliap siulittaasua, siulittaasup tullia siulittaasullu tulliata aappaa kommunit kattunneqareerpata borgmesteritut, borgmesterip tulliatut aamma borgmesterip tulliata aappaatut ingerlaqqissapput, taamaattumillu taamaattutut taamaaqataanik qinerneqassallutik. Siulittaasumik, siulittaasup tullianik aamma siulittaasup tulliata aappaanik qinersinermi kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 8-mi 9-milu aalajangersakkat taamatulli atuutsinneqassapput.
Imm. 3-mut
Aqutsinissamut inatsisip § 6-iani aalajangersagaq kommunalbestyrelsimi ilaasortamut sivisunerpaamik kommunalbestyrelsimi ilaasortaasimasumut arlalinnik piginnaatitsissuteqarpoq. Aalajangersagarli taanna Ikaarsaariarnermi Ataatsimiititaliap inissitsiterneranut atatillugu atorneqarsinnaanngilaq. Ikaarsaariarnermi Ataatsimiititaliaq nutaamik aaqqissuussineruvoq taamaattumillu ilaasortat tamarmik tassunga siullerpaamik qinigaasussaallutik. Siunnersuutikkut tassunga taarsiullugu siunnersuutigineqarpoq Ikaarsaariarnermi Ataatsimiititaliami ilaasortap ukiumigut utoqqaanertap piginnaatitsissutit taakku tigussagai.
§ 10-mutImm. 1-imut
Kommunimi kattunneqartumi aqutsinissamut ileqqoreqqusaq kiisalu Ikaarsaariarnermi Ataatsimiititaliap sulineranut suleriaasissaq Ikaarsaariarnermi Ataatsimiititaliap suliarissavaa. Ikaarsaariarnermi Ataatsimiititaliap suleriaasia kommunit kattunneqareerpata kommunalbestyrelsip sulinissaanut naleqqussarneqassaaq. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi § 2 taamatulli atuutsinneqassaaq.
Imm. 2-mut
Kommunit kattunneqarnissaasa piareersarlugu suliarineqarneranut kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 18-imiit 31-mut aalajangersakkat naapertorlugit Ikaarsaariarnermi Ataatsimiititaliaq ataatsimiititalianik allequtaasunik pilersitsisinnaavoq.
Ataatsimiititalianik pilersitsineq kommunimi nutaami kommunalbestyrelsimut aamma atuutissaaq, taamaattoq ataatsimiititalianut ataavartuinnaat eqqarsaatigalugit. Aammattaaq kommunit kattunneqareerpata kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi § 18, imm. 5 aamma 6 naapertorlugit ataatsimiititalianik ilusiliinermik kommunalbestyrelsi allanngortitsinissaminut periarfissaqarpoq.
§ 11-mutIkaarsaariarnermi Ataatsimiititaliap siulittaasumik, siulittaasup tullianik siulittaasullu tulliata aappaanik qinersineri piffissamut qinigaaffimmut 1. maj 2008-miit april 2013-imut atuutissapput, tassa siulittaasoq kommunimi nutaami 1. januar 2009 kingorna borgmesteritut, siulittaasup tullia borgmesterip tulliatut siulittaasullu tulliata aappa borgmesterip tulliata aappaatut ingerlaqqissammata.
§ 12-imutImm. 1-imut
Kommunalbestyrelsini ilaasortat akissarsiaqartitaanerat pillugu aalajangersakkat allanngortinneqarnissaat maannakkuugallartoq Naalakkersuisut kissaatiginngilaat, taamaattumik kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 17 aamma 47, aammalu kommunalbestyrelsinut, nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu nalunaarummi nr. 35, 5. oktober 2001-imeersoq Ikaarsaariarnermi Ataatsimiititaliat ilaasortaasa akissarsiaqartitaanerannut taamatulli atuutsinneqarput.
Imm. 2-mut
Ikaarsaariarnermi Ataatsimiititaliani ilaasortat kommuniusimasuni kommunalbestyrelsimi ilaasortaajutigisut Ikaarsaariarnermi Ataatsimiititaliami sulinermut akissarsiaritinneqartut taamaallaat 50%-iinik akissarsiaqartinneqassapput, kommunalbestyrelsiusimasuni sulineq tamakkiisumik suli akissarsiaqaataassasoq.
§ 13-imutImm. 1-imut
Ikaarsaariarnermi Ataatsimiititaliap sulinissaanut aningaasanut missingersuusiamut siunnersuut Ikaarsaariarnermi Ataatsimiititaliap siulittaasuata kingusinnerpaamik 1. juli 2008-mi suliarisimassavaa. Aningaasanut missingersuusiamut siunnersuutip kattussuunnerup pinissaata tungaanut Ikaarsaariarnermi Ataatsimiititaliap sulinissaanut taamaallaat atuutissaaq, naallu aningaasanut missingersuusiap suliarineqarnissaanut piffissaq sivikikulukkaluartoq Ikaarsaariarnermi Ataatsimiititaliamut ajornartorsiuutaanissaa naatsorsuutigineqanngilaq.
Imm. 2-mut
Aningaasanut missingersuusiamut siunnersuut inatsisartut inatsisaanni nr. 20, 3. november 1994-imeersumi § 39-mi imm. 1-imit 5-imut aammalu aningaasanut missingersuusiat suliarineqartarnerat pillugu § 40-mi aalajangersakkat Ikaarsaariarnermi Ataatsimiititaliap aningaasanut missingersuusiamik suliarinninnerani taamatulli atuutsinneqassapput.
Imm. 3-mut
Aningaasanut missingersuusiap akuersissutigineqareerneratigut Ikaarsaariarnermi ataatsimiititaliaq aningaasanut missingersuusiaq pillugu nassuiaammik naatsumik tamanut saqqummiussissaaq. Tamanut saqqummiussineq pissaaq akuersissuteqariitsiarnermi, naatsorsuutigineqarporlu aningaasanut missingersuusiap tamanut saqqummiunneqarnera pissasoq akuersissuteqarnerup kingorna kingusinnerpaamik ullut 14 qaangiunneranni.
Aningaasanut missingersuusiaq assersuutigalugu kommunip nutaap qarasaasiakkut nittartagaatigut tamanut saqqummiunneqarsinnaavoq imaluunniit sumiiffinni kommunip allaffiini tamanit misissugassanngortinneqarsinnaalluni.
Aningaasanut missingersuusiaq imm. 2 naapertorlugu Naalakkersuisunut nassiunneqassaaq.
§ 14-imutImm. 1-imut
Naatsorsuutigineqarpoq 2008-mut Aningaasanut inatsimmi 4 millioner kr.-it immikkoortinneqassasut Ikaarsaariarnermi Ataatsimiititaliani siulittaasut ilaasortaasullu akissarsiassaannut tapiissutitut.
Ataqatigiissaarisunik allatullu allattoqarfeqarnikkut ikiuuttussanik Ikaarsaariarnermi Ataatsimiititaliat atorfinitsitsinissaannut tapiissutitut 2008-mi 4 millioner kr.-it imaluunniit Ikaarsaariarnermi Ataatsimiititalianut ataasiakkaanut immikkuutaartunut 1 millioner kr.-it tapiissutitut immikkoortinneqarnissaat naatsorsuutigineqarpoq. Aningaasat taakku Ikaarsaariarnermi Ataatsimmiititaliani sisamani taakkunani immikkuutaarlutik AC-fuldmægtigit 2,5 ukioq kaajallallugu sulisussaannut naapertuupput.
Taamaattumik Ikaarsaariarnermi Ataatsimiititaliat ataasiakkaat immikkuutaarlutik naatsorsuutigisinnaavaat 2 millioner kr.-inik tapiiffigineqarnissartik, taakkunannga 1 million kr.-it allaffissornermut 1 million kr.-illu akissarsianut atorneqassallutik. Nassuiaatini nalinginnaasuni imm. 4 innersuutigineqarpoq. Namminersornerullutik Oqartussat tapiissutaasa aalajangersimasut saniatigut aningaasartuutit agguaanneqarnissaat kommunit susassaqarfigaat Ikaarsaariarnermi Ataatsimiititaliamit aalajangiiffigineqartussat kommuninillu kattuttunit akilerneqartussat. Aammattaaq aningaasartuutit kommuninut ataasiakkaanut kommunimi nutaami ilaasunut agguaanneqarnissaat Ikaarsaariarnermi Ataatsimiititaliap aalajangiiffigisassaraa.
Imm. 2-mut
Kommunimi kattunneqartumi kommunit ilaasut allaffissornikkut Ikaarsaariarnermi Ataatsimiititaliamut sullississapput. Kommunit kattunnissaasa piareersarneqarneranut allaffissornikkut qanoq annertutigisumik ikiorserneqarnissaq pisariaqartinneqarnersoq Ikaarsaariarnermi Ataatsimiititaliat namminneq aalajangissavaat.
§ 15-imutImm. 1-imut
Ikaarsaariarnermi Ataatsimiititaliap kingusinnerpaamik 1. august 2008-mi aalajangiiffigissavaa kukkunersiuinermi sulianut piginnaasaqarluartoq sorleq Ikaarsaariarnermi Ataatsimiititaliap 2008-mut naatsorsuutaanik kukkunersiuisuussanersoq.
Naatsorsuutit kukkunersiorneqassapput kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 45-mi aamma 46-mi kiisalu nalunaarummi nr. 29, 18. december 1995-imeersumi §§ 9-miit 12-imut aalajangersakkat naapertorlugit.
Imm. 2-mut
Kommunimi nutaami aningaasaqarnermut ataatsimiititaliap naatsorsuutit kommunalbestyrelsimut saqqummiutissavai. Naatsorsuutit saqqummiunneqassapput kukkunersiusarfimmut toqqakkamut kingusinnerpaammik 1. juni 2009-mi saqqummiunneqarsinnaasunngorlugit.
§ 16-imutImm. 1-imut
Kommunip nutaap kattunneqarnissaata pinissaa tamakkivillugu Ikaarsaariarnermi Ataatsimiititaliap piareersassavaa. Ikaarsaariarnermi Ataatsimiititaliap ilaatigut aalajangiiffigissavaa kattunnerup qanorpiaq iliorluni pinissaa. Qaammatit arfineq-pingasut (8) kattunnissamut Ikaarsaariarnermi Ataatsimiititaliap piareersaaffissaata qanoq ingerlanissaa pilersaarusiorneqassaaq, taamaalilluni kommuni nutaaq 1. januar 2009-miit ingerlalluarsinnaasunngorlugu.
Imm. 2-mut
Kattussuunnermut atatillugu Kalaallit Nunaata nunap immikkoortuinut kommuneqarfinnullu aggorneqarnera pillugu inatsisartut inatsisaat nr. 11, 30. oktober 1998-imeersoq inatsisissatut siunnersuutikkut matumuuna Naalakkersuisut atortuujunnaarsippaat.
Kalaallit Nunaata kommuneqarfinnut aggorneqarnera pillugu inatsisissamut nutaamut Naalakkersuisut siunnersuusiornissaannut pingaaruteqarpoq kommunip nutaap taaguutissaata ilisarnaatissaatalu Ikaarsaariarnermi Ataatsimiititalianit pilertortumik aalajangiiffigineqarnissaa.
Taaguutissatut ilisarnaatissatullu aalajangiunneqartut Ikaarsaariarnermi Ataatsimiititaliap inassuteqaatigissavai Naalakkersuisunut, kingorna taakku agguataarinermut nutaamut inatsisissatut siunnersuut kommunip taaguutaanik ilisarnaataanillu aalajangersaaffiusussaq saqqummiutissavaat. Taamaattumik 1. august 2008-mut piffissaliisoqarpoq, taamaalillutik Inatsisartut 2008-mi ukiakkut ataatsimiinnermi inatsisissatut siunnersuummik suliarinnissinnaaniassammata.
Naatsorsuutigineqarpoq Ikaarsaariarnermi Ataatsimiititaliat kissaataat inatsisip akuersissutigineqarnerani Inatsisartunit malinneqassasut.
§ 17-imutImm. 1-imut
Ikaarsaariarnermi Ataatsimiititaliap aalajangiiffigissavaa kommunip nutaap kommunitut allaffiata sumi inissinneqarnissaa aammalu ingerlatsiviit tamarmik qullersaqarfimmi (rådhusimi) inissinneqassanersut imaluunniit ingerlatsiviit ataasiakkaat kommunimi nutaami sumiiffinni allani inissinneqarnissaat pitsaanerpaassanersoq.
Ikaarsaariarnermi Ataatsimiititaliap aamma aalajangiiffigissavai ingerlatsiviit ataasiakkaat tamarmik kommuniusimasuni immikkuutaartuni tamani immikkoortortaqassanersut imaluunniit immikkoortortaqarfiit sullissivinnik saaffiginnissutinik ingerlatsivinnut naleqquttunut ingerlatitseqqittartussanik taarserneqassanersut.
Imm. 2-mut
Kommunimi kattunneqartumi aqutsisoqarfik 1. janur 2009-miit atorluarsinnaasuussappat Ikaarsaariarnermi Ataatsimiititaliap aalajangiiffigisariaqarpaa kommunip nutaap aqutsisoqarfia qanoq aaqqissuunneqassanersoq kiisalu allaffissornermi aqutsivinni pisortaasussat aqutsiviup ineriartortinneqarnissaanut pisariaqartinneqarnermissut amerlatigisut atorfinitsissallugit.
Kommunaldirektørinik atorfinitsitsisarneq pillugu kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi § 21, imm. 2-mi nr. 2-mi aamma sulisunik allanik atorfinitsitsisarneq pillugu § 65-imi aalajangersakkat taamatulli atuutsinneqassapput.
Imm. 3-mut
Kommunit kattussuunneqarnerata piviusunngortinneqannginnerani Ikaarsaariarnermi Ataatsimiititaliap sulinini naammassereersimassavaa, taamaalilluni kommuni nutaaq 1. januar 2009-mi tamakkiisumik atorluarsinnaasooqqullugu.
Taamaattumik sulinerup taassuma piffissamik killiliiffigineqarnissaa Naalakkersuisut pitsaanerpaasorisimavaat.
§ 18-imutImm. 1-imut
Kommunimi nutaami aningaasanut missingersuusiaq siulleq 2009-mut atuuttussaq Ikaarsaariarnermi Ataatsimiititaliap suliarissavaa. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 39-miit 42-mut aamma immikkuualuttunut missingersuusiortarnermut, naatsorsuutinut, kukkunersiuisarnermut aamma karseqarnermut naatsorsuuseriveqarnermullu maleruagassiat pillugit nalunaarummi nr. 29, 18. september 1995-imeersumi §§ 1-imiit 4-mut aalajangersakkat taamatulli atuutsinneqassapput. Aningaasanut missingersuusiap suliarineqarneranut atatillugu pingaaruteqarpoq nalunaarummi piffissanut killiliussat Ikaarsaariarnermi Ataatsimiititaliamit arajutsisimaneqannginnissaat. Piffissanut killiliussat taakku peqqussutigaat aningaasanut missingersuusiamut siunnersuut kingusinnerpaamik 30. september 2009-mi Ikaarsaariarnermi Ataatsimiititaliamit suliarineqarnissaminut piareersimassasoq aningaasanullu missingersuusiaq inaarlugu suliarineqareersimassaaq kingusinnerpaamik 30. november 2008-mi.
Imm. 2-mut
Aaqqissuusseqqinnermi siunertarineqartut ilagaat kikkut tamarmik naligiimmik atugaqartitaanissaasa qulakkeerneqarnissaa, taamaattumik isertitanit akileraarusiisarneq akigititallu aallaavittut 1. januar 2009-miit nalimmassarneqassapput.
§ 19-imutImm. 1-imut
Ingerlatsiveqarfiit tamaasa Ikaarsaariarnermi Ataatsimiititaliap misissuiffigeqqissaassavai, misissueqqissaarnerlu taanna aallaavigalugu kommunimi nutaami siunissami ingerlatsinerup qanoq qaffasissuseqarnissaani siunniussat pingaarnerusut suliarissallugit.
Aningaasanut missingersuusiornermut atatillugu misissueqqissaarneq aallaavigalugu kommunimi nutaami kiffartuussinerup qaffasissusissaa pillugu isertitanit akileraarusiinissaq akigititassallu Ikaarsaariarnermi Ataatsimiititaliap aalajangersaavigissavai.
Aammattaaq Ikaarsaariarnermi Ataatsimiititaliap anguniartariaqarpaa kommunimi nutaami tamarmi kiffartuussinerup qaffasissusiata assigiilernissaa.
§ 20-mutKommuniusimasuni kommunalbestyrelsit 1. maj 2008-miit taamaallaat suliassaraat kommunit ulluinnarni ingerlatitaanerat, taamaattumillu taamaallaat periarfissaqarfigalugu ingerlatsinermut inatsisitigullu aningaasartuutissat aningaasartuutigineqarnissaat. Aningaasartuutit taakku aallaavittut 2008-mut aningaasanut missingersuusiat tunngavigalugit aningaasartuutigineqassapput.
Imm. 2-mut
Iliuusissat aningaasanut tunngasut imm. 1-imi taaneqanngitsut kommunimi kattunneqartumi kommunalbestyrelsimit aningaasartuuteqartoqannginnerani Ikaarsaariarnermi Ataatsimiititaliamut akuersissutigisassanngorlugit saqqummiunneqartassapput. Ilassutitut aningaasaliissutit ingerlatsinermi aningaasartuutissanut atugassat saqqummiunneqartariaqanngillat, oqaatigineqassaarli aningaasaliissutit taamaattut Ikaarsaariarnermi Ataatsimiititaliamit § 21 imm. 2 naapertorlugu appaavigineqarsinnaasut.
Imm. 3-mut
Kommunimi nutaami aqutsinerup tamarmiusup aaqqiivigineqarnissaa Ikaarsaariarnermi Ataatsimiititaliap aalajangiiffigissavaa. Taamaattumik piffissami ikaarsaariarfiusumi Ikaarsaariarnermi Ataatsimiititaliaq akuersiseqqaarnagu kommunalbestyrelsiusimasut ingerlatsivimmi atorfinnik nutaanik pilersitsisinnaanissaat inuttaleeqqissinnaanissaallu Naalakkersuisunit tulluartuusorineqanngilaq. Aalajangersagaq atorfinnut qanoq qaffasitsigigaluartunulluunniit tamanut atuuppoq.
§ 21-mutImm. 1-imut
Maannakkut kommunalbestyrelsiusuniit paasissutissanik pissarsinissaq kommunip nutaap pilersinneqarnissaanut Ikaarsaariarnermi Ataatsimiititaliap suliarinninneranut amerlasuutigut pingaarutilerujussuussaaq. Aalajangersagaq malillugu tamakkuninnga kommuniusimasuniit paasissutissanik tunineqarnissamik piumasaqaateqarnissamut killiliisinnasunik aalajangersagaqarsorineqanngilaq. Taamattoq Ikaarsaariarnermi Ataatsimiititaliap piumasaqaateqarnera tunngavilersorluagaasimassaaq. Ikaarsaariarnermi Ataatsimiititaliap sulinermini atugassaanik allagaatinik, paasissutissanik pissarsinissamut, katersuinissaanut suliarinninnissaanullu, matumanittaaq paasissutissanik isertuussassanik aamma inunnut ataasiakkaanut tunngassuteqartunik tamakkuninngalu naliliinissamut Ikaarsaariarnermi Ataatsimiititaliamut tunniussinissamut kommunalbestyrelsit pisussaatitaassapput. Ikaarsaariarnermi Ataatsimiititaliap ingerlaavartumik piumasarisinnaavaa paasissutissat aalajangersimasut pissarsiarineqarnissaat Ikaarsaariarnermilu Ataatsimiititaliamut ingerlatinneqarnissaat.
Paasissutissanik aalajangersimasunik pissarsiniarsinnaatitaaneq Ikaarsaariarnermi Ataatsimiititaliamut pisinnaatitaaffiuvoq ilaasortanut ataasiakkaanuunngitsoq. Taamaattoq Ikaarsaariarnermi Ataatsimiititaliaq periarfissaqartitaavoq paasissutissanik pissarsinissaq Ikaarsariarnermi Ataatsimiititaliap allaffissornikkut sulisuinut tunniunnissaanut.
Aalajangersakkakkut siunertaavoq Ikaarsaariarnermi Ataatsimiititaliap suliassanik Ataatsimiititaliamut tunniunneqartunik isumaginninnissamini aalajangiinissamut tunngavissaasa pisariaqartinneqartut qulakkeerneqarnissaat.
Imm. 2-mut
Kommunip nutaap sapinngisamik pitsaanerpaamik aallariarfeqarnissaa qulakkeerniarlugu pingaaruteqarpoq kommuniusimasut kattunnerup nalaani aningaasaqarnerat piffissami ikaarsaariarfiusumi immikkut amerlasuunik aningaasartuuteqarnikkut artukkerneqarsimannginnissaat.
Taamaattumik Ikaarsaariarnermi Ataatsimiititaliaq periarfissaqartitaavoq 2008-mut kommunit ataasiakkaat missingersuusiaannik nalileereernermigut aningaasaliissutit akuersissutigineqareersut appaavigineqarnissaannut. Aalajangersagaq aamma isigineqassaaq pisinnaatitaaffinnut § 2 imm. 2 aamma 3 naapertorlugit Ikaarsaariarnermi Ataatsimiititaliamut tutsinneqartunut atatillugu.
Imm. 3-mut
Aalajangersakkakkut tassuuna erseqqissarneqarpoq imm. 2 tunngavigalugu Ikaarsaariarnermi Ataatsimiititaliap aalajangiiffigisinnaanngikkaa kommuni inatsisiliat malillugit aningaasartuutissaminik aningaasartuuteqassanngitsoq.
Imm. 4-mut
Aalajangersakkakkut piffissami ikaarsaariarfiusumi aningaasatigut iliuusissanut maleruagassanik erseqqinnerusunik aalajangersaanissamut Naalakkersuisut piginnaatinneqarput.
Naatsorsuutigineqarpoq piginnaatitsissut taanna piviusunngortinneqassasoq piffissami ikaarsaariarfiusumi kommunit aningaasaqarnerisa immikkuualuttutigut maleruagassiuiffigineqarneratigut, tamatumuuna pinngitsoortinniarneqarluni kommunalbestyrelsiusimasut kommunerjussuarmut nutaamut tunngatillugu aningaasaqarnikkut pitsaanngitsumik iliuuseqarsinnaanerat.
§ 22-mutImm. 1-imut
Isumaqatigiissutit aamma atsiueqatigiilluni isumaqatigiissutit kommuniusimasut kommunalbestyrelsiinit isumaqatigiissutigineqarsimasut kommuninit nutaanit pisinnaatitaaffiit pisussaaffiillu imm. 2-mi taaneqartut ilanngullugit tiguneqassapput.
Kommunit kattunnissaasa piareersarneqarneranut atatillugu pisariaqalersinnaavoq isumaqatigiissutit aamma atsiueqatigiilluni isumaqatigiissutit kommuniusimasunit isumaqatigiissutigineqarsimasut atorunnaarsinneqarnissaat imaluunniit allanngortinneqarnissaat, tamatumani siunertaalluni atorunnaarsitsinerup imaluunniit allanngortitsinerup kommunimut kattunneqartumut 1. januar 2009-mi kingusinnerukkulluunniit atuutsinneqalernissaat siunertaralugu.
Aalajangersakkakkut allannguinissat imaluunniit atorunnaarsitsinissat pillugit taamatut aalajangiinissamut Ikaarsaariarnermi Ataatsimiititaliat periarfissinneqarput. Atorunnaarsitsinissat imaluunniit allannguinissat 1. januar 2009 sioqqullugu Ikaarsaariarnermi Ataatsimiititaliamiit aalajangiiffigineqarsinnaanerat pingaarpoq, tassami kommunip kattunneqartup isumaqatigiissutinik imaluunniit atsiueqatigiilluni isumaqatigiissutinik piumasaqaatitaat allanngortinneqanngitsunik tiguseratarsinnaammata.
Imm. 2-mut
Aalajangersakkakkut aalajangersarneqarpoq kommunini nutaani kommunalbestyrelsit 1. januar 2009-miit kommunalbestyrelsit kattunnermi ilaasut pisinnaatitaaffiinik pisussaaffiinillu tigusissasut aammalu ullormit tassannga kommunit nutaat kommuniusimasut pigisaannik nalilinnik akiligassaannillu tigusissasut. Aalajangersakkami pineqarput kommunit nutaat pilersinneqarnerisa nalaani pisinnaatitaaffiit pisussaaffiillu kommunini kattunneqartuni kommunalbestyrelsiusut tigummisaat tamarmik, aammattaaq aalajangersakkami pineqarput kommunit taaneqartut pigisaat nalillit akiligassaallu tamarmik.
Aalajangersakkap ilaatigut nassataraa kommunit nutaat illuutinik pigisanillu nalilinnik allanik kommuniusimasunit pigineqartunik tigusinissaat, aammattaaq kommuniusimasut kommunalbestyrelsiisa taarsigassarsiaannut akiligassaannullu allanut, matumanittaaq qularnaveeqqusiinerinut, akiligassalittut kommunip nutaap pisussaaffeqalernera. Taamaattumik aalajangersakkap nassatarissavaa kommunit akiligassaqarfiisa akiligassallip allanngornera pissutigiinnarlugu pisussaaffinnik ingerlaannartumik akiligassanngortitsisinnasannginnera.
Aalajangersakkami ilanngullugu pineqartunut ilaapput kommunit taaneqartut innuttaasunit, suliffeqarfinnit aamma pisortat oqartussaasuinit allanit pisassarisaat kiisalu innuttaasut, suliffeqarfiit aamma pisortat oqartussaasuisa allat kommuninit taaneqartunit pisassarisaat.
Kiisalu aalajangersakkap nassataraa kommunini kattunneqartuni aamma kommunit kattunneqartut avataanni oqartussaasunik inuinnarnillu kommunalbestyrelsiusimasut suleqateqarnerinik kommunalbestyrelsip nutaap ingerlatitseqqinnissaa.
§ 23-mutAalajangersakkakkut aalajangersarneqarpoq tjenestemandit kommunini kattunnermi ilaasuni suliffeqarlutik atorfeqartitaasut kattunnermut atatillugu maannamut atugassarisaminnut naleqquttunik atugassaqartitaallutik kommunimi nutaami atorfeqartitaalissasut.
Aalajangersakkap nassataraa atorfinitsitsinermi oqartussaasoq tassaasoq kommunimi nutaami kommunalbestyrelsi aammalu atorfeqartitaaffik tassaasoq kommuni nutaaq. Kommunimi nutaami atorfeqartitaalerneq immini nuutsitsinerunngilaq. Taamaattumik tjenestemandit pineqartut kommunimi kattunneqartumi atorfeqartutut nuunnermik malitsigisaanik akissarsiassaqarlutik soraarnerussutisiassaqarlutilluunniit soraarnissaminnik piumasaqaateqarsinnaanngillat.
Aammattaaq aalajangersakkap nassataraa tjenestemandit pineqartut pisussaatitaasinnaammata atorfeqartitaaffimmi nutaami suliat suussusiinik allanngortitsinngitsumik atorfimmik naleqquttumik tigusinissamut. Atorfiup allap taamaattup naleqquttuunerata naliliivigineqarnerani atorfiup suussusiata atorfigisimasamullu qanoq atatiginerata naliliivigineqarnerata saniatigut ilaatinneqassaaq tjenestemandip qanoq ilinniagaqarsimanera, ukioqqortussusia, peqqissusia, killiffiata nalinginnaasumik isummerfiginera il.il. tunngavigalugit atorfik naleqquttoq innersuunneqarsimanersoq ilanngullugu nalilerneqassasoq. Naliliinermi aammattaaq ilanngullugu ilaatigut naliliivigineqartariaqarpoq atorfeqartitaaffiup allanngornera kommunit kattunnerannut nalinginnaasumik ilaatinneqarnersoq. Tassa imaappoq tjenestemandit pineqartut atorfeqartitaaffiup nutaap iluani atorfimmik naleqquttumik tigusinissaq pisussaaffigissagaat, naak maannamut atorfeqartitaaffimmik iluani tigussallugu pisussaaffigisussaanngikkaluarlugu.
§ 24-mutAalajangersakkakkut isumaqatigiissutit malillugit inunnillu ataasiakkaanik isumaqatigiissuteqarnikkut atorfeqartitat tamarmik inatsisit tunngavigalugit assigiimmik pineqarnissaat qulakkeerniarneqarpoq, taamaalilluni atorfeqartitaaneq atugassarisat atuuttut assingi malillugit ingerlaqqissinnaassalluni.
Taamaattumik pisinnaatitaaffinnut pisussaaffinnullu nuunnerup nalaani piusunut kommuni nutaaq pisussaaffeqalissaaq.
Aalajangersakkap nassataraa aallaaviatigut kommunit kattunneqarnerisa kingorna sulineq pillugu isumaqatigiissutinik atorfeqartitaaffimmi nutaami sulisorisat eqquutsitsillutik atorfeqartitaalernissaat.
Taamaattumik aalajangersakkap nassataraa kommunit kattunneqarnerannut atatillugu atorfeqartitaaffimmi nutaami atorfeqalersutut nuutsitsinermut atatillugu sulisitsisup allanngornera immini pissutaasinnaanngimmat atorfeqartitap tungaaniit atorfeqarneq pillugu isumaqatigiissutip atorunnaarsinneqarsinnaannginneranut, tamannali allanngortitsinerussaaq atorfeqartitap naammagalugu atortariaqagaa atorfeqartitaanermut tunngasut annertuumik allannguuteqanngippata.
Taamaattoq atorfeqartitaq nalunaaruteqarnissamut piffissarititaasoq nalinginnaasoq malillugu atorfimminiit soraarniuteqarsinnaavoq atorfeqartitaaffimmut nutaamut nuutsinneqarnissani kissaatigissanngikkuniuk.
Kommunimi kattunneqartumi ingerlatsiveqarfiit siunissami sumi inissinneqarnissaat Ikaarsaariarnermi Ataatsimiititaliap aalajangiiffigereerpagu sulisorisat sumi inissinneqarumaarnerat sapinngisamik piaarnerpaamik pilersaarusiorneqartariaqarpoq. Pilersaarutit pillugit sulisorisat ingerlaavartumik ilisimatinneqartartariaqarput sulisorisallu suliffigisaata nuunneqarnissaa ima piaartigisumik nalunaarutigineqartariaqarpoq nalunaaruteqarnissamut piffissarititaasoq nalinginnaasoq malillugu sulisorisaq atorfimminiit soraarniuteqarsinnaasariaqarluni suliani malillugit nuunneqarnissaminik kissaateqanngikkuni.
§ 25-mutImm. 1-imut
Aalajangersagaq 2008-mut naatsorsuutinut kommuninit kattunnermi ilaasunit tamanit immikkuutaarlutik suliarineqartussanut tunngavoq.
Siunnersuutigineqarpoq 2008-mut naatsorsuutit kommunimut kattunnermi ilaasumut tunngasut kommuniusimasumi aningaasaqarnermut ataatsimiititaliamit kommunimi tassani kommunalbestyrelsimut saqqummiunneqassasut.
Imm. 2-mut
Aalajangersakkakkut siunnersuutigineqarpoq kommunimi nutaami kommunip pineqartup naatsorsuutai kommunalbestyrelsimit kukkunersiuisunut saqqummiunneqassasut. Kommunit kattunnermi ilaasut ilaat assigiinngitsunik kukkunersiuisoqarsimappata naatsorsuutit tamakku immikkuutaartillugit kukkunersiuisunut susassaqartunut saqqummiunneqassapput.
Imm. 3-mut
Aalajangersakkakkut siunnersuutigineqarpoq kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20, 3. november 1994-imeersumi aammalu kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit nalunaarummi nr. 29, 18. september 1995-imeersumi aalajangersakkat arlallit naatsorsuutinik saqqummiussinermi taamatulli atuutsinneqassasut.
Aqutsinissamut inatsisip § 45-ani kommunip naatsorsuutaanut piumasaqaatit suut piumasaqaataanersut aalajangersarneqarput § 48-lu nalunaarutip saqqummersinnissaanut piginnaatitsissutitut aalajangersagaalluni.
Naatsorsuutit suliarineqarnissaat kiisalu naatsorsuutit tamanut saqqummiunneqarnissaat pillugu piffissaliussanut aalajangersakkat nalunaarutip aalajangersagartaasigut aalajangersarneqarput.
§ 26-mut§ 25 imm. 2-mi taaneqartutut kommunimi kattunneqartumi kommunip pineqartup naatsorsuutai kommunalbestyrelsimit kukkunersiuisunut saqqummiunneqassapput.
Aalajangersakkakkut kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20, 3. november 1994-imeersumi aammalu kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit nalunaarummi nr. 29, 18. september 1995-imeersumi aalajangersakkat arlallit taamatulli atuutsinneqassasut aalajangersarneqarpoq.
Aqutsinissamut inatsisip § 46-ani piumasaqaatit suut kukkunersiuisunut piumasaqaataanersut aalajangersarneqarput § 48-lu nalunaarutip saqqummersinnissaanut piginnaatitsissutitut aalajangersagaalluni.
Nalunaarutip §§ 9-miit 12-imut aalajangersarneqarput ukiumoortumik nalunaarusiortoqassasoq allaaserineqarpullu kommunalbestyrelsi qanoq iliorluni taassuminnga suliarinnissaanersoq, aamma kukkunersiuisut nalunaarutaasa suliarineqarnissaanut piffissaliussat suut atuunnersut.
§ 27-mutAalajangersakkakkut Ikaarsaariarnermi Ataatsimiititaliat kommunalbestyrelsitulli pisortat ingerlatsineranni inatsisiliornikkut maleruagassani pineqartunut ilaasut aalajangersarneqarpoq.
Naalakkersuisut pingaartissimavaat erseqqissassallugu pisortat ingerlatsineranni suliassat suliarineqartarnerat pillugu inatsisartut inatsisaat nr. 8, 13. juni 1994-imeersoq aamma pisortat ingerlatsinerat pillugu paasitinneqarsinnaatitaaneq pillugu inatsisartut inatsisaat nr. 9, 13. juni 1994-imeersoq tunngavigalugit Ikaarsaariarnermi Ataatsimiititaliat sulinissaat.
Ilanngullugu siunnersuutigineqarpoq Ikaarsaariarnermi Ataatsimiititaliat aqutsivigineqarnerat kommunalbestyrelsit aqutsivigineqarneranni inatsisitigut maleruagassani pineqassasut, tak. siunnersuutip § 31-a, tassuuna ilanngunneqarpoq kommunalbestyrelsit nunaqarfinnilu aqutsisut pillugit inatsisartut inatsisaanni § 5 aalajangersakkatut nutaatut.
Taamaattumik Ikaarsaariarnermi Ataatsimiititaliat isiginiassavaat suliassat suliarineqartarnerat pillugu aalajangersakkat nalinginnaasut, soorlu aalajangeeqataasinnaatitaaneq pillugu aalajangersakkat, suliami peqataasunik tusarniaanissat, aalajangiinerit tunngavilersornissaat aammalu paasitinneqarsinnaatitaaneq pillugu aalajangersakkat, aammalu allattuinissamut pisussaaffeqarneq kiisalu pisortat ingerlatsinerat pillugu paasitinneqarsinnaatitaaneq pillugu inatsisartut inatsisaat malillugu paasitinneqarsinnaatitaaneq.
§ 28-mutAllagaatit sulinermi nammineq atugassat ingerlatsinermi oqartussaasup ilumini isumaliutaanik taamaallaat imaqartut imaluunniit taakkuninngaannangajak imaqartut pisortat ingerlatsinerat pillugu paasitinneqarsinnaatitaaneq pillugu inatsisartut inatsisaat nr. 9, 13. juni 1994-imeersoq aamma pisortat ingerlatsineranni suliassat suliarineqartarnerat pillugu inatsisartut inatsisaat nr. 8, 13. juni 1994-imeersoq malillugit paasitinneqarsinnaatitaanermi pineqartunut aallaaviatigut ilaanngillat. Taamaattoq allagaatit sulinermi nammineq atugassat oqartussaasumut allamut nassiunneqarunik imaluunniit allatut iliorluni avataaniittunut tunniunneqarunik sulinermi nammineq atugassatut iluseqarnertik atuinnarsinnaanngilaat.
Kattussuunnerulli eqaatsumik suliarineqarnissaa eqqarsaatigalugu siunnersuutigineqarpoq allagaatit Ikaarsaariarnermi Ataatsimiititaliap kattunnissamik piareersaaneranut atatillugu kommuninit kattunneqartunit Ikaarsaariarnermi Ataatsimiititaliamit tiguneqartut sulinermi nammineq atugassatut iluseqarnertik atuinnassagaat. Taamaattumik aalajangersakkap nassataraa paasitinneqarsinnaatitaaneq pillugu suliassanik suliarinnittarneq pillugu inatsimmi aamma pisortat ingerlatsinerat pillugu paasitinneqarsinnaatitaaneq pillugu inatsimmi aalajangersakkanit allaassuteqarnera.
§ 29-mutImm. 1-imut
Kommunalbestyrelsiusimasut piffissaq atuuffissaat qaammatinik sisamanik (4) sivikillineqarpoq. Taamaattumik siunnersuutigineqarpoq borgmesterit Ikaarsaariarnermi Ataatsimiititalianut qinigaanngitsut qaammatini sisamani taakkunani akissarsiassaminnik annaasaqartussat taarsiiffigineqassasut.
Taarsiissutit amerlassuseqassapput piffissaq atuuffik sivikillineqanngippat borgmesterip akissarsiarisassaasut. Kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi §§ 17-imi aamma 37-mi kiisalu akissarsiaqartitsineq pillugu namminersornerullutik oqartussat nalunaarutaanni nr. 35, 5. oktober 2001-imeersumi aalajangersakkat taamatulli atuutsinneqassapput.
Imm. 2-mut
Kommunini kattunneqartuni kommunalbestyrelsiusut piffissaq atuuffiata sivikillineqarnerata aamma nassatarissavaa borgmesterit ilaasa borgmesterit qinigaajunnaarnersiutaat pillugit nalunaarut nr. 23, 12. september 1997-imeersoq naapertorlugu qinigaajunnaarnersiuteqarnissaminni qaammatinik sisamanik amigaateqarnissaat. Kattunnerup kingornatigut borgmesterit taakku kommunimi kattunneqartumi borgmesteritut ingerlaqqissanngippata piffissamut piumasaqaat aamma sanioqqunneqassaaq, taamaalillutik borgmesterit taakku qinigaajunnaarnersiuteqarsinnaassallutik.
Imm. 3-mut
Siunnersuutigineqarpoq maannakkut kommunalbestyrelsiusut piffissaq atuuffiata sivikillineqarnerata kingunerisaanik borgmesterit akissarsiassaminnik annaasaqartut, tak. imm. 1, akissarsiassaat Namminersornerullutik Oqartussanit aningaasalersorneqassasut.
§ 30-mutQinersinissanut pilersaarutaaqqaartunut naleqqiullugu kommunalbestyrelsinut ilagiillu sinniisaannut qinersinissat ukiumik ataatsimik siuartinneqarput. Siuartitsinikkut eqqarsaatigineqanngilaq qinersinerit ingerlanneqarnissaasa aningaasalersorneqarnissaasa allanngortinneqarnissaa. Qinersinerit ingerlanneqarnissaannut aningaasartuutit periuseq nalinginnaasoq malillugu Namminersornerullutik Oqartussat aamma kommunit akornanni avinneqassapput, taamaattumik kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi §§ 73-imi aamma 75-mi aalajangersakkat taamatulli atuutsinneqassapput.
§ 31-mutAalajangersakkap imarai siunnersuutip matuma kingunerisaanik kommunalbestyrelsit, nunaqarfinni aqutsisut il.il. pillugit inatsisartut inatsisaanni nr. 20, 3. november 1994-imeersumi allannguutit.
§ 5 imm. 1-imut
Aalajangersakkakkut tassuuna siunnersuutigineqarpoq aqutsineq nakkutilliinerlu pillugit maleruagassani Ikaarsaariarnermi Ataatsimiititaliat kommunitulli pineqassasut. Suliassaqarfiit ilaanni Ikaarsaariarnermi ataatsimiititliat oqartussaaffii inatsisissatut siunnersuummi immikkuualuttutigut maleruagassiuiffigineqarput. Marloqiusanik maleruagassaqassatillugu pisortat suliassaataannik aaqqissuusseqqinneq pillugu inatsisartut inatsisissaattut siunnersuummi maleruagassat immikkut ittut kommunalbestyrelsit aamma nunaqarfinni aqutsisut pillugit inatsisartut inatsisaanni maleruagassanit nalinginnaasunit salliutinneqassapput.
Oqaatigineqassaaq inissitsiterneq aamma siulittaasumik, siulittaasup tullianik il.il. qinersineq pillugit inatsisissatut siunnersuutip § 9-ani immikkut maleruagassaqartoq, taakkulu kommunalbestyrelsit nunaqarfinnilu aqutsisut pillugit inatsisartut inatsisaanni § 6-imit salliutillugit atorneqassapput. Tassani ilaatigut siunnersuutigineqarpoq Ikaarsaariarnermi Ataatsimiititaliat taamalu aamma kommunini kattunneqartuni kommunalbestyrelsit ilaasortaasa amerlassusissaat 17-iussasut. Taamaalilluni aalajangersakkap taarserpaa kommunalbestyrelsit nunaqarfinnilu aqutsisut pillugit inatsisartut inatsisaanni § 5, taamaattumik kommunip aqutsinissamut ileqqoreqqusaani aalajangersarneqarsinnaajunnaarpoq kommunalbestyrelsini qassit ilaasortaassanersut.
Nakkuktilliisoqarfiup oqartussaaffii Ikaarsaariarnermi Ataatsimiititaliamut taamatulli atuutsinneqarput. Ilaasortap suleqataaffigisinnaanngilaa Ikaarsaariarnermi Ataatsimiititaliaq pillugu suliaq nammineq ilaasortaaffigisani.
Ikaarsaariarnermi Ataatsimiititaliani ilaasortat taarsiissuteqarnissamut inuttut akisussaaffeqarnerat pillugu aalajangersakkani aamma pineqarput. Aammattaaq suliassanik suliakkiutigineqartunik suliarinnikkumannginneq pillugu aalajangersakkani Ikaarsaariarnermi Ataatsimiititaliap siulittaasua pineqarpoq.
§ 5-imi imm. 2-mut
Inatsisissatut siunnersuutip § 6-iani imm. 2-mut atatillugu siunnersuutigineqarpoq inatsisip atuutsinneqarnera Nakkutilliisoqarfiullu oqartussaaffii eqqarsaatigalugit Ikaarsaariarnermi Ataatsimiititaliat siulittaasui tamatigut paasineqassasut borgmesteritut, borgmesterip tulliatut aamma borgmesterip tulliata aappaatut.
§ 5-imi imm. 3-mut
Ataatsimiititalianik allequtaasunik pilersitsinermi Ikaarsaariarnermi Ataatsimiititaliaq kommunalbestyrelsitulli pisinnaatitaaffeqassaaq, tak. inatsisissatut siunnersuutip § 10-ani imm. 2. Maannakkut kommuniusuni ilaasortaqarmat ataatsimiititalianut, siulersuisunut, kommissioninut taamaaqataannullu kommunip sinniisuutitaqarfigisassaanut qinigaareersunik Ikaarsaariarnermi Ataatsimiititaliat kommunalbestyrelsit nunaqarfinnilu aqutsisut pillugit inatsisartut inatsisaanni § 18-imi imm. 3-mi pineqartunut ilaanngillat.
Naalakkersuisut pilersaaruteqarput aqutsinissamut inatsisissamut nutaamut siunnersuut 2008-mi upernaakkut ataatsimiinnissami saqqummiunneqassasoq, tassungalu atatillugu ilanngunneqassaaq aalajangersagaq kommunip kattunneqartup taamatulli sinniisuutitassaanik qinersinissamik kommuninut nutaamik peqqussutaasumik.
§ 32-mutAalajangersakkap imarai siunnersuutip matuma kingunerisaanik kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni nr. 10, 31. oktober 1996-imeersumi allannguutit. Innersuutigineqassapput nassuiaatini qinersinerit pillugit immikkoortoq 3.2.
Nr. 1-imut
Qinersisarnerit pillugit inatsisip § 6-iani aalajangersarneqarpoq kommunalbestyrelsimi ilaasortat ukiunut sisamanut qinigaassasut piffissarlu qinigaaffik 1. majimiit atuuttutut naatsorsuutigineqartoq.
Kommunalbestyrelsinut tullianik qinersisoqannginnerani ukiup qinigaaffiup qaammatisiutit ukiuat malissaneraa paasineqassasoq Naalakkersuisut kissaatigaat, tamatuma kingorna qinersisarnerit pillugit inatsimmut nutaamut inatsisissatut siunnersuut saqqummiunneqarumaarpoq.
Taamaattumik Ikaarsaariarnermi Ataatsimiititaliat nutaamik qinigaasut kingornatigullu kommunimi nutaami kommunalbestyrelsit piffissaq atuuffiat aallaaviatigut ukiunit sisamanit sivisunerussaaq.
Taamaattumik qinersisarnerit pillugit inatsisip § 6-ia atortuujunnaarsinneqassasoq siunnersuutigineqarpoq.
Nr. 2-mut
Qinersisarnerit pillugit inatsisip § 41-ani allaaserineqarpoq qinigassanngortittut kikkut qinigaasutut isigineqarnissaannut qanoq kisitsisoqassanersoq. Kommunini nutaani kommunalbestyrelsinut qinersinissami, tak. siunnersuummi § 2, nunami sumiiffiup sinniisuutitaqarnissaa siunnersuutaavoq, qinersinerullu inaarutaasumik kisinneqarnissaa pillugu aalajangersakkat siunnersuutip uuma § 3-ani ilanngunneqarput.
Taamaattumik qinersisarnerit pillugit inatsisip § 41-a atortuujunnaarsinneqassasoq siunnersuutigineqarpoq.
Qinersisarnerit pillugit inatsimmi §§ 42 aama 43 Qinersinermik siulersuisut pisinnaatitaaffii siunnersuutip uuma § 4-aa malillugu Qinersinermut ataatsimiititaliamut tunniunneqarput.
Taamaattumik qinersisarnerit pillugit inatsimmi § 42 aamma 43 atortuujunnaarsinneqassasut siunnersuutigineqarpoq.
Nr. 3-mut
Siunnersuutip § 8-ni siunnersuutigineqarpoq nunaqarfinni aqutsisut piffissaq atuuffiat 30. april 2009 tungaanut sivitsorneqassasoq, tamatuma kingorna nunaqarfinni aqutsisut maannakkutut iluseqarlutik atorunnaassapput.
Taamaattumik qinersisarnerit pillugit inatsimmi §§ 54-imiit 61-imut atortuujunnaarsinneqassasut siunnersuutigineqarpoq.
Nr. 4-mut
Siunnersuutip § 7-iani siunnersuutigineqarpoq ilagiit sinniisaasa piffissaq atuuffiat ukiumik ataatsimik sivikillineqassasoq. Taamaattumik qinersisarnerit pillugit inatsisip § 65-ia atortuujunnaarsinneqassasoq siunnersuutigineqarpoq.
§ 33-mutImm. 1-imut
Siunnersuutigineqarpoq inatsisartut inatsisaat 1. december 2007-imi atortuulissasoq.
Imm. 2-mut
Siunnersuutip § 1-iani siunissami kommuneqarfinnut agguataarineq aalajangersarneqarpoq, taamaattumik Kalaallit Nunaata nunap immmikkoortuinut kommuneqarfinnullu aggorneqarnera pillugu inatsisartut inatsisaat nr. 11, 30. oktober 1998-imeersoq 31. december 2008-miit kommunit kattussuutsinneqarnerisa atortuulerfianiit atortuujunnaarsinneqarpoq. Oqaatigineqassaaq inatsisip taassuma atortuujunnaarsinneqarnerata kommunit killeqarfiisa nutaat inatsisikkut kingusinnerpaamik 2008-mi ukiakkut ataatsimiinnermi aalajangersarneqarnissaat pisariaqartilermagu, taamaattoqanngippammi inatsit tunngavigalugu taakku oqaatigineqarsinnaassanngimmata, tak. taanna pillugu § 16-imi imm. 2-mi nassuiaatit.