Radiukkut tv-kkullu aallakaatitsisarneq pillugu Inatsisartut peqqussutaat nr. 6, 14. november 2004-imeersoq.
Kalaallit Nunaanni radiukkut fjernsynikkullu aallakaatitsisarneq pillugu inatsit nr. 815, 19. december 1989-imeersoq naapertorlugu aalajangersarneqarput:
Kapitali 1
Aallakaatitassiorsinnaatitaaneq§ 1. Makkua § 2-mi taaneqartunik aallakaatitassiornissamut pisinnaatitaapput:
1) Kalaallit Nunaata Radioa (KNR), tak. kapitali 4.
2) Ingerlatseqatigiiffiit, peqatigiiffiit assigisaallu kiisalu kommunit aallakaatitsisinnaanermut akuersissummik kapitali 3 malillugu tunineqarsimasut.
Imm. 2. Inatsisartut peqqussutaat aammalu Inatsisartut peqqussutaat naapertorlugu aalajangersakkat atuutilersinneqarsimasut kiisalu aallakaatitsisinnaanermut akuersissummik tunineqarnermi piumasaqaatitut nalunaarutigineqarsimasinnaasut naapertorlugit aallakaatitassiortoqartassaaq.§ 2. Aallakaatitassiorneq imatut paasineqassaaq:
1) Radioqarfiit aqqutigalugit tusarnaagassianik isiginnaagassianillu inunnut tamanut aallakaatitsineq.
2) Tusarnaagassianik isiginnaagassianillu nr. 1-imi ilanngullugit taaneqanngitsunik antenneqarfiit ataatsimoorussat iluaqutigalugit agguaanerit.
Imm. 2. Inatsisartut peqqussutaanni matumani radioqarfinnik oqarnermi pineqarput radiukkut attaveqarnermut atortut ledningeqanngitsut suulluunniit.
Imm. 3. Inatsisartut peqqussutaanni matumani antenneqarfinnik ataatsimoorussanik oqarnermi pineqarput antenneqarfiit ataatsimoorussat kabeleqarfiillu allat aallakaatitassianik tusarnaagassanik isiginnaagassanillu ininut privatimik najugaqarfiusunut inunnut tamanut agguaasarnermut atortut.
Imm. 4. Inatsisartut peqqussutaanni matumani kabeleqarfinnik oqarnermi pineqarput kabelit aqqutigalugit nalunaarasuartaatitigut attaveqaqatigiinnermut atortut.§ 3. Nalunaarasuartaatitigut attaveqarneq sullissinerlu pillugit Inatsisartut peqqussutaat naapertorlugu tamanut ammasumik nalunaarasuartaatitigut sullissinermi atortorisanik ingerlatsinermillu kiisalu tamakku suliariumannittussarsiorsinnaanerinut kisermaassisinnaanermik akuersissuteqartup, teknikikkut atortunik KNR-ip §2, imm. 1 naapertorlugu tusarnaagassianik isiginnaagassianillu inunnut tamanut aallakaatitsisarnermini pisariaqartitaanik, KNR-mik isumaqatigiissutit malillugit pilersissavai, atortunillu ingerlatsineq akisussaaffigissallugu.
Imm. 2. Atortunik imm. 1-imi taaneqartunik ikkussuinermut ingerlatsinermullu piumasaqaatit kiffartuussinermik isumaqatigiissutini aalajangersarneqassapput, Naalakkersuisunit akuerineqartussanngorlugit.
Imm. 3. Kiffartuussissutit imm. 1-imi taaneqartut akiisa naatsorsorneqarnissaannut tunngavissat akiliisarnissamullu piumasaqaatit Naalakkersuisut erseqqinnerusumik malittarisassiorssinnaavaat.
Kapitali 2
Tusarnaagassianik isiginnaagassianillu siammarterisarneqTV-ikkut aallakaatitsissutaasinnaasut digitaliusut iluaqutigalugit tusarnaagassianik isiginnaagassianillu siammarterineq
§ 4. Kallaallinit aammalu nunanit allanit tusarnaagassianik isiginnaagassianillu aallakaatitsissutit digitaliusut iluaqutigalugit nuna tamakkerlugu siammarterineq, taamaallaat Naalakkersuisut akuersissuteqarnerisigut pisinnaavoq.
Imm. 2. Naalakkersuisut akuersissummik tunniussinerminnut atatillugu akuersissummut piumasaqaatinik aalajangersaasinnaapput.
Imm. 3. Kisermaassinermut akitsuutit Naalakkersuisunit aalajangerneqartut akilersinnissaannut akuersissuteqartinnissaat Naalakkersuisut piumasarisinnaavaat.
Imm. 4. Naalakkersuisut akuersissummik atorunnaarsitsisinnaapput akuersissummik piginnittup
1) Inatsisartut peqqussutaat imaluunniit aalajangersakkat peqqussut naapertorlugu aalajangersarneqarsimasut unioqqutippagit, unioqqutitsineq annertuppat unioqqutitsinerilluunniit qasseeriarluni akuttunngitsumik pippata, imaluunniit
2) akuersissuteqarnermi piumasaqaatigineqartut sumiginnarpagit.
Imm. 5. Kallaallinit aammalu nunanit allanit tusarnaagassianik isiginnaagassianillu aallakaatitsissutit digitaliusut iluaqutigalugit nuna tamakkerlugu siammarterinemut akuersissummik tunniussisarneq pillugu maleruagassanik Naalakkersuisut aalajangiisinnaapput.
Antenneqarfinni ataatsimoorussani tusarnaagassianik isiginnaagassianillu siammarterisarneq
§ 5. Kalaallinit aammalu nunanit allanit tusarnaagassianik isiginnaagassianillu, antenne iluatigalugu toqqaannartumik tigooqqarneqartunik, imaluunniit kabeleqarfiit aqqutigalugit tigooqqarneqartunik, antenneqarfinni ataatsimoorussani agguaasarneq taamaallaat pissaaq allannguuteqanngitsumik aallakaatitsinerullu peqatigisaanik.
Imm. 2. Taamaattorli allagartalersuineq assigisaalu kiisalu piffissakkut allakkut agguaaneq pisinnaapput radiukkut imaluunniit fjernsynikkut aallakaatitsivik atorneqartoq akuersisimappat.§ 6. Antenneqarfinnik ataatsimoorussanik piginnittut pisussaapput, tusarnaagassiat isiginnaagassiallu radioqarfiit aqqutigalugit KNR-imit siammarterneqartut siaruarternissaat qulakkiissallugu. Tamatumanili pineqanngillat aallakaatitassiat § 29, imm. 1, naapertorlugu aallakaatinneqartut. Pisussaaffik aamma atuutinngilaq KNR-ip aallakaatitai antenneqarfinnik ataatsimoorussanik atuisunit allatut tigoorarneqarsinnaappata.
Imm. 2. KNR-imit aallakaatitassiat digitaliusut taamaallaat siaruarterneqassapput aallakaatitassiat digitaliusut allat antenneqarfimmi siaruarterneqarpata. KNR-imit aallakaatitassiat digitaliusut allanngortinneqarnissaat inerteqqutaavoq, ilutigitillugu aallakaatitassiat assingi digitaliusumik siaruarterneqanngippata.§ 7. Antenneqarfiit marlunnik amerlanerusunik kanaleqarpata aammattaaq kanali ataaseq atugassanngortinneqassaaq nunaqarfigisami aallakaatitassianut kapitali 3 malillugu akuersissut naapertorlugu siammarneqartussanut agguaanneqartussanulluunniit.
Imm. 2. Aallakaatitassiat ataatsimoortut neqeroorutigineqarpata,
1) ataatsimoortut tamarmik aallakaatitassianik imm. 1-imi aamma § 6-imi ilanngunneqartunik imaqassapput, aammalu
2) ataatsimoortut ataasiinnaat, aallakaatitassianik imm. 1-imi aamma § 6-imi ilanngunneqartunik imaqartut imaluunniit aallakaatitassianik taakkuinnarnik aallakaatitassianillu allanik imaqartut pisiarinissaannut periarfissaqassaaq, taakkulu ima killilimmik akeqartillugit akilerneqassapput aallakaatitassiat ilassutaat, aallakaatitassiat ataatsimoortut katillugit akiinut killilimmik naleqassallutik.
Imm. 3. Imm. 2 naapertorlugu pisussaaffik atuutinngilaq aallakaatitassiat pineqartut antenneqarfinnik ataatsimoorussanik atuisunit allatut tigoorarneqarsinnaappata.§ 8. Dekoderit aallakaatitanik ilisarnarunnaarsakkanik allanngortitsilluni tv-kkut aallakaatitanik fjernsynikkut takuteqqeriaannanngortitsissutit antennini ataatsimoorussani atorneqarsinnaanerinut maleruagassanik Naalakkersuit aalajangiisinnaapput. Maleruagassani pissutsit makkua pineqarsinnaapput:
1) Aallakaatitassianik neqerooruteqartut dekoderinik ataatsimoorussanik antenneqarfinni ataatsimoorussani atorneqartunik atuisinnaatitaanerat.
2) Aallakaatitassianik neqerooruteqartut namminerisamik dekoderiminnik atuisinnaatitaanerat.
3) Aallakaatitassianik neqerooruteqartut atuisunut toqqaannartumik akiliisitsisinnaanerat.
Kapitali 3
Aallakaatitsisinnaanermut akuersissut§ 9. Ingerlatseqatigiiffiit, peqatigiiffiit assigisaasaluunniit nuna tamakkerlugu aallakaatitassiornissamut qinnuteqarnerisa kingorna, Naalakkersuisut akuersissut tunniussinnaavaat (nuna tamakkerlugu aallakaatitsisinnaanermut akuersissut) , tak. § 14.
Imm. 2. Naalakkersuisut nuna tamakkerlugu aallakaatitsisinnaanermut akuersissuteqarnerminnut atatillugu akuersissummut, matumani aamma ilanngullugit piffissamik killiliinermut kisermaassinermullu akitsuutit akilernissaannut piumasaqaatinik aalajangiisinnaapput.
Imm. 3. Nuna tamakkerlugu aallakaatitsisinnaanermut akuersissummut piumasaqaatit atugassarititaasullu Naalakkersuisunit erseqqinnerusumik maleruagassiuunneqarsinnaapput, aallakaatitsisinnaanermut akuersissummut akitsuutit akilernissaat ilanngullugit.§ 10. Radio tv-lu pillugit aalajangiisartut, tak. kapitali 6, ingerlatseqatigiiffiit, peqatigiiffiit assigisaasalu kiisalu kommunit qinnuteqaateqarnerisigut nunaqarfigisami aallakaatitsisinnaanermut akuersissuteqarfigisinnaavai (nunaqarfigisami aallakaatitsisinnaanermut akuersissut) tak. § 13.
Imm. 2. Nunaqarfigisap iluani aallakaatitsisinnaanermut akuersissut kommunip pineqartup iluani aallakaatitsisinnaanermut akuersissutaavoq. Pissutsit immikkut illuinnartut atuutsillugit kommunit qanigisat iluanni aamma aallakaatitsisinnaaneq Radio tv-lu pillugit aalajangiisartut aallakaatitsinissamut akuersissummik piginnittumut akuersissutigisinnaavaa.
Imm. 3. Aallakaatitassiamik sumiiffimmi allami aallakaatitsisinnaanermut akuersissummik piginnittumit tassunga ilutigitillugu aallakaatinneqartumik aallakaatitsinissaq taamaallaat ajornanngilaq aallakaatitsisinnaanermut akuersissutinik piginnittut tamanna isumaqatigiissutigippassuk, aammalu aallakaatitassianik assigiinnik ataatsikkut aallakaatitsinerit ataasiakkaaginnaappata.
Imm. 4. Radio tv-lu pillugit aalajangiisartut sumiiffimmi aallakaatitsisinnaanermut akuersissutaagallartumik tunniussinermigut aallakaatitsisinnaaneq akuersissutigisinnaavaa, aallakaatitassiat sumiiffiup iluani piffissap sivikitsup ingerlanerani pisunik ataasiakkaanik imaqarpata.§ 11. Aallakaatitsisinnaanermut akuersissutip aallakaatitsisinnaanermut akuersissutaanermi saniatigut aammattaaq imaraa radiofrekvensit pillugit inatsisip Kalaallit Nunaanni atuutilersinneqarnera pillugu Kunngip peqqussutaa naapertorlugu frekvensimik atuinissamut akuersissut.
Imm. 2. Aallakaatitsisinnaanermut akuersissut piffissami, qaammatisiutit malillugit ukiup akuersissummik tunniussiffiusup sinnerani kiisalu qaammatisiutit malillugit ukiuni taassuma tulliini tallimani atuuttussatut tunniunneqassaaq, aatsaalli piffissamut sivikinnerusumut qinnuteqartoqarsimanngippat. Piffissaq aallakaatitsisinnaanermut akuersissutip atuuffia naappat nutarterneqarnissaa qinnutigineqarsinnaavoq.§ 12. Aallakaatitsisinnaanermut akuersissummik qinnuteqaammi aallakaatitassiat suunerat nassuiarneqassaaq. Aallakaatitassiariniakkap tamakkerlugu suunera nassuiaammi ersersinneqassaaq. Qinnuteqaat paasissutissanik makkuninnga imaqassaaq:
1) Qinnuteqaateqartup aqqa, najugaa, immaqalu oqarasuaatip telefaxillu normui kiisalu e-mail adresse.
2) Qinnuteqaateqartup IIN-normua aamma ingerlatsiveqarfittut normua.
3) Aallakaatitsisinnaanermut akuersissutip qanoq siaruarsinnaatiginera.
4) Sumiiffik aallakaatitat annguffigisinnaasaat.
5) Aallakaatitsisinnaanermut akuersissutip suussusia (radio tv-luunniit).
6) Piginnittunut, siulersugaanermut pisortaqarnermullu tunngasut.
7) Tusagassiuutitut ingerlassanik allanik piginnittuusimagaanni suleqateqaraanniluunniit.
8) Suleqatigiinnissamik pilersaaruteqaraanni.
9) Aallakaatitassiornerup ilusia imarisaalu, aamma oqaatsit agguataagaanerat.
10) Piffissat aallakaatitsiffiit.
11) Aallakaatitassiornerup aningaasalersugaanera.
12) Aallakaatitsinermut aallakaatitassiornermullu atortorissaarutit.
13) Pissutsit, Radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu frekvensimik atuinissamut akuersissummik qinnuteqaatip suliarineqarnissaanut pisariaqartut.
Imm. 2. Qinnuteqaat aallakaatitassiornermut akisussaasumit atsiorneqarsimassaaq.
Imm. 3. Qinnuteqaateqartup akuersissummik tunineqareernermi kingorna paasissutissanut imm. 1-imi taaneqartunut allannguutaasinnaasut Radio tv-lu pillugit ataatsimiititaliamut qaqugukkulluunniit nalunaarutigisassavai.
Imm. 4. Qinnuteqaateqarnermi periusissat pillugit maleruagassat aamma paasissutissanut ilassutissat Naalakkersuisut aalajangersinnaavaat.§ 13. Ingerlatseqatigiiffiit, peqatigiiffiit assigisaasalu sumiiffiup aalajangersimasup iluani aallakaatitsisinnaanerannut akuersissut piumasaqaatit makkua naammassineqarsimappata tunniunneqassaaq:
1) Ingerlatseqatigiiffik, peqatigiiffik assigisaaluunniit Kalaallit Nunaanni angerlarsimaffeqassaaq.
2) Ingerlatseqatigiiffiup, peqatigiiffiup assigisaataluunniit qinnuteqaammi uppernarsaatissanut piumasaqaatit naammassisimassavai, tak. § 12, imm. 1.
3) Aallakaatitassiap ilusia imarisaalu inatsisinik unioqqutitsisutut isigineqartuussanngillat.
4) Radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu frekvensimik atuinissamut akuersissummut piumasaqaatit naammassineqarsimassapput.
Imm. 2. Kommunip aallakaatitsisinnaaneranut akuersissut tunniunneqassaaq imm. 1-imi piumasaqaatit naammassineqarsimappata, aammalu kommunip aallakaatitassiornissamut siunertatuaa tassaappat innuttaasut soqutiginnittut aallakaatitassiornermut aallakaatitsinermullu atortorissaarutinik atugassaqartinnissaat imaluunniit kommunip paasissutissanik ingerlatitsisarnissaa.§ 14. Ingerlatseqatigiiffiit, peqatigiiffiit assigisaasalu nuna tamakkerlugu aallakaatitsisinnaanerannut akuersissut tunniunneqarsinnaavoq piumasaqaatit imaattut naammassineqarsimappata:
1) § 13 , imm. 1-imi piumasaqaatit naammassineqarsimappata.
2) Qinnuteqaateqartoq sumiiffiup aalajangersimasup iluani tassunga ilutigitillugu aallakaatitsisinnaanermut akuersissummik tunineqarsimanngippat.
3) Qinnuteqaateqartup aningaasaqarniarnikkut tunngavia naammaginartuuppat.
4) Qinnuteqaateqartup aallakaatitsinissamut periarfissai naammaginartuuppata.
Imm. 2. Nuna tamakkerlugu aallakaatitsisinnaanermut akuersissummik kommunimut tunniussisoqarsinnaanngilaq.§ 15. KNR-ip akuersissutillu piginnittuata aallakaatitsinerit tamarmik aallakaatitassiornermut akisussaasoqartinneqarnissaat isumagissavaat.
Imm. 2. KNR-ip akuersissutillu piginnittuata isumagissavaat aallakaatitassiat naammassineri tamaasa kia akisussaasimanerata nalunaarutigineqarnissaa, aammalu radioqarfiup tv-qarfiulluunniit suunera paasisitsissutigineqassaaq.
Imm. 3. KNR-ip akuersissutillu piginnittuata ingerlatami aalajangersakkat eqqortinneqarnissaat nakkutigissavaat.§ 16. KNR aamma akuersissutip piginnittua upalungaarsimanissami pingaaruteqartunik innuttaasunut nalunaarutinik aallakaatitaqartarnissamik pisussaapput.
Imm. 2. Imm. 1-imi aallakaatinneqartussat taaneqartut qaqugu qanorlu aallakaatinneqartarnissaat pillugu Naalakkersuisut malittarisassanik aalajangiisinnaapput.§ 17. KNR-ip akuersissutillu piginnittuata aallakaatitassiat tamaasa, maleruagassat Naalakkersuisunit aalajangerneqartut naapertorlugit immiuttassavaat qaammatinilu pingasuni toqqortarisassallugit. Aallakaatitassiorneq pillugu suliamik suliaqarnermut atatillugu, pilerisaarutit aallakaatinneqarsimasut ilanngullugit, Radio tv-lu pillugit aalajangiisartut piginnittoq peqqusinnaavaat aallakaatitassianik immiussat tunniuteqqullugit. Suliassap aallakaatitsinermut tunngasup suliarineqarnera pissutigalugu pisariaqarpat piginnittoq Radio tv-lu pillugit ataatsimiititaliamit peqquneqarsinnaavoq aallakaatitassiat qaammatinit pingasunit sivisunerusumik toqqortareqqullugit.
§ 18. KNR-ip aamma sumiiffinni radioqarfiit tv-qarfiillu kapitali 5 naapertorlugu tapiissutinik pissarsisartut piginneqqaartussaatitaaneq pillugu inatsisip periarfissiinera naapertorlugu innuttaasunut periarfissiissapput aallakaatitassianik toqqortaasivimminni misissuisinnaatillugit, taamaaliornissamut aningaasartuutinut akiliuteqartitsillutik.
§ 19. Radio tv-lu pillugit aalajangiisartut sumiiffimmi aallakaatitsisinnaanermut akuersissut atuukkunnaarallartissinnaavaa atuukkunnaavitsissinnaalluguluunniit, akuersissutip piginnittuata § 13 naapertorlugu aallakaatitsisinnaanermut akuersissuteqarnissamut piumasaqaatit naammassisinnaajunnaarpagit, imaluunniit akuersissutini ukioq ataaseq sinnerlugu atorsimanngippagu.
Imm. 2. Radio tv-lu pillugit aalajangiisartut sumiiffimmi aallakaatitsisinnaanermut akuersissut atuukkunnaarallartissinnaavaa atuukkunnaavitsissinnaalluguluunniit, akuersissutip piginnittuata
1) paragraffit 15-imiit 18-imut, § 17 naapertorlugu peqqussutit nalunaarutigineqartut imaluunniit aalajangersakkat taakku malillugit § 16, imm. 2-mi peqqussutigineqartut sumiginnarpagit,
2) § 12, imm. 3, unioqqutippagu,
3) pilerisaarisarnermut aningaasalersuinermullu maleruagassat unioqqutippagit, tak. kapitali 7,
4) Inatsisartut peqqussutaat imaluunniit aalajangersakkat peqqussut naapertorlugu aalajangersarneqarsimasut unioqqutippagit, unioqqutitsinerit annertuujuppata qasseeriarluniluunniit unioqqutitsineruppata,
5) inatsisit allat ingerlatsinermini annertuumik qasseeriarluniluunniit unioqqutippagit, imaluunniit
6) Radiofrekvensit pillugit inatsisip Kalaallit Nunaanni atuutillersinneqarnera pillugu peqqussut naapertorlugu pinngitsoorani akiliutaasussat akilersimanngippagit.
Imm. 3. Imm. 2-mi taaneqartut pisimatillugit Radio tv-lu pillugit aalajangiisartut inassuteqarneratigut nuna tamakkerlugu aallakaatitsisinnaanermut akuersissut Naalakkersuisut atorunnaarallartissinnaavaat atorunnaavitsissinnaalluguluunniit. Atorunnaarsitsineq pisinnaavoq akuersissutip piginnittuata aallakaatitsisinnaanermut akuersissummik tunineqarnissamut piumasaqaatit naammassisinnaajunnaarpagit, tak. § 14-imi akuersissummut piumasaqaatit, imaluunniit ukioq ataaseq sinnerlugu akuersissut atorneqarsimanngippat.
Kapitali 4
KNRSiunertat suliassallu
§ 20. KNR-ip siunertaraa Kalaallit Nunaanni innuttaasut tamakkerlugit aallakaatitassianik sullissinernillu tamatigoortunik nutaarsiassaqartitsinermut, qaammarsaanermut, ilinniartitsinermut, eqqumiitsuliornermut aliikkusersuinermullu tunngasunik (innuttaasunik kiffartuussinermi pisussaaffiit) tv, radio aamma internet assigisaalluunniit aqqutigalugit pilersorneqarnissaat qulakkiissallugu.
Imm. 2. Aallakaatitassiat suliarilluagaallutillu, tamatigoortuullutillu amerlasuujunissaat anguniarneqassaaq.
Imm. 3. KNR-ip aallakaatitassiai ataatsimut isigalugit Kalaallit Nunaanni inuiaqatigiit tamatigoortumik sammineqarnerannik imaqassapput, tassuunakkullu kulturikkut, inuunermik paasinninnikkut inuunermilu atugassarititaasutigut nunap immikkoortuini assigiinngitsuni atugaasut qanoq assigiinngitsiginerinik takussutissiissallutik.
Imm. 4. Nunap tamavimmi sammineqarnissaa anguniarlugu KNR aallakaatitassiortartullu allat, aamma sumiiffinni radioqarfiit tv-qarfiillu niuernerpalaartumik tunngaveqarlutik erseqqinnerusunik isumaqatigiissuteqassapput, taamaalillutik aallakaatitassiortartut allat sumiiffimminniit nuna tamakkerlugu ingerlatsisumut ilaatigut pilersuisunngorlutik.
Imm. 5. Aallakaatitassiat innuttaasut inuiaqatigiinnut tunngasunik pingaarutilinnik ilisimatinneqarnissaannik oqallinnissaanillu qulakkeerisuussapput.
Imm. 6. Aallakaatitassiatigut aammattaaq eqqumiitsuliornikkut kulturikkullu pilersitsisarnerup tamatiguussusia takussutissaqartinneqassaaq, aallakaatitassianilu inuiaat kalaallit kulturikkut soqutigisaasa amerlasuunut sammissusiat ersersinneqassalluni. KNR-ip kalaallit eqqumiitsuliaannik kulturiannillu, aamma kalaallit kulturikkut kingornussaannik sulissutiginninniartutut ingerlatitseqqinniartutullu inissisimanini pingaartilluinnassavaa.
Imm. 7. KNR-ip aallakaatitassiami aallakaatitanik meeqqanut inuusuttuaqqanullu sammitinneqartut isumagissavai.
Imm. 8. KNR-ip teknikkikkut periarfissat nutaat atorlugit isumaginiassavaa inuit innarluutillit aallakaatitassianik atuisinnaanerannik annertusaanissaq, matumani aamma aallakaatitassiat inuiaqatigiinnut annertuumik soqutiginaatillit sapinngisamik allagartalersugaanissaat ussersornikkulluunniit nutserneqarnissaat anguniassallugu.
Imm. 9. KNR-ip innuttaasuni ikinnerussuteqarlutik kalaallit oqaasiinik ilitsoqqussaralugu oqaaseqartuunngitsut aallakaatitassiamini sapinngisamik annertunerpaamik isumagineqarnissaat qulakkiissavaa.§ 21. KNR-ip aallakaatitassianik meeqqat ukiukinnerit timikkut, tarnikkut ileqqulersornikkulluunniit annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukissornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukissornermik imaqartut imaluunniit isiginnaagassat kanngunartut pillugit KNR-i tusarnaartartunut isiginnaartartunullu mianersoqqusisassaaq.
Imm. 2. KNR-ip aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik, politikkimik isummamik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut aqqutissiueqataasinnaasunik aallakaatitsisoqannginnissaa qulakkiissavaa.§ 22. Aallakaatitassianik aaqqissuussinermi pingaartilluinnarneqassapput naqisimaneqanngitsumik paasissutissiisinnaatitaaneq oqaaseqarsinnaatitaanerlu.
Imm. 2. Innuttaasut KNR aqqutigalugu paasissutissiisinnaanissamut periarfissinneqarnissaat KNR-ip qulakkiissavaa. Tassunga atatillugu KNR aningaasartuutinut akiliuteqartitsilluni tusarnaartartut isiginnaartartullu nammineerlutik aallakaatitassiaminnik ineriartortitsineranni ikiorneqarnissaannik aammalu tusarnaartartut isiginnaartartullu allatut KNR aqqutigalugu saqqummiussisinnaanissaat neqeroorfigisinnaavai.§ 23. Paasissutissiisarnermi tunngaveqarluartarnissaq nakerisarsiortannginnissarlu pingaartinneqassapput.
§ 24. KNR-ip oqaatsit pillugit erseqqissumik anguniagaqarnermigut kalaallit oqaasiisa pigiinnarneqarnissaat ineriartortinneqarnissaallu peqataaffigissavaa.
§ 25. KNR-ip nutaarsiassaqartitsinermik aallakaatitaasa annertunersaasa naammineerluni aallakaatitassiaanissaat KNR-ip qulakkiissavaa, tak. imm. 2.
Imm. 2. Nammineerluni aallakaatitassiat tassaapput radiukkut tv-kkullu aallakaatitassiat aaqqissorneqarsimasut KNR-ip nammineq suliarisimasai aamma aallakaatitassiat aaqqissorneqarsimasut KNR-ip pingaarnertut suliarinnittuulluni aallakaatitassiortartut allat aallakaatitassioqatigalugit suliarisimasai.
Imm. 3. KNR-ip nammineerluni aallakaatitassiaasa saniatigut aallakaatitassiat piniarnerisigut aallakaatitassiortartunillu allanit pisinikkut pissarsiarineqartassapput, tak. § 20, imm. 4. Aallakaatitassiat aamma KNR-ip aallakaatitassiortartullu allat aallakaatitassioqatigiinnerisigut suliarineqarsinnaapput.§ 26. Innuttaasut aallakaatitsineq pillugu tusarniarneqartarnissaat KNR-ip qulakkiissavaa.
§ 27. Pilerisaarutit aallakaatitassiallu aningaasalersorneqartut kapitali 7-imi maleruagassat malillugit aallakaatitsinermi ilaatinneqarsinnaapput.
§ 28. Naalakkersuisut aamma KNR anguniagassat pillugit isumaqatigiissummik piffissaliussaq Naalakkersuisunit aalajangersarneqartoq nallertinnagu isumaqatigiissuteqartassapput ukiut sisamakkuutaarlugit atuuttussamik, tak. paragraffit 20-miit 26-mut (innuttaasunik kiffartuussinermut isumaqatigiissut) innuttaasunik kiffartuussinermi pisussaaffiit annertussusiinik qanorlu ittuunissaannik erseqqinnerusumik aalajangersaaffiusumik, taamaattorli tak. § 61. Isumaqatigiissutit ikinnerpaamik makkuninnga imaqassapput:
1) KNR-ip innuttaasunik kiffartuussinermi ingerlatsinermini aallakaatitsinissamut periarfissaasa qassiuneri pillugit nassuiaatit.
2) KNR-ip piffissami isumaqatigiissuteqarfiusumi ingerlatsinissamini aningaasaqarnikkut atugassarisaasut naatsorsuutigineqartut pillugit nassuiaatit.
3) Nammineerluni aallakaatitassiat ikinnerpaaffissaat nalunaarneqassaaq, tak. § 25, imm. 2.
4) Kalaallisut aallakaatitassiat allat ikinnerpaaffissaat nalunaarneqassaaq, tak. imm. 2.
5) Aallakaatitassiortartunit allanit pisiarineqartussat ikinnerpaaffissaat nalunaarneqassaaq.
6) Aallakaatitassiat nutaarsiassat maannarpiarlu soqutiginartut ikinnerpaaffissaat nalunaarneqassaaq, matumani aamma aallakaatitassiat nutaarsiassat maannarpiarlu soqutiginartut nammineerluni aallakaatitassiat ikinnerpaaffissaat.
7) Eqqumiitsuliorneq kulturilu pillugit aallakaatitassiat ikinnerpaaffissaat nalunaarneqassaaq.
8) Aallakaatitassiat meeqqanut aammalu inuusuttuaqqanut sammitinneqartut ikinnerpaaffissaat nalunaarneqassaaq.
9) Aallakaatitassiat ilinniartitsinermut tunngasut ikinnerpaaffissaat nalunaarneqassaaq.
10) Aallakaatitassiat inuiaqatigiinni assigiinngitsunik oqaasilinnut sammitinneqartut aallakaatitanut assigiinngitsunut agguataarsimasut annertussusiat pillugu nassuiaatit, tak. § 20, imm. 9.
11) Ingerlatsinermi aningaasartuutit tamarmiusut ilaasa akissarsianut atorneqartussat annerpaaffissaat nalunaarneqassaaq.
12) KNR-ip sulisuinik ilinniartitseqqittarnerup ingerlaqqiffiusumillu ilinniartitsinerup qanoq annertutiginissaannik nassuiaat.
13) Allanik aallakaatitsisarnerup allanillu ingerlataqarnerup imarisaat qanorlu annertutigineri pillugit nassuiaatit, tak. § 29.
Imm. 2. Kalaallisut aallakaatitassianik allanik oqarnermi pineqarput radiukkut tv-kkullu aallakaatitassiat aaqqissorneqarsimasut, Kalaallit Nunaanni tv-qarfinnit radioqarfinnilluunniit allanit imaluunniit suliffeqarfinnit aallakaatitassiortartunit allanit Kalaallit Nunaanni angerlarsimaffeqartunit aallakaatitassiarineqarsimasut.
Imm. 3. Nammineerluni aallakaatitassiat, kalaallisut aallakaatitassiat allat, aallakaatitassiortartunit allanit pisiat ikinnerpaaffissaannik aallakaatitassiallu ataasiakkaat suunissaannik aalajangersaanermi aallakaateqqitat, pilerisaarutit aallakaatitassiallu allat aaqqissorneqarsimanngitsut ilaatinneqassanngillat.
Imm. 4. Naalakkersuisut innuttaasunik kiffartuussinermut isumaqatigiissutip imarisai pillugit erseqqinnerusunik malittarisassiorsinnaapput.
Imm. 5. Innuttaasunik kiffartuussinermut isumaqatigiissutip eqquutsinneqarnera pillugu ukiumoortumik nassuiaatit KNR-ip suliaralugillu Naalakkersuisunut aamma Radio tv-lu pillugit ataatsimiititaliamut nassiutissavai. Nassuiaatit nassiunneqarsimaffissaa isumaqatigiissummi aalajangerneqartassaaq.
Imm. 6. Innuttaasunik kiffartuussinermut isumaqatigiissut, taassumalu eqquutsinneqarnera pillugu nassuiaat tamanut saqqummiunneqartassapput.§ 29. KNR allanik aallakaatitassiorsinnaatitaavoq, assersuutigalugu nunanut allanut aallakaatitsinermi aammalu aallakaatitassiornermi aallakaatitsinertiguinnaanngitsoq siammarterneqartussanik. KNR aallakaatitassiornermik allamik, kapitali 3 naapertorlugu akuersissut malillugu, ingerlataqarsinnaanngilaq. Naalakkersuisut aallakaatitassiorneq alla pillugu maleruagassiorsinnaapput.
Imm. 2. KNR aallakaatitassiornermik ingerlataqarnermut atatillugu imaluunniit ingerlatsiviup teknikkikkut atortuisa atorneqarnissaat, immikkut piginnaasaqarnissaq il.il. siunertaralugit allanik ingerlataqarsinnaavoq. Pisariaqartitsineq naapertorlugu KNR sumiiffinni radioqarfinnik tv-qarfinnillu akiliisitsilluni ilitsersuisassaaq.
Imm. 3. Naalakkersuisut ingerlataq alla pillugu maleruagassiorsinnaapput, matumani aamma ingerlatamik allamik suliaqarsinnaanermut killiliussat annertunerulersinneqarnissaat pillugu. Sumiiffinni radioqarfinnik tv-qarfinnillu KNR-ip ilitsersuinera pillugu akiliisitsinermi piumasaqaatit pillugit Naalakkersuisut aalajangersaasinnaapput, tak. imm. 2, 2.
Imm. 4. Akiliisitsisarluni tv KNR-ip allanik aallakaatitassiornerani aamma ingerlataani allami ilaasinnaanngilaq.
Imm. 5. Allanik aallakaatitassiorneq aamma ingerlataq alla unammilleqatigiinnermi atugassarititaasut tunngavigalugit ingerlanneqassaaq.
KNR-ip aaqqissuussaanera
§ 30. KNR pisortat suliffeqarfigaat namminersortoq.
Imm. 2. KNR-ip suliani aalajangiineri suliffeqarfiup ingerlatsineranut tunngassuteqartut, aqutsinikkut oqartussaasunut allanut ingerlateqqinneqarsinnaanngillat. Sulianili tusagassiornermi ileqqorissaarnissaq aammalu akissuteqartarnissaq pillugit KNR-ip aalajangiineri tusagassiuisarnermi akisussaassuseqarneq pillugu inatsimmi maleruagassat naapertorlugit Tusagassiuisarnerit pillugit Aalajangiisartunut ingerlateqqinneqarsinnaapput.§ 31. KNR siulersuisunit arfineq marlunnik ilaasortalimmit aqunneqassaaq, taakkunannga siulersuisut siulittaasuat ilaasortarlu alla ataaseq Naalakkersuisunit toqqarneqartarlutik. Ilaasortat sinneri inassuteqartoqarneratigut Naalakkersuisunit imatut toqqarneqartarput:
1) Ilaasortaq ataaseq sumiiffinni radioqarfiit tv-qarfiillu kattuffiannit aallakaatitassiortartullu namminersortut kattuffeqarpata kattuffiannit inassutigineqartarpoq.
2) Ilaasortaq ataaseq Tusagassiornermik Ilinniarfimmi pisortanit inassutigineqartarpoq.
3) Ilaasortaq ataaseq Kalaallit Nunaanni tusarnaartartut isiginnaartartullu nuna tamakkerlugu kattuffiinit inassutigineqartarpoq.
4) Ilaasortaq ataaseq Kalaallit Nunaanni eqqumiitsuliortut kulturimillu sammisaqartut kattuffiinit inassutigineqartarpoq.
5) Ilaasortaq ataaseq KNR-imi aalajangersimasumik sulisuusunit inassutigineqartarpoq.
Imm. 2. Ilaasortat Kalaallit Nunaanni najugaqartuussapput, 18-inik ukioqalereersimassallutik aammalu Inatsisartuni ilaasortaassanatik.
Imm. 3. Inassuteqarsinnaasunit imm. 1-imi taaneqartunit inassuteqartoqarsimanngippat Naalakkersuisut inassuteqarnertaqanngitsumik ilaasortassamik toqqaassapput. Kalaallit Nunaanni tusarnaartartut isiginnaartartullu nuna tamakkerlugu kattuffeqanngippata ilaasortaq ataaseq KANUKOKA-mit inassutigineqassaaq.
Imm. 4. Siulersuisut tamarmiullutik tusagassiorneq, kultureqarneq, pisortatut aqutsineq inuussutissarsiornerlu paasisimasaqarfigissavaat. Ilaasortat peqqussut naapertorlugu inassuteqarnertaqanngitsumik Naalakkersuisunit toqqarneqartussat tamarmik immikkut pisortatut aqutsineq inuussutissarsiornerlu paasisimasaqarfigissavaat.
Imm. 5. Siulersuisuni ilaasortanut tamanut, siulittaasoq kisiat pinnagu, sinniisussamik toqqaasoqassaaq, taannalu siulersuisunut ilaasortanngussaaq siulersuisunut ilaasortaq pineqartoq tunuarpat, soraarsitaappat sivisuumilluunniit peqanngippat. Sinniisoq toqqarneqarsimasoq siulersuisuni aalajangersimasumik ilaasortanngorpat sinniisussamik nutaamik toqqaasoqassaaq. Siulittaasoq tunuarpat soraarsitaappalluunniit Naalakkersuisut siulittaasumik nutaamik toqqaassapput.
Imm. 6. Siulersuisut akunnerminni siulittaasup tullianik toqqaassapput.
Imm. 7. Ilaasortat ukiuni sisamani atasussatut qinerneqassapput, taamaattorli siullermik piffissamut 1. november 2005-imiit 31. december 2007-imut. Ilaasortat toqqarneqaqqissinnaapput, kisiannili ataasiaannarlutik. Naalakkersuisut siulersuisunut ilaasortaq sinniisussarluunniit aalajangersimasumik ilaasortanngorsimasoq piffissap toqqaaffiup ingerlanerani soraarsissinnaavaat, siulersuisutut akisussaaffini annertuumik sumiginnarpagu allatulluunniit siulersuisuni issianissaminut imminut piukkunnarunnaarsissimappat.
Imm. 8. Siulersuisut akissarsiaqarnissaat aamma siulersuisuni ilaasortat akissaajaatiminnut, matumani ilanngullugit KNR-imik sullissinerminni angalanerminnut, nerisaqarnerminnut ineqarnerminnullu taarsiivigineqarnissaat pillugit Naalakkersuisut maleruagassiorsinnaapput.§ 32. Siulersuisut KNR-ip siulersuisorai qullerpaat, KNR-illu ingerlatsinera pillugu aalajangersakkat malinneqarnissaannut akisussaanerpaajullutik. Siulersuisut taassuma saniatigut akisussaaffigaat KNR-ip ingerlatsinera tamarmiusoq aamma innuttaasunik kiffartuussinermut isumaqatigiissutip eqquutsinneqarnissaa. Siulersuisut ulluinnarni aallakaatitassiorneq aallakaatitassallu ataasiakkaat sunniuteqarfigisussaanngilaat, tak. § 33, imm. 1.
Imm. 2. Siulersuisut KNR-ip ingerlatsineranut maleruagassat nalinginnaasut aalajangersassavaat.
Imm. 3. Siulersuisut pisortamik atorfinitsitsisartuullutillu soraarsitsisartuupput.
Imm. 4. Naalakkersuisut KNR-imi ileqqoreqqusassat pillugit maleruagassanik aalajangersaasinnaapput.§ 33. Pisortaq ulluinnarni aallakaatitassanut akisussaavoq aammalu KNR-ip ulluinnarni allaffitsigut aningaasatigullu aqunneqarnera suliassaralugit. Suliffeqarfiup malittarisassat tamatumunnga tunngasut maleruagassallu siulersuisut aalajangersimasaat malillugit aqunneqarnissaa pisortap qulakkiissavaa.
Imm. 2. Pisortaq KNR-imi suleqataasunik atorfinitsitsisartuullunilu soraarsitsisartuuvoq.§ 34. Atorfinitsitaanerni atugassarititaasut pissutsillu allat, atorfeqarnerup nalaani pissutsit soraarsitaanerillu eqqarsaatigalugit KNR-ip pisussaaffigaa, aalajangersakkat Namminersornerullutik Oqartussani atorfeqartunut qaqugukkulluunniit atuuttut malissallugit.
KNR-ip aningaasalersugaanera
§ 35. KNR-ip ingerlatsinera Nunatta karsianit tapiissutit, pilerisaarutit, aallakaatitassiat aningaasalersorneqartut allatullu ingerlatsisoqarpat tassuunakkut isertitat aqqutigalugit aningaasalersorneqarpoq.
Imm. 2. Nunatta karsianit ukiumoortumik tapiissutit, ukiumut aningaasanut inatsiseqarfiup tullianut aningaasanut inatsisissap akuersissutigineqarneranut atatillugu Inatsisartunit aalajangersarneqartarput.§ 36. Siulersuisut ukiumut aningaasanut inatsiseqarfiup tullianut aningaasatigut missingersuutit Naalakkersuisunut ukiut tamaasa tunniuttassavaat, Naalakkersuisut piffissaliussaat nallertinnagu. Siunnersuutip imarissavai isertitassatut, ingerlatsinermut aningaasartuutissatut sanaartornermullu aningaasartuutissatut naatsorsuutigisat missingersornerat kiisalu ukiut nikinneranni aningaasaatit akiitsullu. Tamatuma peqatigisaanik ukiumi aningaasanut inatsiseqarfimmi taaneqartumi Nunatta karsiata tapiissutissaasa qanoq amerlatiginissaannik siunnersuut siulersuisut tunniuttassavaat.
Imm. 2. Siulersuisut missingersuutinut tamarmiusunut siunnersuummut ilanngullugu aallakaatitassiornermik allamik ingerlatsinissamut imaluunniit allamik ingerlatsinissamut immikkut missingersuutinut, matumani aamma ingerlatanut assigiinngitsunut allanut ataasiakkaanut immikkut missingersuutinut siunnersuutinik tunniussaqartassapput.§ 37. KNR-ip ukioq naatsorsuusiorfia tassaavoq ukioq aningaasanut inatsiseqarfik. Namminersornerullutik Oqartussani aningaasatigut missingersuusiornermut, naatsorsuutinik nalunaarsuinermut naatsorsuutinillu saqqummiussisarnermut malittarisassat qaqugukkulluunniit atuuttut KNR-ip malissavai.
Imm. 2. Naatsorsuutini KNR-ip pisortat sullissinerannik ingerlatsineranut, aallakaatitassiornermik allamik ingerlatsinermut imaluunniit allamik ingerlatsinermut naatsorsuutai immikkut naatsorsuusiorneqarsimassapput, matumani aamma allanik ingerlatsinernut assigiinngitsunut tamanut immikkut naatsorsuutit.
Imm. 3. Naalakkersuisut innuttaasunik kiffartuussinermi ingerlatsinerup aallakaatitassiornermillu allamik ingerlatsinerup aamma allamik ingerlatsinerup missingersuutitigut naatsorsuutitigullu immikkoortinneqarnissaat pillugu maleruagassanik aalajangersaasinnaapput.
Imm. 4. Ukiumoortumik naatsorsuutit Namminersornerullutik Oqartussat kukkunersiuisuinit kukkunersiorneqartassapput.
Imm. 5. Piffissaliussaq Naalakkersuisunit aalajangerneqartoq tikitsinnagu, ukiumoortumik naatsorsuutit kukkunersiorneqarsimasut siulersuisunit akuerineqarsimasut, kukkunersiuisut oqaaseqaataannik ilaqartillugit siulersuisunit Naalakkersuisunut akuersissutigisassatut saqqummiunneqartassapput. Naalakkersuisut ukiumoortumik naatsorsuutit tamatuma kingorna Inatsisartunut ilisimatitsissutitut ingerlateqqissavaat.
Imm. 6. Siulersuisut naatsorsuutinik Naalakkersuisunut saqqummiussinertik ilutigalugu naatsorsuutit tamanut saqqummiutissavaat.
Kapitali 5
Sumiiffinni radioqarfinnut tv-qarfinnullu tapiissutit§ 38. Naalakkersuisut tunngaviusumik tapiissutinik tapiiffigineqarnissamik qinnuteqaateqartoqartillugu aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfinnut tv-qarfinnullu piumasaqaatinik makkuninnga naammassinnittunut tunngaviusumik tapiissuteqartassapput:
1) Aallakaatitsivik aallakaatitsisinnaanermut akuersissummik atuuttumik peqassaaq.
2) Aallakaatitsiviup missingersuutit, naatsorsuutit kukkunersiuisoqarnerlu pillugit Namminersornerullutik Oqartussat maleruagassiaat eqquutsissavai.
3) Aallakaatitsiviup aallakaatitassiornermik ingerlatsinermut uppernarsaatit pillugit Namminersornerullutik Oqartussat maleruagassiaat eqquutsissavai.
4) Aallakaatitsiviup sumiiffimmi innuttaasut sumiiffimmi nutaarsiassanik ilisimatittassavai.
5) Aallakaatitsiviup sumiiffimmi innuttaasut oqaaseqarnissamut periarfissaqartissavai.
6) Aallakaatitsiviup aallakaatitassiornermik ingerlatsinermini ilaatigut aallakaatissavai siammartissallugilluunniit aallakaatitassiat aaqqissorneqarsimasut, allakaatitsiviup nammineerluni suliai imaluunniit aallakaatitsiviup aallakaatitassiornermik ingerlatsivimmik allamik suleqateqarluni pingaarnertut aallakaatitassiortuulluni suliai (nammineerluni aallakaatitassiat). Aallakaatitseqqinnerit, ussassaarutit aallakaatitassiallu aaqqissuunneqarsimanngitsut nammineerluni aallakaatitassiatut isigineqanngillat.
7) Aallakaatitsiviup aallakaatitassianik meeqqat ukiukinnerit timikkut, tarnikkut ileqqulersornikkulluunniit annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukissornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukissornermik imaqartut imaluunniit isiginnaagassat kanngunartut pillugit aallakaatitsivik tusarnaartartunut isiginnaartartunullu mianersoqqusisassaaq.
8) Aallakaatitsiviup aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut, politikkikkut isummanik aqqutissiueqataasinnaasunik aallakaatitsisoqannginnissaa qulakkiissavaa.
Imm. 2. Piumasaqaatit imm. 1, nr. 4-miit 6-imut taaneqartut qanoq annertutiginissaasa ikinnerpaaffissaat pillugit maleruagassat Naalakkersuisunit aalajangersarneqarsinnaapput.
Imm. 3. Tapiissutit qaammatit pingasukkuutaartumik siumoortumik tunniunneqartassapput.
Imm. 4. Tapiissutinik pissarsisup aallakaatitassiornermik ingerlatsinermi allannguutit, imm. 1-imi piumasaqaatinik naammassinnikkunnaarnermik kinguneqartut Naalakkersuisunut nalunaarutigisussaavai.
Imm. 5. Tapiissutinik pissarsisup aallakaatitsinermik ingerlataqarnini, piffissaliussaq Naalakkersuisunit aalajangerneqartoq nallertinnagu ukiumoortumik naatsorsuutitigut kiisalu ukiumoortumik nalunaarutikkut nassuiaatigisassavaa.§ 39. Naalakkersuisut aallakaatitassiornissamut tapiissutinik tapiiffigineqarnissamik qinnuteqaateqartoqartillugu aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfinnut tv-qarfinnullu, tunngaviusumik tapiissutinik tapiiffigineqarnissamik piumasaqaatinik aamma nammineerluni aallakaatitassiat aalajangersimasut ikinnerpaaffissaannik piumasaqaatitut Naalakkersuisut aalajangersimasaannik naammassinnittunut taamatut tapiissuteqartassapput, tak. imm. 2.
Imm. 2. Nammineerluni aallakaatitassiat qanoq ittut aallakaatitassiornermut tapiissutinik tapiiffigineqarsinnaanerat pillugu maleruagassat Naalakkersuisut aalajangersassavaat, aammalu aallakaatitassiornermut tapiissutit, matumani aamma tapiissutit annertussusiinik ataasiakkaanik pisinnaanermut piumasaqaatit pillugit maleruagassat aalajangersarsinnaallugit.
Imm. 3. Aallakaatitassiornermut tapiissutit qaammatit pingasukkuutaartumik tunniunneqassapput qinnuteqaateqartup qaammatip pingasukkuutaap taassuma siuliani nammineerluni aallakaatitassiarisimasaasa annertussusii tunngavigalugit. Aallakaateqqitat, pilerisaarutit aallakaatitallu allat aaqqissorneqanngitsut nammineerluni aallakaatitassiat naatsorsorneqarneranni ilaassanngillat.
Imm. 4. Tapiissutinik pissarsisup nammineerluni aallakaatitassiornermik ingerlataqarnini, piffissaliussaq Naalakkersuisunit aalajangerneqartoq nallertinnagu ukiumoortumik naatsorsuutitigut ukiumoortumillu nalunaarutikkut nassuiaatigisassavaa.§ 40. Naalakkersuisut aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfiit tv-qarfiillu kattuffiannut, kattuffiup ingerlanneqarneranut tapiissutinik kiisalu aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfiit tv-qarfiillu sulisuisa ilinniarteqqinneqartarnerannik ingerlaqqiffiusumillu ilinniartinneqarnerannik ineriartortitsinermut tapiissuteqartassapput.
§ 41. Tunngaviusumik tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisoq
1) tunngaviusumik tapiissutinik tapiiffigineqarnissamik qinnuteqaateqarnermini eqqunngitsunik paasissutissiisimappat,
2) aallakaatitassiornermik ingerlataqarnermi annertuumik allannguutit nalunaarutigisimanngippagit, tak. 38, imm. 4,
3) aallakaatitassiornermik ingerlataqarnini pillugu nassuiaammik piffissaliussatut aalajangersarneqartup iluani tunniussaqarsimanngippat, tak. 38, imm. 5, imaluunniit
4) aallakaatitsisinnaanermut akuersissummik tunineqarnissamut piumasaqaatinik naammassinnikkunnaarsimappat, tak. § 13.
Imm. 2. Aallakaatitassiornermut tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisoq
1) aallakaatitassiornermut tapiissutinik tapiiffigineqarnissamik qinnuteqaateqarnermini eqqunngitsunik paasissutissiisimappat,
2) nammineerluni aallakaatitassiornini pillugu nassuiaammik piffissaliussatut aalajangersarneqartup iluani tunniussaqarsimanngippat, tak. 39, imm. 4, imaluunniit
3) aallakaatitsisinnaanermut akuersissummik tunineqarnissamut piumasaqaatinik naammassinnikkunnaarsimappat, tak. § 13.
Imm. 3. Tunngaviusumik tapiissutit, aallakaatitassiornermut tapiissutit aamma sumiiffinni radioqarfiit tv-qarfiillu kattuffiata ingerlanneqarneranut tapiissutit kiisalu ilinniartitseqqinnermut ingerlaqqiffiusumillu ilinniartitsinermut tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisup tapiissutit aningaasaliissutigineqarneranni siunertaannit allaanerusunut atorsimappagit.§ 42. Naalakkersuisut tunngaviusumik aamma aallakaatitassiornermut tapiissutit kiisalu tapiissutit § 40-mi taaneqartut, matumani ilanngullugit qinnuteqaat, naatsorsuutit utertitsinissarlu pillugit erseqqinnerusunik maleruagassiorsinnaapput.
Imm. 2. Naalakkersuisut isumagisassanngortitsinerminni radio tv-lu pillugit aalajangiisartut kattuffilluunniit sumiiffinni radioqarfiit tv-qarfiillu sinniisigisaat tamakkiisumik ilaannakuusumilluunniit peqqusinnaavaat, tunngaviusumik aamma aallakaatitassiornermut tapiissutit kiisalu ilinniartitseqqinnermut ingerlaqqiffiusumillu ilinniartitsinermut tapiissutit pillugit maleruagassanik isumaginneqqullugit. Naalakkersuisut tapiissutit isumagineqarnerat pillugu isumaginnittussatut piginnaatitsinermut maleruagassanik aalajangersaasinnaapput.
Imm. 3. Aningaasat tunngaviusumik aamma aallakaatitassiornermut tapiissutitut atunngitsoorneqartut ilinniartitseqqinnermut ingerlaqqiffiusumillu ilinniartitsinermut tapiissutitut Naalakkersuisunit atorneqarsinnaapput, tak. § 40, imm. 1. Tapiissutinik allaffissornikkut aqutsineq allamut isumagisassanngortinneqarsimappat, taamatut piginnaatinneqartup tunngaviusumik aamma aallakaatitassiornermut tapiissutit atunngitsoorneqartut ilinniartitseqqinnermut ingerlaqqiffiusumillu ilinniartitsinermut tapiissutitut atorsinnaavai.
Kapitali 6
Radio tv-lu pillugit aalajangiisartut§ 43. Naalakkersuisut aalajangiisartut, Radio tv-lu pillugit aalajangiisartut radiumi tv-milu suliassanik arlalinnik samminnittuusussaq pilersissavaat, tak. paragraffit 44-miit 46-mut. Aalajangiisartut ukiuni sisamani atasussatut pilersinneqassaaq, siullermik piffissamut 1. januar 2005-imiit 31. december 2008-mut.
Imm. 2. Aalajangiisartut pingasunik ilaasortaqassaaq, taakkualu tamarmiullutik ingerlatsinermut, inuussutissarsiornermut, tusagassiornermut kulturimullu tunngasunik ilisimasaqassapput. Ilaasortat Kalaallit Nunaanni najugaqartuussapput, Inatsisartuni ilaasortaassanatik, KNR-ip, Sinerissami Takusassiiviit Tusagassiiviillu Kattuffiata (STTK) STTK-lluunniit ilaasortaasa arlaanni siulersuisuini ilaasortaassanatik taakkunaniluunniit sulisuussanatik.
Imm. 3. Suleqatigisat attuumassuteqartut ilaasortassatut siunnersuutissaannik piniareerlutik Naalakkersuisut aalajangiisartut ilaasortassaanik toqqaasassapput. Naalakkersuisut aalajangiisartut siulittaasua toqqassavaat.
Imm. 4. Naalakkersuisut aalajangiisartut oqaaseqartereerunikkut aalajangiisartut suleriaasissaa pillugu maleruagassat aalajangersassavaat.
Imm. 5. Naalakkersuisut aalajangiisartut allattoqarnissaa isumagissavaat.
Imm. 6. Aalajangiisartut ingerlatani pillugit ukiumoortumik nalunaarusiamik Naalakkersuisunut tunniussaqartassaaq.§ 44. Radio tv-lu pillugit aalajangiisartut suliassai pingaarnerit makkuupput:
1) Sumiiffimmi aallakaatitsisinnaanermut akuersissutinik tunniussisarneq.
2) Sumiiffimmi aallakaatitsisinnaanermut akuersissutinik atorunnaarsitsisarneq aamma nuna tamakkerlugu aallakaatitsisinnaanermut akuersissutinik atorunnaarsitsinissaq pillugu Naalakkersuisunut inassuteqartarneq.
3) KNR-ip innuttaasunik kiffartuussinermut isumaqatiissutip eqquutsinneqarneranik ukiumoortumik nassuiaataanik misissuataarisarnissaq, Naalakkersuisunullu tamanna pillugu oqaaseqaasiornissaq.
4) Suliassat pilerisaarutinut aallakaatitallu aningaasalersorneqarnerannut tunngasut aalajangiiffigisarnerat il.il., tak. § 46.
5) KNR-ip aamma radioqarfiit tv-qarfiillu allat, radiukkut tv-kkullu aallakaatitsisarneq pillugu maleruagassanik malinninnissaannik nakkutilliinissaq, tassunga ilanngullugit Inatsisartut peqqussutaannik, inatsisartut peqqussutaat naapertorlugu aalajangersakkanik akuersissuteqarnissamullu piumasaqaatinik unioqqutitsisoqartillugu assuarliutit.
6) Radio tv-lu pillugit apeqqutini Naalakkersuisut siunnersortassallugit.
Imm. 2. Radio tv-lu pillugit aalajangiisartut isumagissavaa attuumassuteqanngitsut avataaneersut tusarnaartartunut isiginnaartartunullu tunngatillugu makkuninnga misissuisinneqartarnissaat
1) radiukkut tv-kkullu aallakaatitsineq pillugu kissaatit aamma
2) nuna tamakkerlugu aamma sumiiffinni radioqarfiit tv-qarfiillu aallakaatittagaannik aammalu radiukkut tv-kkullu neqeroorutinik allanik atuineq.
Imm. 3. Naalakkersuisut Radio tv-lu pillugit aalajangiisartut allanik suliakkersorsinnaavaat.§ 45. Radio tv-lu pillugit aalajangiisartut aalajangiiffigisassavai sumiiffinni aallakaatitsisinnaanermut akuersissutinik tunniussinissaq atuukkunnaarsitsinissarlu.
§ 46. Pilerisaarutinut aallakaatitassianullu aningaasalersorneqartunut tunngatillugu Radio tv-lu pillugit aalajangiisartut suliassai makkuupput:
1) Paragraffit 50-imiit 55-imut aamma § 53 naapertorlugi
2) § 52 naapertorlugu radiukkut tv-kkullu pilerisaarutit imarisassaat aalajangiisartut aalajangiiffigisassavai. Aalajangiisartut maleruagassat unioqqutinneqarnerat assuarliutigisinnaavai aammalu KNR aamma aallakaatitsisarnissamut akuersissuteqartoq peqqusinnaallugit aalajangiinerup tamanut saqqummiunneqarnissaanik. Aalajangiisartut aalajangiiffigisinnaavaa tamanna qanoq iliornikkut qanorlu iluseqarluni pinissaa.
3) Paasissutissat immikkut illuinnartut pilerisaarutitigut aallakaatinneqartut pillugit aalajangiisartut akissuteqarnissamut aalajangiissaaq. Akissuteqarnissamut piumasaqaataavoq, paasissutissat aningaasaqarnikkut imaluunniit allatigut pingaaruteqartumik ajoqusiinissamut peqqusissutaasinnaanerat, ilumuussusiisalu nalorninaatsuunissaat. Aalajangiisartut KNR aamma aallakaatitsisarnissamut akuersissuteqartoq akissuteqarnissamut peqqusinnaavai. Aalajangiisartut aalajangiiffigisinnaavai akissuteqarnissap imarisassaa, ilusissaa inissinneqarnissaalu.
4) Paragraffit 54 aamma 55 naapertorlugit aningaasaliisut aallakaatitassianillu aningaasaliisut suussusersineqarnissaat aalajangiisartut aalajangiiffigissavai.§ 47. Radio tv-lu pillugit aalajangiisartut aalajangiineri pisortaqarfinnut allanut ingerlateqqinneqarsinnaanngillat.
§ 48. Radio tv-lu pillugit aalajangiisartut suliassaminik isumaginninnissamini KNR aamma aallakaatitsisinnaanermut akuersissummik piginnittoq suliffeqarfiup ingerlanneqarnera pillugu paasissutissanik piumasaqarfigisinnaavaa.
§ 49. Radio tv-lu pillugit aalajangiisartut ingerlatsinera Naalakkersuisut malittarisassiuussinnaavaat, tassunga ilanngullugit aalajangiisartut suliassai, ilusissaa ukiumullu nalunaarusiami missingersuutit naatsorsuutillu imarisassaat.
Kapitali 7
Pilerisaarutit aallakaatitanillu aningaasalersuisarneq§ 50. Radiumi tv-milu pilerisaarutit imatut paasineqassapput:
1) Nioqqutissanut, kiffartuussinernut suliffeqarfiillu iluanaarniarnissamik siunertaqartut kaammattuutit nersorinninnerillu, qanorluunniit aallakaatitassiamut akiliuteqartoqarsimagaluarpat.
2) Aningaasarsiornikkut soqutigisaqaqatigiit pillugit ilisimatitsissutit isummanillu saqqummiussinerit, assersuutigalugu inuussutissarsiuteqartut kattuffii, sulisitsisut kattuffii sulisartullu peqatigiiffii pillugit aammalu upperisarsiornikkut paasissutissiinerit politikkikkulluunniit isummiussat, peqatigiit taakkua isumaasa siuarsarneqarnissaat kaammattuutigineqarnissaallu siunertaralugit, qanorluunniit aallakaatitassiamut akiliuteqartoqarsimagaluarpat.
Imm. 2. Pilerisaarutit ilumut taamaattuunerat uppernarsarneqarsinnaasariaqarpoq, taamaalilluni imarisaat saqqummiunneqariaasiallu aallakaatitanit nalinginnaasunit allaanerulluni.§ 51. Tv-kkut, tekst-tv kisiat pinnagu, pilerisaarutit sivisunerpaamik minutsinik tallimanik sivisussusilikkuutaamik taamaallaat aallakaatinneqarsinnaapput. Reklamit taakku aallakaatitanut akunniliullugit inissinneqassapput.
Imm. 2. Radiukkut pilerisaarutit KNR-imi taamaallaat sivisunerpaamik minutsinik tallimanik sivisussusilikkuutaamik aallakaatinneqarsinnaapput, aallakaatitanullu akunniliussatut inissinneqassallutik.
Imm. 3. Pilerisaarutinik aallakaatitsinerit piffissap ullormut aallakaatitsiviusup 10 procentiinit sivisunerussanngillat.§ 52. Nakorsaatit, tupat, immiaaqqat, viinnit imigassallu kimittuut pilerisaarutinut ilanngunneqaqqusaanngillat, taamaattorli tak. imm. 3.
Imm. 2. Aamma upperisarsiornermik suliaqartut aamma politikkikkut partiit, kattusseqatigiit, kattuffiit kisimiillutillu qinigassanngortittut tv-kkut pilerisaarutinut ilanngunneqaqqusaanngillat, taamaattorli tak. imm. 3.
Imm. 3. Naalakkersuisut imm. 1-imi 2-milu inerteqqutit avaqqunneqarsinnaaneri pillugit maleruagassiorsinnaapput.§ 53. Pilerisaarutit aallakaatitassiornermi qanoq ittumik ilanngunneqartarnissaat Naalakkersuisut malittarisassiuussinnaavaat, matumani ilanngullugit pilerisaarutit suunerannik uppernarsaanermut, inissisimanerannut, oqaasiinut imarisaannullu aammalu qanoq annertussuseqarnissaannut maleruagassat. Tamatumunnga atatillugu pilerisaarutit meeqqanut sammitinneqartut inissinneqarnissaannut aamma nioqqutissat meeqqanut tunngasut pillugit pilerisaarutinut tunngasut Naalakkersuisut malittarisassiuussinnaavaat.
§ 54. Aallakaatitassianut aningaasalersuisarnermut ilaapput inuup ingerlatsiviulluunniit radiukkut tv-kkulluunniit aallakaatitassianik, filminik il.il. aallakaatitsinermik aallakaatitassiornermilluunniit ingerlataqartuunngitsup, atermi, ilisarnaatimi (logo), kinaassutsimi, ingerlatami nioqqutissiamiluunniit ilisimaneqarnerulernissaa siunertaralugu radiukkut tv-kkulluunniit aallakaatitassiat, matumani aamma tekst-tv-mi takutitat toqqaannartumik toqqaannanngitsumilluunniit aningaasalersorneqarnerannut tapiissutai suulluunniit.
Imm. 2. Aallakaatitap aningaasalersugaanera aallakaatitap aallartinnerani, naanerani aallakaatitalluunniit nalinginnaasumik unillatsiarfiini imaluunniit taaneqartut arlaanni arlalinni tapiissuteqartup aqqata ilisarnaataataluunniit (logo) nalunaarneqarneratigut ilisarnarsisinneqarsinnaasariaqarpoq. Tamakkuali aallakaatitami imminermi nalunaarneqassanngillat. Taamaattorli tekst-tv-mi takutitani ataasiakkaani, imm. 1 naapertorlugu tapiiffigineqartuni tapiissuteqartup aqqa ilisarnaataaluunniit (logo) nalunaarneqassapput.
Imm. 3. Aallakaatitap aningaasalersorneqartup imarisaa qanorlu saqqummiunneqarnera tapiissuteqartumit imatut sunniuteqarfigineqassanngilaq, radioqarfiup tv-qarfiulluunniit aallakaatitanut tunngatillugu aaqqissuussinikkut nammineersinnaaneranut malunniutissalluni.
Imm. 4. Aallakaatitassiat inuup ingerlatsiviulluunniit immiaaqqanik, viinninik imigassanillu kimittuunik, tupanit nioqqutissianik nioqqutissanilluunniit pujortarnermut atatillugu atorneqarnerusartunik aammalu nakorsaatinik tunisassiornissamik tuniniaanissamillu pingaarnertut ingerlataqartup aningaasalersugai aallakaatinneqaqqusaanngillat, taamaattorli tak. imm 8.
Imm. 5. Aallakaatitassiat upperisarsiornermik suliaqartunit aamma politikkikkut partiinit, kattuffinnit kisimiillutillu qinigassanngortittunit aningaasalersorneqartut aallakaatinneqaqqusaanngillat, taamaattorli tak. imm. 7 aamma 8.
Imm. 6. Aallakaatitassiat nutaarsiassanik maannarpiarlu soqutiginartunik imallit aningaasalersorneqartut aallakaatinneqaqqusaanngillat.
Imm. 7. Radioqarfiit tv-qarfiillu tapiissutinik pissarsineq ajortut imm. 5-imi pineqanngillat.
Imm. 8. Naalakkersuisut imm. 4-mi 5-imilu inerteqqutit avaqqunneqarsinnaaneri pillugit maleruagassiorsinnaapput.§ 55. Aningaasalersuisarnerit aallakaatitassiornermik ingerlatsinermi qanoq ittumik ilanngunneqarsinnaanerannut maleruagassat erseqqinnerusut Naalakkersuisunit aalajangersarneqarsinnaapput.
§ 56. Pilerisaarutit ilanngunneqartut aallakaatitassiallu aningaasaliiffigineqartut pillugit naammagittaalliuutit, tak. § 46, ilanngunneqartup aallakaatinneqartulluunniit aallakaatinneqareerneratigut sapaatip akunneri sisamat qaangiutsinnagit Radio tv-lu pillugit ataatsimiititaliamit tiguneqareersimassapput.
Imm. 2. Radio tv-lu pillugit aalajangiisartut suliassanik nammineerluni suliassanngortitsinissani aalajangersinnaavaa.
Imm. 3. Naalakkersuisut pilerisaarutit aallakaatitanillu aningaasalersuisarneq pillugit sulianik naammagittaalliuuteqartarneq pillugu maleruagassanik aalajangersaasinnaapput.
Kapitali 8
Misileraanerit aamma pineqaatissiinerit§ 57. Misileraanerit Inatsisartut peqqussutaanni aalajangersakkat periarfissiinerat naapertorlugu ingerlanneqarnissaat Naalakkersuisut akuersissutigisinnaavaat.
§ 58. Dekoderinik imaluunniit dekoderinut atortunik allanik, radiukkut tv-kkulluunniit aallakaatitap ilisarnarunnaarsarneqarsimasup (kodet) imarisaanik pisortanit akuerisaanngitsumik pissarsinissamut atugassanik sananissaq, eqqussuinissaq, tuniniaanissaq, ikkussinissaq, peqarnissaq allanngortitsinissarluunniit inerteqqutaapput. Atortut tamakkua takoqqusaarutiginissaat allatulluunniit pilerisaarutini ilanngunneqarnissaat inerteqqutaavoq.
§ 59. Akiliisinneqarsinnaavoq
1) § 1-imut akerliusumik tusarnaagassanik isiginnaagassanillu aallakaatitassiortoq,
2) tusarnaagassianik isiginnaagassianillu § 4, imm. 1-imut imaluunniit § 4, imm. 2 aamma 3 malillugit piumasaqaatinut akerliusunik, aallakaatitsissutit digitaliusut aqqutigalugit siammarterisoq,
3) tusarnaagassianik isiginnaagassianillu paragraffinut 5-imiit 7-imut akerliusumik antenneqarfiit ataatsimoorussat atorlugit siammarterisoq,
4) aningaasaliissutigineqartunit allaanerusumik siunertanut allanut tapiissutinik atuisoq,
5) § 46, imm. 1, nr. 1 malillugu aalajangikkamik sumiginnaasoq,
6) naqqiissuteqarnissamik aalajangiinermik sumiginnaasoq, tak. § 46, imm. 1, nr. 2, imaluunniit
7) § 6-imik, § 7, imm. 1-imik 2-millu, paragraffinik 15-imiit 18-imut, paragraffinik 50-imiit 51-imut, § 52, imm. 1-imiit 2-mut, § 48, § 54, imm. 2-miit 6-imut, § 58-imik imaluunniit § 17 naapertorlugu peqqussummik unioqqutitsisoq.
Imm. 2. § 8-mi, § 12-imi, imm. 4-mi, § 16-imi, imm. 2-mi, 38, imm. 2-mi, § 39, imm. 2-mi, § 42, imm. 1-imi, § 53-imi aamma § 55-imi inassutinik unioqqutitsinerit akiliisussanngortitsissutaasinnaapput.
Imm. 3. Aktietigut ingerlatseqatigiiffiit, piginneqatigiilluni ingerlatseqatigiiffiit, peqatigiiffiit assigisaalluunniit pillaammik akiliisussanngortinneqarsinnaapput. Kommuni kommunilluunniit suleqatigiiffiat il.il. pillaammik akiliisussanngortinneqarsinnaapput.
Kapitali 9
Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkat§ 60. Inatsisartut peqqussutaat ulloq 1. januar 2005-imiit atuutilissaaq. Tassunga ilutigitillugu Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq atuukkunnaarsinneqassaaq, taamaattorli tak. imm. 3.
Imm. 2. Malittarisassat radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq naapertorlugu aalajangersarneqartut atuutiinnassapput, Inatsisartut peqqussutaani matumani allaniluunniit tunngavissaqarluni maleruagassat aalajangersarneqartut allamik taarserneqarnissaasa imaluunniit atuukkunnaarsinneqarnissaasa tungaannut.
Imm. 3. Radiukkut fjernsynikkullu aallakaatitsisarneq pillugu Namminersornerullutik Oqartussat nalunaarutaat nr. 34, 26. november 1991-imeersoq maleruagassallu tassunga aalajangersakkat naapertorlugit sumiiffinni radioqarfinnut tv-qarfinnullu, Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq naapertorlugu akuersissuteqarfigineqartunut atuuppoq, taakkua Inatsisartut peqqussutaat manna naapertorlugu aallakaatitsisarnissamut akuersissuteqarfigineqarnissamik tungaannut. Suliassat Radio tv-lu pillugit naammagittaalliuuteqartarfimmut isumagisassanngortinneqarsimasut januarip aallaqqaataanit 2005-imiit Radio tv-lu pillugit ataatsimiititaliamit isumagineqalissapput, taamaattorli tak. § 64.§ 61. Naalakkersuisut KNR-illu anguniagassat pillugit isumaqatigiissutissaat, tak. § 28, siullerpaameerluni isumaqatigiissutigineqassaaq piffissamut 1. januar 2006-imiit 31. december 2008-imut, taavalu kingorna 1. januar 2009 aallarnerfigalugu ukiut sisamakkuutaartumik.
§ 62. Radiukkut fjernsynikkullu aallakaatitsisarneq pillugu Inatsisartut peqqussutaanni nr. 3-mi, 17. maj 1990-imeersumi maleruagassat naapertorlugit siulersuisut toqqarneqartut, 1. november 2005-imi nutaamik siulersuisussanik toqqaanissap tungaanut atuutissapput.
§ 63. Akuersissutit radiukkut fjernsynikkullu aallakaatitsisarneq pillugu Namminersornerullutik Oqartussat nalunaarutaat nr. 34, 26. november 1991-imeersoq naapertorlugu sumiiffinni radioqarfinnut tv-qarfinnullu tunniunneqarsimasut ulloq akuersissutip atorunnaarfissaatut aalajangerneqarsimasoq tikillugu atuutissapput, taamaattorli tak. imm. 2.
Imm. 2. Inatsisartut peqqussutaanni matumani kapitali 5 naapertorlugu tapiissutit tunniunneqarnissaannut piumasaqaataavoq, qinnuteqartup aallakaatitsisinnaanermut akuersissummik kapitali 5-imi maleruagassat malillugit tunineqarsimanissaa.§ 64. Naammagittaalliuutit 1. januar 2005 nallertinnagu Radio tv-lu pillugit naammagittaalliuuteqartarfimmut anngunneqartut, Radio tv-lu pillugit naammagittaalliuuteqartarfimmit inaarneqassapput Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq peqqussullu taanna naapertorlugu maleruagassat aalajangersarneqartut naapertorlugit inaarlugit naammassineqassapput.
§ 65. Inatsisartut peqqussutaat radiukkut tv-kkullu ingerlatsinernut danskit amerikamiullu sakkutooqarfiini (Pituffik), Kalaallit Nunaata illersorneqarnissaa pillugu 27. april 1951-imi isumaqatigiissut naapertorlugu pilersinneqarsimasuni amerikamiunit ingerlanneqartunut atuutinngilaq.
Namminersornerullutik Oqartussat, ulloq 14. november 2004
Hans Enoksen/
Henriette Rasmussen
Isumaliutissiissut (Aappassaaneerinninneq)
Akissuteqaat (Aappassaaneerinninneq)
Aappassaaneerinninnermut allannguutissatut siunnersuut (akuerineqartoq)
Akissuteqaat (Pingajussaaneerinninneq)
Pingajussaaneerinninnermut allannguutissatut siunnersuut (akuerineqartoq)