22. september 2004

UKA 2004/38

 

NAQQIUT
(3. august 2004-imik ullulerneqarsimasoq siunnersuut taarserpaa)

 

Peqqussutissatut siunnersuummut oqaaseqaatit

 

Oqaaseqaatit nalinginnaasut

1) Aallaqqaasiut.

a) Peqqussutissatut siunnersuutip imarisai pingaarnerit:

Radiukkut tv-kkullu aallakaatitsisarneq pillugu Inatsisartut peqqussutaattut siunnersuutip radiukkut fjernsynikkullu aallakaatitsisarneq pillugu peqqussut maanna atuuttoq (Inatsisartut peqqussutaat nr. 3, 17. maj 1990-imeersoq kingusinnerusukkut allannguuteqartartoq) taarsissavaa.

Peqqussutissatut siunnersuutip siunertai pingaarnerit makkuupput:

 

Siunertat pingaarnerit:

1) Radiukkut tv-kkullu aallakaatitassiat assigiinngiiaarnerunissaannik tunngavissiinissaq, innuttaasut oqaaseqarsinnaatitaanerat paasissutissiisinnaatitaanerallu tamat oqartussaaqataaneranni pingaarluinnartuusut tassuunakkut isumagiumallugit.
2) Inuiaat kalaallit kulturiannik, ileqquinik kinaassusiannillu atajuartitseqataanissaq ineriartortitseqataanissarlu.
3) Radiukkut tv-kkullu tusagassiuuteqarnerup inuussutissarsiutitut ineriartortinneqarnissaanut periarfissanik pitsaanerusunik pilersitsinissaq.
4) KNR-ip, sumiiffinni radioqarfiit tv-qarfiillu aamma aallakaatitassiortartut allat radiukkut tv-kkullu aallakaatitassianik aallakaatitassiornermi aallakaatitsinermilu suleqatigiinnerulernissaat anguniarlugu.


KNR-imut tunngatillugu:

1) KNR-ip pisortat sullissinerannik ingerlatsineranik pitsaanerulersitsinissaq.
2) KNR-ip pisortat sullissinerannik isumaginnittuunermini periarfissaanik pitsanngorsaanissaq.
3) KNR-ip allanik aallakaatitassiornermik allanillu ingerlatsinermik suliaqarnermini periarfissaanik pitsanngorsaanissaq.
4) KNR-ip aqunneqarneranik pitsaanerulersitsinissaq.
5) Aningaasaliisartut KNR-ip naammassisassaatut ilimasuutaasa KNR-illu taakkuninnga piviusunngortitsinissamut periarfissaasa ataqatigiinnerulersinnissaat.
6) Innuttaasut KNR-ip ingerlatsineranut kissaataasa KNR-illu ingerlatsinerata ataqatigiinnerulersinnissaat.
7) KNR-ip ingerlatsinerata ersinnerulersinnissaa uppernarsaatissaqarnerulersinnissaalu.


Sumiiffinni radioqarfinnut tv-qarfinnullu tunngatillugu:

1) Sumiiffinni radioqarfiit tv-qarfiillu aallakaatitassiornermik ingerlatsinerinik pitsaanerulersitsinissaq.
2) Sumiiffinni radioqarfiit tv-qarfiillu aallakaatitassiornermik ingerlatsinerminni periarfissaannik naammaginartunngortitsinissaq.
3) Sumiiffinni radioqarfiit tv-qarfiillu aallakaatitassiornermik ingerlatsinerisa allanillu ingerlatsinerisa ersinnerulersinnissaat uppernarsaatissaqarnerulersinnissaallu.


Allaffissornikkut aqutsinermut tunngatillugu:

1) Aallakaatitsisinnaanermut akuersissutinut tunngatillugu suleriaatsimik pitsaanerulersitsinissaq, pisariinnerulersitsinissaq eqaannerulersitsinissarlu.
2) KNR-ip sumiiffinnilu radioqarfiit tv-qarfiillu peqqussummik malinninnerannik nakkutilliinerup pitsaanerulersinnissaa.
3) Radiumut tv-mullu tunngasut pillugit ilisimasaqarluartunik siunnersuisoqalernissamik aqqutissiuussinissaq.
4) Allaffissornikkut aqutsinermik nakkutilliinermillu suliat Namminersornerullutik Oqartussanit allamut nuunneqarnissaannik kissaateqarneq.


Siunnersuutip imarisai:

Siunnersuutip imarisai makkuupput:
Kapitali 1 Tusarnaagassanik isiginnaagassanillu aallakaatitassiorneq
Kapitali 2 Aallakaatitanik tusarnaagassanik isiginnaagassanillu siammarterineq
Kapitali 3 Aallakaatitsisinnaanermut akuersissut
Kapitali 4 KNR
Kapitali 5 Sumiiffinni radioqarfinnut tv-qarfinnullu tapiissutit
Kapitali 6 Radio tv-lu pillugit ataatsimiititaliaq
Kapitali 7 Pilerisaarisarnermut aallakaatitanillu aningaasalersuisarneq
Kapitali 8 Misileraanerit aamma pineqaatissiinerit
Kapitali 9 Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkat


Siunnersuut peqqussummut maanna atuuttumut sanilliulluni arlaqartutigut annertuumik allaassuteqarpoq. Nutaartaasut annertunersaat peqqussummut maanna atuuttumut sanilliullugit makkuupput:

KNR-imut tunngatillugu:

KNR-ip pisortat sullissineranni pisussaaffii annertuumik amerlisinneqarlutillu erseqqissarneqarput, soorlu

1) nunap tamavimmi sammineqarnissaa anguniarlugu aallakaatitassiortartunik allanik atuinissamik pisussaaffik,
2) eqqumiitsuliornermik kulturimillu pingaartitsilluinnarnissaq,
3) meeqqanik inuusuttuaqqanillu pingaartitsilluinnarnissaq,
4) innarluutillit aallakaatitassianik atuisinnaanerannik pingaartitsilluinnarnissaq,
5) inuiaqatigiinni allamiut oqaasiinik assigiinngitsunik oqaaseqartunik sapinngisamik annertunerpaamik isumaginninnissaq,
6) aallakaatitassianik ajoqusiisinnaasunik assigiinngisitsisinnaasunillu aallakaatitsinissamik inerteqqut,
7) innuttaasut oqaaseqarsinnaatitaanerannik pingaartitsilluinnarnissaq,
8) KNR-ip kalaallit oqaasiinut tunngatillugu pingaaruteqarneranik mianerinnilluinnarnissaq,
9) aallakaatitassiat nutaarsiassanik imallit nammineerluni aallakaatitassiarineqartut amerlasuujunissaannik piumasaqaat, aamma
10) innuttaasut aallakaatitassiornermik ingerlatsineq pillugu tusarniarneqartarnissaannik piumasaqaat.

Naalakkersuisut KNR-illu anguniagassat pillugit isumaqatigiissummik ukiut sisamakkuutaartumik atuuttussamik, pisortat sullissineranni pisussaaffiit qanoq annertutiginissaannik qanorlu ittuunissaannik imaqartumik (pisortat sullissinerannik isumaqatigiissummik) isumaqatigiissuteqartalernissaannik piumasaqaammik atuutilersitsisoqassaaq. Aamma isumaqatigiissutip minnerpaamik sunik imaqarnissaa pillugu aalajangersakkat peqqussutikkut aalajangersarneqartut atuutilersinniarneqarput.

Siulersuisut nutaamik katitigaanissaat siunnersuutaavoq, siulersuisut ilaatigut suliamik ilisimasaqartuunissaat ilaatigullu aqutsinermik inuussutissarsiornermillu ilisimasaqartuunissaat tassuunakkut anguniarneqarluni, tassa politikkikkut toqqaasarnermut taarsiullugu kissaatigineqarmat siulersuisut piginnaasaqarluartuunissaat.

Siulersuisut aamma pisortap suliassaat erseqqissarneqarput.

Atorfinitsitsisartuuneq allanngortinneqarpoq. Pisortaq sulisorisanik tamanik atorfinitsitsisartuussaaq.

Allamik ingerlataqarnikkut isertinneqartartut amerlanerulernissaannut periarfissat annertunerulersinneqarput. Taakku pisortat sullissinerannik ingerlatsinermut aamma allamik ingerlataqarnermut missingersuutit naatsorsuutillu immikkoortinneqarnissaannik piumasaqaammut ilaapput.


Radioqarfinnut tv-qarfinnullu allanut tunngatillugu:

Aallakaatitsisinnaanermut akuersissutit pillugit maleruagassat nutaat, soorlu

1) nuna tamakkerlugu aallakaatitsisinnaanermut (Naalakkersuisut) aamma sumiiffimmi aallakaatitsisinnaanermut (Radio tv-lu pillugit ataatsimiititaliaq) akuersissutinik tunniussaqartartussat agguataarneqarnerat,
2) aallakaatitsisinnaanermut akuersissummi aamma ilaavoq frekvensimik atuisinnaanermut akuersissut (periaaseq pisariillisarneqarluni),
3) aallakaatitsisinnaanermut akuersissutit peqqussutikkut aalajangersarneqartumik killiligaanerat,
4) sumiiffinni aallakaatitsiviit aallakaatitseqatigiissinnaanerannut maleruagassat qasukkarneqarput,
5) kommunit aallakaatitsisinnaanermut akuersissutinik tunineqarsinnaanerannut piumasaqaatit erseqqissarneqarput,
6) piumasaqaatinik peqqussummi aalajangersarneqartunik naammassinninnermi aallakaatitsisinnaanermut akuersissummik tunineqarnissaq piumasarineqarsinnaalerpoq,
7) nuna tamakkerlugu aallakaatitsisinnaanermut akuersissut Naalakkersuisut nalileereerlutik tunniuttassavaat, aamma akuersissuteqarfigineqarnermut akiliutissamik akileeqqusisinnaaneq ilanngullugu.

Sumiiffinni radioqarfiit tv-qarfiillu tapiiffigineqartarnerat pillugu maleruagassanik atuutilersitsineq, soorlu

1) radioqarfinnut tunngaviusumik tapiissutit,
2) tv-qarfinnut tunngaviusumik aamma aallakaatitassiornissamut tapiissutit,
3) aallakaatitsiviit kattuffiata ingerlanneqarneranut tapiissutit,
4) aallakaatitsiviit sulisuisa ilinniarteqqinneqartarnerannut ingerlaqqiffiusumillu ilinniaqqittarnerannut tapiissutit,
5) tapiissutit allaffeqarfikkut isumagineqartarnerisa Radio tv-lu pillugit ataatsimiititaliamut aallakaatitsiviilluunniit kattuffiannut isumagisassanngortinneqarnissaat.


Radio tv-lu pillugit ataatsimiititaliamut tunngatillugu:

Allaffeqarfikkut aqutsinermi ataatsimiititaliamik nutaamik pilersitsisoqassaaq allaffeqarfikkut aqutsinermik, nakkutilliinermik siunnersuinermillu suliaqartussamik, matumani aamma

1) aallakaatitsisinnaanermut akuersissutinik tunniussisarneq atorunnaarsitsisarnerlu,
2) pilerisaarisarnermut aallakaatitassianillu aningaasalersuisarneq pillugit suliassani aalajangiisarneq,
3) KNR-ip pisortat sullissinerannik isumaqatigiissutip eqquutsinneqarnera pillugu ukiumoortumik nassuiaataanik misissuataarineq, Naalakkersuisunullu taanna pillugu oqaaseqaateqartarneq,
4) KNR-ip aallakaatitsiviillu allat radiukkut tv-kkullu aallakaatitsisarneq pillugu peqqussummik malinninnerannik nakkutilliineq,
5) peqqussumik, aalajangersakkanik peqqussut naapertorlugu aalajangersarneqartunik aamma akuersissutinut piumasaqaatinik unioqqutitsinerit assuarisarnissaat,
6) Naalakkersuisut radio tv-lu pillugit apeqqutini siunnersortarnissaat,
7) Attuumassuteqanngitsut avataaneersut tusarnaartartunut isiginnaartartunullu tunngasunik misissuisittarnissaat.

Ataatsimiititaliaq pingasunik ilaasortaqarpoq, suleqatit attuumassuteqartut ilaasortassanik siunnersuuteqartereernerisigut Naalakkersuisunit ukiuni sisamani atasussatut toqqarneqartartut.


b) Peqqussutissamut siunnersuutip tunngavii pingaarnerit:

Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq Folketingip inatsit nutaaq piginnaatitsissut, Kalaallit Nunaanni radiukkut fjernsynikkullu aallakaatitsisarneq pillugu inatsit nr. 815, 19. december 1989-imeersoq akuerereermagu piviusunngortinneqarpoq. Inatsisip taassuma atuutilersinneqarnerani siunertaavoq Namminersornerullutik Oqartussat, Kalaallit Nunaanni radiukkut fjernsynikkullu aallakaatitsisarneq pillugu malittarisassanik aalajangersaanissamut sapinngisamik annertunerpaamik piginnaatinneqarnissaat.

Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersoq tamatuma kingorna arlaleriarlugu allanngortinneqartarpoq, kingullerpaamik Radiukkut fjernsynikkullu aallakaatitsisarneq pillugu Inatsisartut peqqussutaata allanngortinneqarnera pillugu Inatsisartut peqqussutaatigut nr. 1, 20. februar 1998-imeersukkut (KNR-ip siulersuisuisa akissarsisinneqartarnerat pillugu). Tassa imaappoq peqqussut maanna atuuttoq atuunnermini tamakkiisumik nutarteriffigineqartarsimanngilaq.

Teknikkikkut ineriartorneq innuttaasut nutaanik periarfissaqalernerannik neqeroorfigineqalernerannillu nassataqarsimavoq. Soorlu satellitsi aqqutigalugu aallakaatitassiat siaruarterneqartarnerat innuttaasunut assigiinngitsunik nutaanik neqerooruteqalernermik kinguneqarsimavoq. Aallakaatitseriaatsip taassuma kinguneraa nunami maani aqutsinerup naleqqussarneqartariaqarnera, tassa satellitsi aqqutigalugu siammarterinerup nunap inatsisitigut oqartussaaffiata avataaniinnera ilaatigut pissutigalugu. Aammattaaq digital atorlugu aallakaatitassiornerup aallakaatitsinerullu ineriartornerat periarfissanik nutaanik arlaqartunik nassataqartussaavoq.

Peqqussutip tamakkerluni nutarterneqarnissaa Naalakkersuisut aamma tusagassiornermik ingerlataqartut, pingaartumik KNR-ip sumiiffinnilu radioqarfiit tv-qarfiillu pisariaqartuutissimavaat. Tassunga ilaatigut patsisaapput teknikkikkut ineriartornerup kingunerisaanik allanngortitsinissat naleqqussaanissallu pisariaqartinneqarsimanerat, minnerunngitsumilli aamma pissutsit allat kingunerisaannik allannguinissat naleqqussaanissallu.


c) Inatsisip piareersarnerani immikkoortut pingaarnerit:

Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik (KIIIP) tusagassiuuteqarneq pillugu 1998-imi upernaakkut isumasioqatigiissitsivoq nutarterinermut matumunnga aallarniutaasumik. Tusagassiuuteqarneq pillugu isumasioqatigiissitsinerup kingorna "Tusagassiuuteqarneq pillugu nassuiaat" suliarineqarpoq 1999-imilu Naalakkersuisunut Inatsisartunullu saqqummiunneqarluni. Tamatuma kingorna qulaajaalluni sulineq tusagassiuuteqarneq pillugu suleqatigiissitaliani tallimani pisortaqarfimmilu ingerlanneqarpoq. Tamanna tunngavigalugu nutaamik peqqussutissatut siunnersuutaagallartoq KIIIP-imit suliarineqarpoq tusagassiuuteqarnermik suliaqartunut tusarniaassutigineqarallarluni kiisalu Inatsisartut Kultureqarnermut Ilinniartitaanermullu ataatsimiititaliaannut 2002-mi julimi ilisimatitsissutigineqarluni.

Tusarniaagallarnermut uiggiullugu KNR-ip aamma sinerissami takusassiiviit tusagassiiviillu kattuffiata SSTK-p sinniisuutitaasa peqataaffigisaannik KNR-ip 2003-mi majimi isumasioqatigiissitsinerani siunnersuut oqaluuserineqarpoq, aammalu tamatuma kingorna siunnersuut pisortaqarfiup, KNR-ip STTK-llu arlaleriarlutik ataatsimiissutigisarsimallugu. Taamaammat maanna siunnersuutigineqartoq KNR-imik STTK-millu peqateqarluni oqaloqatiginnissutigilluareerlugu suliaavoq. Kiisalu aamma siunnersuut tusarniaaneq sioqqullugu KNR-ip siulersuisuinut saqqummiunneqarlunilu nassuiarneqarpoq, taakkulu taamaalillutik siunnersuummut tunngatillugu apeqquteqarsinnaasimallutillu ingerlaannaq oqaaseqaateqarsinnaasimapput.

Siunnersuut tamatuma kingorna tusarniaassutigineqarpoq piffissami 4. februar 2004-miit 25. februar 2004-mut.

Tusarniaanermi akissutit tiguneqartut tunngavigalugit Naalakkersuisut aalajangerpaat peqqussutissatut siunnersuutip saqqummiunneqarnissaata Inatsisartut 2004-mi ukiakkut ataatsimiinnissaannut kinguartinneqarnissaa. Tusarniaanermi akissutigineqartut ilanngullugit suliarineqareermata siunnersuut piffissami 1.-15. juni 2004 tikillugu nutaamik tusarniaassutigineqarpoq.

 

2) Siunnersuummi immikkoortut pingaarnerit pillugit nassuiaat:

Inatsisartut peqqussutaata qulequtaani "fjernsyn" "tv"-mik taarserneqarpoq, taannami ullumikkut oqaatsinik atuinermut naapertuunneruvoq aammalu oqaatsit ullumikkut atugaasut nalinginnaanerpaat ilagalugu.

Siunnersuummi aalajangersakkani pineqarput radiukkut tv-kkullu aallakaatitsisarneq, tassa aalajangersakkani ataasiakkaani taakkununngalu oqaaseqaatini allamik allassimasoqanngippat.

Peqqussummi maannamutuulli taamaallaat radiukkut tv-kkullu aallakaatitassiorneq pineqarpoq. Assigiimmik ingerlajartorneq, tassa imaappoq radiup, tv-p, oqarasuaatip, internetip qarasaasiatigullu teknologip ataatsimuuleriartornerat, ilaatigut pisortat sullissineranni aallakaatitseriaatsinik nutaanik innuttaasunut neqerooruteqarsinnaanissanik ammaassisoq peqqussutissatut siunnersuummi sapinngisaq naapertorlugu ilaatinniarneqarpoq.

Pisortat sullissineranni ingerlatsineq aamma Internetikkut toqqaannartumik ingerlatsinermik ilaneqarpoq. Teknikkikkut ineriartorneq eqqarsaatigalugu aammattaaq allatut, tassa radio, tv aamma internet kisiisa aqqutiginagit aallakaatitsisinnaaneq ammaanneqarpoq.

Peqqussutissatut siunnersuut inatsisinut allanut tunngasunut makkununnga ilaatigut attuumassuteqarpoq: Nalunaarasuartaateqarneq/frekvens pillugit inatsit, aamma Radiofrekvensit pillugit inatsisip Kalaallit Nunaanni atortuulersinneqarnera pillugu peqqussut, piginneqqaartussaatitaanermik inatsit aamma tusagassiuuteqarnermi akisussaaneq pillugu inatsit. Aalajangersakkanut ataasiakkaanut oqaaseqaatit innersuussutigineqarput.

Tamatuma saniatigut eqqartukkanut assigiinngitsunut agguataarilluni oqaaseqaatit makku ilanngunneqassapput:

KNR-imut tunngatillugu:

1) Pisortat sullissineranni pisussaaffiit annertusarneqarneri erseqqissarneqarnerilu:

KNR-ip pisortat sullissineranni pisussaaffii maanna Inatsisartut peqqussutaanni atuuttumi § 8, imm. 1-imi aalajangersagaapput, tassani imaattunik allassimasoqarluni: "KNR pisortat suliffeqarfigaat namminersortoq, pisussaasoq radiofoniikkut fjernsynikkullu aallakaatitassianik nutaarsiassaqartitsinermut, qaammarsaanermut, aliikkusersuinermut eqqumiitsuliornermullu tunngasunik aallakaatitsisarnissamut. Aallakaatitassianik aaqqissuussinermi pingaartinneqassapput naqisimaneqanngitsumik paasissutissiisinnaatitaaneq oqaaseqarsinnaatitaanerlu. Aallakaatitassiat suliarilluagaallutillu, tamatigoortuullutillu amerlasuujusarnissaat anguniarneqassaaq. Paasissutissiisarnermi tunngaveqarluartarnissaq nakerisarsiortannginnissarlu pingaartinneqassapput".

Tusagassiuuteqarneq pillugu nassuiaammi imaattoqarpoq, pisortat sullissinerannik oqartarnerup tamakkerluni nalileqqinneqarnissaa pisariaqarsorinartoq, matumani ilanngullugit isummerfigineqassallutik oqaaseq siunissami qanoq nassuiarneqartassanersoq, ingerlatsiviit suut pisussaaffinnik sunik isumagisassaqassanersut, tamakkualu isumagineqarnissaannut aningaasatigut tunngavissat qanoq qulakkeerneqassanersut. Aammattaaq oqaatigineqarpoq pisortat sullissinerannik oqartarnermi ilaatinneqartut erseqqissarneqarnissaat pisariaqartoq, nassuiaatit pingaarnersiukkanut immikkoortiternerisigut piviusunngortinneqarsinnaasariaqartut, aammalu minnerpaaffissanut piumasaqaatit aalajangersarneqartariaqartut. Kiisalu oqaatigineqarpoq isiginnaartartut tusarnaartartullu pillugit ingerlaavartumik misissuisarnissat neqeroorutigineqartut pitsaanerulernissaannik aammalu aallakaatinneqartartut inuiaqatigiit pisariaqartitaannut naapertuuttuunissaannik qulakkeerisuujuassasut.

Aammalu peqqussutissatut siunnersuummi nutaatut nassuiarneqarpoq pisortat sullissineranni pisussaaffiit qanoq paasisariaqarnersut. Tamatuma saniatigut pisortat sullissinerisa pisussaaffiinik annertuumik piorsaasoqarpoq erseqqissaasoqarlunilu. Taakkua pillugit qulaani siunnersuutip imarisaata nassuiarneqarnera pillugu aallaqqaasiut innersuussutigineqarpoq

Pisortat sullissineranni pisussaaffiit annertusarneqarnerat erseqqissarneqarnerallu KNR-ip Naalakkersuisullu anguniagassat pillugit isumaqatigiissutinik ukiuni sisamani atuuttartussanik isumaqatigiissuteqartarnissaannik pisussaaffinnik aammalu anguniagassat pillugit isumaqatigiissutit taakku minnerpaamik sunik imaqarnissaannik piumasaqaatinik peqqussummi aalajangersaasoqarnissaanik atuutilersitsinermut attuumassuteqartinneqassapput. Tassa imaappoq minnerpaaffissanut piumasaqaatit taakku pisortat sullissineranni pisussaaffinnut ataasiakkaanut tunngassuteqarput.

Pisortat sullissineranni pisussaaffiit ataasiakkaat tunngavii siunertaallu pillugit aalajangersakkanut oqaaseqaatit innersuussutigineqarput.

2) Anguniagassat pillugit isumaqatigiissuteqartoqarnissaanik piumasaqaat isumaqatigiissutillu imarisaat pillugit aalajangersakkat:

Inatsisartut peqqussutaanni maanna atuuttumi anguniagassat pillugit isumaqatigiissuteqartoqarnissaanut piumasaqaatinut pisortallu sullissineranni naatsorsuutinut maleruagassanik aalajangersaasoqanngilaq.

Tusagassiuutit pillugit nassuiaammi kaammattuutigineqarpoq pisortat aningaasaliissutaasa sumut atorneqartarnerisa aammalu sunik angusaqarfiusarnerisa pisortanit paasineqarnissaat siunertaralugu pisariaqartoq, pisortat sullissineranni aallakaatitsiviit pisortat sullissineranni naatsorsuutinik akuttunngitsumik suliaqartarnissamik pisussaaffilerneqarnissaat isumaliutigineqartariaqartoq, tassani pineqarlutik pisortat sullissineranni pisusaaffinnik aalajangersarneqarsimasunik naammassinninnissap qanoq annertutigisumik eqquutsinneqarsimaneranik naatsorsuutit. Tassunga uiggiullugu oqaatigineqarpoq taamatut naatsorsuusiorsinnaanissami aallakaatitassiortartut anguniagassaat erseqqissut uuttuutigineqarsinnaasullu allattorneqarsimanissaat pisariaqassasoq, tassuunakkut pisortat sullissineranni naatsorsuusiornissamik piumasaqaatit pisortallu sullissineranni pisussaaffiit sanilliunneqarsinnaasunngorlugit piviusunngortinneqarsinnaasunngorlugillu.

Siunnersuutip § 28-anni ukiunut sisamanut atuuttussamik anguniagassat pillugit isumaqatigiissusiortoqartalernissaa siunniunneqarpoq, Naalakkersuisut KNR-illu akornanni isumaqatigiissutaasussamik. Anguniagassat pillugit isumaqatigiissutip KNR-ip pisortat sullissineranni pisussaaffiisa qanoq annertutiginissaat qanorlu ittuunissaat erseqqinnerusumik aalajangersaavigissavaa, taamaattumillu aamma pisortat sullissinerat pillugu isumaqatigiissummik taaneqartarpoq. § 28-missaaq anguniagassat pillugit isumaqatigiissutip ikinnerpaamik qanoq amerlatigisunik imaqarnissaanik aalajangersaasoqarpoq. Aammattaaq pisortat sullissinerannik isumaqatigiissutip eqquutsinneqarnera pillugu ukiumoortumik nassuiaat KNR-ip suliarisassavaa. Nassuiaat Naalakkersuisunut aamma Radio tv-lu pillugit ataatsimiititaliamut siunnersuutigineqartumut nassiunneqartassaaq.

Anguniagassat pillugit isumaqatigiissutip siunertai pingaarnerit tassaapput aningaasaliisartut naammassisassatut ilimasuutaasa KNR-illu taakkuninnga piviusunngortitsinissamut periarfissaasa ataqatigiinnerulersinnissaat. Aammattaaq anguniagassat pillugit isumaqatigiissummik atuutilersitsinikkut naatsorsuutigineqarpoq KNR-ip ingerlatsinerata ersinnerulersinnissaa uppernarsaatissaqarnerulersinnissaalu. Tassa anguniagassat pillugit isumaqatigiissut tassaavoq, aningaasaliissutinik akuersissuteqarnerup aallakaatitanik aalajangersimasunik il.il. aallakaatitsisarnissamik taakkulu minnerpaaffissaannik politikkikkut piumasaqaammik ilaqartinneqarnissaanut sakkussaq. Anguniagassalli pillugit isumaqatigiissut KNR-ip ulluinnarni aallakaatitassianik pilersaarusiorneranik, aallakaatittagaanik aallakaatitaanillu ataasiakkaanik sunniinissamut periarfissiinngilaq.

3) Siulersuisut katitigaanerat nutaaq:

Siulersuisut maleruagassat maanna atuuttut malillugit ima katitigaapput siulersuisut qulingiluanik ilaasortaqarlutik. Siulittaasoq Naalakkersuisunit toqqarneqartarluni, ilaasortallu tallimat Inatsisartut inassuteqarnerisigut Naalakkersuisunit toqqarneqartarlutik. Ilaasortaq ataaseq Sinerissami Takusassiiviit Tusagassiiviillu Kattuffiata inassuteqarneratigut Naalakkersuisunit toqqarneqartarpoq, ilaasortaq ataaseq KNR-ip nunap immikkoortuini aalajangersimasumik sulisuisa inassuteqarnerisigut Naalakkersuisunit toqqarneqartarluni ilaasortarlu ataaseq KNR-ip qitiusumik immikkoortortaqarfiani aalajangersimasumik sulisuusut inassuteqarnerisigut Naalakkersuisunit toqqarneqartarluni. Siulersuisut tamarmiullutik tusagassiuuteqarnermut, kulturimut, aqutsinermut inuussutissarsiornermullu tunngasunik ilisimasaqartuussapput.

KNR pisortat suliffeqarfigaat angingaatsiartoq annertuunik akisussaaffilik aammalu aningaasaqarnikkut annertuumik akisussaaffilik, tamannalu pissutigalugu suliffeqarfiup aqunneqarnerata pitsaanerulersinnissaa kissaatiginartinneqarpoq. Tamanna siulersuisut piginnaasaqarluartunngortinnerisigut siullermik qulakkeerniarneqarpoq.

Siulersuisut katitigaanerisa nutarterneqarnissaanik siunnersuummi siullertut anguniagaavoq siulersuisut ikilinissaat, tassami siulersuisut arfineq-marlunnik ilaasortaqarlutik katitigaanissaat siunnersuutaammat. Tassuunakkut sunniuteqarsinnaanerunissaat naatsorsuutigineqarpoq. Siulittaasoq Naalakkersuisunit maannamutuut toqqarneqartassaaq. Taassuma saniatigut siunniussaavoq Naalakkersuisut inassuteqartoqarneratigut ilaasortassanik maannamutuut toqqaasarnissaat. Tassa imaappoq ilaasortaq ataaseq KNR-imi aalajangersimasumik sulisuusunit inassutigineqartassaaq. Ilaasortaq ataaseq Kalaallit Nunaanni isiginnaartartut tusarnaartartullu nuna tamakkerlugu kattuffiinit inassutigineqartassaaq, ilaasortaq ataaseq Tusagassiornermik Ilinniarfimmi pisortanit toqqarneqartassalluni, ilaasortaq ataaseq sumiiffinni radioqarfiit tv-qarfiillu kattuffiannit aallakaatitassiortartullu namminersortut kattuffeqarpata kattuffiannit toqqarneqartassalluni aammalu ilaasortaq ataaseq Kalaallit Nunaanni eqqumiitsuliortut kulturimillu sammisaqartut nuna tamakkerlugu kattuffiinit toqqarneqartassalluni. Tassuunakkut ilaatigut qulakkeerneqassaaq sulisuusut sunniuteqaqataanissaat, atuisut sunniuteqaqataanissaat aammalu tusagassiornermik kulturimillu ilisimasaqartoqarnissaa. Ilaasortassaq kingulleq ataaseq Naalakkersuisunit toqqarneqartassaaq, taannalu siulittaasoq assigalugu aqutsinermut inuussutissarsiornermulluunniit tunngasunik ilisimasaqartuussaaq. Tassunga ilutigitillugu siulersuisut, Inatsisartut inassuteqarnerisigut Naalakkersuisut ilaasortassanik toqqaasarnerisigut politikkikkut akuuffigineqarnerat atorunnaassaaq. Siulersuisut tamarmiullutik maannamutuut tusagassiuutinut, kulturimut, aqutsinermut inuussutissarsiornermullu tunngasunik ilisimasaqartuusassapput.

4) Siulersuisut aammalu pisortap suliassaannik erseqqissaaneq:

Maleruagassat atuuttut naapertorlugit siulersuisut suliassaat Inatsisartut peqqussutaanni § 11, imm. 1-3-mi atuarneqarsinnaapput.

Imm. 1-imi atuarneqarsinnaavoq, siulersuisut tassaasut KNR-ip siulersuisui qullerpaat, akisussaanerpaallu KNR-ip ingerlatsinera pillugu aalajangersakkat malinnissaannut.

Imm. 1-imi aalajangersarneqarpoq, KNR-ip ingerlatsineranut maleruagassat nalinginnaasut siulersuisut aalajangigassarigaat.

Imm. 3-mi aalajangersarneqarpoq, siulersuisut tassaasut direktørimik KNR-illu ulluinnarni siulersorneqarneranut ilaasortat allat atorfinitsitsisinnaasut soraarsitsisinnaasullu.

Inatsisartut peqqussutaanni § 12-imi maleruagassat naapertorlugit direktørip suliassai aalajangersarneqarput. Tassani atuarneqarsinnaavoq, direktøri ulluinnarni aallakaatittakkanut akisussaasoq KNR-illu allaffeqarnikkut aningaasatigullu ulluinnarni siulersorneqarneranik nakkutigisaqartuusoq. Direktørip isumagissavaa suliffiup taassuma siulersorneqarnissaa tamanna pillugu malittarisassat maleruagassiallu siulersuisunit aalajangersarneqartut malillugit.

Siulersuisut aammalu pisortap suliassaasa erseqqissarneqarnissaat pisariaqartuutinneqarpoq. Matumani aamma siulersuisut ulluinnarni aallakaatitassiornermut aallakaatitassianulluunniit ataasiakkaanut maannamutuut akuliussinnaannginnerat erseqqissarneqarpoq.

Naalakkiisarnermi aqqutit oqartussaasunullu tunngassuteqartut qulakkeerumallugit ulluinnarnilu aqutsisut direktørimut tatiginninnerat nukittorsarumallugu, atorfinitsitsisarnermi oqartussaanerup allannguuteqartinneqarnissaa aammattaaq siunnersuutigineqarpoq.

Siunnersuummi aalajangiunneqarpoq, pisortap KNI-p sulisuisa sinnerinik atorfinitsitsisarnissamut oqartussaaffilerneqassasoq, tassunga ilanngullugit ulluinnarni aqutsisut ilaasortaat.

Siunnersuutip § 32-anni, imm. 1-imi oqaaseqatigiinni siullerni ilanngunneqarpoq, siulersuisut akisussaaffigaat KNR-ip ingerlatsinera tamarmiusoq aamma pisortat sullissinerannik isumaqatigiissutip eqquutsinneqarnissaa. Taamatuttaaq siunnersuutip § 32-anni, imm. 2-mi oqaaseqatigiit aappaanni aalajangersarneqarpoq, siulersuisut ulluinnarni aallakaatitassiorneq aallakaatitassallu ataasiakkaat sunniuteqarfigisussaanngikkaat.

Siunnersuutip § 32-anni, imm. 3-mi aalajangersarneqarpoq, siulersuisut pisortamik atorfinitsitsisartuullutillu soraarsitsisartuusut. Tamatumunnga ilagitillugu siunnersuutip § 33-anni, imm. 2-mi aalajangersarneqarpoq, pisortap KNR-imi suleqataasut atorfinitsittarlugillu soraarsittassagai. Taamaalilluni KNR-ip ulluinnarni aqutsisuinik atorfinitsitsisarneq soraarsitaasitsisarnerlu siulersuisuniit pisortamut nuunneqarpoq.

5) Pilerisaarisarnertigut il.il. isertitaqarnissamut periarfissat atuutiinnarnerat.

Inatsisartut peqqussutaanni maanna atuuttumi § 9 naapertorlugu KNR-ip ingerlatitaanera ilaatigut pilerisaarisarnermutigut ilanngussisunillu aningaasaliisarnikkut aningaasalersorneqartarpoq.

KNR-ip pilerisaarutinik suliaqarnermigut isertitaqarsinnaanera ingerlaannassanersoq isumaliutigineqarsimavoq. Periarfissamik taassuminnga atorunnaarsitsinikkut nuna tamakkerlugu pisortat sullissineranni aallakaatitsiviup namminersortut soqutigisaannut attuumassutaarutivinnissaa qulakkeerneqassagaluarpoq. Aammattaaq pilerisaarutinik suliaqarnissaq tamakkuninnga suliaqartartunut allanut, soorlu sumiiffinni radioqarfinnut tv-qarfinnullu, nuna tamakkerlugu aallakaatitsiviulerumaarsinnaasunut aviisinullu pilerinarnerulissagaluarpoq. Taamaattoqassagaluarpat landskarsimit tapiiffigineqartariaqarneq annertunerulissaaq KNR-illuunniit ingerlatai annikillineqartariaqassagaluarlutik.

Naalakkersuisut nalilerpaat pilerisaarisarnertigut isertitaqarsinnaasimaneq KNR-ip nammineerluinnarsinnaaneranut annertuumik sunniuteqarsimanngitsoq, siunissamilu aamma taamaannaviarunanngitsoq. Aammalu Naalakkersuisut isumaqarput KNR tamakkuninnga suliaqartartunut allanut niuernerpalaartumik atugassaqarfiusumik unammillersinnaasariaqartoq. Taamaammat Naalakkersuisut isumaqarput niuernermi pissutsit kisimik tamatumani aalajangiisuusariaqartut, taamaattorli tusarnaartartut isiginnaartartullu eqqarsaatigalugit minnerpaaffissatut piumasaqaatit aalajangersimasut, matumani aamma pilerisaarisarnermut ataatsikkoortillugit taamaallaat aallakaatinneqarnissaannik, pilerisaarutinik aallakaatitsinerup piffissap ullormut aallakaatitsiffiusup 10 procentiinit sivisunerunnginnissaanik aamma nioqqutissat peqqinnissamut ulorianarsinnaasut il.il. aalajangersimasut pilerisaarutinut ilanngunneqan-nginnissaannik piumasaqaatit ataqqineqarnissaannik Naalakkersuisut piumasaqarnertik attatiinnarumassagaat.

Aammattaaq KNR-ip aallakaatitassiornermik allamik ingerlatamillu allamik ingerlataqarsinnaanera aammalu taakkununnga atatillugu immikkut ingerlatseqatigiiffiliorsinnaanera ingerlatseqatigiiffinnilluunniit pioreersuni aningaasaliisinnaanera ammaanneqarpoq. Tassuunakkut siunertaavoq KNR-ip pisortat sullissineranni aallakaatitassiortuunermi saniatigut ingerlatamik isertitaqarfiusinnaasumik ingerlataqarsinnaaneranut periarfissaqarnerulersitsinissaq. Periarfissiinerit taakku pisortat sullissineranni ingerlatap aallakaatitassiornerullu allap aammalu ingerlatap allap missingersuutitigut naatsorsuutitigullu immikkoortinneqarnissaannik siunnersuummi piumasaqaateqarnermut aammalu ingerlatap allap unammilleqatigiinnermi atugassarititaasut malillugit pinissaanik aalajangersaanermut attuumassuteqarput.

 

Radioqarfinnut tv-qarfinnullu allanut tunngatillugu:

1) Aallakaatitsisinnaanermut akuersissutit pillugit maleruagassat nutaat:

Peqqussut maanna atuuttoq naapertorlugu KIIIP taannaavoq sumiiffinni radioqarfiit tv-qarfiillu aallakaatitsisinnaanerannut akuersissutinik tunniussisartuusoq. Tassunga atatillugu aammattaaq Radiofrekvensit pillugit inatsisip Kalaallit Nunaanni atortuulersinneqarnera pillugu peqqussut naapertorlugu frekvensimik atuisinnaanermut akuersissummik qinnuteqartoqartussaavoq. Namminersornerullutik Oqartussat Radiunik Nakkutilliiviat taannaavoq frekvensimik atuisinnaanermut akuersissutinik tunniussisartuusoq. Aammattaaq kommunimi sumiiffimmi radioqarfiup tv-qarfiulluunniit angerlarsimaffigisaani kommunalbestyrelsi kiisalu KNR aamma Tele Greenland A/S oqaaseqartinneqartussaapput.

Qinnuteqarnermi periutsip pisariillisarneqarnissaa kissaataasimavoq. Taama kissaateqarneq siunnersuummi imaalillugu akuersaarneqarpoq, akuersissutinik qinnuteqartarfik ataasiinnanngussasoq, tassalu ataatsimiititaliaq nutaaq pilersinneqartoq, Radio tv-lu pillugit ataatsimiititaliaq. Ataatsimiititaliallu isumagissavaa frekvensimik atuisinnaanermut akuersissummik aammattaaq qinnuteqartoqarnissaa, qinnuteqartoq taamaalilluni aallakaatitsisinnaanermut akuersissuteqarfigineqarnermi saniatigut frekvensimik atuisinnaanermut akuersissummik tunineqartussanngorlugu. Kommunalbestyrelsip aamma KNR-ip Tele Greenland A/S-illu tusarniarneqartussaanerinik piumasaqaat peerneqarpoq, taamatummi tusarniaanissaq pisariaqanngitsutut nalilerneqarmat.

KNR-ip saniatigut nuna tamakkerlugu radiukkut tv-kkullu aallakaatitsisoqarsinnaanera siunnersuutikkut aamma ammaanneqarmat pisariaqartuutinneqarpoq taamaaliornissami aallakaatitsisinnaanermut akuersissummik qinnuteqartoqartarnissaa. Qinnuteqaatit taamaattut Naalakkersuisunit suliarineqartussaanissaat pissusissamisoortuutinneqarpoq, qinnuteqaatimmi akuerineqarnissaanik isummernissaminni aammattaaq naliliisinnaassammata tamanna ingerlatanik taamaattunik suliaqartunut allanut qanoq sunniuteqassanersoq. Tassunga ilutigitillugu aamma akuersissummik taamaattumik tunineqarnermut akiliuteqartitsisoqarsinnaaneranik piumasaqaateqarnissaq periarfissiuunneqarpoq.

Summiiffinni aallakaatitsisinnaanermut akuersissutinik tunniussisartuuneq Radio tv-lu pillugit ataatsimiititaliartaamut suliassanngortinneqarpoq, taanna pingasunik ilaasortaqarpoq tamarmiullutik ingerlatsinermut, inuussutissarsiornermut tusagassiuuteqarnermut kulturimullu tunngasunik ilisimasaqartuussallutik. Tassuunakkut qulakkeerneqassaaq akuersissutit tunniunneqarneranni politikkikkut ilaatigut akuliuffigineqannginnissaq.

Aammattaaq peqqussummi nutaatut aalajangersarneqarpoq aallakaatitsisinnaanermut akuersissummik qinnuteqaatip sunik imaqarnissaanik piumasaqaat. Tassa imaassaaq aallakaatitsisinnaanermut akuersissummik tunineqarnissamut piumasaqaatit naammassineqarpata, taava qinnuteqartup aallakaatitsisinnaanermut akuersissummik tunineqarnissani pisinnaatitaaffigigaa.

Peqqussummi nutaatut aalajangersarneqarpoq suliffeqarfiit Kalaallit Nunaanni angerlarsimaffeqartut kisimik aallakaatitsisinnaanermut akuersissummik tunineqarsinnaanerat. Tassuunakkut tamakkuninnga suliallit nunanit allaneersut angisuut unammillilernissaat pinngitsoortinniarneqarpoq.

Nutaatut periarfissaalissaaq Radio tv-lu pillugit ataatsimiititaliap kommunit qanigisat iluanni aamma aallakaatitsisinnaanermut immikkut akuersissuteqarsinnaanera, aammalu aallakaatitseqatigiissinnaanermut maleruagassat nutarterneqarput, taamaaliornikkut aallakaatitseqatigiissinnaanerit pisinnaalerlutik tamanna akuersissumik piginnittut isumaqatigiissutigippassuk, aammalu aallakaatitseqatigiinnerit ataasiakkaaginnaappata.

Piumasaqaatit suut naammassineqarsimatillugit kommunip aallakaatitsisinnaanermut akuersissummik tunineqarsinnaanissaa aamma erseqqissarneqarpoq.

Kiisalu qanoq pisoqartillugu aallakaatitsisinnaanermut akuersissutit atorunnaarsinneqarsinnaanerinik aalajangersakkanik ilanngussisoqarpoq.


2) Sumiiffinni radioqarfiit tv-qarfiillu tapiiffigineqartarnerat pillugu maleruagassanik atuutilersitsineq:

Sumiiffinni radioqarfinnut tv-qarfinnullu tapiissuteqartarneq aningaasanut inatsimmi tamatumunnga immikkut aningaasaliissutaasimasut aqqutigalugit maannamut pisarpoq, konto pingaarneq 40.14.16, Kulturikkut sunngiffimmilu sammisassaqartitsinerit allat. Aningaasaliissutit ukiuni kingullerni allanngortinneqartaratik 1.592.000 koruuniusarput. Taakku sumiiffinni aallakaatitsiviit tv-qarfiillu ingerlatsinerannut tapiissutitut aammalu sinerissami aallakaatitsiviit kattuffiata (STTK) ingerlanneqarneranut tapiissutigineqartarput. Tapiissutit tunniunneqartarnerat KIIIP-imit ingerlanneqarpoq, taassumalu STTK ukiut tamaasa isumaqatigiissuteqarfigalugu aningaasat agguaattarpai. Tapiissutinik pissarsissagaanni ilaatigut piumasaqaataavoq pissarsisup aallakaatitsisinnaanermut akuersissummik peqarnissaa.

Sumiiffinni aallakaatitsiviit tapiiffigineqassappata piumasaqaatit suut naammassineqarsimanissaannik aalajangersakkanik peqqussummi aalajangersaasoqarnissaa pisariaqartinneqarsimavoq. Tassuunakkut siullertut qulakkeerniarneqarpoq sumiiffiit sapinngisamik amerlanerpaat sumiiffimmi aallakaatitsivinnik peqaannarnissaat aammattaaq siunissami tapiissuteqartarnikkut qulakkeerneqassasoq. Tamanna oqaaseqarsinnaatitaanermik qulakkeerinissamut aammalu sumiiffinni aallakaatinneqartartut KNR-illu aallakaatittagaasa pitsaassusiinik annertusaanissamut sakkussatut isigineqassaaq, tassami siunnersuummi naatsorsuutaavoq KNR-ip nunamik tamavimmik sammisaqarnissaq qulakkeerniarlugu aallakaatitassiortartut allat, aamma sumiiffinni radioqarfiit tv-qarfiillu atortassagai.

Aamma tassunga atatillugu sumiiffinni aallakaatitsiviit kattuffiata ingerlanneqarnerata tapiiffigineqartarnissaanik qulakkeerinissaq pisariaqartuutinneqarsimavoq, tassuunakkut kattuffik taamatullu aamma sumiiffinni aallakaatitsiviit nukittorsarniarlugit. Taassuma saniatigut aamma pingaartinneqarpoq sumiiffinni aallakaatitsiviit sulisuisa ilinniarteqqinneqartarnerinut ingerlaqqiffiusumillu ilinniartinneqartarnerinut tapiissutissanik immikkoortitsisoqarnissaa, taamaaliornikkummi sumiiffinni aallakaatitsiviit ingerlatsinerisa pitsaassusiat annertusarneqarsinnaammat.

Tv-mut tunngatillugu tunngaviusumik tapiissutinik aallakaatitassiornissamullu tapiissutinik tunniussisinnaaneq pissusissamisoortuusorineqarpoq, aallakaatitassiornermut tapiissutit annertussusissaat nammineerluni aallakaatitassiaasimasut annertussusiat apeqqutaatillugu aalajangerneqartassalluni. Tassuunakkut siunertaavoq aallakaatitsiviit ataasiakkaat sapinngisartik tamaat nammineerlutik aallakaatitassiornissamut kajumissuseqartinnissaat.

Aammattaaq Naalakkersuisut tapiissutit isumagineqartarnerannik, kattuffiup ingerlanneqarneranut tapiissutit kisiisa pinnagit Radio tv-lu pillugit ataatsimiititaliamut imaluunniit kattuffimmut sumiiffinni radioqarfiit tv-qarfiillu sinniisigisaannut isumagisassanngortitsisinnaanerannik periarfissiisoqarpoq.


Radio tv-lu pillugit ataatsimiititaliamut tunngatillugu:

Allaffissornikkut ataatsimiititaliamik, Radio tv-lu pillugit ataatsimiititaliamik atuutilersitsinissaq siunnersuutaavoq, taanna allaffissornikkut aqutsinermik, nakkutilliinermik siunnersuinissamillu suliaqartussaalluni. Ataatsimiititaliaq pingasunik ilaasortaqarpoq, tamarmiullutik ingerlatsinermut, inuussutissarsiornermut, tusagassiuuteqarnermut kulturimullu tunngasunik ilisimasaqartuussallutik. Taakku suleqatigisat susassaqartut ilaasortassanik siunnersuuteqartereernerisigut ukiuni sisamani atasussatut Naalakkersuisunit toqqarneqartassapput. Ilaasortat akornanni ataatsimiititaliamut siulittaasoq Naalakkersuisunit toqqarneqassaaq.

Ataatsimiititaliap aallakaatitsisinnaanermut akuersissutinik tunniussisartuunermi aallakaatitsisinnaanermullu akuersissutinik atuukkunnaarsitsinissamik aalajangiisarnissami saniatigut suliassarai KNR-ip anguniagassat pillugit isumaqatigiissummik eqquutsitsineq pillugu ukiumoortumik nassuiaataanik misissuataarinissaq, Naalakkersuisunullu taanna pillugu oqaaseqaateqarnissaq. Taakku saniatigut ataatsimiititaliap suliassat reklaminut aallakaatitassianillu aningaasalersuisarnermut tunngasut aalajangiiffigisassavai il.il., KNR-ip aammalu radioqarfiit tv-qarfiillu allat radiukkut tv-kkullu aallakaatitsisarneq pillugu peqqussummik malinninnerannik nakkutilliissalluni aammalu radiumut tv-mullu apeqqutini Naalakkersuisut siunnersortassallugit. Taakku saniatigut ataatsimiititaliamut suliassiissutigineqarpoq attuumassuteqanngitsut avataaneersut tusarnaartartunut isiginnaartartunullu tunngasunik misissuisinneqartarnissaat.

Ataatsimiititaliap pilersinneqarneratigut suliassat assigiinngitsut Kultureqarnermut Pisortaqarfiup isumagisartagai ataatsimiititaliamut isumagisassanngortinneqassapput kiisalu Radiukkut tv-kkullu pilerisaarisarnermut pillugit maalaaruteqartarfik maanna atuuttoq atorunnaarsinneqassalluni.

Ataatsimiititaliap pilersinneqarnera taassumalu suliassai aallakatitsisinnaanermut akuersissutit pillugit suleriaatsimik pitsaanerulersitsinissamik, pisariillisaanissamik eqaallisaanissamillu, KNR-ip sumiiffinnilu radioqarfiit tv-qarfiillu peqqussummik malinninnerannik nakkutilliinerup annertusarneqarnissaanik aammalu radiumut tv-mullu tunngasuni siunnersuisartuusut piginnaasaqarluartuunissaannik tunngaveqarlutillu siunertaqarput. Aammattaaq allaffissornikkut aqutsinerup nakkutilliinerullu Namminersornerullutik Oqartussanit allamut nuunneqarnissaat kissaataasimavoq.

Pilerisaarisarnermut aallakaatitassianillu aningaasalersuisarneq pillugit:

Peqqussummi maanna atuuttumi § 25, imm. 4, nr. 2 malillugu sumiiffinni fjernsynikkut pilerisaarutinik aallakaatitsineq, piffissap nammineerluni aallakaatitassianik aallakaatitassianilluunniit sumiiffimmut attuumassuteqartunik ullormut aallakaatitsiffiusartup 10 procentianit sivisunerusinnaanngilaq, aammalu akuersissummik piginnittut tamarmik pilerisaarutinik ataatsimoortunik ullormut ataaseriaannarlutik aallakaatitsisinnaapput. Siunnersuummi sumiiffinni radioqarfiit tv-qarfiillu KNR-imut naligiissinneqarput, tassa radiukkut tv-kkullu pilerisaarutinik aallakaatitat piffissap ullormut aallakaatitsiviusartup 10 procentianit sivisunerusinnaanatik.

Aamma aningaasarsiornermik soqutigisallit tv-kut pilerisaarutinik ilanngussisarnissaannik inerteqqut peerneqarpoq. Tamanna pisariaqanngitsumik killilersuinertut isigineqarpoq.

Aamma siunnersuummi Naalakkersuisut pilerisaarisarnermut qanoq ittumik aallakaatitsinermut ilaatinneqarsinnaanerinik maleruagassiorsinnaanerisa annertusinissaa ilanngunneqarpoq. Nutaatut erseqqissarneqarpoq pilerisaarisarnermut meeqqanut sammitinneqartut qanoq innikkut aallakaatinneqartarnissaat pillugu Naalakkersuisut maleruagassiorsinnaanerat.

Taakku saniatigut allannguutit erseqqissaanerillu annertunngitsut ilaapput, aammalu aalajangersakkat ilaat nalunaarutikkut (radiukkut tv-kkullu pilerisaarisarnermut aallakaatitassianillu aningaasalersuisarneq pillugit Namminersornerullutik Oqartussat nalunaarutaat nr. 3, 25. januar 1991-imeersoq) maannamut aalajangersarneqarsimasut peqqussutip oqaasertaanut ilanngunneqarput. Taakku pillugit aalajangersakkanut ataasiakkaanut oqaaseqaatit innersuussutigineqarput.


Misileraanerit pineqaatissiisarnerillu pillugit:

Peqqussutip maanna atuuttup kapitali 6-ia pineqaatissiinissanik aalajangersakkanik, atuutilersitsinermik ikaarsaariarnermillu aalajangersakkanik kiisalu misileraanerit pillugu aalajangersakkanik imaqarpoq.

Peqqussutissatut siunnersuutip kapitali 8-aa taamaallaat misileraanissanik pineqaatissiinissanillu imaqartinneqarpoq. Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkat siunnersuutip kapitali 9-anni ataatsimoortinneqarput.

Maannamutut misileraanernik ingerlatsinissamut Naalakkersuisut periarfissinneqarput.

Nunaatut ilanngunneqarpoq dekoderinik imaluunniit dekoderinut atortunik allanik, radiukkut tv-kkulluunniit aallakaatitap ilisarnarunnaarsarneqarsimasup (kodet) imarisaanik pisortanit akuerisaanngitsumik pissarsinissamut inerteqquteqarnermut aalajangersakkanik.

Maanna Inatsisartut peqqussutaanni atuuttumi § 34-mut tunngassuteqartumik pineqaatissiisarnissamik aalajangersaasoqarpoq, tassalu s§ 58-issatut siunnersuummi dekoderinik akuerisaanngitsunik inerteqquteqarnermik unioqqutitsineq akiliisitsissutaasinnaasoq.

Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkat pillugit:

Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkanut kapitalimi ataatsimi ataatsimoortinneqarput.

Peqqussutip akuersissutigineqarneratigut peqqussut maanna atuuttoq atuukkunnaarsinneqarpoq. Taamaattorli sumiiffinni radioqarfinnut tv-qarfinnullu peqqussut maanna atuuttoq naapertorlugu akuersissuteqarfigineqartunut atuuppoq, taakkua Inatsisartut peqqussutaat manna nutaaq naapertorlugu aallakaatitsisarnissamut akuersissuteqarfigineqarnissamik tungaannut.

Taamatuttaaq anguniagassat pillugit isumaqatigiissutit pillugit ikaarsaariarnermi aalajangersagaliornissaq pisariaqartinneqarsimavoq, tamatumunngalu tunngatillugu KNR-ip siulersuisuisa atuuffissaannut piffissaq pillugu ikaarsaariarnermi aalajangersaasoqarpoq.

Taamatuttaaq siornatigut aallakaatitsinissamut akuersissutit tunniunneqarsimasut pillugit ikaarsaariarnermi aalajangersaanissaq pisariaqartinneqarsimavoq.

Taamatuttaaq Radio tv-lu pillugit naammagittaalliuuteqartarfimmut peqqussutip atuutilinnginnerani suliat apuunneqartut pillugit ikaarsaariarnermi aalajangersaasoqarnissaa pisariaqartinneqarsimavoq.

 

3. Pisortanut aningaasaqarnikkut allaffissornikkullu sunniutissai.

3.1. Pisortanut aningaasaqarnikkut sunniutissai

Aningaasartuutit amerlinissaat:

Siunnersuut assigiinngitsunik marlunnik, tamarmik immikkoorlutik aningaasartuuteqarnerulernermik aningaasartuuteqarnerulersinnaanermilluunniit kinguneqartussanik imaqarpoq:

- KNR pisortat sullissineranni amerlanerusunik pisussaaffeqalerpoq
- Radio tv-lu pillugit ataatsimiititaliap sulinera

Pisortat sullissineranni pisussaaffinnut tunngatillugu tassaapput ullumikkumut sanilliullugu pisussaaffiit nutaat annertusisalluunniit makkuusut:

1) aallakaatitassiat ilinniartitsinermut tunngasut aamma neqeroorutigineqassapput.
2) aallakaatitassianik meeqqanut aammalu inuusuttuaqqanut sammitinneqartunik peqarnissaa qulakkeerneqassaaq.
3) innarluutillit aallakaatitassianik atuisinnaanerat annertusarneqassaaq.
4) innuttaasuni ikinnerussuteqarlutik kalaallit oqaasiinik inunnguuseralugu oqaaseqartuunngitsut aallakaatitassiani sapinngisamik annertunerpaamik isumagineqarnissaat qulakkeerneqassaaq.
5) tusarnaartartut isiginnaartartullu nammineerlutik aallakaatitassiaminnik il.il. ineriartortitsineranni ikiuunnissaq neqeroorutigineqassaaq.
6) KNR-ip nutaarsiassanik aallakaatitassiaasa ilaasa annertuut nammineerluni aallakaatitassiatut suliaanissaat qulakkeerneqassaaq.
7) pisariaqartitsisoqarnera naapertorlugu akiliisitsilluni sumiiffinni radioqarfinnik tv-qarfinnillu ilitsersuisassaaq.

Aallakaatitassiat ilinniartitsinermut tunngasut eqqarsaatigalugit taamaallaat aningaasartuuteqarnerulersoqassaaq aallakaatitassianik nutaanik aallakaatitassiortoqassappat. Aallarnisaatitut siunniunneqarpoq aallakaatitassiat ilinniartitsinermut tunngasut pioreersut atorneqarnissaat. Aallakaatitassianik nutaanik aallakaatitassiortoqassappat pisariaqassaaq aningaasat taamaaliornissamut atugassat KNR-imut, Inerisaavimmut imaluunniit ilinniarfinnut aallakaatitassianik ilinniartitsinermut tunngasunik aallakaatitassiuunneqartunut immikkoortinneqarnissaat.

Aallakaatitassianik meeqqanut aammalu inuusuttuaqqanut sammitinneqartunik peqarnissaata qulakkeernissaanik pisussaaffik taamaallaat aningaasartuuteqarnerulernermik nassataqassaaq aallakaatitassianik taamaattunik aallakaatitassiortarnissaq ullumikkornit annertunerusussatut naatsorsuutigineqarpat. Tamannali siunertaanngilaq, taamaattoqassagaluarpalli tamanna aamma pisortat sullissinerannik isumaqatigiissutip isumaqatigiinniutigineqarnerani ilanngunneqartussaassaaq.

Innarluutillit aallakaatitassianik atuisinnaanerisa annertusarneqarnissaanik pisussaaffik eqqarsaatigalugu tamatuma ataavartumik annertunerulernissaa naatsorsuutigineqarpoq, tamannalu tassunga aningaasartuuteqarnerulernissamik kinguneqassaaq imaluunniit teknikkikkut atortorissaarutit nutaat atornerisigut annertusaaneq atugassarisat pioreersut iluanni pisinnaalluni. Tassunga aningaasartuuteqarnerulernissaq naatsorsuutigineqanngilaq. Taamaassagaluarpat apeqqut taanna aamma pisortat sullissinerannik isumaqatigiissutip isumaqatigiinniutigineqarnerani ilanngunneqartussaassaaq.

Innuttaasuni ikinnerussuteqarlutik kalaallit oqaasiinik inunnguuseralugu oqaaseqartuunngitsut sapinngisamik annertunerpaamik isumagineqarnissaannik qulakkeerisussaaneq imminermini aningaasartuuteqarnerulernermik kinguneqarnavianngilaq, KNR-imi maannakkut taamatut isumaginnereerpoq. Aallakaatitassiat allagartalersorneqartartut nutserneqartartulluunniit ullumikkornit amerlanerulissappata tamanna KNR-ip Naalakkersuisullu pisortat sullissinerannik isumaqatigiissuteqarnissaanni isumaqatigiinniutissaassaaq.

Tusarnaartartut isiginnaartartullu nammineerlutik aallakaatitassiaminnik ineriartortitsineranni ikiuisarnissamik neqerooruteqartussaanermik pisussaaffik aningaasartuuteqarnerulernermik kinguneqassaaq taamaaliornissaq sulisooreersunik atuinikkut periarfissaqareersimanngippat. Aamma pisussaaffiup qanoq annertutiginera apeqqutaassaaq. Naalakkersuisut naliliipput KNR-ip taamatut pisussaaffimmik isumaginninnissani sulisut pigineqareersut atorlugit naammassisinnaassagaa. Ilanngullugu oqaatigineqassaaq KNR ikiuunnissamut atatillugu aningaasartuutinik akiliisitsinissaminut aalajangersakkami periarfissinneqarmat.

KNR-ip nutaarsiassanik aallakaatitassiaasa ilaasa annertuut nammineerluni aallakaatitassiatut suliaanissaannik qulakkeerinissamik pisussaaffik aamma aningaasartuuteqarnerulernermik nassataqartussaanngilaq, ullumikkummi tamanna ingerlanneqareerpoq.

Pisariaqartitsisoqarnera naapertorlugu sumiiffinni radioqarfinnik tv-qarfinnillu ilitsersuisarnissamik pisussaaffiup aningaasartuuteqarnerulernissamik kinguneqarnissaa naatsorsuutigineqanngilaq, ilitsersuinermi akiliisitsilluni pisartussaavoq. Tassa imaappoq suliassamut tassunga KNR-ip aaqqissuussinera KNR-imut aningaasartuuteqarnerulernermik nassataqassangatinneqanngilaq.

Ataatsimiititaliamik pilersitsineq makkununnga aningaasartuuteqarnerulertariaqarnermik nassataqassaaq:

1) Ataatsimiititaliap ilaasortaasa akissarsisinneqartarnissaat.
2) Ataatsimiititaliap ataatsiminnerinut atatillugu aningaasartuutinik, tassa angalanermut najugaqarnermullu il.il. aningaasartuutinik akiliisarnissaq.
3) Nakkutilliilluni angalanerni angalanermut najugaqarnermullu aningaasartuutinik akiliisarnissaq.
4) Ataatsimiititaliap allattoqartinneqarnissaa.
5) Attuumassuteqanngitsut avataaneersut tusarnaartartunut isiginnaartartunullu tunngasunik misissuinerannut aningaasartuutit.

Ataatsimiititaliap ukiumut 3-4-riarluni ataatsimiittarnissaa naatsorsuutaavoq. Ataatsimiittarnissat ullunik 1-2-nik sivisussuseqartassangatinneqarput. Ataatsimiititaliap ilaasortai akissarsisitsisarneq pillugu inatsimmi tamatumunnga maleruagassat malillugit akissarsisinneqartassapput. Taamaammat ilaasortat ataatsimiinnernut atatillugu akissarsiassaannut aningaasartuutissat 10.000 koruuniunissaat eqqoriarneqarpoq.

Ataatsimiinnernut atatillugu angalanernut najugaqarnernullu aningaasartuutinut apeqqutaassapput ataatsimiinnerit sumi ingerlanneqartarnissaat ataatsimiititaliamilu ilaasortat sumi najugaqarnerat. Tassunga aningaasartuutissat ukiumut 20.000 koruuniunissaat eqqoriarneqarpoq.

Tamatuma saniatigut ataatsimiititaliap ataatsimiititaliallu allattaata ukiumut marloriarlutik nakkutilliiartorlutik angalasarnissaat naatsorsuutigineqarpoq. Angalanissat sinerissami illoqarfinnut toqqarneqartunut angalanerussapput, soorlu angalanermi ataatsimi Qeqertarsuup tunuani illoqarfinnut angalanerullu aappaani kujataani illoqarfinnut. Tassunga aningaasartuutissat ukiumut 120.000 koruuniunissaat eqqoriarneqarpoq.

Taakku saniatigut allatseqartitsinermut, matumani aamma allatsip aningaasarsiaqartinneqarneranut aningaasartuuteqartoqarnissaa naatsorsuutigineqartariaqarpoq. Suliamut tassunga inuup ukiumut sulinerata sisamararterutaata atorneqarnissaa ilimagineqarpoq, aningaasartuutillu tamarmiusut 70.000 koruuniunissaat eqqoriarneqarsinnaavoq. Aqutsisuniit ataatsimiititaliamut suliassat, maannamut KIIIP-mi isumagineqartartut (aallakaatitsisarnissamut akuersissutinik tunniussisarneq tapiissuteqartarnerlu), sapinngisamik ataatsimiititaliamut allattoqarfittut atuutiinnarnissaq pillugu, nuunneqarneranni pingaarutilinnik sipaaruteqartoqarnissaa ilimagineqanngilaq.

Attuumassuteqanngitsut avataaneersut tusarnaartartunut isiginnaartartunullu tunngasunik misissuisinneqartarnissaannik qulakkeerinnittussaaneq aningaasartuuteqarnerulernissamik kinguneqassaaq, taamaaliornissanummi maannamut aningaasanik missingersuusiortoqarneq ajormat. Aningaasartuutit qanoq annertutiginissaannut apeqqutaassapput misissuinerit annertussusissaat qanorlu ittuunissaat aammalu qanoq akulikitsigisumik ingerlanneqartarnissaat. Suliamut tassunga ukiumut 280.000 koruunit missingersuutigineqarput.

Tassa imaappoq ataatsimiititaliap sulineranut ukiumut 500.000 koruunit atorneqarnissaat missingersorneqarpoq. Tassunga ilutigitillugu aamma oqaatigineqassaaq ataatsimiititaliap suliassaasa ilaat (aallakaatitsisinnaanermut akuersissummik tunniussisarneq nakkutilliinerlu) maannakkut KIIIP-imit suliarineqartarmata, aammalu Radiu TV-lu pillugit maalaaruteqartarfik tassunga ilutigitillugu atorunnaarsinneqassalluni. Nakkutilliiartorluni angalanernut aningaasartuutit maannamut missingersuutini ilaaneq ajorput aningaasartuutigineqassanatillu, taamaammat tassunga aningaasartuutit tassaassapput aningaasartuutaanerulersussat.

Isertitat amerlinissaat:

KNR ingerlatamik allamik aningaasarsiorfiusinnaasumik ingerlatsinissamut pitsaanerusunik periarfissinneqassaaq. Tassunga atatillugu isertitassat amerlissutigisinnaasaasa annertussusissaat eqqoriarneqarsinnaanngilaq.

Taassuma saniatigut oqaatigineqassaaq KNR-imi siulersuisuni ilaasortat qulingiluaniit arfineq-marlunnut appartinneqarnissaannik siunnersuuteqarneq siulersuisuni ilaasortat akissarsisinneqartarnerannut aamma siulersuisut ataatsimiinnerannut atatillugu angalanermut najugaqarnermullu aningaasartuutinut annertoorsuunngitsunik sipaaruteqartoqarnissaanik kinguneqartussaammat, tassanili apeqqutaassaaq siulersuisunut ilaasortat nunap ilaani suminngaanneernerat. Aningaasartuutikinnerulernissaq ima annertutigissangatinneqanngilaq, aningaasaliissutit tungaasigut allannguuteqartitsinissamik kinguneqassalluni.

Siunnersuutip aningaasatigut sunniutigiumaagassaatut naatsorsuutigineqartut, taakkulu qanoq aningaasalersorneqarnissaasa skemanngorlugu takutinneqarnerat:

Suliaq Ukiumut aningaasartuutaanerusussat kr.-inngorlugit Aningaasalersorneqarnissaat
1) Ilinniartitsineq KNR-ip pisortat sullissineranni isumagisassaanut ilaasoq

0

 KNR-imut, Inerisaavimmut ilinniarfinnullu aningaasaliissutit iluanni*
2) KNR aallakaatitanik meeqqanut inuusuttuaqqanullu sammitinneqartunik aallakaatitsisussaatitaavoq

0

 KNR-imut aningaasaliissutit iluanni**
3) KNR innarluutillit aallakaatitanik atuisinnaanerannik annertusaassaaq

0

 KNR-imut aningaasaliissutit iluanni **
4) KNR-ip oqaatsitigut ikinnerussuteqartut sapinngisamik annertunerpaamik isumagissavai

0

 KNR-imut aningaasaliissutit iluanni **
5) KNR tusarnaartartut isiginnaartartullu namminneq aallakaatitassiaminnik ineriartortitsineranni ikiuunnissaminik neqeruussaaq

0

 Atuisut akiliutaasigut
6) KNR-ip qulakkiissavaa aallakaatitat nutaarsiassat ilaasa annertuut nammineerluni aallakaatitassiaanissaat

0

 KNR-imut aningaasaliissutit iluanni **
7) KNR pisariaqartitsineq naapertorlugu akiliisitsilluni sumiiffinni radioqarfinnut tv-qarfinnullu ilitsersuissaq

0

 Atuisut akiliutaasigut
9) Radio tv-lu pillugit ataatsimiititaliami ilaasortat akissarsisinneqartarnissaat

10.000

 Radio tv-lu pillugit ataatsimiititaliap sulinissaanut immikkut aningaasaliissutitigut
10) Radio tv-lu pillugit ataatsimiititaliap ataatsimiinnerinut atatillugu aningaasartuutit

20.000

 Radio tv-lu pillugit ataatsimiititaliap sulinissaanut immikkut aningaasaliissutitigut
11) Radio tv-lu pillugit ataatsimiititaliap nakkutilliilluni angalanerinut atatillugu aningaasartuutit

120.000

 Radio tv-lu pillugit ataatsimiititaliap sulinissaanut immikkut aningaasaliissutitigut
12) Ataatsimiititaliap allatseqartinnera.

70.000

 Radio tv-lu pillugit ataatsimiititaliap sulinissaanut immikkut aningaasaliissutitigut
13) Attuumassuteqanngitsut isiginnaartartunut tusarnaartartunullu tunngasunik misissuisarnissaat

280.000

 Radio tv-lu pillugit ataatsimiititaliap sulinissaanut immikkut aningaasaliissutitigut
14) KNR-ip aningaasarsiorfiusinnaasumik allamik ingerlataqarnissamut periarfissai pitsaanerulerput Isertitat amerlisinnaapput. Maannangaaq eqqoriaruminaapput. Isertitassat amerlissutissaannik 2005-imi missingersuuteqartoqanngilaq.
15) KNR-imi siulersuisuni ilaasortat ikilinerat KNR-imut sipaarutissat Sipaarutissat annikingaarmata taakku missingersuusiorneqarsimanngillat.

* Ilinniartitsinermut atortut aallakaatitassiarineqareersut aallakaatitassiarineriniluunniit aningaasartorfiusussaanngitsut aallaqqaammut atorneqarnissaat naatsorsuutigineqarpoq. Ilinniartitsinermut atortunik KNR-ip aallakaatitsivia aqqutigalugu siunissami ilinniartitsisarnissamut atugassanik amerlanerusunik aallakaatitassiortoqassappat, taakku KNR-imut, Inerisaavimmut ilinniarfinnulluunniit immikkut aningaasaliissutigineqartariaqarput.

** Maannakkut amerlassusii allanngortinneqassanngippata pisussaaffiit aningaasartuuteqarnerulernissamik nassataqarnavianngillat. Amerlineqassappata taakkununnga aningaasaliissutit amerlanerusut immikkoortinneqartariaqarput.


3.2. Pisortanut allaffissornikkut sunniutissai.

Radio tv-lu pillugit ataatsimiititaliamik pilersitsinerup kingunerissavaa allaffissornerup pisariinnerulernissaa, tassami suliat sumiiffinnut assigiinngitsunut maannamut agguataarneqarsimagaluartut ataatsimut kattunneqartussaapput. Aammalu aallakaatitsisinnaanermut akuersissummik qinnuteqarnermi periusissatut siunnersuutigineqartoq qinnuteqartumut pisariillisarneqarpoq, tassami qinnuteqartoq ataasiinnarmut qinnuteqartussanngormat, aammami frekvensimik atuisinnaanermut akuersissut aallakaatitsisinnaanermut akuersissummut ilanngunneqartussanngormat. Pisariillisaaneq pisortat sipaaruteqarnissaannik nassataqarnavianngilaq.

Siunnersuutip pisortanut allaffissornikkut allanik sunniuteqarnissaa naatsorsuutigineqanngilaq.

 

4. Inuussutissarsiutinik ingerlataqartunut aningaasaqarnikkut allaffissornikkullu sunniutissai.

Siunnersuutip inuussutissarsiutinik ingerlataqartunut aningaasaqarnikkut allaffissornikkullu sunniuteqarnissaa naatsorsuutigineqanngilaq.

 

5. Avatangiisunut tunngatillugu sunniutissai.

Siunnersuutip avatangiisinut tunngatillugu sunniuteqarnissaa naatsorsuutigineqanngilaq.

 

6. Aqutsinikkut innuttaasunut sunniutissai.

Siusinnerusukkut taaneqarersutuut siunnersuut aallakaatitsisinnaanermut akuersissummik, aamma frekvensimik atuisinnaanermut akuersissummik tunineqarnissamut periusissap pisariillineranik kinguneqassaaq. Suliat sumiiffinni assigiinngitsuni maannamut isumagineqartarsimasut kattunnerisigut aamma aqutsineq innuttaasunut pisariillisaataassaaq.

 

7. Kingunerisinnaasai annertuut allat.

Siunnersuutip allanik annertuunik kinguneqarnissaa naatsorsuutigineqanngilaq.

 

8. Naalagaaffeqatigiinnermut namminersulernissamullu tunngasut.

Siunnersuutip Naalagaaffeqatigiinnermut namminersulernissamullu tunngatillugu annertuumik sunniuteqarnissaa naatsorsuutigineqanngilaq.

 

9. Oqartussaasut kattuffiillu il.il. tusarniarneqarsimasut.

Siunnersuut piffissami 1.-15. juni 2004-imut makkununnga tusarniaassutigineqarpoq:

Tusarniaanermi piffissarititap naanerani tusarniaavigineqartunit makkuninnga tusarniaanermi akissutinik pissarsisoqarpoq:

KNR, KANUKOKA, Aningaasaqarnermut Pisortaqarfik, Ilaqutariinnermut Pisortaqarfik, Allattoqarfik, Kalaallit Nunaanni Tusagassiuutit pillugit Maalaaruteqartarfik, Sulisitsisut Peqatigiiffiat ILIK.


Siusinnerusukkut tusarniaanermi makku akissuteqarput:

KNR, SSTK, Sermitsiaq, AG, Assilissat, Kulturministeriets Mediesekretariat, TELE Greenland A/S, KANUKOKA, Aningaasaqarnermut Pisortaqarfik, Ineqarnermut Attaveqarnermullu Pisortaqarfik, Aqutsinermut Pisortaqarfik, Ilaqutariinnermut Pisortaqarfik, Namminersornermut Pisortaqarfik, Allattoqarfik, Inuussutissarsiornermut, Nunalerinermut Suliffeqarnermullu Pisortaqarfik, Grønlands IT-råd, Kalaallit Nunaanni Tusagassiuutit pillugit Maalaaruteqartarfik, Tusagassiortut Peqatigiiffiat, Sulisitsisut Peqatigiiffiat, SIK, Kalaallit Atuakkiortut, Timersoqatigiit Kattuffiat, Inerisaavik, Katuaq, Nunatta Atuagaateqarfia, Nunatta Katersugaasivia Allagaateqarfialu, Tusagassiornermik Ilinniarfik, Ilisimatusarfik.

Siunnersuummi kingullermi nassiunneqartumi siunnersuummut februar 2004-mi tusarniaassutigineqartumut sanilliullugu allannguutit ikittunnguuneri pissutigalugit, kinguliini siornatigut tusarniaanermi oqaaseqaatit pingaarnerit aamma nassuiarneqassapput, taakkua siunnersuummut ilanngunneqarsimanngineri pingaarnerutillugit.


Siunnersuutip kapitali 1-ianut aamma 2-anut:

Peqqussutip siunertaa:

Kalaallit Atuakkiortuisa kaammattuutigaat, peqqussutissatut siunnersuut siunertaq pillugu aallaqqaaserneqassasoq. Inatsisiliornermi aallaavigineqartarmat, tassalu siunnersuummut siunertanut aalajngersaasoqarneq ajormat, siunnersuummut taamaallaat siunnersuutip siunertaa nassuiaatini nassuiarneqarpoq.


Akuersissuteqarneq imaluunniit nalunaarsuisarneq:

IT-rådi teknologiimi siuariartorneq innersuussutigalugu isumaqarpoq, aallakaatitsisarnissamut akuersissuteqartoqartarnissaanut piumasaqaateqartarnissaq pingaaruteqarunnaartoq aammalu radioqarfinnut tv-qarfinnullu tamanut aallakaatitat imarisassaannik piumasaqaateqartarnissaq. Akuersissuteqariaatsip ingerlatiinnarneqarnissaa radioqarfiit tv-qarfiillu tamarmik aallakaatitaasa imarisassaannut piumasaateqarnissaq pissusissamisoorsorineqarpoq. Akuersissuteqartitseriaaseqartarnerup ilaatigut qularnaassavaa aallakaatitassiortarnerup pitsaalluinnartumik nakkutigineqartarnissaa. Piumasaqaatit naammassineqarsimagaangata nutaatut sumiiffinni aallakaatitsinissamut akuersissuteqarnissamut nutaamik eqqussisoqarsimanera pillugu, nalunaarsueriaatsip akuersissuteqariaatsillu akornanni killiliussat ersarikkunnaarsimapput. Imarisassanut tunngatillugu sumiiffinni radioqarfinnut tv-qarfinnullu maanna taamaallaat piumasaqaataavoq, taakkua aallakaatitaasa imarisaasalu suliarineqartarnerat unioqqutitsinerussanngitsoq. Aammattaaq piumasaqaatigineqarpoq, aallakaatitsisarfik ingerlatsinerminut nunatta karsianiit tapiiffigineqarnissamik qinnuteqarsinnaasoq. Tamanna pillugu siunnersuutip § 13-ia aamma kapitali 5 taakkununngalu nassuiaatit innersuussutigineqassapput.


Teknikikkut atortulersuutit pilersinneqarnerat ingerlanneqarnerallu:

KNR-ip piumasaqaatigaa, taassuma nammineerluni Tele Greenland A/S-imik kiffartuunneqarnissamik isumaqatigiissusiornissaa, KNR-ilu nammineerluni Namminersornerullutik Oqartussat sinnerlugit radioqarfiit sakkortusaaviusut aningaasartuutaat aqussagai, taamaalilluni taakkununnga tunngatillugu atuisutut ingerlatseqqittarnissaq pissusissamisoortoq pilersinneqassammat. KNR-imittaaq oqaatigineqarpoq, KNR-ip Namminersornerullutik Oqartussanut anguniagassat pillugit isumaqatigiissutaanut kiffartuunneqarnissamik isumaqatigiissut ilanngunneqassasoq. Siunnersuutip § 3-anni imm. 2-mi aalajangersarneqarpoq, atortunik ikkussuinermut ingerlatsinermullu piumasaqaatit kiffartuunneqarnissamik isumaqatigiissummi Naalakkersuisunit akuerineqarsimasussami aalajangersarneqassasut. Radiukkut sakkortusaaviit ingerlanneqarnerannut aningaasartuutinut tunngatillugu tamatumani aqutsinissamut apeqqutit pineqarput, peqqussummi aalajangersaavigineqartariaqanngitsut. Kiffartuunneqarnissamik isumaqatigiissut anguniagassat pillugit isumaqatigiissummut ilanngunneqassaaq, ilaatigummi anguniagassat pillugit isumaqatigiissummi isumaqatigiissutip atuuffiata nalaani KNR-ip ingerlatsineranut aningaasatigut killiliussassat ilimagineqartut nassuiaaserneqartussaammata. Tamanna pillugu siunnersuutip § 28-a, imm. 1, nr. 2 aamma kapitali 5 taakkununngalu nassuiaatit innersuussutigineqassapput.


Siammarterisarnermut aalajangersakkat:

KNR allappoq, kapitali 2-mi aalajangersakkat teknikimut tunngasuusut KNR-illu naliliinera naapertorlugu nalunaarummiittariaqarnerat. Pisariaqartinneqarnerusimavoq aalajangersakkat taakkua peqqussutissatut siunnersuummiiginnarnissaat.


Kapitali 3-mut:

Aallakaatitsisinnaanermut akuersissutinik tunniussisarneq:

Kalaallit Atuakkiortut allapput, killiligaanngitsumik oqaaseqarsinnaatitaaneq eqqarsaatigalugu aallakaatitsisinnaanermut akuersissut politikikkut ingerlatsivimmiit tunniunneqartariaqanngitsoq, assersuutigalugu Radio tv-lu pillugit ataatsimiititaliamit. Erseqqissaatigineqarpoq, sumiiffinni aallakaatitsisinnaanermut akuersissutit Radio tv-lu pillugit ataatsimiititaliamit tunniunneqartassasut, nunalu tamakkerlugu aallakaatitsisarnissanut akuersissutit Naalakkersuisunit tunniunneqartassallutik. Nuna tamakkerlugu aallakaatitsisinnaanermut akuersissutit pitsaaqutit ajoqutaasinnaasullu erseqqissumik naliliiffigineqareernerisigut tunniunneqartarnissaat pissusissamisoornerusorineqarpoq. Tamanna politikikkut aalajangiinertut nalilerneqarpoq, ataatsimiititaliap aalajangiiffigisassaatut pissusissamisoorsorineqanngitsoq.


Nuna tamakkerlugu aallakaatitsisinnaanermut akuersissutinut piumasaqaatit pillugit:

KNR allapppoq, radioqarfimmut tv-qarfimmulluunniit nuna tamakkerlugu aallakaatitsisinnaanermut akuersissutinik tunniussilinnginnermi KNR akuutinneqartassasoq, nunalu tamakkerlugu aallakaatitsisarnissamut piumasaqaataassasoq KNR-ip radiukkut tv-kkullu aallakaatittagaasa minnerpaamik annertoqataat. Allaaserineqarportaaq, nuna tamakkerlugu tamanut aallakaatitassianik aallakaatitsioqartalissappat aallakaatitassiortarnissanut aallakaatitatigut tusagassiortarnermullu pissuserissaarnissamut malittarisassanik piumasaqaateqartoqassasoq. Allaaserineqarportaaq, sulisorisat ilinniakkanut tunngatillugu tunulequtaat pillugit piumasaqaateqartoqartariaqarnera. Nuna tamakkerlugu aallakaatitsisinnaanermut akuersissummik tunniussisoqartinnagu illuatungeriit attuumassuteqartut, tassunga KNR ilanngullugu, tusarniaavigineqassapput, KNR-ili aalajangiinernut sunniuteqarnavianngilaq. Akuersissutilli radioqarfimmut tv-qarfimmulluunniit iluanaarniutigalugu aallakaatitsisarnissamik kissaateqartumut tunniunneqartussaassammata, ilimagineqarsinnaanngilaq, KNR-imut assingusunik piumasaqaateqartoqarnissaa. Aallakaatitatigut tusagassiortarnermullu pissuserissaarnissamut malittarisassanut tunngatillugu radioqarfik tv-qarfillu sorliugaluaruniluunniit aallakaatitsisarnissaminut nammineq akisussaasuusussaavoq, tusagassiuuteqarnermilu akisussaaneq pillugu inatsimmi malittarisassat atuuttut naapertorlugit akisussaaneq tunngatinneqarsinnaalluni. Taamaattumik aallaavittut radioqarfiup tv-qarfiulluunniit pineqartup nammineerluni qularnaassavaa, sulisorisat naammaginartumik ilinniagaqarsimanissaat.


Sumiiffinni aallakaatitsisinnaanermut akuersissutit atuuffissaasa sivisussusissaat:

KNR-ip kaammattuutigaa, sumiiffinni radioqarfinnut tv-qarfinnullu aallakaatitsisinnaanermut akuersissutit sivikinnerpaamik ukiunut pingasunut atuuttassasut. KNR-ip siunnersuut tamanna tunngavilersorsimanngilaa. Ukiuni tallimani atuutsitsiinnartarnissaq pissusissamisoornerusorineqarpoq, taakkuami frekvensinut akuersissutit sivisussusaannut naapertuuttuummata.


Kapitali 4-mut:

Timersornernik malinnaasarneq:

Timersoqatigiit Kattuffiata kissaatigaa, peqqussummi allanneqassasoq, KNR-ip pisussaaffigissagaa timersornerup pitsaasumik tamatigoortumillu malinnaavigineqartarnissaa. Timersornerup allanut salliutillugu peqqussutip oqaasertaani erseqqissaavigineqarnissaa pissusissamisoorsorineqanngilaq. Siunnersuutip § 20-a, imm. 1 naapertorlugu timersorneq KNR-ip aliikkutassaqartitsisarnissaani pisussaaffinnut ilaavoq. Tamatuma saniatigut timersorneq pisussaaffinnut siunnersuummi § 20, imm. 3-mi aamma § 20, imm. 5-7-imi ilaatillugu aalajangersarneqartutut nalilerneqarpoq.


Nammineerluni aallakaatitassiat:

KNR isumaqarpoq, peqqussutip qularnaarnerusariaqaraa KNR-ip nunap kulturikkut suliffeqarfigigaa pingaartoq – aamma radiukkut tv-kkullu kulturikkut aliikkutassaqartitsinikkullu aallakaatitassiortarneq pineqaraangat. Kalaallit Atuakkiortuisa kaammattuutigaat, kalaallisut aallakaatitassiortoqartassasoq nutaarsiassaannaanngitsunik soqutiginartuinnaanngitsunillu, taamaalillunilu aallakaatitassianik pissanganartulianik aliikkutassianillu samminnittunik ilaqartillugit. Tamatumunnga tunngatillugu erseqqissaatigineqassaaq, siunnersuummi akornutissaqartinneqanngitsoq, pissanganartulianik aliikkutassianillu kalaallisuunik suli KNR-imi aallakaatitassiortarnissaq. Pissusissamisoorsorineqarneruvorli, nutaarsiassatigut soqutiginartutigullu tunngasut KNR-ip namamineq aallakaatitassiortarnissaani pisussaaffittut pisariaqartuummata. Aammattaaq siunnersuummi KNR-ip kulturimut tunngatillugu pisussaaffii erseqqissaavigineqarput.


Atortorisat sulisussallu:

KNR-ip erseqqissaatigisimavai peqqussutitigut pisortat kiffartuussinissaannut pisussaaffii naammassiniarlugit atortorisatigut sulisussatigullu amigaateqarneq.

Ilaatigut KNR-ip erseqqissaatigaa, siunnersuummi § 20, imm. 4-mi kissaatigisap, nuna tamakkerlugu siammarsimanissamik pinnittup, pivisusunngortinniarnissaa ajornakusoortuusoq. Ilaatigut aningaasaqarnikkut ilaatigullu sinerissami aallakaatitassiortunik imaluunniit aallakaatitanik suliaqarnissamut pikkorissunik sulisoqarnissamut amigaateqarnerit KNR-ip peqqutaatippai.

KNR-ittaaq allaaseraa, pisortat kiffartuussinissamut pisussaaffii nutaajusut piumasaqaatigimmassuk KNR-ip taakkua isumaginissaannut atortunik sulisussanillu annertusaanissaa.

Aningaasaqarnermut Pisortaqarfiup ilanngussisoqarnissaanik kissaateqarpoq, tassalu atuartitsinermi atortussanik amerlanerusunik, imaluunniit pitsaassusaannik qaffassaanissamik, suliaqartoqartalissappat, tamanna kontuni pingaarnerni pineqartuni aningaasanut inatsimmi aningaasaliissutit killiliussaasa iluanni pissasoq, pisariaqarpat Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmut aningaasanut inatsimmi killiliussatut aningaasaliissutit iluanni.

Siunnersuutip aningaasatigut sunniutissai pillugit nassuiaatini atortorisat sulisussallu pillugit ajornartorsiutit nassuiarneqarput.


Oqaatsinik atuinissamut tunngavissat:

KNR allappoq, pisortat sullissineranni oqaatsinik atuinissamut tunngavissat suli peqanngitsut, taamaattumik taanna pillugu erseqqissunik malittarisassanik ujartuisoqarpoq. Tamatumunnga tunngatillugu erseqqissaatigineqassaaq, siunnersuummi § 20, imm. 1-mi aalajangersagaq ilanngunneqarmat, tassalu KNR-ip innuttaasuni ikinnerussuteqarlutik kalaallit oqaasiinik ilitsoqqussaralugu oqaaseqartuunngitsut aallakaatitassiamini sapinngisamik annertunerpaamik isumagineqarnissaat qulakkiissagaa. Aalajangersakkamut nassuiaatini allassimavoq, pisortat sullissinerannik isumaqatigiissummi qanoq annertussuseqarnissamut erseqqissaanissaq pissasoq.


Pisortat sullissinerannik isumaqatigiissutip inaarsarneqarnera:

KNR allappoq, anguniagassat pillugit isumaqatigiissutissap missingiutissaata oqaluuserineqarnissaa ujartorneqartoq. Siunnersuummi aalajangersarneqarpoq, KNR-ip Naalakkersuisullu akornanni anguniagassat pillugit ukiunut sisamanut isumaqatigiissusiortoqarnissaa, isumaqatigiissulli siulleq taamaallaat ukiunut pingasunut atuutissasoq piffissami 1. januar 2006-imiit 31. december 2008-mut. Taamaalilluni pisortat sullissinerannik isumaqatigiissutit aqunneqartalernissaat peqqussutip atuutilernerata nalaanut sanilliullugu ukioq ataatsimik kingulliussaaq. Maanna siulersuisut maanna malittarisassat atuuttut naapertorlugit pisortat sullissinerannik isumaqatigiissusiornissamut pisussaaffilerneqarsinnaassanngillat. Taamaattumik 2005-imut pisortat sullissinerannik isumaqatigiissut siulersuisunit peqqussutip atuutilerneranut atatillugu toqqarneqartussanit kingumoortumik isumaqatigiissutigineqartariaqassaaq. Tamatuma kingunerisaanik pisortat sullissinerannik isumaqatigiissutip aqunneqartalernissaata ingerlanneqalernissaa Naalakkersuisut 2006-imut kinguartinneqarnissaa toqqarpaat. Tamatuma periarfississavaa, maanna KNR-ip siulersuisui atuuffitsik tamakkerlugu sulisinnaanissaat (imaappoq 1. november 2005-ip tungaanut), kingornalu siulersuisut nutaat 2005 naatinnagu pisortat sullissinerannik isumaqatigiissutip isumaqatigiissutigineqarnissaa angummaffigisinnaassavaat.


Pisortat sullissinerannik isumaqatigiissut atorlugu aqutsineq:

Nunattta Katersugaasivia Allagaateqarfialu kaammattuivoq, isumaqatigiissuteqarnikkut aqutsinermut malittarisassat peerneqarnissaat. Tusagassiortut Peqatigiiffiata ernummatigaa, anguniagassat pillugit isumaqatigiissutip kingunerisinnaagaa suli KNR-ip politikikkut aqunneqarpallaarnissaa. Isumaqatigiissusiornikkut aqutsinerup politikikkut aqutsivallaarnermik kinguneqarsinnaanerinninnermut peqqutaatinneqartoq ilumoorluarsinnaavoq, KNR-ili Naalakkersuisullu taamatut aqutseriaaseqartoqarnissaa kissaatigaat, aqutsinissarlu taamaallaat qitiusumiit pissaaq taamaattumillu KNR-ip aaqqissuisoqarneranut kiffaanngissusianik aallakaatitsiviullu namminersortuuneranik innarliinavianngilaq.


KNR-ip inatsisitigut inissisimanera:

Anguniagassat pillugit KNR-ip aamma Namminersornerullutik Oqartussat isumaqatigiissuteqareerpata aallakaatitsiviup Namminersornerullutik Oqartussat oqartussaaffeqarfiinut assigiinngitsunut tunngatillugu inatsisitigut inissisimanerata nassuiaaserneqarnissaa KNR-ip kissaatigaa. Kalaallit Atuakkiortut allapput, aalajangersagaq (siunnersuutip § 30-a) asuleernerusoq, kaammattuutigineqarporlu, KNR-ip inatsisitigut inissisimanera ileqquusut nalinginnaasut naapertorlugit pissasoq, assersuutigalugu suliffeqarfittut namminersortitatut, suliffeqarfittut imminut pigisutut imaluunniit inatsiseqartitsinikkut allatigut. Siunnersuummi KNR-ip inatsisitigut inissisimanera erseqqissaavigineqarpoq, tamatumunngalu tunngatillugu aalajangiivittarnermik taasamik ilanngussisoqarpoq, imaappoq KNR-ip aalajangiineri oqartussaasutut aqutsisoqarfinnut allanut ingerlateqqinneqarsinnaanngillat. Taaguutip maanna atuutsinneqartup "pisortat suliffeqarfigaat namminersortoq"-p allanngortinneqarnissaa pisariaqartinneqarsimanngilaq, tamannalu aamma danskit Danmarks Radiomut inatsiseqartitsineranni atuuppoq, tamannalu Namminersornerullutik Oqartussanut tunngatillugu KNR-ip immikkut aaqqissuussaanikkut inissisimaneranut tulluarnerpaajusorinarluni.


KNR-ip siulersuisuisa inissititerneqarnerat:

KNR-ip ajornartorsiornartutut nalilerpaa, avataaniit aallakaatitassiortartumik (taannaasinnaavoq tuniniaasartoq imaluunniit unammillerti) siulersuisuni suli ilaasortaqartarnissaa. Tamanna Tusagassiortut Peqatigiiffiannit isumaqatigineqarpoq. Aallakaatitassiortut avataaninngaanneersut atuutiinnarnissaat pissusissamisoorsorineqarpoq, taamaaliornikkut KNR-ip sumiiffinnilu aallakaatitassiortartut suleqatigiinnerulernissaat anguneqassammat.


Isumaqatigiinniarsinnaatitaaneq:

KNR allappoq, ajuusaarutigalugu paasisimallugu, TP-mut isumaqatigiinniarsinnaatitaaneq KNR-imut nuunneqarnissaa siunniunneqanngimmat. KNR allappoq, tamatuma kingunerissagaa, TP-mik isumaqatigiinniartarnernut atatillugu aaqqissuussinerit eqaannerit pisariinnerillu aaqqissuussinerullu nutaap nangissutaanissaanut KNR-ip piumanerusimagaluagai ajornartorsiornarnerusunngoriaannaasut. Tamatumani pineqarpoq siornatigut siunnersuummut nassiunneqartumut atatillugu allannguut, Aningaasaqarnermut Pisortaqarfiup Isumaqatigiinniartarnermut Immikkoortuaniit tusarniaanermi akissummi patsisilerneqartoq. Siunnersuutip § 34-anut nassuiaatit innersuussutigineqassapput.


KNR-ip aningaasalersorneqarnera:

KNR-ip erseqqissaatigaa, aningaasalersuinissaq pillugu aalajangersakkat KNR-imut ajornartorsiortitsisut, aammalu aningaasaqarnikkut naatsorsuuserisarnermullu tunngassuteqartut pillugit inatsisitigut tunngavissat ullumikkornit allaanerunissaat. KNR-ip kaammattuutigaa, aningaasaqarnikkut naatsorsuuserisarnermullu malittarisassat nalinginnaasut ingerlatseqatigiiffinnut pisussaafiusut KNR-ip malittariaqarai (ukiumoortumik naatsorsuusiortarnissamut inatsit). KNR-ip maannamut tunngavilersuutai saqqummiunneqartut aallaavigalugit aalajangersakkat taakkua allanngortinneqarnissaat pissusissamisoorsorineqanngilaq. KNR peqquneqarpoq kissaatigisaminut tunngavilersuutinik itisilereqqullugu taakkununngalu erseqqissunik siunnersuusioqqullugu. Maleruagassanut allanut tunngavilersuutinik erseqqissarluakkanik saqqummiussisoqassagaluarpat, siunnersuutip aalajangiiffigineqalinnginnerani taakkua siunnersuummut Naalakkersuisut ilanngunniarumaarpaat.


Kapitali 5-imut:

Sumiiffinni radioqarfinni tv-qarfinnilu aallakaatitassiortarnerni oqaatsit atorneqartut agguataagaanerat:

KNR allappoq, sumiiffinni aallakaatitsisarfinnut oqaatsit atorneqartut agguataarneqartarnissaannut piumasaqaasiortoqartariaqartoq, aallakaatitsisinnaanermut akuersissummik pissarsinissamut piumasaqaataasussanik. Tamatumunnga erseqqissaatigineqassaaq, oqaatsit atorneqartut agguataagaanissaannut piumasaaateqarnissaq pissusissamisoorsorineqanngimmat. Pingaarnerutinneqarpoq, sumiiffinni aallakaatitsiviit sumiiffinni innuttaasut najukkami nutaarsiassanik ilisimatittassagaat sumiiffinnilu innuttaasut saqqummiussaqartarnissaannik periarfissittassagaat. Ilimagineqarpoq, aallakaatitsisarfiit ataasiakkaat aallakaatitassiortarnertik oqaatsinik atuisut sullitatik aallaavigalugit aallakaatitassiortassasut taamaaliornikkullu oqaatsinik atuisut ikinnerussuteqartut, taamaattoqarfiusinnaasuni, pisariaqarfiatigut pingaartinniartassagaat.


Tapiissutinik aqutsineq:

KNR-ip isumaqatiginngilaa, sumiiffinni aallakaatitsivinnut tunngaviusumik aallakaatitassiortarnermullu tapiissutit aqunneqarnerat taakkununnga periarfissaatinneqassasoq, kaammattuutigalugulu tamassuma paarlattuanik Radio tv-lu pillugit ataatsimiititaliap aqutaanik tamanna pisassasoq. Tamatumunnga erseqqissaatigineqassaaq, tapiissutit tunniunneqartartut kinaassusersiunngitsumik tunngaveqarluni, taamaattumillu nalilerneqarluni tapiissutinik isiginiaavallaarani tulluanngitsumillu tunniussisoqartartoq.


Kapitali 6-imut:

Radio tv-lu pillugit ataatsimiititaliap suliassai inissititerneqarneralu:

KNR-ip kissaatigaa KNR-imut tunngatillugu ataatsimiititaliap suliassaasa erseqqissaavigineqarnissaat erseqqissaatigalugulu, Radio tv-lu pillugit ataatsimiitaliap ilaasortaanik toqqaanermi KNR-ip siunniussai isumaalu tusarniarneqarluassasut. Siunnersuummi ataatsimiititaliap suliassai erseqqissaatigineqarput. KNR illuatungeriit allat assigalugit ilaasortassanik inassuteqarnikkut siunnersuisinnaavoq, tamatumunngali tunngatillugu KNR immikkut inissisimatinneqassanngilaq.


Kapitel 7-imut:

Aallakaatitsiarnermi sivisussutsinut tamakkiisunut sanilliullugu pilerisaarisarnermut sivisussusissaat:

KNR-ip maluginiarsimavaa, pilerisaarutinik aallakaatitsinerit piffissap aallakaatitsiviusup 10 procentiinit sivisussuseqartarnissaat ilanngunneqaqqissimasoq, tamannalu KNR-ip siunissami aningaasanik isertitaqartalernissaanut killiliinertut KNR-ip nalilerpaa. Tamatumunga erseqqissaatigineqassaaq, KNR-imi paasissutissat pissarsiarineqartut tunngavigalugit paasineqarmat, maannamut killilersuisoqarsimannginnera, aammalu taamaattoqalernissaa imaaliallaannaq ilimagineqarsinnaanngitsoq. Taamaattumik aalajangersakkap allannguuteqartinneqarnissaa tunngavissaqartinneqarsimanngilaq.


KNR-ip pilerisaarisarnermutigut ingerlatsinera:

KANUKOKA-p KNR-ip pilerisaarutinik ingerlatsiinnarnissaanut periarfissinneqarnera ajornartorsiutitut nalilerpaa, tamannalu sumiiffinni radioqarfinnut tv-qarfinnullu tunngatinneqartariaqarsoralugu. Kalaallit aviisii siornatigut pilerisaarisarnermut pillugit maleruagassat ajornannginnerulersinneqarnerat naammagisimaarsimanngilaat. Tamatumunnga erseqqissaatigineqassaaq, KNR-ip pilerisaarutinik ingerlatsiinnarnissaa STTK-mit isornartorsiorneqarsimannginnera. Taamatuttaaq erseqqissaatigineqassaaq, siunnersuummi erseqqissarneqarmat, KNR-ip ingerlataani allani, tassunga ilaalluni pilerisaarutinik ingerlatsinera, unammilleqatigiinnermi atugassarititaasut malissagai. Pilerisaarisarnermut pillugit maleruagassat ajornannginnerulersinneqarnissaannik siunnersuutaaqqaartut siunnersuummit peerneqarput.

 

Peqqussutissatut siunnersuummi aalajangersakkanut ataasiakkaanut oqaaseqaatit

 

Kapitali 1-imut, Aallakaatitassiorsinnaatitaaneq.

Peqqussutip atuuttup kapitaliata 1-ip imarai aallakaatitassiat siaruarneqartarnerat agguarnerallu pillugit malittarisassat nalinginnaasut. Tassalu kapitalimi erseqqissarneqarpoq ingerlatsiviit suut silaannaap malingi atorlugit kikkunnut tamanut aallakaatitsisinnaanersut (§ 1), kikkullu inuit namminneq illuinut kabelit atorlugit aallakaatitanik siammaasinnaanersut, tassa kabelit atorlugit aallakaatitassiorneq (§ 3). Aalajangerneqarportaaq antennit ataatsimoorussat aallakaatitat pioreersut suut agguaassinnaaneraat (§2) - agguaatissaneraat (§ 4), ilanngullugulu teknikkimut tunnganerusutigut aqutsineq (§§-it 5-imiit 7-imut).

Peqqussutissatut siunnersuummi kapitali 1-ip 2-llu aalajangersakkat peqqussummi maanna atuuttumi kapitali 1-imi ataatsimoortinneqartut taarserpaat. Aalajangersakkat aallakaatitassiorneq pillugu kapitalimut (kapitali 1) aamma aallakaatitanik siammarterineq pillugu kapitalimut (kapitali 2) agguarneqarnissaat naleqquttuusorineqarpoq, siammarterinerup aallakaatitassiornertut isigineqannginnera tassuunakkut erseqqissuutinniarlugu.

Peqqussutissatut siunnersuummi kapitali 1-imi aalajangerneqarput kikkut aallakaatitassiornermik ingerlatsisinnaatitaanersut aammalu aallakaatitassiorneq suunersoq. Taakku saniatigut nassuiarneqarpoq radioqarfiit, antennit ataatsimoorussat kabelillu suunersut. Kiisalu teknikkikkut atortut, KNR-ip aallakaatitassianik tusarnaagassanik isiginnaagassanillu aallakaatitsineranut agguaaneranullu pisariaqartut ikkussornissaannik ingerlannissaannillu pisussaaffiliisumik aalajangersagaliortoqarpoq.

 

§ 1-imut

Peqqussummi maanna atuuttumi § 1-ip imaraa kikkut aallakaatitassianik tusarnaagassanik isiginnaagassanillu radioqarfiit aqqutigalugit inunnut tamanut siaruaanissamut pisinnaatitaanersut.

Peqqussummi "aallakaatitassianik tusarnaagassanik isiginnaagassanillu siaruaasarneq"-mik atuinerup allanngortillugu pisariillisarlugulu "aallakaatitarsiorsinnaatitaaneq"-mik taarserneqarnissaa siunnersuutaavoq. Tusarnaagassanik isiginnaagassanillu aallakaatitassiorneq § 2-mi allanneqarnermisuut aallakaatitassianik tusarnaagassanik isiginnaagassanillu radioqarfiit aqqutigalugit inunnut tamanut aallakaatitsinermut aammalu aallakaatitassianik tusarnaagassanik isiginnaagassanillu radioqarfitsigut aallakaatinneqanngitsunik antenneqarfiit ataatsimoorussat atorlugit agguaanermut ataatsimut taaguutaassaaq.

Aalajangersakkatut siunnersuummi siunertarineqarpoq aallakaatitat radiukkut tv-kkullu ingerlatsineq pillugu Inatsisartut peqqussutaatigut aqunneqartut ataatsimut isigalugu taajumallugit aallakaatitassiorsinnaatitaaneq, silaannaap malingi (aallakaatitsineq) imaluunniit kabelit atorlugit (agguaaneq) aallakaatitassiaagaluarpata assigiimmik.

Nr. 1-ip KNR-ip aallakaatitassiorsinnaatitaaneranik imaqartup taamaalilluni peqqussummi maanna atuuttumi § 1, imm. 1 aamma § 3, nr. 1 nangippai.

Nr. 2-p ingerlatseqatigiiffiit, peqatigiiffiit assigisaasalu kiisalu kommunit aallakaatitassiorsinnaanerannik imaqartup peqqussummi maanna atuuttumi ilaatigut § 1, imm. 2 aamma § 3, nr. 2, sumiiffimmi aallakaatitassiorsinnaanermik imaqartut nangippai. Kommunit aallakaatitassiorsinnaanerannut tunngatillugu qanoq pisoqartillugu kommunit aallakaatitsisinnaanermut akuersissummik pisinnaanerannut piumasaqaatit siunnersuummi § 13, imm. 2-mi ilanngunneqarput. Tassunga tunngatillugu aalajangersakkami tassungalu oqaaseqaatini itisilerineq innersuussutigineqarpoq. Nutaatut aamma atuutilersinneqarpoq nuna tamakkerlugu aallakaatitassiorsinnaanermut periarfissaq, tamanna Naalakkersuisunit akuersissutigineqarsimappat, tak. siunnersuummi § 14 tassungalu oqaaseqaatit.

Aamma nutaatut immikkoortoq 2, aallakaatitassiorsinnaatitaanerup Inatsisartut peqqussutaat peqqussullu naapertorlugu aalajangersakkat kiisalu aallakaatitsisinnaanermut akuersissummik tunineqarnermi piumasaqaataasimasinnaasut naapertorlugit ingerlanneqarnissaanik erseqqissaasoq ilanngunneqarpoq.

 

§ 2-mut

Aalajangersakkami erseqqissarneqarpoq aallakaatitassiorsinnaatitaaneq Inatsisartut peqqussutaanni qanoq isumaqartinneqarnersoq.

Aallakaatitassiorsinnaatitaanermut maannamutuut isumaqarpoq nammineerluni aallakaatitassiorsinnaatitaaneq imaluunniit aallakaatitassiat ilaannik, soorlu satellitsikkut aallakaatitaneersunik, videobåndineersunik, aallakaatitanit ataatsimoortuneersunik nammineerluniluunniit immiussaneersunik atuilluni aallakaatitassiamik aaqqissuussineq katiterinerlu. Aallakaatitassiamik suliaqartoq taamaalilluni aallakaatitamut akisussaassaaq. Taassuma paarlattoraa aallakaatitassianik tusarnaagassanik isiginnaagassanillu siammarterineq, tassa aallakaatitassiat tusarnaagassat isiginnaagassallu siammarterisumit namminermit aallakaatitassiarineqarsimanngitsut katiterneqarsimanngitsulluunniit, kisiannili aallakaatitassianik naammassereerlugit aaqqissuussanik avataaneersunik siammarterineq, taamaattumillu aamma aallakaatitassiat ataasiakkaat siammarterisumit akisussaaffigineqanngitsut.

Imm. 1-imi erseqqissarneqarpoq taaguutip "aallakaatitassiorsinnaatitaaneq"-p amerlanerusunut atugaanera, tassa imaappoq aallakaatitassiornermut ilaapput radioqarfiit atorlugit silaannakkut satellitsikkulluunniit aallakaatitsineq imaluunniit antennit ataatsimoorussat kabelinik atortullit aqqutigalugit agguaaneq.

Nr. 1-imi pineqarpoq maannakkut siaruaasarnermik paasinnittaaseq taaguummik aallakaatitsinermik maanna taarserneqartoq, - tassa silaannaap malingi atorlugit aallakaatitsisarneq kikkunnut tamanut siammakkamik aallakaatitsisarnerusoq aallakaatitsiviit nunamiittut atorlugit. Aallakaatitsinermik oqartarnermi pineqarportaaq satellitsit aqqutigalugit silaannaap malingi atorlugit aallakaatitsineq, ilaatigut satellitsit sunut tamanut siammaasartut, ilaatigullu satellitsit attaveqaqatigiinnermut atugaasut. Pingaarnerpaavoq aallakaatitassiat aallakaatitsisumit kikkunnut tamanut apuussinnaanngortissimanissaat - kodikkatut kodigaanngitsutulluunniit – immaqa satellitsi atorlugu antennit ataatsimoorussat aqqutigalugit agguaanneqarnissaat siunertaralugu. Pineqanngillalli radiumik aamma tv-mik ingerlatseqatigiiffiit aallakaatitassianik satellitsit attaveqatigiissutit atorlugit tigusisussap aallakaatitassiornerani ilaasussatut naatsorsuussanik paarlaateqatigiittarnerat, taamaaqataanillu tele atorlugu matoqqasumik ingerlatitseqqinnerit.

Nipi assilissallu atorlugit aallakaatitassiat maannamutuut isumaqarpoq aallakaatitassiat tusaaneqarsinnaasut imaluunniit takuneqarsinnaasut imaluunniit marluutillugit. Tassani aamma ilaapput tv-mi allagartaliussat. Internettikkut nipi assilissallu atorlugit paasissutissiineq aamma nipi assilissallu atorlugit aallakaatitassiatut isigineqassapput, taamatulli paasissutissiinerit aalajangersakkamut matumungamut ilaasutut isigineqassanngillat, internetti aallaaviatigut immikkoortumiit immikkoortumut paasissutissiinertut isigineqarmat tassa nalinginnaasuunani, soorlu tamanna aalajangersakkami tassani piumasarineqartoq. Taamaattumik assersuutigalugu qarasaasiani sinilikkani oqaasertat oqaasertallu ingerlatinneqarsinnaasut peqqussutip isumaa naapertorlugu nipi assilissallu atorlugit aallakaatitassiatut isigineqassanngillat.

Radioqarfiit, tassunga ilanngullugit satellitsit, atorlugit kikkunnut tamanut aallakaatitsisarneq Radiofrekvensit pillugit inatsisip Kalaallit Nunaanni atortuulersinneqarnera pillugu peqqussummut aamma ilaavoq. Tassani piumasaavoq radioqarfinnik taamaattunik pilersitsinerit i-ngerlatsinerillu tamarmik attaveqarnermut ministerimit akuerineqartassasut. Namminersornerullutik Oqartussat akuersissutit ulluinnarni akisussaaffigissavaat. Namminersornerullutik Oqartussat Tele Greenland A/S Kalaallit Nunaanni tele atorlugu attaveqarnermut akuersissummik tuninikuuaat, tak. Namminersornerullutik Oqartussat nalunaarutaat nr. 18, 22. november 1999-imeersoq Tele Greenland A/S-imut akuersissummut tunngasoq. Akuersissut pillugu nalunaarummi § 9, imm.1, nr. 2 malillugu Tele Greenland A/S-ip isumagisassaraa radiukkut fjernsynikkullu ingerlatsineq pillugu Inatsisartut peqqussutaat naapertorlugu akuersissummik tunniussisarnermi suliassanik ingerlatsineq. Akuersissummik tunisisup (Namminersornerullutik Oqartussat) akuersissummillu pigisaqartup (Tele Greenland A/S) akornanni pissutsit aqunneqarnissaat pillugit malittarisassat itisilerneqarnissaat siunertaralugu Namminersornerullutik Oqartussat Tele Greenland A/S ingerlatsinissamik isumaqatigiissuteqarfigisimavaat. Tamatumani ilaatigut oqaatigineqarpoq radiumik aqutsinermut tunngasut Tele Greenland A/S-imi sullissivimmi ataatsimi, Namminersornerullutik Oqartussat sinnerlugit innuttaasut tungaannut sinniisuusumi katersorsimasut.

Nr. 2-mi pineqarpoq kabelit atorlugit aallakaatitassiorsinnaatitaaneq, tassa imaappoq aallakaatitat antenninut ataatsimoorussanut toqqaannartumik atalersillugit aallakaatitassiorneq.

Imm. 2-mi nassuiarneqarpoq oqaaseq radioqarfiit. Nassuiaat oqaatsip maannamutuut paasineqartarneratut ippoq. Atortut suulluunniit pineqarneranni ilaatigut aamma ilanngunneqarput satellitsit, aamma tak. imm. 1, nr. 1-imut qulaani oqaaseqaatit.

Imm. 3-mi oqaasiliorneratigut pisariillisaasoqarpoq oqariartaatsit nalinginnaasut naapertorlugit, tassalu antennit ataatsimoorussat kabelillu allat aallakaatitanik ininut nammineq najukkatut atorneqartunut agguaassissutaasartut tamarmik peqqussummi taaguusigaapput antennit ataatsimoorussat. Ininik nammineq inigisatut atorneqartunik oqarnermi pineqarput inoqutigiit namminerisamik najugallit. Init allat aallakaatitanik pilersugaanerat peqqussutip avataaniippoq. Tamatumani assersuutigalugu pineqarput init pisiniarfittut, isersimaartarfittut saqqummersitsisarfittullu atorneqartut, hotelit initai aamma init napparsimasunut, sullitanut inissiivinnilu inissitanut atugaasut.

Imm. 4 nutaajuvoq. Oqaatsip "kabel"-ip nassuiaaserneqarnissaa pissusissamisoorsorineqarpoq, peqqussummimi aalajangersakkani arlalinni taanna atorneqarmat. Kabelit tassaatinneqarput radiumut attaveqarnermut atortunut ledningeqanngitsunut imm. 2-mi nassuiarneqartunut paarlattuusut, kabelilli ledningeqartuusut nalunaarasuartarnikkut aallakaatitanik nassiussuisinnaalersitsisinnaasut.

Telefonikkut oqarasuartaatikkullu sukkasuumik atassuteqaatit aamma "kabelinut" ilaapput. Telefonikkut oqarasuartaatikkullu sukkasuumik atassuteqaatit atorlugit aallakaatitassiorneq taamaallaat pisinnaavoq atassuteqaatit taakku nipi aamma assilissat atorlugit aallakaatitassiornermi sumiiffinnut inuinnaat najugaqarfiinut tamanut agguaanneqartussanngortinneqarpata, tamanna imm. 3-mi aalajangersarneqarmat.

 

§ 3-mut

Aalajangersakkap peqqussummi maanna atuuttumi § 5 nangippaa. Aalajangersakkamulli tassunga tunngatillugu allannguutigitinneqarpoq Kalaallit Nunaanni Nalunaarasuartaaserisoqarfiup ima oqaasertalimmik taarserneqarnera "Nalunaarasuartaatitigut attaveqarneq aamma nalunaarasuartaateqarnermi sullissinerit pillugit Inatsisartut peqqussutaat naapertorlugu pisortat nalunaarasuartaatitigut sullissineranni atortunik pilersitsisinnaanermut ingerlatsisinnaanermullu kiisalu taakkuninnga neqerooruteqarsinnaanermut akuersissummik tunineqarsimasup". Akuersissummik tunineqarsimasoq maanna tassaavoq Tele Greenland A/S, akuersissutilli selskabimut allamut siunissami tunniunneqarsinnaanera eqqarsaatigalugu taama oqaasertaliineq toqqarneqarpoq. Aammattaaq § 2-mut nutaamut siunnersuutip kingunerisaanik allannguuteqartitsisoqarpoq.

Immikkoortoq 2-mi nutaatut aalajangersarneqarpoq atortunik pineqartunik ikkussuinissamut ingerlatsinissamullu piumasaqaatit sullissinissamik isumaqatigiissummi Naalakkersuisunit akuerineqartussami aalajangersarneqassasut. Sullissinissamik isumaqatigiissut KNR-ip akuersissummillu piginnittup isumaqatigiissutigissavaat. Isumaginnittuunissamik isumaqatigiissut Tele Greenland A/S-ip, KNR-ip, KIIIP-ip aamma Ineqarnermut Attaveqaqatigiinnermullu Pisortaqarfiup ukiuni kingullerni isumaqatigiissutigisarsimavaat. Taanna isumaqatigiissuteqaqatigiissussat taakku marluk, tassa akuersissummik piginnittup KNR-illu sullissinissamik isumaqatigiissutigisaligassaannik taarserneqarpoq.

Naalakkersuisut immikkoortoq 3-mi piginnaatinneqarput sullissinernut akiliutissat, akuersissummik piginnittup immikkoortoq 1 naapertorlugu akiligassaasa naatsorsornissaannut tunngavissanut akiliuteqarnissamullu piumasaqaatinut maleruagassanik erseqqinnerusunik aalajangersaanissamut. Aalajangersakkap peqqussummi maanna atuuttumi § 5, imm. 2 taarserpaa. Naalakkersuisut taanna aqqutigalugu periarfissaqarput taakkuninnga aaqqiinissamut, akuersissummimmi piginnittoq KNR-ilu taakku pillugit isumaqatigiinngissuteqalissappata taamaaliornissaq pisariaqalersinnaavoq.

 

Kapitali 2-mut. Tusarnaagassianik isiginnaagassianillu siammarterisarneq.

Kapitali 2-mi ataatsimoortinneqarput tusarnaagassianik isiginnaagassianillu siammarterisarneq pillugu aalajangersakkat. Tusarnaagassianik isiginnaagassianillu siammaterisarneq pillugu aalajangersakkat peqqussummi maanna atuuttumi kapitali 1, §§-ini 2-miit 4-mut aamma § 7-imi allassimapput.

Maleruagassanut maanna atuuttunut sanilliullugu § 4-tut nutaatut ilanngunneqarpoq tusarnaagassianik isiginnaagassianillu Kalaallit Nunaannersunik nunanillu allaneersunik siammarterisarnerup nassiussissutit digitaliusut atorlugit pisinnaaneranik aalajangersagaq.

Aallakaatitassiat tusarnaagassat isiginnaagassallu antennit ataatsimoorussat atorlugit siammarterneqartut allagartalersorneqarsinnaanerat allatulluunniit nutserneqarsinnaanerat periarfissatut nutaatut atuutilersinneqarpoq, radiumik fjernsynimilluunniit ingerlatsiviup pineqartup taamaaliornissaq akuersissutigippagu, tak. siunnersuummi § 5, imm. 2.

Aamma aallakaatitassiat ataatsimoortut pillugit aalajangersaasoqarpoq, tassa taakkuninnga neqerooruteqartut pisussaaffilerneqarlutik aallakaatitassiat poortakkuutaartut tamarmik KNR-ip pisortat sullissineranni aallakaatitaanik aamma sumiiffimmi aallakaatitanik imaqarnissaat qulakkiissagaat, aammalu ataatsimoortunik ataasiinnarnik aallakaatitanik taakkuninnga imaluunniit aallakaatitanik taakkuninnga aallakaatitanillu allanik imaqartunik pisisoqarsinnaanissaa, taakkulu aallakaatitat ataatsimoortut akiata tamarmiusup ilaannannguanik akeqarnissaat qulakkiissagaat. Siunnersuummi § 7, imm. 2 aamma 3 taakkununngalu oqaaseqaatit innersuussutigineqarput.

Antenninik ataatsimoorussanik kabelinillu allanik ikkussinissamut ingerlatsinissamullu maleruagassiorsinnaanermut Naalakkersuisunut piginnaatitsissut atuuttoq peqqussummi maanna atuuttumi § 6-imiittoq peerneqarpoq. Tassunga taarsiullugu ilanngunneqarpoq antennini ataatsimoorussani dekoderinik atuisinnaaneq pillugu aalajangersagaliorsinnaanermik Naalakkersuisunut piginnaatitsissut. Siunnersuummi § 8 tassungalu oqaaseqaatit innersuussutigineqarput.

 

§ 4-mut

Imm. 1-imi erseqqissarneqarpoq tusarnaagassianik isiginnaagassianillu Kalaallit Nunaanneersunik nunanillu allaneersunik digital atorlugu aallakaatitsissutit aqqutigalugit nuna tamakkerlugu siammarterineq Naalakkersuisut akuersissuteqarnerisigut taamaallaat pisinnaasoq. Tusarnaagassianut isiginnaagassianullu nunanit allaneersunut ilaatinneqarputtaaq danskit tusarnaagassiaat isiginnaagassiaallu.

Akuersissut aallakaatitsisinnaanermut akuersissutitut isigineqassanngilaq, tassanimi taamaallaat pineqarmat siammarterineq.

Akuersissuteqartoqarnissaanik piumasaqaammut patsisaavoq Naalakkersuisut qulakkeerusummassuk nuna tamakkerlugu siammarterinerup siunertarineqanngitsunik KNR-imut, sumiiffinni radioqarfinnut tv-qarfinnullu aammalu aallakaatitsivinnut allanut nuna tamakkerlugu radiukkut tv-kkullu aallakaatitassiorsinnaanermut akuersissummik peqarsimasinnaasunut sunniuteqarnerlunnginnissaa. Akuersissuteqartoqarnissaanik piumasaqaat aamma periarfissiivoq Naalakkersuisut piumasaqaatinik, matumani aamma akuersissutip akuersissuteqarfigineqarnermut akiliuteqarnissamik piumasaqaatitaqartinneqarnissaanik aalajangersaasinnaanissaannut, tamanna pillugu tak. imm. 2-mut 3-mullu tunngatillugu ataani.

Tusarnaagassianik isiginnaagassianillu nunanit allaneersunik oqarnermi maannamutuut pineqarput aallakaatitat nunani allani radiukkut siammarteriviit, ingerlatseqatigiiffiit aallakaatitassiornermik suliallit assigisaasalu aallakaatitaat tamaasa, oqaatsit sorliit aallakaatitani atorneqarnerat apeqqutaatinnagu.

Naalakkersuisut akuersissuteqarnermut piumasaqaatinik aalajangersaasinnaanerat imm. 2-mi periarfissinneqarpoq. Taakku tassaasinnaapput KNR-imik aamma radioqarfinnik tv-qarfinnillu allanik suleqateqarnissamik, teknikkikkut atortunik aalajangersimasunik atuinissamik, piffissap akuersissuteqarfiup sivisussusissaa pillugu, aallakaatitsinerit peqatigisaannik allannguuteqartitsinanilu ingerlateqqiinerup ingerlanneqarnissaanik aamma piginnittuunermut killilersuutaasinnaasunik piumasaqaatit.

Imm. 3-kkut periarfissiissutigineqarpoq akuersissuteqarfigineqarnermut akiliutip Naalakkersuisunit angissusilerneqartup akilerneqarnissaa Naalakkersuisut akuersissuteqarnermi piumasarisinnaagaat. Tassunga tunngaviuvoq nuna tamakkerlugu siammarterisinnaanermut akuersissuteqarfigineqarneq isertitaqarnissamut periarfissiinermik ilaqarmat. Akuersissuteqarfigineqarnermut akiliut taamaalilluni tassaasinnaavoq landskarsip isertitassaasa ilassaat imaluunniit KNR-ip aamma radioqarfiit tv-qarfiillu allat isertitassaraluamikkut annaasaannut taarsiissutissaq.

Naalakkersuisut sunik pisoqartillugu akuersissummik atuukkunnaarsitsisinnaanerat imm. 4-mi periarfissinneqarpoq.

Imm. 5-imi Naalakkersuisut periarfissinneqarput akuersissummik tunniussinissamut maleruagassanik aalajangersaanissamut. Periarfissiissut taanna aqqutigalugu Naalakkersuisut ilaatigut aalajangersarsinnaassavaat neqerooruteqarnissamik pilersaarusiornermut ingerlatsinermullu maleruagassat.

 

§ 5-imut

Aallakaatitat tusarnaagassiat isiginnaagassiallu siullertut tiguneqarsinnaapput nammineq inigisami antenni radiumut tv-mulluunniit ikkuteriigaq imaluunniit nammineq antennerisaq atorlugit. Nammineq tigusinermut ilaapput kalaallit nunanilu allamiut aallakaatitassiaat. Aappaattut aallakaatitat tiguneqarlutillu agguaanneqarsinnaapput kabelit atorlugit qitiusumik tigoriarlugit atuisunut atassuserneqarsimasunut agguarlugit. Taaneqartoq kingulleq peqqussutissatut siunnersuummi § 5-imi pineqarpoq.

Radioqarfiit radiukkut tv-kkullu aallakaatitanik tigusisarnermut atugaasut peqqussut manna atorlugu aqunneqanngillat, kisiannili Radiofrekvensit pillugit inatsisip Kalaallit Nunaanni atortuulersinneqarnera pillugu peqqussummi, nammineq tigusisarnermut aammalu antennit ataatsimoorussat atorlugit tigusisarnermut atortut teknikkikkut qanoq ittuunissaannik piumasaasunik imaqarnerusumi aalajangersakkaniillutik. Tamatumunnga tunngasut Tele Greenland A/S-ip maanna isumagisarai.

Peqqussummi maanna atuuttumi § 2, imm. 1-imi aalajangersarneqarpoq antennit ataatsimoorussat taamaallaat aallakaatitanik (KNR-imeersunik sumiiffinnilu aallakaatitsivinneersunik) peqqussummi § 1-imi pineqartunik, atortut antenniat iluaqutigalugu toqqaannartumik tigoorarneqartunik siammarterinermut atorneqarsinnaasut. Tamatuma saniatigut KNR-ip sumiiffinnilu aallakaatitsiviit nammineerlutik aallakaatitassiaat peqqussummi maanna atuuttumi § 3, kikkut kabelit atorlugit namminersortumik aallakaatitassiorsinnaanerannik imaqartoq naapertorlugu atortunut toqqaannartumik ingerlatinneqarsinnaapput.

Aammattaaq atortut aallakaatitanik nunanit allaneersunik, antenni aqqutigalugu toqqaannartumik tigoorarneqartunik siammarterinermut atorneqarnissaat peqqussummi maanna atuuttumi § 2, imm. 1 naapertorlugu ajornanngilaq.

§ 5-itut siunnersuut peqqussummi maanna atuuttumi § 2, imm. 2-mik nangitsineruvoq. Antennit ataatsimoorussat aallakaatitanik naammassillugit aaqqissuunneqarsimasunik avataaneersunik siammarterinermut atorneqarsinnaanerat aalajangersakkami maleruagassiuunneqarpoq. Tamanna imatut paasisariaqarpoq aallakaatitanik tusarnaagassanik isiginnaagassanillu Kalaallit Nunaanneersunik nunanillu allaneersunik siammaterineq toqqaannartumik allannguuteqartitsinanilu ingerlatitseqqiinikkut pissasoq. Aallakaatitat piffissami allami aallakaatinneqarsinnaanerat periarfissaajuassaaq, nutaatullu periarfissaalissaaq aallakaatitassianik allagartalersuisinnaaneq, tamanna radiumik tv-milluunniit ingerlatsivimmit pineqartumit akuersissutigineqarsimappat, erseqqissarneqassaarli aalajangersagaq aallakaatitassiortut allat aallakaatitaat tunngavigalugit aallakaatitamik nutaamik aaqqissuinissamik periarfissiinngimmat. Aammattaaq erseqqissarneqassaaq radiumik tv-milluunniit ingerlatsiviup pineqartup akuersinera aallakaatitassianik allagartalersuinissap piffissamiluunniit allami siammaterinissap inerteqqutaannginnissaanut imminermini naammanngimmat, tassami piginnittooqqaarnissamut inatsimmi aamma piumasaqaataammat piginnittooqqaartut, eqqumiitsuliortut il.il. suliaat aallakaatitassiani ilaatinneqartillugit taakku akuersisinneqaqqaartussaammata.

 

§ 6-imut

Imm. 1-imi aalajangersakkap peqqussummi maanna atuuttumi § 4, imm. 1 nangippaa. Allannguutaavoq erseqqissarneqarmat, must carry-mik taaneqartartoq atorlugu pisussaaffik taamaallaat KNR-ip pisortat sullissineranni aallakaatitassiaanut atuuttoq, tassa KNR-ip aallakaatitassianik allanik siunnersuummi § 29, imm. 1 malillugu ingerlatsineranut atuunnani. Taassuma saniatigut erseqqissarneqarpoq pisussaaffik aamma atuutinngitsoq atuisut KNR-ip aallakaatitassiai antennit ataatsimoorussat aqqutiginagit allatut tigoorarsinnaappatigit. Must carry atorlugu pisussaaffiup KNR-ip pisortat sullissineranni aallakaatitassiornerinnaanut tunngasuuneranut patsisaavoq aallakaatitassiorneq taanna kisimi tassaammat innuttaasunut neqeroorutigineqartussatut inuiaqatigiinnit immikkut soqutiginaatilik.

Aalajangersakkami maannamutuut pineqarput antennit ataatsimoorussat tamarmik, atassusertissimasut qassiuneri apeqqutaatinnagit.

Imm. 2-mi aalajangersagaq nutaajuvoq, teknikkikkullu ineriartornermik pissuteqarluni. Aatsaat digital atorlugu aallakaatitassianik allanik siammaterisoqarpat KNR-ip aallakaatitassiaanik digitaliusunik siammaterinissamik pisussaaffeqartoqarneranut pissutaavoq, antennit aallakaatitassianik digitaliusunik aallakaatitsinissamut sanaajusimanngippata tamanna antenninik pineqartunik piginnittup aallakaatitassianik digitaliusunik aallakaatitsisarnissaanut annertuallaamik aningaasartuuteqarfiussammat.

 

§ 7-imut

Imm. 1-imi aalajangersakkap peqqussummi maanna atuuttumi § 4, imm. 2 oqaasertaa allanngulaarlugu nangippaa. Aalajangersakkakkut qulakkeerniarneqarpoq antennit ataatsimoorussat kanalinik marlunnit amerlanerusunik kanaleqarpata must carry-mik taaneqartartoq atorlugu pisussaaffiup sumiiffinni aallakaatitat maannamutuut aamma imarissagai.

Imm. 2-mi aalajangersagaq nutaajuvoq. Aalajangersakkakkut pinngitsoortinniarneqarpoq atuisut aallakaatitassianik antennit ataatsimoorussat aqqutigalugit siammaterneqartussaasut isiginnaarsinnaajumallugit aallakaatitassianik poortanik, soorlu tv-kanalinik akiliilluni isiginnaarneqarsinnaasunik akisuunik imaqartunik pinngitsaalineqarlutik pisisinneqarnissaat.

 

§ 8-mut

Aalajangersakkap imarisaa nutaajuvoq. Aalajangersakkap siunertaraa Naalakkersuisut periarfississallugit antennini ataatsimoorussani dekoderinik atorfissaqartitsisoqassappat taamaattut atorneqarsinnaanerinut maleruagassanik aalajangersaanissamut.

 

Kapitali 3-mut, Aallakaatitsisinnaanermut akuersissut.

Kapitalimi tassani ataatsimoortinneqarput aallakaatitsisinnaanermut akuersissutit, tassa nuna tamakkerlugu aamma sumiiffinni aallakaatitsisinnaanermut akuersissutit tunniunneqartarneri pillugit aalajangersakkat. Kapitalip taarserpaa peqqussummi maanna atuuttumi kapitali 3, sumiiffinni radiukkut fjernsynikkullu aallakaatitsisarnerinnarmik imaqartoq.

Kapitalip imarai kikkut aallakaatitsisinnaanermut akuersissutinik tunniussisartuunerannik, aallakaatitsisinnaanermut akuersissutip qanoq annertutigineranik sivisussusianillu aalajangersakkat, qinnuteqarnissaq pillugu aalajangersakkat, aallakaatitsisinnaanermut akuersissummut atatillugu immikkut pisussaaffiit pillugit aalajangersakkat kiisalu aallakaatitsisinnaanermut akuersissutit qanoq ittunik pisoqartillugu atorunnaarsinneqarsinnaaneri pillugit aalajangersakkat.

Naalakkersuisut nuna tamakkerlugu aallakaatitsisinnaanermut akuersissutinik tunniussaqartartutut inissinneqarput, taavalu Radio tv-lu pillugit ataatsimiititaliaq nutaaq sumiiffinni aallakaatitsisinnaanermut akuersissutinik tunniussaqartartutut inissinneqarluni.

Nuna tamakkerlugu aallakaatitsisinnaanermut akuersissut qinnuteqartoqarneratigut tunniunneqartassaaq. Naalakkersuisut akuersissuteqarnermut atatillugu tassunga atugassarititaasunik aalajangersaasinnaapput, matumani aamma akuersissummik tunineqarnermut akiliuteqartarnissamut tunngasut pillugit. Sumiiffimmili aallakaatitsisinnaanermut akuersissut pineqarsinnaassaaq peqqussumi aalajangersakkat taama tunineqarnissamik imaqartut naammassisimagaanni.

Nutaatut periarfissiisoqarpoq sumiiffimmi aallakaatitsisinnaanermut akuersissummik tunineqarnissamik qinnuteqartoqartillugu kommunit qanigisat iluanni aamma aallakaatitsisinnaanermut akuersissummik tunniussisoqarsinnaalerluni.

Aammattaaq sumiiffinni akuersissutinik piginnittut arlallit aallakaatitseqatigiissinnaanerat ammaanneqarpoq, taamaaliornissamut piumasaqaatit erseqqinnerusumik taaneqartut naammassineqarsimappata.

Nutaatut peqqussummi aalajangersarneqarpoq, aallakaatitsisinnaanermut akuersissut aammattaaq Radiofrekvensit pillugit inatsisip Kalaallit Nunaanni atortuulersinneqarnera pillugu peqqussut malillugu frekvensimik atuisinnaanermut akuersissummik imaqartoq.

Aammattaaq piffissat aallakaatitsisinnaanermut akuersissutit atuuffiisa peqqussutikkoortumik aalajangersarneqarnissaat nutaajuvoq.

Aamma peqqussummi nutaatut ilanngunneqarpoq aallakaatitsisinnaanermut akuersissummik tunineqarnissamik qinnuteqaat sunik imaqassanersoq.

Aallakaatitsisinnaanermut akuersissummik atorunnaarsitsinissamut periarfissat peqqussummut maanna atuuttumut sanilliullugit annerulersinneqarput. Atorunnaarsitsisinnaanerup akuersissummik tunniussaqarsinnaaneq maliinnarpaa.

 

§ 9-mut

Aalajangersakkap imarisaa nutaajuvoq.

Imm. 1-imi aalajangersagaq aqqutigalugu periarfissiisoqarpoq KNR-ip saniatigut radioqarfiit tv-qarfiillu allat nuna tamakkerlugu aallakaatitsisinnaanermut akuersissummik tunineqarsinnaanngorlugit. Oqaatigineqassaaq akuersissut kommunimut tunniunneqarsinnaanngimmat. Aalajangersagaq § 14-imut attuumassuteqarpoq, tassani allanneqarsimallutik akuersissummik tunniussaqarnissami piumasaqaatit.

Naalakkersuisut imm. 2-kkut piginnaatinneqarput akuersissummik tunniussaqarnerminnut atatillugu tassunga atugassarititaasunik aalajangersaanissamut, matumani aamma akuersissummik tunineqarnermut akiliuteqartarsinnaanermut tunngasunik. Tassunga tunngaviupput aallakaatitsisinnaanermut akuersissutip tunniunneqarnerani aallakaatitassiornermik ingerlataqarnerup imarisaanut tunngatillugu KNR-ip pineqartarneratuulli pisussaaffiliisoqartannginnera, aammalu pilerisaarutinik nioqquteqarnissamut aallakaatitassiornermillu ingerlataqarnikkut allanik isertitaqarnissamut annertungaatsiartunik periarfissiisoqarnera. Tassa imaappoq akuersissummik tunineqarnermut akiliuteqarnissamik piumasaqaateqarnissaq pilerisaarutinik nioqquteqarnerup unammillerfiunerulerneratigut KNR-ip sumiiffinnilu radioqarfiit tv-qarfiillu isertitassatigut annaasaqarnissaannut taarsiissuteqarumanermik pissuteqarsinnaavoq.

Naalakkersuisut imm. 3-mi periarfissinneqarput nuna tamakkerlugu aallakaatitsisinnaanermut akuersissummik tunineqarnermut atatillugu piumasaqaatit atugassarititaasullu suut atuutissanerinik maleruagassiornissamut. Piumasaqaatilli peqqussummi aalajangersarneqartut Naalakkersuisunit avaqqunneqarsinnaassanngillat, tak. § 14.

 

§ 10-mut

Peqqussummi maanna atuuttumi § 18 naapertorlugu Kultureqarnermut, Ilinniartitaanermullu Pisortaqarfiup ingerlatseqatigiiffiit, peqatigiiffiit assigisaallu kiisalu kommunit, sumiiffiit aalajangersimasut iluanni radioqarfiit atorlugit radiukkut fjernsynikkullu aallakaatitsisinnaanermut akuersissutinik tunisinnaavai. Sumiiffinni aallakaatitsisinnaanermut akuersissutinik tunniussisartuunerup Radio tv-lu pillugit ataatsimiititaliamut isumagisassanngortinneqarnissaa siunnersuummi § 10-mi siunnersuutigineqarpoq. Akuersissuteqarnissap qinnuteqaammik tunngaveqarnissaa imm. 1-imi erseqqissarneqarpoq.

Sumiiffimmi aallakaatitsisinnaanermut akuersissutip nunap assingatigut sumut killeqarnera imm. 2-mi aalajangersarneqarpoq. Tassani allassimavoq maannamutuut aallaaviusussaq tassaasoq akuersissutip kommunimi pineqartuinnarmi atuunnissaa. Nutaatulli periarfissiisoqarpoq pissutsit immikkut ittut atuutsillugit kommunit qanigisat iluanni aamma aallakaatitsisinnaaneq Radio tv-lu pillugit ataatsimiititaliamit akuersissutigineqarsinnaanngorluni. Taamatut qinnuteqaatinik suliaqarnissami Radio tv-lu pillugit ataatsimiititaliaq naliliinermini ilaatigut teknikkimut tunngasut pingaarutaat apeqqutaatillugit ataatsimut naliliisartussaassaaq. Tamatuma saniatigut aamma pingaaruteqassaaq apeqqusissallugu aallakaatitsisinnaanermut akuersissut annertusisaq annertuumik akornutaassangatinneqarnersoq, aammalu kommunit qanigisat radioqarfinnik tv-qarfinnilluunniit peqareernersut. Kommunimi qanigisami kommunalbestyrelsip akuersissut annertusisaq taamaattoq itigartitsissutigisinnaassanngilaa.

Sumiiffinni akuersissutinik piginnittut arlallit aallakaatitanik aallakaatitseqatigiissinnaanerat pillugu peqqussummi maanna atuuttumi inerteqqut imm. 3-mi aalajangersagaq aqqutigalugu aalajangiusimaneqarpoq.

Aallakaatitseqatigiinneq tassaavoq aallakaatitassiap radioqarfinni tv-qarfinniluunniit arlaqartuni ataatsikkut, imaluunniit piffissani annikitsuararsuaannarmik nikingasuni aallakaatinneqarnera.

Aallakaatitseqatigiinnissamut inerteqqummut tunngaviupput aallakaatitseqatigiinnikkut radiukkut fjernsynikkullu aallakaatitsineq ilaatigut sumiiffinni aallakaatitsiviit aallakaatitsivigisinnaasaattut akuersissutigineqartup ilumut annertusisinneqarneranik kinguneqarsinnaanera, ilaatigullu aamma ajornartorsiutigineqalersinnaammat sumiiffimmi radioqarfiup tv-qarfiulluunniit annerusup annerusutut inissisimanermigut kommunimi allami aallakaatitsivik alla unammillersinnaajunnaarsissinnaammagu, imaluunniit kommunimi allami aallakaatitsivik aalajangersimasumik suleqatigalugu aallakaatitat suunerinik aalajangiisuunermigut aallakaatitsivik sumiiffianut attuumassutaarutitissinnaammagu.

Taamaattorli aallakaatitseqatigiissinnaaneq imm. 3-mi ammaanneqarpoq, tassa akuersissummik piginnittut tamanna isumaqatigiissutigippassuk, aallakaatitseqatigiinnerillu ataasiakkaaginnaappata. "Aallakaatitanik assigiinnik ataatsikkut aallakaatitsinernik" oqarneq tassaavoq ataatsikkut aallakaatitsinerit nalinginnaasuunnginnissaat. "Ataasiakkaaginnaappatamik" oqarnermi pineqarpoq aallakaatitanik assigiinnik ataatsikkut aallakaatitsinerit piffissami killilimmi pisinnaanerat. Qanorpiaq sivisussuseqarnissaat siumut oqaatigereerneqarsinnaanngilaq, ataatsikkummi aallakaatinneqartup suunera apeqqutaassammat. Piumasaqaatit taakku naammassineqarpata aallakaatitseqatigiinnissamut inerteqqutaagaluartut ataqqineqartutut isigineqassapput.

Aallakaatitsisinnaanermut akuersissutaagallartunik tunniussaqarsinnaaneq imm. 4-mi periarfissinneqarpoq, aallakaatitassiat sumiiffimmi aalajangersimasumi piffissap sivikitsup iluani ataasiaannartumik pisunik imaqarpata. Aalajangersakkap siunertarai sumiiffinni akuersissummik peqarfiunngitsuni piffissap sivikitsup iluani pisut, aammalu aningaasaqarneq pissutsilluunniit allat pissutigalugit KNR-imit aallakaatitassiarineqarsinnaanngitsut radiukkut tv-kkullu aallakaatitassiarineqarnissaannut periarfissanik pitsanngorsaanissaq. Tamakku tassaasinnaapput timersornerit, soorlu nuna tamakkerlugu pissartanngorniunnerit, qinersinerit pillugit aallakaatitat il.il.

 

§ 11-mut

Imm. 1-imi nutaatut aalajangersarneqarpoq aallakaatitsisinnaanermut akuersissut aallakaatitassiornermik ingerlataqarnissamut akuersissutaanermi saniatigut aamma tassaassasoq Radiofrekvensit pillugit inatsisip Kalaallit Nunaanni atortuulersinneqarnera pillugu peqqussut naapertorlugu frekvensimik atuisinnaanermut akuersissut. Maannamut marloqiusamik akuersissuteqartarneq tassuunakkut atorunnaarsinneqassaaq. Tassa imaappoq oqartussaasup akuersissummik tunniussaqartussap isumagissavaa aallakaatitsisinnaanermut akuersissummik qinnuteqaat tiguneqarpat qinnuteqartoq sinnerlugu frekvensimik atuisinnaanermut akuersissummik qinnuteqassalluni.

Aalajangersagaq sumiiffinnut nunalu tamakkerlugu aallakaatitsisinnaanermut akuersissutinut tunngasuuvoq.

Oqaatigineqassaaq aallakaatitsisinnaanermut akuersissummik pisariaqartitsisoqarani taamaallaat frekvensimik atuinissamut akuersissummik pisariaqartitsisoqarsinnaasoq. Taamaattoqarsinnaavoq aallakaatitanik frekvensi atorlugu siammarterisoqassatillugu, kisiannili tassa aallakaatitassiortoqassatinnagu. Taamaattoqartillugu pineqartoq frekvensimik atuisinnaanermut maleruagassat atuuttut naapertorlugit taamaattumik qinnuteqassaaq. Frekvensimik atuisinnaanermut akuersissut pisuni taamaattuni aallakaatitsisinnaanermut akuersissummut ilaanngimmat qinnuteqaat Radio tv-lu pillugit ataatsimiititaliamut tunniunneqaranilu tassannga suliarineqassanngilaq, kisianni ingerlatsisoqarfimmut frekvensimik atuisinnaanermut akuersissutinik isumaginnittuusumut toqqaannartumik tunniunneqassalluni, tamanna pillugu tak. § 2-mut oqaaseqaatit.

Piffissat aallakaatitsisinnaanermut akuersissutit atuuffiisa sivisussusii peqqussummi nutaatut imm. 2-mi aalajangersarneqarput. Peqqussut maanna atuuttoq naapertorlugu sumiiffinni aallakaatitsisinnaanermut akuersissutit piffissani, radiunut tunngatillugu sivisunerpaamik ukiunik pingasunik sivisussusilinni fjernsyninullu tunngatillugu sivisunerpaamik ukiunik tallimanik sivisussusilinni atuuffeqartarput, piffissami akuersissutip naaffiani sivitsuisoqarsinnaalluni.

Nuna tamakkerlugu aallakaatitsisinnaanermut akuersissummut tunngatillugu Naalakkersuisut akuersissuteqarnermut atatillugu tamatuma sivisussusissaa piumasaqaatitut aalajangersinnaavaat, tak. siunnersuummi § 9, imm. 2.

 

§ 12-imut

Imm. 1-imi aalajangersakkami aalajangerneqarpoq aallakaatitsisinnaanermut akuersissummik tunineqarnissamik qinnuteqaat sunik imaqassanersoq. Tamanna aamma peqqussummi maanna atuuttumi § 19, imm. 2-mi piumasaqaataavoq, kisiannili qinnuteqaatip sunik imaqarnissaa § 12-imut siunnersuummi erseqqinnerujussuarmik nassuiarneqarpoq. Qinnuteqaatilli sunik imaqarnissaa radiukkut fjernsynikkullu aallakaatitsisarneq pillugu Namminersornerullutik Oqartussat nalunaarutaanni nr. 34, 26. november 1991-imeersumi erseqqingaatsiartunik maannamut maleruagassaqarsimavoq. Tassunga taarsiullugu maanna peqqussummi imminermi erseqqissumik aalajangersagaliornissamik siunnersuuteqarnermut patsisaavoq sumiiffimmi aallakaatitsisinnaanermut akuersissummik tunineqarnissamut pisinnaatitaanermut aalajangiisuummat taamatut piumasaqaatinik naammassinnissimanissaq. Piumasaqaatit taakku ilagaat qinnuteqaammut uppernarsaatissatut piumasaqaatit naammassineqarsimanissaat, tak. siunnersuummi § 13, imm. 1, nr. 2.

Nr. 1-ip siunertaraa qinnuteqartup kinaassusiata erseqqissuunissaa, taassumalu attavigineqarnissaanut periarfissat.

Nr. 2-p siunertaraa qinnuteqartup piumasaqaatinut inuussutissarsiummik ingerlataqarneq pillugu inatsimmi suliffeqarfinnik nalunaarsuisarneq pillugu aalajangersarneqarsimasunut tunngatillugu kinaassusiata paasineqarnissaa. Radioqarfiit tv-qarfiillu aallakaatitsiviit aningaasalersornissaannut tunngavissat ilaattut inuussutissarsiummik ingerlataqarsinnaapput. Aallakaatitsiviit inatsisinut naapertuuttumik inuussutissarsiummik ingerlataqarnerat nakkutigisinnaassagaanni inuussutissarsiummik ingerlataqarneq pillugu Inatsisartut inatsisaanni piumasaqaatinik naammassinnissimassapput, taamaattoqarneralu ajornannginnerpaamik nakkutigineqarsinnaavoq IIN-normuisa (Inuussutissarsiummik Ingerlataqartunik Nalunaarsuiffimmi normu) aammalu ingerlatsiveqarfittut normuisa qinnutiginerisigut.

Nr. 3-p siunertaraa erseqqissassallugu nuna tamakkerlugu aallakaatitsisarnissamik ingerlataqarnissamik qinnuteqaat Naalakkersuisunit suliassaanersoq, imaluunniit sumiiffimmi aallakaatitsisarnissamik ingerlataqarnissamik qinnuteqaat Radio tv-lu pillugit ataatsimiititaliamit suliassaanersoq.

Nr. 4-p siunertaraa erseqqissassallugu sumiiffik qanoq annertutigisoq aallakaatitsiviup pineqartup aallakaatitsinermini annguffissarissaneraa. Tamanna siunnersuummi § 10, imm. 2-mi aalajangersakkamut, sumiiffimmi aallakaatitsisinnaanermut akuersissutip kommunip pineqartup iluinnaani akuersissutigineqartarnissaanik imaqartumut sanilliullugu pingaaruteqarpoq.

Nr. 5-ip siunertaraa erseqqissassallugu aallakaatitassiornermik ingerlataq qanoq ittoq siunniussaanersoq, tassunga ilaalluni radio imaluunniit tv imaluunniit taakkua marluk tamarmik pineqarnersut.

Nr. 6-ip siunertaraa erseqqissassallugu aallakaatitsivik kimit pigineqarnersoq, aallakaatitsivillu qanoq aqunneqarnersoq. Tamanna aallakaatitsiviup tungaanit akisussaassusermik aalajangiisoqassatillugu aammalu aallakaatitsivik sinnerlugu kia avammut kiinnertartuunissaani pingaaruteqassaaq. Oqartussaasut akuersissummik tunniussisut paasissutissanut taakkununnga uppernarsaatissat, soorlu ileqqoreqqusat assigisaalluunniit, piumasarisinnaavaat.

Nr. 7 aallakaatitseqatigiinnissamut inerteqqut pillugu aalajangersakkamut tunngatillugu pingaaruteqarpoq, tassami piginnittuuneq imaluunniit sumiiffimmi aallakaatitsivimmik allamik aalajangersimasumik suleqateqarneq aallakaatitsiviit pineqartut aallakaatitseqatigiinnerisa ataasiakkaaginnaannginnerannik ersersitsisuusinnaammat.

Nr. 8-p siunertaraa suleqatigiinnissamik pilersaarutaasinnaasut pillugit ilisimatitsissuteqartoqarnissaa, soorlu KNR-imik, radioqarfinnik tv-qarfinnilluunniit allanik imaluunniit aallakaatitassiortartunik allanik.

Nr. 9-p siunertaraa aallakaatitsiviit ataasiakkaat aallakaatitaasa suunerinik aallakaatitsiviillu tamarmik aallakaatitaasa tamarmiusut suunerinik takussutissiisoqarnissaa.

Nr. 10-p siunertaraa aallakaatitsiviup pineqartup aallakaatitsinermik ingerlataqarnissani qaqugu ingerlanniarneraa takussutississallugu.

Nr. 11-p siunertaraa aallakaatitsiviit ataasiakkaat aningaasartuutaat isertitaallu, matumani aamma isertitaqarfinnit assigiinngitsunit isertitaasa qanoq annertutiginissaat pillugit paasissutissiisoqarnissaa, aamma landskarsimit tapiissutitigut aammalu pilerisaarisarnermutigut isertitatigut.

Nr. 12 nr. 4-mut attuumassuteqarpoq, siunertaraalu aallakaatitsiviit ataasiakkaat sunik teknikkikkut atortoqarnerannik takussutissiinissaq, tassuunakkut Radioforvaltningip qulakkiissammagit atortut atorneqartut akuerisaanerat, aammalu teknikkikkut periarfissat, matumani aamma atortut analogiusut digitaliusulluunniit atorneqarnersut.

Nr. 13-ip siunertaraa oqartussaasut akuersissummik tunniussaqartussat frekvensimik atuinissamut akuersissummik, qinnuteqartoq sinnerlugu qinnuteqarsinnaanissaat.

Imm. 2-p siunertaraa qulakkiissallugu akuersissummik qinnuteqartup aamma tassaanera aallakaatitsinermut akisussaasoq.

Imm. 3-p siunertaraa qulakkiissallugu oqartussaasut akuersissummik tunniussaqartartut paasissutissat akuersissutip tunniunneqarneranut pingaaruteqartut allannguutaat pillugit sukkulluunniit paasisinneqartarnissaat.

Imm. 4-p Naalakkersuisut piginnaatippai qinnuteqarnermi periusissaq aamma paasissutissat ilassutissat pillugit maleruagassiornissamut. Taakku tassaasinnaapput piffissat qinnuteqarnissamut killiliussat, uppernarsaatissanut piumasaqaatit il.il. Pisut ilaanni pisariaqarsinnaavoq peqqussummi taaneqartunut naleqqiullugu paasissutissat ilassutissaannik pissarsiniartariaqarneq. Assersuutigalugu tassaasinnaapput naatsorsuutinut tunngassuteqartut paasissutissat, aamma aallakaatitsiviup pineqartup ingerlanneqarnera qanoq aningaasalersorneqarnersoq.

 

§ 13-imut

Imm. 1-imi aalajangersakkami erseqqissarneqarpoq sumiiffinni aallakaatitsisinnaanermut akuersissutinik ingerlatseqatigiiffinnut, peqatigiiffinnut assigisaannullu tunniussaqartoqarnissaani suut piumasaqaataassanersut, kommunilli pineqanngillat, tassami piumasaqaatit allat aamma kommuninut atuummata, tak. ataani imm. 2-mut. Oqaaseq "assigisaannullu" " ingerlatseqatigiiffinnut" aamma "peqatigiiffinnut" tunngatinneqarpoq. Assersuutigalugu taakkua tassaasinnaapput ingerlatseqatigiiffiit allatut ilusillit, soqutigisaqaqatigiit kattuffiillu.

Kalaallit Nunaanni frekvensit amigaataanngimmata sumiiffinni radioqarfiit tv-qarfiillu amerlassusissaat tunngaviatigut killeqanngilaq. Aallakaatitsiviit arlallit pigineqarsinnaanerannut tunngatillugu killilersuisoqanngilaq, oqaatigineqassaarli Kalaallit Nunaanni unammilleqatigiinnermut inatsit, matumani aamma pissaaneqarnerulluni salliunerup atornerlunneqarsinnaanera pillugu aalajangersakkat ataqqineqassammata.

Nr. 1-imi erseqqissarneqarpoq ingerlatseqatigiiffik, peqatigiiffik assigisaaluunniit Kalaallit Nunaanni angerlarsimaffeqartuussasoq. Tamanna imatut paasisariaqarpoq allaffik pingaarneq imaluunniit aallakaatitassiornermut akisussaaffeqarfik Kalaallit Nunaanniissasoq, taamalu kalaallit inatsisaasa ataaniissalluni. Aalajangersakkakkuttaaq pinngitsoortinniarneqarpoq nunani allani ingerlatsisut anginerusut kissaatiginanngitsumik unammillernissaat.

Nr. 2-p siunertaraa qulakkiissallugu qinnuteqaammi paasissutissat kissaatigineqartut pissarsiarineqarnissaat.

Nr. 3-p siunertaraa qulakkiissallugu sumiiffinni radioqarfiit tv-qarfiillu inatsisinut atuuttunut akerliusumik aallakaatitassiornermik ingerlataqartutut isigineqartut akuersissummik tunineqannginnissaat. Tamakku tassaasinnaapput aallakaatitassiorneq ammip qalipaataanik immikkoortitsinermik imaqartoq.

Nr. 4 qinnuteqarnermi periutsip pisariillisarneqarnissaanik kissaateqarnermut atavoq, tassa aallakaatitsisinnaanermut akuersissut aamma frekvensimik atuisinnaanermut akuersissummik imaqarluni.

Imm. 2-p imarai kommunip sumiiffimmi aallakaatitsisinnaanermut akuersissummik tunineqarnissaanut piumasaqaatit. Kommunip aallakaatitassiornermik ingerlatsisinnaaneranut killiliisuuvoq ingerlatsinermi siunertaq tassatuaassammat innuttaasunut soqutiginnittunut imaluunniit kommunit ilisimatitsissutinik ingerlatitseqqittarnerannut aallakaatitassiornermut aallakaatitsinermullu atortorissaarutinik atugassiisarnissaq. Assersuutigalugu kommunip aalajangersagaq manna malillugu illu tusagassiorfik pilersissinnaavaa, kisiannili tusagassiornerup imarisai sunniuteqarfigisinnaanagit kommunip ilisimatitsissutaasa ingerlateqqinneqartarnerat eqqaassanngikkaanni.

 

§ 14-imut

Aalajangersakkap imaa nutaajuvoq.

Imm. 1-ip imarai nuna tamakkerlugu aallakaatitsisinnaanermut akuersissummik tunineqarnissamut piumasaqaatit. Tassuunakkut aallakaatitsiviit KNR-iunngitsut nuna tamakkerlugu aallakaatitsisinnaanerat ammaanneqarpoq. Sumiiffinni aallakaatitsisinnaanermut akuersissutinit allaassutaa tassaavoq nuna tamakkerlugu aallakaatitsisinnaanermut akuersissummik tunineqarnissamut piumasaqaatit naammassineqaraluarpataluunniit pinngitsoorani akuersissummik tunineqarnissamik imaqanngimmat. Tassani naleqquttuusorineqarpoq akuersissummik tunniussinissap ataatsimut nalilerneqareerneratigut aatsaat taamaaliortoqassasoq. Siunnersuummi § 9, imm. 2-mi oqaatigineqartutuut Naalakkersuisut nuna tamakkerlugu aallakaatitsisinnaanermut akuersissummik tunniussinermi aamma atugassarititaasunik aalajangersaasinnaapput. Tassa § 14-imi piumasaqaatinik naammassinninneq tassatuaavoq akuersissummik tunineqarnissamut piumasaqaatinik pisariaqartunik naammassinninneq, kisiannili akuersissummik tunineqarnissamut qulakkeerutaanngitsoq.

Oqaatsip "assigisaasalu" nassuiarneqarnera § 13-imut oqaaseqaatinut innersuussutigineqarpoq.

Nr. 1-imi erseqqissarneqarpoq sumiiffimmi aallakaatitsisinnaanermut akuersissummik tunineqarnissamut piumasaqaatit naammassineqarsimanissaat. Piumasaqaatinut taakkununnga tunngavigisanut tunngatillugu siunnersuummi § 13-imut oqaaseqaatit innersuussutigineqarput.

Nr. 2-mut tunngaviuvoq sumiiffimmi radioqarfiup tv-qarfiulluunniit aammattaaq nuna tamakkerlugu aallakaatitsisuunera sumiiffimmi pisutut oqaatigineqarsinnaanngimmat. Taamaattumik aalajangersakkakkut aamma oqaatigineqarsinnaavoq radioqarfimmut tv-qarfimmulluunniit nuna tamakkerlugu aallakaatitsisinnaanermut akuersissummik peqareersumut sumiiffimmi aallakaatitsisinnaanermut akuersissummik tunniussisoqarsinnaanngitsoq.

Nr. 3-p qulakkiigassaraa ingerlanniakkatut pilersaarutigineqartup piviusorsiortumik eqqarsaatigilluagaasumillu tunngaveqarnissaa.

Nr. 4-p qulakkiigassaraa ingerlatap aallakaatitsinissamut periarfissanik naammaginartunik nammineerluni peqarnissaa imaluunniit tamanna pillugu allanut isumaqatigiissuteqarnissaa, tassa ingerlatap nuna tamakkerlugu aallakaatitsinermik ingerlataqarsinnaaneranik qulakkeerisumik.

Imm. 2-mi aalajangersarneqarpoq nuna tamakkerlugu aallakaatitsisinnaanermut akuersissummik kommunimut tunniussisoqarsinnaanngitsoq. Tamatumani peqqutaatinneqarpoq, § 13, imm. 2 naapertorlugu kommunit piumasaqaatini aalajangersimasuni taamaallaat sumiiffinni aallakaatitsisinnaanermut akuersissuteqarfigineqarsinnaasut, nunalu tamakkerlugu aallakaatitsisarnissamut atatillugu piumasaqaatit taakkua naammassineqarsimanngitsutut isigineqarmata.

 

§ 15-imut

Aalajangersakkap peqqussummi maanna atuuttumi § 21 nangippaa, arlalitsigulli annertusillugu qularnaarumallugu akisussaaffiit ersarissarneqarnissaat. Aalajangersagaq aamma annertusillugu KNR-imut atuuttussanngortinneqarpoq.

Aallakaatitassiornermut akisussaasup nalunaarneqarneratigut qularnaarneqassaaq inuit peqqussutissatut siunnersuut tusagassiorneq pillugu inatsit (tusagassiorneq pillugu inatsisip Kalaallit Nunaannut atortussanngortitaanera pillugu peqqussusiaq nr. 39, 20. januar 1997-imeersoq) imaluunniit piginneqqaartussaatitaaneq pillugu inatsit (Kalaallit Nunaanni piginneqqaartussaatitaaneq pillugu inatsip atuutilernera pillugu peqqussut nr. 525, 14. juni 2000-imeersoq) malillugit akiliisitassanngortinneqarsinnaasut imaluunniit taarsiisussanngortinneqarsinnaasut, kiisalu pinerluttarneq pillugu inatsit malillugu akisussaatitaaratarsinnaasut kinaassusersineqarsinnaanerat.

Imm. 1-ip peqqussummi maanna atuuttumi § 21, imm. 1 nangippaa. Aallakaatitassiornermut akisussaasup kikkut aallakaatitami peqataasimanerannik allatulluunniit ilaasimanerannik sapinngisamik ilisimasaqartussaanera pillugu aalajangersakkap erseqqissarnissaa pisariaqartinneqanngilaq.

Imm. 2-p peqqussummi maanna atuuttumi § 21, imm. 2 nangippaa ilassutitut piumasaralugu radioqarfik tv-qarfilluunniit sunaassusersineqassasoq. Tamatumani anguniagaavoq isiginnaartartut tusarnaartartullu aamma Radio tv-lu pillugit ataatsimiititaliap ilisimassammagu kina aallakaatitsisuunersoq, ilaatigut aallakaatitanut tunngatillugu suliassanngorsinnaasut suliarineqarnissaat eqqarsaatigalugu.

Imm. 3-mi nutaatut aalajangersarneqarpoq KNR aamma akuersissummik piginnittoq nakkutilliinissamut pisussaaffeqartut taamalu nakkutigissallugu ingerlatat pillugit malittarisassat malinneqarnissaat.

 

§ 16-imut

Aalajangersakkap peqqussummi maanna atuuttumi § 8, imm. 5 aamma § 18, imm. 6 nangippai. Aalajangersagaq soorlu ajunaarnersuaqartillugu, ajornartorsiulernermi sorsuttoqalernerani assigisaannilu atorneqarsinnaasutut eqqarsaataavoq. Ajornartorsiulernermut sortuttoqalerneranulluunniit tunngatillugu aalajangersagaq upalungaarsimanermik pilersaarusiornermut ilaatinneqassaaq.

Imm. 2-mi tunngavigitinniarneqarpoq nalunaarutit qanoq piaartigisumik, qanoq akulikitsigisumik, qanoq iluseqarlutik tusagassiuutinilu sorlerni (radiumi tv-miluunniit imaluunniit taakkunani marlunni) atorneqarsinnaanerannut maleruagassanik aalajangersaanissamut.

 

§ 17-imut

Aalajangersakkap peqqussummi maanna atuuttumi § 14 aamma § 20 nangippai. Aalajangersakkanut taakkununnga sanilliullugu allannguutigitinneqarpoq båndinngorlugit toqqortaqarnissap piumasaqaataajunnaarnera. Tassunga patsisaavoq allatut toqqortaqarnissamut periarfissat maanna taamatulli naammaginartiginerat, aammalu båndinngorlugit toqqortaqarnissaq sulilussinnarnerullunilu inissakilliornermik kinguneqarsinnaammat. Pingaarnerpaaq tassaavoq toqqortaqarnerup isumannaatsuunissaa. Aammattaaq una allannguutaavoq tunniussineq Naalakkersuisut pinnagit Radio tv-lu pillugit ataatsimiititaliamut ingerlatinneqassammat. Taamaaqataanik Naalakkersuisut pinnagit ataatsimiititaliaq tassaavoq aallakaatitassiat qaammatinik pingasunik sivisunerusumik aallakaatitsisinnaanermut akuersissummik piginnittup toqqorsivimmiititsinissaanut piumasaqarsinnaasoq. Taanna suliassanut Radio tv-lu pillugit ataatsimiititaliamit isumagineqartussanut ataqatigiisinneqarpoq, aamma nakkutilliisussaatitaaneq.

 

§ 18-imut

Aalajangersakkap imarisaa nutaajuvoq. Tamatuma siunertaraa innuttaasut aallakaatitanut toqqorsivinnik atuisinnaanissaat. Tamanna ilisimatusarnermut, ilinniagaqarnermut il.il. atatillugu pisinnaavoq. Aallakaatitsiviit pisortanit tapiissutinik pissarsisartut kisimik aalajangersakkami pineqarput. Aalajangersakkap KNR aamma sumiiffinni radioqarfiit tv-qarfiillu pisussaatippai aallakaatitanut toqqorsivinnut killilersugaanngitsumik innuttaasut atuisinnaanerannik qulakkeerinissamut. Tamatuma aallakaatitsisarfiit allattugaatinik imaluunniit qarasaasiakkut paasissutissiivinnik pilersitsinissaannut pisussaaffilerpai, aallakaatitassiat kissaatigineqartut piaartumik pissarsiarineqarnissaannut. Aallakaatitsisarfiittaaq akisussaaffigaat qulakkiissallugu, piginneqqaartussaatitaanermut maleruagassanik unioqqutinneqannginnissaat. Akerlianilli aallakaatitsisarfiit aallakaatitassiat toqqorsiviinut isersinnaasariaqarnerinut pisussaaffiliinngilaq. Atortut aallaqqaammut suliaasimasup tunniunneqarnissaanut aalajangersagaq aallakaatitsisarfinnik pisussaaffiliinngilaq. Atortup assilineqarnissaa kissaatigineqarpat aallakaatitsisarfik akileeqqusisinnaavoq tassani aningaasartuutaasimasut annertoqqataannik. "Aallakaatitanut toqqorsivinnik" tassaavoq aallakaatitanik aallakaatinneqarsimasunik toqqorsivik. Akerlinilli aallakaatitassiat aaqqissuunneqarsimanngitsut ilaannakuusumilluunniit aaqqissuunneqarsimasut kiisalu aallakaatitassiat naammassillugit aaqqissuunneqarsimasut tamanulli saqqummiunneqarsimanngitsut matumani ilaatinneqanngillat.

 

§ 19-imut

Aalajangersakkap peqqussummi maanna atuuttumi § 23, imm. 3-miit 5-imut nangippai. Aalajangersakkakkut aqunneqarpoq akuersissut qaqugukkut arsaarinnissutigineqarallarsinnaanersoq imaluunniit arsaarinnissutigivinneqarsinnaanersoq. Peqqussummi maanna atuuttumi maleruagassanut sanilliullugu sukaterinissaq siunnersuummi anguniarneqarpoq.

Imm. 1-ip peqqussummi maanna atuuttumi § 23, imm. 4, nr. 1 aamma § 23, imm. 3 nangissutigai. Aalajangersakkap qulakkiissavaa aallakaatitsisinnaanermut akuersissummik tunineqarnissamut piumasaqaatit sukkulluunniit naammassineqarsimasarnissaat, akuersissutillu piffissami sivisuumi (ukioq ataaseq sinnerlugu) atorneqarsimanngitsut atuukkunnaarsinneqarsinnaanerat. Tamatuma siunertaraa akuersissutip atorneqannginnerata piffissap ilaannaani pisimanera pillugu atuukkunnaarsinneqarnissaagaluanik pinngitsoortitsinissap qulakkeerneqarnissaa.

Imm. 2-p peqqussummi maanna atuuttumi § 23, imm. 4, nr. 2 aamma 3 nangippai. Tamatuma saniatigut ilanngunneqarpoq siunnersuummi § 16-imi pisussaaffik naammassineqarsimanngippat aamma atorunnaarsitsisoqarsinnaasoq. Pisussaaffiup tamatuma inuiaqatigiinnut pingaaruteqartup naammassineqarsimanissaa qulakkeerniarlugu taamaattoqarnerani aamma aallakaatitsisinnaanermut akuersissutip atorunnaarsinneqarsinnaanissaa naleqquttuusorineqarpoq.

Nutaatut imm. 2, nr. 2-mi aalajangersakkamik ilanngussisoqarpoq atuukkunnaarsitsisoqarsinnaasoq aallakaatitsisinnaanermut akuersissummik qinnuteqarnermi paasissutissat ilaatinneqartussat allannguutaasa akuersissummik piginnittup sukkulluunniit nalunaarutigineqarnissaannut pisussaaffimminik naammassisimanngikkaangat. Aatsaat tassuunakkut qulakkeerneqarsinnaassaaq allannguutit aallakaatitsisinnaanermut akuersissummik tunineqarnissamut piumasaqaatit naammassineqarunnaarnerannik kinguneqartut Radio tv-lu pillugit ataatsimiititaliamit ilisimaneqalernissaat.

Imm. 2, nr. 3-kkut pilerisaarisarnermut pillugit maleruagassat eqquutsinneqarnissaasa sukaterneqarnissaat naleqquttuusorineqarpoq, tamannalu pilerisaarisarnermut pillugit maleruagassat unioqqutinneqarneranni aallakaatitsisinnaanermut akuersissutip atorunnaarsinneqarsinnaalerneratigut ilaatigut anguneqarsinnaavoq.

Imm. 2, nr. 4-p peqqussummi maanna atuuttumi § 23, imm. 5 nangippaa. Aalajangersagaq pisunut nr. 1-imiit 3-mut taaneqartunut tapertatut isigineqassaaq, tassa ataasiarluni unioqqutitsisoqarpat unioqqutitsinerup qanoq sakkortutiginera apeqqutaatinnagu atorunnaarsitsinermik kinguneqarsinnaalluni. Aammattaaq maannamutuulli allanik unioqqutitsisoqartillugu atorunnaarsitsisoqarsinnaanissaa naleqquttuutinneqarpoq, aatsaalli unioqqutitsinerit sakkortuujuppata qasseeriarlutilluunniit pippata.

Imm. 2, nr. 5 aamma nutaajuvoq. Aammattaaq pinerluttulerinermik inatsimmik inatsisinilluunniit immikkut ittunik unioqqutitsisoqarnerani atorunnaarsitsisinnaanerup pineqaatissiinertut atorneqarnissaa naleqquttuusorineqarpoq. Taamaattoqassappat unioqqutitsinerit sakkortuujunissaat unioqqutitsinerilluunniit qasseeriarlutik pisimanissaat naleqquttuusorineqarpoq.

Imm. 2, nr. 6 aamma nutaajuvoq aallakaatitsisinnaanermullu akuersissutip siunnersuut malillugu aamma frekvensimik atuisinnaanermut akuersissummik ilaqarnissaanut atalluni.

Imm. 3 nutaajuvoq. Tamatuma imaraa nuna tamakkerlugu aallakaatitsisinnaanermut akuersissutip atorunnaarsinneqarsinnaaneranut periarfissat. Tassani takuneqarsinnaavoq sumiiffimmi radiukkut tv-kkullu aallakaatitassiornermisuulli atorunnaarsinneqarsinnaasoq, aammattaarlu akuersissummi piumasaqaatitut aalajangiussat malinneqarunnaarsimappata. Akuersissummik atorunnaarsitsisinnaaneq Naalakkersuisunut inissinneqarpoq, Naalakkersuisummi aamma taakkuupput aallakaatitsisinnaanermut akuersissummik tunniussaqartartuusut. Aallakaatitsisinnaanermut akuersissutit atorunnaarsinneqarsinnaanerannik isummat nakkutilliisussaanermut attuumassuteqarluinnarmata naleqquttuusorineqarpoq Naalakkersuisut aallakaatitsisinnaanermut akuersissummik atorunnaarsitsinissaasa Radio tv-lu pillugit ataatsimiititaliap tamatuminnga inassuteqarneratigut pisarnissaa, ataatsimiititaliarmi sumiiffimmi nunalu tamakkerlugu radiukkut tv-kkullu aallakaatitassiornermik nakkutilliisuussammat.

 

Kapitali 4-mut, KNR

Kapitalip peqqussummi maanna atuuttumi kapitali 2 allannguuteqartillugu nangippaa. Immikkoortunut agguataarinissaq naleqquttuusorineqarpoq, tassa KNR-ip suliassai siulliullugit allaaserineqarlutik, tulliatut KNR-ip aaqqissuussaanera naggataatigullu KNR-ip aningaasalersugaanera pillugu aalajangersakkat.

Peqqussummi maanna atuuttumi kapitali 2-mut sanilliullugu båndinngorlugit toqqortaqarnissaq pillugu aalajangersagaq (peqqussummi maanna atuuttumi § 14) aallakaatitsisinnaanermut akuersissut pillugu kapitalimut nuunneqarpoq. Tamanna pillugu siunnersuummi § 18-imut oqaaseqaatit innersuussutigineqarput.

KNR-ip suliassai pillugit immikkoortumi siullermik allaaserineqarput KNR-ip pisortat sullissineranni pisussaaffiinik taaneqartartut, tulliatut KNR-ip Naalakkersuisullu akornanni pisortat sullissinerannik isumaqatigiissut pillugu aalajangersakkat, taavalu kingulliullugit KNR-ip i-ngerlataa pisortat sullissinerannik ingerlatsinerunngitsoq, tassa imaappoq allanik aallakaatitassiornermik ingerlataqarneq ingerlatarlu alla pillugit aalajangersakkat.

Immikkoortut tullii marluk peqqussummi maanna atuuttumi iluseq malillugu sananeqaateqarput.

Peqqussummut maanna atuuttumut sanilliullugu pisortat sullissineranni pisussaaffiit annertuumik ilaartorneqarlutillu erseqqissarneqarput. Taakku erseqqinnerusumik nassuiarneqarnerannut tunngatillugu §§-inut 20-miit 26-mut oqaaseqaatit innersuussutigineqarput.

Nutaatut aalajangersarneqarpoq KNR Naalakkersuisullu anguniagassat pillugit isumaqatigiissummik ukiuni sisamani atuuttartussamik isumaqatigiissuteqassasut, tassani pisortat sullissineranni pisussaaffiit qanoq annertutigineri qanorlu ittuunissaat erseqqinnerusumik aalajangersarneqartassallutik (tassa pisortat sullissinerannik isumaqatigiissummik taasaq). Tassunga uiggiullugu siunnersuummi aalajangersarneqarpoq pisortat sullissinerannik isumaqatigiissut minnerpaamik sunik imaqassanersoq.

Peqqussummut maanna atuuttumut sanilliullugu aamma KNR allanik aallakaatitassiorsinnaanermut allamillu ingerlataqarnissamut periarfissarissaarnerulersinneqarpoq.

Aaqqissuussaaneq pillugu immikkoortumi erseqqissarneqassaaq siulersuisut katitigaanerisa annertuumik allannguuteqartinneqarnissaat siunnersuummi anguniarneqarmat, tamatumalu saniatigut aamma siulersuisut pisortallu piginnaatitaaffii erseqqissarneqarmata.

KNR-ip aningaasalersugaanera pillugu immikkoortumi erseqqissarneqassaaq pisortat sullissinerannik ingerlatsinerup aamma allanik aallakaatitassiornerup aammalu allanik ingerlataqarnerup missingersuutitigut naatsorsuutitigullu immikkoortinneqarnissaat pillugu aalajangersagaliortoqarmat.

 

§ 20-mut

Imm. 1-imi aalajangersarneqarpoq aallakaatitat sullissinerillu suut KNR-ip isumagissallugit pisussaaffigigai. Inuiaqatigiinnit suliakkiissutit taakku tassaatinneqarput pisortat sullissineranni KNR-ip pisussaaffii. Aallakaatitassiat sullissinerillu ataasiakkaat allannguut ataaseq ilanngullugu KNR-ip peqqussummi maanna atuuttumi § 8, imm. 1 naapertorlugu isumagisassaasut aalajangersarneqarsimasut assigaat. Aamma nutaatut KNR pisussaaffilerneqarpoq aallakaatitassianik sullissinernillu neqeroorutai ilinniartitsinermut tunngasunik ilaneqassasut.

Aalajangersakkap kingunerissavaa pisortat sullissineranni neqeroorutit inuiannut kalaallinut ingerlateqqinneqartassammata periaatsit maannamut nalunngisat kisiisa atornagit, tassalu radioqarfiit, ilanngullugu satellitsi, imaluunniit antennit ataatsimoorussat, aammali atorneqassallutik elektronikki atorlugu attaveqatigeeriaatsit allat atorlugit, assersuutigalugu Internet. Oqaatsip "assigisaalluunniit" ilanngunneqarneratigut aallakaatitsisarnerup radio, tv aamma internet kisiisa isumalluutiginagit periaatsit allat atorlugit pisinnaalernissaa periarfissaqalerpoq. Tamatumuuna ataatsimuuleriartorneq, tassa radiup, tv-p, telefonip, internetip computerteknologiillu ataatsimuuleriartornerat, ilaatigut pisortat sullissineranni innuttaasunut neqeroorutinik ingerlatitseqqeriaatsinik nutaanik periarfissiisussaq sapinngisaq tamaat naaperiarneqarpoq.

Aamma imm. 1-imi aalajangersakkami KNR-ip pisortat sullissineranni nuna tamakkerlugu aallakaatitsivittut inissisimanera aalajangerneqarpoq. Tassa imaappoq KNR-ip pisussaaffigaa inuiaat kalaallit tamakkerlugit angussallugit. "Inuiaat kalaallit tamakkerlugit"-mik oqarnermi siunertaavoq KNR-ip nuna tamakkivillugu sammissagaa, aammali siunertaavoq KNR-ip aallakaatitassiamini sullissinerminilu inuiaqatigiinni assigiinngitsunik oqaasillit assigiinngitsunillu soqutigisallit taamatullu aamma innuttaasut aallakaatitassianut kissaataat qissimigaassagai. Tamanna imm. 3-mi aamma imm. 4-mi aalajangersakkani erseqqissaqqinneqarpoq.

Imm. 2-p peqqussummi maanna atuuttumi § 8, imm. 1 oqaaseqatigiit kingulliit allannguuteqartinnagit nangippai. Pitsaassuseq tassaatinneqarpoq teknikkikkut tusagassiornikkullu aammalu imarisatigut pitsaassuseq.

Imm. 3 nutaajuvoq. Tassani erseqqissarneqarpoq KNR-ip pisussaaffigigaa neqeroorummigut aamma nuna tamakkerlugu sammissagaa. Aalajangersakkap ajornartinngilaa KNR-ip nunanit allaneersunik aallakaatitsisarnissaa, piumasaqaataavortaaq nutaarsiassalerinermi aamma nunanit allanit nutaarsiassat ilaatinneqarnerat.

Imm. 4 nutaajuvoq. Aalajangersakkap ilaatigut siunertaraa KNR-ip neqeroorutimigut nuna tamaviat sammissagaa, ilaatigullu aamma siunertaralugu KNR-ip aallakaatitassiortartunik allanik, soorlu sumiiffinni radioqarfinnik tv-qarfinnillu atuisarnissamik pisussaaffilerneqarnissaa, taakku taamaalillutik KNR-ip aallakaatitassiornermik ingerlatsinerani pilersuisutut atuullutik.

Imm. 5 nutaajuvoq. Tassuunakkut qulakkeerniarneqarpoq KNR-ip tamat oqartussaaqataanerannik nukittorsaanissami suleqataanissaa KNR-ip aallakaatittakkamigut immikkut anguniassagaa.

Imm. 6 nutaajuvoq. Aalajangersakkap siunertaraa erseqqissassallugu KNR-ip kalaallit eqqumiitsuliaannik kulturiannillu, aamma kalaallit siuliminnit kingornussaannik suliniuteqartuullunilu ingerlatitseqqittuunissaq immikkut pisussaaffigigaa.

Imm. 7 nutaajuvoq. Tassuunakkut qulakkeerniarneqarpoq aallakaatitat aallakaatitassianik meeqqanut sammitinneqartunik aallakaatitassianillu inuusuttuaqqanut sammitinneqartunik ilaqarnissaat.

Imm. 8 nutaajuvoq. Siunertaavoq innuttaasut akornanni inuit aalajangersimasut KNR-ip aallakaatittagaani aamma isumagineqarnissaat, tassa pingaartumik tusilartut innarluuteqarnertik pissutigalugu KNR-ip aallakaatittagai allagartalersugaanngippata ussersorluniluunniit nutserneqanngippata pissarsiaqarfigisarnavianngimmatigit.

Imm. 9 nutaajuvoq. Siunertaavoq innuttaasuni ikinnerussuteqarlutik kalaallit oqaasiinik ilitsoqqussaralugit oqaaseqartuunngitsut aallakaatitani sapinngisamik annertunerpaamik isumagineqarnissaat. "Sapinngisamik annertunerpaamik isumagineqarnissaannik" oqarnermi anguniarneqarpoq oqaatsitigut ikinnerussuteqartut isumagineqarnissaannik kissaatigisap qanoq annertutiginissaata pisortat sullissinerannik isumaqatigiissummik isumaqatigiissuteqarnermi aalajangersarneqarnissaa. Tassunga tunngatillugu aamma innersuussutigineqarput siunnersuummi § 28, imm. 1, nr. 10, tassungalu oqaaseqaatit.

 

§ 21-mut

Aallakaatitat sunik imaqarnissaat § 20-mi erseqqissumik killilersorneqartoq aallakaatitat sunik imaqannginnissaat § 21-mi erseqqissumik killilersorneqarpoq.

Imm. 1-ip siunertaraa qulakkiissallugu innuttaasuni inooqataasut tamarmik KNR-ip aallakaatitai akornuserneqaatiginagit atorsinnaassagaat. Ukiukinnerit aallakaatitatigut sunneruminarnerusarput, taamaammallu naleqquttuusorineqarpoq taakku KNR-imit immikkut isumagineqarnissaat pisussaaffiliunneqassasoq.

Tunngavigineqartumi "pissuteqanngivilluni nukissornermi" siunniunneqarpoq nukissornerup isiginnaartunut sunniuteqartarnerata ataatsimut nalilersorneqarsinnaanera, nukissornerup suunera, annertussusaa tunngavialu, nukissorfigineqartup inissisimanera qisuariarneralu, isiginnaagassiap ilitsersorneqarnera kiisalu kusanartutut eqqumiitsuliarineranilu takutitat eqqarsaatigalugit. Naliliinermi aammattaaq aliikkutassiani, eqqumiitsuliat pillugit aallakaatitassiani aamma nutaarsiassat pisimasuiillu tunngavigalugit aallakaatitassiani nukissornerit nalilersornerini uuttueriaatsit assigiinngitsut atorneqassallutik, kingullertut taaneqartumi aallakaatitassiani nukissorneq pillugit aallakaatitassianut nakkutilliilluni piiaanerit nutaarsiassat paasissutissiinermilu kiffaanngissuseqarnerit inuiaqatigiinnilu oqallinninnerit eqqarsaatigalugit illuatungiliutsinneqassammata. Uniffiit aappaata siunertaraa nutaarsiassanut paasissutissiinernilu aallakaatitassiat sakkortuut pingaaruteqarnerisa akuerineqarnissaasa ersarissisinneqarnissaat ilutigalugulu isiginnaartunut aalajangersimasunut illersuinissamut soqutiginninneq eqqarsaatigineqarluni, aamma meeqqat inuusuttullu ilanngullugit. Mianersoqqusineq aallakaatitassiani taamatut takutitsisut sioqqullugit aamma saqqummiunneqartariaqarpoq, assersuutigalugu filmimi, aallakaatitassiamilu immikkuullarissumik ilanngussinissaq sioqqutilaarlugu, assersuutigalugu nutaarsiassanik aallakaatitsinermi.

Imm. 2 pissutsit taagorneqartut pissutigalugit assigiinngisitsinissamut inerteqqutit tunngaviusumik inatsimmi aalajangersarneqarsimasut malinneqarnissaannut immikkut pisussaaffittut paasineqassaaq.

 

§ 22-mut

Imm. 1-ip peqqussummi maanna atuuttumi § 22 nangippaa.

Imm. 2 nutaajuvoq. Aalajangersakkap siunertaraa qulakkiissallugu KNR-ip inuuttaasut periarfississagai KNR aqqutigalugu oqaaseqarsinnaatitaanissamut, tassuunakkullu naqisimaneqanngitsumik oqaaseqarsinnaatitaanermik annertusaaqataalluni. Aalajangersakkakkut KNR immikkut pisussaaffilerneqarpoq tusarnaartartut isiginnaartartullu nammineerlutik aallakaatitassiaminnik ineriartortitsinissaannut allatulluunniit KNR aqqutigalugu saqqummernissaannut akiliisitsilluni ikiuunnissamut. Tamanna soorlu piviusunngortinneqarsinnaavoq ilinniarnermi atugassaqartitsinikkut, teknikkikkut atortunik atugassaqartitsinikkut ilinniakkatigulluunniit siunnersuilluni ikiuisinnaanikkut. "Taamaaliornissamut aningaasartuutinik" oqarnermi pineqarpoq KNR-ip atuisut taamaallaat aningaasartuutinut naapertuuttumik akiliisittassagai. Tassa imaappoq KNR tassuunakkut iluanaaruteqassanngilaq.

 

§ 23-mut

Aalajangersakkap peqqussummi maanna atuuttumi § 8, imm. 1, oqaaseqatigiit kingulliit allanngortinnagit nangippai. Nakerisarsiortannginnissamik piumasaqaat KNR-ip nammineertuuneranik kiffaanngissuseqarneranillu erseqqissaanertut isigineqassaaq.

 

§ 24-mut

Aalajangersagaq nutaajuvoq. "Oqaatsit pillugit erseqqissumik anguniagaqarnermigut"-mik oqarnermi pineqarpoq KNR ilaatigut pisussaaffilerneqartoq oqaatsit pillugit anguniagaqarnissamik aalajangersaanissamik, ilaatigullu aamma anguniakkamut tassunga tunngaviussasoq KNR-ip aallakaatitsinermik ingerlataqarnini aqqutigalugu qanoq iliorluni kalaallit oqaasiisa attatiinnarneqarnissaannik ineriartortinneqarnissaannillu annertusaaniarnersoq. Tassunga tunngatillugu KNR-ip pisussaaffigilluinnarpaa oqaatsit aallakaatitsinermini eqqortumik atornissaat.

 

§ 25-mut

Aalajangersagaq nutaajuvoq.

Imm. 1-ip siunertaraa qulakkiissallugu KNR-ip aallakaatitassiaasa aalajangersimasut ilaat annertuut nammineerluni aallakaatitassiatut suliaanissaat. Aallakaatitassiat nutaarsiassat pineqarnerunerinut pissutaavoq nutaarsiassanik aallakaatitat pitsaassuseq uppernassuserlu aammalu tunngaveqarluassuseq eqqarsaatigalugit taakkorpiaammata pisortat sullissinerannik ingerlataqartumit suliamut piginnaasaqarluartunik sulisoqartumit isumagineqartussat. Tamanna ima paasineqassanngilaq aallakaatitat KNR-imit suliarineqarsimanngitsut aallakaatinneqassanngitsut. Tamannarpiarmi siunnersuummi § 20, imm. 4-mi siunniussaavoq.

Imm. 2-mi "nammineerluni aallakaatitassiat" suunerat nassuiarneqarpoq. "Aallakaatitassiat aaqqissorneqarsimasut" tassaapput aallakaatitassiat aallakaatinneqartinnatik aaqqissuisunit suliarineqarsimasut. Taakkununnga ilaanngillat soorlu aallakaatitassiat KNR-ip allakaatitassiortartunit allanit imaluunniit tv-mi ingerlatseqatigiiffinnik allanik suleqateqarnissamik isumaqatigiissuteqarnikkut tigusimasai, soorlu Danmarks Radio-p aallakaatitai aamma Inatsisartut ataatsimiittarfimminni oqallinnerinik toqqaannartumik aallakaatitat. Pilerisaarisarnermut aamma ilaanngillat.

Imm. 3-p siunertaraa qulakkiissallugu aallakaatitarineqartartut tamarmiusut nammineerluni aallakaatitassiat saniatigut aamma aallakaatitassiortartunit allanit pisinikkut pissarsiaasarnissaat, aammalu aallakaatitat ilaat avataaniit pilersuisuusunik suleqateqarnikkut pissarsiarineqartarnissaat.

 

§ 26-mut

Aalajangersagaq nutaajuvoq. Aalajangersakkap siunertaraa innuttaasut aallakaatitat pillugit tusarniarneqarnissaat qulakkiissallugu, innuttaasut kissaataasa aallakaatitsinerup aaqqissorneqarnerani qissimigaarneqarluarnissaat tassuunakkut anguniarlugu. Tamannali ima paasineqassanngilaq innuttaasut amerlanerussuteqartut kissaataat kisiisa KNR-ip aallakaatittassagai, KNR-immi pisortat sullissinerannik isumaginnittuunermigut aammattaaq qulakkiigassarimmagu aallakaatitat innuttaasuni amerlanerussuteqartunit kissaatigineqanngikkaluartunik ilaqarnissaat.

Tusarniaasarnissat qanoq qulakkeerneqarnissaat pillugu peqqussummi piumasaqaatinik aalajangersaasoqanngilaq. Taamaalilluni tamatumunnga periaasissaq KNR-ip nammineq toqqarsinnaavaa. Assersuutigalugu tamanna pisinnaavoq qangatut isiginnaartartunik naalaartartunillu immersugassat atorlugit misissuisitsinikkut imaluunniit internettikkut allatulluunniit atortutigut.

 

§ 27-mut

Aalajangersakkap peqqussummi maanna atuuttumi § 8, imm. 4 allannguuteqartinnagu nangippaa. Pilerisaarisarnermut aallakaatitassiallu aningaasalersorneqartut pisortat sullissineranni pisussaaffinnut ilaanngillat, tassaallutilli KNR-ip ingerlatsinerata aningaasalersorneqarneranik taamatut ingerlataqarnikkut isertitat matussuseeqataanissaannik kissaateqarnermik tunngavillit. Siunnersuummi § 35, imm. 1-imi naatsorsuutaavoq KNR-ip ingerlatsinerata ilaatigut pilerisaarisarnermutigut aallakaatitatigullu aningaasalersorneqartutigut aningaasalersorneqarnissaa.

 

§ 28-mut

Aalajangersagaq nutaajuvoq, erseqqissarpaalu Naalakkersuisut KNR-illu anguniagassat pillugit isumaqatigiissuteqartarnissaannik, aamma inuiaqatigiinnik kiffartuussineq pillugu isumaqatigiissummik taaneqartartumik pisussaaffik.

Anguniagassat pillugit isumaqatigiissut nalinginnaasumik isumaqatigiissutaasartuni isumaqatigiissutaanngilaq pingaarutilik. Paarlattuanik anguniagassat pillugit isumaqatigiissut isumaqatigiissutinut tunngassuteqartunut assingusunut isigineqassaaq, tamatumani politikkikkut KNR-imut kiisalu KNR-ip ingerlatsineranut anguniagassatut piumasaqaatinik unnersuussisarnermut tunngavissianik saqqummiinerulluni KNR-ip suliassanik aaqqiinissaanut suli pisariillisaanissanik pitsaassutsinillu ineriartortitsiuarnissamut ilapittuisinnaasunik. Taamaalilluni anguniagassat pillugit isumaqatigiissut siunissami KNR-ip ingerlataanut ineriartortitsinissamut kissaatinut Naalakkersuisunit KNR-imillu ataatsimoorluni politikkikkut oqariartuutaavoq. Taamaalilluni pisortat sullissinerannik isumaqatigiissutip atuutilersinneqarnissaanut siunertaavoq qulakkiissallugu pisortat sullissineranni aallakaatitsivittut KNR-imut erseqqissunik uuttorneqarsinnaasunik piumasaqaasiortoqarnissaa, taamaalillunilu piumasaqaatit taakkua imaalillugit iluarsineqarsinnaatillugit, isumaqatigiissut suli tassaassasoq pisortat sullissinerannik pisussaaffiup piviusorsiortumik saqqummiunneqarnera.

Qitiusumik suliassaqarfiit isiginiarneqarnerisigut, atortut sulisorisallu atorneqartut angusallu anguneqartut akornanni ataqatigiinnerit malittarineqarnerisigut, KNR-ip sullissineri kiffartuussinerilu Naalakkersuisunit malinnaaffigineqarluarsinnaalissapput. Taamaalillunilu ilimagisat anguneqassanngikkaluarpata qisuariarsinnaanermik annertunerusumik periarfissaqartoqalissaaq.

Aallaavittut suliassat allanngortitigassat annikinnerit, ingerlatat suussusaasa allanngortinneqarnissaat imaluunniit siunniussat isumaqatigiissutigineqartut aningaasaliissutit killiliussat iluanni isumagineqassapput. Tamatumani aamma atuupput aningaasaliissutitigut allannguutit annikitsut aallaavittut suliassat suussusissaannik allannguuteqartitsisussaanngitsut imaluunniit piumasaqaatini allannguutit taakkununnga tunngassuteqartut. Paarlattuanilli KNR-ip suliassaani pingaarutilimmik allannguinerit, ingerlatat suussusaannik imaluunniit siunnissani isumaqatigiissutaasuni allannguinerit KNR-ip aningaasaliissutaanut tunngaviusunut nalileeqqinnermik kinguneqartitsisinnaapput. Taamaaqataanik KNR-ip aningaasaliissutitigut tunngaviinik annertuunik allannguinerit KNR-ip suliaasa ingerlataasalu suussusaannik taakkununngalu piumasaqaatinut tunngatillugu nalileeqqinnermik kinguneqartitsisinnaavoq.

Siunnersuutip § 28-anni, imm. 5-imi KNR pisussaaffilerneqarpoq ukiumoortumik anguniagassat pillugit isumaqatigiissutip naammassineqarsimanera pillugu nassuiaasiortarnissamut. Taamatut nalunaarusiortarnissaq KNR-ip Naalakkersuisullu akornanni tatigeqatigiinnermik aallaaveqarpoq, tamatumani piumasaqaatigineqarluni nalunaarusiortarneq eqqortuussasoq tamakkiisuussallunilu. Ukiumoortumik nalunaarusiaq tassaassaaq anguniagassat pillugit suliassamut aallaaviusussaq aqutseriaatsimut siunertaritinneqartoq.

Anguniagassat pillugit isumaqatigiissutip eqquutsinneqarnissaanut Naalakkersuisut nakkutilliinissaat KNR-imit ukiumoortumik nalunaarusiaata naliliiffigineqaannarnissaanut tunnganngilaq. Taamatuttaaq Naalakkersuisut pisussaatinneqarput pissutsit isumaqatigiissummi isumaqatigiissutaasut unioqqutinneqarsorinartut KNR-imut ingerlaavartumik tikkuussissutigisassallugit. Assersuutigalugu taamaattut tassaasinnaapput sap. akunnikkuutaartumik aallakaatitanut aalajangersimasunut minnerpaaffissat piumasaqaataasa eqquutsinneqarnerat. Peqqussummi anguniagassat pillugit isumaqatigiissummik eqquutsitsinnginnermut pineqatissiinissanik ilanngussisoqanngilaq, tamatumunnga peqqutaavoq tamatumani isumaqatigiissut inatsiseqartitsinikkut tunngassuteqartoq pineqanngimmat. Taamaattumik Naalakkersuisut KNR-imut pineqaatissiisarnissamut periarfissaat taamaallaat suliffeqarfiup aningaasaliissutitigut akisussaaneranut tunngatinneqassapput tamatumalu saniatigut siulersuisunut imaluunniit siulersuisuni ilaasortanut ataasiakkaanut tunngatillugu politikikkut akisussaatitsisarnissamut tunngassuteqartitsinissamut periarfissiinissaq.

Imm. 1-ip aaqqissuussineq nutaaq imaraa, tassa Naalakkersuisut KNR-illu anguniagassat pillugit isumaqatigiissummik pisortat sullissineranni pisussaaffinnik aalajangersimasunik imaqartussamik isumaqatigiissuteqartarnissaat. Pisussaaffiit annertussusii landskarsimit tapiissutit annertussusiinut KNR-illu isertitaanut allanut naleqqussarneqassapput.

Isumaqatigiissutip ukiuni sisamani atuuttarnissaanut patsisaaneruvoq KNR-ip siulersuisuisa KNR-ip ingerlatsinera pillugu piffissamut sivisunerusumut pilersaarusiorsinnaanissaannik kissaateqarneq. Taamaakkaluartorli isumaqatigiissutigineqartup ukiumiit ukiumut aaqqiiffigineqartarsinnaanera ajornaquteqassanngilaq, tamannami KNR-ip ingerlatsinerani allannguutit, aamma landskarsip tapiissutaasa annertussusiisa kingunerisaannik pisariaqarsinnaammat. Aningaasanut inatsimmi ukioq aningaasaliiffiusoq qaangerlugu isumaqatigiissusiornissamut tunngavissiisoqarsimanngimmat, anguniagassat pillugit isumaqatigiissut ima ilusilerneqassaaq anguniagassat pillugit isumaqatigiissummi aalajangersarneqassasoq anguniagassat pillugit isumaqatigiissut aningaasaliisartutut oqartussaasut akuersissuteqartarnissaannik piumasaqaatitaqarnera.

Imm. 1-ip aamma aalajangersarpaa isumaqatigiissut minnerpaamik sunik imaqassanersoq. Tassa imaappoq isumaqatigiissummi pineqartut arlaqartut illua´tungeriinnit isumaqatigiissutigineqarpata aaqqinneqarsinnaapput, imaluunniit Naalakkersuisut piginnaatitaaffik imm. 4-tut siunnersuutigineqartumiittoq naapertorlugu pisortat sullissineranni pisussaaffiit pillugit maleruagassanik amerlanerusunik isumaqatigiissummi aaqqinneqartartussanik aalajangersaasinnaallutik.

Isumaqatigiissummi isummerfigineqassapput pissutsit suliniutissatut pingaarnerpaatullu isigineqartut makku:

Nr. 1 frekvensinik tunniussisarnermut tunngavoq, pisinnaasaqassutsilli agguaanneqarnera tassuuna aqunneqanngilaq. Kalaallit Nunaanni frekvensit amigaataanngillat. Tassalu isumaqatigiissummi takuneqarsinnaassaaq frekvensit/kanalit qassit KNR-ip pisortanik sullissinermut atorsinnaanerai. Assersuutigalugu ullumikkut KNR-2-qanngilaq. Tamanna periarfissaqalissagaluarpat malittarisassaq manna malillugu isumaqatigiissummi takuneqarsinnaassaaq. Aammattaaq KNR digital atorlugu kanalimik pilersitsisinnaanngussappat analog digitaliluunniit atorlugu siammaasarnerup agguataarnera takuneqarsinnaassaaq.

Nr. 2-p siunertaraa KNR-ip piffissami isumaqatigiissuteqarfiusumi aningaasaqarnikkut atugassarisaasa qanoq ittuunerannik takussutissiinissaq. Tassani ilaapput isertitassatut naatsorsuutigisat aningaasarsiorfiusunut assigiinngitsunut agguataarsimasut aamma aningaasartuutit KNR-ip ingerlataanut ataasiakkaanut agguataarlugit missingersorneqarsimasut.

Nr. 3-mi aalajangersarneqarpoq nammineerluni aallakaatitassiat minnerpaaffissaat isumaqatigiissummi ersarissumik nalunaarsimassasut. Tassani pineqarput nal.ak. aallakaatitsiviit aamma piffissamut aallakaatitsiviusumut tamarmiusumut sanilliullugit annertussusii.

Nr. 4-mi aalajangersarneqarpoq Kalaallit Nunaanni aallakaatitassiat minnerpaaffissaat isumaqatigiissummi ersarissumik nalunaarsimassasut. Tassani pineqarput nal.ak. aallakaatitsiviit aamma piffissamut aallakaatitsiviusumut tamarmiusumut sanilliullugit annertussusii.

Nr. 5-imi aalajangersarneqarpoq aallakaatitassiat aallakaatitassiortartunit allanit pisiarineqartussat minnerpaaffissaat nalunaarsimassasut. Tassani pineqarput nal.ak. aallakaatitsiviit aamma piffissamut aallakaatitsiviusumut tamarmiusumut sanilliullugit annertussusii. Nr. 4-mut sanilliullugu assigiinngissutaavoq nr. 4-mi pineqarmata aallakaatitassiat allat Kalaallit Nunaanni aallakaatitassiarineqarsimasut tamarmiusut annertussusiat, nr. 5-imili taamaallaat pineqarlutik aallakaatitassiat aallakaatitassiortartunit allanit pisiarineqartut.

Nr. 6-imi aalajangersarneqarpoq aallakaatitat nutaarsiassat maannalu soqutiginaatillit minnerpaaffissaat nalunaarsimassasut. Aallakaatitanik maanna soqutiginaatilinnik oqarnermi pineqarput aallakaatitassiat nutaarsiassanik politikkimut tunngasunik imaluunniit inuiaqatigiinnut pingaarutilinnik imallit, soorlu nutaarsiassanut oqaaseqaatit, nutaarsiassat ineriartornerannik malinnaaneq, imaluunniit nutaarsiassanut pisunullu maanna soqutiginaatilinnut politikkikkut isummat. Aallakaatitat taamaattut minnerpaaffeqarnissaannik piumasaqarneq KNR-ip nutaarsiassanik aallakaatitaasa ilaasa annertuut nammineerluni aallakaatitassiaanissaannik piumasaqaammut attuumassuteqarpoq, tak. siunnersuummi § 25, imm. 1.

Nr. 7-imi aalajangersarneqarpoq aallakaatitat eqqumiitsuliornermut kulturimullu tunngasut minnerpaaffissaat nalunaarneqassasut. Aallakaatitat taamaattut minnerpaaffeqarnissaannik piumasaqarneq KNR-ip aallakaatittakkamigut eqqumiitsuliornerup kulturillu tamatigoortuunerannik takutitsinissamut pisussaaffeqarneranik erseqqissaanermut attuumassuteqarpoq, tak. siunnersuummi § 20, imm. 6.

Nr. 8-mi aalajangersarneqarpoq aallakaatitat meeqqanut aammalu inuusuttunut sammitinneqartut minnerpaaffissaat nalunaarneqassasut. Aallakaatitat taamaattut minnerpaaffeqarnissaannik piumasaqarneq KNR-ip aallakaatittakkami aallakaatitassianik meeqqanut aammalu inuusuttuaqqanut sammitinneqartunik ilaqarnissaannik qulakkeerinissamik pisussaaffeqarneranut attuumassuteqarpoq.

Nr. 9-mi aalajangersarneqarpoq aallakaatitat ilinniartitsinermut tunngasut minnerpaaffissaat nalunaarneqassasut. Aallakaatitat taamaattut minnerpaaffeqarnissaannik piumasaqarneq KNR-ip pisortat sullissineranni pisussaaffimmi tamarmiusut ilaattut nutaamik pisussaaffeqalernermigut innuttaasut aallakaatitassianik ilinniartitsinermut tunngasunik qulakkeerussinissaanut attuumassuteqarpoq. Tassunga tunngaviuvoq maannamut atorneqartanngitsut ilinniartitsinermut atorneqalernissaannik kissaateqarneq.

Nr. 10-p siunertaraa inuiaqatigiinni assigiinngitsunik oqaasillit, matumani aamma danskisut immaqalu oqaatsinik ikittuararsuaannarnit atorneqartunik oqaasillit, qanoq annertutigisumik KNR-imit sullinneqarnissaasa allaaserinissaat. Tamanna siunnersuummi § 20, imm. 1-imut attuumassuteqarpoq, tassa KNR-ip pisortat sullissineranni Kalaallit Nunaanni innuttaasut tamakkerlugit neqerooruteqarfigissagai, aamma assigiinngitsunik oqaasillit ataqqillugit. Aalajangersagaq aamma siunnersuummi § 20, imm. 9-mut atavoq, tassani KNR aallakaatitamini pisussaaffilerneqarluni innuttaasuni ikinnerussuteqarlutik kalaallit oqaasiinik ilitsoqqussaralugit oqaaseqartuunngitsut sapinngisamik annertunerpaamik isumagineqarnissaannik. Aamma aallakaatitassiat assigiinngitsut suunerinut agguataarinerup allaaserineqarnissaani anguniarneqarpoq kalaallit oqaasiisa saniatigut oqaatsit allat aallakaatitassiani aalajangersimasuni sapinngisamik suliniuteqarfigineqarnissaat, soorlu nutaarsiassaqartitsinikkut aamma maanna soqutiginartunik aallakaatitassiatigut.

Nr. 11 akissarsianut aningaasartuutit tamarmiusut annertussusii naammaginartumik annertussuseqartikkumallugit ilanngunneqarpoq.

Nr. 12-ip ilanngunneqarneratigut qulakkeerniarneqarpoq ilinniartitseqqinnernut ingerlaqqiffiusumillu ilinniartitsinernut aningaasanik immikkoortitsisoqartarnissaa, taamaaliornikkut sulisuusut suliamik tungaasigut piginnaasaat sukkulluunniit naammaginartuujuaqqullugit, tamannami pisortat sullissineranni nuna tamakkerlugu aallakaatitsiviup pitsaassutsimik attassiinnarnissaanut pisariaqartutut isigineqarmat.

Nr. 13 KNR-ip pisortat sullissineranni ingerlatsinermini maannamut periarfissarisimasaanut attuumassuteqarpoq, tassa allatut aallakaatitassiortarnissamut allamillu ingerlataqarnissamut, aammalu siunnersuummi aalajangersarneqarpoq KNR-ip ingerlatai taakku assigiinngitsut missingersuutitigut naatsorsuutitigullu immikkoortinneqarsimassasut.

Imm. 2-mi nassuiarneqarpoq kalaallisut aallakaatitassiorneq alla peqqussummi qanoq paasineqassanersoq. Nammineerluni aallakaatitassianut piumasaqaataasutuulli aallakaatitassiat aaqqissorneqarsimanissaat piumasaqaataavoq.

Imm. 3-mi erseqqissarneqarpoq aallakaateqqitat, pilerisaarisarnermut aallakatitassiallu aaqqissorneqanngitsut allat aallakaatitassiat assigiinngitsut ataasiakkaat minnerpaaffissaannik angissusiliinermi ilanngullugit naatsorsuunneqassanngitsut.

Imm. 4 pisortat sullissineranni pisussaaffiit aalajangersimasut amerlanerusut annertussusilerneqarneranni atorneqarsinnaavoq, kisiannili pisussaaffiit peqqussummi aalajangersarneqartut periarfissarititaasa iluanni, kiisalu piumasaqaatinik erseqqissaanermut.

Imm. 5-imi aalajangersarneqarpoq KNR isumaqatigiissutip ukiunik sisamanik sivisussuseqartup ukiuisa qaangiunneri tamaasa isumaqatigiissutip naammassineqarnera pillugu nassuiaateqartassasoq. Tamanna tunngavigalugu isumaqatigiissutip ukiut sisamat iluanni aaqqiivigisarnissaa periarfissaqartarsinnaassaaq, tak. qulaani. Isumaqatigiissutip isumaqatigiissuteqaqataasunut Naalakkersuisunut aamma Radio tv-lu pillugit ataatsimiititaliamut nassiunneqartarnissaanut patsisaavoq Radio tv-lu pillugit ataatsimiititaliaq siunnersuummi § 44, imm. 1, nr. 3 naapertorlugu pisussaaffeqarmat ukiumoortumik nassuiaammik misissuataarinissamik, tamatumalu pillugu Naalakkersuisunut oqaaseqaateqarnissamik.

Imm. 6-imi erseqqissarneqarpoq pisortat sullissinerannik isumaqatigiissut aamma tamatuma naammassineqarnera pillugu ukiumoortumik nassuiaat tamanut saqqummiunneqassasut. Tassunga pissutaavoq tamat KNR-ip ingerlatsineranik paasisaqarnissamut periarfissaqarnerisa ingerlatsinerup ersitsuullunilu uppernarsaatissaqarneranut pingaaruteqarnera.

 

§ 29-mut

Peqqussummi maanna atuuttumi § 8, imm. 2-3 malillugit KNR allanik ingerlataqarsinnaavoq assersuutigalugu aallakaatitassiat nunanut allanut nassiuttarnerisigut, videokassettinik aallakaatitassiornikkut, aallakaatitassianik tunisaqartarnikkut, naqitikkanik saqqummersitsisarnikkut, atortorissaarutit attartortittarnerisigut pikkorissartitsisarnikkullu. Periarfissat tamakkua ingerlateqqinneqassapput peqatigisaanillu allanik ingerlatsineq annertusineqarsinnaalissalluni. Teknologip ineriartornerata unammillernerullu sakkortusiartornerata kingunerisaanik pisariaqalersimavoq KNR qangatut aallakaatitassiortarnerup saniatigut allanik sammisaqalersissallugu, aammalu ingerlatseqatigiiffinnik allanik tusagassiuutinut tunngasunik suliaqartunik suleqateqarsinnaalersissallugu.

Imm. 1 peqqussummi maanna atuuttumi § 8, imm. 2-mik nangitsineruvoq. Aalajangersakkami aalajangersarneqarpoq KNR-ip allatut aallakaatitassiornermik suliaqarsinnaanera, tassa imaappoq pisortat sullissinerannik ingerlataqarnerup saniatigut aallakaatitassiornermik ingerlataqarnermik.

Imm. 1 oqaaseqatigiit aappaanni erseqqissarneqarpoq KNR kapitali 3 malillugu akuersissut naapertorlugu aallakaatitassianik allanik suliaqarsinnaanngitsoq. Tassa imaappoq siunertarineqanngilaq KNR assersuutigalugu allequtarisaminik ingerlatseqatigiiffiliornermigut, tak. imm. 3-tut siunnersuummi matuma kinguliiniittumi periarfissat nutaat, iluanaarniutigalugu radiumik tv-millu ingerlatsinissamut akuersissummik tunineqarsinnaalissasoq, taamaalillunilu aallakaatitsivinnut namminersortunut allanut unammillerluni. Akerlianilli KNR radioqarfinnik tv-qarfinnillu kapitali 3 malillugu akuersissummik peqartunik suleqateqalersinnaassaaq.

Imm. 1, oqaaseqatigiit kingulliit Naalakkersuisut periarfissippaat allatut aallakaatitassiornermik ingerlataqarnermut maleruagassiornissamut. Tassaasinnaapput allanik aallakaatitassiornermik ingerlatat assigiinngitsut, matumani aamma taamaaliornermi atugassarititaasinnaasut pillugit maleruagassat.

Imm. 2, oqaaseqatigiit siulliit peqqussummi maanna atuuttumi § 8, imm. 3-mik nangitsineruvoq. Aalajangersakkakkut siunertarineqarput Kalaallit Nunaanni atuisut tusagassiornermi periarfissat nutaat iluanni Kalaallit Nunaanni pisortat sullissineranni neqeroorutinik atuisinnaanerisa qularnaarnissaa, aammalu KNR-ip suliffeqarfinnut tusagassiuutinut tunngasunik suliaqartunut unammillernissamut pitsaanerpaamik periarfissaqarnissaata qularnaarnissaa.

KNR-ip assersuutigalugu aallakaatitassiaqassutsikkut, suleqataasut immikkut ilisimasaqassusiisigut teknikkikkullu atortorissaarutitigut nukissaqassusiata KNR tusagassiuutinut tunngasutigut siunissami inissisimalluarnissamut pitsaasunik periarfissaqartippaa. Tusagassiuutit tungaasigut ineriartornerup qangatut tv-kkut aallakaatitassiortarnerup telelu atorlugu sullissinerit immikkoortinnissaat ajornakusoorneruleriartortissavaa. Tele atorlugu sullissinerit orniginarnerusutut isigineqartut tassaapput filmit piniarneqarsinnaasut (video-on-demand), eqquiniarnerit niuernikkullu sullissinerit assigiinngitsut, soorlu home-banking (angerlarsimaffimmiit bankimut attaveqarneq). Taaneqarsinnaasut allat tassaapput aallakaatitat ilinniartitsissutit inuit ataasiakkaat immikkulluunniit soqutigisallit qinnutigisimasaat, aallakaatitassiat immikkut soqutigisaqaqatigiinnut sammititat nutaarsiassallu aalajangersimasunut sammititat.

Siunnersuummi KNR ilaatigut periarfissinneqarpoq aallakaatitsisarfimmini frekvensinilu tunniunneqarsimasuni atunngisani sullissinernut taamaattunut atorsinnaagai. KNR taamaaliorsinnaavoq piffissaq aallakaatitsivissaq sullissinermik neqerooruteqartunut allanut tunisarlugu imaluunniit nammineq tele atorlugu sullissinissaq neqeroorutigisarlugu. KNR-ip radiukkut tv-kkullu aallakaatitsiviunissaq pingaarnertut siunertarimmagu naatsorsuutigineqarpoq tele atorlugu sullissinerit KNR-ip nammineq neqeroorutigisinnaasai tamatigoortumik aallakaatitassiornermut tunngassasut. Tamatumuuna mattunneqarpoq assersuutigalugu telefoni atorlugu sullissinerit assigisaallu. Tamatumuunakkulli ineriartorneq siumut eqqoriaruminaammat sullissisinnaanerit sukumiisumik killilersornissaannut aalajangersaasoqanngilaq.

KNR-ip pisinnaasani atunngisani tele atorlugu sullissinissamik neqerooruteqartunut allanut tunisinnaavaa inatsisit allanut tunngasut killissatuaralugit, tamatumani ilanngullugit tele pillugu inatsisit.

Imm. 2, oqaaseqatigiit aappaanni nutaatut ilanngunneqarpoq KNR-ip pisariaqartitsineq naapertorlugu sumiiffinni radioqarfinnik tv-qarfinnillu akiliisitsilluni ilitsersuinissaanik pisussaaffik. Aalajangersagaq aallakaatitassiortartut allat, matumani aamma sumiiffinni radioqarfiit tv-qarfiillu KNR-imut aallakaatitassianik ilaatigut tunisisartuunissaannik siunniussamut attuumassuteqarpoq, tak. siunnersuummi § 20, imm. 4. Soorlu § 29, imm. 4, 2-mi takuneqarsinnaasoq Naalakkersuisut KNR-ip ilitsersuinerani akiliuteqarnissamut piumasaqaatit pillugit malittarisassaliorsinnaassapput.

KNR-ip imm. 3-mi siunnersuutigineqartoq malillugu nutaatut periarfissarilissavaa allamik ingerlataqarnissaq, matumani aamma allatut aallakaatitassiornermik ingerlataqarnissaq siunertaralugu ingerlatseqatigiiffinnik nutaanik pilersitsisinnaaneq ingerlatseqatigiifinnilluunniit pioreersuni aningaasaliissuteqarsinnaaneq, tassa kisimiilluni imaluunniit allanik suleqateqarluni. KNR taamaalilluni periarfissaqalissaaq ingerlatseqatigiiffinnik pigisanik pilersitsinissamut ingerlatseqatigiiffinnillu allanik tusagassiornermut tunngasunik suliaqartunik suleqateqalernissamut. Oqaatigineqassaaq KNR taamatut suleqateqarnermi pilersaarutit pilerisaarisarnikkut aningaasalersorneqartut peqataaffigisinnaammagit.

Imm. 4-mi aalajangersakkap imaraa ingerlatamik allamik suliaqarnissamut, matumani aamma ingerlatamik allamik suliaqarsinnaanermut killilersuutit pillugit maleruagassanik Naalakkersuisut aalajangersaanissaannut piginnaatitsissut. Piginnaatitsissut ilanngunneqarpoq ingerlatanik allanik suliaqarsinnaanermut nutaanik periarfissiinikkut sunniutissat siunertarineqanngitsut illua´tungilerumallugit. Tassunga pissutaapput tamatuminnga suliaqarnerup siumut takorlooreerneqarsinnaananilu sukkasuumik ineriartornera. Uniffiup aappaani aalajangersakkap siunertaraa akiliinissamut piumasaqaatit naleqqussarnissaannut Naalakkersuisut periarfissaqarnissaat, taamaasiortoqarnissaanut pisariaqartitsisoqarpat. Suliassaq taanna eqqarsaatigalugu KNR-ip allatigut aallakaatitassiornera aamma aallat ingerlatat unammilleqatigiinnermi piumsaqaatit naapertorlugit ingerlannissaannut imm. 6-mi piumasaqaateqrneq sanneqqunneqarsinnaavoq.

Imm. 5-mi erseqqissarneqarpoq akiliisitsisarluni tv KNR-ip allatut ingerlataani ilaasinnaanngitsoq.

Aalajangersakkami KNR-ip allamik ingerlataqarsinnaanera killilerneqarpoq. Tassa imaappoq akiliisitsisarluni tv isertitatut isumalluutigineqarsinnaanngilaq. Akiliisitsisarlunimik oqarnermi pineqarput aallakaatitassiat, soorlu filmit, timersortut il.il. pillugit aallakaatitat isiginnaarumallugit akiliisarneq.

Inerteqqut taanna KNR-ip kapitali 3 naapertorlugu akuersissut malillugu aamma aallakaatitassiornermik ingerlataqarnissaanut inerteqqummut attuumassuteqarpoq. Inerteqquteqarnikkut aamma qulakkeerniarneqarpoq KNR-ip akiliisitsisarluni tv-mik neqerooruteqarnermigut aallakaatitsiviit allat piuinnarsinnaanermut tunngavissaannik arsaarinninnginnissaa.

Imm. 6-imi erseqqissarneqarpoq ingerlataq alla unammilleqatigiinnermut atugassarititaasut tunngavigalugit ingerlanneqassasoq. Tamanna ilaatigut isumaqarpoq landskarsimit aningaasaliissutit ingerlatamut allamut atorneqaqqusaanngitsut, aammalu KNR-ip ingerlatseqatigiiffiillu allat nioqqutissanik sullissinernillu niuernerat, matumani aamma ingerlatseqatigiiffiit tamakkiisumik nammineq pigisat, unammilleqatigiiffiusumik ingerlanneqassasoq. Tamanna aamma atuuppoq KNR-ip iluani niuernermi, tassa ingerlatat niuernerpalaartut ingerlatseqatigiiffimmi immikkut ingerlasumi ingerlanneqanngippata. Aalajangersagaq KNR-ip pisortat sullissinerannik ingerlatsinerani aamma allatut aallakaatitassiornermik ingerlatsinerani aammalu ingerlatamik allamik ingerlatsinerani missingersuutitigut naatsorsuutitigullu immikkoortitsinissamik aalajangersakkamut attuumassuteqarpoq.

KNR-ip ingerlatsinera niuernerpalaartumik atugassaqarfiusumik ingerlanneqanngitsutut nalilerneqarpat tamanna pillugu apeqqut Unammilleqatigiinnermut ataatsimiititaliamut suliakkiissutigineqarsinnaavoq.

 

§ 30-mut

Aalajangersakkap peqqussummi maanna atuuttumi § 8, imm. 1, § 10, imm. 1-imik ilallugu nangippaa.

Oqaatsip "Pisortat suliffeqarfiat namminersortoq" erseqqissarpaa KNR-ip suliffeqarfik namminersortuunera inatsisitigut aalajangiunneqarpoq. KNR-ip ingerlatsinera pillugu aalajangersakkat malinneqarnissaannik pingaarnertut akisussaasumik suliffeqarfiup nammineq siulersuisoqarnera tamatuminnga ersarissaataavoq, tak. siunnersuummi § 32 tassungalu oqaaseqaatit. Namminersorneq tassaavoq KNR-ip ingerlatsineranut akisussaanerup suliffeqarfimmi namminermi erseqqissumik inissisimanera.Tassa imaappoq Namminersornerullutik Oqartussat KNR-ip ingerlatsineranut sunniuteqarsinnaanerat KNR-imi siulersuisut siulittaasussaannik ilaasortamillu allamik ataatsimik toqqaanissamut killeqarpoq. Namminersornertaaq imm. 2, pkt. 1-imi aalajangersaavigalugu erseqqissagaavoq, tassalu KNR-ip suliani aalajangiineri suliffeqarfiup ingerlatsineranut tunngassuteqartut, aqutsinikkut oqartussaasunut allanut ingerlateqqinneqarsinnaanngitsut. Tamannali tusagassiornermi ileqqorissaarnissaq aammalu akissuteqartarnissaq pillugit sulianut atuutinngilaq, tak. imm. 2, pkt. 2.

Suliffeqarfiup pisortanit pigineqarneranut patsisaanerpaavoq suliffeqarfiup ingerlatsinerata pisortanit aningaasalersuinikkut annertunerpaamik aningaasalersugaanera. Siunnersuummi § 35-mi takuneqarsinnaasutuut KNR-ip ingerlatsinera ilaatigut landskarsimit tapiissutitigut aningaasalersugaavoq. Tamatuma kinguneraa KNR missingersuutinut naatsorsuutinullu maleruagassat, pisortat suliffeqarfiutaannut allanut landskarsimit tapiissutitigut aningaasalersorneqartunut atuuttut malissallugit pisussaaffeqartoq, tak. siunnersuummi § 37. Tassa KNR missingersuutit naatsorsuutillu pillugit maleruagassanik aalajangersarneqarsimasunik malinnittussaanermi saniatigut aamma missingersuutit naatsorsuutillu pillugit peqqusinerit aalajangersimasut, soorlu missingersuutinut killiliussanik ataqqinninnissamik aammalu missingersuutinut tunngatillugu allaffeqarfikkoortumik suleriaatsit aalajangersarneqarsimasut malinninnissamik pisussaaffeqarpoq.

Suliffeqarfiup pisortanut attuumassuteqarnera pissutsillu, tassalu taassuma ingerlanneqarnera Nunatta karsianit pingaarnerusumik aningaasalersorneqarmat, imaalersippaat, taassuma ingerlataasa ilaat suliffeqarfittut ingerlatsivittut ittuummata Pisortat ingerlatsineranni suliassat suliarineqaretarnerat pillugu Inatsisartut Inatsisaannut aamma Inatsisartut Ombudsmandiat pillugu Inatsisartut inatsisaannut ilaatinneqarput. Suliffeqarfiuttaaq ingerlatsinera Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaannut ilaatinneqarpoq.

Siunnersuummi § 34 naapertorlugu KNR-ip aalajangersakkat Namminersornerullutik Oqartussani atorfeqartunut sukkulluunniit atuuttut malitassarigai. Ilitsersuisinnaatitaanerli KNR-ip atorfinitsitsisinnaatitaaneranik, siulersuisut pisortamik atorfinitsitsisinnaallutillu soraarsitsisinnaanerannik aammalu pisortap KNR-imi sulisunik allanik atorfinitsitsisinnaallunilu soraarsitsisinnaaneranik peqqussummi aalajangersarneqartumik killiliinngilaq

 

§ 31-mut

Aalajangersakkami aalajangersarneqarput KNR-ip siulersuisuisa qanoq katitigaanissaat, piffissaq atuuffissaat, taakkulu saniatigut imm. 8-mi nanginneqarput siulersuisut il.il. akissarsisinneqartarneri pillugit Naalakkersuisut maleruagassiorsinnaanerannut piginnaatitsineq.

Imm. 1: Aalajangersakkami erseqqissarneqarpoq siulersuisut peqqussummut maanna atuuttumut sanilliullugu qulingiluanik ilaasortaqarnermiit arfineq-marlunnik ilaasortaqarnermut appartinneqassasut.

Imm. 1-imi aamma erseqqissarneqarpoq siulittaasoq Naalakkersuisunit maannamutuut toqqarneqartassasoq. Ilaasortap allap ataatsip Naalakkersuisunit toqqarneqartartussanngornerat nutaajuvoq. Ilaasortat arlaannaataluunniit Inatsisartunit inassuteqarnermik tunngaveqartumik toqqarneqartannginnissaat nutaajuvoq. Tassunga tunngaviuvoq siulersuisut suliamik ilisimasaqarluartuunissaasa siulersuisunit politikkikkut toqqagaasunit kissaatiginarnerutinneqarnera.

Maleruagassat maanna atuuttut malillugit imaappoq ilaasortat marluk inassuteqartoqareerneratigut Naalakkersuisunit toqqarneqartarlutik, tassa KNR-ip nunap immikkoortuini immikkoortortaqarfiini taamatullu aamma qitiusumik immikkoortortaani aalajangersimasumik sulisuusut tamarmik immikkut ilaasortassamik ataatsimik inassuteqarnerisigut. Siunnersuut malillugu KNR-imi aalajangersimasumik sulisuusut ilaasortassamik ataasiinnarmik inassuteqarnerisigut toqqaasoqartassaaq. Tassunga ilaatigut patsisaavoq siulersuisuni ilaasortat ikilineqarnerat ilaatigullu aamma periuseq nalinginnaasoq imaammat ilaasortap ataasiinnaap sulisuusunit inassutigineqartussaanera. Aamma nunap immikkoortuini immikkoortortaqarfiit maanna ikilineqarsimapput siunissamilu immaqa atorunnaarsinneqassallutik.

Aamma ilaasortat allat sisamat, 1) sumiiffinni radioqarfiit tv-qarfiillu kattuffiannit aallakaatitassiortartullu namminersortut allat kattuffeqarpata kattuffiannit, 2) Tusagassiornermik Ilinniarfimmi pisortanit, 3) Kalaallit Nunaanni isiginnaartartut tusarnaartartullu nuna tamakkerlugu kattuffiinit aamma 4) Kalaallit Nunaanni eqqumiitsuliortut kulturimillu sammisaqartut nuna tamakkerlugu kattuffiinit inassuteqartoqarneratigut Naalakkersuisunit toqqarneqartassapput. Isiginnaartartut tusarnaartartullu maannakkorpiaq nuna tamakkerlugu kattuffeqanngillat. Tamanna peqqussutip atortuulernerani taamaaginnassagaluarpat inassuteqarsinnaaneq KANUKOKA-mut nuunneqassaaq. Ilaasortassatut inassutigineqartutigut qulakkeerniarneqarpoq siulersuisut tusagassiuuteqarnermut kulturimullu tunngasunik ilisimasaqartuunissaat.

Imm. 2: Imm. 2-mi piumasaqaatit ilanngunneqarput qulakkeerniarlugu ilaasortat toqqarneqartut Kalaallit Nunaannut pisariaqartumik attuumassuteqartuunissaat, nammineersinnaasuunissaat aammalu tamatumunnga ilutigitillugu inatsisiliortuni oqartussaasunilu landskarsimit aningaasaliissuteqartartuusuni ilaannginnissaat.

Imm. 3: Ilaasortassatut inassutigineqartunit kikkut toqqassanerlugit Naalakkersuisut namminneq aalajangissavaat, soorlu aallakaatitassiortartut namminersortut kattuffiata inassutigisaa imaluunniit sumiiffinni radioqarfiit tv-qarfiillu kattuffiata inassutigisaa. Aalajangersakkami aammattaaq erseqqissarneqarpoq inassuteqarsinnaasut inassuteqaataannik tigusaqartoqanngippat Naalakkersuisut inassuteqarnertaqanngitsumik toqqaasinnaasut.

Imm. 4: Aalajangersakkakkut qulakkeerniarneqarpoq siulersuisut tamarmiullutik tusagassiornermut tunngasunik, kulturimut aamma aqutsinermut inuussutissarsiornermullu tunngasunik ilisimasaqartuunissaat, tassuunakkummi suliffeqarfimmik aqutsisinnaanissaat pitsaanerpaaq anguneqassammat, tassami tusagassiuuteqarnermut tunngasutigut, kulturimut inuussutissarsiornermullu tunngasutigut periarsinnaasariaqarmata.

Aalajangersakkami aalajangersarneqarpoq ilaasortat inassuteqarnertaqanngitsumik Naalakkersuisunit peqqussut naapertorlugu toqqarneqartut tamarmik aqutsinermik inuussutissarsiornermilluunniit ilisimasaqartuussasut. Tamanna ilaasortat allat tusagassiuuteqarnermut kulturimullu tunngasunik ilisimasaqartuunissaannik naatsorsuutigisaqarnermik tunngaveqarpoq.

Imm. 5: Aalajangersakkap peqqussummi maanna atuuttumi § 10, imm. 4 nangippaa. Aalajangersakkap siunertaraa piffissami atuuffiusumi ilaasortanik nutaanik toqqaasoqartassanngitsoq, ilaasortat arlaat tunuaraluarpat, tunuartitaagaluarpat sivisuumilluunniit peqanngikkaluarpat apeqqutaatinnagu. Taamaattorli maannamutuulli naleqquttuusorineqarpoq siulittaasuusoq tunuassagaluarpat tunuartitaassagaluarpalluunniit siulittaasumik nutaamik toqqaasoqartassasoq. Siulittaasoq sivisuumik peqanngissappat siulittaasup tullia piffissami siulittaasup peqanngiffiani siulittaasutut atuutissaaq.

Imm. 6: Aalajangersakkap peqqussummi maanna atuuttumi § 10, imm. 6 nangippaa. Aalajangersakkami qulakkeerniarneqarpoq siulittaasoq peerutissagaluarpat taartaasussamik aalajangersimasumik peqarnissaq.

Imm. 7: Aalajangersakkami piffissaq siulersuisut atuuffissaat aalajangersaavigaa. Taanna maannamutuut ukiunik sisamanik sivisussuseqarpoq, siullerpaamilli ukiuni marlunni qaammatinilu marlunni. Tamatumunnga pissutaavoq nutaamik siulersuisunngortut pisortat sullissinerannik isumaqatigiissutissap 1. januar 2009-miit atuutilersussap piareersarnissaanut aammalu isumaqatigiissutigineqarnissaanut piffissaqartikkumallugit, tak. siunnersuummi § 61.

Aalajangersakkap oqaaseqatigiivisa aappaanni aalajangersarneqarportaaq, toqqaasoqaqqissinnaasoq, tamannali ataasiaannarluni pisinnaasoq. Ajornaqutissaqartinneqanngilarli, siulersuisunut ilaasortap piffissap ingerlanerani siulersuisunut ilaasortaasimanngitsup nutaamik toqqarneqaqqissinnaanera.

Aalajangersakkap oqaaseqatigiivisa pingajuat maanna peqqussutip atuuttup § 10, imm. 2-ata nangissutigaa. Aalajangersakkami siunertarineqarpoq toqqaasussaatitaasut siulersuisunut ilaasortaq sinniisussarluunniit aalajangersimasumik ilaasortanngorsimasoq piffissap atuuffiup ingerlanerani soraarsissinnaagaat, siulersuisutut akisussaaffini annertuumik sumiginnarpagu allatulluunniit siulersuisuni issianissaminut imminut piukkunnarunnaarsissimappat.

Toqqaasussaatitaasut tassaapput piffissap atuuffiup ingerlanerani siulersuisunut ilaasortaq arlallilluunniit taarserneqarnissaanut tunngavissaqarnersoq isummerfigissallugu. Siulersuisunut ilaasortat arlallit inassuteqarnikkut Naalakkersuisunit toqqagaammata, inassuteqartut tassaasariaqarput ilaasortamik taarsiinissamut inassuteqarsinnaasariaqartussat. Naalakkersuisulli taamatut inassuteqarnermik malinninnissamut pisussaaffeqanngillat. Naalakkersuisut aalajangiinerat naammagittaalliuutigineqarsinnaanngilaq.

Siunnersuutip akuersissutigineqarneratigut peqatigitillugu naqissuserneqassaaq, atuuffiup naannginnerani taamaallaat siulersuisunut ilaasortamik taarsiisoqarsinnaasassasoq, siulersuisunut ilaasortaq pineqartoq aalajangersakkami pisunut taaneqartunut marluusunut ilaatinneqarsimappat. Taamaalilluni naammanngilaq, pineqartoq oqartussaasutut toqqaasinnaatitaasunit tatigineqarunnaarsimanera imaluunniit allatut taakkunanit tatigineerutivissimanera. Taamaaliornikkut qulakkeerniarneqarpoq, siulersuisut ilaasortaannik taarsiisarneq KNR-ip siulersuisuinut piginnaatitsissutaasoq politikikkut akuliunniarnertut atorniarneqannginnissaa. Namminersornissaq Inatsisartut peqqussutaatigut KNR-imut qularnaarinniffiuniartoq, siunnersuutikkut killilersimaarniarneqarnissaa siunniunneqanngilaq.

Aalajangersakkap oqaasertalerneqarneratigut pisut nassuiaaserneqarluarput, siulersuisunut ilaasortat piffissami toqqagaaffimmik qaangiutinnginnerani tunuartitaasinnaanerat. Aappaatigut oqartussaasut toqqaasussat siulersuisunut ilaasortanik taarsiisinnaanerat periarfissinneqarpoq, tamatumunnga naammaginartumik peqqutissaqartoqaraangat, aappaatigullu siulersuisunut ilaasortat maanaannakkut taarserneqarsinnaasarnissaat qulakkeerneqarpoq imaalillugu, siulersuisut taamaalillunilu KNR-ip namminersortuunera killilersuiffigineqarani.

"Siulersuisutut akisussaaffini annertuumik sumiginnarpagu"-mik oqaasertaliinikkut siunertarineqarpoq, siulersuisunut ilaasortat siulersuisutut atuuffimminni tunuartinneqartarnissaat aatsaat pisinnaasoq isumagisaat ima naammaginartiginngippat, pisoq nalinginnaasumik mianersuaalliornermut tunngatinneqarsinnaanani. Kingorna aalajangersagaq assersuutigalugu annertuumik peqataasoqannginnerani atorneqarsinnaassaaq (assersuutigalugu siulersuisut sulineranni peqataasannginneq killilimmilluunniit peqataasarneq imaluunniit unioqqutitsisumik iliuuseqartoqarsimanermut imaluunniit tunngavissaqanngitsumik missingersuutit sipporneqarnerisa unitsinniarneqarnissaanni).

"Allatulluunniit siulersuisuni issianissaminut imminut piukkunnarunnaarsissimappat"-mik oqaasertaliinikkut siunertarineqarpoq, toqqaasussaatitaasut siulersuisunut ilaasortamik taarsiisinnaanerat, siulersuisut avataasigut suliaqarluni iliuuseqarnermigut atuuffimminik nangitsiinnarnissamut piukkunnarunnaarsimasumik. Pingaartumik tamatumani eqqarsaatigineqarpoq pinerluttuliorsimanerit, tassunga ilanngullugit aningaasatigut peqquserluuteqarneq, soorlu allap pianik imminut paarititanik peqquserluuteqarneq, peqquserlunneq, piginnaatitaanermik atornerluineq allallu. Allanilli pinerluuteqarsimanerup qanoq issusia apeqqutaatillugu, kingunerisinnaavaa toqqaanermi piumasaqaataasimasutut pineqartoq toqqaasussaatitaasuniit tatigineqarsinnaajunnaarnera. Pinerluuteqarsimanerup allamik taarserneqarnissamik kinguneqarsinnaanera qanoq pissanersoq, tamanna pisup toqqaasussaatitaasut aalajangiinerisigut pisinnaavoq. Pinerluuteqarsimanerup saniatigut siulersuisunut ilaasortaq piukkunnarunnaarsimanera innersuussutigalugu tunuartinneqarsinnaavoq, pineqartoq iliuuseqarnermigut iliuuseqarsimannginnermigulluunniit siulersuisut soqutigisaannut soqutigisaqannginnermik takutitsisimaguni. Taamaattorli toqqaasussaatitaasut soqutigisaat malillugit sulinissamut piumassuseqannginneq piginnaasaqannginnerluunniit imminermini tunuartitaanissamut peqqutaatinneqarsinnaavoq.

Imm. 8-p peqqussummi maanna atuuttumi siulersuisunik akissarsiaqartitsisarneq pillugu maleruagassanik aalajangersaasinnaanermut piginnaatitsineq nangippaa.

 

§ 32-mut

Imm. 1-ip peqqussummi maanna atuuttumi § 11, imm. 1, siulersuisut KNR-ip ingerlatsineranut aammalu anguniagassat pillugit isumaqatigiissutip naammassineqarnissaanut akisussaanerannik erseqqissaanermik ilallugu nangippaa, soorluttaaq erseqqissarneqartoq siulersuisut ulluinnarni aallakaatitassiornermut aallakaatitanullu ataasiakkaanut sunniuteqartussaanngitsut.

Imm. 2-p peqqussummi maanna atuuttumi § 11, imm. 2 nangippaa. Maleruagassat nalinginnaasut tassaapput KNR-ip ingerlatsinerani nalinginnaasumik atugassarisaasut pingaarnerit. Tamakku tassaasinnaapput iliuusissanut pilersaarutit.

Imm. 3-p peqqussummi maanna atuuttumi § 11, imm. 3 nangippaa, allannguutigaluguli siulersuisut maanna pisortaq kisiat atorfinitsissinnaalermassuk, tassa maannamutuut aamma KNR-imi ulluinnarni aqutsisut atorfinitsittarneri pinnagit. Taamatut allannguinermi naatsorsuutaavoq naalakkiuteqarsinnaanerup ersarinnerulersinnissaata aammalu pisortap suliffeqarfimmik aqutsinissamut sulisuusunillu tamanik ilitsersuinissamut piginnaatitaasariaqarnerata qulakkeerneqarnissaat.

KNR-imi ileqqoreqqusanik aalajangersaanissaq imm. 4-mi periarfissiuunneqarpoq. Kalaallit Nunaata Radioanut ileqqoreqqusat pillugit nalunaarut maanna atuuttoq (Namminersornerullutik Oqartussat nalunaarutaat nr. 2, 24. januar 1991-imeersoq) peqqussutip atortuulersinneqarnerani atorunnaarsinneqassaaq, tak. siunnersuummi § 60, imm. 2, taassumami nutarterneqarnissaa pisariaqarmat.

 

§ 33-mut

Imm. 1-ip peqqussummi maanna atuuttumi § 12, imm. 1 allannguuteqartinnagu nangippaa. Aalajangersakkap siunertaraa pisortap siulersuisut tungaannut akisussaaffiata killilernissaa.

Imm. 2-p peqqussummi maanna atuuttumi § 12, imm. 2 nangippaa, allannguutigaluguli pisortap ulluinnarni pisortat aamma atorfinitsittalissagai, tak. tassunga tunngatillugu siunnersuummi § 32, imm. 3-mut oqaaseqaatit.

 

§ 34-mut

Aalajangersakkap peqqussummi maanna atuuttumi § 13 oqaasertai allannguuteqartilaarlugit nangippai.

Tassuunakkut naleqquttuusorineqarpoq atugassarititaasut Namminersornerullutik Oqartussani atorfeqartunut atuuttut KNR-ip pisortat suliffeqarfiutaattut suli malissagai.

KNR-ip sulisunik piginnaasaqarluartunik pissarsiniartarnermi sulisoqaannarniartarnermilu ajornartorsiutaasartut innersuussutigalugit kissaatigisimavaa sulisut aalajangersimasut isumaqatigiinniutigineqartarnerat tiguniarlugu.

Isumaqatigiinniartarnerup taama tunngaveqarluni KNR-imut tigutinnissaa Naalakkersuisut naleqquttuusorinngilaat.

KNR-ip atugassarititaasunik Namminersornerullutik Oqartussanut atuuttunik tunngaviatigut suli malinnittussaaneranik Naalakkersuisut aalajangiusimanninnerannut ilaatigut patsisaavoq Namminersornerullutik Oqartussat suliffeqarfiutaasa tamarmik aningaasartuutitigut aqunneqarnissaat assigiimmillu atugassaqartitaanissaat pingaarnertut kissaataammat. Killiliussat taakku iluanni aamma periarfissaqarpoq, aningaasarsiat pillugit isumaqatigiissutinut isumaqatigiissutinullu tapiliussatut aalajangersaanertigut arlaatigut eqaatsumik aaqqiisoqarsinnaanera, soorluttaaq atorfiit suliallu nutaat akisussaassutsimut pisinnaatitaanermullu il.il. tunngatillugu nalinginnaasumik aalajangersarneqarsimasunit annertuumik aallaassuteqartut pillugit isumaqatigiinniarnerit ingerlanneqarsinnaajuartut. Kattuffik isumaqatigiinniussisinnaasoq isumaqatigineqarsinnaappat aamma periarfissaqarsinnaavoq piffissami isumaqatigiissuteqarfiusumi aningaasarsianik nammineq aalajangersaanissamut atugassanik immikkoortitsisoqarnissaa.

 

§ 35-mut

KNR-ip aningaasalersugaanera peqqussummi maanna atuuttumi § 9 naapertorlugu aalajangersagaavoq, tassani allassimalluni KNR-ip ingerlatsinera landskarsimit tapiissutitigut, pilerisaarisarnermutigut aallakaatitassianullu aningaasalersuisarnertigut isertitatigut, pinnguaatitigut unammisitsinertigullu isertitsinartutigut aammalu sullissinernik tunisinertigut il.il. aningaasalersorneqassasoq. Sumiiffinni aallakaatitsiviit aningaasalersugaanerat radiukkut tv-kkullu aallakaatitsisarneq pillugu maleruagassat malillugit aalajangersagaanngilaq, kisianni kulturi sunngiffimmilu sammisassaqartitsineq pillugit Inatsisartut peqqussutaat aallakaatitsivinnut taakkununnga tapiissuteqarsinnaanermik periarfissamik imaqarpoq. Aallakaatitsiviit taakku landskarsimit tapiissutitigut, kommunit tapiissuteqarsimappata tapiissutaasigut ilaasortaanermullu akiliutitigut, pilerisaarisarnermutigut aallakaatitassianillu aningaasalersuisarnertigut isertitatigut aammalu allamik ingerlataqarnikkut isertitatigut aningaasalersugaasarput.

Imm. 1: Aalajangersakkami erseqqissarneqarpoq KNR-ip ingerlatsinera landskarsimit tapiissutinit, reklaminit, aallakaatitanit aningaasalersorneqartunit allamillu ingerlataqarnermit isertinneqarsimasinnaasutigut aningaasalersorneqassasoq. Allamik ingerlataqarneq tassaavoq siunnersuummi § 29, imm. 1 naapertorlugu allatut aallakaatitassiornermi isertitat aammalu siunnersuummi § 29, imm. 2 naapertorlugu allamik ingerlataqarnikkut isertitat.

Imm. 2: Aalajangersakkap peqqussummi maanna atuuttumi § 9, imm. 2 erseqqissaanertalerlugu nangippaa. Tunngaviatigut Inatsisartut tassaapput tapiissutit annertussusissaannik aalajangersaasinnaasut tassuunakkullu KNR-ip ingerlatsinerani atugassaasunik aaqqiisartussat. Pisortat sullissinerannik isumaqatigiissut ukiuni sisamani atuuttartussaammat piffissami tassani aningaasaliissutaasartussat annertussusissaannut piumasaqaatit isumaqatigiissummut ilanngunneqartassapput. Tamanna oqartussaasut aningaasaliisuusut aningaasaliissutinik allanngortitsinissaannut aporfiussanngilaq, taamaaliortoqassappalli piffissap isumaqatigiissuteqarfiusup iluani angusassatut piumasaqaatit isumaqatigiissummiittut taassuma kingunerisaanik allannguallatsinneqartariaqassapput.

 

§ 36-mut

Imm. 1: Aalajangersakkap peqqussummi maanna atuuttumi § 15 allannguuteqartinnagu nangippaa. Siulersuisut missingersuusiornerminni Namminersornerullutik Oqartussat missingersuutinut killiliussatut nalunaarutaat ataqqissavaat. Aamma missingersuusiorneq pisortat sullissinerannik isumaqatigiissutaasimasumut naapertuuttuussaaq. Piffissami isumaqatigiissuteqarfiusumi isertitassatut naatsorsuutigisat pisortat sullissinerannik isumaqatigiissummi allaaserineqarsimassapput. Naatsorsuutigisat taakku eqquussinnaanngitsut paasinarsippat, tamanna anguniagassanut piumasaqaatit isumaqatigiissummiittut aaqqiivigineqartariaqarnerannik kinguneqassaaq, imaluunniit ingerlatassat annertussusissaattut naatsorsuutigisat attatiinnarneqarnissaat kissaatigineqarpat Inatsisartunit tapiissutit annertussusiat allanngortinneqartariaqassaaq.

Imm. 2: Aalajangersagaq nutaajuvoq. Aalajangersakkap siunertaraa KNR-ip pisortat sullissinerannik ingerlatsinerata aamma allanik aallakaatitassiornerata aammalu allamik ingerlataqarnerata missingersuutitigut immikkoortinneqarnissaannik qulakkeerinissaq. Tamanna taamatuttaaq naatsorsuutitigut immikkoortitsinissamik piumasaqaammut attuumassuteqarpoq, tak. siunnersuummi § 37, imm. 2. Missingersuutitigut naatsorsuutitigullu immikkoortitsinissaq KNR-ip allamik ingerlatsinerata niuernerpalaartumik atugassaqarfiusumik ingerlanneqarnissaanik piumasaqaammut attuumassuteqarpoq, tak. siunnersuummi § 29, imm. 6.

 

§ 37-mut

Imm. 1-ip peqqussummi maanna atuuttumi § 17, imm. 1 erseqqissaanertalerlugu nangippaa. Namminersornerullutik Oqartussani missingersuusiorneq, naatsorsuutinik nalunaarsuineq naatsorsuutinillu saqqummiussisarneq pillugit aalajangersakkat sukkulluunniit atuuttut KNR-imit malinneqarnissaannut tunngaviuvoq, KNR pisortat suliffeqarfiutigimmassuk Landskarsimit tapiissutinit aningaasalersugaanerusoq. Taassuma erseqqinnerusumik nassuiarneqarneranut tunngatillugu siunnersuummi § 30-mut oqaaseqaatit innersuussutigineqarput.

Imm. 2 nutaajuvoq. Aalajangersakkap siunertaraa KNR-ip pisortat sullissinerannik ingerlatsinerata aamma allanik aallakaatitassiornerata aammalu allamik ingerlataqarnerata naatsorsuutitigut immikkoortinneqarnissaannik qulakkeerinissaq. Tamanna taamatuttaaq missingersuutitigut immikkoortitsinissamik piumasaqaammut attuumassuteqarpoq, tak. siunnersuummi § 36, imm. 2. Missingersuutitigut naatsorsuutitigullu immikkoortitsinissaq KNR-ip allamik ingerlatsinerata niuernerpalaartumik atugassaqarfiusumik ingerlanneqarnissaanik piumasaqaammut attuumassuteqarpoq, tak. siunnersuummi § 29, imm. 6.

Imm. 3 nutaajuvoq. Naalakkersuisut periarfissippai KNR-ip ingerlatsinerisa assigiinngitsut missingersuutitigut naatsorsuutitigullu immikkoortinneqarnissaat pillugu erseqqinnerusunik maleruagassiornissamut.

Imm. 4-p peqqussummi maanna atuuttumi § 17, imm. 2 allannguuteqartinnagu nangippaa. Ukiumoortumik naatsorsuutit Namminersornerullutik Oqartussat kukkunersiuisuannit kukkunersiorneqarnissaannut patsisaasumut tunngatillugu imm. 1-imut siunnersuummilu § 30-mut oqaaseqaatit innersuussutigineqarput.

Imm. 5-ip peqqussummi maanna atuuttumi § 17, imm. 3 nangippaa. Naatsorsuutit Naalakkersuisunut saqqummiunneqarnerminni siulersuisunit akuerisaasimanissaat erseqqissarneqarpoq. Pisarnertut naatsorsuutit Naalakkersuisunut akuerisassatut saqqummiunneqassapput kingornalu Inatsisartunut ilisimatitsissutitut saqqummiunneqassallutik.

Imm. 6 nutaajuvoq. Naatsorsuutit tamanut saqqummiunneqarnissaannik piumasaqaat KNR-ip ingerlatsinerata tamanut ersarinnerulerlunilu uppernarsaatissaqarnissaanik pissuteqarpoq.

 

Kapitali 5-imut, Sumiiffinni radioqarfinnut tv-qarfinnullu tapiissutit

Sumiiffinni radioqarfiit tv-qarfiillu landskarsimit tapiiffigineqartarnissaannik peqqussummi aalajangersagaliorneq nutaajuvoq.

Kapitalip imarai tunngaviusumik tapiissutit radioqarfinnit tv-qarfinnillu qinnutigineqarsinnaasut pillugit aalajangersakkat. Tulliupput aallakaatitassiornissamut tapiissutit, tv-qarfiinnarnit qinnutigineqarsinnaasut pillugit aalajangersakkat. Taava tulliupput kattuffimmut tapiissutit aamma sumiiffinni radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqartarnerannut tapiissutit pillugit aalajangersakkat. Tulliupput tapiissutinik tiguneqarsimasunik utertitsisarnissaq pillugu aalajangersakkat. Kiisalu tapiissutit ataasiakkaat allaffissornikkut isumagineqartarnerisa allamut isumagisassanngortinneqarnissaat aamma aningaasat tapiissutitut atorneqanngitsoortut atornissaat pillugit aalajangersagaqarpoq.

Tapiissutit pillugit maleruagassat peqqussummi aalajangersarneqarnerannut tunngaviuvoq radioqarfiit tv-qarfiillu ataasiakkaat tapiissutinik tunineqarsinnaanermik qulakkeerissunniarlugit, tassa piumasaqaatit peqqussummi aalajangersarneqartut naammassineqarsimappata. Tassuunakkut aallakaatitsiviit ataasiakkaat siumut naatsorsuutiginnissinnaanerulissapput ingerlatsinerminnullu taamaalillutik pilersaarusiorsinnaanerulissallutik. Aammattaaq sumiiffinni radioqarfiit tv-qarfiillu aningaasalersugaanikkut tunngaviisa annertusarneqarnissaat nalinginnaasumik kissaataasimavoq.

Tapiissutit pillugit aalajangersakkat ilaatigut siunertaraat aallakaatitsiviit ataasiakkaat ingerlataminnut tunngatillugu tunngaviusumik piumasaqaatinik naammassinninnissaannik qulakkeerinissaq, tassa aallakaatitassianut tunngatillugu aamma ingerlataminni maleruagassanut tunngatillugu. Tamatuma saniatigut siunertaraat aallakaatitsiviit nammineerlutik aallakaatitassianik suliaqarnissamut kajuminnerulersinnissaat. Aamma siunertaraat qulakkiissallugu radioqarfiit tv-qarfiillu kattufiata nukittorsarnissaa, radioqarfiit tv-qarfiillu taamaallillutik suliamik tungaatigut nukittuumik, ilaasortaminnik siunnersuisinnaasumik aammalu ilaasortami soqutigisaannut naapertuuttumik isumaginnissinnaasumik kattuffeqarnissaat anguniarlugu. Kiisalu aamma aalajangersakkat siunertaraat radioqarfiit tv-qarfiillu sulisumik ilinniarteqqinneqartarnissaannut ingerlaqqiffiusumillu ilinniarqittarnissaannut periarfissaqaqqullugit tamatumuunakkut aallakaatitsiviit ingerlatsinerisa pitsaassusiat annertusarniarlugu.

 

§ 38-mut

Aalajangersakkami aalajangersarneqarput radioqarfiit tv-qarfiillu tunngaviusumik tapiissutinik tunineqarnissaannut piumasaqaatit.

Imm. 1: Nr. 1-imiit 3-mut piumasaqaatit siulliit pingasut siunertaraat qulakkiissallugu aallakaatitsivik pineqartoq aallakaatitassiornermik ingerlataqarsinnaanersoq, aallakaatitassiornermillu ingerlatsineq Namminersornerullutik Oqartussat missingersuutinut, naatsorsuutinut kukkunersiuisoqarnermullu tunngatillugu maleruagassiaat naapertorlugit ingerlanneqarnersoq kiisalu aallakaatitassiornermik ingerlatamut uppernarsaatissaqarnersoq. Maleruagassat taakku missingersuusiortarneq pillugu inatsimmi taannalu malillugu allaffissornikkut maleruagassiani allassimapput.

Nr. 4-mi piumasaqaatip siunertaraa qulakkiissallugu aallakaatitsiviup pineqartup sumiiffimmi nutaarsiassaqartitsineq isumagisarineraa, tassami sumiiffimmi nutaarsiassaqartitsineq sumiiffinni tamat oqartussaaqataanerannut pingaaruteqarluinnartutut nalilerneqarmat.

Aallakaatitsiviup sumiiffimmi innuttaasut oqaaseqarsinnaatitaanerannik periarfissiinissaa pillugu nr. 5-imi piumasaqaat aamma sumiiffinni tamat oqartussaaqataanerannik siuarsaasussatut isigineqassaaq.

Nr. 6-imi piumasaqaammut tunngaviuvoq sumiiffinni aallakaatitsiviit ataasiakkaat aamma nammineerlutik aallakaatitassianik suliaqartarnissaasa qulakkeernissaa. "Aallakaatissavai siammartissallugilluunniit"-mik oqarnermi erseqqissarniarneqarpoq aallakaatitsiviup aallakaatitsinikkut imaluunniit siammarterinikkut aallakaatitassiornermik ingerlataqartuusinnaanera, tak. siunnersuummi § 2, imm. 1.

Nr. 7-imi piumasaqaatip siunertaraa qulakkiissallugu, inuiaqatigiit tamarmik aallakaatitsiviup aallakaatitassiaasa ajoqutiginagit iluaqutigineqartarnissaat. Ukiukinnerit aallakaatitanik sunnerneqarnerusinnaapput, taamaattumik pissusissamisoorsorineqarpoq aallakaatitsiviup taakkuninnga sianiginninniarluarnissaa.

Tunngavigineqartumi "pissuteqanngivilluni nukissornermi" siunniunneqarpoq nukissornerup isiginnaartunut sunniuteqartarnerata ataatsimut nalilersorneqarsinnaanera, nukissornerup suunera, annertussusaa tunngavialu, nukissorfigineqartup inissisimanera qisuariarneralu, isiginnaagassiap ilitsersorneqarnera kiisalu kusanartutut eqqumiitsuliarineranilu takutitat eqqarsaatigalugit. Naliliinermi aammattaaq aliikkutassiani, eqqumiitsuliat pillugit aallakaatitassiani aamma nutaarsiassat pisimasuiillu tunngavigalugit aallakaatitassiani nukissornerit nalilersornerini uuttueriaatsit assigiinngitsut atorneqassallutik, kingullertut taaneqartumi aallakaatitassiani nukissorneq pillugit aallakaatitassianut nakkutilliilluni piiaanerit nutaarsiassat paasissutissiinermilu kiffaanngissuseqarnerit inuiaqatigiinnilu oqallinninnerit eqqarsaatigalugit illuatungiliutsinneqassammata. Uniffiit aappaata siunertaraa nutaarsiassanut paasissutissiinernilu aallakaatitassiat sakkortuut pingaaruteqarnerisa akuerineqarnissaasa ersarissisinneqarnissaat ilutigalugulu isiginnaartunut aalajangersimasunut illersuinissamut soqutiginninneq eqqarsaatigineqarluni, aamma meeqqat inuusuttullu ilanngullugit. Mianersoqqusineq aallakaatitassiani taamatut takutitsisut sioqqullugit aamma saqqummiunneqartariaqarpoq, assersuutigalugu filmimi, aallakaatitassiamilu immikkuullarissumik ilanngussinissaq sioqqutilaarlugu, assersuutigalugu nutaarsiassanik aallakaatitsinermi.

Nr. 8-mi piumasaqaat isigineqassaaq pissutsit taaneqartut pissutigalugit allanik immikkoortitsinissamut inerteqqutit pillugit maleruagassat malinneqarnissaannut immikkut pisussaaffeqartoqarnera.

Imm. 2: Aalajangersagaq imm. 1, nr. 4-miit 6-imut naapertorlugit pisussaaffiit naammaginartumik isumagineqarnissaannik qulakkeerinissaq siunertaralugu ilanngunneqarpoq.

Imm. 3: Radioqarfinnut tv-qarfinnullu tapiissutit maannakkut aamma qaammatit pingasukkaarlugit tunniunneqartarput. Taamatut periuseqarnerup ingerlaannarnissaa naleqquttuusorineqarpoq. Tapiissutit qaammatit pingasukkaarlugit tunniunneqartarnerisa kinguneraat tunniussisoqalerneri tamaasa qulakkeeqqaarneqartarluni aallakaatitsiviup tapiissutinik tunineqarnissamut piumasaqaatit suli naammassisimanerai. Qulakkeerinninneq tamanna pissaaq, imm. 1-imi piumasaqaatit taaneqartut suli eqquutsinneqarsimanerisa misissuiffigineqarnerisigut. Tapiissutit siumoortumik tunniunneqartarnerannut patsisaavoq nammineerluni aallakaatitassiat annertussusiat tapiissutinut aalajangiisuunngimmat, taamaallaalli minnerpaaffissatut angissusiliussap naammassineqarsimanissaa.

Imm. 4: Nalunaaruteqartussaatitaaneq imm. 1-imut imm. 3-mullu attuumassuteqarpoq. Tassa imaappoq tapiissutinik tunineqarnissamut piumasaqaatit naammassineqarunnaarpata tapiissutinik tunniussisarneq unitsinneqassaaq. Taamaattumik tapiissutinik pissarsisartup nalunaaruteqartussaatitaanissaa pisariaqartuuvoq.

Imm. 5: Aalajangersakkami qulakkeerniarneqarpoq aallakaatitsiviit ataasiakkaat aallakaatitassiornivimmik suliaqarnerisa Naalakkersuisunit takuneqarsinnaanissaat. Ukiumoortumik nalunaarutip ilaatigut imarissavaa aallakaatitsiviup ukiup ingerlanerani aallakaatitassiornivimmik suliarisimasai pillugit nassuiaat.

 

§ 39-mut

Aalajangersakkami aalajangersarneqarput sumiiffinni tv-qarfiit aallakaatitassiornissamut tapiissutinik tunineqarnissaannut piumasaqaatit.

Radio eqqarsaatigalugu maannakkut nammineerluni aallakaatitassiortarnerit annertoreermata, aammalu tassani aallakaatitassiornermi aningaasartuutit tv-kkut nammineerluni aallakaatitassiornermut sanilliullugit annikinneerarsuummata naleqquttuusorineqarpoq sumiiffinni tv-qarfiit kisiisa aallakaatitassiornissamut tapiissutinik tunineqartarnissaat.

Imm. 1: Aalajangersakkami allassimavoq aallakaatitassiornissamut tapiissutit taamaallaat tv-qarfinnut tunngaviusumik tapiissutinik tunineqarsinnaanermut piumasaqaatinik naammassinnissimasunut tunniunneqartassasut, taassumalu saniatigut nammineerluni aallakaatitassiassanut aalajangersimasunut Naalakkersuisunit minnerpaaffiliussaq eqquutsissimassagaat. Naalakkersuisut imm. 2-mi pisussaaffilerneqarput nammineerluni aallakaatitassiat aallakaatitassiornissamut tapiiffigineqarsinnaasut qanoq ittuunissaat pillugit maleruagassanik aalajangersaanissamut.

Imm. 2: Nammineerluni aallakaatitassiat qanoq ittut aallakaatitassiornissamut tapiissutinik tapiiffigineqarsinnaanerisa nalunaarutikkut maleruagassiuunneqarnissaat naleqquttuusorineqarpoq. Maannangaaq naatsorsuutigineqarpoq aallakaatitat qanoq ittut aallakaatitassiornissamut tapiissutinik tapiiffigineqarsinnaasunut ilaannginnissaat aalajangersarneqarumaartoq. Nammineerluni aallakaatitassianik taamatut killilersuinissaq pissuteqarpoq, taamaaliortoqanngikkaluarpat aallakaatitassiornissamut tapiissutit nammineerluni aallakaatitassianut tusagassiornermik allatulluunniit tusagassiuuteqarnermut tunngasunik tunngaveqanngitsunut atorneqarsinnaanerat – soorlu bingortitsinermik aallakaatitsinernut angallannerlu pillugu nalunaaruteqarnernut.

Imm. 3: Aammattaaq aallakaatitassiornissamut tapiissutit qaammatit pingasukkaarlugit tunniunneqartarnissaat naleqquttuusorineqarpoq. Tunngavisumilli tapiissutinit allaassutigissallugu kingumoortumik tunniunneqartarnissaat qaammatip pingasut siuliani aallakaatitassiaasimasut naatsorsorneqarnerat tunngaviussalluni. Tassunga patsisaavoq tapiissutit nammineerluni aallakaatitassiat annertussusiinit aalajangiganngortinneqarnerat.

Aallakaateqqitat, pilerisaarisarnermut aallakaatitassiallu allat aaqqissorneqanngitsut nammineerluni aallakaatitassiat naatsorsorneqarneranni ilaatinneqannginnissaasa erseqqissarneqarnissaa naleqquttuusorineqarpoq. Tamanna aamma atuuppoq KNR-ip nammineerluni aallakaatitassiaasa naatsorsorneqarneranni, tak. siunnersuummi § 28, imm. 3.

Imm. 4: Aalajangersakkami qulakkeerniarneqarpoq aallakaatitsiviit ataasiakkaat ukiup ataatsip ingerlanerani nammineerlutik aallakaatitassiornermik suliaqarsimanerisa Naalakkersuisunit takussutissaqartinneqarnissaat. Ukiumoortumik nalunaarutip ilaatigut imarissavaa aallakaatitsiviup ukiup ingerlanerani aallakaatitassiarisimasaasa allaaserineqarnerat.

 

§ 40-mut

Sumiiffinni radioqarfiit tv-qarfiillu kattufiata ingerlanneqarneranut immikkut tapiissutit aalajangersarneqartarnissaat naleqquttuusorineqarpoq. Maanna taamatut tapiissuteqartoqartareerpoq.

Aammattaaq ilinniartitseqqinnermut ingerlaqqiffiusumillu ilinniartitsinermut immikkut tapiissutit aalajangersarneqartarnissaat naleqquttuusorineqarpoq. Maanna aningaasat sumiiffinni radioqarfinnut tv-qarfinnullu atunngitsoorneqartut ilinniartitseqqinnermut ingerlaqqiffiusumillu ilinniaqqinnermut atorneqartarput.

Imm. 1 naapertorlugu sumiiffinni radioqarfinnut tv-qarfinnullu aningaasaliissutaareersut iluanni tapiissutit qanoq annertutigisut kattuffiup ingerlanneqarneranut aammalu ilinniartitseqqinnermut ingerlaqqiffiusumillu ilinniaqqittarnermut tunniunneqartassanersut Naalakkersuisunit aalajangersarneqarsinnaapput. Naalakkersuisut taakkuninnga naliliinerminni ilanngutassaraat tapiissutinik agguaassisarnermik isumaginninneq siunnersuummi § 42, imm. 2 malillugu kattuffimmut suliassanngortinneqarsimanersoq.

 

§ 41-mut

Tapiissutit qanoq pisoqartillugu uterteqquneqarsinnaanerat aalajangersakkami aalajangersarneqarpoq.

Piffissamut tapiissuteqarfiusumut sorlermut tapiissutinik utertitsinissamik piumasaqarsinnaaneq aalajangersakkami erseqqissarneqanngilaq. Utertitsinissamik piumasaqaammut patsisaasoq tassunga aalajangiisuussaaq. Qinnuteqaammi paasissutissat eqqunngitsuusimappata tapiissutit tapiissutinik tunineqarfiup aallartinneraniit uterteqquneqarsinnaassapput. Utertitseqqusineq tapiissutinik pissarsisup aallakaatitassiornermini allannguutinik nalunaarutiginnissimannginneranik pissuteqarpat, piffissamit allannguuteqarfiusumiit utertitsinissaq piumasarineqarsinnaassaaq. Piumasaqaat tapiissutinik pissarsisup aallakaatitassiornermik ingerlatsinerminik nammineerlunilu aallakaatitassiornermik ingerlatsinerminik nassuiaateqarsimannginneranik pissuteqarpat, piffissamut nalunaarusiugassamut tunngatillugu utertitsinissaq piumasarineqarsinnaassaaq. Piumasaqaat tapiissutinik pissarsisup akuersissummik tunineqarnissamut piumasaqaatinik naammassinnikkunnaarneranik pissuteqarpat piffissamit taakku pilerfianniit utertitsinissaq piumasarineqarsinnaassaaq.

Imm. 1-ip imarai tunngaviusumik tapiissutit 2-llu imaralugit aallakaatitassiornissamut tapiissutit. Allassimavoq taakkunani tamani utertitseqqusisinnaaneq periarfissaasoq. Aallakaatitassiornissamulli tapiissutinik pissarsisup aallakaatitassiornermik suliaqarnermini allannguutinik annertuunik nalunaaruteqarsimannginnerani tapiissutit uterteqquneqarsinnaanerat aalajangersagaliuunneqanngilaq. Tassunga patsisaavoq aallakaatitassiornissamut tapiissutit nammineerluni aallakaatitassiaasimasut annertussusii tunngavigalugit kingumoortumik tunniunneqartarnissaat.

Imm. 3-imi pineqarput tunngaviusumik tunisasasiornermilu tapiissutit utertillugit akilerneqarnissaat, sumiiffinni aallakaatitsiviit kattuffiata ingerlanneqarneranut aamma ilinniartitseqqinnermut ingerlaqqiffiusumillu ilinniaqqinnernermut tapiissutit. Oqaasertassaatut allanneqarsimasukkut siunertaavoq tapiissutit aningaasaliissutigineqarnerminni siunertaannut atorneqanngippata utertinneqarnissaannik piumasaqarsinnaaneq sapinngisamik annertunerpaatinniarlugu.

 

§ 42-mut

Imm. 1-ip Naalakkersuisut periarfissippai tapiissutit ataasiakkaat pillugit maleruagassianik pisariaqarfiini aalajangersaanissamut.

Imm. 2-p Naalakkersuisut periarfissippai tapiissutit isumagineqartarnerannik tamakkiisumik ilaannakuusumilluunniit allamut isumagisassanngortitsinissamut. Allamut isumagisassanngortitsineq taamaallaat pisinnaavoq Radio tv-lu pillugit ataatsimiititaliamut imaluunniit kattuffimmut sumiiffinni radioqarfiit tv-qarfiillu sinniisigisaannut. Tunngaviusumik tapiissutit pillugit maleruagassanik isumaginninnerup sumiiffinni radioqarfiit tv-qarfiillu maanna kattuffigisaannut STTK-mut isumagisassanngortinnissaa Naalakkersuisut siunertaraat. Tamatuma tutsuiginanngissutsimik ajornartorsiuteqalernissamik kinguneqarnissaa naatsorsuutigineqanngilaq, tunngaviusumimmi tapiissutinik tunniussisarneq piumasaqaatinik tamanut atuuttunik naammassinnissimanissamik tunngaveqartarmat, missingersuinikkut naliliinermik ilaqartinneqanngitsumik. Tapiissutit pillugit maleruagassat allat Radio tv-lu pillugit ataatsimiititaliamut isumagisassanngortinnissaat Naalakkersuisut siunertaraat. Isumagisassanngortitsinerup qanoq annertutiginera, kinarpiaq piginnaatinneqassanersoq, aalajangiinernik suliassanngortitsinerit ingerlatsinermillu suliaqarnermik nakkutilliineq pillugit nalunaarummik sanasoqarnissaa Naalakkersuisut siunniuppaat.

Imm. 3-mi siunertaavoq tapiissutit pillugit aaqqissuussinerup sapinngisamik eqaatsumik imaaliornikkut ingerlanneqarnissaa, tassa tunngaviusumik aallakaatitassiornissamullu tapiissutitut atunngitsoorneqartut allami iluaqutissanngortinneqartassallutik. Tamanna maanna periusiusup assigaa, tassa aallakaatitsivinnut tapiissutissatut missingersuutigineqaraluarlutik atunngitsoorneqartut aallakaatitsiviit sulisuinik ilinniartitseqqinnermut ingerlaqqiffiusumillu ilinniartitsinermut atorneqartarlutik.

 

Kapitali 6-imut, Radio tv-lu pillugit ataatsimiititaliaq

Peqqussummi maanna atuuttumi kapitali 5-ip imaraa Radio tv-lu pillugit Maalaaruteqartarfiup sulinera. Maalaaruteqartarfiup suliai tassaapput pilerisaarisarnermut imarisaat pillugit aalajangiinerit aamma pilerisaarutini paasissutissiissutigineqartut eqqunngitsut naqqiuteqarfigineqarneri pillugit aalajangiinerit.

Peqqussutissatut siunnersuummi kapitali 6 naapertorlugu Radio tv-lu pillugit ataatsimiititaliamik pituttorsimanngitsumik pilersitsisoqassaaq, pilerisaarisarnermut aallakaatitassianillu aningaasalersuisarneq pillugit maalaartarfittut suli atuunnermi saniatigut isumaginnittuunermik nakkutilliisuunermillu suliassanik arlaqartunik isumaginnittuusussaq. Ataatsimiititaliap taamaalilluni isumaginnittuunermik nakkutilliisuunermillu suliassat Kultureqarnermut Pisortaqarfimmit maanna isumagineqartaraluartut suliassarilissavai. Ataatsimiititaliap aalajangiineri Naalakkersuisunut ingerlateqqinneqarsinnaanngillat.

Ataatsimiititaliamik pilersitsinerup radiumut tv-mullu tunngasunik sutigut tamatigut pitsanngorsaataanissaa naatsorsuutigineqarpoq. Tamakkununnga tunngasunik ilisimasaqarluartut ataatsimiititaliami katiterneqarnerisigut sullissisoq Naalakkersuisunut iluaqutaalluarsinnaasoq siunnersortaalluarsinnaasorlu, aammali radiunut tv-nullu tunngassuteqartunik sammisalinnit aamma iluaqutigineqarsinnaasoq pigineqaleriartussaaq. Tamanna assersuutitut radiumik tv-millu ingerlataqarneq pillugu maleruagassanut tunngatillugu apeqqutini aalajangersimasuni siunnersuinermut ilitsersuinermullu atatillugu pisinnaavoq.

Aamma ataatsimiititaliap pilersinneqarneratigut radiunut tv-nullu tunngasunik nakkutilliinermik suliassat maannakkumornit annertunerusumik malinneqassapput. Nakkutilliinermik suliassat mannakkumut pingaartorujussuartut isumagineqarsimannginnerat aningaasanik atugassanik amigaateqarsimanermik pissuteqarpoq, taamaammallu ataatsimiititaliap nakkutilliisutut sulinissaa annertusarneqassappat aamma aningaasat ataatsimiititaliap sulineranut pisariaqartut immikkoortinneqartariaqarput.

Aamma qitiusumik allaffeqarfimmi ingerlatsinermi suliassanik ataatsimiititaliamut isumagisassanngortitsinerup kingunerissavaa, qitiusumik allaffeqarfimmi pisortaqarfittut suliassaanerusut annertunerusumik piffissaqarfigineqalernissaat.

 

§ 43-mut

Imm. 1-imi erseqqissarneqarpoq Naalakkersuisut Radio tv-lu pillugit ataatsimiititaliamik pilersitsissasut, tassa imaappoq Naalakkersuisut ataatsimiititaliap ilaasortaanik toqqaasassasut, tak. imm. 3. Ataatsimiititaliaq ukiuni sisamani atasussatut toqqarneqartassaaq, siullerpaamik peqqussutip atortuulersinneqarnerani. Naalakkersuisut ataatsimiititaliaq oqaaseqaateqartereerlugu ataatsimiititaliap suleriaasissai aalajangersassavaat, tak. imm. 4.

Ukiuni sisamani atuuttarnissaanik toqqaaneq pisortat sullissinerannik isumaqatigiissutip ukiuni sisamani atuuttarnissaanut naapertuuttuutinniarneqarpoq.

Imm. 2-mi erseqqissarneqarpoq ataatsimiititaliaq pingasunik ingerlatsinermut, inuussutissarsiornermut, tusagassiuuteqarnermut kulturimullu tunngasunik ilisimasaqartuusussanik ilaasortaqartoq. Ataatsimiititaliap ilaasortaasa tamarmiullutik piginnaasassat taakku piginnaasaqarfigissavaat. Ataatsimiititaliap ilaasortaasa ataatsimiititaliap suliassaasa assigiinngitsuusut isumaginissaannut tamakkuninnga piginnaasaqartuunissaat pisariaqartuusorineqarpoq.

Ilaasortat Kalaallit Nunaanni najugaqartuunissaannik piumasaqaammut patsisaavoq ilaasortat Kalaallit Nunaanni pissutsinik ilisimasaqartuunissaat kissaatigineqarmat, tamannalu aamma sulianut aningaasaqarnermullu tunngasunik pissuteqarpoq.

Ilaasortat Inatsisartuni ilaasortaannginnissaannik piumasaqaatip ilanngunneqarneratigut qulakkeerniarneqarpoq inatsisiliortuunerup aningaasaliisuunerullu, illua´tungaatigullu aamma oqartussaasuni aqutsisutut inissisimanerup immikkoortinneqarnissaat.

Ilaasortat KNR-ip, STTK-p STTK-lluunniit ilaasortaasa arlaata siulersuisuini ilaasortaannginnissaannik taakkunaniluunniit sulisuunnginnissaannik piumasaqaat ataatsimiititaliap pineqartunut attuumassuteqanngivinnissaanik qulakkeeriniarneruvoq.

Imm. 3-p Naalakkersuisut pisussaaffilerpai suleqatigisat attuumassuteqartut ataatsimiititaliami ilaasortassanik siunnersuutaannik piniartarnissamut. Suleqatigisat attuumassuteqartut ilaatigut tassaassapput KNR aamma STTK. Ilaasortassatut toqqarneqartut akornanni siulittaasumik toqqaanermut ilaatigut peqqutaatinneqarpoq, ataatsimiititaliap allattoqarfiullu, siunnersuutip § 43-a, imm. 5 naapertorlugu, akornanni pisariitsumik isumannaatsumillu attaveqartarnissap qulakkeerneqarnissaata isumannaarneqarnissaa kissaatigineqartoq.

Imm. 4-p Naalakkersuisut pisussaaffilerpai suleriaasissat pillugit maleruagassanik aalajangersaanissamut. Suleriaasissani ilaatigut aalajangersarneqassapput ataatsimiigiaqqusisarnissanut, imaqarniliortarnissanut il.il. malittarisassat.

Imm. 5-ip Naalakkersuisut peqquai ataatsimiititaliamut ikiuuttartussamik allattoqartitsinissaq. Ataatsimiititaliap ataatsimiinnissaasa il.il. piareersarnissaat ingerlanneqarnissaallu allattoqarfiup peqataaffigisassavai. Matumani ilaapput suliat suliarineqarnissaannut piareersaaneq ataatsimiititaliallu aalajangiussimasaanik malitseqartitsineq. Allattoqarfimmik pilersitsinissaq ilimagineqanngilaq, ikiuuttartussatummi allattoqarfik Kultureqarnermut Pisortaqarfimmi sulisumit isumagineqarnissaa ilimagineqarmat.

Imm. 6-ip ataatsimiititaliaq pisussaaffilerpaa ukiumoortumik ingerlatani pillugit Naalakkersuisunut nalunaarusiortarnissaanik. Tamatumani ilaatigut peqqutaatinneqarpoq, ataatsimiititaliap suliaasa annertussusaannik qanoq ittuunerannillu Naalakkersuisut ilisimatinneqartarnissaminnik pisariaqartitsisarnissaat, taamaalilluni Naalakkersuisut qulakkeerniassammassuk, ataatsimiititaliap peqqussutip suliassatut pisussaaffiligaasa isumagineqartarnissaat, taamaalillunilu suliassat isumagineqarnissaannut atatillugu piumasaqaaatinut tunngatillugu ajornartorsiutaasinnaasut ataatsimiititaliap eqqaasitsissutigisarsinnaassammagit.

 

§ 44-mut

Ataatsimiititaliap suliassai pingaarnerit aalajangersakkami taagorneqarput. Tassani allassimavoq suliassat aalajangersimasut tassaasut aallakaatitsisinnaanermut akuersissutinik tunniussinissani suliassat, pisortat sullissinerannik nassuiaammik misissuineq aamma suliassani pilerisaarutinut aallakaatitassianullu aningaasalersuisarnermut tunngasuni aalajangiinerit, nakkutilliinermik suliassat aammalu siunnersuisutut suliassat. Taakku saniatigut attuumassuteqanngitsunik avataaneersunik tusarnaartartunut isiginnaartartunullu tunngasunik misissuisitsisoqartarnissaa immikkut pisussaaffiliunneqarpoq.

Nr. 1. Aallakaatitsisinnaanermut akuersissutinik tunniussaqarneq tassaavoq piumasaqaatit peqqussummi aalajangersarneqarsimasut naammassineqarsimanerannik qulakkeerineq. Aamma ataatsimiititaliap isumagissavaa frekvensimik atuisinnaanermut akuersissummik qinnuteqartoq sinnerlugu qinnuteqarnissaq. Aallakaatitsisinnaanermut akuersissummik tunniussisartuuneq taamaalilluni Kultureqarnermut Pisortaqarfimmiit ataatsimiititaliamut nuunneqassaaq.

Nr. 2: Oqartussaasut aallakaatitsisinnaanermut akuersissummik tunniussisartut aammattaaq taassuminnga atuukkunnaarsitsisartuunissaat naleqquttuusorineqarpoq. Nuna tamakkerlugu aallakaatitsisinnaanermut akuersissutinut tunngatillugu taakku Naalakkersuisunit tunniunneqartassapput. Ataatsimiititaliap nakkutilliisuunini tunngavigalugu akuersissutinik taamaattunik atuukkunnaarsitsinissamik Naalakkersuisunut inassuteqaateqartarnissaa naleqquttuusorineqarpoq.

Nr. 3: Pisortat sullissinerannik nassuiaammik misissuataarineq pissaaq, pisortat sullissineranni isumaqatigiissut malillugu pisortat sullissinerannik isumaginnittuusumut piumasaqaatit qanoq annertutigisumik KNR-imit naammassineqarsimanerannik misissuinikkut. Taamatut misissuisarnissap attuumassuteqanngitsumit ingerlanneqarnissaa pisariaqartuutinneqarpoq.

Nr. 4: Ataatsimiititaliap pilerisaarutinut aallakaatitassianullu aningaasalersuisarnermut tunngasuni piginnaatitaaneranut tunngaviuvoq suliassap taassuma Radiumut tv-mullu maalaartarfimmit maanna atuuttumit, matumunngali ilutigitillugu atorunnaarsinneqartussamit nuunneqarnissaanik kissaateqarneq.

Nr. 5: Nakkutilliinissamik pisussaaffiup attuumassuteqanngitsumit ingerlanneqarnissaa naleqquttuusorineqarpoq. Taamaammat suliassaq Kultureqarnermut Pisortaqarfimmiit ataatsimiititaliamut nuunneqarpoq. Nakkutilliineq pitsaasuussappat ataatsimiititaliaq ataatsimiititalialluunniit ilaasortai ataasiakkaat KNR-imut aallakaatitsisinnaanermullu akuersissutinik piginnittunut siumut ilisimatitseqqaaratik nakkutilliiartortassapput. Nakkutilliinermi ilaatigut radioqarfiit tv-qarfiillu ingerlatsinerat pillugu maleruagassat aallakaatitsisarfiit pineqartut naammassisimaneraat naliliiffigineqartassapput ilaatigullu aallakaatitsisarfinnut maleruagassanik malinninngitsunik uparuaasoqartassalluni. Maleruassanik uparuaanerit malinneqassanngikkaluarpata, malinninnissaq ataatsimiititaliamit naalakkiutigineqarsinnaavoq, taakkuali pillugit ataatsimiititaliaq Naalakkersuisunut ilisimatitsisinnaanngilaq.

Nr. 6: Aalajangersakkamut tunngaviuvoq Naalakkersuisut kissaatigimmassuk suliamik ilisimasaqarluartunik, Naalakkersuisunullu radio tv-lu pillugit apeqqutini nalinginnaasumik siunnersuisartussanik peqarnissaq. Siunnersuineq nalinginnaasuusinnaallunilu aallakaatitassiornermut aalajangersimasumut tunngassuteqarsinnaavoq. Ataatsimiititaliap taamaalilluni aamma KNR-ip aallakaatitsisinnaanermullu akuersissutinik piginnittut aallakaatitassiornerisa pitsaassusiat pillugu Naalakkersuisut siunnersortarsinnaavai. Taakku tassaasinnaapput pisortat sullissineranni aallakaatitassiornermi innuttaasunut neqeroorutaasut pitsaassusiat pillugu oqaaseqaatit, naliliinerit nassuiaatillu. Pitsaassuseq atituumik isigalugu tassaatinneqassaaq tusagassiornerup/suliap pitsaassusia, teknikkikkut pitsaassuseq aamma imarisatigut pitsaassuseq. Ataatsimiititaliap suliassat nammineq suliniuteqarnermigut suliarilersinnaavai aammalu peqquneqaqqaanngikkaluarluni Naalakkersuisunut saaffiginnissuteqarsinnaalluni. Aamma Naalakkersuisut pissutsini aalajangersimasuni ataatsimiititaliap siunnersuinissaa qinnutigisinnaavaat.

Oqaatigineqassaaq ataatsimiititaliap sulinera ingerlanneqassammat Tugassiorneq pillugu Ataatsimiititaliap pitsaasumik aallakaatitassiorneq akisarnerlu pillugit maalaartarfittut oqartussaaffeqarnera ataqqillugu, tak. tusagassiornermut akisussaaneq pillugu inatsisip Kalaallit Nunaannut atortuulersinneqarnera pillugu peqqussut nr. 39, 20. januar 1997-imeersoq.

Imm. 2-p qulakkeerniagassaraa tusarnaartartut isiginnaartartullu aallakaatitanik neqeroorutinik aammalu radiukkut tv-kkullu neqeroorutinik allanik pisariaqartitsinerannik atuinerannillu ingerlaavartumik misissuisoqartarnissaa. Misissuinerit ataatsimiititaliap Naalakkersuisunut siunnersortitut suliassaanut ilaasutut isigineqassapput. Aamma KNR-ip aammalu radioqarfiit tv-qarfiillu allat misissuinerit iluaqutigisinnaassavaat. "Attuumassuteqanngitsut avataaneersut"-nik oqarnermi anguniarneqarpoq misissuinerit radioqarfinnit tv-qarfinnillu namminernit ingerlanneqaratik allanit ingerlanneqartarnissaat. Misissuinerit qanoq akulikitsigisumik qanorlu ittumik ingerlanneqartarnissaat ataatsimiititaliamit aalajangerneqartassaaq.

Ataatsimiititaliap pisussaatitaanera KNR-ip aammalu radioqarfiit tv-qarfiillu allat tusarnaartartunut isiginnaartartunullu tunngasunik nammineerlutik misissuisarnissaannut aporfiunavianngilaq.

Imm. 3-mi siunertaavoq Radio tv-lu pillugit ataatsimiititaliamut suliassanik allanik Naalakkersuisut peqqussuteqarsinnaanerat, tamanna pissusissamisoorsorineqarpat. Tamanna ilaatigut pisinnaavoq siunnersuummi § 42, imm. 2 naapertorlugu tunngaviusumik aamma aallakaatitassiornermut tapiissutit kiisalu ilinniartitseqqinnermut ingerlaqqiffiusumillu ilinniartitsinermut tapiissutit pillugit maleruagassat aqunneqarnerat pillugit maleruagassat.

 

§ 45-mut

Aalajangersakkami pineqarpoq ataatsimiititaliap aalajangiisinnaassusia, pilerisaarisarnermut aallakaatitanillu aningaasalersuisarneq pillugit suliassat siunnersuummi § 46 naapertorlugu aalajangersarneqartut pinnagit.

 

§ 46-mut

Aalajangersakkami pineqarput ataatsimiititaliap pilerisaarutinut aallakaatitanillu aningaasalersuisarnermut tunngasut pillugit suliassai.

Aalajangersakkap peqqussummi maanna atuuttumi § 32 nangippaa, taamaallaat Radiumut tv-mullu maalaartarfiup maanna atuuttup suliassaasa Radio tv-lu pillugit ataatsimiititaliamut nuunneqarneri pinnagit. Taamatuttaaq ataasiakkaanik allannguuteqartitsisoqarpoq.

Peqqussut maanna atuuttoq naapertorlugu Radio tv-lu pillugit maalaaruteqartarfiup taamaallaat radiukkut tv-kkullu pilerisaarisarnermut imaat pillugit suliassanik aalajangiisaraluarpoq. Radio tv-lu pillugit ataatsimiititaliap aalajangiisarnissami suliassai annertusissapput suussusersinernut, inissiinissanut, oqaasertanut annertussutsinullu kiisalu aningaasaliisut aallakaatitassianillu aningaasaliiffigineqartunik aalajangiinernik ilaqartilerlugit. Taamatuttaaq paasissutissat immikkut ittut pillugit akissuteqarnissap imarisassassaanik, ilusissaanik inissinneqarnissaanillu aalajangiisarnissaq suliassaapput.

Aalajangiinernik tamanut saqqummiussisarnissamut peqqusineq taamaallaat pisinnaavoq pilerisaarisarnermut imarisaat aammalu paasissutissanik immikkut ittunik akissuteqarnissat pillugit aalajangiinerit. Tamatumunnga peqqutaatinneqarpoq, taamaattut pinartuunerusutut nalilerneqarnerat.

Tamanut saqqummiussineq aviisitigut nuna tamakkerlugu saqqummersartutigut, nuna tamakkerlugu radiukkut tv-kkullu, tusagassiuutitigut nalunaarutitigut paasissutisseeriaatsitigullu assigisaasigut pisinnaavoq, tassuunakkut nalunaarut innuttaasunit tamanit ilisimaneqalersillugu.

Ataatsimiititaliap aalajangiinerisa oqaaseqaataasalu sukkut qanorlu ittumik nalunaarutigineqartarnissaannik ataatsimiititaliap aalajangiisinnaanera tassaasinnaavoq nalunaarutip aallakaatitsinerup ingerlanerani piffissami sumi nalunaarutigineqarnissaanik, aammalu nalunaarutip oqaaseqarfigitinnagu nalunaarutigineqarnissaanik peqqusinerit.

 

§ 47-mut

Aalajangersagaq peqqussummi maanna atuuttumi § 33, imm. 1-imik nangitsineruvoq. Ingerlatitseqqissinnaannginnermik aalajangersagaq patsiseqarpoq tamatumunnga tunngasuni ilisimasariaqakkat pisortaqarfinni allani ilisimaneqarnissaasa naatsorsuutigineqannginnera. Ingerlatitseqqissinnaannginnermik aalajangersagaq ataatsimiititaliap aalajangiinerinut tamanut atuuttussanngorlugu annertusineqarpoq.

 

§ 48-mut

Aalajangersagaq nutaajuvoq. Ataatsimiititaliap suliassaminik isumaginninnissaminut pisariaqartitaminik KNR-imut aallakaatitsisinnaanermullu akuersissutinik piginnittunut qinnuteqarsinnaaneranik periarfissiivoq.

 

§ 49-mut

Aalajangersakkap Naalakkersuisut piginnaatippai ataatsimiititaliap sulinera pillugu aalajangersakkanik erseqqissunik aalajangersaanissamut. Taakku assersuutitut tassaasinnaapput ataatsimiititaliap nakkutilliinermi siunnersuinermilu suliassaasa qanoq annertutiginissaat suunissaallu. Pisariaqartitsisoqalissappat, ukiumoortumik nalunaarusiap ilusaa imassaalu kiisalu missingersuutit naatsorsuutillu pillugit maleruagassiortoqarsinnaanissaa eqqarsaatersuutaassaaq.

 

Kapitali 7-imut, Pilerisaarisarnermut aallakaatitanillu aningaasalersuisarneq

Peqqussummi maanna atuuttumi kapitali 4-p imarai pilerisaarisarnermut aallakaatitanillu aningaasalersuisarnerit pillugit maleruagassat. Maleruagassat taakku radiukkut fjernsynikkullu pilerisaarutit akiliussisarnerillu pillugit Namminersornerullutik Oqartussat nalunaarutaanni nr. 3, 25. januar 1991-imeersumi aalajangersakkanik erseqqinnerusunik malitseqarput.

Pilerisaarisarnermut maleruagassat maanna atuuttut naapertorlugit aallakaatitat akornanni ataatsimoortillugit inissinneqartassapput imaalillugit, aallakaatitat reklaminit kipisaqattaartinnagit. Reklamilli sumiiffinni radiuni aallakaatitassiani sukkulluunniit ilanngunneqarsinnaapput. Tekst-tv-mi reklameqarnissaa aallakaatitanillu aningaasalersuinissaq inerteqqutaavoq. Tamatumunnga patsisaavoq pilerisaarisarnermut aallakaatitanillu aningaasalersuisarneq pillugit malittarisassat, sumut inissiisarnermut tunngatillugu, tv-mut tunngatillugu piffissami aallakaatitsiviusumiinnaq inissinneqartussanngortitaasimammata, taamaattumillu tekst-tv-mut nuunneqarsinnaanatik. Imarisaanut tunngatillugu nakorsaatit, immiaaqqat, viinnit, imigassat kimittuut tupallu pilerisaarutigeqqusaanngillat. TV-mi aningaasaqarnikkut soqutigisallit, kiisalu upperisakkut naalakkersuinikkullu qanoq isiginnittaaseqarnerit pillugit pilerisaaruteqartoqaqqusaanngilaq.

Peqqussutissatut siunnersuutip nutaatut periarfissiissutigai tekst-tv-mi pilerisaarutinik ilanngussinissaq aallakaatitanillu aningaasalersuinissaq. Tekst-tv aallakaatitassiortarnerup ilagisaatut isigineqarpoq taamalu aallakaatitassiorneq pillugu peqqussummi malittarisassanut nalinginnaasunut ilaalluni.

 

§ 50-imut

Imm. 1-imi aalajangersagaq nutaajuvoq. Aalajangersakkami aalajangersarneqarpoq, peqqussummi pilerisaarisarnermut suunerisa paasineqarnissaat. Aalajangersakkap siunertaraa, reklamini kaammattuutit nersorinninnerillu ersarissut pineqarnerisa reklamillu toqqaannartumik innersuussutit "ersarinngitsut" ersarissarneqarnissaat, tamatumanilu aalajangiisuunngitsoq aallakaatitassiamut akissarsisitsisoqarsimanerat.

Isummiussat paasissutissiivigineqartarnerannut saqqummiunneqartarnerannullu atatillugu tamatumani aalajangiisuunngilaq, aallakaatitassiamut akissarsisitsisoqarsimanera, taamaallaalli paasissutissiinermi siunertarineqartoq paasissutissanik paasissutissiineq saqqummiussinerlu.

Imm. 2-mi aalajangersakkap Inatsisartut peqqussutaanni maanna atuuttumi § 25, imm. 1 nangippaa. Anguniagaavoq pilerisaarisarnermut tusarnaartartunut isiginnaartartunullu isertukulunneqassanngitsut "poortorneqaratilluunniit". Tamannattaaq tekst-tv-mi reklaminut atuuppoq.

Tamatumani siunertarineqarpoq, tusarnaartartut isiginnaartartullu takusinnaasariaqarmassuk tusarnaarsinnaasariaqarmassullu, tamatumani aallakaatitassiavik imaluunnit pilerisaarisarnermut pineqarnersut.

 

§ 51-imut

Aalajangersakkap peqqussummi maanna atuuttumi § 25, imm. 2 aamma 3 nangippai.

Imm. 1-imi aalajangersarneqarpoq tv-kkut pilerisaarisarnermut maannamutuut sivisunerpaamik minutsini tallimani ataatsimoortillugit taamaallaat aallakaatinneqarsinnaasut, aammalu aallakaatitanut akunniliunneqartassasut. Tv-kkut aallakaatitat maanaannaq unitsinneqartarnissaannik inerteqqummut ilaatigut patsisaapput aallakaatitanik ataasiakkaanik piginnittooqqaarsinnaatitaanermut tunngasut, aammali aallakaatitat pissanganartut soqutiginartulluunniit aallakaatinneqarnerini pilerisaarutinit akornusersorneqannginnissaannik kissaateqarnermik pissuteqarpoq.

Nutaatut erseqqissarneqarpoq maanaannaq unitsitsisarnissamik inerteqqut tekst-tv-mi reklaminut atuutinngitsoq.

Imm. 2-mi aalajangersarneqarpoq KNR-imi radiukkut pilerisaarisarnermut maannamutuut sivisunerpaamik minutsini tallimani ataatsimoortillugit taamaallaat aallakaatinneqarsinnaasut, aammalu aallakaatitanut akunniliunneqartassasut. Radiukkut aallakaatitat maanaannaq unitsinneqartarnissaannik inerteqqut maannamutuut KNR-iinnarmut atuutitiinnarneqassaaq, tamannalu pisortat sullissineranni aallakaatitsiviuneranik pissuteqarpoq. Akerlianilli sumiiffinni aallakaatitsiviit radiukkut aallakaatitsivimminni sumiluunniit pilerisaarisarnermut maannamutuut inississinnaavaat, tamannalu taakku pilerisaarisarnermutigut isertitaqarnissamik pisariaqartitsinerunerannik aammalu pisortat sullissineranni aallakaatitsiviunnginnerannik pissuteqarpoq.

Ataatsimoortunngorlugit aallakaatinneqarsinnaasut annerpaaffissaattut aalajangersarneqartup atuutiinnarnissaa aamma aalajangiusimaneqarpoq. Tamanna pilerisaarisarnermut ataatsimoortut tv-mi nalinginnaasumik aammalu radiumut tunngatillugu KNR-imi piffissap aallakaatitsiviusup tamarmiusup ilaanik annertuallaamik sivisussuseqannginnissaannik kissaateqarnermik pissuteqarpoq.

Imm. 3-mi aalajangersarneqarpoq pilerisaarutinik aallakaatitat piffissamut ullormut aallakaatitsiviusumut sanilliullutik annertussusissaasa maannamutuut annerpaaffissaqarnissaat. Pilerisaarutinik aallakaatitat piffissap ullormut aallakaatitsiviusup annerpaamik 10 procentianik maannamutuut sivisussuseqarsinnaapput. Tassuunakkut qulakkeerniarneqarpoq pilerisaarisarnermut tusarnaartartunit isiginnaartartunillu akornutitut isigineqannginnissaat, aammalu pilerisaarisarnermut aallakaatitsiviusumi aallakaatinneqartunut sanilliullutik pingaarnerulinnginnissaat. Tassunga tunngatillugu oqaatigineqassaaq KNR-ip pilerisaarisarnermut 10 procentimit sivisunerusumik annertussuseqalersissinnaanissaat ukiuni qaninnerni ilimaginngimmagu.

Sumiiffinni radioqarfinnut tv-qarfinnullu tunngatillugu annikitsumik qasukkaasoqarpoq. Maannamummi aalajangersagaavoq tv-kkut pilerisaarutinik aallakaatitat piffissap ullormut aallakaatitsiviusup nammineerluni aallakaatitassianik aallakaatitsinermut aallakaatitanilluunniit sumiiffimmut attuumassuteqartunik aallakaatitsinermut atorneqartup 10 procentiinit sivisunerussanngitsut. Aammattaaq akuersissummik pigisaqartut tamarmik pilerisaarutinik ataatsimoortunik ullormut annerpaamik ataasiarlutik aallakaatitsisinnaasut. KNR-ip sumiiffinnilu radioqarfiit tv-qarfiillu naligiissinneqarnissaat naleqquttuusorineqarpoq.

 

§ 52-imut

Imm. 1-ip peqqussummi maanna atuuttumi § 26, imm. 1 allannguuteqartinnagu nangippaa. Inerteqqummut tassunga patsisaavoq nioqqutissat taagorneqartut peqqissutsimut ajoqutaasinnaanerat. Tamannali nakorsaatinut atuutinngilaq. Nakorsaatit pilerisaarutinut ilanngunneqannginnissaannut patsisaavoq nakorsaatinik pisariaqanngitsumik atuinissaq nakorsaatinilluunniit kukkusumik atuinissaq sunniutigisinnaammassuk.

Imm. 2-p peqqussummi maanna atuuttumi § 26, imm. 2 nangippaa, allannguutaallunili aningaasaqarnikkut soqutigisallit pillugit pilerisaarisoqartannginnissaata inerteqqutaajunaarnera. Tassunga pissutaavoq taamatut inerteqquteqaannarnissaq pingaarutilinnik tunngavissaqarsorineqanngimmat. Aammattaaq politikkikkut partiit, kattusseqatigiit aamma kisimiillutik qinigassanngortittut, matumani politikkikkut partiinut sanilliunneqarsinnaasut pilerisaarutinut ilanngunneqannginnissaat tapunneqarpoq.

Imm. 3-p Naalakkersuisut periarfissippai inerteqqutinik imm. 1-imi 2-milu pineqartunik avaqqutsisinnaanermut maleruagassanik aalajangersaasinnaanermut. Assersuutigalugu pineqartoq tassaasinnaavoq nakorsaatinut niuertarfinni pisiarineqarsinnaasunut tunngatillugu, aammalu imigassanut aalakoornartortalinnut ima aalakoornartortakitsiginertik pissutigalugu peqqinnissamut akornutaasinnaanngitsutut isigineqartunut tunngatillugu.

 

§ 53-imut

Aalajangersakkap peqqussummi maanna atuuttumi § 27 nangippaa. Allannguutigitinneqartoq tassaavoq Naalakkersuisut erseqqinnerusunik maleruagassiortussaatitaajunnaarmata taamaallaalli taamaaliorsinnaatitaallutik. Aammattaaq erseqqissaatigineqarpoq pilerisaarisarnermut suunerannik uppernarsaanermut, inissisimanerannut, oqaasertaannut imarisaannullu tunngatillugu malerugassiortoqarsinnaanera, aammalu pilerisaarisarnermut meeqqanut sammitinneqartut inissinneqarnissaannut aamma nioqqutissat meeqqanut tunngasut pillugit reklaminut tunngasut Naalakkersuisunit maleruagassiuunneqarsinnaasut. Tamanna tunngavissaliullugu assersuutigalugu aallakaatitat "poortorsimasutut" pilerisaarutinik aallakaatitsinermi imaqartunut maleruagassiortoqarsinnaavoq.

Radiukkut fjernsynikkullu pilerisaarutit akiliussisarnerillu pillugit nalunaarut (nalunaarut nr. 3, 21. januar 1991-imeersoq) atuuttoq peqqussutip aalajangiutivinneqarneranut atatillugu atorunnaarsinneqassaaq, aalajangersakkalli tassaniittut arlaqartut nutaamik nalunaarummi ilanngunneqarnissaat naatsorsuutigineqarpoq.

 

§ 54-imut

Aalajangersakkap peqqussummi maanna atuuttumi § 28, imm. 1 ataasiakkaatigut allannguuteqartillugu erseqqissarlugulu kiisalu radiukkut fjernsynikkullu pilerisaarutit akiliussisarnerillu pillugit Namminersornerullutik Oqartussat nalunaarutaat nr. 3, 21. januar 1991-imeersoq nangippai.

Imm. 1-ip peqqussummi maanna atuuttumi § 28, imm. 1 ikittuinnarnik allannguuteqartillugu nangippaa. Tassani erseqqissarneqarpoq akiliutit suut aningaasalersuinertut isigineqarnersut. Tassani allassimavoq siullermik tassaassasut radiukkut tv-kkulluunniit aallakaatitat aningaasalersorneqarnerannut toqqaannartumik toqqaannanngitsumilluunniit tapiissutit. Tullia tassaavoq tapiissutinik tunniussaqartoq nammineerluni radiukkut tv-kkulluunniit aallakaatitassianik aallakaatitsinermik aallakaatitassiornermilluunniit ingerlataqartuussanngitsoq. Kiisalu tapiissuteqarnermi tunngavilersuutaassaaq atip, ilisarnaatip (logo), kinaassutsip, ingerlatap nioqqutissialluunniit ilisimaneqarnerulernissaa.

Erseqqissarneqarpoq tekst-tv-mi quppernerit aamma aallakaatitanut aningaasalersuinikkut aningaasalersorneqarsinnaasunut ilaasut.

Aammattaaq ilanngunneqarpoq tapiissutit inummit ingerlatsivimmilluunniit tapiissutaasinnaasut.

Imm. 2-p peqqussummi maanna atuuttumi § 28, imm. 2 ikittuinnarnik allannguuteqartillugu nangippaa. Allannguutigitinneqarpoq tapiissutinik tunniussaqartup aqqata aallakaatitap nalinginnaasumik unillatsiarfiini nalunaarneqarneratigut aamma ilisarnarsisinneqarsinnaasoq. Tamanna soorlu pisinnaavoq timersorluni unammisut nikinneranni aamma aallakaatitat sivisunerusut unillatsiarfiini. Unillatsiarfiit pilerisaarutinik ilanngussinissaq aallakaatitanillu aningaasalersuinissaq siunertaralugu aallakaatitanut ikkunneqarsimasut nalinginnaasumik unillatsiarnertut isigineqanngillat.

Aammattaaq tekst-tv-mut tunngatillugu ilisarnarsisitsinissap qanoq pinissaa aalajangersarneqarpoq. Aalajangersagaq ilanngunneqarpoq oqaaseqatigiinni siullerni maleruagassap tekst-tv-mi aningaasaliisup ilisarnarsisinneqarnissaanut atorneqarsinnaannginnera pissutigalugu.

Imm. 3-p peqqussummi maanna atuuttumi § 28, imm. 3 allannguuteqartinnagu nangippaa.

Aalajangersakkap siunertaraa radioqarfiit tv-qarfiillu ataasiakkaat aaqqissuussinerminni nammineersinnaassusiisa qulakkeerneqarnissaat.

Imm. 4-p radiukkut fjernsynikkullu pilerisaarutit akiliussisarnerillu pillugit Namminersornerullutik Oqartussat nalunaarutaanni nr. 3, 21. januar 1991-imeersumi § 23, imm. 1 ataasiakkaanik allannguuteqartillugu nangippaa.

Aalajangersakkap peqqussutikkoortumik nutaatut aalajangersarpai kikkut aningaasalersuisinnaatitaanerannut killilersuutit, aallakaatitallu suut aningaasalersorneqarsinnaaneri. Tassa imaappoq sukaterisoqarpoq, tassami immiaaqqanik, viinninik imigassanillu kimittuunik nioqqutissiortut tuniniaasartullu aningaasalersuineri pissarsiarineqarsinnaajunnaarmata. Aalajangersagaq inerteqqutinut § 52, imm. 1-imi 2-milu pineqartunut atavoq aammalu inerteqqutit taakku tunngaviisulli tunngaveqarluni.

Imm. 5-ip nalunaarummi qulaani imm. 4-mi taaneqartumi § 23, imm. 2 ataasiakkaanik allannguuteqartillugu nangippaa.

Qasukkaaneq tassaavoq aningaasarsiornikkut soqutigisallit, soorlu sulisitsisut peqatigiiffii sulisulluunniit peqatigiiffii aallakaatitanik maanna aningaasalersuisinnaalermata. Taamatut qasukkaaneq atuutilersinneqarpoq soorlu pisortat sullissineranni aallakaatitsivik filmimik aningaasaliisunit pineqartunit tapiiffigineqartumik aallakaatitsinissamik kissaateqarsinnaammat. Taaneqassaaq imm. 3-mi aalajangersagaqarmat aallakaatitassiap aningaasalersorneqartup imarisaa qanorlu sananeqarnera aningaasalersuisunit imatut sunnerneqassanngitsoq radiumik tv-milluunniit ingerlatsiviup akisussaanera aallakaatitanillu namminiivilluni aaqqissuussisinnaanera sunnerneqarlutik.

Imm. 6-ip nalunaarummi imm. 4-mi qulaani taaneqartumi § 24, imm. 1 allannguuteqartinnagu nangippaa.

Aallakaatitassiat nutaarsiassanik maannarpiarlu soqutiginartunik imallit aningaasalersorneqarnissaannut inerteqqummut patsisaavoq aallakaatitat taamaattut pituttorsimanngitsuunissaat sukkulluunniit apeqquserneqassanngimmat.

Imm. 7-ip siunertaraa radioqarfiit tv-qarfiillu landskarsimit tapiissutinik pissarsineq ajortut, aallakaatitat upperisarsioqatigiinnit naalakkersuinikkullu suliniaqatigiiffinnit aningaasalersorneqarnissaannut inerteqqummi ilatinneqannginnissaat. Tamatumunnga tunngaviuvoq piumasaqaatinik taamaattunik aallakaatitsiviit pisortanit aningaasatigut tapiiffigineqarneq ajortut aalajangersaavigineqarnissaat naleqquttuusorineqanngimmat.

Imm. 8 nutaajuvoq. Aalajangersakkap Naalakkersuisut periarfissippai inerteqqutinik imm. 4-mi 5-imilu pineqartunik avaqqutsisinnaanermut maleruagassanik aalajangersaasinnaanermut. Avaqqutsinerit assersuutigalugu tassaasinnaapput suliffeqarfiup imm. 4-mi pineqartut iluanni annertunerpaamik suliaqartuugaluarluni allanik inerteqqutaanngitsunik annertuumik suliaqarneranik pissuteqartut, soorlu suliffeqarfik immiaaqqanik aamma sodavandinik nioqqutissiortoq. Suliffeqarfiup sodavandiliornermut immikkoortortaqarfiata aningaasaliisuunera erseqqippat inerteqqutip atuutitinneqarnissaa matumani isummerfigineqarsinnaavoq.

 

§ 55-imut

Aalajangersakkap Naalakkersuisut piginnaatippai aallakaatitassianut aningaasalersuisinnaanermut aammalu aallakaatitassianut akiliiffigineqarsimallutik aallakaatinneqartunut periarfissanik killilersuinissamut. Aalajangersakkap ilaatigut nangippaa peqqussummi maanna atuuttumi § 29.

 

§ 56-imut

Imm. 1-ip peqqussummi maanna atuuttumi § 32, imm. 3 nangippaa. Taanna aalajangersakkamut tassunga tunngatillugu ataatsimiititaliap pilerisaarisarnermut aningaasaliisarnerillu pillugit aalajangiisarnissaasa annertusineqarnerannut atuutissaaq. Taanna aalajangiisinnaassutsit annertusineqarnerata kinguneraa, § 46-mi Radio tv-lu pillugit ataatsimiititaliamut tunniunneqartoq.

Ilanngussaq aallakaatitarluunniit naammagittaalliuutigineqartoq arlaleriarlugu takutinneqarsimappat, naammagittaalliornissamut piffissaliussaq ilanngussap aallakaatitalluunniit aallakaatinneqarfia kingulleq aallarnerfigalugu naatsorsorneqassaaq.

Imm. 2 nutaajuvoq. Ataatsimiititaliap pilerisaarisarnermut pillugit maleruagassat malinneqarnerannik nakkutilliilluarsinnaanissaa aalajangersakkap siunertaraa.

Imm. 3-p Naalakkersuisut periarfissippai naammagittaalliuutinik tunniussaqarnissamut maleruagassanik aalajangersaanissamut. Taakku ilaatigut tassaasinnaapput naammagittaalliuutit qanoq iluseqarnissaat qinnuteqaatillu qanoq suliarineqarnissaat pillugit maleruagassat.

 

Kapitali 8-mut. Misileraanerit aamma pineqaatissiinerit.

Peqqussummi maanna atuuttumi kapitali 6-p imarai pineqaatissiinerit pillugit aalajangersakkat, atortuulersitsinermik ikaarsaarutaasumillu aalajangersakkat kiisalu misileraalluni aaqqissuussinerit pillugit aalajangersakkat.

Peqqussutissatut siunnersuummi kapitali 8-p taamaallaat imarai misileraanerit pineqaatissiinerillu pillugit aalajangersakkat. Atortuulersitsissutaasumik, ikaarsaarutaasumik atorunnaarsitsissutaasumillu aalajangersakkat siunnersuummi kapitali 9-mi ataatsimoortinneqarput.

 

§ 57-imut

Aalajangersakkap peqqussummi maanna atuuttumi § 34a, imm. 1 nangippaa, Inatsisartullu peqqussutaanni aalajangersakkat iluanni misileraalluni aaqqissuussinerit piviusunngortinneqarsinnaanerannut periarfissiilluni. Naalakkersuisut taamaalillutik kiffaanngissuseqarput immikkut ittunik utaqqiisaasumik aaqqissuussinernut nutaanik malittarisassaliorsinnaallutik taamaalillutillu ilaatigut piffissami aalajangersimasumi aaqqissuussinernik pilersitsisinnaallutik, peqqussutip akuersissutigineqarnerani siumut naatsorsuutigineqarsimanngitsut.

 

§ 58-imut

Aalajangersakkami siunnersuutigineqarpoq dekoderit akuerisaanngitsut atortorissaarutillu allat radiukkut tv-kkullu aallakaatitassiat kodikkat eqqunngitsumik tunngaveqarluni tiguneqarsinnaanissaat siunertaralugu tunineqartarnissaat il.il. inerteqqutigineqassasoq. Inerteqqummi pineqarput inuutissarsiutigalugu tunisaqarnerit il.il. aamma nammineq atugassanik - tassalu inuup nammineq atugassaatut - dekoderkortit akuerisaanngitsut tunineqartarnerat.

Aalajangersakkami pineqarput radiukkut tv-kkullu aallakaatitat kodikkat tamarmik, tassalu piinnarnagit radiumik tv-millu ingerlatsiviit aallakaatitassiat akilerneqarnissaat siunertaralugu kodersimasaat, aammali ilaatigut piginnittooqqaartussaaneq patsisigalugu kodiinerit.

Aalajangersakkami pineqaannangillat dekoderiviit dekoderkortillu akuerineqanngitsut, aammali atortorissaarutit allat aallakaatitassiat eqqunngitsumik tunngaveqarluni tiguneqarsinnaanissaannik siunertaqartut. Assersuutigalugu tassaasinnaapput edb-kkut programmiliat assigisaallu kisimiillutik atortorisalluunniit allat peqatigalugit akuerineqanngitsumik dekodiinissamut dekoderkortilluunniit akuerisat assilinissaannut atorneqarsinnaasut. Dekoderkortit imaqanngitsut kortit taamaattut qanoq iliornikkut aallakaatitanik eqqunngitsumik tunngaveqarluni tigusinissaq siunertaralugu atorsinnaanngortinneqarsinnaanerat ilisimatitsissutigiitigalugu tunineqarpata, tamannattaaq aalajangersakkamut siunnersuutigineqartumut ilaassaaq. Satellitsikkut tigusinissamut atortorissaarutit nalinginnaasut assigisaasalu tunineqarsinnaanerat il.il. aalajangersakkami ilaanngillat.

Dekoderinut inerteqqutaasunut atortussat akuerisaanngitsut pillugit iliuutsit inerteqqutaasut tassaapput sananeq, avataaniit pisineq, tunisaqarneq, pigisaqarneq allanngortitsinerlu. Tunisaqarnermik oqarnermi pineqaannanngilaq tunisaqarneq, atortitsineq atukkiinerlu, aammali dekoderinik inerteqqutaasunik, programkortinik atortorissaarutinillu allanik ikkussuineq. Allanngortitsinermik oqarnermi ilaatigut eqqarsaatigineqarput programkortinik pigineqareersunik pitsaanerulersitsineq, programminik allanngortitsineq imaluunniit kodiinik allanngortitsineq. Aamma dekoderit atortorissaarutillu akuerisaanngitsut takoqqusaarutiginerat allatulluunniit pilerisaarutiginerat aalajangersakkamut ilaapput.

Radiukkut tv-kkulluunniit aallakaatitamik kodikkamik oqarnermi pineqarpoq aallakaatitaq nipaa aamma/imaluunniit assiliartaa paasiuminaatsunngorlugu allanngortinneqarsimasoq, tigusisartut aalajanersimasut aallakaatitap pineqartup imarisaanik tigusisinnaanissaat siunertaralugu. Tigusisartut tassaasinnaapput dekoderimik programkortertaa ilanngullugu attartorsimasut pisisimasulluunniit aamma radiukkut tv-kkullu ingerlatsivimmut pineqartumut imaluunniit dekoderingerlatseqatigiiffinnik taaneqartartunut ilaasortaasut. Kodiisarnermik oqartarnerup tamatumunnga tunngatillugu assigaa allanngortiterineq.

 

§ 59-imut

Aalajangersakkap peqqussummi maanna atuuttumi ataasiakkaanik ilassuteqarluni § 34 nangippaa, ilanngullugulu § 58-imi dekoderit inerteqqutaasut pillugit siunnersuutigineqartoq unioqqutinneqarpat akiliisitsinermik kinguneqarsinnaaneranik ilallugu.

Aalajangersakkami siunertarineqarpoq peqqussummi aalajangersakkanik unioqqutitsisoqartillugu, peqqussut naapertorlugu maleruagassanik, peqqussutinik aalajangiinernillu pineqaatissiisinnaanissaq, tamanna pingaarnerusutut nalilerneqarpat.

Imm. 3-mi aalajangersakkap siunertaraa, akiliisitaanissamut akisussaaffiup ingerlatseqatigiiffiit taaneqartut kiisalu kommunit komunillu suleqatigiit assigalugit inunnut inatsisilerisartunut tutsinneqarsinnaanera.

 

Kapitali 9-mut, Atortuulersitsissutaasumik, ikaarsaarutaasumik atorunnaarsitsissutaasumillu aalajangersakkat.

Atortuulersitsissutaasumik, ikaarsaarutaasumik atorunnaarsitsissutaasumillu aalajangersakkat tamarmik kapitalimi ataatsimoortinneqarput.

Peqqussut maanna atuuttoq peqqussutissap aalajangiutivinneqarnera ilutigalugu atorunnaarsinneqassaaq. Peqqussutilli sumiiffinni radioqarfinnut tv-qarfinnullu, peqqussut maanna atuuttoq malillugu akuersissummik tunineqarsimasunut tunngatillugu atuutitiinnarneqarnissaa pisariaqarsimavoq, taakku aallakaatitsisinnaanermut akuersissummik peqqussut nutaaq malillugu tunineqarnissaasa tungaanut. Tamanna pillugu siunnersuummi § 60, imm. 3-mut oqaaseqaatit innersuussutigineqarput.

Aammattaaq anguniagassat pillugit isumaqatigiissutit pillugit aalajangersakkamik ikaarsaarutaasumik sananissaq pisariaqartutut nalilerneqarpoq. Tamanna pillugu siunnersuummi § 61-imut oqaaseqaatit innersuussutigineqarput.

Taamatuttaaq KNR-ip maanna siulersuisuisa atuuffiat pillugu ikaarsaarutaasumik aalajangersaanissaq pisariaqartinneqarsimavoq. Tamanna pillugu siunnersuummut nassuiaatip § 62-ia innersuussutigineqarpoq.

Kiisalu aallakaatitsisinnaanermut akuersissutit siusinnerusukkut tunniunneqarsimasut pillugit aalajangersakkamik ikaarsaarutaasumik sananissaq pisariaqartutut nalilerneqarpoq. Taakkua pillugit siunnersuummi § 64-imut oqaaseqaatit innersuussutigineqarput.

 

§ 60-imut

Piffissaq peqqussutip atortuulerfia imm. 1-imi aalajangersarneqarpoq.

Piffissaq atortuulersitsiviusussaq nallertinnagu allaffissornikkut peqqussutissanik pisarialinnik sanasoqarniissaa piffissap atortuulersitsivissatut toqqarneqarsimasup periarfissaqartissavaa.

Aamma missingersuusiortarneq naatsorsuusiortarnerlu ilaatigut eqqarsaatigalugit naleqquttuutinneqarpoq atortuulersitsivissap qaammatisiutit malillugit ukiup aallartinneraniit pinissaa.

Imm. 2-mi pineqarpoq allaffissornikkut peqqussutit atuuttut atuutitiinnarneqarnissaannik apeqqut. Pissusissamisoorsorineqarpoq taakkua atuukkunnaarnissaasa tungaannut imaluunnit allanik nutaanik taarserneqarnissaasa tungaannut atuutiinnarnissaat.

Nalunaarutit atuuttut peqqussutip atuutilernera peqatigitillugu atuutilernissaat siunertaralugu iluarsartuunneqarnissaat ilimagineqarpoq. Kisiannili Kalaallit Nunaata Radioani siulersuisut akissarsisinneqartarnerat akissaajaatiminnullu taarsiiffigineqartarnerat pillugu Namminersornerullutik Oqartussat nalunaarutaat nr. 14, 26. marts 1998-imeersoq atortuuinnartinneqassaaq, peqqussummummi allannguutit maleruagassanut taakkununnga sunniuteqartussaanngimmata.

Imm. 3-p qulakkeerniagassaraa sumiiffinni radioqarfiit tv-qarfiillu akuersissummik tunineqarnerminnut atatillugu pisussaaffissamissut naatsorsuutigisinnaasimasaminnit allaanerusunik pisussaaffilerneqannginnissaat. Tapiissutinik tunineqassagaanni peqqussut nutaaq malillugu akuersissummik tunineqarsimanissaq piumasaqaataammat naatsorsuutigineqarsinnaavoq aallakaatitsiviit amerlanersaat akuersissummik piaarnerpaamik qinnuteqarumaartut. Uniffiup kingulliup siunertaraa Kalaallit Nunaanni Tusagassiuutit pillugit Maalaaruteqartarfimmut peqqussutip atuutilerneraniit suliassanik nutaanik suliakkiisinnaaneq ajornarsivinnissaanut periarfissiivoq, tak. siunnersuummi § 64.

 

§ 61-imut

Aalajangersakkami takuneqarsinnaasutuut anguniagassat pillugit isumaqatigiissut siulleq taamaallaat ukiuni pingasuni atuuttuussaaq. Tamatumunnga patsisaavoq, siulersuisut nutaat aatsaat 1. november 2005-imi toqqarneqarnissaat, taamaattumillu anguniagassat pillugit isumaqatigiissut aatsaat piffissami 1. januar 2006-imiit 31. december 2008-mut sunniuteqalissalluni.

Isumaqatigiissutip tullissaa ukiunik sisamanik sivisussuseqartumik atuuttussaassaaq. Tassunga patsisaavoq siulersuisut nutaat 1. januar 2008-mi atuutilersussaanerat. Tassuunakkut siulersuisut nutaat taakku isumaqatigiissummik ukiunik sisamanik sivisussuseqartumik atuuttussamik siullermik 1. januar 2009-miit atuutilersussamik piareersaanissamut periarfissinneqassapput. Taava aamma nutaamik siulersuisunngortarumaartut anguniagassat pillugit isumaqatigiissutip nutaap atortuulerfissaa sioqqullugu ukiumi ataatsimi atuutereersimasassapput.

 

§ 62-imut

Siulersuisut maanna atuuttut atuuffiat 31. oktober 2005-imi naassaaq. Pissusissamisoorsorineqarpoq, atuuffimmi tamarmiusumi siulersuisut ingerlaannarnissaat.

 

§ 63-imut

Imm. 1-imi erseqqissarneqarpoq aallakaatitsisinnaanermut akuersissutit siusinnerusukkut tunniunneqarsimasut ulloq atuukkunnaarfissartik tikillugu atuutissasut. Tassunga tunngavigineqarpoq aallakaatitsisinnaanermut akuersissummik pigisaqartut piffissaq aallakaatitsisinnaanermut akuersissutip atuukkunnaarfissaa tikillugu atuisinnaanissaminnik naatsorsuutiginnissinnaasariaqarnerat.

Imm. 2-mi erseqqissarneqarpoq qinnuteqartup kapitali 5-imi maleruagassat naapertorlugit aallakaatitsisinnaanermut akuersissummik tunineqarsimanissaa peqqussummi kapitali 5 naapertorlugu tapiissutinik tunineqarnissamut piumasaqaataasoq. Aallakaatitsisinnaanermut akuersissummik siusinnerusukkut tunniunneqarsimasunik pigisaqartut aallakaatitsisinnaanermut akuersissutip atuukkunnaarfissaatuulli akuersissutip atuukkunnaarfissaata tungaanut tapiissutinik pissarsisarnissaminnik naatsorsuutiginnissinnaasariaqanngitsutut isigineqarput. Tassa imaappoq tapiissutinik tunineqassagaanni tamatumunnga piumasaqaatit sukkulluunniit atuuttut naammassineqarsimassapput.

 

§ 64-imut

Aalajangersakkap siunertaraa aalajangiiffigissallugu, peqqussutip atuutilinnginnerata nalaani suliat Radio tv-lu pillugit maalaaruteqartarfimmut apuunneqartut inaarlugit kikkunnit suliarineqartarnissaat, kingornalu maleruagassat sorliit atuutsillugit maalaarutit suliarineqartarnissaat. Maalaarutit peqqussutip nutaap atuutilinnginnerani inatsiseqartitsinernut tunngammata pissusissamisoorsorineqarpoq, maleruagassat maanna atuuttut naapertorlugit maalaarutit siornatigut Radio tv-lu pillugit maalaaruteqartarfimmit inaarlugit suliarineqarnissaat.

 

§ 65-imut

Aalajangersakkami erseqqissarneqarpoq Pituffik peqqussummi aalajangersakkami pineqanngitsoq. Tamanna danskit inatsisaanni piginnaatitsissummi allassimavoq.