3. august 2004 UKA 2004/38
Radiukkut fjernsynikkullu aallakaatitsisarneq pillugu inatsisartut peqqussutaannut siunnersuut
(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)
Saqqummiussissut
Siullermeerneqarnera
Radiukkut fjersynikkullu aallakaatitsisarneq pillugu inatsisartut peqqussutissaannut siunnersuut matumuuna Naalakkersuisut saqqummiuppaat.
Radiukkut fjernsynikkullu aallakaatitsisarneq pillugu inatsisartut peqqussutaat atuuttoq (peqqussut nr. 3, 17. maj 1990-imeersoq kingusinnerusukkullu allanngortinneqartoq) siunnersuummi taarserneqarpoq. Peqqussutip atuuttup atuunnerata nalaani peqqussut ataatsimoortumik annertuumillu misissorneqartarsimanngilaq.
Naalakkersuisut tusagassiorfinnilu sulisut, tassunga ilanngullugit pingaartumik KNR aamma illoqarfinni radiukkut fjersynikkullu aallakaatitsisartut, pissusissamisoortutut isigisimavaat, peqqussutip ataatsimoortumik misissuiffigineqarnissaa. Tamanna pissuteqarpoq, teknologiikkut ineriartornerup kingunerisaanik allanngortiterinissaq naleqqussaanissarlu pisariaqartinneqarmat, aammali pissutsit allat tunngavigalugit allanngortitsisariaqarlunilu naleqqussaasariaqarmat.
Siunnersuummi pingaarnertut siunertaavoq, Kalaallit Nunaanni oqaaseqarsinnaanerup paasititsiniaanerullu nukittorsarnerisigut, taamaalillunilu oqartussaaqataanerup siunertaasaa uummarissarnerisigut, radiukkut fjernsynikkullu aallakaatitassat amerlanerulernissaat tunngavissinniarlugu. Siunnersuummi aamma siunertaavoq, kalaallit kulturiata, ileqqutoqaasa kinaassusaatalu aalajangiusimaannarnissaat ineriartortinnissaallu. Taakku saniatigut siunnersuummi siunertaavoq, radiukkut fjernsynikkullu aallakaatitassat sananeqartarneri aallakaatinneqartarnerilu eqqarsaatigalugit, KNR-ip illoqarfinni radioqarfiit fjernsyneqarfiillu aamma aallakaatitassiortartut nunat allaneersut akornanni qaninnerusumik suleqatigiinnerunissaq, taamaalillunilu radiukkut fjernsynikkullu tusagassiorfiit inuussutissarsiutitut ineriartortinnissaannut pitsaanerusumik sinaakkutissinnissaat qulakkeerneqarluni.
Inatsisartut peqqussutaannut atuuttumut naleqqiullugu siunnersuut arlalitsigut allanngortitsivoq. Taamaattumik matumani allannguutit pingaarnerit kisimik erseqqissarneqassapput.
Oqaatsit – pisortat sullissineranni pisussaaffiit – nutaatut oqaasertaliunneqarnera siunnersuummi ilaatinneqarpoq. KNR-imut tunngatillugu, KNR-ip pisortat sullissineranni pisussaaffinnut ingerlatsinerata pitsaassusaata nukittorsarneqarnissaa siunnersuummi anguniarneqarpoq, tassa siunnersuutigineqarmat tusagassiorfiit pillugit politikkikkut nassuiaammi, 1999-imi Inatsisartunut saqqummiunneqartumi, innersuussutit aallaavigalugit pisortat sullissineranni pisussaaffinnut pitsanngorsaanissaq erseqqissaanissarlu siunnersuutigineqarmat.
Siunnersuummi KNR-ip Naalakkersuisullu akornanni ukiunut 4-nut atuuttussamik naammassisaqarnissamut isumaqatigiissusiortoqarnissaanik (pisortat sullissineranni pisussaaffinnut isumaqatigiissutit) siunnersuummi piumasaqartoqarneranut pissutaavoq, pisortat sullissineranni pisussaaffiit pitsanngorsarnissaat erseqqissarnissaallu. Naammassisaqarnissamut isumaqatigiissutip taassuma imarisaanut minnerpaaffissamik piumasaqaatit siunnersuummi aamma ilanngunneqarput. Naammassisaqarnissamut isumaqatigiissutip taassumalu minnerpaaffissamut piumasaqaataasa qulequtsernerata tunngavigissavaa, KNR-ip "pisortat sullissineranni naatsorsuusiornermik" taasamik ingerlataqarnissaa, taamaalilluni pisortat sullissineranni pisussaaffinni aalajangersakkanut qanoq annertutigisumik iluatsitsisoqarsimanersoq uuttorneqarsinnaassammat.
Naammassisaqarnissamik isumaqatigiissutit isumassarsiarineqarnerini pingaarnersaavoq, akuersissutinik tunniussaqartut naatsorsuutigisaannut KNR-illu taakkununnga piviusunngortitsinissaannut annertunerusumik ataqatigiittoqarnissaa. Naammassisaqarnissamut isumaqatigiissummi aammattaaq siunertaavoq KNR-ip ingerlatsineranut annertunerusumik uppernarsaatissaqarnissaa. Naammassisaqarnissamik isumaqatigiissutit aqutsinermi atortutut isigineqassapput, tassani assersuutigalugu aallakaatitassiat aalajangersimasut taakkulu ikinnerpaaffissaasa tunniunneqartarnissaannut naleqqiullugu akuersissutit tunniunneqartut piviusunngortinnissaat periarfissinniarlugu. Taamaattorli KNR-ip ulluinnarni aallakaatitassiortarneranut il.il. imaluunniit aallakaatitassianut ataasiakkaanut piumasaqaateqarnissaq sunnerniassallugit isumaqatigiissummi periarfissaqanngilaq.
KNR-ip siulersuisuisa suli pikkorinnerulernissaasa piviusunngortinnissaa aamma peqqussutissamut siunnersuummi anguniarneqarpoq.
KNR-ip saniatigut radiukkut fjernsynikkullu aallakaatitassiorfiit allat nuna tamakkerlugu radiukkut fjernsynikkullu ingerlataqarnissaat periarfissinniarlugu nutaamik siunnersuuteqartoqarpoq. Siunnersuutigineqarpoq qinnuteqaatit taamak ittut Naalakkersuisunit suliarineqartassasut.
Illoqarfinni radiukkut fjernsynikkullu aallakaatitassiorfiit eqqarsaatigalugit allaffissornikkut pisariillisaanissaq siunnersuutigineqarpoq, taamaalilluni illoqarfinni radiukkut fjernsynikkullu ingerlatsisinnaanermut akuersissutit pillugit qinnuteqaatit siunissami taamaallaat allaffimmi ataatsimi suliarineqartalissallutik. Siunnersuutigineqarpoq, illoqarfinni aallakaatitsitsinnaanermut akuersissutit suliarineqarnissaannut akuerineqarnissaannullu pisinnaatitsinerit pillugit radiu tv-lu pillugit ataatsimiititaliamik nutaamik pilersitsisoqassasoq, taamaalilluni illoqarfinni aallakaatitsitsinnaanermut akuersissutit pillugit qinnuteqaatit siornatigutut KIIIP-imut Radiostyrelsimullu immikkoortillugit nassiunneqartassanngimmata. Ilanngullugu siunnersuutigineqarpoq, illoqarfinni aallakaatitsisinnaanermut akuersissutinut qinnuteqarnermut piumaqasaqaatit peqqussummi namminermi allanneqassasut, taamaalilluni qinnuteqaateqartoq illoqarfimmi aallakaatitsisinnaanermut akuerineqarsinnaassammat, peqqussummi piumasaqaatit qinnuteqaateqartup naammassisimappagit.
Nutaaliatut aamma siunnersuutigineqarpoq, Radiu tv-lu pillugit Ataatsimiititaliap immikkut akuersissuteqarneratigut illoqarfinni aallakaatitsiviit kommuninut qanigisaminnut allakaatitsisarnissaat periarfissinneqassasoq. Ilanngullugu aamma siunnersuutigineqarpoq, ataatsikkut aallakaatitsinermut malittarisassat ammanerulernissaat, taamaalilluni siunnersuutigineqarluni ataatsikkut aallakaatitsinerit pisinnaanngorlugit, tamassumunnga akuerineqarsimasut isumaqatigiissinnaappata aammalu ataatsikkut aallakaatitsigallarnerinnaassappata.
Illoqarfinni radiukkut fjernsynikkullu aallakaatitsisinnaanermut tapiissuteqartarneq eqqarsaatigalugu siunnersuutigineqarpoq, illoqarfinni aallakaatitsisarfiit sapinngisamik amerlanerpaanissaat anguniarlugu, piumasaqaatit sorliit atorlugit tapiissuteqarfigineqarnissaannut peqqussummi aalajangersaasoqassasoq.
Naggasiullugu ilanngullugu taaneqassaaq, siunnersuuteqartoqarneratigut ataatsimiititaliaq nutaaq pilersinneqassammat, taassumalu allaffissornikkut aqutsineq, nakkutiginninneq siunnersuinerlu suliassarissavai. Ataatsimiititaliaq 3-nik inuttaqartinneqassaaq ukiunut 4-nut Naalakkersuisunit toqqarneqartunik. Illuatungeriinnit attuumassuteqartunit qinigassanngortitat tunngavigalugit toqqaaneq pissaaq.
Siunnersuutip itisilerneqarnera taassumalu suliarineranut tunngavigineqartut piniaraanni siunnersuummut oqaaseqaatit innersuussutigineqassapput.
Oqaaseqaatit naatsut taakku atorlugit matumuuna siunnersuut Inatsisartunut suliarisassanngorlugu Naalakkersuisut ingerlateqqippaat.