22-10-2004 UKA2004/38
Radiokkut tv-kkuullu aallakaatitsisarneq pillugu Inatsisartut peqqussutissaattut siunnersuut
pillugu
Inatsisartut Kultureqarnermut Ilinniartitaanermullu Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Doris Jakobsen, Siumut, siulittaasoq
Inatsisartunut ilaasortaq Georg Olsen, Inuit Ataqatigiit. Siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Ellen Christoffersen, Atassut
Inatsisartunut ilaasortaq Astrid Fleischer Rex, Demokraatit
Inatsisartut Kultureqarnermut Ilinniartitaanermullu Ataatsimiititaliaata UKA 2004-mi siullermeerinnerup kingorna radiokkut tv-kkullu aallakaatitsisarneq pillugu Inatsisartut peqqussutissaattut siunnersuut misissorpaa, makkuninngalu oqaaseqaateqarniarluni.
Tusarniaanermi akissuteqaatSiunnersuutip uuma ataatsimiititaliami suliarinninnerani tusarniaanermi akissuteqaatit tunniunneqarsimasut nuutinnerinik ataatsimiititaliaq pissarsisimavoq.
Siunnersuut nassiunneqarpoq tusarniaassutigineqarluni ulloq 1. juni-miit 15. juni 2004 ilanngullugu. Peqqussutissatut siunnersuutip annertunera eqqarsaatigalugu tusarniaanermi piffissarititaasoq sivikippallaartoq ataatsimiititaliaq isumaqarpoq, Naalakkersuisullu piumaffigineqarput siunissami tusarniaasarnissani tamanna eqqarsaatigisassagaat.
AtaatsimiinneritKNR, Nuuk TV aamma Inuk Media ilaatigut peqqussutissatut siunnersuummut isumaat tusarumallugit UKA 2004-mi ataatsimiititaliamit pulaarneqarput.
Ataatsimiititaliap siunnersuummut oqaaseqaatigiumasaiPeqqussutissaq una sivisuumik suliarineqarnikuusoq Kultureqarnermut Ilinniartitaanermullu Ataatsimiititaliap ilisimaaraa, siunnersuummilu allannguutissat pitsanngorsaallu pitsaasutut isigalugit. Radio-qarnermi TV-qarnermilu ineriartorneq annertooq ukiuni makkunani ingerlanneqarpoq, Ineriartornermullu tamatumunnga nunatsinni aamma malinnaanissarput ataatsimiititaliamit pingaartutut isigineqarpoq. Peqqussutissatut siunnersuut una assersuutissaqqissuuvoq. Ataatsimiititalialli, siunnersuutip pissusissamisoortumik kinguneratut aammalu tv-kkut aallakaatitassiornermut tunngatillugu siunnersuummi piumasaqaataasut kingunerisaannik, Naalakkersuisunutt inassutigiumavaa KNR-imut aningaasaliissutaasartut eqqarsaatigeqqeqqullugit. Aammattaaq KNR TV-mi Radio-milu teknikkikkut atortorissaarutinik digitaliseriinissap piviusunngortinneqarnissaa siunertaralugu nutarterinissamik pisariaqartitsineq Naalakkersuisunit misissorneqartariaqartoq Kultureqarnermut Ilinniartitaanermullu Ataatsimiititaliaq isumaqarpoq.
Ataani allassimasut tulleriinnerit malillugit siunnersuut misissuataarneqassaaq:
1) Inuiaqatigiinnik sullissinermi isumaqatigiissut
2) Kalaallisut aalakaatitassiat pingaarnerutinneqarneri nunalu tamakkerlugu tv-kkut kanalit isiginnaarneqarsinnaasut marluk
3) Radio aamma TV-nævn
4) Allakaatitassianik paarlaateqatigiittarnerit allakaatitassioqatigiinnerillu
5) Siulersuisut
6) Aallakaatitsisinnaanermut akuersissutit
1) Inuiaqatigiinnik sullissinermi isumaqatigiissutUkiuni sisamani naammassisaqarnissamik isumaqatigiissummik ukiunut sisamanoortumik KNR-i Naalakkersuisunik isumaqatigiissuteqassasoq siunnersuummi nutaatut anguniarneqarpoq. KNR-ip suliffeqarfittut inuiaqatigiinnut sullissinerata pitsaassusaata nukittorsarneqarnissaa naammassisaqarnissamik isumaqatigiissutip uuma siunertaraa, isumaqatigiissutillu ilaatigut imarissavai KNR-p suliffeqarfittut naammassisaqarnissamik piumasaqaatit arlallit KNR-ip suliassanik aaqqiiniarnermi pisariillisaajuarnissamut pitsaassutillu ineriartortittuarneqarnissaanut tapertaasinnaasut. Ilusilersuinerup kingunerissavaa KNR-ip inuiaqatigiinnik sullissinermi naatsorsuutinik ingerlatsisinnaalernera, taamaalillunilu KNR-p imminut pisussaaffiliunneqartut naammassisimanerai uuttorneqarsinnaanngussalluni. Isumaqatigiissut ukiut sisamakkaarlugit nutarterneqartussaammat ataavartumik iluarsiivigineqartarnissaanut periarfissaqarpoq, inuiaqatigiinnik sullissinermi pisussaaffiit KNR-p piviusunngortitassaanut inuiaqatigiit kalaallit naatsorsuutigisaasa piviusorsiortumik piviusunngortinneqarnissaat taamaaliortuarnikkut ersersinneqarsinnaavoq.
Naammasisaqarnissamut isumaqatigiissummik taama ittumik maannakkut KNR-ip Naalakkersuisunik isumaqatigiissuteqarnissaa Kultureqarnermut Ilinniartitaanermullu Ataatsimiititaliap isumaqatigiittup pitsaasutut isigaa. KNR-i inuiaqatigiinnitsinnut kultureqarnitsinnullu pingaaruteqarluartutut inissisimavoq. KNR-i aqqutigalugu kulturerput oqaatsigullu siammartarpagut ilisimasaqarfiginerallu pigiinnartarlugu, inuiaqatigiinnilu sullissinermik isumaqatigiissut aqqutigalugu kalaallinut inuiaqatigiinnut KNR-ip suliassani naammaginartumik ingerlannerai KNR-ip Naalakkersuisullu eqqumaniarfigisinnaavaat.
2) Kalaallisut aallakaatitassiat pingaarnerutinneqarneri nunalu tamakkerlugu tv-kkut kanalit isiginnaarneqarsinnaasut marlukKalaallisut oqaasertalinnik aallakaatitassiat pingaarnerutinneqarnissaat pingaaruteqartorujussuusoq ataatsimiititaliaq isumaqatigiittoq isumaqarpoq. Tamanna siunnersuummi § 24-imi taperserneqarpoq, allassimammat, "KNR-ip oqaatsit pillugit erseqqissumik anguniagaqarnermigut kalaallit oqaasiisa pigiinnarneqarnissaat ineriartortinneqarnissaallu peqataaffigissavaa".
Taamaattoq siunnersuummi § 24-imi allaaserineqartutut ullumikkut KNR-ip pisussaaffini tamakkiisumik naammassisimanngikai ataatsimiititaliaq isumaqarpoq, siunissamilu tamatuma annertunerusumik aallunneqalernissaa ataatsimiititaliap qilanaaraa.
KNR-i Danmarks Radiomit toqqaannartumik pissarsiaminit aallakaatitassianik akuttunngitsumik atuisarpoq. KNR-i Danmarks Radio-mik pitsaalluinnartumik suleqatigiinnissamut isumaqatigiissuteqarpoq, kissaatigisanilu naapertorlugit aningaasartuutaanngitsumik aallakaatitassianik atuisinnaalluni.
DR-ip aallakaatitassiaanik toqqaannartumik aallakaatitsiffiusinnaasunik nuna tamakkerlugu kanal-imik Naalakkersuisut pilersitsissasut ataatsimiititaliami ikinnerussuteqartup Demokraatineersup inassutigaa. Tamanna kalaallit nunaanni aallakaatitassiarineqartut kalaallisullu oqaasertaqartut aallakaatitassiat annertunerusumik aallunneqarnerulernissaat pillugu KNR-i periarfissinneqassaaq.
3) Radio aamma TV-nævnAqutsinermik, nakkutiginninnermik siunnersuinermillu ingerlataqartussamik radio aamma tv-nævnimik pilersitsinissaq peqqussummi siunnersuutigineqarpoq. Aallakaatitsisinnaanermut akuersissutinik tunniussisarneq arsaarinnittarnerlu nævnip ilaatigut suliassarai. Nævni pingasunik ilaasortaqassaaq, ingerlatsinermut tunngasunit, inuussutissarsiornermut tunngasunit, tusagassiuutinut tunngasunit kulturikkullu paasisimasalinnit tamaneersunit sinniisoqarfigineqassalluni, taamaaliornikkut akuersissuteqartoqassatillugu naalakkersuinikkut arlaannaannulluunniit attuumassuteqannginnissaat qulakkeerneqassaaq. Nævn-ip pilersinneqarnerani aallakaatitsisinnaanermut akuersissutinut tunngatillugu suleriaatsip pisariillisarneqarnissaa eqaallisarneqarnissaalu pingaarnertut siunertarineqarpoq.
Radio aamma tv-nævnimik pilersitsinerup kingunerissavaa radio-umut aamma tv-mut naammagittaalliortarfiup atuuttup atorunnaarsinneqarnera. Nævnip atuuttup atorunnaarsinneqarnerani sipaarutaasussat nul kruuniunissaat siunnersuummi oqaatigineqarpoq, akerlianilli nævnimut nutaatut pilersinneqartumut aningaasartuutissat imaassasut naatsorsuutigineqarlutik:
Nævnimi ilaasortat akissaritinneqartarneri: 10.000 kr.
Nævnip ataatsimiinnerinut atatillugu angalanernut najugaqarnermullu aningaasartuutit: 20.000 kr.
Nakkutilliilluni pulaarnernut atatillugu angalanernut najugaqarnermullu aningaasartuutit: 120.000 kr.
Allattoqarnermut tapersiissutit: 70.000 kr.
Arlaannaannulluunniit attuumassuteqanngitsumik tusarnaartartunik isiginnaartartunillu misissuinernut aningaasartuutit: 280.000 kr.Nævnip maannakkut atuuttup atorunnaarsinneqarnerani sipaaruteqarfiunnginnera Inatsisartut Kultureqarnermut Ilinniartitaanermullu Ataatsimiititaliaata tupigusuutigaa. Radio-mut tv-mullu naammagittaalliortarfiup maannakkut atuuttumut naleqqiullugu Radio-mut tv-mullu nævni suliassanik amerlanerusunik suliakkerneqartussaavoq, kisiannili nævni atuuttoq ataatsimiittarnernut allattoqarnermullu tapersiissutinik nukinnik atuiffiusimavoq, ataatsimiititaliallu paasinninnera malillugu nævnip atorunnaarsinneqarnerani sipaaruteqartoqartussaavoq.
Tamatuma saniatigut arlaannaannulluunniit attuumassuteqanngitsumik tusarnaartartunik isiginnaartartunillu misissuinernut nalinginnaanngitsumik amerlassuseqartunik aningaasanik immikkoortitsisoqarsimasoq ataatsimiititaliaq naliliivoq, misissuinernimmi taama ittunik suliaqarnissaminut pissusissamisoortumik KNR-i aamma suliaqartussaavoq.
Radio-mut tv-mullu nævnimik pilersitsinissamut aningaasaliissutit amerlassusaat Naalakkersuisut isumaliutigeqqitariaqaraat ataatsimiititaliap isumaqatigiittup innersuussutigaa.
4) Allakaatitassianik paarlaateqatigiittarnerit allakaatitassioqatigiinnerilluTunisassiat radio tv-milu aallakaatitassanik aallakaatitsinerit pillugit KNR-ip najukkanilu radio-qarfiit tv-qarfiillu kiisalu tunisassiortut avataaneersut akunnerminni annertunerusumik suleqatigiilersinnaanerat peqqussutikkut pingaarnertut anguniakkat ilagaat.
Siusinnerusumut sanilliullugu KNR-ip najukkanilu aallakaatitassiorfiit akornanni annertunerusumik suleqatigiittoqalernissaanik suliniut ataatsimiititaliap pingaarluinnartutut isigaa. Tamatumami KNR-ip illoqarfiit pingaarnersaata aallakaatitsiviatut isigineqarunnaarluni ullumikkornit annertunerusumik nunatta tamarmi aallakaatitsisarfiatut isigineqalernera kingunerisammagu. Sinerissami najukkanilu aallakaatitassiorfiit suleqatigiinnerisigut nunami tamarmi nunaqarfinnit isorliunerusunillu nutaarsiassat ilanngussallu pissarsiarineqarsinnaalissapput, taamaaliornikkullu oqaatsitta assigiinngissutaat nunami tamarmi tv-kkut tusarneqarnissaanut periarfissaqalissalluni.
KNR-ip sullinneqarnissanik assigiingitsunik pisariaqartitsinermigut tunisassiortut atornerisigut tapersersortassagai ataatsimiititaliap pingaarluinnartutut isigaa. Matumani KNR-i unammillertitut ingerlananilu isigineqassanngilaq. Taamaattumik KNR-i nammineq ingerlatseqatigiiffinnik pilersitsinissaminut periarfissinneqassanngilaq.
§ 29 imm. 3-p peerneqarnissaa ataatsimiititaliap isumaqatigiittup Naalakkersuisunut inassutigissavaa.
Kommunimut sanilerisamut immikkut akuersissuteqarnikkut nassitsisinnaanermut periarfissamik maannakkut ammaasoqara aamma pitsaalluinnartuuvoq. Nunarput isorartoqaaq kommunillu akornanni nassitseqatigiittarnerup nunap ilaani illoqarfiit ataasiakkaat imminnut atassuteqanerulersisinnaavai.
Taamaattoq annertussuseq pinnagu pitsaassuserli salliutillugu inerniliisoqartarnissaa eqqumaffigineqartariaqartoq ataatsimiititaliaq isumaqarpoq. Taamaattumik najukkani radio-qarfinnut tv-qarfinnullu tapiisarnermi malittarisassat peqqussummi aalajangersaavigineqarsimanerisa paasisaqarfigineqarneri ataatsimiititaliamut nuannersuuvoq, matumani ilanngullugu najukkani radio-qarfinni tv-qarfinnilu sulisut ilinniarteqqinneqartarnerisa ilinniarnerminnillu nangitsisinnaanerisa siuarsarnissaannut tapiissuteqartarnissaq immikkuullarissumik taaneqarput.
Tassunga atatillugu sulisut ilinniarnerminnik nangitsinissamut periarfissinneqarnissaat ilutigisaanillu inuusuttut radio-qarnermi tv-qarnermilu qanoq suleriaaseqartoqartarneranik paasisaqarnissamut periarfissinneqarnissaat siunertaralugu tusagassiutinik atuinissamut sungiusarfimmik (medietræningsværksted) pilersitsinissamik KNR-ip pilersaarutaanut tapersiinini ataatsimiititaliap oqaatigiumavaa. Eqqarsaatit tamakku aamma maanngaanniit taperserneqarnissaat ataatsimiititaliap isumaqatigiittup Naalakkersuisunut innersuussutigivaa.
Aammattaaq naggueqatitta aallakaatitassiornermi suleqatigineqarnerunissaat inerisaaqatigineqarnissaallu Naalakkersuisunit sulissutigineqartariaqartoq ataatsimiititaliaq isumaqarpoq. Naggueqativullu ataatsimooruteqarpugut, inuunerput inooriaaserpullu pillugit annertunerusumik paasisaqarnissatsinnut periarfissinneqartariaqaraluarluta. Tamatumanilu tv-mik tusagassiuutinillu atuinerup annertunerusumik suleqatigiissutigineqarnissaat periarfissaalluarpoq.
5) SiulersuisutSiulersuisut suli pikkorinnerulernissaat pillugu eqqarsaatit nutaat ataatsimiititaliami amerlanerussuteqartut tassaasut Siumumeersut, Inuit Ataqatigiinneersut Atassummeersullu taperserpaat. Siulersuisuusuni nutaani ilaasortat arfineq-marluussapput. Siulittaasoq ilaasortarlu alla ataaseq Naalakkersuisunit toqqarneqartassaaq. Siulersuisuni ilaasortat sinneri tallimat nuna tamakkerlugu soqutigisaqaqatigiinnit ilinniagaqarfinnillu assigiinngitsunit innersuussisoqareerneratigut Naalakkersuisunit toqqarneqartassapput.
Ilaasortaq ataaseq isiginnaartartut tusaarnaartartullu nuna tamakkerlugu peqatigiiffiannit toqqarneqartassaaq. Ullumikkut isiginnaartartut tusaarnaartartullu nuna tamakkerlugu peqatigiiffeqanngillat,taamaattumik peqqussutip atuutilerfiani suli taamaattoqassagaluarpat innersuussinissamut piginnatitaaffik KANUKOKA-mut tunniunneqartariaqassaaq.
Nuna tamakkerlugu taamaattumik isiginnaartartut tusarnaartarlullu peqatigiiffiannik pilersitsinissaq ataatsimiititaliami amerlanerussuteqartut taperserpaat Naalakkersuisullu aamma taamaasiornissaat inassutigalugu.
Siunnersuummi nutaami siulersuisut inissitsiterneqarnerat ataatsimiititamiami ikinnerussuteqartup Demokraatineersup tapersersorsinnaanngilaa. Siulersuisut pikkorinnerusut naalakkersuinikkullu toqqagaanngitsut pigineqalernissaannik kissaatiginninneq siulersuisuni ilaasortat arlaannaalluunniit Inatsisartunit toqaneqartannginnissaa siunertarineqartoq siunnersuummi allassimavoq. Naalakkersuisunit toqqaannartumik siulersuisunut ilaasortat marluk toqqarneqartartillugit taamatullu innersuussisoqartoqareerneratigut sinnerisa Naalakkersuisunit toqqarneqartarnerat naalakkersuinermut attuumassuteqanngitsunik siulersuisoqarnertut taaneqarsinnaanngitsoq Demokraatineersoq isumaqarpoq
Siulersuisut sukkulluunniit Naalakkersuisunit toqqarneqartussaatillugit partiit illuatungiliuttut sunniuteqarsinnaanerat mattunneqassaaq. Akerlianilli immikkut soqutigisaqaqatigiiffinninngarnit suliffeqarfinnillu partiit innuttaasunit annertuumik tapersersorneqarput, tamannalu pingaartinneqarluinnartariaqaraluarpoq, pingaartumik inuppalaartumik suliffeqarfik KNR-itut ittoq pineqartillugu. Taamaattumik siulersuisut inissitsiterneqarnerat Naalakkersuisut allanngortitertariaqaraat Demokraatineersoq isumaqarpoq, taamaalilluni siulersuisunut ilaasortassanik partiit toqqaasarnissaat suli periarfissaqaqqullugu. Siulersuisunik pikkorinnerusunik isumassarsiaq aallaavigalugu siulersuisuni ilaasortat sinneri toqqarneqarsinnaassapput, tamatumani pineqartumut matumunnga immikkut piginnaassuseqarneri pingaartinneqarlutik.
6) Aallakaatitsisinnaanermut akuersissutitSiunnersuummi kapitali 3-mi, § 15-imit - § 18 oqaasertaliunneqarsimasut uku: "KNR-ip akuersissutillu piginnittuata" paatsuuinermik pilersitsisinnaanersut allanngortittariaqarsinnaaneri ataatsimiititaliap oqaluuseraa, oqaasertaliunneqartummi suliat aalajangersimasut allalluunniit pineqartunit tamanit ataatsimut suliarineqartussaanerattut paasineqarsinnaammata.
Oqaasertaliussat pineqartut KNR-imut aqutsinermilu aallakaatitsisinnannermut akuersissummik piginnittumut tunngassuteqarneri paatsoorneqarsinnaaqqunagit oqaasertaliunneqartut allanngortinneqartariaqannginnerannik ataatsimiititaliaq naliliivoq.
KNR-ip ingerlatseqatigiiffinnik pilersitsisinnaaneranut periarfissaasasa killiliivigineqarnissaa eqqarsaatigalugu ataatsimiititaliap innersuussutaanut naapertuuttumik Naalakkersuisut allannguutissatut siunnersuummik saqqummiussereerpata, ataatsimiititaliami amerlanerussuteqartut Siumumeersut, Inuit Ataqatigiinneersut Atassummeersullu, siunnersuutip ilusimisut iluseqartup Inatsisartunit akuersissutigineqarnissaa inassutigaat.
KNR-ip ingerlatseqatigiiffinnik pilersitsisinnaaneranut periarfissaasasa killiliivigineqarnissaa eqqarsaatigalugu ataatsimiititaliap innersuussutaanut naapertuuttumik Naalakkersuisut allannguutissatut siunnersuummik saqqummiussereerpata kiisalu siulersuisuni ilaasortassanik toqqaasarnissamut tunngatillugu aammalu DR-ip aallakaatitassiaanik toqqaannartumik nuna tamakkerlugu kanalimik pilersitsisoqarnissaanik Naalakkersuisut ikinnerussuteqartup inassutaanut naapertuuttumik saqqummiussereerpata siunnersuutip iluserisamisut iluseqartup akuersissutigineqarnissaa ataatsimiititaliami ikinnerussuteqartup Demokraatineersup inassutigaa.
Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata Radio-kkut TV-kkullu aallakaatitsisarneq pillugu Inatsisartut peqqussutissaannut siunnersuut aappassaaniigassanngortippaa.
Doris Jakobsen, Siulittaasoq
Georg Olsen
Ellen Christoffersen
Ruth Heilmann
Astrid Fleischer Rex