27. oktober 2004

UKA 2004/38

 

Radiukkut tv-kkullu aallakaatitsisarneq pillugu Inatsisartut peqqussutissaattut siunnersuut

 

Akissuteqaat
(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)

 

Pingajussaaneerneqarnera

 

Siunnersuutip aappassaaneerlugu oqaluuserineqarnerani Naalakkersuisut Kattusseqatigiit, Atassutip, Siumut aamma IA-p tapersiinerinut qutsavigerusuppai.

Siunnersuutip aappassaaneerlugu oqallisiginerani oqaatsit kalaallisoortaani eqqornerusumik taaneqarluarsinnaaneri Naalakkersuisut paasivaat. Inatsisit oqaasertaasa sapinngisamik paasiuminartuunissaat Naalakkersuisut pingaartikkamikku pingajussaanik oqaluuserineqarnerani Naalakkersuisut allannguutissatut siunnersuuteqarniarlutik aalajangerput.

Siunnersuut oqaatsit tungaanuinnaq tunngasuuvoq, taamaalillunilu malittarisassat imarisaannik allannguisitsigani. Saqqummiunneqarnera sioqqullugu allannguutissatut siunnersuutigisat Oqaasileriffimmut oqaloqatigiissutigineqarsimapput.

Taamatut oqaaseqarlunga Naalakkersuisut sinnerlugit siunnersuutip kalaallisuuani allannguuteqarneq ilanngullugu naggataarutaasumik akuersissutiginissaanut innersuussutigaara.