Manna Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaat nr. 26, 28. november 2016-imeersoq, Inatsisartut inatsisaatigut nr. 24, 28. november 2018-imeersukkut, Inatsisartut inatsisaatigut nr. 13, 1. december 2021-meersukkut kiisalu Inatsisartut inatsisaatigut nr. 63, 20. november 2023-meersukkut allannguutitalik, nalunaarutigineqarpoq.

 

Kapitali 1

Inatsisip atortuuffia

 

  § 1.  Inatsit atortussaatinneqarpoq kommuninut aamma Namminersorlutik Oqartussanut, taakku­nunnga ilanngullugit ingerlatsiveqarfinnut, naalakkersuisoqarfinnut, paaqqinnittarfinnut, suliffeqarfinnut il. il., taakku missingersuutaat kommunit ukiumoortumik missingersuutaannut imaluunniit Namminersorlutik Oqartussat aningaasanut inatsisaannut ilanngunneqarsimappata.

  Imm. 2. Naalakkersuisut aalajangersinnaavaat inatsimmi malittarisassat aamma inatsit naapertorlugu malittarisassat tamakkiisumik ilaannakortumilluunniit suliffeqarfinnut, peqatigiiffinnut, aningaasaateqarfinnut il. il. atuutsinneqassasut:

1) taakku ingerlatsinermi imaluunniit naatsorsuutitigut amigartoorutaat kommuninit Namminersorlutilluunniit Oqartussanit tapiissutitigut imaluunniit inatsit naapertorlugu tapersiilluni tunissuteqartoqarneratigut, akitsuutitigut allatigulluunniit isertitatigut matussuserneqassappata, imaluunniit

2) kommuninit, Namminersorlutik Oqartussanit imaluunniit suliffeqarfinnit il. il. nr. I-imi ilaatinneqartunit aningaasaliiffigineqartartunut, tapiissutisisartunut, taarsigassarsisinneqartunut, qularna­veeqqusiiffigineqartunut allatigulluunniit taperneqartunut, tassa aningaasaliissutit il. il. tigusisussap ingerlatsineranut annertuumik pingaaruteqarpata.

Imm. 3.  Imm. 2 atuutsinneqassanngilaq inatsimmi allami suliffeqarfiup, peqatigiiffiup imaluunniit aningaasaateqarfiup missingersuusiornissaanut naatsorsuusiornissaanullu malittarisassanik aalajangersaasoqarsimappat.

 

Kapitali 2

Missingersuutinik oqimaaqatigiissitsineq taarsigassarsinerlu

 

Missingersuutinik oqimaaqatigiissitsineq

 

  § 2.  Missingersuutit tamarmiusut kommunimi imaluunniit Namminersorlutik Oqartussani ukiut sisamat ingerlaneranni oqimaaqatigiissinneqassapput imaluunniit sinneqartoorfiussapput, taamaattoq imm. 3 takuuk.

  Imm. 2.  Missingersuutit oqimaaqatigiissinneqarnissaannik piumasaqaat imm. 1-imi pineqartoq naammassineqarsimassaaq, kommunip ukiumoortumik missingersuutaani, ukiunut arlalinnut missingersuutit ilanngullugit imaluunniit Namminersorlutik Oqartussat aningaasanut inatsisaat, ukiunut arlalinnut missingersuutit ilanngullugit:

1)  sanaartornermut, ingerlatsinermut, isertitanut aamma tapiissutinut atatillugu inerneri tamarmiusut amigartoorfiunngippata, aamma

2)  ingerlatsinermut, tapiissutinut sanaartornermullu aningaasaliissutit tamarmiusut ukiumi ataatsimi annerpaamik 1,00 procentimik qaffassimappata aamma ukiut sisamat ingerlanerini ataatsimut qaffariaataat annerpaamik 2,00 procentiuppat.

  Imm. 3.  Inatsisartut akuersissuteqarnerisa kingorna imm. 2 malillugu naatsorsuinermi aningaasartuutit ineqarnermut, inuussutissarsiornermut imaluunniit ataqatigiimmik aaqqissuussinernut suliniutinut aningaasaliinernut atatinneqarsinnaasut ilanngunneqassanngillat, sunniutissanik nalilersuineq malillugu ataatsimut isigalugu inuiaqatigiit aningaasaqarneranut iluanaarutaasut nalilerneqarpat.  Uniffik siulleq malillugu akuersinermi, taarsigassarsiat § 6 malillugu akuerineqartillugit, aningaasallu aningaasaliinissanut akuerineqartunik aningaasalersuinermut atorneqartillugit aamma taarsigassarsianut, taarsigassarsianik pilersitsinermi akiliutinut aningaasartuutinut, naqitsinermi akiliummut, akiliinermut, akiliutinut ernianullu tunngasunik aningaasartuutit ilaapput.

  Imm. 4. Imm. 2 nr. 2-mi procentit annertussusaat taaneqartut ukiuni kingullerni pingasuni innuttaasut amerliartornerannik Naatsorsueqqissaartarfiup 1. januaari eqqorluarlugu nalunaarsugaasa agguaqatigiissinnerata 80 pct.-iannik qaffanneqarput.

  Imm. 5.  Imm. 2 nr. 2-mi procentit annertussusaat taaneqartut ukiunut pingasunut 1. januaari eqqorluarlugu innuttaasut ikiliartornerannik Naatsorsueqqissaartarfiup kingusinnerpaamik nalunaarsugaasa agguaqatigiissinnerata 50 pct.-iannik ikilineqarput. Imm. 2 nr. 2-mi procentit annertussusaat taaneqartut ukiumut annerpaamik 0,25 pct. pointinik ikilineqarsinnaapput.

  Imm. 6.  Imm. 2-mi procentit annertussusaat taaneqartut ukiut aningaasanut inatsiseqarfiup tulliani aningaasaliissutinit agguagarsiap amerlassusiata assinganik qaffanneqassapput, ukiut aningaasanut inatsiseqarfiusut siuliini naatsorsuinerni aningaasat amerlassusaat nuunneqartut ilanngullugit naatsorsorneqarsimappata.

  Imm. 7.  Imm. 2-mi procentit annertussusaat taaneqartut aningaasaqarnermi ukiup tulliani aningaasaliissutinit agguagarsiap amerlassusiata assinganik qaffanneqassapput, naatsorsuinermi piffissap iluani aningaasat amerlassusaat kommuninit imaluunniit Namminersorlutik Oqartussanit suliassanut nuunneqartunut atatillugit tiguneqarsimappata. Taamatut pisoqartillugu imm. 2-mi procentit annertussusaat taaneqartut ukiut aningaasanut inatsiseqarfiup tulliani aningaasaliissutinit agguagarsiap assinganik millineqassapput, naatsorsuinermi piffissap iluani aningaasat amerlassusaat kommuninit imaluunniit Namminersorlutik Oqartussanit suliassanut nuunneqartunut atatillugit tiguneqarsimappata

  Imm. 8. Imm. 2, nr. 1-imi taaneqartutut missingersuutit inissisimanerannik naatsorsuinermi, tunissutit, tapiissutit, ikiorsiissutit assigisaallu aningaasaateqarfinnit, ingerlatsivinnit, kattuffinnit, suliffeqarfinnit naalagaaffiillu suliniaqatigiiffiinit inuinnarnillu tiguneqartut, tunissutit, tapiissutit il.il. kommunip namminersorlutilluunniit oqartussat aalajangersimasunik pisinissamut, aalajangersimasunik sanaartornissamut allanilluunniit suliassanut atugassaattut tiguneqartut isiginiarneqartassanngillat.

  Imm. 9. Imm. 2, nr. 2-mi oqaatigineqartutut missingersuutit inissisimanerannik naatsorsuinermi aningaasartuutit siunertanut imm. 8-mi taaneqartunut, aningaasartuutit aningaasanik tunissutitut, tapiissutitut il.il. tiguneqartunit annertunerutinnagit ilanngunneqartassanngillat.

 

  § 3. Nikingassutaagallartup piffissami ungasinngitsumi aningaasaqarnikkut atasinnaassuseq ulorianartorsiortissanngippagu immikkorluinnaq pisoqartillugu § 2, imm. 1-mi piumasaqaatip taaneqartup saneqqunnissaanut Naalakkersuisut inassuteqareernerisigut Inatsisartut Aningaasaqarnermut Akileraartarnermullu Ataatsimiititaliaat akuersissuteqarallarsinnaavoq.

Imm. 2. Pissutsit immikkut illuinnartut tassaapput pisut nalinginnaasuunngitsut Namminersorlutik Oqartussat nakkutigisinnaanngisaat aamma pisortat aningaasaqarnerannut tamarmiusumut pingaaru­teqarluinnartumik sunniuteqartartut imaluunniit piffissat ilaanni aningaasaqarnikkut annertuumik kinguariartitsisartut.

 

  § 4.  Naalakkersuisoq, Naalakkersuisut Siulittaasuata erseqqinnerusumik aalajangiineratigut piginnaatinneqartoq, ukiut tamaasa februaarip naannginnerani kommunit aamma Namminersorlutik Oqartussat ukiut aningaasanut inatsiseqarfiut sisamat siuliinut missingersuusiaasa inissisimanerannut naatsorsuutinik suliaqartassaaq. Naatsorsuutinik tamanut saqqummiussinissaq sioqqullugu Aningaasaqarnermut Siunnersuisoqatigiinnut oqaaseqaateqarfigineqartussanngorlugit saqqummiunneqartassapput.

  Imm. 2.  Naalakkersuisoq, Naalakkersuisut Siulittaasuata erseqqinnerusumik aalajangiinera malillugu tamatumunnga piginnaatinneqartoq, ukiut tamaasa apriilip naannginnerani ukiut aningaasanut inatsiseqarfiusut tulliit sisamanut kommunini aammalu Namminersorlutik Oqartussani aningaasanut § 2, imm. 2, nr. 2-mi taaneqartunut tunngavigineqartunik naatsorsuutinik suliaqartassaaq. Naatsorsuutinik saqqummiussinissaq sioqqullugu kommuninut oqaaseqaateqarfigineqartussanngorlugit saqqummiunneqartassapput.

Imm. 3. Inatsisartut inatsisaatigut imaluunniit Inatsisartut inatsisaata allanngortinneratigut, Inatsisartut inatsisaanni imaluunniit Inatsisartut peqqussutaani aningaasartuutini, utertussat kingorna, Inatsisartut kommuninut katillugit 5 mio. kr.-t sinnerlugit aningaasartuuteqarnerulersitsippata, aningaasartuutaanerusussatut ilimagineqartut Namminersorlutik Oqartussat missingersuutaasa inissisimanerinik naatsorsuinermi ilanngullugit naatsorsorneqassapput, tak. imm. 1 aamma 2.

 

Piginnaatitsissut

 

§ 5. Missingersuutinik naatsorsueriaasissaq pillugu Naalakkersuisut erseqqinnerusumik malittari­sassaliorsinnaapput.

 

Taarsigassarsineq

 

  § 6. Naalakkersuisut inissianut, inuussutisssarsiutinut attaveqaatinullu suliniutinut aatsaat  taarsigassarsisinnaallutilluunniit taarsigassarsinissamut akuersisinnaapput, atuisut akiliutaat, pisortat aningaasartuutaasa annikillisat pisortalluunniit kinguneqaatitut isertinneruligassaasa minnerpaamik taarsigassarsiamut atasumik erniat taarsersuutitullu akiliutit matussusersinnaappasigit. Taamattaaq aningaasaliissutit taneqartut ungasissumik isigisumik aningaasarsiornermut politikip attanneqarsinnaaneranut ikiorfartuisuussapput.

  Imm. 2.  Imm. 1 aamma aningaasalersueriaatsini tulliuttuni atoneqassaaq:

1) akiitsunik pisussaaffinnik tigusinerni

2) qularnaveeqqutinik pisussaaffinngoratarsinnaasunik allanik tigusinerni,

3) aningaasatigut attartornermik isumaqatigiissuteqarnermi, imaluunniit

4) pisortat namminersortullu suleqatigiinnerannik il.il. isumaqatigiissusiornerni

  Imm. 3. Imm. 1-imi 2-milu taaneqareersutut taarsigassarsititsisoqarnissaani taarsigassarsinissaq taarsigassarsianillu akuersinissaq il.il. pillugit malittarisassanik erseqqinnerusunik Naalakkersuisut aalajangersaasinnaapput.

 

Kapitali 3

Aningaasaliissuteqarnermi tunngaviit

 

§ 7.  Ukioq aningaasanut inatsiseqarfiusoq 1. januaarimiit 31. decembarip tungaanut sivisussuseqarpoq.

 

§ 8.  Aningaasaliissuteqartoqaqqaartinnagu aningaasartuuteqartoqassanngilaq aamma isertitaqarto­qassanngilaq, taamaattoq tak. § 23, imm. 2

 

Kapitali 4

Aningaasanut inatsit, ukiumoortumik missingersuutit il. il.

 

Namminersorlutik Oqartussat aningaasanut inatsisaat

 

  § 9. Naalakkersuisut aningaasanut inatsisissatut siunnersuut ukioq aningaasanut inatsiseqarfiusussaq sioqqullugu kingusinnerpaamik ulloq 1. september saqqummiutissavaat.

Imm. 2.  Aningaasanut inatsisissatut siunnersuutip imarissavai Nunatta Karsiata ukiumi aningaasa­nut inatsiseqarfiusumi aningaasartuutai isertitaalu tamaasa.

 

§ 10.  Ilanngaatitaqanngitsumik naatsorsuisarneq tunngavigalugu aningaasartuutissanut isertitassa­nullu missingersuutit aningaasanut inatsisissatut siunnersuummi immikkoortinneqassapput.

  Imm. 2.  Aningaasartuutissat missingersuutaanni ingerlatsinermi aningaasartuutit kiisalu isertitat tamarmik ilanngunneqassapput.

  Imm. 3. Isertitassat missingersuutaanni naalagaaffiup Namminersorlutik Oqartussanut tapiissutai aamma akileraarutitigut akitsuutitigullu isertitat ilanngunneqassapput. Aamma iluanaarutit, pigisanik nalilinnik tunisinerit, sanaartorneq il. il. isertitassatut aningaasaliissutinut ilanngunneqassapput.

 

§ 11.  Aningaasanut inatsisitigut aningaasaliissutit naalakkersuisup aalajangersakkat erseqqinnerusumik aalajangersarneqarsimasut malillugit atuinissaanut piginnaatitsissutaapput.

  Imm. 2. Naalakkersuisoq oqartussaaffimmi aningaasaliissutaanut akisussaasuuvoq. Naalakkersui­sup akisussaasuusup aningaasaliissutit atorluarneqarnissaat qulakkiissavaa.

 

§ 12.  Aningaasaliissutinut oqaasertaliisoqarsinnaavoq. Oqaasertaliussat nalinginnaasumik taamaallaat aningaasaliinermi aqutsinermut ilapittuutaassapput.

Imm. 2.  Oqaasertaliussat ukiumi aningaasanut inatsiseqarfiusumi aningaasanut inatsimmut oqaasertaliiffiusumi taamaallaat atuutissapput.

Imm. 3. Oqaasertaliussat aqqutigalugit inatsimmut atuuttumut aalajangersakkanik tigussaasunik allanik ilanngussisoqarsinnaavoq. Oqaasertaliussat aqqutigalugit inatsisinik atuuttunik allannguineq immikkorluinnaq pisoqartillugu, allannguutissallu piffissamut aalajangersimasumut atuuppata aatsaat pisinnaavoq.

Imm. 4.  Oqaasertaliinikkut ataavartumik nalinginnaasumilluunniit inatsimmik allannguisoqarsinnaanngilaq.

Imm. 5.  Oqaasertaliussat ukiumi aningaasanut inatsiseqarfiusumi tullermi aningaasaliissuteqarnis­samut siuarsaasuussanngillat.

 

  § 13. Naalakkersuisut aningaasanut inatsisissatut siunnersuutip suliarineqarnissaanut aaqqissuun­neqarnissaanullu malittarisassaliorsinnaapput.

  Imm. 2. Naalakkersuisut aningaasat atorneqanngitsut ukiup tullianut nuutassat pillugit malittari­sassaliorsinnaapput.

  Imm. 3. Naalakkersuisut immikkoortunut pilersaarusiornissamut immikkoortup pineqartup iluani periusissianik sukkulluunniit atuuttunik takutitsisunut malittarisassaliorsinnaapput.

  Imm. 4. Namminersorlutik Oqartussat illuutaanik aalaakkaasunik, sanaartugaataanik pigisaanillu nalilinnik allanik ingerlaavartumik aserfallatsaaliuinermut aamma nutarsaanermut aningaasanut inatsimmi aningaasanik immikkoortitsisoqarnissaa pillugu malittarisassanik Naalakkersuisut aalajangiisinnaapput.

 

Sanaartornerit, iluarsagassat il.il.

 

  § 14.  Sanaartugassanut iluarsagassanullu aningaasaateqarfik taamaallaat missingersuutinut naatsorsuutinullu teknikikkut aningaasaateqarfiuvoq, Nunatta Karsiani ilaasoq.

  Imm. 2.  Sanaartugassanut iluarsagassanullu aningaasaateqarfimmi Nunatta Karsianit sanaartornermut aningaasaliissutit isertitatut nalunaarsorneqassapput. Tamanna aamma sanaartornermut aningaasaliissutinut, Inatsisartut aningaasaqarnermut ataatsimiititaliaanit kingusinnerusukkut akuerineqarsimasunut aamma § 13, imm. 4 naapertorlugu aningaasaliinernut tunniunneqarsimasunut atuuppoq.

  Imm. 3.  Sanaartornermi suliniutit aningaasartuutaat Sanaartugassanut iluarsagassanullu aningaasaateqarfimmi aningaasartuutitut nalunaarsorneqassapput.

  Imm. 4. Aningaasaqarnermut ukiut akornanni akiliutigineqartut nikingassutaat Sanaartugassanut iluarsagassanullu aningaasaateqarfimmi oqimaaqatigiissinneqartassapput.

  Imm. 5.  Sanaartornermi suliniutini ataasiakkaani katillugu aningaasartuutinut aningaasaliissutigineqarsimasunit aningaasartuutikinnerunermi sinneruttut, suliniutip naammassineqarnerani Nunatta Karsianut utertinneqartassapput.

 

  § 15.  Naalakkersuisoq, Naalakkersuisut Siulittaasuata aalajangiineranit piginnaatinneqartoq, Sanaartugassanut iluarsagassanullu aningaasaateqarfiup ingerlatsineranut missingersuutinut aamma aningaasaliinermut tunngasunik aalajangersaassaaq.

 

  § 16.  Naalakkersuisoq, Naalakkersuisut Siulittaasuata aalajangiineranit piginnaatinneqartoq, Sanaartugassanut iluarsagassanullu aningaasaateqarfimmik ingerlaavartumik aqutsinermut siulersuissaaq.

 

  § 17.  Naalakkersuisut Sanaartugassanut iluarsagassanullu aningaasaateqarfimmi ingerlatat pillugit Inatsisartunut ukiumoortumik nalunaarusiortassapput, ilagalugit suliniutinut nutaanut, suliniutinut ingerlasunut aamma naammassineqarsimasunut imaluunniit suliniutinut taamaatiinnarneqarsimasunut, taama tulleriillutik, immikkut killiffiit.

  Imm. 2.  Nalunaarusiaq suliniutit suussusaannut aamma suliniutinut eqimattakkaanut immikkoortiterneqassaaq ima, nutaamik pissarsinissamut aningaasaliissutit aamma aserfallatsaaliuinermut iluarsagassanullu aningaasaliissutit akornanni immikkoortitsisoqarluni.

 

Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfik

 

§ 18. Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfik missingersuusioriaatsimut naatsorsuusioriaatsimullu aningaasaateqarfiuvoq Nunatta Karsianut ilaatinneqartoq.

  Imm. 2. Aningaasaateqarfiup siunertarivaa piffissamut ungasinnerusumut aningaasaateqarnissaq eqqarsaatigalugu aningaasaateqarfiup aningaasaataanik aningaasaliissuteqartarnissaq. Aningaasaateqarfiup aningaasaatai piffissaq ungasinnerusoq eqqarsaatigalugu toqqissisimanartumik, iluanaarutaanerpaaffiusumik pitsaanerpaamillu inuiaqatigiit aningaasaqarnerannut sunniuteqarnissaat anguni­arlugu aningaasaliissutigineqassapput.

  Imm. 3.  Aningaasaateqarfimmut akiliutit nuunneqartassapput immikkut ittumik isertitanit ukunannga:

1)  Ingerlatseqatigiiffiit nunanit allaneersut aatsitassarsiornermi misissuinerannut sanaartornerannullu atatillugu ingerlatseqatigiiffiup akileraarutaanit 30 mio. kr.-nik amerlanerusunit Nunatta Karsiata iluanaarutaanit pissarsiat,

2)  Aningaasarsianit akileraarutit pillugit Inatsisartut Inatsisaanni § 72 a aamma § 72 b naapertorlugit akileraarutit A-t.

3)  Namminersorlutik Oqartussat pigisaannik 50 mio. kr.-t sinnerlugit nalilinnik tunisaqarnermit iluanaarutit.

4)  Soraarnerussutisiassanik imaluunniit inuunermut sillimmasiisimanernik Danmarkimi, Savalimmiuni nunaniluunniit allani soraarnerussutisiassanut aningaasaateqarfinnut nuussinernit imaluunniit inuunermik imaluunniit soraarnerussutiassanut sillimmasiisarfimmit Kalaallit Nunaanni najugaqartumit akileraarutinit akitsuutinillu iluanaarutit.

5)  Ingerlatsineq, sanaartorneq aamma taarsigassarsititsineq pillugit nunap karsiata naatsorsuutaanni sinneqartoorutit.

  Imm. 4.  Iluanaarutit imm. 3, nr. 1-4-ami taaneqartut tiguneqarnerminnit piaarnerpaamik aningaasaateqarfimmut ikineqartassapput. Sinneqartoorutit imm. 3, nr. 5-imi taaneqartut Inatsisartut nunatta karsiata naatsorsuutaanik akuersinerata kingorna ukiup aningaasanik inatsiseqarfiup naanerani ukiut sisamaanni ukiunilu aningaasanut inatsiseqarfiusuni akunnermiliuttuni amigartoorutaasinnaasut ilanngaatigineqareernerini piaarnerpaamik aningaasaateqarfimmut nuunneqartassapput.

  Imm. 5.  Imm. 3 malillugu akiliutigineqartut Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaat naapertorlugu isertitanut Kalaallit Nunaata Aatsitassarsiornermi Aningaasaateqarfianut ikineqartussanut imaluunniit Namminersorlutik Oqartussat aatsitassanit isertitaqarsinnaatitaanerat aamma ataatsimoortumik tapiissutisisinnaatitaanerat pillugu inatsit naapertor­lugu isertitanut ilaatinneqanngitsut naalagaaffiup Namminersorlutik Oqartussanut ataatsimoortumik tapiissutaannik ikilisitsissapput.

  Imm. 6. Ukiut aningaasanut inatsiseqarfiusut akornanni akiliutigineqartut nikingassutaat aningaa­saateqarfimmi nalimmassarneqassapput.

  Imm. 7. Piffissaq Ungasinnerusoq Eqqarsaatigalugu Aaningaasaliissuteqarnissamut Aningaasaateqarfiup ingerlaavartumik aqunneqarnera Naalakkersuisut Siulittaasuata erseqqinnerusumik aalajangersaaneratigut naalakkersuisumut tunniunneqassaaq.

  Imm. 8. Naalakkersuisut aningaasaateqarfiup missingersuusiortarnissaanut naatsorsuusiortarnissaanullu malittarisassaliorsinnaapput.

  Imm. 9. Naalakkersuisut minnerpaamik ukiumut ataasiarlutik Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfiup suliai pillugit Inatsisartunut nassuiaasiortassapput, tassunga ilanngullugu suliniutit nutaat, suliniutit ingerlanneqartut naammassineqarsimasullu imaluunniit unitsiinnarneqarsimasut killiffii immikkut naatsorsussavaat. Nassuiaat kingusinnerpaamik Nunatta Karsiata naatsorsuutaasa saqqummiunneqarnerani naammassineqarsimassaaq naatsorsuutinullu ilanngullugu suliarineqassalluni.

  Imm. 10. Naalakkersuisut aningaasaateqarfiup aningaasaataanik aningaasaliissuteqartarnissaq pil­lugu erseqqinnerusumik aalajangersagaliorsinnaapput.

 

Aningaasaliissutit nutaat allanngortitalluunniit

 

  § 19.  Naalakkersuisut ilassutitut aningaasaliiffigineqarnissamik qinnuteqaasiornissamut erseqqin­nerusunik aalajangersagaliorsinnaapput.

 

Kommunit ukiumoortumik missingersuutaat, ukiunut arlalinnut missingersuutaat il. il.

 

§ 20. Aningaasaqarnermut Ataatsimiititaliaq kommunip ukiumut aningaasanut inatsiseqarfiusus­samut tullermut ukiumoortumik missingersuutissaanik kommunalbestyrelsimut siunnersuusiussaaq. Siunnersuutit ukiunut tulliuttunut minnerpaamik pingasunut missingersuusianik imaqassapput.

Imm. 2. Ukiumoortumik missingersuusiap imarissavai kommunipisertitassai aningaasartuutissaalu tamarmiusut kiisalu kommunip aningaasaataasa tigoriaannaat aamma aningaasaqarnikkut naatsorsuutaasa nikingassutaat.

Imm. 3. Ukiumoortumik missingersuutit aningaasartuutissatut isertitassatullu aamma nikerartussanut allanut ilimagineqartunut tamatigut takussutissaassaaq. Kommuninut ataatsimoortumik tapiissutinik tunniussisoqarneranut atatillugu siunertanut aalajangersimasunut erseqqinnerusunut aningaasanik immikkoortitsisoqarnissaanut isumaqatigiissuteqartoqarsimappat ukiumoortumik missingersuutini ikinnerpaamik aningaasanik taakkuninnga siunertamut pineqartumut immikkoortitsisoqassaaq.

Imm. 4. Ukiumoortumik missingersuusiaq tunngavissiissanngilaq taarsigassarsinissamut, attartornissamut imaluunniit attartortitsinissamut, tassa Naalakkersuisunit akuersissummik pisariaqartinneqartumik tunniussisoqarsimatinnagu imaluunniit kommunalbestyrelsip malittarisassat atuuttut naa­pertorlugit Naalakkersuisunit akuersissummik pissarseqqaarani taarsigassarsinissaanut, attartornis­saanut imaluunniit attartortitsinissaanut.

Imm. 5.  Naalakkersuisut missingersuusiornissamut aamma ilassutitut aningaasaliissuteqarnissa­mut malittarisassaliorsinnaapput kiisalu kommunit aningaasaatissaannut tigoriaannarnut minnerpaamik piumasaqaasiorsinnaallutik.

  Imm. 6. Naalakkersuisut kommunit immikkoortunut pilersaarutinik suliaqartarnerannut malittarisassanik, immikkoortuni ataasiakkaani periusissanik sukkulluunniit atuuttunik takutitsisunik malittarisassarsiorsinnaapput.

 

  § 20 a. Kommunalbestyrelsit kommunimut sanaartugassanut iluarsagassanullu aningaasaateqarfimmik pilersitsinissaq akuerisinnaavaat. Aningaasaateqarfik missingersuutinut naatsorsuutinullu teknikikkut aningaasaateqarfiuvoq kommunip karsiani ilaasoq.

  Imm. 2. Sanaartugassanut iluarsagassanullu aningaasaateqarfimmi ukiumoortumik missingersuutit sanaartornermut aningaasaliissutit aamma sanaartornermut aningaasaliissutit tapiliussatut aningaasaliissutitut akuerineqarsimasut isertitatut nalunaarsorneqassapput.

  Imm. 3. Sanaartornermi suliniutit aningaasartuutaat sanaartugassanut iluarsagassanullu aningaasaateqarfimmi aningaasartuutitut nalunaarsorneqassapput. Ukiut aningaasanut inatsiseqarfiit akornanni akiliutigineqartut nikingassutaat sanaartugassanut iluarsagassanullu aningaasaateqarfimmit oqimaaqatigiissinneqassapput. Sanaartornermi suliniutini ataasiakkaani katillugu aningaasartuutinut aningaasaliissutigineqarsimasunit aningaasartuutikinnerunermi sinneruttut, suliniutip naammassineqarnerani kommunip karsianut utertinneqartassapput.

  Imm. 4. Aningaasaqarnermut ataatsimiititaliaq Sanaartugassanut iluarsagassanullu aningaasaateqarfimmi ingerlatat pillugit kommunalbestyrelsimut ukiumoortumik nalunaarusiortassaaq, ilagalugit suliniutinut nutaanut, suliniutinut ingerlasunut aamma naammassineqarsimasunut imaluunniit suliniutinut taamaatiinnarneqarsimasunut, taama tulleriillutik, immikkut killiffiit.

 

§ 21. Aningaasaqarnermut Ataatsimiititaliap ukiumoortumik missingersuutissatut ukiunullu arla­linnut missingersuutissatut siunnersuutai kommunalbestyrelsimi minnerpaamik sapaatit akunnerisa marluk akornanni marloriarlugit suliarineqassapput.

Imm. 2. Ukiumoortumik missingersuutinut siunnersuut kommunip nittartagaatigut tamanut saqqummiunneqassaaq peqatigitillugulu siunnersuut siullermeerneqartussanngorlugu aappassaaneerneqartussanngorlugulu kommunalbestyrelsip ilaasortaanut nassiunneqarluni. Siunnersuut aamma Naalakkersuisunut ilisimatitsissutitut nassiunneqassaaq.

  Imm. 3.  Ukiumoortumik missingersuutissatut aamma ukiunut arlalinnut missingersuutissatut siun­nersuutit marloriarlugit suliarineqarnissaannut periusissatut malittarisassat kommunalbestyrelsip su­leriaatsimini aalajangersassavai.

Imm. 4. Ukiumoortumik missingersuusiap aappassaaneerlugu oqaluuserineqarnissaanut inaarutaasumik piffissaliussassaq Naalakkersuisut aalajangersassavaat, aamma ukiumoortumik missingersuu­siami kommunalbestyrelsip inaarutaasumik akuersissuteqarnermini aningaasaliissuteqarfissanik isummerfigisassaani naatsorsuutit immikkoortiterneqarnissaannut malittarisassaliorsinnaapput.

Imm. 5.  Ukiumoortumik missingersuutit akuersissutigineqarnerannit kingusinnerpaamik ullut 14-it qaangiunneranni taakku assilinerat Naalakkersuisunut nassiunneqassapput.

 

§ 22. Ukiumoortumik missingersuutit ukiunullu arlalinnut missingersuutit akuersissutigineqarnerannit kingusinnerpaamik ullut 14-it qaangiunneranni kommunimi innuttaasunit takuneqarsinnaanngussapput.

Imm. 2. Ukiumoortumik missingersuutit ukiunullu arlalinnut missingersuutit imaasa naatsumik nassuiarneqarnerat ukiup aningaasanut inatsiseqarfiusussap tulliata aallartinnginnerani kommunip nittartagaatigut tamanut saqqummiunneqassapput.

 

  § 23.  Ukiumoortumik missingersuutini naatsorsuutit kommunalbestyrelsip ukiumoortumik naatsorsuutinik akuersissuteqarnermini aningaasaliissuteqarfissanut tunngatillugit isummerfigisai § 21, imm. 4 naapertorlugu kommunip ingerlatsineranut pisussaaffiliipput.

  Imm. 2. Aningaasaliissuteqarnissamut oqartussaaffik kommunalbestyrelsimiippoq. Suliniutit inatsisitigut, peqqussutitigut imaluunniit allatigut inatsisitigut aalajangersakkatigut peqqussutigineqartut pisariaqartitsinermi kommunalbestyrelse aningaasaliissuteqaqqaanngikkaluartoq aallartinneqarsinnaapput, aningaasaliissutilli piaarnerpaamik pissarsiarineqarsinnaasariaqarput. Kommunalbestyrelsillu aammattaaq aningaasaqarnermut ataatsimiititaliaq pisinnaatissinnaavaa ingerlatsinermi ani­ngaasartuutissanik missingersuutiniittunik nikisiterisinnaanermut kiisalu sanaartugassanut aningaasaliissutinik sanaartugassanut allanut nuussisinnaanermik.

Imm. 3.  Ilassutitut aningaasaliissutaasut tamarmik aningaasartuutissatut akuersissutigineqartut qa­noq matussuserneqarnissaannik paasissutissanik imaqassapput, ukiunut missingersuusiorfiusunut kingunerisinnaasai ilanngullugit. § 21, imm. 3-mi ilassutitut aningaasaliissutinik atuisinnaanermut assinguvoq.

 

§ 24. Imm. 2-mi malittarisassatut aalajangersakkat apeqqutaatillugit kommunit Naalakkersuisunit akuerineqarnatik:

1) taarsigassarsisinnaanngillat allanillu akiitsunik pisussaaffilersinnaanatik,

2) qularnaveeqqussisinananatik aallanillu pisussaaffinngoratarsinnaasunut tigusisinnaanatik,

3) attartartorsinnaanatik leasinginillu isumaqatigiissuteqarsinnaanatik,

4) pisortat namminersortullu suleqatigiinnerannik il.il. isumaqatigiissussiorsinnaanatik, imaluunniit

5) aalajangersimasumik akiliutigisartakkamik assigisaanilluunniit neriorsuinnaanngillat, kommunit inatsisit naapertorlugu isumagisassarinngisaannik.

  Imm. 2.  Naalakkersuisut malittarsiassanik, kommunit erseqqissumik aalajangersarlugit killiliussani iluanni imm. 1-imi taarsigassarsisinnaanermik il.il. pisinnaatitsisunik aalajangersaassapput. Naalakkersuisut tassani pisinanatitsissummi, kommunit aningaasaqarnermik, missingersuutinik il.il. aqutsinernermik piumasaqaatinik naammassinninnissaat tunngavissaatissinnaavaat.

 

Kapitali 5

Aningaasartuutinik nakkutilliineq

 

Sioqqutsisumik aningaasartuutinik nakkutilliineq

 

§ 25. Kommunit Naalakkersuisullu tamarmik ukiumi aningaasanut inatsiseqarfiusumi piffissani aalajangersimasuni naatsorsuutit, paasissutissat allat aamma kommunip pineqartup oqartussaaffeqarfiilluunniit ataasiakkaat ukiumut aningaasanut inatsiseqarfiusumut tunngatillugu naatsorsuumminnik kingullernik misissuisimanermi naliliinerat pigineqartut tunngavigalugit ukiumi aningaasanut inatsiseqarfiusumi aningaasaliissutissat sinnerlugit atuisoqassanersoq nakkutigissavaat.

  Imm. 2. Kommunip Naalakkersuisulluunniit imm. 1 malillugu aningaasartuutinik nakkutilliinerisigut paasinarsippat kommunip pineqartup imaluunniit Namminersorlutik Oqartussat ukiumut aningaasanut inatsiseqarfiusumut inaarutaasumik naatsorsuutaasa ukiumi aningaasanut inatsiseqarfiusumi aningaasaliissutissat sipporsinnaagaat, taava kommuni pineqartoq Naalakkersuisorluunniit ukiumi aningaasanut inatsiseqarfiusumi aningaasaliissutit sippuisussat naatsorsuutigineqartut matussuserneqarnissaat anguniarlugu iliuuseqartoqarnissaannik aalajangiissapput.

 

§ 26.  Kommunit Naalakkersuisullu tamarmik ukiumi aningaasanut inatsiseqarfiusumi piffissani aalajangersimasuni erseqqinnerusuni § 25, imm. 1 malillugu aningaasartuutinik kingullermik nakkutilliinermi inernerit pillugit aamma § 25, imm. 2 malillugu aalajangiisinnaanerup imarisai erseqqinnerusut pillugit naalakkersuisumut Naalakkersuisut Siulittaasuannit erseqqinnerusumik aalajangersaanikkut immikkut tassunga piginnaatinneqartumut paasissutissanik nalunaaruteqartassapput.

  Imm. 2.  Imm. 1-imi taaneqartutut kommuni nalunaaruteqarsimanngippat Naalakkersuisup Siulittaasuata tassunga piginnaatitsineranut aalajangersakkat erseqqinnerusut malillugit naalakkersuisuutitaq nalunaassaaq kommuni ullut suliffiusut 10-t qaangiutsinnagit nalunaaruteqassasoq. Piffissamut killiliussaq qaangerneqarpat nalunaaruteqartoqarnissaa tikillugu kommuninut ataatsimoortumik tapiissutit tunniunneqartussat 10 procentii uninngatinneqassapput. Nalunaaruteqartoqarpat ataatsimoortumik tapiissutit uninngatinneqartut tunniunneqassapput.

Imm. 3. Paasissutissat tunngavigalugit naalakkersuisoq Naalakkersuisup Siulittaasuata erseqqinnerusumik malittarisassat malillugit tassunga piginnaatitaata ukiumut aningaasanut inatsiseqarfiusumut kommunit Namminersorlutillu Oqartussat aningaasartuutaannut naatsorsuutini kisitsisit kingulliit isertitariumaakkanut sippuissanersut nakkutigissavai. Naalakkersuisoq taanna Naalakkersuisup Siulittaasuata aalajangersakkat erseqqinnerusut malillugit tassunga piginnaatitaa nakkutilliinissamut atugassanik paasissutissanik kommuninut piniarsinnaavoq.

Imm. 4. Imm. 3 naapertorlugu aningaasartuutinik nakkutilliinermi paasineqarpat ukiumi aningaasanut inatsiseqarfiusumi kommunit Namminersorlutilluunniit Oqartussat aningaasartuutaat pillugit inaarutaasumik naatsorsuutit kommunit Namminersorlutilluunniit Oqartussat ukiumi aningaasanut inatsiseqarfiusumi isertitaasa 2,5 procentii sinnerlugit sipporneqarsimasut, kommunalbestyrelsip kommuni sinnerlugu imaluunniit Naalakkersuisut Namminersorlutik Oqartussat sinnerlugit ullut 30-t qaangiutsinnagit aningaasanit tamarmiusunit atorneqarsinnaasut killilissavaat, tassa ukiumi aningaasanut inatsiseqarfiusumi missingersuutit sipporneqarnissaannik naatsorsuutigisap annertoqataanik killilissavaat, taamaattorli imm. 5 takuuk.

  Imm. 5.  Kommunimut tunngatillugu kommunalbestyrelsi imaluunniit Namminersorlutik Oqartussanut tunngatillugu Naalakkersuisut ukiumi aningaasanut inatsiseqarfiusumi naatsorsuutigisatut sippuinerit sapinngisamik matussuserniarlugit allatut iliuuseqarnikkut atorneqarsinnaasunik killiliisoqannginnissaa pillugu aalajangiisinnaavoq imaluunniit atorneqarsinnaasut killilimmik killilerneqarnissaat pillugu aalajangiisinnaavoq.

 

§ 27. Naalakkersuisoq taanna Naalakkersuisut Siulittaasuata aalajangersagai erseqqinnerusut malillugit tamatumunnga piginnaatinneqartoq § 25, imm. 1 aamma § 26, imm. 1-imi taaneqartut malillugit akulikinnerusumik aningaasartuutinik misissueqqusilluni aamma paasisstussanik tunniusseqqusilluni kommunimut peqqusisinnaavoq, matumani kingullermik aningaasartuutinik nakkutilliinermi inernerit kommunimut ukiumoortumik naatsorsuutitigut kisitsisit inaarutaasut isertitassatut naatsorsuutaasunut 2,5 procent sinnerlugu amigartoorfiusinnaanerat takuneqarsinnaassappat.

  Imm. 2. Naalakkersuisoq taanna Naalakkersuisut Siulittaasuata aalajangersagai erseqqinnerusut malillugit tamatumunnga piginnaatinneqartoq § 25, imm. 1 aamma § 26, imm. 1-imi taaneqartut malillugit akulikinnerusumik aningaasartuutinik nakkutilleeqqusilluni aamma paasissutissanik tunniusseqqusilluni peqqusisinnaavoq, matumani aningaasartuutinik nakkutilliinerni tulleriinni 2-ni inernerit kommunip isertitaasa 2,5 procent sinnerlugu inaarutaasumik kisitsisinik qaangiisinnaanerat takuneqarsinnaappat.

Imm. 3. Naalakkersuisoq taanna Naalakkersuisut Siulittaasuata aalajangersagai erseqqinnerusut malillugit tamatumunnga piginnaatinneqartoq, imm. 2-milu pisut malillugit pisariaqartinneqarpat, aningaasartuutinik misissueqqissaartoqarnissaanik kommunimut peqqusisinnaavoq.

 

Aningaasartuutinik nakkutilliinissaq tulliuttoq

 

§ 28. Kommunit tamarmik Naalakkersuisullu ukiumi aningaasanut inatsiseqarfiusumi nutaami kingusinnerpaamik qaammatit pingasut siulliit naaneranni misissussavaat ukiumi aningaasanut inatsiseqarfiusumi kingullermi aningaasartuutit pillugit naatsorsuutit kisitsisitaasa kommunip Namminersorlutilluunniit Oqartussat ukiumi aningaasanut inatsiseqarfiusumi kingullermi isertitaat sipporsimaneraat.

  Imm. 2. Kommune ataaseq imm. 1-imi pineqartoq naapertorlugu nalunaaruteqanngippat Aningaasaqarnermut Naalakkersuisoqarfiup kommune ullunik suliffiusunik qulinik piffissalerlugu nalunaaruteqaqqussavaa. Piffissaliussaq malinneqanngippat kommunip nalunaaruteqarnissaata tungaanut kommunimut tapiissutissat 10 procentii uninngatinneqassapput. Nalunaaruteqartoqarpat tapiissuissat uninngatinneqartut tunniunneqassapput.

 

  § 29.  § 28, imm. 1 malillugu Naalakkersuisut aningaasartuutinik nakkutilliineranni paasinarsippat ukiuni aningaasanut inatsiseqarfiusuni kingullerni 4-ni naatsorsuutinut kisitsisit pigineqartut Namminersorlutik Oqartussat ingerlatsinerannut sanaartortitsinerannullu isertitanit 1 procent sinnerlugu amerliartorfiusunik amigartoorfiusut Naalakkersuisut Aningaasaqarnermut Akileraartarnermullu Ataatsimiititaliaata akuersissuteqareerneratigut ullut 30-t qaangiutsinnagit ukiumut aningaasanut inatsiseqarfiusumut nutaamut Namminersorlutik Oqartussat aningaasaliissutaanni aningaasat amerliartorfiusumik amigartooruteqarfiusut ukiuni aningaasanut inatsiseqarfiusuni 4-ni kingullerni isertitat aqqutigalugit 1 procent sinnerlugu qaangerneqarsimappata minnerpaamik 33,33 procentiinik ikilisaassapput aningaasanillu atorneqartussanik assinganik aalajangiillutik, taamaattoq imm. 2 takuuk. Ukiuni aningaasanut inatsiseqarfiusuni 4-ni siuliini amerliartorfiusunik amigartoorutaasut sinneruttut ukiup aningaasanut inatsiseqarfiusup nutaap kingornagut ukiuni aningaasanut inatsiseqarfiusuni 3-ni Namminersorlutik Oqartussat aningaasaliissutaannik ikilisaassapput.

Imm. 2. Naalakkersuisut Aningaasaqarnermut Akileraartarnermullu Ataatsimiititaliap akuersissuteqareerneratigut, ukiunilu 4-ni aningaasanut inatsiseqarfiusuni siuliini ingerlatsinermut sanaartortitsinernullu amerliartorfiusumik amigartoorutaasut iliuutsit allat aqqutigalugit akuerineqarsimappata, ukiumut aningaasanut inatsiseqarfiusumut nutaamut ukiunilu aningaasanut inatsiseqarfiusuni tulliuttuni Namminersorlutik Oqartussat aningaasaliissutaannik ilanngaasoqarnissaanik imaluunniit taakkuninnga killilimmik ilanngaasoqarnissaanik aalajangiisinnaapput.   Oqaaseqatigiinni siullerni pisut pineqartut pippata Naalakkersuisut taamatuttaaq atorneqarsinnaasunik killiliisinnaapput.

 

§ 30. Naalakkersuisoq taanna Naalakkersuisut Siulittaasuata aalajangersagai erseqqinnerusunut malillugit tamatumunnga piginnaatinneqartoq kommunip ukiuni siuliini 4-ni naatsorsuutai isertitaniit 2,5 procent sinnerlugu amerliartorfiusumik amigartoorfiusut paasineqarpat ukiumi tapiissuteqarfiusumi Namminersorlutik Oqartussat kommuninut ataatsimoortumik tapiissutaanik ilanngaassaaq.  Ukiuni aningaasanut inatsiseqarfiusuni pineqartuni isertitat 2,5 procent qaangerlugu amigartoorfiusimappata ukiumi aningaasanut inatsiseqarfiusumi siullermi aningaasat 40 procentiinik ilanngaasoqassaaq. Ukiuni aningaasanut inatsiseqarfiusuni pineqartuni isertitat 2,5 procent qaangerlugu amigartoorfiusimappata ukiuni aningaasanut inatsiseqarfiusuni tulliuttuni 3-ni aningaasat 20 procentiinik ilanngaasoqassaaq.

  Imm. 2. Ukiumi aningaasanut inatsiseqarfiusumi siullermi ilanngaanernut ukiumi tapiissuteqarfiusumi qaammatini juulimi, aggustimi, septembarimi, oktobarimi, novembarimi aamma decembarimi assigiimmik ilanngaanermut akiliisoqassaaq. Ukiuni aningaasanut inatsiseqarfiusuni tulliuttuni ukiup ingerlanerani qaammatit 12-k assigiimmik ilanngaanermut akiliisoqassaaq.

  Imm. 3. Naalakkersuisut imm. 1 naapertorlugu appaassutigineqartunik naatsorsuinissamut akilersuinissamullu erseqqinnerusumik malittarisassaliorsinnaapput, tassunga ilanngullugu naatsorsuusiornermut aamma missingersuutit naatsorsuutillu imminnut sanillersuunneranni aaqqitassat pisaria­qartut pillugit immikkut ittumik kukkunersiuinermi uppernarsaatinik pissarsiniarsinnaallutik.

 

Ilisimatitsinerit

 

  § 31. Aningaasartuutinik Namminersorlutik Oqartussat kommunillu nakkutilliineranni inerniliussat pingaarnerit pillugit Naalakkersuisut kingusinnerpaamik 1. september aamma 1. december Inatsisartut Aningaasaqarnermut Akileraartarnermullu Ataatsimiititaliaanut kiisalu Kukkunersiuinermut Ataatsimiititaliamut ilisimatitsisassapput, tamannalu pillugu paasissutissanik Namminersorlutik Oqartussat internetimi nittartagaatigut tamanut saqqummiussillutik. Ilisimatitsissut ilaatigut §§ 14-17-imi aningaasaliissutini taaneqartuni atuinermut tunngasunik immikkut killiffimmik imaqassaaq suliniutinullu nutaanut, neriorsuutinut il.il., suliniutinut aallartereersunut, neriorsuutinut il.il. aamma suliniutinut naammassisanut imaluunniit unitsiinnakkanut, neriorsuutinut il.il. agguataarlugit.

  Imm. 2. Naalakkersuisut qaammatit arfinilikkaarlugit Namminersorlutik Oqartussat nittartagaat atorlugu pisortat akiitsuisa tamarmiusut takussutissartaat tamanut saqqummiuttassavaat.

 

§ 32.  Kalaallit Nunaata aningaasaqarnera pillugu ukiumoortumik nalunaarusiaq, tassunga ilanngullugu pisortat aningaasartuutaasa isertitaasalu ineriartornerat Naalakkersuisut Inatsisartut upernaakkut ataatsimiinneranni saqqummiuttassavaat. Ukiumoortumik nalunaarusiap imarissavai qitiusumik aningaasartuuteqarfiusartuni isertitaqarfiusartunilu ataatsimi arlalinniluunniit aningaasaqarnikkut suliassanillu ingerlatsinerup misissuiffigeqqissaarneqarsimanerat.

  Imm. 2. Aningaasanut inatsit ukiumi aningaasanut inatsiseqarfiusumi akuersissutigineqarpat nalunaarusiaq imm. 1-imi pineqartoq Naalakkersuisut saqqummiutinngitsoorsinnaavaat.

  Imm. 3.  Inatsisartunut qinersinerup malitsigisaanik upernaakkut ataatsimiittoqanngippat, imm. 1-imi taaneqartoq nalunaarusiaq, Kalaallit Nunaanni maannakkut aningaasaqarnikkut inissisimaneq pillugu Inatsisartunut allakkatigut ilisimatitsissuteqarnermik, taarserniarlugu Naalakkersuisut aalajangersinnaapput.

 

Aqutsinermi piginnaatitsissut

 

  § 33. Naalakkersuisut aningaasartuutinik nakkutilliisarneq pillugu erseqqinnerusumik malittarisassaliorsinnaapput.

Imm. 2. Naalakkersuisut kommunit Namminersorlutillu Oqartussat taarsigassarsianut allatullu akiitsunut pisussaaffinnut naatsorsuutaat pillugit malittarisassanik erseqqinnerusunik aalajangersaasinnaapput, soorlu pisussaaffinngoratarsinnaasunut, attartortitsinissamut isumaqatigiissutit, pisortat namminersortullu suleqatigiinneri il.il. aamma tamakku pillugit aningaasaqarnermut naalakkersuisoqarfimmut nalunaaruteqartarnerit. Naalakkersuisut tassunga atatillugu naalakkersuisup taassuma Naalakkersuisut Siulittaasuata aalajangersagai erseqqinnerusut malillugit tamatumunnga piginnaatinneqartup nakkutilliinissamut atugassanik paasissutissanik kommuninut piniarsinnaaneranik aalajangersaasinnaapput.

 

Kapitali 6

Naatsorsuutit

 

Missingersuusiornermut Naatsorsuusiornermullu Siunnersuisoqatigiit

 

  § 34.  Namminersorlutik Oqartussat naatsorsuuserinermut pisortaat aallartitaq Naalakkersuisunit toqqarneqartoq aamma aallartitat kommuninit toqqarneqartut peqatigalugit Missingersuusiornermut Naatsorsuuserinermullu Siunnersuisoqatigiinni ilaasortaavoq. Siunnersuisoqatigiit missingersuutinut naatsorsuutinullu tunngasuni pisortat ataatsimut soqutigisaannut tunngatillugu apeqqutini Naalakkersuisunut siunnersuisassapput.

  Imm. 2. Sinniisuutitaq Naalakkersuisunit toqqagaasoq siunnersuisoqatigiinni siulittaasuussaaq, soorlu Naalakkersuisut siunnersuisoqatigiinnut allattaanermik isumaginnittuussasut.

  Imm. 3. Naalakkersuisut Missingersuusiornermut Naatsorsuusiornermullu Siunnersuisoqatigiinnut tunngatillugu erseqqinnerusumik malittarisassaliorsinnaapput, tassunga ilanngullugu siunnersuisoqatigiit suleriaasissaat aalajangersaaffigisinnaavaat.

 

Namminersorlutik Oqartussat naatsorsuutaat

 

§ 35. Naalakkersuisut ukiumut aningaasanut inatsiseqarfiusumut kingullermut tunngatillugu Nu­natta Karsiata naatsorsuutai kukkunersiuisut allattugaat ilanngullugit kingusinnerpaamik Inatsisartut ukiakkut ataatsimiinneranni saqqummiuttassavaat.

Imm. 2.  Nunatta Karsiat naatsorsuutaasa sananeqarnermikkut ukioq aningaasanut inatsiseqarfiusoq aamma ilassutitut aningaasanut inatsiseqarfiusoq malissavaat, imarissavaalu ukiumi aningaasa­nut inatsiseqarfiusumi kingullermi Nunatta Karsiata isertitai aningaasartuutaalu tamarmiusut kiisalu Nunatta Karsiata pigisai nalillit akiligassaalu aamma ukiup ingerlanerani atuisimanerit.

 

  § 36.  Naalakkersuisut Namminersorlutik Oqartussat naatsorsuuseriveqarnerat pillugu malitarisas­saliorsinnaapput. Naalakkersuisut malittarisassaliornerminni naatsorsuuseriveqarnerup iluani isu­mannaatsuunissap torersumillu ingerlatsinissap eqqarsaatigineqarnerisa saniatigut paasissutissanik aningaasaqarnermik pilersaarusiornermut, aqutsinermut nakkutilliinermullu atorneqartussanik pissarsisinnaaneq eqqarsaatigissavaat.

 

§ 37. Namminersorlutik Oqartussani naalakkersuisoqarfiit, aqutsisoqarfiit suliffeqarfiillu il. il. § 1-imi pineqartut paasissutissanik Naalakkersuisunut nalunaaruteqartassapput aamma naatsorsuinermi atortut Naalakkersuisut Nunatta Karsiata naatsorsuutaanik saqqummiussinissamut pisariaqartitaat pissarsiarisassavaat.

 

§ 38.  Nunatta Karsiata ukiumoortumik naatsorsuutaanik kukkunersiuisarneq kukkunersiuisunit naalagaaffimmit akuerisaasunit Inatsisartut toqqagaannit isumagineqartassaaq.

 

§ 39.  Nunatta Karsiata naatsorsuutai pisortat kukkunersiuinermi ileqqorissaarnissaat naapertorlu­gu kukkunersiuisut kukkunersiortassavaat aamma Nunatta Karsiata naatsorsuinermi atortui isornartorsiuisumik misissortassavaat. Kukkunersiuisut ilaatigut naatsorsuutit eqqortuunersut misissortassavaat, aamma pissutsit naatsorsuutinik saqqummiussinermi pineqartut aningaasaliissutinut, inatsisinut najoqqutassanullu allanut kiisalu isumaqatigiissutigisanut aamma suleriaatsinut nalinginnaasunut naapertuunnersut misissortassavaat.

Imm. 2.  Kukkunersiuisoq Inatsisartut kukkunersiuinermut tunngatillugu piumasaqaataanik malinnissaaq, piumasaqaatit inatsimmut aamma pisortat kukkunersiuinermi ileqqorissaarnissaannut akerliunngippata.

 

§ 40.  Naalakkersuisut paasissutissanik suugaluartunik naatsorsuutit naliliiffiginissaannut pisariaqartinneqartunik kukkunersiuisunut nalunaaruteqassapput, takuuk Inatsisartut Naalakkersuisullu pillugit Inatsisartut inatsisaanni § 18 aamma § 19.

 

Kommunit naatsorsuutinik nalunaarsuisarnerat naatsorsuutaallu

 

§ 41. Kommunip naatsorsuutaani nalunaarsorneqassapput kommunip aningaasaatai qanoq aqun­neqarsimanersut aammalu aqunneqarnerat ukiumoortumik aningaasanut missingersuusianut kom­munalbestyrelsillu aalajangiinerinut allanut naapertuuttuunersut.

Imm. 2.  Kommunip aningaasaatai isumannaatsumik paarineqassapput. Aningaasat ullormut atorneqartussatut tigoriaannaatinneqanngitsut aningaaserivimmut ikineqassapput imaluunniit obligationinut aningaasaliinermiluunniit uppernarsaatinut inissinneqassallutik aningaasaateqarfiit aningaa­saataannik inissiiffigineqarsinnaasunut.

 

§ 42. Kommunip naatsorsuutai aningaasaqarnermut ataatsimiititaliamit kommunalbestyrelsimut saqqummiunneqassapput. Naatsorsuutinut ilaatinneqassapput:

1) kukkunersiuisumit nassuiaatit,

2) kommunip qularnaveeqqusiinerinut, attartornerinut, attartortitsinerinut aamma qularnaveeqqusiissuteqarnermi pisussaaffiinut nalunaarsuutit,

3) pisariaqartitsineq naapertorlugu pissutsit qanoq ittuunerannut nassuiaatit, minnerunngitsumik aningaasaliissutaasut naatsorsuutaasullu malunnaatilimmik nikingassuteqarneranni, aamma

4)  kommunip aningaasaliiffigisassatut pilersaarutaanut, ukiunut arlalinnut missingersuusiaanut il. il. tunngatillugit pissutaasunut nassuiaatit.

Imm. 2. Kommunalbestyrelsip naatsorsuutinut nassuiaatit isummerfigissavai aamma naatsorsuutini immikkuualuttut malitseqartinneqassanersut isummerfigissallugit, tamatumalu kingorna naatsorsuutit kommunalbestyrelsip kukkunersiuisunut Naalakkersuisunullu ingerlatissavai.

Imm. 3.  Naalakkersuisut naatsorsuutit saqqummiunneqarnissaat pillugu malittarisassaliussapput.

 

  § 42 a. Kommunip kingusinnerpaamik ukiumi naatsorsuiffiusumi 2023-mi atuutilertussamik kommunip pissarsiassai akilerneqanngitsut isumakkeerfiginerisigut nammineq aningaasaatimi aaqqiiviginissaanut Naalakkersuisut akuersissuteqarsinnaapput. Pissarsiassat nalikilliliiffissamit ukiunik marlunnik sivikinnerusumik akilerneqartussaasimasut akuersissummi ilaatinneqarsinnaanngillat. Taamatut akuersissuteqarnissamut atugassarititaasunik piumasaqaatinillu erseqqinnerusunik Naalakkersuisut aalajangiisinnaapput, tassungalu ilanngullugu akiligassat qanoq ittut akuersissummut ilaatinneqarsinnaanerat aalajangersinnaallugu.

 

§ 43. Aningaasaqarnermut Ataatsimiititaliaq ingerlatsivinnit aningaasaqarnermut ataatsimiititaliap toqqaannartumik ataaniinngitsunit akissuteqaatinik piumasaqassaaq. Akissuteqaatit Aningaasaqarnermut Ataatsimiititaliap kommunalbestyrelsimut inassuteqaataani ataatsimoortuni ilaatinneqassapput. Kommunalbestyrelsi ukiumoortumik naatsorsuutinut oqaatigisassat nassiunneqartut akineqarnissaannik, ukiumoortumillu naatsorsuutit akuerineqarnissaannik ukiup naatsorsuusiorfiusup qaangiunnerani ukiumi kingusinnerpaamik ulloq 15. september aalajangiissaaq.

Imm. 2. Kommunalbestyrelsi aalajangeereerpat, tak. imm.1, aalajangiussaq kukkunersiuisut oqaaseqaataat ilanngullugit Naalakkersuisunut nassiunneqassapput.

Imm. 3.  Ukiumoortumik naatsorsuutit inaarutaasumik akuerineqarnerannit kingusinnerpaamik ullut 14-it qaangiunneranni kukkunersiuisut allattugaat ilanngullugit kommunip nittartagaani tamanit takuneqarsinnaanngussapput.

  Imm. 4. Imm. 1-imi killiliussaq naammassineqarsinnaanngippat Aningaasaqarnermut ataatsimiititaliap siulittaasua, taassumaluunniit sinniisua tamanna pillugu ukiup naatsorsuusiorfiusup kingorna kingusinnerpaamik ulloq 15. august Naalakkersuisunut nalunaaruteqassaaq. Naalakkersuisunut ilaasortaq, Naalakkersuisut siulittaasuata erseqqinnerusumik aalajangiinerata kingorna tassunga akisussaasuusoq, pisut malillugit ukiumoortumik naatsorsuutit akuerineqarnissaannut piffissaliussamik qaammatit marluk angullugit kinguartitsisinnaavoq. Piffissaq kinguartitsiffiusoq qaangerneqarpat, § 47, imm. 1-imi aalajangersakkat atuutissapput.

 

  § 44. Kommunit tamarmik akuerisaasunik kukkunersiuisoqassapput kukkunersiuisunut inatsit sukkulluunniit atuuttoq tunngavigalugu. Kukkunersiuineq Naalakkersuisunit akuerineqassaaq. Kommunalbestyrelsip kukkunersiuisoq akuerisaasoq asoortissappagu Naalakkersuisut akuersiteqqaartinneqassapput.

Imm. 2. Kommunip naatsorsuutai pisortat kukkunersiuinermi ileqqorissaarnissaat naapertorlugu kukkunersiuisut kukkunersiortassavaat aamma kommunip naatsorsuinermi atortui isornartorsiuisu­mik misissortassavaat.

Imm. 3.  Kukkunersiuisut sukkulluunniit nalunaaruteqaqqaaratik karsimik misissuisinnaatitaapput akuttunngitsunillu kommunip naatsorsuutaanik misissuisassallutik, tassungalu atatillugu nakkutilliinermi iliuusissatut akuerisaasut, taakkununnga ilanngullugit qarasaasiat atornissaannut najoqqutassiat toqqissisimanartuunersut misissorneqarnissaat siuunertaralugu.

Imm. 4. Kommunalbestyrelsi paasissutissanik pissarsinissamut paasissutissanillu kukkunersiuisut ingerlatsinerminni pisariaqartitaannik tunniussinissamut pisussaavoq.

Imm. 5 Imm. 3 naapertorlugu kukkunersiuisut suliaqarnerannut atatillugu § 43, imm. 1 aamma 2 kukkunersiuisut nalunaarutaannut atorneqarsinnaapput.

 

§ 45.  Kommunalbestyrelse kommunip karsiata naatsorsuuseriviatalu aaqqissuussaanerannut suleriaaseqarnerannullu tunngatillugit malittarisassaliussaaq. Malittarisassaq kommunip kukkunersiuisuinut nassiunneqassaaq, taakkualu allannguutinik atulersitsinnginnermi tamatigut ilisimatinneqartassapput.

Imm. 2. Kommunip karsiata naatsorsuuseriveqarneratalu aqunneqarnissaannut, kontulersuisarnissamut, kukkunersiuisarnissamut aamma kukkunersiuisut oqaaseqaateqartarnissaannut Naalakkersuisut malittarisassaliorsinnaapput.

 

Kapitali 7

Aningaasaqarnermut Siunnersuisoqatigiit

 

  § 46. Naalakkersuisut Aningaasaqarnermut Siunnersuisoqatigiit akit nikerarnerannik aningaasaqarnermillu ingerlatsinerup attanneqarsinnaaneranik nalilersuisussat pilersissavaat. Aamma Naalakkersuisut siunnersuisoqatigiit qinnuigisinnaavaat inuiaqatigiit aningaasaqarnerannut pingaarutilinnik allatigut siunnersoqqullutik.

  Imm. 2. Aningaasaqarnermut Siunnersuisoqatigiit katitigaanerat, piffissaq atuuffissaat il.il. nalunaarutikkut aalajangersarneqassapput.

  Imm. 3.  Aningaasaqarnermut Siunnersuisoqatigiit allattoqarnerat aningaasaqarnermut naalakkersuisoqarfimmit isumagineqarpoq.

  Imm. 4. Naalakkersuisut Aningaasaqarnermut Siunnersuisoqatigiit suleriaasissaat aalajangersarsinnaavaat.

 

Kapitali 7 a

Pisortani ataatsimoorussaq IT pillugu suleqatigiinneq

 

  § 46 a.  Naalakkersuisut Pisortat ataatsimoorlutik qarasaasianik ingerlatsinerannut siulersuisut inassuteqareernerisigut, aamma kommunit tusarniarneqareernerisigut, alajangersinnaavaat:

1) qarasaasiat sorliit pisortani ataatsimoorussatut isigineqassanersut, aamma

2) kommunit aamma Namminersorlutik Oqartussat pisortat ataatsimoorlutik qarasaasiat sorliit atussaneraat, tassungalu ilanngullugu pisussaaffik kommuninut tamanut aammalu Namminersorlutik Oqartussanut imaluunniit taakku ilaannaannut atuutissanersoq.

Imm. 2. Naalakkersuisut kommunit Namminersorlutik Oqartussallu peqatigalugit pisortat qarasaasianik ataatsimoorlutik pisaarnissamut, ingerlatsinermut ineriartortitsinermullu aaqqissuussaanermik pilersitsinissaat pillugu malittarisassanik aalajangiisinnaapput. Naalakkersuisut matuma ataani, aaqqissuussaaneq qanoq aqunneqassanersoq, alajangiinermi tunngaviit suut malillugit pisortani qarasaasiat ataatsimoorussatut isigineqassanersut, aaqqissuussaanerup aningaasartuutai kommunit Namminersorlutillu Oqartussat akornanni qanoq agguarneqassanersut, aaqqissuussaaneq kommunit aamma Namminersorlutik Oqartussat avataanni allanut sullissilluni suliaqarsinnaanersoq il. il. malittarisassanik aalajangiisinnaapput.

 

Kapitali 8

Pineqaatissiissutaasinnaasut

 

  § 47. Inatsit manna malillugu pisussaaffigisanik kommunalbestyrelsi isumaginnikkusunngippat Nakkutilliisoqarfik kommunalbestyrelsimi ilaasortanut pisussaaffimmik isumaginnikkusunngitsunut pinngitsaaliissummik akileeqqusilluni peqqusisinnaavoq.

  Imm. 2. Kommunalbestyrelsimut ilaasortaq kommunalbestyrelsimi ilaasortatut pisussaaffimminik sakkortuumik unioqqutitsisoq akiliisinneqartussanngortinneqarsinnaavoq.

  Imm. 3. Assuarliut imm. 2 naapertorlugu pisoq taamaallaat Nakkutilliisoqarfiup piumasaqarneratigut pisinnaavoq.

 

Kapitali 9

Atuutilersinneqarnera ikaarsaariarnermilu aalajangersakkat

 

  § 48. Inatsisartut inatsisaat 1. januar 2018 atuutilissaaq, taamaattoq takuuk imm. 2-4.

Imm. 2. §§ 14 aamma 17-ip atuutilerfissaannut piffissaq nalunaarut aqqutigalugu Naalakkersuisunit aalajangersarneqassaaq.

Imm. 3. § 18 1. december 2016 atuutilissaaq.

  Imm. 4. § 26, imm. 3-5, aamma §§ 27-30 ulloq 1. januar 2019 atuutilissapput.

  Imm. 5. Ulloq 31. december 2017 Namminersornerullutik Oqartussat naatsorsuuseriveqarnerat il. il. pillugit Inatsisartut inatsisaat nr. 23, 3. november 1994-imeersoq, Namminersornerullutik Oqartussat missingersuutaat pillugit  Inatsisartut inatsisaat nr. 8, 29. oktober 1999-imeersoq §§ 21-24 kisiisa pinnagit, Namminersornerullutik Oqartussat missingersuutaat pillugit Inatsisartut inatsisaata nr. 8, 29. oktober 1999-imeersup allanngortinneqarneranik Inatsisartut inatsisaat nr. 1, 23. maj 2000-imeersoq kiisalu Kommunit aqunneqarnerat pillugu Inatsisartut inatsisaat nr. 22, 18. november 2010-meersumi §§ 40-50 atorunnaarsinneqassapput.

Imm. 6. Inatsisitigut aalajangersakkat imm. 5-mi inatsisit aalajangersakkallu taaneqartut malillugit atortussanngortinneqarsimasut atuutiinnassapput inatsisitigut aalajangersakkanik Inatsisartut inatsisaat manna malillugu atortussanngortinneqartunik taarserneqarnissaat tikillugu.

 

Inatsisartut inatsisaat nr. 24, 28. november 2018-imeersoq (Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfimmut isertitassanut tunngavissat annertusineqarnerat, innersuussutip naqqiissuteqarfigineqarnera, pisortat ataatsimoorussamik IT atorlugu aaqqissuussinerat aamma missingersuutit oqimaaqatigiinnerat pillugu §§ 2-5-imik atorunnaarsitsigallartarneq )^[1] ima atulernissamut aalajangersagaqarpoq:

 

§ 2

 

Inatsisartut inatsisaat ulloq 1. januar 2019 atuutilerpoq.

Inatsisartut inatsisaat nr. 13, 1. december 2021-meersoq (Missingersuutit inissisimanerannik naatsorsueriaatsimik allannguineq, nammineq aningaasaatinik naleqqussaanissamut ataasiaannartumik akuersissut aamma pisortat ataatsimoorlutik qarasaasiaat pillugit malittarisassanik erseqqissaaneq ) ^[2] ima atulernissamut aalajangersagaqarpoq:

 

§ 2

 

Inatsisartut inatsisaat ulloq 1. januar 2022 atuutilissaaq, inatsisillu atuutilerneranit ukiumoortumik missingersuutinut aningaasanullu inatsisinut akuersissutigineqartunut atuulluni.

  Imm. 2. Inatsisip atortuulersinneqarnerani Namminersornerullutik Oqartussat missingersuutaat pillugit Inatsisartut inatsisaat nr. 8, 29. oktober 1999-imeersumi §§ 21-24 atorunnaarsinneqassapput.

  Imm. 3.  2023-mut § 2, imm. 2, nr. 2-mi naatsorsuutit killiffii taaneqartut, Inatsisartut inatsisaanni § 1, nr. 1-imi matumani oqaasertaliorneqartutut ukiut aningaasanut inatsiseqarfiit sisamani tulliuttuni kommuninut tamanut aamma Namminersorlutik Oqartussanut, kommunit ukiumoortumik missingersuutaat aamma Namminersorlutik qartussat 2021-mut Aningaasaqarnermut inatsisaat ilassutitullu aningaasaliissutit 1. januar 2022 sioqqullugu akuerineqarsimasut tunngavigalugit, ukiumoortumik missingersuutit maluunniit aningaasanut inatsit akuerineqarsimasut 1,50 procentimik ilassuserlugu killigititat aalajangerneqassapput. Naalakkersuisoq taanna Naalakkersuisut Siulittaasuata erseqqinnerusumik aalajangiineratigut tamatumunnga piginnaatinneqartoq, 2022-mi apriilip naannginnerani naatsorsuutinik suliaqassaaq.

  Imm. 4. Naatsorsuutinut § 4, imm. 1-imi taaneqartunut taamaallaat ilaapput ukiut aningaasanut inatsiseqarfiusut Inatsisartut inatsisaata atuutilernerata kingorna naammassineqartut, 2023-milu februaarip naannginnerani siullermik suliarineqartut.

Inatsisartut inatsisaat nr. 63, 20. november 2023-meersoq (Teknikikkut naleqqussaatit, Kommunit immikkoortunut pilersaarutaat kiisalu Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfimmut nuutsisarneq) ^[3] ima atulernissamut aalajangersagaqarpoq:

 

§ 2

 

Inatsisartut inatsisaat ulloq 1. januar 2024 atuutilissaaq.

 

 

 

Aningaasaqarnermut Akileraartarnermullu Naalakkersuisoqarfik , ulloq 1. december 2025

 

 

 

Nikolai Sten Christensen (atsior.)

Pisortaq

 

 

 

/Morten W. Selvejer (atsior.)