§ 1

Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaanni nr. 26, 28. november 2016-imeersumi makkua allanngortinneqarput:

1.  § 18, imm. 3 aamma 4, imatut oqaasertalerneqarput:

” Imm. 3.  Aningaasaateqarfimmut akiliutit nuunneqartassapput immikkut ittumik isertitanit ukunannga:
1)  Ingerlatseqatigiiffiit nunanit allaneersut aatsitassarsiornermi misissuinerannut sanaartornerannullu atatillugu ingerlatseqatigiiffiup akileraarutaanit 30 mio. kr.-nik amerlanerusunit Nunatta Karsiata iluanaarutaanit pissarsiat,
2)  Aningaasarsianit akileraarutit pillugit Inatsisartut Inatsisaanni § 72 a aamma § 72 b naapertorlugit akileraarutit A-t. 
3)  Namminersorlutik Oqartussat pigisaannik 50 mio. kr.-t sinnerlugit nalilinnik tunisaqarnermit iluanaarutit.
4)  Soraarnerussutisiassanik imaluunniit inuunermut sillimmasiisimanernik Danmarkimi, Savalimmiuni nunaniluunniit allani soraarnerussutisiassanut aningaasaateqarfinnut nuussinernit imaluunniit inuunermik imaluunniit soraarnerussutiassanut sillimmasiisarfimmit Kalaallit Nunaanni najugaqartumit akileraarutinit akitsuutinillu iluanaarutit.
5)  Ingerlatsineq, sanaartorneq aamma taarsigassarsititsineq pillugit nunap karsiata naatsorsuutaanni sinneqartoorutit.

  Imm. 4.  Iluanaarutit imm. 3, nr. 1-4-imi taaneqartut, tiguneqarnerisa kingorna piaartumik aningaasaateqarfimmut nuunneqassapput. Sinneqartoorutit imm. 3. nr. 5-imi taaneqartut, Inatsisartut nunap karsiani naatsorsuutinik akuersissuteqareernerisa kingorna piaartumik aningaasaateqarfimmut nuunneqassapput.”

2.  § 23, imm. 1, imatut oqaasertalerneqarput:

”  § 23.  Ukiumoortumik missingersuutini naatsorsuutit kommunalbestyrelsip ukiumoortumik naatsorsuutinik akuersissuteqarnermini aningaasaliissuteqarfissanut tunngatillugit isummerfigisai § 21, imm. 4 naapertorlugu kommunip ingerlatsineranut pisussaaffiliipput.”

3.  § 32-imi imm. 3-tut ilanngunneqarpoq:

”  Imm. 3.  Inatsisartunut qinersinerup malitsigisaanik upernaakkut ataatsimiittoqanngippat, imm. 1-imi taaneqartoq nalunaarusiaq, Kalaallit Nunaanni maannakkut aningaasaqarnikkut inissisimaneq pillugu Inatsisartunut allakkatigut ilisimatitsissuteqarnermik, taarserniarlugu Naalakkersuisut aalajangersinnaapput.”

4. § 46 kingorna kapitalitut ilanngunneqarpoq:

” Kapitali 7 a

Pisortani ataatsimoorussaq IT pillugu suleqatigiinneq”

5.  § 46-ip kingorna kapitali 7 a-mi ilanngunneqarpoq:

”  § 46 a.  Naalakkersuisut makkua pillugit maleruagassanik aalajangersaasinnaapput:

1) Kommunit aamma Namminersorlutik Oqartussat ataatsimoorlutik IT atorlugu periaatsimik pisortani ataatsimoorussamik pissarsinissamut, ingerlatsinermut ineriartortitsinermullu aaqqissuussaanermik pilersitsissasut. Naalakkersuisut tassunga ilanngullugu aaqqissuussaaneq qanoq siulersorneqassanersoq, IT atorlugu periaatsit pisortani ataatsimoorussatut isigineqartariaqarnerannut tunngavissarititaasut suussanersut, aaqqissuussaanermi aningaasartuutit kommunit aamma Namminersorlutik Oqartussat akornanni agguarneqassanersut, aaqqissuussaanermi kommunit aamma namminersorlutik Oqartussat saniatigut allat sullillugit suliassanik suliaqartoqarsinnaanersoq il.il., maleruagassanik aalajangersaasinnaapput.

2) Naalakkersuisut aammattaaq aalajangersinnaavaat, kommunit aamma Namminersorlutik Oqartussat IT atorlugu periaatsit pisortani ataatsimoorussat suut atussaneraat. ”

  Imm. 2.  Naalakkersuisut kommunit aamma Namminersorlutik Oqartussat erseqqinnerusumik aalajangikkatut annertussusilimmik paasissutissanut nalunaarsukkanut akisussaaffik aaqqissuussaanernut imm. 1-imi taaneqartunut suliakkiunneqassasoq, Naalakkersuisut aalajangersinnaavaat.”

6. § 49-ip kingorna § 50-itut ilanngunneqarpoq:

”  § 50.  §§ 2-5-imi aalajangersakkat piffissami 1. januar 2019 - 31. december 2021 atuutissanngillat, taamaattoq takuuk imm. 2.

  Imm. 2.  Naalakkersuisut nalunaarummi piffissaq atorunnaarsitsiviusussaq imm. 1-imiittoq sivikillisissinnaavaat.”

§ 2

Inatsisartut inatsisaat ulloq 1. januar 2019 atuutilerpoq.

Namminersorlutik Oqartussat, ulloq 28. november 2018