§ 1

Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaanni nr. 26, 28. november 2016-imeersumi, Inatsisartut inatsisaanni nr. 24, 28. november 2018-imi aamma Inatsisartut inatsisaanni nr. 13, 1. December 2021-mi allanngortinneqartumi, tulliuttut allannguutigineqarput:

1. § 2, imm. 3, uniffiit aappaattut ikkunneqassaaq:

”  Uniffik siulleq malillugu akuersinermi, taarsigassarsiat § 6 malillugu akuerineqartillugit, aningaasallu aningaasaliinissanut akuerineqartunik aningaasalersuinermut atorneqartillugit aamma taarsigassarsianut, taarsigassarsianik pilersitsinermi akiliutinut aningaasartuutinut, naqitsinermi akiliummut, akiliinermut, akiliutinut ernianullu tunngasunik aningaasartuutit ilaapput.”

2. § 2-mi imm. 8 aamma 9 ikkunneqassapput:
”  Imm. 8.  Imm. 2, nr. 1-imi taaneqartutut missingersuutit inissisimanerannik naatsorsuinermi, tunissutit, tapiissutit, ikiorsiissutit assigisaallu aningaasaateqarfinnit, ingerlatsivinnit, kattuffinnit, suliffeqarfinnit naalagaaffiillu suliniaqatigiiffiinit inuinnarnillu tiguneqartut, tunissutit, tapiissutit il.il. kommunip namminersorlutilluunniit oqartussat aalajangersimasunik pisinissamut, aalajangersimasunik sanaartornissamut allanilluunniit suliassanut atugassaattut tiguneqartut isiginiarneqartassanngillat.

  Imm. 9.  Imm. 2, nr. 2-mi oqaatigineqartutut missingersuutit inissisimanerannik naatsorsuinermi aningaasartuutit siunertanut imm. 8-mi taaneqartunut, aningaasartuutit aningaasanik tunissutitut, tapiissutitut il.il. tiguneqartunit annertunerutinnagit ilanngunneqartassanngillat. “

3. § 4-mi imm. 2-p kingorna ilanngunneqarpoq:

” Imm. 3.  Inatsisartut inatsisaatigut imaluunniit Inatsisartut inatsisaata allanngortinneratigut, Inatsisartut inatsisaanni imaluunniit Inatsisartut peqqussutaani aningaasartuutini, utertussat kingorna, Inatsisartut kommuninut katillugit 5 mio. kr.-t sinnerlugit aningaasartuuteqarnerulersitsippata, aningaasartuutaanerusussatut ilimagineqartut Namminersorlutik Oqartussat missingersuutaasa inissisimanerinik naatsorsuinermi ilanngullugit naatsorsorneqassapput, tak. imm. 1 aamma 2.”

4. § 12, imm. 1, uniffiit aappaat, ima oqaasertalerneqassaaq:

”  Oqaasertaliussat nalinginnaasumik taamaallaat aningaasaliinermi aqutsinermut ilapittuutaassapput.”

5. § 18, imm. 4, ima oqaasertalerneqassaaq:

”  Imm. 4. Iluanaarutit imm. 3, nr. 1-4-ami taaneqartut tiguneqarnerminnit piaarnerpaamik aningaasaateqarfimmut ikineqartassapput. Sinneqartoorutit imm. 3, nr. 5-imi taaneqartut Inatsisartut nunatta karsiata naatsorsuutaanik akuersinerata kingorna ukiup aningaasanik inatsiseqarfiup naanerani ukiut sisamaanni ukiunilu aningaasanut inatsiseqarfiusuni akunnermiliuttuni amigartoorutaasinnaasut ilanngaatigineqareernerini piaarnerpaamik aningaasaateqarfimmut nuunneqartassapput.”

6. § 20-mi imm. 6 ikkunneqassaaq:

”  Imm. 6.  Naalakkersuisut kommunit immikkoortunut pilersaarutinik suliaqartarnerannut malittarisassanik, immikkoortuni ataasiakkaani periusissanik sukkulluunniit atuuttunik takutitsisunik malittarisassarsiorsinnaapput.”

7. § 43, imm. 1, uniffiit pingajuat ima oqaasertalerneqassaaq:

” Kommunalbestyrelsi ukiumoortumik naatsorsuutinut oqaatigisassat nassiunneqartut akineqarnissaannik, ukiumoortumillu naatsorsuutit akuerineqarnissaannik ukiup naatsorsuusiorfiusup qaangiunnerani ukiumi kingusinnerpaamik ulloq 15. september aalajangiissaaq.”

8.  § 43-mi imm. 4-atut ikkunneqassaaq:

”  Imm. 4.  Imm. 1-imi killiliussaq naammassineqarsinnaanngippat Aningaasaqarnermut ataatsimiititaliap siulittaasua, taassumaluunniit sinniisua tamanna pillugu ukiup naatsorsuusiorfiusup kingorna kingusinnerpaamik ulloq 15. august Naalakkersuisunut nalunaaruteqassaaq. Naalakkersuisunut ilaasortaq, Naalakkersuisut siulittaasuata erseqqinnerusumik aalajangiinerata kingorna tassunga akisussaasuusoq, pisut malillugit ukiumoortumik naatsorsuutit akuerineqarnissaannut piffissaliussamik qaammatit marluk angullugit kinguartitsisinnaavoq. Piffissaq kinguartitsiffiusoq qaangerneqarpat, § 47, imm. 1-imi aalajangersakkat atuutissapput.”

§ 2

Inatsisartut inatsisaat ulloq 1. januar 2024 atuutilissaaq.

Namminersorlutik Oqartussat, ulloq 20. novembari 2023

Múte Bourup Egede (atsior.)

Naalakkersuisut Siulittaasuat