Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaanni nr. 26, 28. november 2016-imeersumi § 46, imm. 2 aamma 4 naapertorlugu aalajangersarneqarput:

Aningaasaqarnermut Siunnersuisoqatigiit katitigaanerat aamma arlaannaannulluunniit attuumassuteqannginnerat

  § 1.  Aningaasaqarnermut Siunnersuisoqatigiit siulittaasoqarfimmit 5-inik imaluunniit 6-inik inuttaqartumit, tamatumalu saniatigut 14-inik ilaasortaqartumit, aqunneqarput.

  Imm. 2.  Naalakkersuisut siulittaasoqarfimmi ilaasortanik ukiut pingasukkaarlugit toqqaasassapput.

  Imm. 3.  Siulittaasoqarfimmi inuk ataaseq arlallilluunniit naleqquttunik piginnaasaqartoqartoq Aningaasaqarnermut Siunnersuisoqatigiit suliassaasa isumagineqarnerannut ikiuunnissamut piffissami isumaqatigiissutigineqartumi aalajangiisinnaatitaanani ilaasortaasinnaavoq.

  Imm. 4.  Naalakkersuisut inassuteqaatit makkua malillugit piffissani ukiunik 3-nik sivisussusilinni Aningaasaqarnermut Siunnersuisoqatigiinni ilaasortat sinneri toqqassavaat:

1) ilaasortat 2-t Aningaasaqarnermut Naalakkersuisumit inassutigineqartut,

2) ilaasortat 3-t kommuninit ataatsimoorullugu inassutigineqartut,

3) ilaasortaq 1 Ilisimatusarfimmit inassutigineqartoq,

4) ilaasortaq 1 Pinngortitaleriffimmit inassutigineqartoq,

5) ilaasortaq 1 Sulinermik Inuussutissarsiuteqartut Kattuffiannit (SIK) inassutigineqartoq,

6) ilaasortat 2-t Atorfillit Katuffianit (AK), Ilinniartitsisut Meeqqat Atuarfianneersut Kattuffianit (IMAK), Nunatsinni Perorsaasut Kattuffianit (NPK), Peqqinnissaq Pillugu Kattuffianit (PPK) aamma Ilinniagartuut Kattuffiannit (IK/ASG) ataatsimoorullugu inassutigineqartut,

7) ilaasortaq 1 Sulisitsisunit inassutigineqartoq,

8) ilaasortaq 1 aningaaserivinnit Kalaallit Nunaanni angerlarsimaffeqartunit imaluunniit aalajangersimasumik ingerlatsiveqartunit inassutigineqartut, aamma

9) ilaasortat 2-t aalisarnermut kattuffinnit ataatsimut inassutigineqartut.

  Imm. 5.  Inassuteqarnermi suiaassutsit akornanni naligiissitaaneq pillugu aalajangersakkat sukkulluunniit atuuttut malinneqarnissaat qulakkeerneqassaaq.

  § 2.  Aningaasaqarnermut Siunnersuisoqatigiit sulinerminni Naalakkersuisunut attuumassuteqanngillat.

  Imm. 2.  Aningaasaqarnermut Siunnersuisoqatigiinnut Siulittaasoqarfik atuunnermini pisuni tamaginni kinaassusersiortuussanngilaq, arlaannulluunniit atasuussanani kiisalu soqutigisaqartut allat isumaannut tamakkiisumik attuumassuteqarani ingerlatsissalluni.

  § 3. Aningaasaqarnermut Siunnersuisoqatigiinni ilaasortanik toqqaanermi, ilanngullugu Aningaasaqarnermut Siunnersuisoqatigiit siulittaasoqarfianik, pineqartut aningaasaqarnermut apeqqutini ilisimasaqarnerat paasisimasaqarnerallu aalajangiisuulluinnartumik pingaartinneqassaaq.

  Imm. 2.  Siulittaasoqarfimmut ilaasortassanik toqqaasoqartussanngornerani, siulittaasoqarfiup atuuttup piukkunneqartut suliamut naleqquttuunerannut siunnersuutinut allattuiffik Naalakkersuisunut saqqummiutissavaa. Allattuiffik isertuussassaavoq. Naalakkersuisut siulittaasoqarfimmi ilaasortassanik allanik, siulittaasoqarfiup allattugaanni allassimasunit allaanerusunik, killilersugaanngitsumik toqqaasinnaapput, taamaattoq takuuk imm. 1.

  § 4.  Inatsisartuni imaluunniit Naalakkersuisuni ilaasortat peqatigisaanik Aningaasaqarnermut Siunnersuisoqatigiinni ilaasortaasinnaanngillat.

Aningaasaqarnermut Siunnersuisoqatigiit suliassaat ataatsimiittarnerilu

  § 5.Siulittaasoqarfiup minnerpaamik ukiumut nalunaarusiaq ataaseq tamanut saqqummiuttassavaa.

  Imm. 2.  Aningaasaqarnermut Siunnersuisoqatigiinni ilaasortat nalunaarusiap imarisaanut oqaaseqaateqarsinnaapput, nalunaarusialli imarisassai siulittaasoqarfimmit taamaallaat akisussaaffigineqassapput.

  Imm. 3.  Siulittaasoqarfik tamanut saqqummiunneqartussanik sulinermi allakkiortarsinnaavoq imaluunniit teknikimut tunngassutilinnik allakkiortarsinnaalluni.

  § 6.  § 5 malillugu nalunaarusiornissap saniatigut Aningaasaqarnermut Siunnersuisoqatigiit namminersorlutik pisortallu ingerlatsiveqarfiini naammassisaqarsinnaassutsip ineriartorneranik naliliinernik suliaqartassapput.

  § 7.  Aningaasaqarnermut Siunnersuisoqatigiit siulittaasoqarfiup nalunaarusiaa oqallisiginiarlugu annikinnerpaamik ukiut ataasiarlutik ataatsimiittassapput.

  Imm. 2.  Siulittaasoqarfiup Aningaasaqarnermut Siunnersuisoqatigiinni ataatsimiittarnerit aaqqissuutissavaat.

Aningaasarsiaqartitsineq aningaasartuutillu

  § 8. Aningaasaqarnermut Siunnersuisoqatigiit siulittaasuat sulinerminut ukiumut 100.000 koruuninik aningaasarsiaqartinneqassaaq. Siulittaasup tullia aamma siulittaasoqarfimmi ilaasortat allat kiisalu inuit siulittaasoqarfimmi aalajangiisinnaanatik ilaasortaasut ukiumut 50.000 koruuninik aningaasarsiaqartinneqassapput.

  Imm. 2.  Qaammatisiutit malillugit ukiup affaanut siullermut aningaasarsiarititassat 50 procentii aggustimi kingumoortumik tunniunneqassapput aammalu qaammatisiutit malillugit ukiup affaata aappaanut 50 procentii ukiup tulliani februaarimi tunniunneqassallutik.

  Imm. 3.  Ilaasortap imaluunniit aalajangiisinnaatitaanani ilaasortap ilaasortanngornerani imaluunniit ilaasortaajunnaarnerani, qaammammut aningaasarsiassanik siusinnerusukkut tunniussisoqarsimanngippat, aningaasarsiarititassat aqqaneq marlorarterutaat qaammatip pineqartup ilaasortaaffigisaata imaluunniit aalajangiisinnaatitaanani ilaasortaaffigisaata aallartinneri tamaasa tunniunneqartassapput.

  § 9.  Aningaasartuutit ilaasortat § 1, imm. 4-mi taaneqartut Aningaasaqarnermut Siunnersuisoqatigiit suliaanni peqataanerannut il.il. tunngassuteqartut, inassuteqarsinnaatitaasumit akilerneqassapput, taamaattoq takuuk imm. 2.

  Imm. 2.  Aningaasartuutit Namminersorlutik Oqartussani atorfilinnut tunngassuteqartut, naalakkersuisoqarfimmi suliassaqarfimmi, pineqartup ulluinnarni suliffigisaanit, akilerneqassapput.

Aningaasaqarnermut Siunnersuisoqatigiit allattoqarfiat

  § 10.  Aningaasaqarnermut Siunnersuisoqatigiinnut allattoqarfeqartitsineq naalakkersuisoqarfimmit aningaasaqarnermut akisussaasuusumit isumagineqassaaq.

Atuutilerneranut atorunnaarsitsinermullu aalajangersakkat

  § 11.  Nalunaarut ulloq 1. februar 2024-mi atuutilissaaq.
 Imm. 2.  Tamatuma saniatigut Aningaasaqarnermut Siunnersuisoqatigiit pillugit Namminersorlutik Oqartussat nalunaarutaat nr. 10 24. juli 2019-imeersoq atorunnaassaaq.

Namminersorlutik Oqartussat, ulloq 22. januar 2024

Erik Jensen (atsior.)

Aningaasaqarnermut Akileraartarnermullu Naalakkersuisoq

/ Nikolai S. Christensen