Matumuuna suliffeqarnermi innersuussisarneq il.il. pillugit Inatsisartut inatsisaat, Inatsisartut inatsisaat nr. 6, 3. juni 2015-meersumi, Inatsisartut inatsisaat nr. 32, 9. december 2015-meersumi aamma Inatsisartut inatsisaat nr. 28, 9. december 2015-imeersumi allannguutit ilanngullugit, nalunaarutigineqarpoq.

 

Kapitali 1

Nassuiaatit atuuffiilu

 

  § 1.  Suliffeqarnermi innersuussisarneq paasineqassaaq suliffeqarnermi ineriartorneq siuarsarniarlugu nuna tamakkerlugu, illuinnaasiunngitsumik akeqanngitsumillu sullissinertut, taamatuttaaq sulisartut suliamut tunngatillugu nukittorsarneqarnissaat nunamilu nuttarsinnaanerat ilanngullugit.

  Imm. 2.  Suliffissamik innersuussisarneq paasineqassaaq suliffissarsiortup sulisitsisullu akor-nanni suliffeqarnermi pissutsit aalajangersimasut pilersinneqarnissaat siunertaralugu attaveqaqatigiissitsinertut.

  Imm. 3.  Suliffeqarnermi innersuussisarfiup suliassaraa inuussutissarsiutinit atorfinnillu assi-giinngitsunit tamanit suliffissarsiortunut suliffissanik innersuussisarneq aamma sulisitsisinut sulisussanik innersuussisarneq. Taamatuttaaq suliffeqarnermi innersuussisarfiup ilinniagaqarnermut tunngasuni qinnuteqartunik siunnersuineq allaffissornikkullu aqutsineq suliassarai.

  Imm. 4.  lnatsit sulinermut Kalaallit Nunaanni suliarineqartumut atuuppoq, tassunga ilanngullugit suliffissarsiortut Kalaallit Nunaanni suliffissarsiortut killilersimaarneqarnissaat pillugu lnatsisartut inatsisaat naapertorlugu nunatsinni sulisartutut isigineqartut.

 

Kommunalbestyrelsip suliassai

 

  § 2.  Kommunalbestyrelsip suleqataalluni suliffeqarnermut tunngasutigut ingerlatsinerminnut ilanngullugu

1)  Kommunimi suliffeqarnermi ineriartorneq malinnaavigissavaa,

2)  Kommunimi iliuusissanik inuussutissarsiornerup ineriartortinneqarneranut suliffissaqartitsinermullu pingaarutilinnik aallartitsisarnissamut tunngavissat pilersissavai suliniutigisassallugillu, kiisalu

3)  Kommunimi suliffeqarneq pillugu paasissutissat katersussavai nalilersorlugillu, paasissutissallu tamakku Naalakkersuisunut nalunaarutigisassallugit.

  Imm. 2.  Imm. 1, nr. 3 naapertorlugu Naalakkersuisut nalunaarutiginnittarneq pillugu erseqqinnerusunik malittarisassanik aalajangersaasinnaapput.

 

  § 3.  Kommunalbestyrelsi pisussaavoq kommunimi suliffeqarnermi innersuussisarfissaqartitsissalluni, taamatuttaaq suliffissanik innersuussisarnermik aamma ilinniartitaanernut inuussutissarsiutinullu ilitsersuuisarnernik aaqqissuussissalluni, §§ 5 - 9 takukkit.

  Imm. 2.  Kommunalbestyrelsip kommunimi suliffissaqartitsineq pillugu kisitsisitigut paasissutissat Naalakkersuisunut nalunaarutigisassavai.

  Imm. 3.  Naalakkersuisut kommunalbestyrelsip kisitsisitigut paasissutissanik il.il. nalunaaruteqartarnera pillugu malittarisassanik aalajangersaasinnaapput.

 

  § 4.  Kommunalbestyrelsip sulissutigissavaa kommunimi suliffeqarnermi illuatungeriit pisortallu ingerlatsiviisa akornanni tatigeqatigiiffiusumik qanittumillu suleqatigiinnermik pilersitsisoqarnissaa, taamaalilluni sulisartut ineriartortinneqarnerannut suliniuteqarnissamut tunngavissaqalissammat, siunissami qaninnermi ungasinnerusumilu inuussutissarsiortut pisariaqartitaannut kommunimilu inuussutissarsiutit ineriartortinneqarnerannut periarfissanut tulluussakkanik.

  Imm. 2.  Kommunalbestyrelsi kommunimi sulisartut piginnaasaasa nukittorsarneqarnissaannut suliffissaqartitsinermut tunngatillugu iliuusissanik aallartitsinissamut siunnersuusiussaaq.

  Imm. 3.  Kommunalbestyrelsi suliffissaqartitsinermut tunngatillugu aamma/imaluunniit ilinniartitaanermut tunngatillugu immikkut neqeroorutinik inuusuttunut 30-t ataallugit ukiulinnut sammisitanik aallartitsissaaq.

 

Inuussutissarsiutinut ilinniartitaanernullu ilitsersuisarneq kiisalu suliffissanik innersuussisarneq

 

  § 5.  (Atorunnaarpoq)

  Imm. 2.  Inuussutissarsiutinut ilinniartitaanernullu ilitsersuinermut ilaapput inuussutissarsiummik ilinniartitaanermillu toqqaaniarnermi ikiorsiinerit.

  Imm. 3.  (Atorunnaarpoq)

  Imm. 4.  Kommunalbestyrelsi inuussutissarsiutinut ilinniartitaanernullu ilitsersuinerup kiisalu suliffissanut innersuussisarnerup inernera pillugu Naalakkersuisunut nalunaaruteqarnissamut pisussaaffeqarpoq.

  Imm. 5.  (Atorunnaarpoq)

 

  § 6.  Suliffissamik innersuussisoqartinnagu akissarsiat aamma sulinermi atorfinitsitaanermilu atugassarititaasut allat pillugit paasissutissat pissarsiarineqassapput.

 

  § 7.  Suliffissamik ataavartuusumik innersuussineq, suliffissarsiortup najukkaminit nuuttariaqarneranik nassataqartitsisoq pisinnaavoq:

1)  nuunnissaq suliffeqarnermi suliamullu tunngatillugu pisariaqartitanik naliliineq aallaavigalugu kissaatigineqartutut isigineqarpat,

2)  suliffissarsiortoq akuersippat,

3)  innersuunneqartoq angallanneqarnermut pisattanillu nuussinermut aningaasartuutissinneqassanngippat, aamma

4)  innersuunneqartoq inissaqartinneqarpat imaluunniit suliffissarsiortoq nammineerluni inissarsisimappat.

  Imm. 2.  Sulisartup najugaqarfigiuagaanit qimagulluni ukiup ilaatigut sulinermut imaluunniit piffissami killeqartumi sulinermut innersuussineq pisinnaavoq:

1)  nuunneq suliffeqarnermi najukkami suliamullu tunngatillugu pisariaqartitanik naliliineq aallaavigalugu kissaatigineqartutut isigineqarpat,

2)  suliffissarsiortoq akuersippat,

3)  innersuunneqartoq angallanneqarnermut pisattanillu nuussinermut aningaasartuutissinneqassanngippat, aamma

4)  najugarisami naammattunik piginnaanilinnik sulisussaqanngippat.

  Imm. 3.  Naalakkersuisut aningaasartuutit imm. 1, nr. 3-mi aamma imm. 2, nr. 3-mi taaneqartut matussutissaannut tapiissuteqarsinnaapput. Naalakkersuisut tamakku pillugit malittarisassanik erseqqinnerusunik aalajangersaasinnaapput.

  Imm. 4.  Naalakkersuisut ataasiakkaatigut naliliinikkut, imm. 1 aamma 2 malillugit suliffissamik innersuussinermut atatillugu aningaasartuutinut allanut, ilanngullugit assersuutigalugu angalanermut ineqarnermullu aningaasartuutit, atorfinittussanik oqaloqateqarnernut aamma suliffimmi misiliinernut atatillugu suliffissarsiortup akiligaanut, matussutissatut tapiissuteqarsinnaapput.

 

  § 8.  Sulisussanik sulisitsisumut imaluunniit suliffeqarfimmut innersuussisoqarsinnaanngilaq sulisartut kattuffiannit soqutigisaqaqatigiiffimmiilluunnit allamit uppernarsaatit sukumiisut malillugit sulisartut suliumajunnaarneranni imaluunniit sulisitsisut mattussineranni eqqugaasumut, tamanna isumaqatigiissutinut akerliusutut nalilerneqarsimanngippat.

 

  § 9.  Atorfimmut inuttaqanngitsumut sulisussamik naleqquttumik innersuussisoqarsinnaagaangat tamanna pillugu kommunalbestyrelsi sulisitsisumut nalunaaruteqartassaaq.

  Imm. 2.  Sulilernissaagaluaq piviusunngunngitsoorpat sulilernerluunniit aallartikkaluaannaq taamaatitinneqarpat sulisitsisoq pisussaavoq tamanna pillugu kommunalbestyrelsimut piaartumik nalunaaruteqassalluni taamatullu tamatumunnga pissutaasoq nalunaarutigissallugu.

  Imm. 3.  Sulisitsisoq sulisussanik innersuunneqartunik itigartitsisoq angallanneqarnermut pisattallu nuunnerinut aningaasartuutigineqarsimasunik utertitsilluni akiliisussaatitaavoq, sulisussanik allanik sulilersitsineq itigartitsinermut pissutaasimappat sulisitsisorlu kommunalbestyrelsimut piffissaagallartillugu suliffigiligassamut angalanerup pinngitsoortinneqarsinnaasimagaluarneranik ilisimatitsissuteqarsimanngippat.

 

Aalajangersakkat assigiinngitsut

 

  § 10.  Suliffissarsiortunik aamma suliffinnik neqeroorutinik nalunaarsuinermut aqutsinermullu Naalakkersuisut nuna tamakkerlugu suliffinnut nittartakkamik pilersitsisinnaapput.

  Imm. 2.  Kommunalbestyrelsip Kalaallit Nunaanni suliffinnik inuttaligassanik tamakkerlugit isiginninniarlutik suliffinnut nittartagaq atussavaa, suliffissarsiortunullu suliffiit innersuussissutigissallugit.

  Imm. 3.  Suliffissarsiortup suliffinnut nittartakkamut CV-ni inississavaa. Suliffinnut nittartakkap atorneqarneranik kommunalbestyrelse ilitsersuissaaq, aammalu suliffissarsiortoq nammineq pisinnaanngippat suliffissarsiortup CV-a suliffinnut nittartakkamut inississallugu.

  Imm. 4.  Suliffissarsiortup suliffinnut nittartakkami CV-ni nutarsartuartassavaa.

  Imm. 5.  Suliffinnut nittartakkamut tamanik takussutissiisumik CV-mik inissiinissaq suliffissarsiortuusutut aamma suliffeqarfimmut piareersimasuusutut isigineqarnissamut piumasaqaataavoq.

 

  § 11.  Naalakkersuisut kommunini sulisunik suliffeqarnermi innersuussisarnermik il.il. sulia-qartunik ukiumoortumik pikkorissartitsisassapput.

  Imm. 2.  Naalakkersuisut kommunalbestyrelsinut qinersisoqareernerani tamatigut kommunalbestyrelsimut ilaasortanut peqqussummi matumani pineqartunik suliassaqartitaasunut pikkorissartitsisassapput.

  Imm. 3.  Imm. 1 aamma 2 naapertorlugit pikkorissartitsinernut aningaasartuutit

Nunatta Karsianit kommuninillu akilerneqartassapput.

 

  § 12.  (Atorunnaarpoq)

 

  § 13.  Naalakkersuisut suliffissaaleqinerup akiorneqarnissaa kiisalu suliffeqarnermi innersuussisarnerup pisariillisaavigineqarnissaa ineriartortinneqarnissaalu siunertaralugit misileraanerit pillugit malittarisassanik aalajangersaasinnaapput.

 

  § 14.  Naalakkersuisut ukiumi qaangiuttumi suliffeqarnermi suliniutaasut aamma piffissami aggersumi anguniagaasut taamatuttaaq malitseqartitsinissat aallartinneqassanersut pillugit ukiumoortumik nalunaarusiortassapput.

 

Naammagittaalliuuteqartarneq

 

  § 15.  Inatsit manna malillugu kommunalbestyrelsip aalajangiinerinik naammagittaalliuutit sapaatit akunneri sisamat qaangiutsinnagit Naalakkersuisunut suliassanngortinneqarsinnaapput.

 

Atuutilerfia

 

  § 16.  Inatsisartut inatsisaat ulloq 1. juli 2014-imi atuutilissaaq.

  Imm. 2.  Tamatumunnga peqatigitillugu Suliffeqarnermi innersuussisarneq il.il. pillugu Inatsisartut peqqussutaat nr. 10, 18. december 2003-meersoq atorunnaarsinneqassaaq.

  Imm. 3.  Malittarisassiat Inatsisartut inatsisaanni taaneqartumi imm. 2-p malitsigisaanik aalajangersarneqartut ingerlaannassapput, inatsisartut inatsisaannit matuma imaluunniit allat malitsigisaannik allanngortinneqarnissanik atuukkunnaarsinneqarnissamilluunniit tungaannut.

 

 

Inatsisartut inatsisaat nr. 6 3. juni 2015-meersoq (Suliffinnut nittartakkap atorneqarnera)[1] atuutilernissaanik aalajangersakkanik makkuninnga imaqarpoq:

 

§ 2

 

Inatsisartut inatsisaat 15. juli 2015-imi atuutilerpoq.

 

 

Inatsisartut inatsisaat nr. 32 9. december 2015-meersoq (Nuttarnerulersitsinissamut ikiorsiissutit atorneqarnerulernissaat)[2] atuutilernissaanik aalajangersakkanik makkuninnga imaqarpoq:

 

§ 2

 

Inatsisartut inatsisaat atuutilerpoq 1. januar 2016.

 

 

Inatsisartut inatsisaat nr. 28. 9. december 2015-meersoq, Suliffissanut, ilitsersuisarnernut pikkorissaqqinnernullu qitiusumik ingerlatsiviit pillugit[3] atuutilernissaanik aalajangersakkanik makkuninnga imaqarpoq:

 

§ 10

 

Inatsisartut inatsisaat atortuulissaaq ulloq 1. januar 2016. 

 

 

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik, ulloq 6. marts 2025

 

 

Martha Abelsen(atsior.)

Naalakkersuisoqarfimmi Pisortaq

 

 

/ Mehdi Shams(atsior.)

 

 

 

[1] Inatsimmi allannguutit § 10.

[2] Inatsimmi allannguutit § 7 imm. 1. aamma § 7 imm. 4.

[3] Inatsimmi allannguutit § 5, imm. 1, § 5, imm. 3, § 5, imm. 5 aamma § 12.