Suliffeqarnermi innersuussisarneq il.il. pillugu Inatsisartut peqqussutaanni nr. 10, 18. december 2003-meersumi § 2, imm. 2, § 3, imm. 3, aamma § 5 imm. 5 naapertorlugit, aamma Suliffissaaleqisunik sulilersitsiniarneq pillugu Inatsisartut peqqussutaanni nr. 14, 12. november 2001-imeersumi § 14, imm. 3 naapertorlugit aalajangersarneqarput:

Nalunaarutigineqartut imassaat

§ 1. Suliffissarsiortut ilinniagaqalerniartulluunniit Piareersarfitsigoortumik ingerlassiniartut pillugit paasissutissat, inuttaat tamaasa immikkoortiterlugit, Kommunalbestyrelsip Suliffeqarnermut Inuussutissarsiutinullu ilinniartitaanermut Pisortaqarfimmut imaattut nalunaarutigisassavai:
1) Suliffissarsiortup ilinniagaqalerniartulluunniit CPR-normua.
2) Suliffissarsiortup ilinniagaqalerniartulluunniit massakkut najugaata inuillu aqqisa allattorsimaffiat naapertorlugu najugarisimasaasai.
3) Suliffissarsiortup ilinniagaqalerniartulluunniit nammineq meerai 18-it inorlugit ukioqartut angajoqqaaminni najugaqartut qassiunerinik paasissutissat.
4) Suliffissarsiortup ilinniagaqalerniartulluunniit atuarsimaneranik, ilinniagarisimasaanik inuussutissarsiutitigullu aqqusaagaqarsimassutsimigut piginnaaneqassusianik paasissutissat.
5) Paasissutissat suliffissarsiortoq ilinniagaqalerniartorluunniit isumaginninnermi pisartagaqarsinnaanermit mattunneqarsimasuunersoq, taammassimappallu piffissaq matussaaffigisimasaa.
6) Paasissutissat suliffissarsiortoq ilinniagaqalerniartorluunniit isumaginninnermi pisartagaqartuunersoq, aammalu isumaginninnermit pisartakkat tunniunneqartartut suunersut, taamaassimappallu piffissaq pisartagaqarfiusoq.
7) Paasissutissat siunissami ilinniakkatigut suliffeqalernissamilu suliffissarsiortup ilinniagaqalerniartulluunniit pisariaqartitai pillugit.
8) Paasissutissat suliffissarsiortoq ilinniagaqalerniartorluunniit suliffissarsineqarsimanersoq pillugu.
9) Suliffissarsiortumut ilinniagaqalerniartumulluunniit suliniutit aallartinneqarsimasut, suliniutit aallartinneqarnerannut naammassineqarnerannullu ullut ilanngullugit.
10) Suliffissarsiortup ilinniagaqalerniartulluunniit suliffissaaleqisutut nalunaarsorneqarsimanerata piffissaq aallartiffia naaffialu.
11) Kommunalbestyrelsi suliffissarsiortumut ilinniagaqalerniartumulluunniit siunnersuinermik ingerlatsinersoq.

§ 2. Kommunalbestyrelsip paasissutissat tulliuttuni pineqartut Suliffeqarnermut Inuussutissarsiutinullu ilinniartitaanermut Pisortaqarfimmut ilisimatitsissutigissavai:
1) suliniutit qanoq ittut, tassunga ilanngullugit pikkorissaanerit ingerlanneqarneri ilinniagaqartitsinerillu kommunalbestyrelsip neqeroorutigissallugit pisariaqartinnerai,
2) ullut suliniutinik aallartitsiffiusut naammassinniffiusullu, siuliani nr. 1-imi allassimasut naleqqiullugit, piginnaanngorsaanerit taakkualu inerneri,
3) avataaniit suliartortartut qassit suliaqarfinnut agguarlugit akuersissutigineqarlutik sulilersinneqarsimanersut itigiartinneqarsimanersullut, aamma
4) kommunimi sulisorisat atorfiit taaguutaannut agguarlugit amerlassusaat.

Paasissutissat nalunaarutigineqartarnerat

§ 3. Kommunalbestyrelsip isumannassavaa paasissutissat §§-ini 1 aamma 2-mi pineqartut ingerlaavartumik malinnaatinneqartarnissaat.
Imm. 2. Kommunalbestyrelsip isumagissavaa §§-ini 1 aamma 2-mi pineqartut paasissutissat qaammatini pingasukkaartuni sap. ak. siulliup aallartinnginnerani nalunaarutigineqartarnissaat.

§ 4. Kommunalbestyrelsip §§-ini 1 aamma 2-mi pineqartut paasissutissat nalunaarutigisassavai qarasaasiat atorlugit.
Imm. 2. Suliffeqarnermut Inuussutissarsiutinullu ilinniartitaanermut Pisortaqarfiup qarasaasiat atorlugit nalunaaruteqartarnermi ilusissaq suliarissavaa kommunalbestyrelsinullu atugassanngortillugu.
Imm. 3. Suliffeqarnermut Inuussutissarsiutinullu ilinniartitaanermut Pisortaqarfiup paasissutissat nalunaarutigineqartut suliffeqarnermut qarasaasiamik nalunaarsuiffeqarfik "Suliaq" atorlugu toqqortarisassavai.
Imm. 4. Inuit Suliffeqarnermut Inuussutissarsiutinullu ilinniartitaanermut Pisortaqarfimmit allagartalerneqartut paasissutissat kommunalbestyrelsiniit §§-it 1 aamma 2 naapertorlugit nassiunneqartunik suliareqqiisassapput, taamaasillutillu paasissutissat inunnut ataasiakkaanut tunngatinneqarsinnaajunnaarsinneqartassallutik.
Imm. 5. Kommunalbestyrelsip isumannaassavaa nakkutigalugulu paasissutissat nassiunneqartut kukkusuunnginnissaat paatsiveerusaataannginnissaallu. Eqqunngitsunik paatsiveeerussaataasunilluunniit paasissutissiisoqarsimappat kommunalbestyrelsi iluarsiissutinik ingerlaannartumik nassiussaqassaaq, paasissutissat piiarneqarnissaat iluarsineqarnissaalluunniit siunertaralugu.

§ 5. Nalunaarut atortussanngortinneqarpoq 1. januar 2008.

Namminersornerullutik Oqartussat, 19. novembari. 2007

Siverth K. Heilmann

/

Palle Frederiksen