Suliffissarsiussisarneq pillugu Inatsisartut peqqussutaanni nr. 11-mi, 16. december 1988-imeersumi § 19, imm. 2 tunngavigalugu makku aalajangersarneqarput:

 

Kapitali 1.
Siunertaq aalajangersakkallu tamanut atuuttut

§ 1. Suliffissaaleqineq suliffissarsiuussinikkut ikiorserneqarsinnaanngitsoq akiorniarlugu Naalakkersuisut siunertanut makkununnga tapiissuteqarsinnaapput:
1) Suliffinnik pilersitsineq aammalu sullivinnik pioreersunik ataavartitsineq.
2) Suliffissaaleqileriartornerup nalaani suliffinnik pilersitsineq.
3) Inuussutissarsiornikkut misileraanernik ingerlataqarnermut atatillugu suliffinnik pilersitsineq.
Imm. 2. Naalaakkersuisut tapissutaat suliassanut makkununnga tapiissutaapput:
1) Kommunini suliassat pilersinneqarnerini ingerlanneqarnerinilu koinmunimit tamakkiisumik aningaasalersugaasunut.
2) Suliassanut namminersortunit ingerlanneqartunut inuiaqatigiinnut pingaaruteqartunut, suliffeqarfiup suliassaq ingerlatsinermigut aningaasalersorsinnaangippagu.

§ 2. Suliassanut § 1, imm. 2, nr. 1-mi taaneqartunut, sulisartut ilinniaqaqarsimanngitsut nalunaaquttap akunnermusiaasa feriernerminilu aningaasarsiaasa sukkulluunniit atuuttut 50 %-iinik Naalakkersuisut tapiisarput, sulisartut ilinniagaqarsimasut ilinniagaqarsimanngitsullu nalunaaquttamut akunnermusiaat pillugit SIK-p isumaqatigiissutai naapertulugit.
Imm. 2. Illuatungeriit isumaqatigiissuteqareernerisigut sulinermi akissarsiat nioqqutissiarineqartut naapertorlugit naatsorsorneqarsimasunut 50 %-iinik Naalakkersuisut tapiissuteqarsinnaapput.
Imm. 3. Sulinermi akissarsiat sinneri kommunimit aningaasaliiffigineqassapput.

§ 3. Suliassanut § 1, imm. 2, nr. 2-mi taaneqartunut, sulisartut ilinniagaqarsimanngitsut nalunaaquttamut akunnermusiaasa feriepengiisalu sukkulluunniit atuuttut 33 1/3 %-iinik Naalakkersuisut tapiisarput, sulisartut ilinniagaqarsimasut ilinniagaqarsimanngitsullu akunnermusiaat pillugit SIK-p isumaqatigiissutai naapertorlugit.
Imm. 2. Illuatungeriit isumaqatigiissuteqareernerisigut nioqqutissiarineqartut naapertorlugit sulinermi akissarsiat naatsorsorneqarsimasunut 33 1/3 %-imik Naalakkersuisut tapiissuteqarsinnaapput.
Imm. 3. Sulinermi akissarsiat 33 1/3 %-ii kommunip pineqartup aningaasaliiffigissavai, suliffeqarfiullu namminersortumik ingerlanneqartup taakkua sinneri aningaasaliiffigissallugit.

§ 4. Suliassanut § 1, imm. 2, nr. 1-mi taaneqartunut Naalakkersuisut kommunilu, immikkut ittunik pissutissaqartillugu, sulinermi akissarsiat aningaasaliiffigineqarnissaasa allaasumik agguataarneqarnissaannik isumaqatigiissuteqarsinnaapput, § 2-mi maleruaqqusamit allaasumik.
Imm. 2. Suliassanut § 1, imm. 2, nr. 2-mi taaneqartunut Naalakkersuisut, kommuni suliffeqarfillu akunnerminni sulinermi akissarsiat aningaasaliiffiginerisa allaasumik agguataarneqarnissaat isumaqatigiissutigisinnaavaat, § 3-mi maleruaqqusamit allaasumik.

 

§ 5. Suliassanut § 1, imm. 2, nr. 2-mi taaneqartunut mandetiimimut ataatsimut aalajangersakkamik Naalakkersuisut tapiissuteqarsinnaapput.

 

Kapitali 2.
Tapiiffigineqarnissami piimasaqaatit.

§ 6. Naalakkersuisut sulinermi akissarsianut tapiissuteqarneranni, kapitel 1 naapertorlugu, makku piumasaqaataapput:
1) Qinnuteqarfissaq naatinnagu tapiiffigineqarnissamik qinnuteqaat Isumaginninnermut Suliffeqarnermullu Pisortaqarfimmut nassiunneqariissammat, § 10, imm. 2 aamma § 10, imm. 3 naapertorlugit,
2) tapiiffigineqarnissamik qinnuteqaammi piumasaqaatit, §§ 7-imi 9-imilu taaneqartut, naammassineqarsimassasut,
3) tapiissutit nioqqutissiorfinnit pioreersunit nioqqutissiat piumaneqarnerannut suliffiilluunniit pioreersut kiffartuussinerannut annikillisaataasumik kinguneqassanngitsut,
4) tapiissutit STI-mi ilinniartut sungiusaatigalungu suliffigisinnaasaasa ikileriarnerannik kinguneqassanngitsut.
Imm. 2. Suliassanut § 1, imm. 2, nr. 2-mi taaneqartunut piumasaqaatit Naalakkersuisunit, kommunimit suliffeqarfimmillu isumaqatigiissutigineqassapput.

 

Kapitali 3.
Qinnuteqaatip imarisassaanut piumasaqaatit.

§ 7. Tapiiffigineqarnissamik qinnuteqaat ataani taaneqartunik imaqartinneqassaaq:
1) Suliffissaqartitsiniutip qinnuteqaatigineqartup suunerata allaaserineqarnera, tassunga ilanngullugit:
a) suliffissaqartitsiniutip siunertaa pillugu nassuiaat,
b) suliffissaqartitsiniutigineqartumi suliassat suunerisa allaaserineqarnerat,
c) sulisut amerlassusaat,
d) sapaatip akunnikkaartumik piffissap suliffiup sivisussusaata nalunaarsorneqarnera, piffissamullu atussamaakkamut pilersaaru-
siaq,
e) suliffissaqartitsiniutip qanoq sivisutigisumik ingerlanissaa, aammalu
f) suliffissaqartitsiniutip ulluinnarni aqunneqarneranut tunngasutigut paasissutissat.
2) Paasissutissat akissarsianut aningaasartuutitut atorumaakkat annertussusaasa missingersuutaat, naatsorsuinermi tunngavigineqassapput nalunaaquttap akunneri imaluunniit suliat annertussusaat naapertorlugit.
3) Suliffissaqartitsiniutip aningaasalersorneqarnera pillugu paasissutissat ilanngullugit pilersaarusiornermut, aqutsinermut, nakkutilliinermut, pilersaarutip siulersorneqarneranut, atortussanut sakkunullu aningaasartuutit.

§ 8. Suliassanut § 1, imm. 2, nr. 2-mi taaneqartunut tapiissuteqarnermi paasissutissat saniatigut ilanngussat allat suut saqqummiunneqassanersut Naalakkersuisut, kommunip suliffeqarfiullu isumaqatigiissutigissavaat.

§ 9. Kommunimi suliffissaqartitsiniutitut ingerlatsiviginiakkami qinnuteqaatip kommunalbestyrelsimit akuersissutigineqarsimanerata uppernarsaataanik takussutissaqassaaq.

 

Kapitali 4.
Qinnuteqaatit suliarineqartarnerini periaaseq.

§ 10. Tapiissutit pillugit qinnuteqaat Isumaginninnermut Suliffeqarnermullu Pisortaqarfimmut nassiunneqassaaq.
Imm. 2. Qinnuteqaat suliffissaqartitsiniutip ingerlanneqarnissaa ukiumik ataatsimik sioqqullugu kingusinnerpaamik 1. september Isumaginninnermut Suliffeqarnermullu Pisortaqarfiup tigoreersimassavaa.
Imm. 3. Aningaasaliissutinit sinneruttuusimasinnaasunik qinnuteqaat Isumaginninnermut Suliffeqarnermullu Pisortaqarfiup , ukiumi aningaasaliissutinut sinneruttunut tunngasumi kingusinnerpaamik 1. november tigoreersimassavaa.
Imm. 4. Immikkut pissutissaqartillugu imm. 2-mi 3 imilu qinnuteqarnissamut piffissaliussanut Naalakkersuisut immikkut akuersissuteqarsinnaapput.
Imm. 5. Suliffissaaleqiartorfiup nalaani suliffeqarfinnit pilersinneqarsimasunit tapiiffigineqarnissamik qinnuteqaatit imm. 2-mi 3-imilu piffissaliussat apeqqutaatinnagit Naalakkersuisut suliarisinnaavaat.

§ 11. Qinnuteqaatinut, § 10, imm. 2-mi piffissaliussat: naatinnagit tiguneqarsimasunut aalajangiinerit suliffissaqartitsiniutitut suliniutip ingerlanneqarnissaa ukiumik ataatsimik sioqqullugu kingusinnerpaamik 1. november Naalakkersuisut qinnuteqartunut nalunaarutigissavaat .
Imm. 2. Qinnuteqaatinut, § 10, imm. 3-mi piffissaliussaq naatinnagu tiguneqarsimasunut aalajangiinerit aningaasaliissutinit sinneruttuusimasinnaasunut tunngasut kingusinnerpaamik 15. november Naalakkersuisut qinnuteqartunut nalunaarutigissavaat ukiumi aningaasaliissutinut sinneruttunut tunngasumi.

§ 12. Suliassanut § 1, imm. 2, nr. 2-mi taaneqartunut tapiissutinik qinnuteqaatit suliarineqartarneranni periuseq Naalakkersuisut, kommunip suliffeqarfiullu akunnerminni isumaqatigiissutigissavaat.

 

Kapitali 5.
Nalunaaruteqartussaatitaaneq.

§ 13. Suliffissaqartitsiniutip ukiumi ingerlanneqarfiani kingusinnerpaamik 1. november kommunalbestyrelsip Isumaginninnermut Suliffeqarnermullu Pisortaqarfimmut nalunaarutigissavaa ukiumi pineqartumi ukiup qaammataani pingasukkaartuni (kvartalini) siullerni pingasuni akunnerit tapiissuteqarfigineqarsimasut amerlassusiisa naatsorsorneqarnerat, paasissutissat makku ilanngullugit:
1) ukiup qaammataani pingasukkaartuni (Kvartalini) siullerni pi-ngasuni akunnerit tapiissuteqarfigineqartussatut akuersissutigineqarsimasut amerlassusaat,
2) ukiup qaammataasa pingasukkaartut (kvartalit) siulliit pingasut naanerini akunnerit tapiissuteqarfigineqarsimasut atorneqanngitsut amerlassusaat,
3) nalunaaquttap akunnerisa tapiissuteqarfigineqarsimasut atorneqarsimannginnerinut pissutaasoq, aamma
4) nalunaaquttap akunneri tapiissuteqarfigineqarsimasut atorneqarsimanngitsulli akuersissutigineqarlutik ukiup sinnerani atorneqarsinnaanersut.
Imm. 2. Atuisimanermut naatsorsuut imm. 1-imi piffissaliussaq naatinnagu Isumaginninnermut Suliffeqarnermullu Pisortaqarfiup tigusimanngippagu, ukiup qaammataani kingullerni pingasuni tapiissutit Naalakkersuisut utertissinnaavaat.
Imm. 3. Naalakkersuisut, kommunip suliffeqarfiullu nalunaaruteqaatissap annertussusaa aamma suliassanut § 1, imm. 2, nr. 2-imi taaneqartunut tapiissutit aaqqissuunneqarnerat isumaqatigiissutigissavaat.

 

Kapitali 6.
Aqutsineq.

§ 14. Kommunini suliassanut tapiissuteqarnermi, tak. § 1, imm. 2, nr. 1, suliffeqanngitsup akissarsiassai kommunip tamakkerlugit siumoortumik akilerallassavai. Utertitsivigeqqulluni qinnuteqaat nassiunneqartoq naapertorlugu, tapiissutit akuersissutigineqartut kommunimut utertinneqassapput.
Imm. 2. Suliffeqarfiit namminersortut suliassaannut inuiaqatigiinnut pingaarutilinnut tapiissuteqarnermi, tak. § 1, imm. 2, nr. 2, tapiissutit aqunneqarnerat Naalakkersuisut, kommunip suliffeqarfiullu akunnerminni isumaqatigiissutigissavaat.

§ 15. Qaammatit naaneri tamaasa nalunaaquttap akunneri akuersissutigineqarlutik tapiissuteqarfigineqarsimasut qaammammi pineqartumi atorneqarsimanerat pillugu paasissutissat kommunalbestyrelsip Isumaginninnermut Suliffeqarnermullu Pisortaqarfimmut nassiuttassavai.
Imm. 2. Isumaginninnermut Suliffeqarnermullu Pisortaqarfiup utertitsivigineqarnissamik qinnuteqaatip immersugassiai immikkut suliarineqarsimasut atorlugit Qaammammut naatsorsuusiaq nassiunneqassaaq.
Imm. 3. Naalakkersuisut akilerallakkanik utertitsissagunik paasissutissanik makkunannga piumasaqaateqarsinnaapput:
1) suliffissaqartitsiniutip taaguutaata ilanngunneqarnissaa,
2) suliffissaqartitsiniummi suliassat nalunaarsorneqarnissaat,
3) suliffissaqartitsiniut illoqarfimmi nunaqarfimmiluunniit ingerlanneqarnersoq nalunaarneqassasoq,
4) utertitsivigineqarnissamik qinnuteqaammi piffissaq pineqartoq nalunaarutigineqassasoq,
5) sulinermi nal. akunneri atorneqarsimasut utertitsivigineqartussatut qinnuteqaatigineqartut qassiuneri nalunaarlugit,
6) tapiissuteqarnermi suliffissaaleqisut sulisorineqartut aqqi aamma inuttut normui, aamma
7) kommunimut suliffeqarfimmulluunniit namminersortumut tapiissuteqarnissamik neriorsuuteqartoqarsimanersoq nalunaarutigineqassasoq.

§ 16. Utertitsivigineqaqqulluni qinnuteqaat Isumaginninnermut Suliffeqarnermullu Pisortaqarfiup, ukiup tapiissuteqarfiusup kingorna ukiumi nutaami kingusinnerpaamik 1. februar tigusimanngippagu kommunip tapiiffigineqarnissi annaassavaa.

§ 17. Kommunip suliffissaqartitsiniutaa peqqussutip matumap kinguneranik tapiissuteqarfigineqarsimasoq imminut aningaasalersortutut inerisinneqassagaluarpat, piffissami suliffissaqartitsiniutip imminut aningaasalersulernerata kingornatigut tapiissutigineqartussatut akuersissutaasimangaluit Naalakkersuisut utertissinnaavaat.

§ 18. Peqqussutip matuma kinguneranik suliffissaqartitsiniutit tapiissuteqarfigineqarsimasut nakkutigineqarnissaat pitsaasumillu aqunneqarnissaat kommunalbestyrelsip akisussaaffigaa.

 

Kapitali 7.
Atortuulersitsineq.

§ 19. Nalunaarut manna 1. november 1994 aallarnerfigalugu atortuulersinneqarpoq.
Imm. 2. Tamatumunnga peqatigitillugu kommunini suliffissaqartitsiniarnermut tapiissutit pillugit Namminersornerullutik Oqartussat nalunaarutaat nr. 20, 20. juni 1986-imeersoq atorunnaarsinneqarpoq.

Namminersornerullutik Oqartussat, ulloq 28/9 1994

Henriette Rasmussen

/

Nukákuluk Kreutzmann