Matumuuna Ilageeqarneq pillugu Inatsisartut inatsisaat nr. 9, 19. maj 2010-meersoq, Inatsisartut inatsisaanni nr. 2, 29 november 2026-meersumi, Inatsisartut inatsisaanni nr. 27, 3. december 2018-meersumi kiisalu Inatsisartut inatsisaanni nr. 29, 25. Juni 2026-meersumi allannguutai ilanngullugit nalunaarutigineqarpoq.

 

Kapitali 1

Ilageeqarneq, upperisaq nassuerutiginninnerlu

 

  § 1. Ilagiit lutherikkuusut (Kalaallit Nunaanni Ilagiit) oqaluffiat tassaavoq Kalaallit Nunaanni ilagiit naalagaaffiup tapersersugai.

 

  § 2. Kalaallit Nunaanni Ilagiit Naalagaaffeqatigiinnerup iluani ilagiinnut naalagaaffiup tapersersugaanut ilaavoq, Namminersorlutik Oqartussat ataanniilluni, tassanngalu tapersersugaalluni.

 

Kapitali 2

Ilageeqarnermut pingaarnertut akisussaaffik

 

  § 3. Naalakkersuisut Ilageeqarnermi pingaarnertut akisussaasuupput, taakkulu pillugit aalajangersagassanik Biskoppi isumaqatiginiariarlugu aalajangersagaliorsinnaallutik.

  Imm. 2. Biskoppi isumaqatiginiareerlugu immikkut ilisimasalinnik inuttaqartunik ataatsimiititalianik pisariaqartitsineq malillugu Naalakkersuisut pilersitsisinnaapput.

 

  § 3 a. Palasit, provstit, domprovsti biskoppilu Naalakkersuisut atorfinitsillugillu soraarsittarpaat.

Imm. 2. Palasinik, provstinik domprovstimillu atorfinitsitsinernik soraarsitsinernillu biskoppi isumaginnittussanngortillugu Naalakkersuisut piginnaatissinnaavaat.

 

  § 4. Naalakkersuisut Biskoppimik isumaqatigiinniuteqareernikkut naalagiartitsisarnermi ilagiinnilu iliuuserisat pillugit aalajangersakkanik aalajangersaasinnaapput.

  Imm 2. liturginik, ritualinik, tussiutinik tussiutinullu ilassutinik Biskoppip inassuteqaateqareerneratigut atuutilersitsisarneq pillugu Naalakkersuisut aalajangersakkanik aalajangersaasinnaapput.

 

  § 5. Kalaallit Nunaat palaseqarfinnut amerlassusaat angissusissaallu Naalakkersuisunit aalajangersarneqartunut aggorneqassaaq.

  Imm. 2.  Palaseqarfiit tamarmik palasimit oqaluffiup atuagaanik allattuisartuusumit aqunneqassapput, tak. § 15, imm. 1.

  Imm. 3. Kalaallinut namminneq piumassuserinngisaminnik Danmarkimi najugaqartariaqartunut naalagiartinneqarnissamik tarnikkullu annikilliuutinik ikiorneqarnissamik neqeroorfigineqassapput.

 

Kapitali 3

Biskoppi provstillu

 

  § 6. Kalaallit Nunaata Biskoppeqarfiani Biskoppip Ilageeqarnermi qitiusumik aqutsineq allaffissornerullu siulersornera isumagisarai biskoppeqarfimmilu provstinik, palasinik ajoqinik ilagiinnullu sinniisaasunik nakkutilliisuulluni.

  Imm. 2. Biskoppitut atorfimmut atatillugu biskoppeqarfiup allaffia pilersinneqassaaq.

  Imm. 3. Ilagiit assigiinngitsut suleqatigiinneranni Biskoppi Ilagiinnut sinniisuuvoq. Tassunga tunngasunik aalajangersagassanik Naalakkersuisut aalajangersaasinnaapput.

 

  § 7. Biskoppimik qinersinermi qinersisinnaatitaapput biskoppeqarfimmi ilagiit sinniisaat kiisalu palasit kiffartortut, matumanittaaq palasiugallartut aamma palasit qinersinerup nalaani palasiunerminnit sulinngiffeqarallartut.

  Imm. 2. Naalakkersuisut qinersinerup ingerlanneqarnissaa pillugu aalajangersagaliussapput.

  Imm. 3.  (Atorunnaarsinneqarpoq).

 

  § 8. Biskoppi ilagiit siulersorlugit sulinermini provstinit pingasunit ikiorneqassaaq: Ataaseq Avannaanut, ataaseq Kujataanut aamma ataaseq Qeqqanut Tunumullu provstinit.

  Imm. 2. Qeqqanut Tunumullu provstiusoq domprovstiuvoq Biskoppimullu taartaasartuulluni.

  Imm. 3. Danmarkimi kalaallinut palasi aaqqissuussaanikkut Qeqqanut Tunumullu provsteqarfimmut atavoq.

  Imm. 4. Provsteqarfinni immikkuutaartuni tamani provsteqarfiup allaffia pilersinneqassaaq, taannalu provstip allaffissornikkut sulineranut ikiuutissaaq.

 

  § 9. Ilagiit sinniisaasa inassuteqaateqareernerisigut provsteqarfiup ingerlatsineranut ukiumoortumik aningaasanut missingersuusiaq provstip suliarissavaa, taamaattoq tak. § 6, aalajangersakkallu Naalakkersuisunit Biskoppi isumaqatiginiareerlugu aalajangersarneqartut malillugit aningaasanut atugassiissutinut akisussaalluni.

  Imm. 2. Provsteqarfiup ingerlatsineranut ukiumoortumik aningaasanut missingersuusiat Biskoppimut ilisimatitsissutitut provstimit nassiunneqassapput.

 

  § 10. Palasit kiffartortut ukiut allortarlugit Biskoppip palasit ataatsimiinnissaannut aggersartassavai.

  Imm. 2. Palasit kiffartortut ataatsimiinnermi najuunnissaminnut pisussaatitaaffeqarput.

  Imm. 3. Palasit ataatsimiinneranni palasinik ilinniartitseqqinnerit ingerlaqqillunilu ilinniartitsinerit, pikkorissartitsinerit kiisalu allaffissornikkut anersaakkullu suliassat naammassineqartarneranni paasisimalikkanik paasissutissanillu tunniussueqatigiinnerit ingerlanneqartarput.

  Imm. 4.  Palasit ataatsimiinnerat aalajangiinissanut piginnaatitaaffiunngilaq.

 

  § 11. Biskoppip ukiumut ataasiarluni ataatsimiinnissamut provstit tamaasa aggersassavai paasissutissanik tunniussueqatigiinnissaq isumasioqatigiinnissarlu siunertaralugit.

  Imm. 2. Provstit ataatsimiinnermut atatillugu provsteqarfinni ukiup ingerlasimanera pillugu nalunaarusiamik saqqummiussissapput.

 

  § 12. Provstit ilagiit sinniisaannut qinersisoqareernerani provsteqarfinni tamani ataatsimeeqqaarnissamut aggersaassapput, taakkunani peqataassapput siulittaasut aamma ilagiit sinniisaanni tamani immikkuutaartuni ilaasortaq ataaseq.

  Imm. 2. Provsti ilagiit sinniisaannut inatsisit atuuttut naapertorlugit pisinnaatitaaffiinnik pisussaaffiinnillu ilinniartitsissaaq. Biskoppi ataatsimeeqqaarnerni tamani peqataasinnaavoq.

  Imm. 3. Provstit ukiuni qinersiffiusuni ataatsimeeqqaarnerup qanoq ingerlanneqarnissaa pillugu Biskoppi isumaqatiginnissuteqarfigissavaat.

 

Kapitali 4

Palasit ajoqillu

 

  § 13. Palasit ajoqillu maleruagassat atorfimmut atuuttut ilumooqqissaarlutik malissavaat, sulitillutillu sulinngikkaluarlutilluunniit atorfiup ataqqinassusianut tatiginassusianullu piumasarineqartut malillugit nikagisassaanngitsumik pissuseqassallutik.

 

  § 14. Palasi ajoqilu suliassaminnik isumaginninnerminni, matumanittaaq nalunaajaanermini, tarnikkut annikilliuutinik ikiuinermini ilinniartitsinerminilu, ilagiit sinniisaannit pituttugaanngilaq.

  Imm. 2. Palasi imaluunniit ajoqi upperisarsiornerup tungaatigut pissuteqartumik ilagiinni suliassanik suliaqarnissanut suliassanullu peqataanissamut pisussaajunnaarsinneqarsinnaavoq.

  Imm. 3. Palasip ajoqilluunniit pineqartup suliaq provstimut saqqummiutissavaa. Provstip suliaq biskoppimut saqqummiutissavaa kingornatigullu biskoppip aalajangissavaa palasi ajoqiluunniit suliami tassani suliaqarnissamik pisussaajunnaarsinneqarsinnaanersoq.

 

  § 15. Palaseqarfimmi arlalinnik palaseqarsimappat palasit kiffartortut ilaat ataaseq taakku akornannit palaseqarfimmi atuagarsuarnik allattuisutut Biskoppip toqqassavaa, ukiut sisamat tikillugit atasussatut.

Imm. 2. Palaseqarfimmi palasi ataasiinnaatillugu, taassuma palasip atuagarsuarnut allattuineq isumagissavaa.

  Imm. 3. Palasip atuagarsuarnik allattuisup akisussaaffigaa palaseqarfimmi allaffissorneq pingaartumillu atuagarsuit allattuiffigineqarnissaat, ilagiinni suliassat aaqqissuunneqarnerat, matumanittaaq naalagiarnerit palasit akornanni agguataarnissaat, piareersimasut piffissalersornerisa aalajangersarneqarnerat aamma aningaasanik aqutsineq.

Imm. 4. Palasip atuagarsuarnik allattuisup palaseqarfimmi suleqataasumut atorfeqartumut allamut, palaseqarfiup atuagarsuisa suliassartaannik suliarinnissinnaassusilimmut tunniussinnaavaa.

    Imm. 5. Atuagarsuarnik allattuisarneq pillugu Naalakkersuisut Biskoppimut isumaqatigiinniareernikkut aalajangersakkanik aalajangersaasinnaapput.

 

Kapitali 5

Ilagiit sinniisaat

 

  § 16. Ilagiit sinniisaanni ilaasortaapput ilagiit sinniisaattut qinikkat kiisalu sumiiffimmi ajoqi ajoqilluunniit aamma palasi palasilluunniit kiffartortut sumiiffimmi tassani najugaqartut.

  Imm. 2. Ilaasortat qinikkat amerlassusaat tamatigut palasit ajoqillu amerlassusaannit amerlanerujuaannassapput, taamaanngippallu ajoqi kingulliulluni atorfinittoq peerneqartassaaq. Taannali ilagiit sinniisaasa ataatsimiinneranni peqataasinnaatitaavoq, taasisinnaatitaananili.

  Imm. 3. Palasit kiffartortut palaseqarfimmi najugaqarfiginngisaminni tamarmiusuni taasisinnaatitaanatik ilagiit sinniisaasa ataatsimiinneranni peqataasinnaatitaapput.

  Imm. 4. Provsti provsteqarfimmi tamarmiusumi taasisinnaatitaanani ilagiit sinniisaasa ataatsimiinneranni peqataasinnaatitaavoq.

  Imm. 5. Biskoppi biskoppeqarfimmi tamarmiusumi taasisinnaatitaanani ilagiit sinniisaasa ataatsimiinneranni peqataasinnaatitaavoq.

 

  § 17. Qinersinerup kinguninnguatigut palasip atuagarsuarnik allattuisup imaluunniit sumiiffimmi ajoqip sulissutiginninneratigut ilagiit sinniisaat ataatsimiissapput qinersillutillu siulittaasumik, siulittaasup tullianik allatsimillu ukiumi ataatsimi atasussanik. Tamatuminnga nalunaarut aamma ilaasortanut tamarmiusunut kiisalu ilaasortatut qinigaasut sinniisussaannut nalunaarsuiffik palasimit atuagarsuarnik allattuisumit provstimut Biskoppimullu nassiunneqassapput.

  Imm. 2. Ilagiit sinniisaat ukiumut minnerpaamik marloriarlutik ataatsimiittassapput aammalu ataatsimiittassallutik minnerpaamik ilaasortap ataatsip tamanna piumasarippagu.

  Imm. 3. Taasineq aalajangerneqartassaaq taasisut nalinginnaasumik amerlanerussuteqarnerat naapertorlugu. Ilagiit sinniisaat ataatsimiinnermi aalajangiisinnaassuseqarput ilaasortat minnerpaamik affaat najuuppata. Taasinerit naligiippata siulittaasup taasinera aalajangiisuuvoq.

  Imm. 4. Ilagiit sinniisaasa suleriaasissartik namminneq aalajangersassavaat.

 

  § 18. Ilagiit sinniisaasa ataatsimiinnerat allattaavinnut allattorneqartassapput.

  Imm. 2. Allattaavinni allassimassapput qanga sumilu ataatsimiittoqarnera, kina ataatsimiinnermi najuunnersoq, apeqqutit suut oqaluuserineqarsimanersut kiisalu aalajangiinerit suut pisimanersut.

  Imm. 3. Ilaasortap kialuunniit nammineq isummani allaasoq allattaavinnut naatsumik ilanngutitissinnaavaa.

  Imm. 4. Allattaavik siulittaasumit allatsimillu atsiorneqarsimassaaq ataatsimiinnermilu tulliuttumi akuersissutigisassatut saqqummiunneqassalluni. Allattaaviup akuerineqartup assilinera provstimut biskoppimullu paasissutissatut nassiunneqassaaq.

 

  § 19. Ilagiit sinniisaasa aalajangissavaat ilaasortat ilaat suliami ima soqutigisaqartiginersoq sinniisut oqaluuserinninneranni taasissutiginninnerannilu peqataasinnaanani.

  Imm. 2. Ilaasortap suliap oqaluuserineqarnerani peqataasinnaanerminut nalornissutaalersinnaasunik peqarnini ilagiit sinniisaannut nalunaarutigissavaa.

 

  § 20. Palasip atuagarsuarnik allattuisuusup nakkutigisarissavai oqaluffiup illutai toqusut inaat ilanngullugu. Nakkutilliineq najukkami ilagiit sinniisaat suleqatigalugit pissaaq. Palasi atuagarsuarnik allattuisoq palaseqarfimmi nakkutilliineq pillugu ukiumoortumik nalunaarusiamik provstimut nassiussissaaq. Illuutit isumannaatsumik aserfallatsaalinissaat provstip isumagissavai.

  Imm. 2. Init naalagiartarfittut atorneqartut (atuarfiit naalagiartarfiuutigisut) nakkutigineqarnerat kommunip ataatsimiititaliaa susassaqartoq suleqatigalugu pissaaq.

  Imm. 3. Naalakkersuisut nakkutilliinermut malittarisassiorsinnaapput.

 

  § 21. Ilagiit sinniisaasa oqaluffinnik toqusullu inaannik sananissamut, aaqqissornissaannut, aserfallatsaaliornissaannut pinnersarnissaannullu kiisalu init naalagiartarfittut atorneqartut (atuarfiit naalagiartarfiutigisut) aaqqissornissaannut pinnersarnissaannullu siunnersuutit palasimut atuagarsuarnik allattuisuusumut saqqummiutissavaat.

Imm. 2. Siunnersuutit ilagiit sinniisaasa saqqummiussaat taakku piumasaqarneratigut Biskoppimut Naalakkersuisunullu saqqummiunneqassapput.

 

  § 22. Iivangiiliup nalunaajaatigineqarnissaata periarfissagissaarnissaa ilagiit sinniisaasa pisussaaffigaat.

 

  § 23. Ilagiit sinniisaasa palasimut atuagarsuarnut allattuisumut nalunaarnermikkut makku aalajangiiffigissavaat:

1) naalagiarnernut aalajangersimasunut piffissaq atugassaq,

2) tussiutit nutaat aamma tussiutit tapiisa akuerisaasut atulersinnissaat,

3) palaseqarfimmi palasip atuagarsuarnik allattuisup inassuteqaateqarnera malillugu ulloq apersortitsivissaq pissutsillu allat apersortitsinermut tunngasut, aamma

4) ilagiinni suliniutit soorlu biibililerineq, meeqqanik inuusuttunillu sammisaqarneq, oqalugiartitsinerit, diakonitut sulineq suliniutillu assingusut aallartinneqarnissaat.

  Imm. 2. Palasi ajoqiluunniit ilagiit sinniisaannit akuerineqassapput

1) naalagiarnerni aalajangersimasuni katersuiniartoqarnissaanut, aamma

2) naalagiarnerni aalajangersimasuni imaluunniit ilagiinnut tunngasunik suliaqarnerni naalagiarnermi ileqqorisassanik allanik imaluunniit ritualinik allanik akuerineqarsimasunik siornatigut ilagiinni atorneqartarsimasunit allaasunit atuinissamut.

  Imm. 3. Palasi ajoqiluunniit ilagiit sinniisaannit Biskoppimillu akuerineqassapput naalagiarnerni aalajangersimasuni imaluunniit ilagiinnut tunngasunik suliaqarnerni naalagiarnermi ileqqorisani ritualinilu allannguuteqalaartitsisoqassappat imaluunniit tussiutit tussiutillu tapii akuerisaasunit allaanerusut atorneqassappata.

  Imm. 4. Apeqqutit suulluunniit ilagiinni sulinermut tunngasut sukumiinerusumik misissugassatut isumaliutigisassatullu piukkunnartut ilagiit sinniisaasa palaseqarfimmi palasi atuagarsuarnik allattuisoq aqqutigalugu Biskoppimut provstimullu saqqummiussinnaavaat.

 

Kapitali 6

Ilinniartitaanerit

 

  § 24. Biskoppip palasinik, ajoqinik pattattunillu aamma palasip ikiortaanik ilinniartitseqqinnerit ingerlaqqillunilu ilinniartitsinerit isumagisassarai.

Imm. 2. Naalakkersuisut palasinik, ajoqinik pattattunillu aamma palasip ikiortaanik ilinniartitseqqinnerit ingerlaqqillunilu ilinniartitsinerit pillugit aalajangersakkanik aalajangersaasinnaapput.

 

  § 25. Biskoppip isumagisaraa ajoqinik ilinniartitsineq, naalagiartitsinermi aamma ilagiinnut tunngasuni suliaqarnermi, allattukkanik atuaanermi, oqaluttuareqqiinermi allatullu saqqummiussinermi piginnaasassanik ilinniartup pissarsisinneqarnissaanik siunertaqartoq, taamaalilluni ajoqi suliamut ilisimasaqarluni akisussaassuseqarlunilu ilagiinnut inuiaqatigiinnullu tunngatillugu kiffartornermini isumaginnissinnaasunngorlugu.

  Imm. 2. Biskoppip ajoqinik ilinniartitsinermi aaqqissuussineq aalajangersartassavaa, tamatumani aamma pikkorissaasarnermut ataatsimiititaliaq, ilinniakkamut isernissamut piumasaqaatit aamma ilinniakkap imai aamma annertussusia, kiisalu ilinniagaqarsimanermut allagartat. Biskoppip ilinniakkamik aaqqissuussineq Naalakkersuisunut akuersissutigisassatut nassiuttassavaa.

 

  § 26. Biskoppip isumagisaraa pattattunik ilinniartitsineq, piginnaaneqarfigalugu pattattutut kiffartornerup, allatigullu ilagiinni nipilersornermi, matumanittaaq erinarsoqatigiinnik siulersuinermi, suliani piginnaasassanik ilinniartup pissarsisinneqarnissaanik siunertaqartoq. Ilinniartitaaneq illoqarfinni nunaqarfinnilu naalagiarnermi nipilersorteqarnerup siuarsaavigineqarneranut iluaqutaassaaq. Ilinniartitaanermi pingaarnersaavoq ilagiinni nipilersornissamut tunngasut.

  Imm. 2. Biskoppip pattattunik ilinniartitsinermik aaqqissuussineq aalajangersartassavaa, ilinniakkamut isernissamut piumasaqaatit aamma ilinniakkap imai aamma annertussusia, kiisalu ilinniagaqarsimanermut allagartat. Biskoppip ilinniakkamik aaqqissuussineq Naalakkersuisunut akuersissutigisassatut nassiuttassavaa.

 

Kapitali 7

Atorfinitsitsinermut sulilernissamullu piumasaqaatit

 

  § 26 a. Kalaallit Nunaanni ilagiinni palasitut atorfinni atorfinissinnaapput:

1) inuit upperisarsiornerup tungaatigut Ilisimatusarfimmi bacheloritut naammassinnissimasut imaluunniit danskit universitetianni upperisarsiornerup tungaatigut kandidatitut soraarummeersimasut kingornatigullu pastoralseminariumimi ilinniarnermik ingerlatsisimasut,

2) inuit ilisimasat tungaasigut ilinniarfissuarmi ilinniartitsisunngorniarnermut nallersuussinnaasumik ilinniarsimasut, tamatumalu saniatigut kristumiussutsimut ilisimatusarnermi malittarisassat Naalakkersuisunit aalajangersarneqartut malillugit ingerlaqqiffiusumik ilinniarsimasut, aammalu

3) inuit ilagiinni danskit naalagaaffiata tapersersugaanni palasiusimasut imaluunniit palasiunissamut piumasaqaatinik naammassinnissimasut.

  Imm. 2. Kalaallit Nunaanni Ilagiinni palasit ilagiinni danskit naalagaaffiata tapersersugaanni ilaasortaassapput.

  Imm. 3. Kalaallit Nunaanni Ilagiinni palasit malittarisassat Naalakkersuisunit suliarineqartut naapertorlugit kalaallit oqaasiinik ilisimasaqassapput.

  Imm. 4. Palasit ilinniarnerannut ilinniaqqinnerannullu ilagiit ilinniarfianni ilinniarnermut peqataasimanissaq palasitut atorfinitsitsinissamut piumasaqaataanissaa Naalakkersuisut aalajangersinnaavaat. Tamanna pillugu malittarisassanik erseqqinnerusunik Naalakkersuisut aalajangersaasinnaapput, tassunga ilaalluni pikkorissarnermi akissarsiaqarneq.

 

  § 26 b. Naalakkersuisut biskoppip inassuteqareerneratigut inuk § 26 a, imm. 1-imi piumasaqaatinik naammassinnissimanngitsoq palasitut atorfimmi atorfinitsinneqarnissaannut immikkut ittumik akuerisinnaavaat.

 

  § 26 c. Naalakkersuisut biskoppip inassuteqareerneratigut ilinniarnerup tungaatigut piumasaqaatinik § 26 a, imm. 1, nr. 1 aamma nr. 2-mi taaneqartunut taarsiullugu aalajangersakkanik aalajangersaasinnaapput inunnik piumasaqaatinik taakkuninnga naammassinnissinnaasunik amigaateqartoqassappat.

 

  § 26 d. Kinaluunniit Kalaallit Nunaanni Ilagiinni palasitut atorfinitsinneqartoq biskoppimit soraarummeersinneqarsimassaaq, ivertinneqarsimassaaq, Ilagiinnut palasitut neriorsuisimassaaq biskoppillu uppernarsaasigaanik palasitut sulisinnaanngortitaasimassalluni.

 

Palasitut atorfinitsitsinermi suleriaatsit

 

  § 26 e. § 26 f malillugu oqaaseqaammik tunniussisoqarnissaa pitinnagu sapinngisamik biskoppip imaluunniit provstip biskoppip piginnaatitaata aamma ilagiit sinniisaanni ilaasortat qinikkat akornanni qinnuteqaatinik ilisimatitsiffiusumik ataatsimiittoqassaaq. Ataatsimiinnissaq qinnuteqarfissamut piffissaliussap kinguninnguatigut biskoppimit aalajangerneqassaaq biskoppimillu provstimilluunniit biskoppimit piginnaatinneqartumit aqunneqassalluni. Ilagiit sinniisaannit ataatsimit arlalinnilluunniit qinnuiginnittoqareerneratigut imaluunniit tamanna biskoppimit kissaatigineqarpat biskoppip ilagiillu sinniisaasa akornanni ilisimatitsiffiusumik allamik ataatsimiittoqassaaq.

  Imm. 2. Ilisimatitseqatigiiffiusunik ataatsimiinnerit tamanut ammasuunngillat. Ataatsimiinnernit imaqarniliaasinnaasut allattugaatillu isertuussassaapput.

  Imm. 3. Ilisimatitsiffiusumik ataatsimiinnermut imm. 1-imi taaneqartumut piffissaliussanut periusissanullu malittarisassanik Naalakkersuisut aalajangersaasinnaapput.

 

  § 26 f. Palaseqarfimmi palasitut atorfinnut inuttaqanngitsunut atorfinitsitsinissaq pillugu palaseqarfimmi ilagiit sinniisaannit qinikkat oqaaseqaammik tunniussaqassapput. Sapinngisamik biskoppip ilisimatitsiffiusumik ataatsimiititsinerata kinguninngua oqaaseqaateqarfiusumik ataatsimiittoqassaaq. Oqaaseqaat taasiffissatut pingaarnersiorlugu tunniunneqassaaq, ilagiillu sinniisaat ajornanngippat peqataasut 3-t taaneqarsinnaasuni piukkunneqartunik taaneqarnerpaanik nalunaaruteqassallutik.

  Imm. 2. Ilagiit sinniisaasa oqaaseqaateqareerneranni, sulili biskoppi Naalakkersuisunut imm. 4 naapertorlugu inassuteqaateqanngitsoq qinnuteqartup qinnuteqaatini tunuartippagu, nutaamik oqaaseqaateqarnissamut ataatsimiinnermik ingerlatsisoqassaaq.

Qinnuteqartoq qinnuteqaammik utertitsisoq oqaaseqaateqarnissamut ataatsimiinnermi siullermi taaneqarsimanngippat nutaamik oqaaseqaateqarniarluni ataatsimiinnermik ingerlatsisoqassanngilaq.

Imm. 3. Oqaaseqaateqarniarluni ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.

  Imm. 4. Biskoppi sapinngisamik qinnuteqartunik pingasunik pingaarnersiorlugit tulleriiaarneqartunik inassuteqassaaq. Biskoppip qinnuteqaatit ilagiit sinniisaasa oqaaseqaataannik ilallugit kiisalu nammineq inassuteqaanni ilanngullugu Naalakkersuisunut nassiutissavai.

 

  § 26 g. Palasitut atorfimmi kina atorfinitsinneqassanersoq Naalakkersuisut aalajangissavaat, tak. §§ 26 e aamma 26 f. Qinnuteqartoq biskoppip inassuteqaataanut ilanngunneqanngitsoq atorfinitsinneqarsinnaanngilaq biskoppi oqaaseqaateqarsimatinnagu.

 

  § 26 h. Qinnuteqartoq ilagiit sinniisaasa oqaaseqaataannut ilanngunneqarsimanngitsoq Naalakkersuisut atorfinitsissinnaanngilaat. Qinnuteqartoq ilisimatitsiffiusumik ataatsimiinnermi siullermik taasisoqarnerani tamanit qinerneqartoq peqataanillu biskoppip inassuteqaataani ersertoq atorfimmi atorfinitsinneqassaaq.

  Imm. 2. Immikkut ittumik pissutissaqartoqarpat nutaamik inuttassarsiuisoqarnissaa nutaamillu inassuteqartoqarnissaa Naalakkersuisut aalajangersinnaavaat.

 

  § 26 i. Suliffeqarfinnut inunnulluunniit ilagiit sinniisaannik pilersitsiffiusimanngitsunut sullissinissaq siunertaralugu palasitut atorfiit tamakkiisumik ilaannakuusumilluunniit pilersinneqartut inuttalernissaanni periusissanut malittarisassanik Naalakkersuisut aalajangersaasinnaapput. Tamanna aamma atuuppoq ukioq ataaseq angullugu sivikinnerusumik atorfinitsitsisoqassatillugu.

 

Provstinik atorfinitsitsinermi suleriaaserineqartoq

 

  § 26 j. § 26 k malillugu oqaaseqaammik tunniussisoqarnissaa pitinnagu sapinngisamik biskoppip imaluunniit provstip biskoppip piginnaatitaata aamma ilagiit sinniisaanni ilaasortat qinikkat akornanni qinnuteqaatinik ilisimatitsiffiusumik ataatsimiittoqassaaq. Ataatsimiinnissaq qinnuteqarfissamut piffissaliussap kinguninnguatigut biskoppimit aalajangerneqassaaq biskoppimillu provstimilluunniit biskoppimit piginnaatinneqartumit aqunneqassalluni. Ilagiit sinniisaannit ataatsimit arlalinnilluunniit qinnuiginnittoqareerneratigut imaluunniit tamanna biskoppimit kissaatigineqarpat biskoppip ilagiillu sinniisaasa akornanni ilisimatitsiffiusumik allamik ataatsimiittoqassaaq.

  Imm. 2. Ilisimatitseqatigiiffiusumik ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.

  Imm. 3. Ilisimatitsiffiusumik ataatsimiinnermut imm. 1-imi taaneqartumut piffissaliussanut periusissanullu malittarisassanik Naalakkersuisut aalajangersaasinnaapput.

 

  § 26 k. Provsteqarfimmi ilagiit sinniisaat qinikkat provsteqarfimmi provstitut imaluunniit domprovstitut atorfinnut inuttaqanngitsunut atorfinitsitsinissaq pillugu oqaaseqaateqassapput. Sapinngisamik biskoppip ilisimatitsiffiusumik ataatsimiititsinerata kinguninngua ilisimatitsiffiusumik ataatsimiittoqassaaq.

  Imm. 2. Qinnuteqartup qinnuteqaatini utertippagu, ilagiit sinniisaasa oqaaseqaateqareerneranni aammalu biskoppi suli Naalakkersuisunut inassuteqaateqanngitsoq imm. 4 naapertorlugu, nutaamik oqaaseqaateqarnissamut ataatsimiinnermik ingerlatsisoqassaaq. Qinnuteqartoq qinnuteqaammik utertitsisoq oqaaseqaateqarnissamut ataatsimiinnermi siullermi taaneqarsimanngippat nutaamik oqaaseqaateqarniarluni ataatsimiinnermik ingerlatsisoqassanngilaq.

Imm. 3. Oqaaseqaateqarniarluni ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.

  Imm. 4. Biskoppi sapinngisamik qinnuteqartunik pingasunik pingaarnersiorlugit tulleriiaarneqartunik inassuteqassaaq. Biskoppip qinnuteqaatit ilagiit sinniisaasa oqaaseqaataannik ilallugit namminerlu inassuteqaanni ilanngullugu Naalakkersuisunut nassuitissavai.

 

  § 26 l. Naalakkersuisut aalajangissavaat provstitut imaluunniit domprovstitut atorfimmut kina atorfinitsinneqassanersoq. Qinnuteqartoq biskoppip inassuteqaataanut ilanngunneqanngitsoq atorfinitsinneqarsinnaanngilaq biskoppi oqaaseqaateqartinnagu.

  Imm. 2. Provsti palaseqarfimmi provsteqarfiup allaffiata inissisimaffiani najugaqarlunilu sulissaaq.

 

Kalaallit Nunaanni ilagiit ataanni ilagiinni sulisut allaffeqarfinnilu sulisut qassiunissaat kiisalu atorfiit ilaannut atorfinitsitsinissamut oqartussaasut

 

  § 26 m. Biskoppi Naalakkersuisut isumaqatiginiareerlugit Kalaallit Nunaanni ilagiit ataanni ilagiinni sulisunut allaffeqarfinnilu sulisunut atorfiit pilersinnissaat atorunnaarsinnissaallu pillugit aalajangersakkanik aalajangiissaaq.

  Imm. 2. Biskoppip, palasimik atuagarsuarnik allattuisumik ilagiillu sinniisaannik tusarniaareernerup kingorna, ajoqinik organistinillu atorfinitsitsinissamut soraarsitsinissamullu provstit piginnaatissinnaavai.

  Imm. 3. Biskoppip, palasimik atuagarsuarnik allattuisumik ilagiillu sinniisaannik tusarniaareernerup kingorna, oqaluffinni ikiortinut, soorlu pedelit, eqqiaasut il.il., atorfinitsitsinissamut soraarsitsinissamullu provstit piginnaatissinnaavai.

  Imm. 4. Provsteqarfinni palaseqarfinnilu allaffinni allaffissornikkut sulisunik atorfinitsitsinissamut soraarsitsinissamullu provstit biskoppip piginnaatissinnaavai.

 

Kapitali 8

Akiliutinik akiliisitsisarneq

 

  § 26 n. Atermik allanngortitsiniarluni kalerriuteqarnermi tamatigut akiliuteqartoqartassaaq.

  Imm. 2. Atermik allanngortitsineq akuerineqartoq atermik allanngortitsinermut uppernarsaammik aamma inunngornermut/kuisinnermut uppernarsaammik imaluunniit inunngornermut/atserneqarnermut uppernarsaammik uppernarsarneqassaaq. Uppernarsaammik taamaattumik tunniussinermi immikkut ittumik akiliuteqartoqassanngilaq.

  Imm. 3. Ilagiit oqartussaasulluunniit allat aqqutigalugit atermik allanngortitsinerup kingunerisaanik uppernarsaatinik allanik tunniussinermi tunniusseqqinnermituulli akiliummik akiliuteqartitsisoqassaaq, tak. § 26 o.

 

§ 26 o. Atuagarsuit imarisaat aqqutigalugit uppernarsaammik tunniusseqqinnermi akiliutigineqartussat ukuupput:

a) Inunngornermut/kuisinnermut uppernarsaat

b) Inunngornermut/atserneqarnermut uppernarsaat

c) Inunngornermut uppernarsaat

d) Katinnermut uppernarsaat

e) Toqusumik nalunaarut

 

  § 26 p. Oqaatsit marluiit atorlugit, kalaallisut/tuluttut, atuagarsuit imarisaat aqqutigalugit uppernarsaammik tunniussinermi akiliuteqartoqartassaaq.

 

  § 26 q. Oqartussat aningaasartuutaannut matussusiinissamut atorneqartussanut akiliutigineqartut akilersinnissaannut akiliutillu annertussusissaannut malittarisassat sukumiinerusut aalajangersarnissaannut Naalakkersuisut piginnaatinneqarput, tak. §§ 26 n – 26 p.

 

Kapitali 9

Aalajangersakkat assigiinngitsut

 

  § 27. Naalakkersuisut ilagiit sinniisaanni qinikkatut ullormusiaqartinnissaat, angalanermut najugaqarnermullu aningaasartuutinut taartisiaqartinnissaat kiisalu sulitilluni akissarsiassaraluanik annaasaqarnermut taartisisarnissaat pillugu aalajangersagaliussapput

 

  § 28. Ilagiit sinniisaasa palasillu aalajangigaat aalajangiinermit sapaatip-akunneri 4-at qaangiutsinnagit provstimut naammagittaalliuutigineqarsinnaapput.

  Imm. 2. Provstit aalajangigaat aalajangiinermit sapaatip-akunneri 4-at qaangiutsinnagit Biskoppimut naammagittaalliuutigineqarsinnaapput.

  Imm. 3. Biskoppip aalajangigai aalajangiinermut sapaatip akunneri 4-at qaangiutsinnagit Naalakkersuisunut naammagittaalliuutigineqarsinnaapput. Aalajangiinerit annerusumik upperisarsiornermut tunngassuteqartut taamaallaat misilinneqassapput inatsisitigut tunngavinnut attuumassuteqarpata.

 

Kapitali 10

Atuutilersitsineq

 

  § 29. Inatsisartut inatsisaat ulloq 1. august 2010 atuutilerpoq.

  Imm. 2. Peqatigisaanik Ilageeqarneq pillugu Inatsisartut peqqussutaat nr. 15, 28. oktober 1993-imeersoq, aamma provsteqarfinni ataatsimiititalianut il.il. qinersisarneq pillugu Namminersornerullutik Oqartussat nalunaarutaat nr. 30, 27. juni 1994-imeersoq atorunnaarsinneqarput.

  Imm. 3. Aalajangersakkat Inatsisartut peqqussutaat imm. 2-mi taaneqartoq naapertorlugu aalajangiunneqartut imaluunniit atuutsinneqartut atortuuinnassapput inatsisartut peqqussutaat manna Inatsisartulluunniit peqqussutaat allat malillugit allamik taarserneqarnissamik imaluunniit atortuujunnaarsinneqarnissamik tungaanut.

 

  § 30. Provsteqarfinni ataatsimiititaliat 1. august 2010-mi atuukkunnaassapput.

  Imm. 2. Ilagiinni atorfinitsitsisarnerit pillugit Inatsisartut peqqussutaanni nr. 8, 30. oktober 1998-imeersumi § 11-mi, imm. 2-mi ”provsteqarfinni ataatsimiititaliat” taarserneqassaaq uuminnga ”ilagiit sinniisaat”.

 

  § 31. Atuutilersitsinerup kinguninnguatigut palasinik atuagarsuarnik allattuisunik nutaanik toqqaasoqassaaq, tak. § 15, imm. 1. Palasit atortuulersitsinerup nalaani pisortaasut palaseqarfimmi palasit allat assigalugit palasitut atuagarsuarnik allattuisutut qinerneqarsinnaapput.

 

___________________________________________________________________________

 

Inatsisartut inatsisaat nr. 2, 29. novembari 2013-meersoq (Ilageeqarnermi atorfinitsitsisarneq, uppernarsaatit akiliuteqartarneq palasit ajoqillu upperisarsiornerup tungaatigut pissuteqartumik ilagiinni suliassanik suliaqarnissanut pisussaajunnaarsitaasarnerat, aalajangiinernik allaffissornermi ingerlatsisunut qulliunerusunut suliassanngortitseqqittarnernik killiliineq kiisalu allaffissornermi pinngitsoorani malittarisassiortarnissaq pillugu aalajangersakkat)[1] atortuulersitsinermut aalangersakkanik tullinnguuttunik imaqarpoq:

 

§ 2

 

Inatsisartut inatsisaat ulloq 1. januar 2014 atuutilissaaq. Peqatigisaanik Ilagiinni atorfinitsitsisarnerit pillugit Inatsisartut peqqussutaat nr. 8, 30. oktober 1998-imeersoq, atuukkunnaarsinneqarput.

  Imm. 2. Ilagiinni atorfinitsitsisarnerit pillugit Inatsisartut peqqussutaat nr. 8, 30. oktober 1998-meersoq naapertorlugu malittarisassat aalajangersagaasut piuinnartinneqartulluunniit atorunnaarsinneqarnertik imaluunniit Inatsisartut Inatsisaat manna allatigulluunniit inatsisit naapertorlugit aalajangersagaasunit taarserneqarnertik tikillugu atuutissapput, kisiannili Ilagiinni ikiortit atorfinitsinneqartarnerat pillugu Namminersornerullutik Oqartussat nalunaarutaat nr. 39, 29. december 1998-imeersoq atuukkunnaarsinneqarpoq.

 

___________________________________________________________________________

 

Inatsisartut inatsisaat nr. 27, 3. decembari 2018-imeersoq (Ajoqinik aamma pattattunik ilinniartitaanernik aaqqissuussinerit aamma nipangiusimasassanik ilisimatitseqatigiiffiusumik oqaaseqaatissanullu tunngasunik il.il. ataatsimiittarnerit)[2] atortuulersitsinermut aalajangersakkanik tullinnguuttunik imaqarpoq:

§ 2

 

Inatsisartut inatsisaat atortuulerpoq 1. januar 2019.

Imm. 2. Ilutigisaanik atorunnaarput Namminersornerullutik Oqartussat nalunaarutaat nr. 15, 26. april 1985-imeersoq, Kalaallit Nunaanni ajoqissat ilinniartitaanissaannut tunngasoq aamma Kalaallit Nunaanni organistit ilinniartitaasalernissaannik Namminersornerullutik Oqartussat nalunaarutaat nr. 26, 1. december 1987-imeersoq.

 

___________________________________________________________________________

 

Inatsisartut inatsisaat nr. 29, 25. Juuni 2026-meersoq (Palasinik, provstinik, domprovstinillu atorfinitsitsisarneq soraarsitsisarnerlu, palaseqarfiup atuagarsuinik suliassanik agguaassisinnaalerneq kiisalu atorfiit pilersinneqartarnerat atorunnaarsinneqartarnerallu)[3] atortuulersitsinermut aalajangersakkanik tullinnguuttunik imaqarpoq:

 

§ 2

 

Inatsisartut inatsisaat ulloq 1. januar 2027 atuutsinneqalissaaq.

 

___________________________________________________________________________

 

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, ulloq 19. oktober 2026

 

 

 

Karl Davidsen (atsior.)

Naalakkersuisoqarfimmi pisortaq

 

 

 

/Claus Kleemann (atsior.)