Ilageeqarneq pillugu Inatsisartut inatsisaat nr. 9, 19. maj 2010-meersumi § 7, imm. 2 naapertorlugu aalajangersarneqarpoq:

Kapitali 1

Qinersinissamut piffissaq

  § 1.  Kalaallit Nunaanni ilagiinnut biskopissamik allattoqarfimmit inassuteqarnikkut qaqugu qinersisoqarnissaa kiisalu innersuunneqartut nalunaarutiginissaannut piffissamik killiliineq Ilageeqarnermut Naalakkersuisup aalajangerlugulu nalunaarutigisassavaa.

Kapitali 2

Qinersinermi aqutsisut

  § 2.  Qinersinermi aqutsisussanik qinersinermut ataatsimiititaliortoqassaaq. 
  Imm. 2.  Qinersinermut Ataatsimiititaliap inuttarissavai Naalakkersuisunut siulittaasup naalakkersuisoqarfiani pisortaq, kommunit ataatsimoorlutik toqqagaat ataaseq kiisalu Inatsisartut Allattoqarfiani allattaaneq taakkuluunniit sinniisaat.
  Imm. 3.  Qinersinermut Ataatsimiititaliap siulittaasua tassaassaaq Naalakkersuisut siulittaasuata naalakkersuisoqarfiani pisortaq.
  Imm. 4.  Qinersinermut Ataatsimiititaliap suliani allattortassavai.
  Imm. 5.  Ilagiit allaffiat qinersinermut ataatsimiititaliamut allatseqarfiussaaq.

  § 3.  Qinersinermut Ataatsimiititaliaq qinersinerup piareersarneqarnerani ingerlanneqarneranilu piginnaatitaavoq pissutsit naapertorlugit, matumanilu sila peqqutaatillugu, qinersinermi maleruaqqusanik saneqqutsisinnaanissamut, patsisissaatillugu qinersinerup isertuussassaanerata qinersinerullu ingerlanneqarnerani nakkutigisaanerata tamatigut isumannaarsimanissaat.

Kapitali 3

Qinigaasinnaasut

  § 4.  Biskopimut inuk ataasiinnaq toqqarneqarsinnaavoq:
1)  Kalaallit Nunaanni ilagiinni palasitut sulisimasoq sulisorluunniit,
2)  kalaallit oqaasiinik ilisimasaqartoq, aamma 
3)  upperisarsiornerup tungaatigut Ilisimatusarfimmi bacheloritut naammassinnissimasut imaluunniit nunat avannarliit universitetianni upperisarsiornerup tungaatigut kandidatitut soraarummeersimasut kingornatigullu pastoralseminariumimi ilinniarnermik ingerlatsisimasut.

  § 5.  Biskoppissatut qinigassanngortikkusuttut qinigassanngortinnissamut nalunaarut allattoqarfimmut tunniutereersimassavaat nalunaarutiginninnissamut killiliussaq qaangiutinnginnerani, tamannalu pissaaq § 1 naapertorlugu.

  § 6.  Qineqqusaarnermut nalunaarut minnerpaamik inunnik 20-nik atsiorneqarsimassaaq annerpaamillu 30-init qinersisinnaasunit innersuunneqassallutik § 8 naapertorlugu. Atsiornerit nalunaarummi namminermi issinnaapput taassumaluunniit assilineraniissinnaallutik.
  Imm. 2.  Qineqqusaartup atsiornermigut qineqqusaarnini pillugu uppernarsarlugu atsiorsimassaaq.
  Imm. 3.  Qinersisartoq ataaseq qineqqusaartunut arlalinnut innersuussisinnaanngilaq.
  Imm. 4.  Nalunaarutiginninnermi ilanngunneqassapput innersuussat ataasiakkaarlugit atii, atsiorneri, inuuii najugaallu.

  § 7. Allattoqarfiup qineqqusaartut pillugit nalunaarutit atortussaatitaanerat pillugu nakkutilliissaaq qineqqusaartullu aqqinik nalunaarutigineqartunik allattuissalluni, taakkulu sapinngisamik piaarnerpaamik qinersinermut ataatsimiititaliamut qineqqusaartut aqqinik tunniussinissamut killiliussap naannginnerani nassiunneqassallutik, taamaattoq imm. 2 takuuk.
  Imm. 2.  Nalunaaruteqarneq amigaateqarpat qineqqusaartut ullunik marlunnik piffissalerlugit periarfissinneqassapput nalunaarummik aaqqiinissaannut.
  Imm. 3.  Qinersinermut ataatsimiititaliaq qineqqusaartut nalunaarutigineqartut atortussaaneri pillugit sapinngisamik piaartumik inaarutaasumik aalajangiissaaq tamannalu allattoqarfimmut nalunaarutigissallugu. Qinigassanngortitap nalunaarutigineqarnerani kukkuneqarsimappat Qinersinermut Ataatsimiititaliap pineqartoq kukkunerup aaqqinneqarnissaanut ulluinnarnik marlunnik piffissalissavaa.
  Imm. 4.  Qinigassanngortittut akuerisaasut aqqi ilagiit sinniisaasa siulittaasuinut tamanut allattoqarfik piaartumik nalunaaruteqassaaq.

Kapitali 4

Qinersisinnaatitaasut

  § 8.  Biskopimik qinersinermi qinersisinnaatitaapput biskopeqarfimmi ilagiit sinniisaat kiisalu palasit kiffartortut, matumanittaaq palasiugallartut aamma palasit qinersinerup nalaani palasiunerminnit sulinngiffeqarallartut.

  § 9.  Allattoqarfiup qinersisinnaatitaasutut akuerisaasut nalunaarsimasut qinersinermut allattorsimaffiat suliarissavaa. Qinersinermut allattorsimaffik qineqqusaartut nalunaarutiginissaannut killiliussap qaangiutinnginnerani suliarereerneqarsimassaaq, tak § 1.
  Imm. 2.  Qinersinissamut allattorsimaffimmi ilaatinneqassapput qinersisinnaatitaasut aqqi, inuuii najugaallu qinersisinnaatitaasullu tamarmik immikkut normumik (qinersinermi normumik) tunineqassapput.
  Imm. 3.  Kinaluunniit qinersisussat allassimaffiannut ilanngunneqarsimatinnani qinersisinnaatitaanngilaq.

Kapitali 5

Qinersinermut piareersaanerit

  § 10.  Qinersinermut ataatsimiititaliap allattoqarfiata qinersinissamut atortussat suliarissavai kiisalu ilagiit sinniisaasa siulittaasuannut nassiutissallugit.

Kapitali 6

Qinersinermik naammassinninneq

  § 11.  Ilagiit sinniisaata siulittaasuata taassumalluunnit sinniisaata nakkutigissavaa allakkat puussaat tiguneqartut naammannersut kiisalu qinersinissamut allattorsimaffik ilagiit sinniisaannut qinersisinnaasut aqqi tamarmik piffimmiittut ilanngullugit.

  § 12.  Ilagiit sinniisaata siulittaasuata taassumalluunnit sinniisaata piffissaq aalajangissavaa ilagiillu sinniisaannik ataatsimiigiaqqusissalluni.
  Imm. 2.  Ataatsimiinnermut ilagiinni qinersisinnaatitaasut tamarmik qaaqquneqassapput, matumani ilaallutik palasit, provstit biskopilu.
  Imm. 3. Ataatsimiinnermut qinersisinnaatitaasut taamaallaat peqataasinnaapput.

  § 13.  Ataatsimiinnermi ilagiit sinniisaata siulittaasuata qineqqusaartut aqqi ilisimatitsissutigissavai.
  Imm. 2.  Ilagiit sinniisaata siuliuttaasuata allakkat puussai qinersisinnaatitaasunut tunniutissavai qinersisinnaatitaasullu tunineqartup aqqata saniatigut krydsilissallugu.
  Imm. 3.  Qinersineq pissaaq immikkut qinersinermut allagartaq atorlugu tassanilu kalaallisut qallunaatullu allaqqassalluni "biskopimut qinersineq".
  Imm. 4.  Qinersisup qinersinermut allagartaq immersussavaa qinikkami aqqa allallugu. Taassuma kingorna qinersisup qinersinermut allagartaq allakkap puuanut ilanngunneqarsimasumut ikissavaa ilagiillu sinniisaata siulittaasuannut tunniullugu.
  Imm. 5.  Qinersineq naammassineqariartoq ilagiit sinniisaata siulittaasuata imm. 4-mi taaneqartut kiisalu qinersinermi atortut atorneqanngitsoortut ataatsimoortillugit allakkat puuinut ilissavai. Allakkat puuat taanna kiisalu qinersinermut allattorsimaffik ilanngullugu siulittaasup kingusinnerpaamik ullup tulliani allattoqarfimmut nassiutissavai.

  § 14.  Qinersisup qinersisimasup kina qinersimanerlugu paasissutissiissutigisussaatitaanngilaa.

Kapitali 7

Qinersinermik naatsorsuineq

  § 15.  Pappiaraq taasivik taasivigineqarsimasoq atorsinnaanngilaq:
1)  aqqit arlallit qinerneqarsimappata. 
2)  qulakkeerlugu aalajangerneqarsinnaanngippat, qinigassanngortittunit sorleq qinersisartumit qinerusunneqarsimanersoq,
3)  qinersinermi allakkap puussaa matoqqasoq arlalinnik taasissutinik imaqarpat imaluunniit 
4)  taasissut unioqqutitsinikkut pilersinneqarsimasutut ilimagineqarpat.

  § 16.  Allattoqarfiup qinersineq naatsorsussavaa.
  Imm. 2.  Taasinernik kisitsineq tamanut ammasuuvoq. Inunnik qinersisinnaatitaasunik ikinnerpaamik marlunnik qinersinermi taasinerup kisinneqarnerani tamanut ammasuusumi najuuttoqanngippat, qinersisinnaasut akornanni inunnik marlunnik qinersisinnaatitaasunik uppernarsaasussatut najuuttussanik aggersaasoqassaaq.

  § 17. Qinersineq amerlanerussuteqarnikkut aalajangerneqassaaq.
  Imm. 2.  Qineqqusaartut marluk amerlaqatigiinnik qinerneqarsimappata makitsinikkut aalajangiisoqassaaq.

  § 18.  Qinersinerup inernera pigineqarsimalerpat allattoqarfiup tamanna pillugu qinersinermut ataatsimiititaliamut nalunaarutigissavaa.
  Imm. 2.  Qinersinermut ataatsimiititaliap inernerit akuersissutigissavai Ilageeqarnermullu Naalakkersuisoqarfimmut qineqqusaartut inerneri ilanngullugit tamatuminnga nalunaaruteqassalluni.
  Imm. 3.  Qinersinerup inernera Ilageeqarnermut Naalakkersuisoqarfimmit tamanut saqqummiunneqassaaq.

Kapitali 8

Atortuulersitsinissamik atorunnaarsitsinissamillu aalajangersagaq

  § 19.  Nalunaarut ulloq 1. januar 2020-mi atuutilissaaq.
  Imm. 2.  Biskopimik qinersineq pillugu Namminersornerullutik Oqartussat nalunaarutaanni nr. 5-imi, 16. februar 1995-imeersoq aamma atorunnaarpoq.

Namminersorlutik Oqartussat, ulloq 16. december 2019

Ane Lone Bagger 

/

Lone Nukaaraq Møller