§ 1

Inatsisartut inatsisaat nr. 9, ulloq 19. maj 2010-meersoq, allanngortinneqartoq Inatsisartut inatsisaatigut nr. 2, ulloq 29. november 2013-imeersukkut, imaattunik allannguuteqartitsisoqassaaq:

1. § 20, imm. 1, oqaaseqatigiit siulliit imatut oqaasertalerneqassapput:

”Palasip atuagarsuarnik allattuisuusup nakkutigisarissavai oqaluffiup illutai toqusut inaat ilanngullugu.”

2. § 20-imi, imm. 3-tut ikkunneqassaaq:

” Imm. 3. Naalakkersuisut nakkutilliinermut malittarisassiorsinnaapput.”

3. § 25, imm. 2, imatut oqaasertalerneqassaaq:

” Imm. 2. Biskopip ajoqinik ilinniartitsinermi aaqqissuussineq aalajangersartassavaa, tamatumani aamma pikkorissaasarnermut ataatsimiititaliaq, ilinniakkamut isernissamut piumasaqaatit aamma ilinniakkap imai aamma annertussusia, kiisalu ilinniagaqarsimanermut allagartat. Biskopip ilinniakkamik aaqqissuussineq Naalakkersuisunut akuersissutigisassatut nassiuttassavaa.”

4. § 26, imm. 2, imatut oqaasertalerneqassaaq:

” Imm. 2. Biskopip pattattunik ilinniartitsinermik aaqqissuussineq aalajangersartassavaa, ilinniakkamut isernissamut piumasaqaatit aamma ilinniakkap imai aamma annertussusia, kiisalu ilinniagaqarsimanermut allagartat. Biskopip ilinniakkamik aaqqissuussineq Naalakkersuisunut akuersissutigisassatut nassiuttassavaa.”

5. § 26 e-mi imm. 1-ip kingorna immikkoortutut nutaatut ikkunneqassaaq:

”  Imm. 2.  Ilisimatitseqatigiiffiusunik ataatsimiinnerit tamanut ammasuunngillat. Ataatsimiinnernit imaqarniliaasinnaasut allattugaatillu isertuussassaapput.”

Imm. 2 taamaasilluni imm. 3-ngussaaq.

6. § 26 f-imi ikkunneqassapput imm. 1-ip kingorna nutaatut immikkoortutut:

”  Imm. 2.  Ilagiit sinniisaasa oqaaseqaateqareerneranni, sulili biskoppi Naalakkersuisunut imm. 4 naapertorlugu inassuteqaateqanngitsoq qinnuteqartup qinnuteqaatini tunuartippagu, nutaamik oqaaseqaateqarnissamut ataatsimiinnermik ingerlatsisoqassaaq.

Qinnuteqartoq qinnuteqaammik utertitsisoq oqaaseqaateqarnissamut ataatsimiinnermi siullermi taaneqarsimanngippat nutaamik oqaaseqaateqarniarluni ataatsimiinnermik ingerlatsisoqassanngilaq.

  Imm. 3.  Oqaaseqaateqarniarluni ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.”

Imm. 2 taamaasilluni imm. 4-nngussaaq.

7. § 26 j-imi imm. 1-ip kingorna immikkoortutut nutaatut ikkunneqassaaq:

”  Imm. 2.  Ilisimatitseqatigiiffiusumik ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.”

Imm. 2 taamaasilluni imm. 3-ngussaaq.

8. § 26 k-mi imm. 1-ip kingorna nutaatut immikkoortutut ikkunneqassapput:

”  Imm. 2.  Qinnuteqartup qinnuteqaatini utertippagu, ilagiit sinniisaasa oqaaseqaateqareerneranni aammalu biskoppi suli Naalakkersuisunut inassuteqaateqanngitsoq imm. 4 naapertorlugu, nutaamik oqaaseqaateqarnissamut ataatsimiinnermik ingerlatsisoqassaaq. Qinnuteqartoq qinnuteqaammik utertitsisoq oqaaseqaateqarnissamut ataatsimiinnermi siullermi taaneqarsimanngippat nutaamik oqaaseqaateqarniarluni ataatsimiinnermik ingerlatsisoqassanngilaq.

  Imm. 3.  Oqaaseqaateqarniarluni ataatsimiinnerit tamanut ammasuunngillat. Ataatsimiinnernit imaqarniliortoqarsimappat allattuisoqarsimappalluunniit, taakkua isertuussassaapput.”

Imm. 2 taamaasilluni imm. 4-nngussaaq.

§ 2

Inatsisartut inatsisaat atortuulerpoq 1. januar 2019.

  Imm. 2.  Ilutigisaanik atorunnaarput Namminersornerullutik Oqartussat nalunaarutaat nr. 15, 26. april 1985-imeersoq, Kalaallit Nunaanni ajoqissat ilinniartitaanissaannut tunngasoq aamma Kalaallit Nunaanni organistit ilinniartitaasalernissaannik Namminersornerullutik Oqartussat nalunaarutaat nr. 26, 1. december 1987-imeersoq.

Namminersorlutik Oqartussat, ulloq 3. december 2018