Namminersorlutik Oqartussat Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit Inatsisartut inatsisaat pillugu nalunaarutaat
Manna Umiarsualivimmiinnermut akileraarutit pillugit Inatsisartut inatsisaat nr. 20, 30. oktober 1992-imeersoq, Inatsisartut inatsisaatigut nr. 4, 13. maj 1993-imeersukkut, Inatsisartut inatsisaatigut nr. 14, 28. oktober 1993-imeersukkut, Inatsisartut inatsisaatigut nr. 11, 13. juni 1994-imeersukkut, Inatsisartut inatsisaatigut nr. 17-imut, 3. november 1994-imeersukkut, Inatsisartut inatsisaatigut nr. 1, 20. maj 1998-imeersukkut, Inatsisartut inatsisaatigut nr. 2, 21. maj 2002-meersukkut, Inatsisartut inatsisaatigut nr. 3, 27. marts 2006-imeersukkut, Inatsisartut inatsisaatigut nr. 14, 2. november 2006-imeersukkut, Inatsisartut inatsisaatigut nr. 8, 5. december 2008-meersukkut, Inatsisartut inatsisaatigut nr. 14, 3. juni 2015-imeersukkut, Inatsisartut inatsisaatigut nr. 61, 20 november 2023-meersukkut kiisalu Inatsisartut inatsisaatigut nr. 79, 21. november 2025-meersukkut allannguutilik nalunaarutigineqarpoq.
§ 1. Umiarsuit nunalinneranni umiarsualiviilluunniit avataanni kisarneranni imaluunniit Kalaallit Nunaanni kisarfimmut tikinneranni akileraarutinik akitsuutinillu ukuninnga akileeqquneqarput, taamaattorli § 6 takuuk:
1) § 3 malillugu umiarsualivimmiinnermut akileraarut.
2) § 4 malillugu umiarsuarnut takornariartaatinut umiarsuarnullu ilaasartaatinut ilaasunut akitsuut.
3) § 5 malillugu umiarsuarnut takornariartaatinut umiarsuarnullu ilaasartaatinut avatangiisinut aserfallatsaaliuinermullu akitsuutit.
Umiarsualivimmiinnermut akileraarutit
§ 1 a. (Atorunnaarpoq)
§ 1 b. (Atorunnaarpoq)
§ 1 c. (Atorunnaarpoq)
§ 2. (Atorunnaarpoq)
§ 3. Umiarsuit tamarmik nunalinneranni umiarsualiviilluunniit avataanni kisarneranni imaluunniit Kalaallit Nunaanni kisarfimmut tikinneranni akileraarutinik ukuninnga akileeqquneqarput, taamaattorli § 6 takuuk:
Imm. 2. Umiarsualivimmiinnermut akileraarut minnerpaamik 100 bruttotonimut (BT) ukununnga BT-mut akigititaqarlutik naatsorsorneqartassapput:
1) Umiarsuaq takornariartaat ullormut unnuamullu aallartittumut 1 kr. 10 oori, umiarsuup 30.000 BT qaangersimanngippagu, taamaattorli § 3 takuuk.
2) Umiarsuup takornariartaatip BT-ia 30.000-uppat taannaluunniit qaangerpagu ullormut unnuamullu aallartittumut 2 kr. 20 ooriussaaq, taamaattorli imm. 3 takuuk.
3) Umiarsuaq ilaasunik angallassisussatut sananeqarsimasoq (umiarsuaq ilaasartaat) 100 BT-iuppat taannaluunniit qaangerlugu angissuseqarpat ullormut unnuamullu 1 kr. 10 ooreqassaaq.
4) Angallatit aalisariutit Danmarkimi, Savalimmiuni nunaniluunniit allani angerlarsimaffeqartutut nalunaarsorneqarsimasut ullormut unnuamullu aallartittumut 0 kr. 70 ooreqarput.
5) Umiarsuit nassiussanik angallassisartussatut sananeqarsimasut, kiisalu umiarsuit allat sap.ak. aallartinneri tamaasa 0 kr. 70 oori.
Imm. 3. Sunngiffimmi angallatit nunanit allaneersut 100 BT ataallugu angissusillit, matumani angallatit tingerlaatillit, umiarsualivimmiinnermut akitsuutaat ullormut unnuamullu aallartittumut 300 kr.-qarput.
Imm. 4. Umiarsuit takornariartaatit ilaasartaatillu Nuummi Kangerlussuarmilu tulanneranni ullormut unnuamullu aallartittumut akileraarut, umiarsuup bruttotonnagea 30.000 BT qaangersimanngippagu BT-mut 0 kr. 00 ooriussaaq, aamma umiarsuup BT-ia 30.000 -uppat taannaluunniit qaangerlugu angissuseqarpat BT-mut 0 kr. 70 ooriussaaq. Sunngiffimmi angallatinut nunanit allaneersunut akitsuut 0 kr.-uvoq.
Ilaasunut akitsuut
§ 4. Umiarsuit takornariartaatit umiarsuillu ilaasartaatit umiarsualivimmiinnermut akileraarummut tapitut, ilaasut tamarmik amerlassusaat malillugit umiarsuit nunalinneranni, kisarneranni imaluunniit kisarfimmut tikinnermi nunalinerit tamaasa ataasiarlutik ilaasunut akitsuummut akiliisassapput. Ilaasumut ataatsimut ilaasunut akitsuut 50 kr.-uvoq. Umiarsuit ilaasartaatit 100 BT ataallugu oqimaassusillit ilaasut akitsuutaannut akiliisassanngillat.
Imm. 2. Ukiumut aningaasanut inatsiseqarfiusumut 2026-mut taassumalu kingorna ilaasunut akiliut Inatsisartunit aningaasanut inatsimmi aalajangerneqassaaq.
Avatangiisinut aserfallatsaaliuinermut akiliut
§ 5. Umiarsuit takornariartaatit umiarsuilluunniit ilaasartaatit umiarsualivinnut umiarsualiviilluunniit avataannut niusineranni, tassunga ilanngullugit sineriammi pinngortitamilu niusinermi, kommunalbestyrelsi avatangiisinut aserfallatsaaliuinermullu annerpaamik 50 kr.-nik akiligassanik aalajangersaanissamut piginnaatinneqarpoq. Umiarsuit ilaasartaatit 100 BT ataallugu oqimaassusillit avatangiisinut aserfallatsaaliuinermut akiliummut akiliisassanngillat.
Imm. 2. Nunaligussinermi umiarsuup ilaasui tunngavigalugit nunaligunneqartut amerlassusaat apeqqutaatinnagit akiliut naatsorsorneqassaaq. Angallammit ataatsimit nunniussinerit qanoq amerlatiginersut apeqqutaatinnagu sumiiffimmi ataatsimi qaammatisiutit malillugit ulloq unnnuarlu ataatsimi aqqusaarneq ataatsitut isigineqarpoq.
Imm. 3. Kommunalbestyrelsip sumiiffiit attuumassutillit tamakku toqqassavai, aamma ukiup siuliani akileraartarnermut aqutsisoqarfimmut kingusinnerpaamik 1. oktobarimi nalunaarutigineqartussat akiligassat annertussusaat taakkununnga atasut aalajangersassallugit.
Ilaatinneqanngitsut
§ 6. § 3 aamma 4 malillugit akileraaruteqartussaatitaanut ilaatinneqanngitsut kiisalu § 5 malillugu akitsuutinut ilaatinneqanngitsut tassaapput:
1) Aalisariutit Kalaallit Nunaanni angerlarsimaffeqartutut nalunaarsorneqarsimasut.
2) Angallatit aalisariutit Kalaallit Nunaanni aalisarnermik suliffeqarfimmit attartorneqartut.
3) Umiarsuit 200 bruttotonimit (BT) minnerusumik angissuseqartut Kalaallit Nunaanni angerlarsimaffeqartutut nalunaarsornikut.
4) Niuerfimmi atugaanngitsut sorsuutit danskinit nunanillu allanit pigineqartut, kiisalu danskit nunallu allat naalagaaffiisa umiarsuaataat.
5) Umiarsuit Namminersornerullutik Oqartussat ingerlatsiviinit, Kalaallit Nunaanni kommunimit imaluunniit danskit naalagaaffiannit pigineqartut attartorneqartulluunniit.
6) Umiarsuit aseruatitersimasut usimik allagartaat malillugit umiarsualivimmut pineqartumut nunalittussaanngikkaluartut.
7) Umiarsuit taamaallaat pujorsiutiminnik aaqqiiniarlutik, nakorsamik atorfissaqartitsillutik, inuttatik taarsissallugit, imaluunniit napparsimasunik, toqusunik imaluunniit umiusimasunik imaluunniit imaani umiarsuarmut ikisaminnik imaluunniit ilisimasortamik niusiartorlutik umiarsualivimmut nunalinniartut.
8) Umiarsuit taamaallaat ilisimasassarsiornermut imaluunniit ikiuiniarnermut atorneqartartut.
9) Umiarsuit nunaqarfinnik isorliunerusunillu pilersuinermi aalajangersimasunik ingerlaarfeqartut.
10) Ilaasartaatit umiarsuaatileqatigiiffinnit pigineqartut ilaasunik angallassinermut tunngatillugu Kalaallit Nunaanni Namminersorlutik Oqartussanut sullissinissamik isumaqatigiissuteqartut.
11) Umiarsuit Kalaallit Nunaanni aalajangersimasumik inissinneqartut, taamaallaat umiarsuartut annanniutitut, kalittaatitut, siorartaatitut, ujaqqanik qalluutitut, aaqqartartut umiarsuaattut prammitulluunniit atorneqartut.
12) Umiarsuit Kalaallit Nunaanni nunami suliffissuarmi tunisassiornissaq siunertaralugu aalisakkanik imaluunniit aalisakkanit tunisassianik Danmarkimi, Savalimmiuni nunaniluunniit allani pisianik usingiartut.
13) Umiarsuit nunaqarfinni avinngarusimasunilu aalisakkanik aalisakkaniillu tunisassianik pisiortortut.
14) Umiarsuit uuliamik uulianilluunniit tunisassianik taamaallaat assartuisut.
15) Umiarsuit 100%-imik pisortanit pigineqartut sinnerlugit taamaallaat eqqakkanik atortussanillu atoqqitassanik katersuinermut, angallassinermut usingiarnermullu atatillugu atorneqartut.
Imm. 2. Umiarsuit umiarsualivimmut ataatsimut arlalinniluunniit aalajangersimasumik angalasut § 4 malillugu akileraaruteqartussaatitaanngillat aamma § 5 malillugu akitsuutinik akiliisinneqartussaanngillat
Nalunaaruteqarneq, akunnaallisaaneq akiliinerlu
§ 7. § 4 malillugu akileraarutit akilerneqartussat umiarsuup tulanneranit ilaasut amerlassusaat pillugit paasissutissanik, umiarsualiviulluunniit avataani kisarneranit imaluunniit kisarfimmut tulanneranit tunngaveqartillugit aalajangerneqassapput. § 3 malillugu akileraarutit akilerneqartussat aamma § 5 malillugu akiliutit akilerneqartussat kingusinnerpaamik umiarsuup umiarsualivimmit imaluunniit kisarfimmit aallarnerani aalajangerneqassapput.
Imm. 2. Umiarsuup naalagaa, isumaqatiginninniartartua agentiataluunniit kingusinnerpaamik umiarsualivimmiit kisarfimmiilluunniit aallarnerani akileraarutinut akiligassanik akitsuutinillu akileeqqusinernik naatsorsuutinik kiisalu umiarsuup suussusersinissaanut il.il. paasissutissat pisariallit toqqaannartumik akileraaruseriffimmut elektroniskinngorlugit nalunaarutigisalertussaavai.
Imm. 3. § 3, imm. 2, nr. 1-3 naapertorlugit umiarsuit takornariartaatit umiarsuillu ilaasartaatit ilaasut amerlassusaat, kiisalu § 5 malillugu akiligassanut akilerneqartussanut atugassatut taakku inuiaassusaat, kiisalu sumiiffiit tikinneqartut amerlassusaat ilaasullu angallammiittut amerlassusaat nalunaarutigissavaat.
§ 8. § 3 malillugu naatsorsuinermi tunngaviup naatsorsornerani BT kisitsisinut ilivitsunut qaninnernut ammut akunnaallisinneqassaaq.
Imm. 2. §§ 3 aamma 4 akileraarutit akilerneqartussat aamma § 5 malillugu akiligassat akilerneqartussat umiarsuup umiarsualivimmit kisarfimmilluunniit aallarneranit akiligassanngussapput.
Imm. 3. Akileraaruseriffimmiit akiligassiissutip tiguneraniit akileraarutit akiligassat, akiligassallu akilerneqartussat akiligassanngornikut akileraaruseriffimmut ullut 14-it qaangiutsinnagit akilerneqassapput, taamaattorli imm. 4 takuuk.
Imm. 4. Umiarsuit umiarsualivimmut ataatsimut arlalinnulluunniit aalajangersimasumik angalasartut § 3 malillugu umiarsualimmiinnermut akileraarut pillugu Imm. 2 aamma 3-mi aalajangersagaasunit allaanerusumik akilersueriaaseqarnissamik akileraaruseriffimmut isumaqatigiissusiorsinnaapput.
Imm. 5. Ukiup tulliani januari naatinnagu akileraaruseriffiup avatangiisinut aserfallatsaaliuinermullu akiliutinit isertitat, takuuk § 5, kommuninut ukiumut ataasiarluni naatsorsoriarlugit akilertassavai.
§ 9. Akileraarutit akiligassat, akiligassallu akilerneqartussat umiarsuup akiligassai naatsorsorneqarsinnaanngippata akileraaruseriffiup akileraarutit akiligassat, akiligassallu akilerneqartussat missingiillutik annertussusilersinnaavaat.
§ 10. Inatsisartut inatsisaat manna malillugu akileraarutinut akiligassanik, akitsuutinik akileeqqusissutinik, aamma akiliissutissanngortitat akilernissaannut assigiittut pineqarlutik umiarsuaatilik, piginnittoq, attartuisoq aamma pisortaasoq akiliisussaapput.
§ 11. Naalakkersuisut akiligassat kinguaattoorutit akilerneqanngippata, akileraarutit, akiligassat pillaammillu akiligassiissutit suliamillu suliarinninnermut aningaasartuutit akilerneqarnissaasa imaluunniit akiligassat qularnaveeqqusernissaasa tungaanut umiarsuit Kalaallit Nunaanni umiarsualivinnut tulannissaat itigartissinnaavaat.
§ 12. Naalakkersuisut Inatsisartut inatsisaata matuma atuutilersinnissaanut uku pillugit erseqqinnerusunik malittarisassiorsinnaapput.
Imm. 2. Akileraaruseriffiup nalunaaruteqartarfia pillugu najukkami umiarsualiveqarnermut oqartussat innersuussinissamut ilitsersuinissamullu tunngatillugu piumasaqaatinik Naalakkersuisut aalajangersaasinnaapput.
Imm. 3. Naalakkersuisut kommunit avatangiisinut aserfallatsaaliornermullu akiliummit isertitat atuinissaannut aamma naatsorsuusiornerannut malittarisassanik erseqqinnerusunik aalajangersaasinnaapput.
§ 13. Inatsisartut inatsisaata atuutsinnissaanut Naalakkersuisut maleruagassiorsinnaapput aammalu umiarsuit ilaasa akileraarutinik akiliinnginnissaannik oqilisaaffigineqarnissaannilluunniit aalajangersagaliorsinnaallutik.
§ 14. Kinaluunniit piaaraluni mianersuaalliorujussuarluniluunniit makku pillugit akiliisinneqarsinnaavoq:
1) akitsuutit akiligassallu akilerneqartussat naatsorsorneqarnissaannut taakkualu nakkutigineqarnissaannut atugassanik eqqunngitsumik paasinerlunneqarsinnaasumilluunniit paasissutissiisoq imaluunniit paasissutissanik nipangiussiinnartoq, imaluunniit
2) pineqartumut akileraarutinut tunngavigisanik, akiligassanillu akileeqqusissutinik missingersuutigisatut inissiinerit nalunaarutiginerisa kingornatigut kingusinnerpaamik sapaatip akunneri sisamat qaangiutinnginneranni akileraarutinut akiliutissat, akiligassanillu akileeqqusinernik inissiinerit appasippallaarneri pillugit akileraaruseriffimmut nalunaaruteqanngitsoq.
Imm. 2. Kialuunniit, Inatsisartut inatsisaat manna naapertorlugu maleruagassiani aalajangersakkanik piaaraluneerluni mianersuaalliorujussuarluniluunniit unioqqutitsisup akiliisinneqarnissaa pillugu aalajangersagaliortoqarsinnaavoq.
Imm. 3. Aktieselskabit, anpartsselskabit/ andelsselskabit, piginneqatigiillutik umiarsuaatileqatigiit assigisaalluunniit unioqqutitsippata piginneqatigiiffik akiliisinneqarnissamut akisussaatinneqarsinnaavoq.
§ 15. Naalakkersuisut imaluunniit Naalakkersuisut tamatumunnga piginnaatitaata Inatsisartut inatsisaanni matumani aalajangersakkanik unioqqutitsisoq nalunaarfigisinnaavaat suliassap eqqartuussinertaqanngitsumik naammassineqarsinnaaneranik, unioqqutitsisup unioqqutitsinini nassuerutigippagu akiliisitsissullu nalunaarummi taaneqartoq piffissaq aalajangersimasoq, qinnuteqarnikkullu sivitsorneqarsinnaasoq, nallertinnagu akilerumallugu akuersippat.
Imm. 2. Nalunaarummut imm. 1-imi taaneqartumut tunngatillugu aalajangersakkat Kalaallit Nunaanni eqqartuussisarnermi inatsimmi kapitali 5-imi, unnerluussinermik imaqartut aammattaaq atuupput.
Imm. 3. Akiliisitsissut piffissaq eqqorlugu akilerneqarpat imaluunniit aalajangiunneqarnermi kingorna akiliisitsiniarnikkut akilersinneqarpat qanoq iliuuseqaqqittoqas sanngilaq.
Imm. 4. Pillaammik akiliisitsissut landskarsimut nakkartinneqassaaq.
§ 16. Inatsisartut inatsisaat ullormi 1. januar 1993-imi atuutilissaaq.
Inatdsisartut inatsisaat nr. 4, 13. maj 1993-imeersoq[1] atuutilernissamut ima aalajangersagaqarpoq:
§ 2
Inatsisartut inatsisaat una atortuulissaaq aprilip aallaqqaataani 1993-imi.
Inatsisartut inatsisaat nr. 14, 28. oktober 1993-imeersoq[2] atuutilernissamut ima aalajangersagaqarpoq:
§ 2
Inatsisartut inatsisaat 1. juli 1994-imi atuutilissaaq.
Inatsisartut inatsisaat nr. 11, 13. juni 1994-imeersoq[3] atuutilernissamut ima aalajangersagaqarpoq
§ 2
Inatsisartut inatsisaat 1. juli 1994-imi atuutilissaaq.
Imm. 2. § 1, nr. 1-imi aalajangersagaq ullormiit 1. januar 1994-imiit atuutilerpoq.
Inatsisartut inatsisaat nr. 17, 3. november 1994-imeersoq[4] atuutilernissamut ima aalajangersagaqarpoq:
§ 2
Inatsit manna atortuulersinneqarpoq 1. januar 1995 aallarnerfigalugu.
Inatsisartut inatsisaat nr. 1, 20 maj 1998-imeersoq[5] atuutilernissamut ima aalajangersagaqarpoq:
§ 2
Inatsisartut inatsisaat manna 1. juli 1998 aallarnerfigalugu atortuulissaaq.
Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaat (Umiarsuit takornarianik angallassissutit ilaasunik angallassinermi akitsuummik akiliisinneqartalernissaat) nr. 2, 21. maj 2002-meersoq[6] atuutilernissamut ima aalajangersagaqarpoq:
§ 2.
Inatsisartut inatsisaat manna 1. juli 1998 aallarnerfigalugu atortuulissaaq.
Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaata allanngortinneqarneranik Inatsisartut inatsisaat (Umiarsuit takornarianik angallassissutit ilaasunik angallassinerannut akileraarummik qaffaaneq kiisalu angalanerit ataatsimut aaqqissuuteriikkat akileraarutaat) nr. 3, 27. marts 2006-imeersoq[7] atuutilernissamut ima aalajangersagaqarpoq:
§ 2.
Inatsisartut inatsisaat atuutilissaaq ulloq 1. april 2006-imiit.
Inatsisartut akitsuutit il.il. pillugit inatsisaasa ilaasa allanngortinnerat pillugu inatsisartut inatsisaat (Akileraaruserinerup qitiusumiit ingerlanneqalernerata kinguneranik allannguutit aamma nakkutilliinermut maleruagassat erseqqissaateqarfigineri) nr. 14, 2. november 2006-imeersoq[8] atuutilernissamut ima aalajangersagaqarpoq:
§ 11
Inatsisartut inatsisaat 1. januar 2007-imi atortuulissaaq.
Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneranik inatsisartut inatsisaat (Akileraarutip qaffannera) nr. 8, 5. december 2008-meersoq[9] atuutilernissamut ima aalajangersagaqarpoq:
§ 2
Inatsisartut inatsisaat 1. januar 2009-miit atortuulerpoq.
Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneqarneranik Inatsisartut inatsisaat
(Umiarsuarni takornarianik angallassisuni ilaasut akileraarutaannik aamma ilaasunik nalinginÂnaasunik takornarianillu angallassinermi ilaasut akileraarutaannik atorunnaarsitsineq) nr. 14, 3. juni 2015-imeersoq[10] atuutilernissamut ima aalajangersagaqarpoq:
§ 2
Inatsisartut inatsisaat 1. juni 2015-imi atuutilissaaq.
Umiarsualivimmiinnermut akileraarutit pillugit Inatsisartut inatsisaata allanngortinnera pillugu Inatsisartut inatsisaat (Umiarsuarni takornarianik angallassisuni ilaasut akileraarutaannik atuutilersitseqqinneq) nr. 61, 20. november 2023-meersoq[11] atuutilernissamut ima aalajangersagaqarpoq:
§ 2
Inatsisartut inatsisaat ulloq 1. december 2023 atuutilissaaq.
Imm. 2. § 1, nr. 1-12, ulloq 1. januar 2024 atuutilissapput.
Inatsisartut inatsisaat (Kangerlussuarmi umiarsualivissinnermut umiarsuarnullu aalajangersimasunut akileraarutinik allanngortitsineq, kiisalu elektroniskinngorlugit nalunaaruteqartarnermut tunngatillugu aaqqiineq)[12] nr. 79, 21. november 2025-meersoq atuutilernissamut ima aalajangersagaqarpoq:
§ 2
Inatsisartut inatsisaat ulloq 1. januaari 2026 atuutilissaaq.
Aningaasaqarnermut Akileraartarnermullu Naalakkersuisoqarfik ulloq 7. januaari 2026
Nikolai S. Christensen (atsior.)
Naalakkersuisoqarfimmi pisortaq
/Morten W. Selvejer (atsior.)
[1] Inatsimmik allannguineq § 3, imm. 1, nr. 3 aamma imm. 2-mut tunngavoq.
[2] Inatsimmik allannguineq § 2, nr. 5 aamma 7-imut aamma § 3, imm. 1, nr. 3, aamma imm. 2-mut tunngavoq.
[3] Inatsimmik allannguineq § 3, imm. 1, nr. 3-mut aamma nr. 4-mut aamma imm. 2-mut kiisalu § 15, imm. 4-mut tunngavoq.
[4] Inatsimmik allannguineq § 3, imm. 1, nr. 3-mut tunngavoq.
[5] Inatsimmik allannguineq § 3-mut tunngavoq.
[6] Inatsimmik allannguineq qulequttamut, § 1-imut, § 2, nr. 10-mut kiisalu § 5-imut tunngavoq
[7] Inatsimmik allannguineq § 1, imm. 2-mut aamma § 5, imm. 4-mut tunngavoq.
[8] Inatsimmik allannguineq § 1-imut, §§ 5-imut, 9-mut aamma §§ 13-imut, 14-imut tunngavoq.
[9] Inatsimmik allannguineq § 1, imm. 2 aamma 3-mut tunngavoq.
[10] Inatsimmik allannguineq qulequttamut, §§ 1, imm 2 aamma 3-mut, § 3, imm. 1, nr. 1-imut kiisalu § 5, imm. 1 aamma 4-mut tunngavoq.
[11] Inatsimmik allannguineq qulequttamut, § 1, imm. 1-imut, §§ 1 a-mut, 1 b-mut, 1 c-mut, § 2-mut, § 3, imm. 1 aamma 2-mut, §§ 4-mut, 6-imut, § 10-mut, 12-imut kiisalu § 14, imm. 1 aamma imm. 2-mut tunngavoq.
[12] Inatsimmik allannguineq §§ 1-10 aamma § 12-mut tunngavoq.
Ataatsimoortunngorlugu allanneqarnera
- Umiarsualivimmiinnermut akileraarutit pillugit Inatsisartut inatsisaat - (20/1992)
- Umiarsualivimmiinnermut akileraarutit pillugit Inatsisartut inatsisaata allannguutissaatut Inatsisartut inatsisaat - (4/1993)
- Umiarsualivimmiinnermut akileraarutit pillugit Inatsisartut inatsisaata allannguutissaatut Inatsisartut inatsisaat - (11/1994)
- Umiarsualivimmiinnermut akileraarutit pillugit Inatsisartut inatsisaata allannguutissaatut Inatsisartut inatsisaat - (17/1994)
- Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaat - (1/1998)
- Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaat (Umiarsuit takornarianik angallassissutit ilaasunik angallassinermi akitsuummik akiliisinneqartalernissaat) - (2/2002)
- Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaata allanngortinneqarneranik Inatsisartut inatsisaat (Umiarsuit takornarianik angallassissutit ilaasunik angallassinerannut akileraarummik qaffaaneq kiisalu angalanerit ataatsimut aaqqissuuteriikkat akileraarutaat) - (3/2006)
- Inatsisartut akitsuutit il.il. pillugit inatsisaasa ilaasa allanngortinnerat pillugu inatsisartut inatsisaat (Akileraaruserinerup qitiusumiit ingerlanneqalernerata kinguneranik allannguutit aamma nakkutilliinermut maleruagassat erseqqissaateqarfigineri) - (14/2006)
- Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneranik inatsisartut inatsisaat (Akileraarutip qaffannera) - (8/2008)
- Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneqarneranik Inatsisartut inatsisaat (Umiarsuarni takornarianik angallassisuni ilaasut akileraarutaannik aamma ilaasunik nalinginnaasunik takornarianillu angallassinermi ilaasut akileraarutaannik atorunnaarsitsineq) - (14/2015)
- Umiarsualivimmiinnermut akileraarutit pillugit Inatsisartut inatsisaata allanngortinnera pillugu Inatsisartut inatsisaat (Umiarsuarni takornarianik angallassisuni ilaasut akileraarutaannik atuutilersitseqqinneq) - (61/2023)
- Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit Inatsisartut inatsisaata allanngortinnera pillugu Inatsisartut inatsisaat - (79/2025)