Meeqqanut ileqqaakkat pillugit Inatsisartut inatsisaat nr. 13, 2. november 2006-imeersoq
Pissarsisinnaatitaasut
§ 1. Meeraq ukiut 0 aamma 18-it akornanni ukiulik akileraaruteqaattaanngitsumik meeqqamut ileqqaakkanik pissarsisinnaatitaavoq, meeraq 1. januarimi:
1) Kalaallit Nunaanni najukkamut imaluunniit aalajangersimasumik najukkamut Qitiusumik Inunnik Nalunaarsuiffimmut nalunaarsorneqarsimappat.
2) Meeqqanut inuusuttunullu ikiuisarneq pillugu inatsisartut peqqussutaat naapertorlugu Qallunaat Nunaanni, Savalimmiuni imaluunniit nunani allani angerlarsimaffiup avataani inissinneqarsimappat.
3) Inuit annertuumik innarluutillit pillugit inatsisartut peqqussutaat naapertorlugu Qallunaat Nunaanni, Savalimmiuni imaluunniit nunani allani inissinneqarsimappat.
4) Meeqqalluunniit sulisitsisua meeqqap ilinniagaqarneranut ilinniagaqarluniluunniit Kalaallit Nunaata avataani najugaqarneranut atatillugu ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappat.
5) Angajoqqaani ilagalugit Kalaallit Nunaata avataanut nuuppat, aammalu angajoqqaat imaluunniit angajoqqaat sulisitsisui ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappata.
6) Angajoqqaat atorfeqarnermut ilaatillugu ilinniagaqarneranni ilinniagaqaqqinneranniluunniit piffissami sivisunerpaamik qaammatini 12-ini angajoqqaani ilagalugit Kalaallit Nunaata avataanut nuussimappat.
7) Kalaallit Nunaata avataani efterskolernermut Namminersornerullutik Oqartussanit tapiissutisisarpat.
Tunngaviit
§ 2. Meeqqamut ileqqaarutit tassaapput ukiut meeqqap meeqqamut ileqqaarutinik pissarsivigisinnaasai, tak. § 1, ukiuni pineqartuni § 5, imm. 1-imi oqaaseqatigiit aappaanni taaneqartunik aningaasanik meeqqap pisinnaasaanik gangerlugit.
Imm. 2. Meeqqanut ileqqaakkanut tapit tunniunneqarnissaannut maleruagassanik Naalakkersuisut aalajangersaasinnaapput, tassungalu ilanngullugit tapit nalunaarsorneqarneri, naatsorsorneri angissusilerneqarnerilu pillugit maleruagassat. Tapit, oqaaseqatigiinni siullerni taaneqartutut, akileraarusigassaanngillat.§ 3. Meeqqanut ileqqaakkanik meeqqap pisassai, tassungalu ilanngullugit § 2, imm. 2 malillugu tapit, allamut tunniunneqarsinnaanatilluunnit qularnaveeqqusiunneqarsinnaanngillat, soorluttaaq pisassat tamarmiusut arsaarinnissutigineqarsinnaanngitsut, akiliisitsissutigineqarsinnaanngitsut imaluunniit attoqqusaajunnaarsitaasinnaanngitsut.
§ 4. Meeqqamut ileqqaakkat qinnuteqaateqarnikkut tunniunneqassapput aningaaserivimmilu meeqqap kontoanut ikineqassallutik.
Imm. 2. Qaammammi meeqqap 18-inik ukioqalerfiata naanerani tunniussineq siusinnerpaamik pisinnaavoq. Meeqqap 22-inik ukioqalerfiani qaammatip naannginnerani tunniussinissamik qinnuteqaat tunniunneqarsimanngippat meeqqanut ileqqaakkanik pissarsisinnaatitaaneq atorunnaassaaq.
Imm. 3. Meeqqamut ileqqaakkanik tunniussinermut piumasaqaataavoq aningaasat ukunun-nga atorneqassasut uppernarsarneqassasoq.
1) Ilinniarneq sivikinnerpaamik ukiumik ataatsimik sivisussuseqartoq.
2) Nammineq najugassatut tassungalu ilanngullugu piginneqatigiilluni inissiamik sananeq pisinerluunniit.
3) Attartornermik isumaqatigiissummut atatillugu attartornermut aallarniutitut akiliutissap siumulluunniit akiliutissap akilerneqarnera. Siunertanulli taakkununnga attartornermut qaammammut akiliutissatut isumaqatigiissutigineqartut pingasoriaataasa annertoqataanik annerpaamik tunniussisoqarsinnaasoq.
4) Inigisareriikkap pitsanngorsarnera allilerneqarneranulluunniit.
5) Illumi atortorissaarutinik, pequtinik natersuarnillu pisineq.
6) Sullivimmik namminersortumik pilersitsinermi, sullivimmut atugassatut pigisat nalillit pissarsiarineqartut pissarsiarinerinut tamakkiisumik nalingat meeqqanut ileqqaakkat qaangersimagaangassuk. Meeqqanut ileqqaakkat inuit biiliinik pisinermut atugassatut tunniunneqarsinnaanngillat. Aningaasalersuisarfittut ingerlatseqatigiiffimmi assigisaanilu peqataaneq pilersitsinertut isigineqanngilaq.
7) Selskabini inuussutissarsiornermik ingerlatalinni aktienik piginneqataassutinillu pisineq. Tassunga atatillugu selskabit aningaasalersuisarfittut ingerlatseqatigiiffiit inuussutissarsiornermik ingerlatsivittut isigineqanngillat.
Meeqqanut ileqqaakkanit aningaasat agguagassat
§ 5. Aningaasanik meeqqanut ileqqaakkanit aningaasanut agguagassanut ukiut tamaasa ki-ngusinnerpaamik 30. april ikisisoqartassaaq. Meeqqanut ileqqaakkanut pisinnaatitaasut meeqqat amerlassusii tunngavigalugit aningaasat Inatsisartut aningaasanut inatsisaanni aalajangersarneqartassapput.
Imm. 2. Meeqqanut ileqqaakkanit aningaasat agguagassat Namminersornerullutik Oqartussat pigisaraat.§ 6. Meeqqanut Ileqqaakkanit aningaasat agguagassat uningasuutai tunngavigalugit Meeqqanut ileqqaakkanit aningaasat agguagassat aqunneqarnerinut aningaasartuutit Namminersornerullutik Oqartussat aamma Meeqqanut Ileqqaakkanit aningaasat agguagassat akunnerminni agguataassavaat.
Imm. 2. Namminersornerullutik Oqartussat aqutsinermut aningaasartuutinut akileeqataassutissaanut aningaasat matussutissat Inatsisartut aningaasanut inatsisaanni aalajangersarneqartassapput. Ukiumi aningaasanut inatsisiqalernissaq sioqqullugu 1. majimi meeqqanut ileqqaakkanit aningaasat agguagassani uninngasuutigineqartut tunngavigalugit aningaasat aalajangersarneqartassapput.
Imm. 3. Namminersornerullutik Oqartussat aqutsinermut aningaasartuutinut akileeqataassutissai tassaapput:
1) uninngasuutit 40 mio. kr.-init ikinneruppata 100 procent.
2) uninngasuutit 40 mio. kr.-it qaangersimappatigit 60 mio. kr.-inilli ikinneruppata 75 procent.
3) uninngasuutit 60 mio. kr.-it qaangersimappatigit 80 mio. kr.-inilli ikinneruppata 50 procent.
4) uninngasuutit 60 mio. kr.-it qaangersimappatigit 80 mio.kr.-inilli ikinneruppata 25 procent.
5) uninngasuutit 100 mio. kr.-it qaangersimappatigit 0 procent.
Pisinnaatitsissutit
§ 7. Meeqqanut ileqqaarutit allaffissornikkut aqunneqarneranni suliassat aamma Meeqqanut Ileqqaarutinut Aningaasat aningaasaliissutigineqartarneri pillugit Naalakkersuisut aningaaserivimmik imalunniit aningaasanik aqutsinermik suliaqartumik allamik isumaqatigiissuteqarsinnaapput.
Imm. 2. Meeqqanut Ileqqaarutinut Aningaasat allaffissornikkut aqunneqarnerannut taakkunanngalu akiliisarneq pillugit Naalakkersuisut annertunerusunik malittarisassiorsinnaapput, taassuma ataani aningaasat tunniunneqarnissaannik qinnuteqaateqartarnerit, uppernarsaanerit, maalaarutinik suliarinnittarneq ilaalu ilanngullugit.
Pineqaatissiisarnerit
§ 8. Najoqqutassani, inatsisip kinguneranik aalajangersakkani, aalajangersakkanik unioqqutitsinermi pillaatinik akiligassiinermi malittarisassanik aalajangersaasoqarsinnaavoq.
Atuutilersitsinermi ikaarsaarnermilu aalajangersakkat
§ 9. Inatsisartut inatsisaat atuutilerpoq 1. januar 2007
Imm. 2. Meeqqat piffissami 2. januarip aamma 30. aprilip 2007 akornanni 18-inik ukioqalersut meeqqanullu ileqqaaruteqarsinnaatitaasut, meeqqamut ileqqaarutit siusinnerpaamik 1. juni 2007-imi tigisunaavaat.
Namminersornerullutik Oqartussat, ulloq 2. november 2006
Hans Enoksen/
Josef Motzfeldt
Siullermeerinninnermut siunnersuut
Isumaliutissiissut (Aappassaaneerinninneq)
Aappassaaneerinninnermut allannguutissatut siunnersuut (akuerineqartoq)