16. oktober 2006

UKA 2006/31

Allannguutissatut siunnersuut

uunga

Uunga siunnersuut: Meeqqanut ileqqaakkat pillugit Inatsisartut Inatsisissaattut siunnersuut nr. xx, xx qaammat 2006-imeersoq

Naalakkersuisunit aappassaaniigassanngorlugu saqqummiussaq.

 

Taaguutaanut

Nr. 1. Inatsisissamut siunnersuutip taaguusernera imatut allassimassaaq:
"Uunga siunnersuut: Meeqqanut ileqqaakkat pillugit Inatsisartut inatsisaat nr. xx, xx qaammat 2006-imeersoq".

Qulequttamut

Nr. 2. § 1 sioqqullugu qulequtaq imatut allassimassaaq:
"Pissarsisinnaatitaasut".

§ 1-mut

Nr. 3. Oqaaseqatigiit ":"-tip tungaanut imatut allassimassaaq:
"Meeraq 0 aamma 18-it akornanni ukiulik akileraaruteqanngitsumik meeqqanut ileqqaakkanik pissarsisinnaatitaavoq, meeraq 1. januarimi".

Nr. 4. § 1, nr. 1-imiit nr. 4-imut imatut allassimassaaq:
"1) Kalaallit Nunaanni najukkamut imaluunniit aalajangersimasumik najukkamut Qitiusumik Inunnik Nalunaarsuiffimmut nalunaarsorneqarsimappat.
2) Meeqqanut inuusuttunullu ikiuisarneq pillugu inatsisartut peqqussutaat naapertorlugu Qallunaat Nunaanni, Savalimmiuni imaluunniit nunani allani angerlarsimaffiup avataani inissinneqarsimappat.
3) Inuit annertuumik innarluutillit pillugit inatsisartut peqqussutaat naapertorlugu Qallunaat Nunaanni, Savalimmiuni imaluunniit nunani allani inissinneqarsimappat.
4) Meeqqalluunniit sulisitsisua meeqqap ilinniagaqarneranut ilinniagaqarluniluunniit Kalaallit Nunaata avataani najugaqarneranut atatillugu ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappat."

Nr. 5. § 1, nr. 6 aamma 7, imatut allassimassaaq:
"6) Angajoqqaat atorfeqarnermut ilaatillugu ilinniagaqarneranni ilinniagaqaqqinneranniluunniit piffissami sivisunerpaamik qaammatini 12-ini angajoqqaani ilagalugit Kalaallit Nunaata avataanut nuussimappat.
7) Kalaallit Nunaata avataani efterskolernermut Namminersornerullutik Oqartussanit tapiissutisisarpat."

§ 2-mut

Nr. 6. § 2, imm. 2 imatut allassimassaaq:
"Imm. 2. Meeqqanut ileqqaakkanut tapit tunniunneqarnissaannut maleruagassanik Naalakkersuisut aalajangersaasinnaapput, tassungalu ilanngullugit tapit nalunaarsorneqarneri, naatsorsorneri angissusilerneqarnerilu pillugit maleruagassat. Tapit, oqaaseqatigiinni siullerni taaneqartutut, akileraarusigassaanngillat."

§ 3-mut

Nr. 7. § 3 imatut allassimassaaq:
"Meeqqanut ileqqaakkanik meeqqap pisassai, tassungalu ilanngullugit § 2, imm. 2 malillugu tapit, allamut tunniunneqarsinnaanatilluunnit qularnaveeqqusiunneqarsinnaanngillat, soorluttaaq pisassat tamarmiusut arsaarinnissutigineqarsinnaanngitsut, akiliisitsissutigineqarsinnaanngitsut imaluunniit attoqqusaajunnaarsitaasinnaanngitsut."

§ 4-mut

Nr. 8. § 4 imatut allassimassaaq:
"Meeqqamut ileqqaakkat qinnuteqaateqarnikkut tunniunneqassapput aningaaserivimmilu meeqqap kontoanut ikineqassallutik.
Imm. 2. Qaammammi meeqqap 18-inik ukioqalerfiata naanerani tunniussineq siusinnerpaamik pisinnaavoq. Meeqqap 22-inik ukioqalerfiani qaammatip naannginnerani tunniussinissamik qinnuteqaat tunniunneqarsimanngippat meeqqanut ileqqaakkanik pissarsisinnaatitaaneq atorunnaassaaq.
Imm. 3. Meeqqamut ileqqaakkanik tunniussinermut piumasaqaataavoq aningaasat ukunun-nga atorneqassasut uppernarsarneqassasoq:
1) Ilinniarneq sivikinnerpaamik ukiumik ataatsimik sivisussuseqartoq.
2) Nammineq najugassatut tassungalu ilanngullugu piginneqatigiilluni inissiamik sananeq pisinerluunniit.
3) Attartornermik isumaqatigiissummut atatillugu attartornermut aallarniutitut akiliutissap siumulluunniit akiliutissap akilerneqarnera. Siunertanulli taakkununnga attartornermut qaammammut akiliutissatut isumaqatigiissutigineqartut pingasoriaataasa annertoqataanik annerpaamik tunniussisoqarsinnaasoq.
4) Inigisareriikkap pitsanngorsarnera allilerneqarneranulluunniit.
5) Illumi atortorissaarutinik, pequtinik natersuarnillu pisineq.
6) Sullivimmi namminersortumik pilersitsinermi, sullivimmut atugassatut pigisat nalillit pissarsiarineqartut pissarsiarinerinut tamakkiisumik nalingat meeqqanut ileqqaakkat qaangersimagaangassuk. Meeqqanut ileqqaakkat inuit biiliinik pisinermut atugassatut tunniunneqarsinnaanngillat. Aningaasalersuisarfittut ingerlatseqatigiiffimmi assigisaanilu peqataaneq pilersitsinertut isigineqanngilaq.
7) Selskabini inuussutissarsiornermik ingerlatalinni aktienik piginneqataassutinillu pisineq. Tassunga atatillugu selskabit aningaasalersuisarfittut ingerlatseqatigiiffiit inuussutissarsiornermik ingerlatsivittut isigineqanngillat.

Qulequttamut

Nr. 9. § 5 sioqqullugu qulequtaq imatut allassimassaaq:
"Meeqqanut ileqqaakkanit aningaasat agguagassat".

§ 5-mut

Nr. 10. § 5 imatut allassimassaaq:
"§ 5. Aningaasanik meeqqanut ileqqaakkanit aningaasanut agguagassanut ukiut tamaasa ki-ngusinnerpaamik 30. april ikisisoqartassaaq. Meeqqanut ileqqaakkanut pisinnaatitaasut meeqqat amerlassusii tunngavigalugit aningaasat Inatsisartut aningaasanut inatsisaanni aalajangersarneqartassapput.
Imm. 2. Meeqqanut ileqqaakkanit aningaasat agguagassat Namminersornerullutik Oqartussat pigisaraat."

§ 6-mut

Nr. 11. § 6, imm. 1 aamma 2, imatut allassimassaaq:
"§ 6. Meeqqanut Ileqqaakkanit aningaasat agguagassat uningasuutai tunngavigalugit Meeqqanut ileqqaakkanit aningaasat agguagassat aqunneqarnerinut aningaasartuutit Namminersornerullutik Oqartussat aamma Meeqqanut Ileqqaakkanit aningaasat agguagassat akunnerminni agguataassavaat.
Imm. 2. Namminersornerullutik Oqartussat aqutsinermut aningaasartuutinut akileeqataassutissaanut aningaasat matussutissat Inatsisartut aningaasanut inatsisaanni aalajangersarneqartassapput. Ukiumi aningaasanut inatsisiqalernissaq sioqqullugu 1. majimi meeqqanut ileqqaakkanit aningaasat agguagassani uninngasuutigineqartut tunngavigalugit aningaasat aalajangersarneqartassapput."

 

Oqaaseqaatit nalinginnaasut

Inatsisissamut siunnersuutip kalaallisoortaanut allannguutinik arlalinnik allannguutissatut siunnersuut imaqarpoq. Allannguutissatut siunnersuutip Inatsisartut Akileraartarnermut Akitsuusiisarnermullu ataatsimiititap inatsisissamut siunnersuutip suliarineqarnerani Inatsisartut nutserisoqarfiannut siunnersuutip misissorneqarnissaanik aammalu siunnersuutip UKA 2006/31-ip kalaallisoortaanut allannguutissanik siunnersuusioqquneqarnerata kingunerivaa. Taamaasilluni nutserisoqarfiup inatsisissami oqaatsit atorneqartut Kalaallit Nunaanni inatsisinut allanut naleqqiullugit tulleriissarneqarsimapput aammalu nutserinermut atatillugu aaqqiissuteqarsimallutik.

Tamatuma saniatigut inatsisissap qallunaatuuani § 1, nr. 6-imi oqaasiliorneranut tunngatillugu oqaatsertalernera aaqqiivigineqarsimavoq.

 

Aalajangersakkanut ataasiakkaanut oqaaseqaatit nalinginnaasut

Nr. 1-imiit nr. 4-mut aammalu 6-imiit nr. 11-mut
Inatsisissamut siunnersuutip kalaallisoortaanut taamaallaat siunnersuut allannguutinik imaqarpoq. Taamaasilluni kalaallisut oqaasertalersorneqarnerani aammalu oqaasiliorneranut tunngatillugu allannguutinik arlalinnik aaqqiissuteqartoqarpoq.

Nr. 5-mut
Kalaallisut oqaaseqatigiiliornerata aamma oqaasiliorneranut tunngatillugu allanngortinneqarnerata saniatigut, inatsisissamut siunnersuutip § 1, nr. 6-iata qallunaatut allanneqarnerani oqaaseq „nuuppoq" allanngortinneqassaaq imatut „nuuppata".