10. august 2006

UKA 2006/31

 

Uunga siunnersuut: Meeqqanut ileqqaarutit pillugit Inatsisartut Inatsisissaattut siunnersuut nr. xx xx 2006-imeersoq

 

Pisinnaatitaasut

§ 1. Meeraq ukiut 0 aamma 18-it akornanni ukiulik akileraaruteqaattaanngitsumik meeqqamut ileqqaarsinnaatitaavoq, meeraq 1. januarimi:
1) Kalaallit Nunaanni ineqarfimmut imaluunniit aalajangersimasumik najukkamut Qitiusumik Inunnik Nalunaarsuiffimmut nalunaarsorneqarsimappat.
2) Meeqqanut inuusuttunullu ikiuisarneq pillugu inatsisartut peqqussutaat malillugu Qallunaat Nunaanni, Savalimmiuni imaluunniit nunani allani angerlarsimaffiup avataani inissinneqarsimappat.
3) Inuit annertuumik innarluutillit pillugit inatsisartut peqqussutaat malillugu Qallunaat Nunaanni, Savalimmiuni imaluunniit nunani allani inissinneqarsimappat.
4) Meeqaalluunniit sulisitsisua meeqqap Kalaallit Nunaata avataani ilinniagaqarneranut ilinniagaqarluniluunniit najugaqarneranut atatillugu ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappat.
5) Angajoqqaani ilagalugit Kalaallit Nunaata avataanut nuuppat, aammalu angajoqqaat imaluunniit angajoqqaat sulisitsisui ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappata.
6) Angajoqqaat suliffeqarnerannut atatillugu ilinniagaqarpata ilinniaqqippataluunniit piffissami sivisunerpaamik qaammatini aqqaneq marlunni Kalaallit Nunaata avataanut nuuppat.
7) Kalaallit Nunaata avataani efterskolernermut Namminersornerullutik Oqartussanit tapiiffigineqarpat.

 

Tunngaviit

§ 2. Meeqqamut ileqqaarutit tassaapput ukiut meeqqap meeqqamut ileqqaarutinik pissarsiviginnaasai, tak. § 1, ukiuni pineqartuni § 5, imm. 1-imi oqaaseqatigiit aappaanni taaneqartunik aningaasanik meeqqap pisinnaasaanik gangerlugit.
Imm. 2. Meeqqamut ileqqaarutinut ilassutinik akiliinissamut Naalakkersuisut annertunerusumik malittarisassanik aalajangersaasinnaapput, taassumalu tapiissutit annertussusaasannik naatsorsuinissamut, naatsorsornissaannut aammalu aalajangersarnissaannut. Imm. 1-imi ilassutit taaneqartut akileraaruteqaataassanngillat.

§ 3. Meeqqap meeqqamut ileqqaarutinit pisassai, taassuma ataani § 2, imm. 2 malillugu ilassutaasinnaasut, allanut tunniunneqarsinnaanngillat taarsigassanulluunniit sallunaveeqqutaasinnaanatik, aammalu akiligassanut taarsiissutaasinnaanatik imaluunniit piumasaqaatinut tamarmiusunut akiliutaasinnaanatik.

§ 4 Meeqqanut ileqqaarutinik akiliineq qinnuteqarnikkut pissaaq, meeqqallu aningaaserivimmi kontoanut ilineqassallutik.
Imm. 2. Meeqqamut ileqqaarutit siusinnerpaamik tunniunneqarsinnaapput qaammatip meeqqap 18-inik ukioqalerfiata naanerani. Meeqqamut ileqqaarutinik akiliiffigineqarsinnaaneq atorunnaassaaq qaammatip meeqqap 22-inik ukioqalerfiata naanerani akiliisoqarnissaanik qinnuteqaateqartoqanngippat.
Imm. 3. Meeqqamut ileqqaarutit tunniunneqartinnagit makkununnga atorneqarnissaat uppernarsaqqaarneqartariaqarpoq:
1) Ilinniarneq minnerpaamik ukiumik ataatsimik sivisussusilik.
2) Namminerisamik illussamik sananermi pisinermiluunniit , aammalu piginneqatigiilluni illuliornermi.
3) Inimik attartornermut atatillugu aallarniutitut siumulluunniit akiliutitut. Tamakkununngali atugassatut annerpaamik qaammammut akiliutissatut isumaqatigiissutigineqarsimasup pingasoriaataa tunniunneqarsinnaavoq.
4) Inigisap pitsanngorsarneranut allilerneranulluunniit.
5) Allamik initaarnermut atatillugu illumi atortorissaarutinik innaallagissamoortunik, pequtinik natersuarnillu pisinermut.
6) Namminersorluni ingerlatsivimmik pilersitsinermi, pilersitsinermut atatillugu aningaasaliissutit katillugit meeqqamut ileqqaarutit nalingat qummut qaangersimappagu. Meeqqamut ileqqaarutit bilinik inunnik angallassissutinik pisinermut atorneqarsinnaanngillat. Aningaasaliissuteqarfimmik assigisaanilluunniit ingerlatseqataaneq pilersitsinertut isigineqanngilaq.
7) Selskabini inuussutissarsiornermik ingerlatalinni aktienik anpartinillu pisinermut. Tamatumani aningaasaliissuteqarfiit inuussutissarsiornermik ingerlatsisutut isigineqanngillat

 

Meeqqanut ileqqaarutinut aningaasat agguagassat

§ 5. Ukiut tamaasa kingusinnerpaamik 30. april aningaasanik aningaasanut inatsimmi aalajangersakkanik meeqqanut ileqqaarutinut aningaasanut akiliisoqartassaaq. Aningaasat amerlassusaat meeqqat meeqqamut ileqqaaruteqarsinnaatitaasut amerlassusaat tunngavigalugu aalajangerneqartassapput.
Imm. 2. Meeqqanut ileqqaarutinut Aningaasat Namminersornerullutik Oqartussat pigaat.

§ 6. Meeqqanut Ileqqaarutinut Aningaasat allaffissornikkut aqunneqarnerini aningaasartuutit Meeqqanut Ileqqaarutinut Aningaasani aningaasaatit tunngavigalugit Namminersornerullutik Oqartussat aamma Meeqqanut Ileqqaarutinut Aningaasat akornanni avinneqartassapput
Imm. 2. Allaffissornikkut aqutsinermut Namminersornerullutik Oqartussat aningaasartuutaasa matussutissaannik Inatsisartut aningaasanut inatsisaanni aningaasanik immikkoortitsisoqartassaaq.
Imm.3. Namminersornerullutik Oqartussat allaffissornikkut aqutsinermut aningaasartuutinut akiliutissaat annertussuseqassapput:
1) aningaasaatit 40 mio.kr.-it ataappatigit 100 procentit
2) aningaasaatit 40 mio.kr.-it qaangerpatigit kisianni 60 mio.kr.-it ataallugit 75 procentit
3) aningaasaatit 60 mio.kr.-it qaangerpatigit kisianni 80 mio.kr.-it ataallugit 50 procent-it
4) aningaasaatit 60 mio.kr.-it qaangerpatigit kisianni 80 mio.kr.-it ataallugit 25 procent-it
5) aningaasaatit 100 mio.kr.-it qaangerpatigit 0 procent

 

Pisinnaatitsissutit

§ 7 Meeqqanut ileqqaarutit allaffissornikkut aqunneqarneranni suliassat aamma Meeqqanut Ileqqaarutinut Aningaasat aningaasaliissutigineqartarneri pillugit Naalakkersuisut aningaaserivimmik imalunniit aningaasanik aqutsinermik suliaqartumik allamik isumaqatigiissuteqarsinnaapput.
Imm. 2. Meeqqanut Ileqqaarutinut Aningaasat allaffissornikkut aqunneqarnerannut taakkunanngalu akiliisarneq pillugit nalakkersuisut annertunerusunik malittarisassiorsinnaapput, taassuma ataani aningaasat tunniunneqarnissaannik qinnuteqaateqartarnerit, uppernarsaanerit, maalaarutinik suliarinnittarneq ilaalu ilanngullugit.

 

Pineqaatissiisarnerit

§ 8. Najoqqutassani, inatsisip kinguneranik aalajangersakkani, aalajangersakkanik unioqqutitsinermi pillaatinik akiligassiinermi malittarisassanik aalajangersaasoqarsinnaavoq.

 

Atuutilersitsinermi ikaarsaarnermilu aalajangersakkat

§ 9. Inatsisartut inatsisaat atuutilerpoq 1. januar 2007
Imm. 2. Meeqqat piffissami 2. januarip aamma 30. aprilip 2007 akornanni 18-inik ukioqalersut meeqqanullu ileqqaaruteqarsinnaatitaasut, meeqqamut ileqqaarutit siusinnerpaamik 1. juni 2007-imi tigisunaavaat.

Namminersornerullutik Oqartussat, ulloq

Hans Enoksen

/

Josef Motzfeldt