13. oktober 2006 UKA 2006/31
Meeqqanut ileqqaarutit pillugit Inatsisartut inatsisissaattut siunnersuut
pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
siunnersuutip appassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Augusta Salling, Atassut (siulittaasoq)
Inatsisartunut ilaasortaq Agnetehe Davidsen, Siumut (siulittaasup tullia)
Inatsisartunut ilaasortaq Lars Emil Johansen, Siumut
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Lene Knüppel, Demokraatit (sinniisussaq)
Inatsisartunut ilaasortaq Tommy Marĝ, Siumut (sinniisussaq)
Inatsisartunut ilaasortaq Jens Lars Fleischer, Siumut (sinniisussaq)
UKA 2006-imi siunnersuummik siullermeerineq tunngavigalugu inatsisisatut siunnersuut oqaaseqaatitai ilanngullugit tusarniaanermiillu akissutit tiguneqarsimasut Inatsisartut Akileraartarnermut Akitsuusiisarnermullu Ataatsimiititaliap misissuataarpai. Siullermeerinermi apeqqutit saqqummiunneqartut sukumiinerusumik ersersinneqarnissaat anguniarlugu Aningaasanut Nunanullu Allanut Naalakkersuisoq Akileraartarnermut Akitsuusiisarnermullu Ataatsimiititaliamut allakkamik ulloq 2. oktober 2006-imi nassiussaqarpoq. Allagaq isumaliutissiissummut matumunnga ilanngussaq 1-itut ilanngunneqarpoq.Tamatuma saniatigut inatsisissatut siunnersuut pillugu Inatsisartut Ilaqutariinnermut Ataatsimiititaliaata oqaaseqaateqarnissaa Akileraartarnermut Akitsuusiisarnermullu Ataatsimiititaliap qinnutigisimavaa. Qinnutiginninneq Ilaqutariinnermullu Ataatsimiititaliap akissuteqaataa 3. oktober 2006-imeersoq isumaliutissiissummut matumunnga ilanngussatut 2-tut aamma 3-tut ilanngunneqarput.
Inatsisissatut siunnersuut pillugu tusarniaaneq.Siunnersuut piffissami 14. juni-mit 17. juli-mut 2006 tamanut tusarniaassutigineqarsimavoq. Tusarniaanermut piffissaliussaq KANUKOKA-p tungaanit akerliliinissamut pilersitsisimavoq, maluginiaqquneqarporlu siunnersuut aasaanerani sulinngiffeqarnerup nalaani nassiunneqarsimasoq taamaalilluni kommuninit ataasiakkaanit oqaaseqaatinik pissarsiniarneq KANUKOKA-mut ajornarluinnangajassimasoq.
Tassunga atatillugu ataatsimiititaliap ilisimatitsissutigissavaa UPA 2000/9-p suliarineqarnerani Inatsisartut Inatsisit Atortinneqarnerannut Ataatsimiititaliaata oqaatiginikuummagu, tusarniaanermi akissuteqarnissamut killiliussaq nalinginnaasumik sapaatit akunnerinik sisamanik sivikinnerusumut aalajangersarneqartassanngitsoq. Taamaalilluni siuunnersuut teknikkikkut ajornarkusoorsimappat imaluunniit piffissaq tusarniaaffik aasaanerani sulinngiffeqarnerup nalaaniissmappat il. il. killiliussap sivitsuiffigineqarnissaa tunngavissaatitaavoq. Inatsisinik nalersuisarnermut maleruaqqusat atuuttut naapertorlugit tusarniaanermi akissuteqarnissamut killiliussaq aallaavittut isigalugu minnerpaamik sapaatit akunnerinut sisamanut, sulinngiffeqarnerullu nalaani sapaatit akunnerinut arfinilimmut – arfineq-pingasunut aalajangersarneqarpoq.
Tusarniaanermi akissuteqarnissamut killiliussaq pisumi saqqummiunneqartumi sapaatit akunnerinik tallimanik sivikinnerusumut aalajangerneqarsimammat nassuiaatigineqartut tunngavigalugit Akileraartarnermut Akitsuusissarnermullu Ataatsimiititaliamit naammaginanngitsutut isigineqarpoq. Taamaattumik siunissami tusarniaanermi akissuteqarnissamut killiliussap naleqqunnerusumik aalajangersaaffigineqartarnissaa misissoqqullugu Aningaasanut Nunannullu Allanut Naalakkersuisumut kaammattuutigineqassaaq.
Tusarniaanermi peqataasimasut tusarniaanerullu inerneri pillugit inatsisissatut siunnersuummut nalinginnaasumik oqaaseqaatit innersuunneqarput.
Inatsisissatut siunnersuutip teknikikkut ilusiligaanera.Inatsisissatut siunnersuutip kalaallisuuaniunerusoq oqaasertatigut ajortoqarneranik Akileraartarnermut Akitsuusiisarnermullu Ataatsimiititaliaq malussarsimavoq.Tassunga atatillugu Inatsisartut Nutserisoqarfiat qinnuigineqarluni ulloq 11. oktober 2006, ilanngullugu nassiunneqartumik allakkiorsimavoq (Ilanngussaq 4). Ajornartorsiutitut malugineqartut iluarsineqaqqullugit inatsisissatut siunnersuummut allannguutissatut siunnersuummik saqqummiusseqqullugit Naalakkersuisut kaammattorneqassapput.
Inatsissatut siunnersuummik Inatsisartut siullermeerinerat.Inatsissatut siunnersuummik siullermeerinermi Inatsisartut nalilersuinerminni aveqqapput. Siumut, Inuit Ataqatigiit aamma Atassut siunnersuummut ilaliillutik oqaaseqarput siunnersuulli Demokraatinit Kattusseqatigiillu Partiiannit ilalerneqanngilaq.
Akileraartarnermut Akitsuusiisarnermullu Ataatsimiititaliap isumaliutersuutai.Inatsisissatut siunnersuutip imarisamigut inissisimaneranut tunngatillugu Inatsisartut Ilaqutariinnermut Ataatsimiititaliaat ima oqaaseqarpoq: "Siunnersuummi meeqqanut ileqqaarutissatut siunnersuutigineqartoq isumaginninnikkut tunniunneqartartussaanngimmat Ilaqutariinnermut Ataatsimiititaliaq siunnersuummut oqaaseqaatissaqanngilaq.".
Akileraartarnermut Akitsuusiisarnermullu Ataatsimiititaliap tapiliullugu oqaatigisinnaavaa, siunnersuut akileraartarnermut akitsuusiisarnermulluunniit naalakkersuinikkut siunnerfigineqartunut aamma attuumassuteqanngimmat. Siunnersuut malillugu meeqqanut ileqqaarutit tapiliunneqarumaartullu akileraaruserneqartussannginnerat pissusissamisoorsorinarmat Akileraartarnermut Akitsuusiisarnermullu Ataatsimiititaliap oqaaseqaateqarnissaanut pissutissaqartitsilinngilaq.
Ileqqaakkaneersunik tunineqartarnissamut imaluunniit aalajangersimasumik annertussusinnik tapiliussaneersunik tunineqartarnissamut siunnersuutikkut inatsisitigoortumik meeqqat piumasaqaateqarsinnaannginnerat Akileraartarnermut Akitsuusiisarnermullu Ataatsimiititaliamit maluginiarneqarpoq. Inatsisissatut siunnersuummut oqaaseqaatini eqqaaneqartutuut aningaasanut inatsisiliortoq aningaasanik illikartitsinissamut taamaalilluni sukkulluunniit pisussaaffeqartussaanngilaq.
Tamatuma saniatigut allaffissornikkut aningaasartuutit aningaasaliinermilu pissarsiassaqannginneq peqqutaalluni ukiuni aalajangersimasuni aningaasat meeqqat ileqqaagaanniittut aningaasat ikilisinneqartarsinnaanerat ataatsimiititaliamit maluginiarneqarpoq.
Inatsisissatut siunnersuummik ataatsimiititaliaq nalilersuinermini amerlanerussuteqartunut ikinnerussuteqartunullu aveqqavoq:
Akileraartarnermut Akitsuusiisarnermullu Ataatsimiititaliami amerlanerussuteqartut Siumut, Atassut aamma Inuit Ataqatigiit siunnersuummut tapersiipput, taanna naalakkersuisooqatigiinnissamut isumaqatigiissummi meeqqanut tamanut, inunngornerannit 18-inik ukioqalernissaasa tungaannut ileqqaagaqartitsinissamik pilersitsinissaq pillugu anguniagaqarnermik piviusunngortitsisuummat. Ileqqaartinneqartut inuusuttut nammineerlutik inuunermik ilinniarnermik, ineqarnermik, inuussutissarsiummillu suliffiuteqarnermik nammineerlutik ingerlatsinissaannut oqilisaataasussaapput.
Akileraartarnermut Akitsuusiisarnermullu Ataatsimiititaliami ikinnerussuteqartoq Demokraatineersoq siunnersuummut itigartitsivoq. Matumunnga tunngavilersuutaavoq assersuutigalugu meeqqat ulluinnarni atugaasa ilinniarnissamullu periarfissaasa pitsaanersut qulakkeerniarnissaannut annertuumik ilinniartitaanermut, ilaqutariinnut aamma isumaginninnermut tunngasuni atorfissaqartinneqartunik aningaasanik aningaasaliissutaasunik siunnersuut pituisuummat.
Akileraartarnermut Akitsuusiisarnermullu Ataatsimiititaliap inassuteqaataa.Siuliani oqaatigineqartut tunngavigalugit inatsisissatut siunnersuummi oqaasertatigut ajoqutit iluarsisarialittut malugineqartut ilanngullugit inatsisissatut siunnersuut aappassaneerneqarnermini akuersissutigineqassasoq Akileraartarnermut Akitsuusiisarnermullu Ataatsimiititaliami amerlanerussutillit inassutigaat.
Siunnersuut itigartitsissutigineqassasoq ataatsimiititaliami ikinnerussuteqartup inassutigaa.
Taamatut oqaaseqarluni Inatsisartut Akileraartarnermut Akitsuusiisarnermullu
Ataatsimiititaliaata siunnersuut Inatsisartunut aappassaaniigassanngortippaa.
Augusta Salling
siulittaasoq
Lars Emil Johansen
Agathe Fontain
Agnethe Davidsen
Lene Knüppel