10. august 2006

UKA 2006/31

 

Inatsisissatut siunnersuummut oqaaseqaatit


Oqaaseqaatit nalinginnaasut

1. Inatsisissatut siunnersuummut tunngavik

Inatsisissatut siunnersuut Aningaasaqarnermut Pisortaqarfimmi, Ilaqutariinnermut Pisortaqar-fimmi aammalu Akileraartarnermut Pisortaqarfimmi atorfillit suleqatigiinnerisa inerneraa.

Suleqatigiinnermi Naalakkersuisooqatigiit isumaqatigiissutaannik tunngaveqarpoq, tassani ersilluni "Nunatsinni meeqqat 18-iliinissamik tungaanut ukiumut 1.000 kr.-inik ileqqaartinne-qartalernissaat 2007 aallarnerfigalugu atuutilernissaa Naalakkersuisut tunngavissiussavaat".

Sulinermi pingaartinneqarput qulakkiissallugit uku:

Aaqqissuussinerup kinguneraa meeqqanut ileqqaarutinit inuusuttunut akiliinermi nammineq ileqqaarutissanik pilersitsisinnaanerat imaluunniit ilinniagaqarnerminnut, initaarnissaminnut assigisaannulluunniit atatillugu akissaqartissimanngisaraluarminnik atuisinnaanerat.


2. Siunnersuummi immikkoortut pingaarnerit

Siunnersuummi pisinnaasut pillugit immikkoortumi killilerneqarpoq meeqqat kikkut akileraarutitaqanngitsumik meeqqanut ileqqaarutinik pisinnaanersut. Aallaaviusumik meeqqat nunatsinni ineqarfeqartutut imaluunniit aalajangersimasumik najugaqartutut Qitiusumik Inunnik Nalunaarsuiffimmi nalunaarsorneqarsimasut pineqarput. Taassuma saniatigut meeqqat inuttut atugaqarneq imaluunniit ilinniagaqarneq pissutigalugu Kalaallit Nunaata avataani najugaqartut meeqqanut ileqqaarutinik pisinnaatitaapput.

Nunat ilaanni isertitat tunngaviginagit meeqqanut meeqqalluunniit angajoqqaavinut tapiissuteqartoqartarpoq, taakku nunani pineqartuni najugaqaraangata. Aaqqissuussinerit assigiinngitsunik imaqarsinnaapput, kisiannili ilisarnaataavoq tamanut tunngasuuneri aammalu angajoqqaat isertitaat apeqqutaatinnagit akilerneqartarneri, taamaalillunilu tapiiffigineqartup inuttat atugai tunngavigineqartarani. Assersuutigalugu Qallunaat Nunaanni ilaqutariinnut meeralinnut akiliutit pillugit inatsimmi aalajangersakkat malillugit angajoqqaanut tassani najugaqartunut ataavartumik tapiissutinik akiliisoqartarpoq, taakkulu siunnersuummi uani meeqqamut ataatsimut aningaasat immikkoortitassatut ilimagineqartunit annertunerungaatsiarput.

Isumaliutersuutaanikuuvoq meeqqat meeqqanut ileqqaarnermik aaqqissuussinermut peqataasinnaanngitsut, taakku angajoqqaaviluunniit nunanit allanit isertitat apeqqutaatinnagit tapiissutinik pisartagaqarpata. Soorlu oqaaseqatigiinni Naalakkersuisooqatigiit isumaqatigiissutaannik qulaani issuarneqartumi takuneqarsinnaasoq siunertaavoq meeqqat tamarmik 0-miit 18-inut ukiullit tamarmik meeqqanut ileqqaarutinut ukiumoortumik tapiissutisisinnaapput. Taamaammat aalajangersakkamik ilanngussisoqanngilaq, meeqqanut ileqqaarutisisinnaanerup atorunnaarnissaanik piffissani meeqqanut nunanit allanit isertitat apeqqutaatinnagit tapiissusisoqartartillugu.

Tunngaviit pillugit immikkoortumi aalajangersarneqarpoq meeqqamut ileqqaarutit qanoq naatsorsorneqartassanersut qaqugukkullu tunniunneqartassanersut, kiisalu meeqqanut ileqqaarutit qaqugukkut kingusinnerpaamik tunniunneqarsinnaanerinut killigitinneqartut aalajangersarneqarlutik. Meeqqanut ileqqaarutit tunniunneqarsinnaanerinut piumasaqaatit suut naammassineqarsimassanersut aalajangersarneqarputtaaq. Taassuma saniatigut akiligassaqarfiit akiliisitsiniarnerannut allanullu tunniuneqarsinnaanerannut meeqqanut ileqqaarutit iller-sorneqarnissaannut malittarisassat aalajangersorneqarput.

Meeqqanut Ileqqaarutinut Aningaasat agguuaanneqartussat pillugit immikkoortumi pineqarpoq Meeqqanut Ileqqaarutinut Aningaasat Namminersornerullutik Oqartussanit pigineqartut pilersinneqarnissaat. Meeqqanut Ileqqaarutinut Aningaasat aningaasalersorneqassapput meeqqat meeqqanut ileqqaarutinik pisartagaqarsinnaasut amerlassusaat tunngavigalugu annertussusilikkanik ukiut tamaasa akiliisarnikkut. Meeqqanut ileqqaarutit meeqqanut tunniunne-qarnertut Meeqqanut Ileqqaarutinut Aningaasanit aningaasalersorneqassapput.

Taamaalilluni Meeqqanut Ileqqaarutinut Aningaasat Namminersornerullutik Oqartussat ileqqaarnerattut isikkoqassaaq, tassani aningaasat meeqqat ileqqaarutaannit akiliinissamut Namminersornerullutik Oqartussat pisussaaffiinut atorneqassallutik.

Meeqqanut Ileqqaarutinut Aningaasanik pilersitsinissamik siunnersuuteqarneq tunngaveqarpoq aaqqissuussinermut aningaasat akiliutigineqartut ataatsimut amerlasuunngorlugit aningaasaliissutigineqarsinnaaneri periarfissaqassammat, taamaalillunilu meeqqanut ileqqaarutit meeqqat ataasiakkaat kontoinut ilineqarnerannit pitsaanerusumik pissarsissutigineqarsinnaassallutik.

Meeqqanut Ileqqaarutinut Aningaasanik aaqqissuussineq soraarnerussutisianut aaqqissuussinernut arlalissuartigut sanilliunneqarsinnaavoq, tassani Meeqqanut Ileqqaarutinut Aningaasat soraarnerussutisianut karsitulli qulakkeerneqassallutik aningaasat akiliutigineqartut pitsaanerpaamik aningaasaliissutigineqarnissaat ajunaarutaariataarsinnaanerallu minnerpaatinneqassalluni. Meeqqanut Ileqqaarutinut Aningaasanik pisinnaatitaasut soraarnerussutisianut karsitulli ileqqaarutit ineriartornerannik ataavartumik ilisimatinneqartassapput, piffissanngorpallu pissarsisinnaasunut akilerneqarnissaat isumagineqassalluni.

Ukiumi siullermi Meeqqanut Ileqqaarutinut Aningaasat pilersinneqarneranni ilimagineqarpoq allaffissornikkut aqutsinermi aningaasartuutit pissarsianit amerlanerussasut. Meeqqanut Ileqqaarutinut Aningaasat amerliartornerat peqatigalugu siullermik ilimagineqarpoq pissarsiat aningaasartuutit amerlaqatigissagaat, taassumalu kingorna amerlanerulissallutik. Taamaammat siunnersuutigineqarpoq Meeqqanut Ileqqaarutinut Aningaasat allaffissornikkut aqunneqarneranni aningaasartuutit Meeqqanut Ileqqaarutinut Aningaasani aningaasaatit tunngavigalugit Namminersornerullutik Oqartussat aamma Meeqqanut Ileqqaarutinut Aningaasat akornanni agguarlugit akilerneqartassasut, naggataatigullu taamaallaat Meeqqanut Ileqqaarutinut Aningaasanit akilerneqartassallutik.

Taamatut agguaaqatigiinnermi Meeqqanut Ileqqaarutinut Aningaasat pilersinneqarneranniit ukiumit siullermiit pissarsianit iluanaaruteqarnissaq qulakkeerneqassaaq. Iluaraarutit meeqqanut ileqqaarutinut akiliutinut ilassutitut akiliutigineqarsinnaapput.

Siunnersuummi § 7, imm. 1-imi ammaanneqarpoq meeqqanut ileqqaarutit allaffissornikkut aqunneqarneranni suliassat aamma Meeqqanut Ileqqaarutinut Aningaasat aningaasaliissutigineqarnissaat pillugit Naalakkersuisut aningaaserivimmik imalunniit ani-ngaasanik aqutsinermik suliaqartumik allamik isumaqatigiissuteqarsinnaanerat

Siunertaavoq aningaaserivimmik ukiunut arlalinnut atuuttussamik taamatut isumaqatigiissusiortoqassasoq, tassa allaffissornikkut aqutsinermik aningaasaliisarnermillu aningaaseriviit ilisimasaqarmata misilittagaqarlutillu, tamannalu aaqqissuussinerup pitsaasumik aaqqissuunnissaanut tunngaviuvoq.


3. Aningaasatigut allaffissornikkullu pisortanut kingunissai

Meeqqanut ileqqaaruteqarnermik siunnersuutip 2007-imi ukiunilu missingersersuiffiusuni 18 mio.kr.-it missaanni aningaasartuuteqarnerunermik kinguneqarnissaa ilimagineqarpoq.

Taassuma saniatigut Meeqqanut Ileqqaarutinut Aningaasat allaffissornikkut aqunneqarneranni siunnersuutip 2007-imi, 2008-mi aamma 2009-mi 1 mio.kr.-inik aningaasartuuteqarnerunermik kinguneqarnissaa ilimagineqarpoq, taassumalu kingorna Meeqqanut Ileqqaarutinut Aningaasat allaffissornermi aningaasartuutinik tamakkiisumik ilaannakortumilluunniit akilersuisinnaalersillugit amerlassuseqalissasut. Tassunga ilanngunneqassaaq meeqqanut ileqqaaruteqarnermik aaqqissuussineq pillugu 2007-imi paasisitsiniaanissamut 200.000 kr.-it atorneqassasut.

Naggasiullugu ilimagineqartariaqarpoq pisortat suliaqarnerannut atatillugu allaffissornermi annikitsunik aningaasartuuteqartoqarnissaa.


4. Aningaasatigut allaffissornikkulu namminersortunut kingunissai

Siunnersuut inuussutissarsiortunut aningaasatigut allaffissornikkullu toqqaannartumik kinguneqartussaanngilaq.

Meeqqanut ileqqaarutinut aningaasanit agguaassassanit akiliutigineqartartut amerliartornerini siunnersuut kinguneqassaaq inuusuttut atuinerisa qaffariartornissaasa periarfissaqarneranik, ilimagineqartariaqarporlu inuussutissarsiortunut aningaasatigut pitsaasumik kinguneqassasoq.


5. Avatangiisinut pinngortitamullu kingunissai

Siunnersuut avatangiisinut pinngortitamullu kinguneqartussaanngilaq.


6. Allaffissornikkut innuttaasunut kingunissai

Siunnersuut innuttaasunut killeqartumik allaffissornikkut kinguneqassaaq, tassa siunnersuutaammat meeqqanut ileqqaarutit tunniunneqarnissaannut qinnuteqaateqartoqartassasoq.


7. Naalagaaffeqatigiinnermut namminersornermullu pissutsit

Siunnersuut naalagaaffeqatigiinnermut namminersornermullu tunngassuteqanngilaq


8. Pisortanik kattuffinnillu tusarniaaneq

Siunnersuut ukununnga tusarsiaassutigineqarpoq:

KANUKOKA, Kalaallit Nunaanni Sulisitsisut, ILIK, Nunaqavissut Suliffiutilli Kattuffiat (NUSUKA), Sulinermik Inuussutissarsiuteqartut Kattuffiat (SIK), KNAPK, Savaatillit Peqati-giit Suleqatigiissut (SPS), Atorfillit Kattuffiat (AK), Ilinniagaqartuut Kattuffiat/Akademikernes Sammenslutning i Grønland (ASG), Grønlandsbanken, Sparbank Vest, Suliffeqarnermut Inuussutissarsiutinullu Ilinniartitaanermut Pisortaqarfik, Ineqarnermut Attaveqarnermullu Pisortaqarfik, Aalisarnermut, Piniarnermut Nunalerinermullu Pisortaqarfik, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik, Avatangiisinut Pinngortitamullu Pisortaqarfik, Peqqinnissamut Pisortaqarfik, Inuussutissarsiornermut Pisortaqarfik, Ilaqutariinnermut Pisortaqarfik, Sulisoqarnermut Pisortaqarfik, Aatsitassanut Ikummatissanullu Pisortaqarfik, Nunanut Allanut Pisortaqarfik aamma Aningaasaqarnermut Pisortaqarfik.

Tusarniaanermi akissutit Akileraartarutinut Akitsuutinullu Ataatsimiititaliamut ingerlatinneqarput.

Inuussutissarsiornermut Pisortaqarfimmiit tusarniaanermi akissut siunnersuutip tunuliaqutaanik itisiliinermik kinguneqarpoq.

Ineqarnermut Attaveqarnermullu Pisortaqarfimmiit tusarniaanermi akissut tunngavigalugu siunnersuummi § 7, imm. 2-mi pisinnaatitsissut ilanngunneqarpoq maalaarutinik sulinerinninneq pillugu Naalakkersuisut malittarisassanik aalajangersaasinnaanerinik.

Tusarniaanermi akissutit allat siunnersuutip allannguuteqarnerinik kinguneqanngillat.

 

Siunnersuummi aalajangersakkanut ataasiakkaanut oqaaseqaatit

§1 -imut

Aalajangersagaq killilersuinermik imaqarpoq, meeqqat sorliit 0-miit 18-inut ukiulinnut akileraaruteqaataanngitsumik meeqqamut ileqqaarsinnaatitaanersut.

Aalajangersakkani nr. 1-7-imi 1. januarimi meeraq ilaanngippat, ukiumi pineqartumi meeraq inatsisissamut siunnersuummi uani malittarisassat malillugit meeqqamut ileqqaaruteqarsinnaatitaanngilaq.

Nr. 1-imut
Meeqqat januarip aallaqqaataani nunami maani ineqarfimmut imaluunniit aalajangersimasumik najukkamut Qitiusumik Inunnik Nalunaarsuiffimmi nalunaarsorsimasut akileraaruteqaataanngitsumik meeqqamut ileqqaaruteqarsinnaatitaapput.

Aalajangersagaq taanna malillugu qaammatisiutini ukiumi pineqartumi meeqqap meeqqamut ileqqaruteqarsinnaatitaaneranut pingaaruteqarpoq, meeqqap Kalaallit Nunaannut peqqussummi 1. januar 2007-imi atuutilersussatut naatsorsuutigineqartumi malittarisassat malillugit Qitiusumik Inunnik Nalunaarsuiffimmi nalunaarsorneqarsimanissaa. Peqqussummi atuuttumi § 6-imi aalajangersarneqarpoq ineqarfik aamma aalajangersimasumik najugaq qanoq paasineqassanersoq, aammalu § 8-mi aalajangersarneqarluni angajoqqaat immikkut najugaqarpata meeqqap najugaa. Nunap iluani nuunnernut nalunaaruteqarnissaq pillugu malittarisassat peqqussutip kapitalinia 4-mi (§§24-27) ersipput, kisiannili nunanit allanit Savalimmiuniillu nuunnerit peqqussutip kapitaliani 5-imi (§§ 16-22) takuneqarsinnaapput. Peqqussumi kapitali 6-imi (§§ 24-27) nunanut allanut nuunnerit nalunaarutigineqarnissaat pillugu malittarisassat aalajangersarneqarput.

Meeqqat meeqqamut ileqqaarsinnaatitaasut amerlassusaat aallaaviusumik naatsorsorneqartarpoq taamaallaat januarip aallaqqaataani Qitiusumik Inunnik Nalunaarsuiffimmi paasissutissat tunngavigalugit. Meeqqat januarip aappaani kingusinnerusumiluunniit Kalaallit Nunaannut nuuttutut inunnik nalunaarsuiffimmi nalunaarsorneqarsimasut siunnersuut malillugu ukiumi pineqartumi meeqqanut ileqqaarutinik pisinnaatitaanngilaq. Meeqqat pineqartut ukiup tulliani januarip aallaqqaataani suli nalunaarsorneqarsimappata ukiumi tassani meeqqat meeqqanut ileqqaarutinik pisinnaatitaapput.

Januarip aallaqqaataa aalajangiunneqarpoq meeqqanut ileqqaarutinik aaqqissuussinermi allaffissornikkut aqutsinerup ajornanngitsumik aaqqissuunneqarnissaa qulakkeerniarlugu. Aammattaaq tunngavigineqarpoq nunamut nunamiillu nuunnerit nalinginnaasumik juullertinnagu ukiullu nikinnerata kingorna pisarneri.

Nr. 2-mut
Meeraq 1. januarimi meeqqat inuusuttunullu ikiusarneq pillugu inatsisartut peqqussutaat malillugu Qallunaat Nunutnaanni, Savalimmiuni imaluunniit nunani allani angerlarsimaffiup avataani inissinneqarsimappat, meeraq aamma meeqqamut ileqqaarutinik pisinnaaatitaavoq.

Tassani pineqarpoq taamatut inissinneqarsimanerup meeqqamut ajoqutaannginnissaa.

Nr. 3-mut
Meeraq inuit annertuumik innarluutillit pillugit inatsisartut peqqussutaat malillugu 1. januarimi Qallunaat Nunaanni, Savalimmiuni imaluunniit nunani allani inissinneqarsimappat, nr. 2-mi allassimasutulli meeraq meeqqamut ileqqaarutinik pisinnaatitaavoq.

Aalajangersakkami nr. 2-p ataani pissutsit taaneqartut tunngavigineqarput.

Nr. 4-mut
Meeraq meeqqalluunniit sulitsitsisua januarip aallartinnerani meeqqap Kalaallit Nunaata avataani ilinniagaqarneranut ilinniagaqarluniluunniit najugaqarneranut atatillugu ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarpata meeraq meeqqamut ileqqaarutinik pisinnaatitaavoq.

Aalajangersakkami ilaatigut meeqqat pineqarput timersornermik pisinnaasaqartutut Suliffeqarnermut Inuussutissarsiutinullu Ilinniartitaanermut Pisortaqarfimmit akuerineqarnikut aammalu inuussutissarsiutinut tunngaviusumik ilinniagaqarnermut atatillugu Kalaallit Nunaata avataani atuartut.

Nr. 5-imut
Meeraq meeqqamut ileqqaarutinik pisinnaatitaavoq meeraq angajoqqaani ilagalugit Kalaallit Nunaata avataanut 1. januarimi nuussimappat, aamma angajoqqaat angajoqqaalluunniit sulisitsisui ilinniagaqarnersiutit pillugit inatsisartut peqqussutaanni malittarisassat malillugit ilinniagaqarnersiuteqarsinnaatitaappata.

Aalajangersakkami aamma pineqarput taamaallaat angajoqqaaq ataaseq Kalaallit Nunaata avataani ilinniagaqarnermut atatillugu ilinniagaqarnersiuteqarpat.

Aalajangersakkami nr. 2-p ataani pissutsit taaneqartut tunngavigineqarput.

Nr. 6-imut
Meeraq angajoqqaat suliffeqarnerannut atatillugu ilinniarpata ilinniaqqippataluunniit piffissami sivisunerpaamik qaammatini aqqaneq marlunni 1. januarimi Kalaallit Nunaata avataanut nuussimappat meeqqamut ileqqaarutinik pisinnaatitaavoq.

Aalajangersakkami aamma pineqarput taamaallaat angajoqqaaq ataaseq Kalaallit Nunaata avataani ilinniagaqarpat ilinniaqqippalluunniit.

Angajoqqaat Kalaallit Nunaata avataaniinneranni qaammatit aqqaneq marluk taaneqartut sivitsorneqarpata meeraq meeqqamut ileqqaarutinik pisinnaatitaanngilaq qaammatit aqqaneq marluk taakku qaanngiunnerannit ukioq tulliuttoq aallarnerfigalugu, kisiannili aatsaat meeraq aalajangersakkat allat ataaniinngippat.

Aalajangersakkami ilaapput namminersortuni pisortanilu suliffeqarnermut atatillugu ilinniarnerit ilinniaqqinnerillu. Siunnersuummi § 7, imm. 2 malillugu ilaatigut Meeqqanut Ileqqaarutinut Aningaasat allaffissornikkut aqunneqarnerannut Naalakkersuisut annertunerusunik malittarisassiorsinnaapput, taassuma ataani uppernarsaammik tunniussisarnermut. Tassunga atatillugu ilinniarnerit ilinniaqqinnerillu siunnersuummi § 1, imm. 1, nr. 6-imi pineqartut pillugit uppernarsaammik tunniussinissap aaqqiissunneqarnissaa piffissarlu pillugit annertunerusumik malittarisassiornissaq Naalakkersuisut ilimagaat, taassuma ataani tassunga atatillugu piumasaqaatinik aalajangersakkanik malinninnginneq kinguneqassasoq meeqqap siunnersuummi § 1, imm. 1, nr. 6 malillugu meeqqanut ileqqaarutinik pisinnaatitaannginneranik.

Nr. 7-imut
Meeraq Kalaallit Nunaata avataani efterskolernermut Namminersornerullutik Oqartussanit januarip aallaqqaataani tapiiffigineqarpat meeqqamut ileqqaarutinik pisinnaatitaavoq

Tapiissutit taakku maannakkut tapiissutigineqartarput Qallunaat Nunaanni efterskolimiinnermut tapiissutit pillugit nalunaarut nr. 26 15. januar 2004-imeersoq malillugu.

Aalajangersakkami nr. 2-p ataani pissutsit taaneqartut tunngavigineqarput.


§ 2-mut

Imm. 1-imut
Meeqqamut ileqqaarutit tassaapput ukiut meeqqap meeqqamut ileqqaaruteqarfigisinnaasai, § 5, imm. 1-imi oqaaseqatigiit aappaanni taaneqartunik aningaasanik meeqqap pisinnaasaanik gangerlugit.

Assersuut

Meeraq ukiuni arfineq pingasuni meeqqamut ileqqaarsinnaatitaappat meeqqallu pisassai § 5, imm. 1 oqaaseqatigiit aappaat malillugu ukiuni sisamani siullerni 1.000 kr.-iuppata ukiunilu kingullerni sisamani 1.200 kr.-iuppata, meeraq meeqqamut ileqqaarutinik imatut amerlatigisunik pisinnaalissaaq:

4 x 1.000 kr. = 4.000 kr.
4 x 1.200 kr. = 4.800 kr.
Katillugit           8.800 kr.

Aalajangersakkap kinguneraa meeqqanut ileqqaaruteqarnermi aningaasanik agguassanut akilerneqartunit meeqqap pisassarsiassaminik meeqqap akiliiffigineqarnissaminik tamatigut pisinnaatitaaffeqarnera. Pisassat tassaapput ukiumi pineqartumi aningaasat tamarmiusut, aningaasallu ilanngaateqassanngillat, meeraq ukiup ingerlanerani meeqqanut ileqqaarutinik pissarsisinnaajunnaarsimagaluarpalluunniit.

Meeqqap § 1-imi piumasaaqaatini ataatsimik eqqortitsisoq § 5, imm. 1-ip immikkoortortaasa appaanni aningaasat taaneqartut pisassarissavai. Assersuutigalugu meeraq Kalaallit Nunaanni najugaqartutut Qitiusumik Inunnik Nalunaarsuiviimi 1. januarimiit nalunaarsorneqarpat meeraq ukiumi pineqartumi meeqqanut ileqqaarutinit pisassaqassaaq.

Meeqqap § 1-imi piumasaqaatinik januarip aallaqqaataani eqqortitsinngippat, meeraq Kalaallit Nunaanni najugaqartutut Qitiusumik Inunnik Nalunaarsuivmimi 1. januarimiit nalunaarsorneqarpat meeraq ukiumi pineqartumi meeqqanut ileqqaarutinit pisassaqassanngilaq. Meeraq januarip aallaqqaataaniit Kalaallit Nunaanni najugaqarunnaartut Qitiusumik Inunnik Nalunaarsuivmimi nalunaarsorneqarpat meeraq ukiumi pineqartumi meeqqanut ileqqaarutinit pisassaqassanngilaq.

Imm. 2-mut
Siunnersuutigineqarpoq meeqqamut ileqqaarutinut ilassutit pillugit Naalakkersuisut annertunerusumik malittarisassanik aalajangersaasinnaassasut taassuma ataani ilassutit tamakkerlugit amerlussusiinik naatsorsuineq, naatsorseriaaseq aammalu aalajangersaaneq. Meeqqamut ileqqaarutinut ilassutinik akiliisoqarpat, taakku akileraaruteqassanngillat.

§ 7, imm. 1 malillugu Naalakkersuisut aningaaserivimmik imaluunniit aningaasanik inuussutissarsiutigalugu aqutsisumik allamik meeqqanut ileqqaarutit pappiaqqanut nalilinnut killilimmik ajunaarfiusinnaasunut aningaaasaliisutigineqarnissaat pillugu isumaqatigiissusiorsinnaapput. Aningaasaliinerit ilimagineqartiariaqarput Meeqqanut Ileqqaarutinik Aningaasanut ataavartumik ernianik, pissarsianik, nalinginit iluanaarutinik assigisaannillu ataavartumik pissarsissutigineqartarnissaat. Pissarsiat ukiumiit ukiumut nikerarsinnaapput.

§ 4 malillugu qinnuteqartoqarneratigut meeqqamut ileqqaarutit tunniunneqartassapput, tunniussinerlu kingusinnerpaamik pissaaq qaammammi meeqqap 22-nik ukioqalerfiani. Ilimagineqartariaqarpoq meeqqat ilaat meeqqamut ileqqaarutit akilerneqannginneranni toqussasut meeqqallu ilaat assersuutigalugu ukiunik arlalinnik sioqqutillutik nunamiit aallarsimanertik pissutigalugu piffissaq eqqorlugu akiliisoqarnissaanik qinnuteqarsinnaassanngitsut. Naatsorsuutigineqassavortaaq meeqqat tamarmik § 4, imm. 3-mi piumasaqaatinik naammassinninna-vianngitsut.

Aalajangersagassatut siunnersuutip Naalakkersuisut periarfissaqalersippai, pissarsiat aammalu meeqqanut ileqqaarutit tiguneqanngitsut meeqqanut ileqqaarutinut ilassutitut akiliutigineqarnissaannik malittarisassanik aalajangersaanissamut. Ilassutit taakku ataavartumik pissarsiat ilaatigut apeqqutaatillugu allanngorarsinnaapput.

Naalakkersuisut malittarisassanik aalajangersaanerminni ilaatigut isiginiarsinnaavaat, Meeqqanut Ileqqaarutinut Aningaasatini sillimmatitut aningaasaanik katersisoqarsinnaassasoq, piffissat ilaanni annikitsumik pissarsiviusuni imaluunniit pissarsiviunngitsuni pissamaatissatut atorneqarsinnaasunik, taamaalilluni aningaasat tiguneqanngitsut pissarsiallu ilaat meeqqanut ileqqaarutinut ilassutitut akiliutigineqarsinnaassallutik. Aammattaaq isiginiarneqarsinnaavoq ilassutit ukiut ingerlanerini naleqquttumik agguarneqarnissaasa qulakkeerneqarnissaa, assigisaallu.


§ 3-mut

Siunnersuutigineqarpoq meeqqap meeqqamut ileqqaarutinit pisassai, taassuma ataani § 2, imm. 2 malillugu ilassutit, allanut tunniunneqarsinnaanngitsut sallunaveeqqutaasinnaanatilluunniit, aammalu akiligassanut taarsiissutaasinnaassanngitsut imaluunniit taarseeqqusissutitut piumasaqaatinut tamarmiusunut taarsiissutaasinnaassanngitsut.

Taamaalilluni meeqqap meeqqamut ileqqaarutinit pissarsiassai akiligassaqarfiit akiliisitsiniarnerannut atatillugu atorneqarsinnaassanngillat, aammalu meeqqap imaluunniit meeqqap angajoqqaavisa pissarsiassat qularnaveeqqutitut allatulluunniit atorsinnaassanagit.

Aalajangersakkami piffissaq pineqarpoq aningaasat meeqqap aningaaserivimmi kontoanut akilerneqarnissaasa tungaanut. Piffissamiit meeqqamut ileqqaarutit meeqqap kontoanut ilineqarneraniit meeqqamut ileqqaarutit malittarisassat nalinginnaasut atorlugit atorneqarsinnaassapput, taamaammalu akiligassaqarfiit akiliisitsiniarnerannut allanulluunniit tunniunneqarsinnaarneranut inerteqqummit illersugaajunnaassallutik.


§ 4-mut

Imm. 1-imut
Meeqqaanut ileqqaarutit qinnuteqartoqarneratigut akilerneqartassapput, meeqqallu aningaaaserivimmi kontoanut ilineqassallutik.

Imm. 2-mut
Meeqqamut ileqqaarutit siusinnerpaamik tunniunneqarsinnaapput qaammatip meeqqap 18-inik ukioqalerfiata naanerani, kingusinnerpaamillu tunniunneqassallutik qaammatip meeqqap 22-nik ukioqalerfiata naanerani.

Taamaalilluni meeraq meeqqamut ileqqaarutit akilerneqarnissaannik qinnuteqaateqarnissamut ukiunik sisamanik periarfissaqassaaq, takuuk imm. 1.

Periarfissaq aalajangersarneqarpoq inuusuttut ilinniagaqarnermik aallartitsinissaat, inissaminnik assigisaanilluunniit pilersitsinissaat siuarsarniarlugu. Aammataaq meeqqanut ileqqaarutinut aningaasat agguaassassat ileqqaanermik aaqqissuussinernut allanut unammillertuunnginnissaat eqqarsaatigineqarput.

Meeqqap qaammammi 22-nik ukioqalernermini meeqqamut ileqqaarutit akilerneqarnissaannik qinnuteqaateqanngippat, meeqqap meeqqamut ileqqaarutit annaassavai, aningaasallu meeqqanut ileqqaarutinut aningaasanut agguaassassanut nuunneqassallutik.

§ 7, imm. 2 malillugu Naalakkersuisut ilaatigut meeqqanut ileqqaarutinut aningaasat agguaassassat allaffissornikkut aqunneqarneri pillugu annertunerusumik malittarisassiorsinnaapput. Tassunga atatillugu ilimagineqarpoq aalajangersarneqassasoq meeqqat tamarmik meeqqanut ileqqaarutit ineriartornerat pillugu akuttunngitsumik ilisimatinneqartassasut aammalu meeqqat 18-inik ukioqalinngitsiarneranni ilisimatinneqartassasut, kiisalu meeqqat 22-nik ukioqalernissartik sioqqutingaatsiarlugu akiliisoqarnissaanik qinnuteqarsimanngitsut qinnuteqarsimannginnerup kingunissaanik ilisimatinneqartassasut.

Imm. 3-mut
Meeqqanut ileqqaarutit tunniunneqartinnagit piumasaqaatit assigiinngitsut naammassineqaqqaartariaqarnerat siunnersuutigineqarpoq. Piumasaqaatitigut siunertaavoq qulakkeerniarneqarmat meeqqanut ileqqaarutit atuinerulersitsiinnannginnissaat kisiannili inuusuttumut sapinngisamik iluaqutaalernissaat. Aningaasat tunniunneqartinnagit siunnersuutigineqartumi piumasaqaatit, Aningaaserivinni ileqqaakkat akileraarutitigut oqilisaaffigineqarnissaat pillugu inatsimmi piumasaqaatinut assingupput.


§5 -imut

Imm. 1-imut
Ukiut tamaasa kingusinnerpaamik 30. april aningaasanik aningaasanut inatsimmi aalajangersakkanik Meeqqanut Ileqqaarutinut Aningaasanut akiliisoqartassaaq. Aningaasat amerlassusaat meeqqat meeqqamut ileqqaaruteqarsinnaatitaasut amerlassusaat tunngavigalugu aalajangerneqartassapput.

Meeqqat ileqqaarutaannut aningaasat agguagassat aningaasalersorneqassapput ukiumoortumik aningaasanut inatsimmi meeqqanut ileqqaarutinut aningaasaliisoqartarneratigut. Aningaasat amerlassusissaat aalajangersarneqartassapput meeqqat ukiumi tulliuttumi meeqqamut ileqqaarutisisinnaasutut ilimagineqartut amerlassusaasa missingersorneqarnerat tunngavigalugu. Aningaasat ukiumi aningaasanik inatsiseqarfiusumi kingusinnerpaamik 30. april meeqqanut ileqqaarutinut agguagassanut akilerneqartassapput.

Taassuma kingorna meeqqanut ileqqaarutit tunniunneqartarneri Meeqqanut Ileqqaarutinut Aningaasanit aningaasalersorneqartassapput.

Imm. 2-mut
Taamaalilluni meeqqanut ileqqaarutinut aningaasat agguagassat Namminersornerullutik Oqartussat pigissavaat. Meeqqap meeqqamut ileqqaarutit aatsaat atorsinnaalissavai piffissami aningaasat aningaaserivimmi meeqqap kontoanut nuunneqarpata, takuuk § 4 imm.2.

Taamaalilluni meeqqat ileqqaarutaannut aningaasat agguagassat Namminersornerullutik Oqartussat ileqqaarnerattut isikkoqassaaq, tassani aningaasat Namminersornerullutik Oqartussat meeqqat ileqqaarutaannut akiliinissamut pisussaaffiinut atorneqassallutik.


§ 6-mut

Imm. 1-imut
Meeqqanut Ileqqaarutinut Aningaasat allaffissornikkut aqunneqarnerinut aningaasartuutit Meeqqanut Ileqqaarutinut Aningaasani aningaasaatit tunngavilugit Namminersornerullutik Oqartussat aamma Meeqqanut Ileqqaarutinut Aningaasat akornanni agguarlugit akilerneqartassapput.

Imm. 2
Namminersornerullutik Oqartussat allaffissornermi aqutsinermut akiliutissaannut matussutissat aningaasanut inatsimmi aalajangerneqartassapput. Agguaaneq pissaaq ukiumi aningaasanik inatsiseqarfiusup siuliani majip aallaqqaataani Meeqqanut Ileqqaarutinut Aningaasani aningaasaatit tunngavigalugit, tassa ukiumi majip aallaqaataani Meeqqanut Ileqqaarutinut Aningaasanut akiliinerup siuliani. Piffissaq aalajangerneqarpoq qaammatisiutini ukiumut tullermut aningaasanut inatsimmut ataqatigiissaarinissaq eqqarsaatigalugu.

Imm. 3-mut
Namminersornerullutik Oqartussat allaffissornermi aningaasartuutinut akiligassaat tassaassapput:

1) aningaasaatit 40 mio.kr.-it ataappatigit 100 procentit
2) aningaasaatit 40 mio.kr.-it qaangerpatigit kisianni 60 mio.kr.-it ataallugit 75 procentit
3) aningaasaatit 60 mio.kr.-it qaangerpatigit kisianni 80 mio.kr.-it ataallugit 50 procent-it
4) aningaasaatit 60 mio.kr.-it qaangerpatigit kisianni 80 mio.kr.-it ataallugit 25 procent-it
5) aningaasaatit 100 mio.kr.-it qaangerpatigit 0 procent

Ukiumi siullermi Meeqqanut Ileqqaarutinut Aningaasat pilersinneqarneranni ilimagineqarpoq allaffissornikkut aqutsinermi aningaasartuutit pissarsianit amerlanerussasut. Meeqqanut Ilaqqaarutinut Aningaasani aningaasaatit amerliartornerat peqatigalugu siullermik ilimagineqarpoq pissarsiat aningaasartuutit amerlaqatigissagaat, taassumalu kingorna amerlanerulissallutik. Agguaaqatigiinnissamut siunnersuummi ukiumit siullermiit Meeqqanut Ileqqaarutinut Aningaasat pilersinneqarneranniit pissarsianit iluanaaruteqarnissaq qulakkeerneqassaaq, taakkulu meeqqanut ileqqaarutinut akiliutinut ilassutitut akiliutigineqarsinnaapput.

Siunnersuutip kinguneraa Meeqqanut Ileqqaarutinut Aningaasanut akiulitigineqartussat kiisalu Meeqqanut Ileqqaarutinut Aningaasat allaffissornikkut aqunneqarnerinut aningaasartuutinut Namminersornerullutik Oqartussat akiliutissaat aningaasanut inatsimmi aningaasaliissutigineqartassasut. Ilimagineqarpoq allaffissornikkut aningaasartuutinut Namminersornerullutik Oqartussat akilitigisartagaat ukiut arfineq marluk missaat ingerlareerpata 0 kr.-inngussasut.

Aningaasat akiliutigineqartut aningaasaliissutiginerini aningaasartuutit aalajangersakkami ilanngunneqanngillat, taamaammallu Meeqqanut Ileqqaarutinut aningaasanit akilerneqartassallutik. Aningaasartuutit tassaagajupput aningaaserivimmut assigisaanulluunniit sullissinermut akiliutit, taakkulu aningaasaliissutigineqartut procentii annikitsut tunngavigalugit naatsorsorneqartarput.

Meeqqanut Ileqqaarutinut Aningaasani aningaasaatit naatsorsuutinik tunngaveqarput, tamassumunngalu pissutaalluni piffissap akiliiffiusup piffissallu pisassaqartunut akiliinerup assigiinngissutaannik. Assersuutigalugu meeqqamut ataatsimut ukiumut Meeqqanut Ileqqaarutinut Aningaasanut akiliisoqarpat, aningaasat aatsaat akilerneqassapput meeraq 18-inik ukioqalerpat. Ukiut taakku akornanni ukiuni 17-ini 1.000 kr.-it Meeqqanut Ileqqaarutinut Aningaasat aningaasaatigissavaat.


§ 7-imut

Imm. 1-imut
Siunnersuutigineqarpoq meeqqanut ileqqaarutit allaffissornikkut aqunneqarneranni suliassat aamma meeqqanut ileqqaarutinut aningaasat agguagassat aningaasaliissutigineqarnissaat pillugit Naalakkersuisut aningaaserivimmik imaluunniit aningaasanik aqutsinermik suliaqartumik allamik isumaqatigiissuteqarsinnaassasut.

Siunertaavoq piviusuni Aningaasaqarnermut Naalakkersuisoq imaluunniit pisortaq pisinnaatinneqartoq Naalakkersuisut sinnerlugit aningaaserivimmik ukiunut arlalinnut atuuttussamik taamatut isumaqatigiissusiortoqasinnaassasoq, tassa allaffissornikkut aqutsinermik aningaasaliisarnermillu aningaaseriviit ilisimasaqarmata misilittagaqarlutillu, tamannalu aaqqissuussinerup pitsaasumik aaqqissuunnissaanut tunngaviuvoq.

Isumaqatigiissummi ilaatigut ajunaaruteqariataarsinnaanerup annertunerpaaffissaa aalajangersarneqassaaq. Tassunga atatillugu pingaartinneqassaaq annikinnerpaamik ajunaaruteqariataarsinnaaneq eqqarsaatigalugu annertunerpaamik pissarsinissap qulakkeerneqarnissaa. Siunertaavoq pappiaqqanut annikitsumik ajunaaruteqarfioriataarneqarsinnaasunut aningaasaliisoqassasoq, akerlianillu ilimagineqanngilaq pappiaqqanut annertuumik ajunaarfioriaannaasunut aningaasaliisoqassanngitsoq.

Akerlianik isumaqatigiissutip kingunerissavaa aningaaserivik pisinnaatitaaffeqartunut tunngatillugu eqqartuussiveqarnikkut pisussaaffeqarluni aalajangiivittassasoq. Taamatut pisinnaatitsineq Naalakkersuisut allaffeqarfissuanniit ingerlanneqassaaq.

Imm. 2-mut
Siunnersuutigineqarpoq Meeqqanut ileqqaarutinut aningaasat agguagassat allaffissornikkut aqunneqarnerannut nalakkersuisut annertunerusunik malittarisassiorsinnaassasut, taassuma ataani aningaasat tunniunneqarnissaannik qinnuteqaateqartarnerit, uppernarsaanerit, maalaarutit suliarineqartarneri ilaalu ilanngullugit.

Soorlu qulaani oqaatigineqartoq ilimagineqarpoq ilinniarnermik ilinniaqqinnermillu uppernarsaammik tunniussinissap aaqqissunneqarnissaa piffissarlu pillugit Naalakkersuisut annertunerusumik malittarisassiorsinnaassapput, taassuma ataani tamanna eqqortinneqanngippat meeraq sinnersuummi § 1, imm, 1, nr. 6 malillugu meeqqanut ileqqaarutinik pisassaqassanngitsoq.

Naalakkersuisut aalajangersaasinnaapput meeqqat tamarmik meeqqanut ileqqaarutit ineriartornerat pillugu akuttunngitsumik ilisimatinneqartassasut aammalu meeqqat 18-inik ukioqalinngitsiarneranni ilisimatinneqartassasut, kiisalu meeqqat 22-nik ukioqalernissartik sioqqutingaatsiarlugu akiliisoqarnissaanik qinnuteqarsimanngitsut qinnuteqarsimannginnerup kingunissaanik ilisimatinneqartassasut.

Maalaarutit suliarineqartarnerannut malittarisassat aalajangersarneqarnerannut atatillugu ilaatigut Naalakkersuisunut maalaarutit tunniunnissaannut piffissarititat pillugit Naalakkersuisut aalajangersaasinnaapput


§ 8-mut

Siunnersuutigineqarpoq najoqqutassani inatsisip kinguneranik aalajangersakkani najoqqutassami aalajangersakkanik unioqqutitsinermi pillaatinik akiligassiinermi malittarisassanik aalajangersaasoqarsinnaassasoq.


§ 9-mut

Inatsisartut inatsisaat atuutilissaaq 1. januar 2007

Siunnersuutigineqarpoq meeqqat piffissami 2. januarip aamma 30. aprilip 2007 akornanni 18-inik ukioqalersut meeqqanullu ileqqaaruteqarsinnaatitaasut, meeqqamut ileqqaarutit siusinnerpaamik 1. juni 2007-imi tigisunaassagaat.