Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit Inatsisartut peqqussutaat nr. 10, 14. november 2004-meersoq.
Kalaallit Nunaanni Peqqinnissaqarfik pillugu inatsimmi nr. 369-imi, 6. juni 1991-imeersumi, § 1 aamma § 3, imm. 1 aamma imm. 2, malillugit aalajangersarneqarput:
Atuuffia
§ 1. Peqqussummi pineqarput nioqqutissat tamarmik tupap naasuanit (Nicotianamit) suliarineqarsimasut, tassunga ilanngullugit sikaritsit, sikaat, sikaavaqqat, serutsit, imassat, tupat imusassat, sunoorsit sukuluussallu il.il.
§ 2. Avatangiisit pujortarfiunngitsut pillugit peqqussumi malittarisassat Namminersornerullutik Oqartussanut kommuninullu taamaallaat atuupput, taakkununnga ilanngullugit suliffeqarfiit taakkua ingerlataat aamma Namminersornerullutik Oqartussat suliffeqarfiutaat namminersortitat.
Imm. 2. Avatangiisit pujortarfiunngitsut pillugit malittarisassanut ilaanngillat Hans Egedep Illua aamma pisortat illuutaanni ineqartut namminerisaminnik inaat inersimasunuinnaq angerlarsimaffiusut, soorlu assersuutigalugu utoqqaat angerlarsimaffii aammalu innarluutillinnut ulloq unnuarlu paaqqinnittarfiit
Imm. 3. Avatangiisit pujortarfiunngitsut pillugit malittarisassat aammattaaq ingerlatseqatigiiffinnut, suliffeqarfinnut il.il. erseqqinnerusumik taaneqartunut, pisortat ingerlatsiviinut ilaasutut inatsisit tunngavigalugit taaneqarsinnaanngitsunut atuutsinneqarnissaat pillugu malittarisassanik Naalakkersuisut aalajangersaasinnaapput. Tamannali aatsaat atuuppoq pineqartut ingerlatsinerminni aningaasartuutaasa annertunersaat Namminersornerullutik Oqartussanit kommuninilluunniit matussuserneqartarpata, imaluunniit ingerlatseqatigiiffiit, suliffeqarfiit il.il. annertunersaat taakkunannga pigineqarpata.
Avatangiisit pujortarfiunngitsut
§ 3. Pisortat illuutaanni pujortarneq inerteqqutaavoq, taamaattorli takuuk imm. 2.
Imm. 2. Pujortarneq inerteqqutaanngilaq inini pujortartartunut immikkut aaqqissuunneqarsimasuni, taamaattorli takuuk § 5.
Imm. 3. Pujortartarfittut immikkut aaqqissuussisoqarnissaa aalajangerneqassaaq pineqartumi siulersuisunit, paaqqinnittarfiit siulersuisuinit, kommunalbestyrelsemit il.il.§ 4. Angallassissutini kikkunnit tamanit atorneqartartuni pujortarneq inerteqqutaavoq, taamaattorli takuuk imm. 2.
Imm. 2. Umiarsuarni aalajangersimasumik ingerlaarfilinni pujortartoqarsinnaavoq inini pujortartarfittut immikkut aaqqissuussani.
Imm. 3. Nunanut allanut nunanillu allanit aqqutit peqqussummi ilaatinneqanngillat.§ 5. Meeqqat atuarfiini, timersortarfinni, naluttarfinni, ulluunerani paaqqinnittarfiit aamma meeqqanut inuusuttunullu ulloq unnuarlu paaqqinnittarfinni pujortarneq inerteqqutaavoq. Tamanna illup iluani silataanilu atuuppoq.
§ 6. §§ 3-5-imi aalajangersakkat apeqqutaatinnagit nalliuttorsiornerni pingaarutilinni pujortarneq akuerigallarneqarsinnaavoq.
Imm. 2. §§ 3-5-imi aalajangersakkat avaqqullugit immikkut akuersinissaq, takuuk imm. 1, pineqartumi aqutsisunit, paaqqinnittarfiup siulersuisuinit, kommunalbestyrelsemit il.il aalajangerneqarsinnaavoq.§ 7. Init pujortartarfittut aaqqissuussat, takuuk § 3, imm. 2, aamma § 4, imm. 2, allagartaliinikkut nalunaaqutserneqassapput, takuneqarsinnaassalluni inimi tassani pujortartoqarsinnaasoq.
Imm. 2. Sapinngisamik silaannarissakulaarnikkut imaluunniit pitsaasumik silaannarissaateqarnikkut pujumik akornutaasut annikillisimaartinneqassapput.
Tupanik nioqqutissianik nioqquteqarneq
§ 8. Inunnut 18-it inorlugit ukiulinnut tupanik nioqqutissianik tuniniaasoqaqqusaanngilaq.
Imm. 2. Tupanik nioqqutissianik tuniniaaneq pisiniartitsisumit pisitinneqarnikkut taammallaat pisinnaavoq.
Imm. 3. Inuk 18-inik ukioqalersimanerminik pisariaqartumik uppernarsaateqarnersoq nioqquteqartup pisiniarfiullu tuniniaasup qulakkiissallugu akisussaaffigaat, takuuk imm. 1.§ 9. Tupanik nioqqutissiat ataasiakkaarlugit nioqqutigineqassanngillat. Tassunga ilaanngilaq sikaanik nioqquteqarneq.
Tupanik nioqqutissianik nalunaaqutsersuineq
§ 10. Tupamik atuinerup peqqinnissamut peqqinnermullu navianartumik sunniuttarneranik mianersoqqussummik tupanik nioqqutissiat tamarmik erseqqissumik nalunaaqutserneqarsimassapput. Mianersoqqussut kalaallisut danskisullu allassimassaaq.
Imm. 2. Mianersoqqussutit qanoq oqaasertaqartinneqarlutillu iluseqartinneqarnissaat pillugit malittarisassanik Naalakkersuisut aalajangersaassapput.§ 11. Tupanik nioqqutissiat tamarmik usserummik aamma nikotinimik qanoq annertutigisumik akoqarnerinik paasissutissartaqartinneqassapput. Paasissutissat kalaallisut danskisullu allassimassapput.
Tupanik nioqqutissiat pilerisaarutigineqarneri
§ 12. Tupanik nioqqutissiat allagarsiussatigut, allagartarsuartigut allatigulluunnit pilerisaaruteqartoqaqqusaanngilaq.
Imm. 2. Tupanik nioqqutissianik pilerisaarutinut sunulluunniit inerteqquteqarneq nalunaaqutsersuutit, saqqarmiut, ilisarnaatit allatulluunniit takussutissiat atornerisigut sanioqqunneqassanngilaq.
Imm. 3. Immikkoortoq 1-imi aamma 2-mi inerteqqutinut ilaanngillat aviisit, atuagassiat, aviisit assiliartalersukkat assigisaallu Nunatsinnut eqqunneqartartut.§ 13. Tupanik misiligutissanik akeqanngitsumik agguaaneq inerteqqutaavoq.
Pineqaatissiisarnerit
§ 14. § 8-mi, imm. 1 aamma 2-mi, § 9-mi, § 10-mi, imm. 1-imi, § 11-mi, § 12-imi, imm. 1 aamma 2-mi, aamma § 13-imi aalajangersakkanik unioqqutitsinermi akiliisitaasussanngortitsilluni pineqaatissiisoqarsinnaavoq.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik taamaaqataalluunniit imm. 1-imi pineqartumik unioqqutitsippat ingerlatseqatigiiffik immini unioqqutitsinermut akiliisitaasussanngorlugu akisussaatinneqarsinnaavoq. Namminersornerullutik Oqartussat, kommuni imaluunniit kommunit ataatsimoorlutik ingerlassaqarfii unioqqutitsisimappata Namminersornerullutik Oqartussat, kommunalbestyrelse imaluunniit kommunit ataatsimoorlutik ingerlassaqarfii taamatut akiliisitaasussanngorlugit akisussaatinneqarsinnaapput.
Atuutilerfia
§ 15. Inatsisartut peqqussutaat ulloq 1. januar 2005 atuutilerpoq.
Imm. 2. Peqatigitillugu Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit Inatsisartut peqqussutaat nr. 4, 23. maj 2000-imeersoq atorunnaarsinneqarpoq.
Imm. 3. Tupamit tunisassiat nioqqutissap suuneranik dansk-isunnarluunniit nalunaarsorneqaraluarpata tuniniarneqarsinnaapput, tak. § 11, tupamit nioqqutissiaq 2005-imi jannuaarip aallaqqaatigitinnagu Nunatsinnut eqqunneqarsimappat.
Namminersornerullutik Oqartussat, ulloq 14. november 2004
Hans Enoksen/
Asii Chemnitz Narup
Isumaliutissiissut (Aappassaaneerinninneq)
Akissuteqaat (Aappassaaneerinninneq)