23. september 2004 UKA 2004/32
Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit Inatsisartut peqqussutaannut siunnersuut.
(Ilaqutariinnermut Peqqissutsimullu Naalakkersuisoq)
Saqqummiussissut
Siullermeerneqarnera
Tupatorneq nunatsinni peqqissutsimut ajoqutaasut annersaasa ilagaat. Misissuinernit assigiinngitsunit nalunngilarput innuttaasut inersimasut 70%-ii pallillugit pujortartartuusut, aammalu inuusuttuaqqani pujortartartut 40%-it missaanniittut.
Ataatsimut isigalugu inuusuttuaqqat 15-inik ukioqalertinnatik pujortaqqaartarput. Pingajorarterutaasali aqqaneq marlunnik ukioqalertinnatik pujortarneq misilissimavaat. Inuusuttuaqqat pujortartartut 13-15-inik ukioqarlutik ullut tamaasa pujortartalersarput, qanorlu cigaritsitortiginerat qatanngutaannit angajullernit ikinngutaannillu sunnerneqartartorujussuuvoq.
Naalakkersuisut peqqussutsikkut anguniarpaat tupamik atuinerup annikillisarnissaa kiisalu tupamik pujortarnerup peqqissutsimut sunniutigisartagaasa pinaveersaartinneqarnissaat killilersimaarneqarnissaallu. Tamanna ilaatigut innuttaasunut tamanut, meeqqanut inersimasunullu avatangiisit tupatorfiunngitsut qularnaarnerisigut pissaaq.
2003-mi ukiakkut ataatsimiinnermi Inatsisartunut ilaasortat arlallit tupa pillugu peqqussutip maanna atuuttup sukannernerulersinneqarnissaanut siunnersuutinik saqqummiussipput, taakkununnga ilanngullugit tupanik nioqqutissianik pisinissamut ukiut killilerneqarnissaat kiisalu pisortat illuutaanni meeqqallu atuarfianni pujortarnerup inerteqqutaalernissaa. Naalakkersuisut taakku tusaatissatut tiguaat, peqqussutissatullu siunnersuut matumunnga ilanngunneqartoq annertuumik sukannernerulersinneqartoq suliarisimallugu.
Pisortat illuutaanni pujortartarneq pillugu malittarisassat siusinnerusukkut nalornissutigineqartarsimasut peqqussummi maanna siunnersuutigineqarpoq illuni peqqussummi pi-neqartunut ilaatinneqartuni pujortarneq inerteqqutaasoq. Taamaattorli suleqatinut ininik pujortartarfiliornissaq suli periarfissaalluni. Kisiannili siunnersuutigineqarpoq meeqqat atuarfianni, inini timersortarfissuarni, naluttarfinni, ulluunerani paaqqinnittarfinni aammalu meeqqanut inuusuttunullu ulloq unnuarlu paaqqinnittarfinni pujortarneq inerteqqutaalluinnartoq, taamaattumillu ininik pujortartarfiliortoqarsinnaanani. Inerteqqut illut iluanni silataannilu atuutissaaq.
Allannguutitut annertuutut siunnersutigineqarpoq inunnut 18-inik ukioqalersimanngitsunut tupanik nioqqutissianik tuniniaaqqusinnginneq. Tamatumunnga peqatigitillugu siunnersuutigineqarpoq, tupanik nioqqutissianik tuniniaaneq taamallaat pisiniartitsisumit pisitinneqarnikkut pisinnaassasoq . Taamaaliornikkut ukiutigut killissarisanik nakkutilliinerup aqunniarneqarnerata oqinnerulernissaa naatsorsuutigineqarpoq.
Siunnersuutigineqarportaaq tupanik tunisassiat ataasiakkaarlugit tuniniarneqarnissaat inerteq-qutigineqassasoq, tupap peqqinnissamut navianartumik sunniuteqartarneranik nalunaaqutsersuineq pisuni taamaattuni amigaateqarajuttoq paasineqarsimammat.
Peqqinnissaqarfiup missingersuutai tamarmiusut eqqarsaatigalugit siunnersuut aningaasartuutaassanngilaq. Tupamik atuinerup annikillisinniarneqarnerata Namminersornerullutik Oqartussat akitsuutinit isertitaannut imaluunniit inuussutissarsiuteqartunut qanoq sunniuteqarnissaa naatsorsorneqarsimanngilaq.
Inunnut 18-inik ukioqalersimanngitsunut tupanik nioqqutissianik tuniniaaqqusaasoqannginnerata kingunerisaanik tuniniaaffiit pisiniartut ukiuinik nakkutilliineq piffissaajaatigisalissavaat. Tamanna imigassanik aalakoornartulinnik tuniniaanermi pisussaareerpoq, taamaattumillu inuussutissarsiuteqartunut allaffissornikkut kingunerisassai annikitsuinnaasuusussaasutut isumaqarfigineqartariaqarput.
Tamatuma saniatigut siunnersuutip annertunerusumik kinguneqarnissaa naatsorsuutigineqanngilaq.
Peqqussulli tupamik atuinerup annikillisarniarnerani kisimi suliniutaassanngilaq, paasissutissiiuarnerli isummersuinerlu ilutigalugit tupamik atuinermik annikillisaaqataassalluni, taamaalillunilu innuttaasut peqqissusiat annertuumik pitsanngoriaateqarluni.
Taamatut oqaaseqarlunga Naalakkersuisut sinnerlugit tupa avatangiisinillu tupatorfiunngitsunik isumannaarineq pillugu inatsisartut peqqussutissaattut siunnersuut Inatsisartunut oqaluuserisassanngortippara.