11. oktober 2004 UKA 2004/32
Tupa avatangiisinillu tupatorfiunngitsunik isumannaarineq kiisalu tupanik nioqqutissat nalunaaqutserneqartarneri pillugit Inatsisartut peqqussutaannut siunnersuut.
(Ilaqutariinnermut Peqqissutsimullu Naalakkersuisoq)
Akissuteqaat
Aapassaaneerinninneq
Ataatsimiititaliaq qutsavigaara peqqussutissatut siunnersuut oqaluuserisimammagu.
Avatangiisit tupatorfiunngitsut pillugit aalajangersakkani pillaatissiisinnaanermut periarfissaqanngilaq, taamaaliortoqassagaluarpat Namminersornerullutik Oqartussat, kommunit minnerunngitsumillu politiit allaffissornikkut aningaasartuutaat qaffarujussuartussaammata. Taassuma saniatigut unnerluutigisaqattaanneq pilersinneqartussaavoq.
Nakkutilliisussanik pilersitsinermut aningaasartornissaagaluamut taarsiullugu Namminersornerullutik Oqartussani Isumannaallisaanermut ataatsimiititaliaq Naalakkersuisut attavigilersaarpaat, avatangiisit pujortarfiunngitsut pillugit aalajangersakkat malinnissaat sulinermi tunngavissiinikkut qulakkeerneqaqqullugit. Unioqqutitsinerit pisortaqatigiinnut nalunaarutigineqarsinnaassapput, taakkulu aaqqiisoqarnissaa isumagisassavaat. Isumannaallisaanermut ataatsimiititaliap atorneqarnerata aalajangersakkanik malinninnissamut iluaqutaanissaa Naalakkersuisut naatsorsuutigaat, taamaattumik pillaatissiinissamut Inatsisartut periarfissarsiornissaat pisariaqanngilaq.
Siumup oqaaseqartuata nalunaarutigaa tupatornerup kingunerisaanik nappaatigineqalersartut katsorsarnerannut peqqinnissaqarfiup aningaasartuutissatut missingersuutaanit 300 mio koruunit missaat atorneqartartut. Kisitsisit taakku Ilaqutariinnermut Peqqissutsimullu Ataatsimiititaliap isumaliutissiissutaanit ilanngunneqarsimapput "misissuinerit nutaat"-tut innersuunneqarsimallutik. Kisitsit taanna eqqunngilaq, tupatornerullu kingunerisaanik nappaatit katsorsarneqartarnerannut aningaasartuutaasartut misissorneqarsimanerannik ilisimasaqanngilanga.
Naalakkersuisullu inassutigissavaat peqqussutissatut siunnersuutip taamatut iluseqartillugu akuersissutigineqarnissaa.