Matumuuna Kalaallit Nunaannut suliffissarsiortut killilersimaarnissaat pillugu Inatsisartut inatsisaat, allannguutit Inatsisartut inatsisaat nr. 27, 9. december 2015-meersut, Inatsisartut inatsisaat nr. 23, 28. november 2016-meersut aamma Inatsisartut inatsisaat nr. 22, 13. november 2017-meersut ilanngullugit nalunaarutigineqarpoq.

Siunertaq

  § 1.  Inatsisartut inatsisaata matuma siunertaraa sulisinnaasut Kalaallit Nunaanniittut suliffissanut maaniittunut siulliusussaatitaanerata qularnaarneqarnissaa.

Atuuffia

  § 2.  Inatsit atuuppoq nunami umiarsuartigullu assartuinermi ilaasartaatinilu makkuninnga atorfinitsitsisarnerni:

1)  atorfinni suliamik ilinniagaqarsimanngitsunik inuttalerneqarsinnaasuni,

2)  atorfinni sulianik ingerlatsinissami suliamik ilinniarsimasuunissamik piumasaqaateqarfiusuni, suliamik ilinniarsimasutut imaluunniit tunngaviusumik inuussutissarsiutinut ilinniartitaanerni, aamma,

3)  atorfinni imarsiornerup tungaatigut annertunerusumik ilinniagaqaqqaarluni atorfiniffigineqarsinnaasuni

  Imm. 2.  Aammattaaq inatsit atorfinnut akissarsiorfiusunut imm. 1-imi taaneqartuni avataaniit aggersunit inuttaqartinneqartunut atuuppoq, suliffeqarfiup sulisua Kalaallit Nunaata avataani suliffeqarfimmi atorfeqarnersoq apeqqutaatinnagu.

  Imm. 3.  Imm. 2-mut ilaanngillat avataaniit akissarsiaqarlutik sulisuusut, pineqartoq:

1)  suliffeqarfimmi Kalaallit Nunaata avataani angerlarsimaffilimmi sulisuuppat,

2)  pineqartoq nunami maani najugaqartuunngippat,

3)  taamaallaat sulisorineqarpat suliassanut sulisitsisup nunani allaneersup suliassiissutaanut akiligaanullu tunngatillugu,

4)  kalaallimit suliassiisumit kiffartuussamilluunniit sullissisuunngippat, aamma

5)  nunami maani suliassanik ataavartunik suliaqartuunngippat.

  Imm. 4.  Naalakkersuisut aalajangersagaliorsinnaapput, inatsit atortinneqassasoq sulisussanik avataaneersunik akissarsiaqartunik sulisitsinernut allanut, imm. 1-imi pineqartut atorfiit avataanniittunut.

  Imm. 5.  Naalakkersuisut aalajangersagaliorsinnaapput inatsit atussanngitsoq avataaneersunik sulisunik akissarsialinnik sulisitsinermi atorfinnut imm. 1-imi ilaagaluartunut.

  § 3.  Sulisartutut kalaaliusutut naatsorsuunneqarput inuit Kalaallit Nunaanni inunngorsimasut, aammalu inunngornerminniit ukiuni siullerni 5-ini nunatsinni najugaqavissuusimasut.

  Imm. 2.  Kikkulluunniit § 3 imm. 1-imi piumasarineqartunik eqqortitsisimanngitsut sulisartutut avataaneersutut isigineqarput, immikkut ittumik Kalaallit Nunaannut attuumassuteqarsimanngikkunik, tak. § 4.

  § 4.  Atorfinitsitsinermi inuk immikkut ittumik Kalaallit Nunaannut attuumassuteqartutut isigineqassaaq, pineqartoq

1)  ukiut kingulliit 10 ingerlaneranni ukiuni 7-ini Kalaallit Nunaanni najugaqavissimaguni, imaluunniit

2)  inummik § 3 imm. 1-imi pineqartumik imaluunniit inummut immikkut ittumik Kalaallit Nunaannut attuumassutilimmik, tak. immikkoortumi uani nr. 1 kiisalu immikkoortoq 3, imaluunniit inatsimmi uani aalajangersakkat malillugit Kalaallit Nunaanni pisortat imaluunniit namminersortut suliffeqarfianni atorfilimmut, katissimaguni imaluunniit sivikinnerpaamik ukiumi ataatsimi inooqateqarsimanerminik uppernarsaasinnaaguni.

  Imm. 2.  Imm. 1-imi nr. 1 malillugu Kalaallit Nunaanni najugaqavinnermut ilaatinneqassaaq ilinniarluni Kalaallit Nunaata avataani, ilinniarniakkap Kalaallit Nunaanni ingerlanneqarsinnaannginnera pissutigalugu, najugaqarneq, pineqartullu ilinniarnermi aallartinnerani najugaqavissuunissamut piumasat kalaallinut ilinniartunut tapisiaqarnissamik piumasarineqartartut eqqortikkunigit.

  Imm. 3.  Naalakkersuisut aalajangersinnaavaat atorfinitsitsinermi inuk pissutinik imm. 1- imi 2-milu taaneqartunit allaanerusunik pissuteqarluni Kalaallit Nunaannut immikkut attuumassuteqartutut isigineqassanersoq.

Kommuninit akuersissutit nalunaarutillu

  § 5.  Atorfinnut § 2-mi pineqartunut atorfinitsitsineq imaluunniit sulisinnaasunik avataaneersunik atuineq taamaallaat pisinnaavoq kommunimi kommunalbestyrelsimit akuersisitseqqaarluni.

  Imm. 2.  Imm. 1 malillugu sulisitsisoq pisussaavoq akuersissummik piniarnissamut.

  Imm. 3.  Sanaassap suliassartaasa ilaannut assigisaannulluunniit sulisinnaasunik avataaneersunik sulisoqarnermi sanasup sanatitsisulluunniit imm. 1 malillugu akisussaaffigaa akuersissummik pissarsiniarnissaq.

  § 5a.  Kommunalbestyrelsimit akuersissummik pissarsinissamut piumasaqaataavoq atorfik, § 2-imi pineqartunut ilaasoq nuna tamakkerlugu suliffissanut nittartakkami, suliffissarsiortunik aamma suliffissanik neqeroorutaasunik nalunaarsuinissamut aqutsinissamullu Naalakkersuisunit pilersinneqartumi, taamaattumik pilersitsisoqarsimappat, inuttassarsiorlugu allagarsiissutigineqassasoq.

  Imm. 2.  Atorfik suliffissanut nittartakkami minnerpaamik sapaatit akunnerini marlunni allagarsiissutigineqarsimassaaq.

  § 6.  Kommunalbestyrelsip aalajangissavaa § 5 malillugu akuersissut tunniunneqarsinnaanersoq. Akuersineq nalunaarutigineqartassaaq atorfik sulisussamik kalaallimik inummilluunniit immikkut ittumik Kalaallit Nunaannut attuumassuteqartumik piumasarineqartut naapertorlugit ilinniagalimmik kommunip suliffissaqartitsinermut ingerlatsiviata inuttassarsissussinnaanngippagu.

  Imm. 2.  Kommunimit akuersissut nalunaarutigineqassaaq piffissamut killilikkamut sivisunerpaamik ukiunik marlunnik sivisussusilimmut.

  Imm. 3.  Imm. 1 tunngavigalugu aalajangiinerit qinnuteqaatip tiguneraniit ullut 14-it qaangiutsinnagit aalajangerneqartassapput, takuulli § 5a. Kommunalbestyrelsilli qinnuteqaatip aalajangiiffiginissaanut paasissutissat amigaateqartutut nalilerpagit, kommunalbestyrelsi qinnuteqartumut paasissutissanik imaluunniit takussutissanik uppernarsaatinik piumasaqarsinnaavoq. Taamaattoqartillugu aalajangiinissamut killigititaq unitsinneqassaaq, paasissutissat takussutissat uppernarsaataasut pisariaqartinneqartut tigunissaasa tungaanut. Tamatuma kingorna kommunalbestyrelsi ullut 14-it qaangiutsinnagit aalajangiissaaq.

  Imm. 4.  Naalakkersuisut immikkut pisoqartillugu imm. 3-mi killissarititap sivikillineqarsinnaanera aalajangersaaffigisinnaavaat.

  Imm. 5.  Naalakkersuisut aalajangersagaliorsinnaapput nalunaarusiortarnermut, taassuma imassaanut akuttussusissaanullu tunngatillugu.

  § 7.  Sulisitsisut allallu sulisussanik avataaneersunik atorfeqartitsinissaminnut akuerineqarsimasut pisussaaffigaat atorfeqartitsilernerminniit imaluunniit soraarsitsinerminniit ullut 8 qaangiutinnginneranni kommunalbestyrelsi tamatuminnga nalunaarfigissallugu.

  § 8.  Naalakkersuisut nalunaarutit tunniunneqartarnerat suliarineqartarnerallu, aamma akuerineqarnissamik qinnuteqartarneq erseqqinnerusumik malittarisassiussavaaat.

Naammagittaalliorneq

  § 9.  Kommunalbestyrelsip § 6 tunngavigalugu aalajangigaa sulisitsisumit imaluunniit qinnuteqartumit allamit Naalakkersuisunut naammagittaalliuutigineqarsinnaavoq aalajangerneq pillugu nalunaarfigineqarnermiit ullut 14-it qaangiutinnginneranni.

  Imm. 2.  Sulisitsisoq imaluunnit qinnuteqartoq alla naammagittaalliuutimi tunniunneraniit qaammat ataaseq qaangiutsinnagu allamik nalunaarfigineqanngippat akuersissut tunniunneqartutut isigineqassaaq.

Aalajangersakkat assigiinngitsut

  § 10.  Naalakkersuisut aamma kommunalbestyrelsit inatsisip eqqortinneqarnissaa anguniarlugu pisortat oqartussaasoqarfiinut allanut paasiniaasarsinnaapput.

Pineqaatissiisarneq

  § 11.  § 5-imik aamma § 7-imik unioqqutitsinerit akiliisitaaneq kingunerisassavaat.

  Imm. 2.  Unioqqutitsineq aktieteqarnikkut ingerlatseqatigiiffimmit, piginneqatigiiffinnit (anpartsselskabinit andelsselskabinillu) assigisaannilluunniit piliarineqarsimappat ingerlatseqatigiiffik piginneqatigiiffilluunniit akiliisinneqarsinnaavoq. Unioqqutitsineq Namminersornerullutik Oqartussanit, kalaallit kommuniannit imaluunniit kommunit ataatsimut ingerlatseqatigiiffianit piliarineqarsimappat, Namminersornerullutik Oqartussat, kommuni kommunilluunniit ingerlatseqatigiiffiat akiliisinneqarsinnaavoq.

Atortussanngortitsineq

  § 12.  Inatsit atortussanngortinneqarpoq 1. januar 1993 aallarnerfigalugu.

  Imm. 2.  Atortussanngortitsinermut peqatigitillugu Kalaallit Nunaanni suliffissarsiortut killilersimaarnissaat pillugu Inatsisartut inatsisaat nr. 18 ulloq 16. december 1988-

imeersoq atorunnaarsinneqarpoq.

Imm. 3.  Malittarisassat imm. 2-mi inatsit taaneqartoq tunngavigalugu atulersitaasimasut atuutiinnarallassapput immikkut nutaamik malittarisassiuussinikkut atorunnaarsinneqarnissamik tungaanut.

  § 13.  Inatsisartut inatsisaat sakkutooqarfinnut, Kalaallit Nunaata illersorneqarnissaa pillugu 27. april 1951-imi isumaqatigiissutaasimasunut, atuutinngilaq. Kalaallit kommuneqarfiisa aggornerisa avataaniittunut Kalaallit Nunaanni Naalakkersuisut inatsimmi uani kommunalbestyrelsinut ataasiakkaanut oqaasissaqarfigitinneqartut isumagissavaat.

  Imm. 2.  Naalakkersuisut inatsisartut inatsisaat sumiiffinnut oqaatigineqarsimasunut aalajangersimasunut atuutitinngitsoorsinnaavaat.

Inatsisartut inatsisaat nr. 27, 9. december 2015-meersoq (Sulisitsisut suliffissanut nittartakkamik atuinissaat)^[1] atuutilernissaanik aalajangersakkanik makkuninnga imaqarpoq:

§ 2

Inatsisartut inatsisaat atuutilerpoq ulloq 1. januar 2016.

Inatsisartut inatsisaat nr. 23, 28. november 2016-meersoq (Atuuffia aamma ilinniakkat allat, nalunaarusiortarneq il.il.)^[2] atuutilernissaanik aalajangersakkanik makkuninnga imaqarpoq:

§ 2

Inatsisartut inatsisaat atuutilerpoq 1. januar 2017.

Inatsisartut inatsisaat nr. 22, 13. november 2017-meersoq (Aalajangiinissamut killigititat)^[3] atuutilernissaanik aalajangersakkanik makkuninnga imaqarpoq:

§ 2

Inatsisartut inatsisaat 1. januar 2018-imi atuutilerpoq.

Isumaginninnermut, Ilaqutariinnut, Suliffeqarnermut Nunamullu Namminermut

Naalakkersuisoqarfik, ulloq 24. februar 2025

Martha Abelsen (atsior.)

Departementschef

/ Mehdi Shams (atsior.)