Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersumi § 13-imi imm. 1, Inatsisartut inatsisaatigut nr. 24, 28. novembari 2016-meersukkut kiisalu Kommunit qimmit qitsuillu pillugit ileqqoreqqusaat pillugit Namminersornerullutik Oqartussat nalunaarutaat nr. 15, 19. juni 2003-meersumut allanngortinneqartumi aalajangerneqarpoq:

 

Kapitali 1

Atuuffeqarfiat

 

  § 1.  Ileqqoreqqusaq una Qeqqata Kommuniani qimmeqarneq pillugu atuuttuuvoq.

  Imm. 2.  Kommunimi immikkoortortaq qimuttoqarfimmi ilaatinneqarnersoq qimmit qimuttut pillugit inatsimmi sukkulluunniit atuuttuusumi nassuiarneqarpoq.

  Imm. 3.  Ileqqoreqqusami uani atorfimmut atatillugit qimmit kiisalu qimmit innarluutilinnut ikiortaasartut ilaatinneqanngillat.

 

Kapitali 2

Nalinginnaasumik aalajangersakkat

 

Qimmeqarnissamut akuersissut nalunaarsuinerlu 

 

  § 2.  Qeqqata Kommuniani qimmeqarnissamut akuersissut qinnuteqareernikkut kommunalbestyrelsimit allakkatigut nalunaarutigineqassaaq, tassanilu uumasunut aalajangersakkat atuuttut malinneqarsimasut uppernarsarneqassalluni.

  Imm. 2.  Akuersissut tunineqartuinnarmut atuuppoq, allanullu tunniunneqarsinnaanani.

  Imm. 3.  Kommunalbestyrelsip inuit qimmeqarnissaannik itigartissinnaavai taakku ileqqoreqqusamik uuminnga naammassinnissimanngippata imaluunniit ileqqoreqqusamik uuminnga sakkortuumik utikattumilluunniit unioqqutitsisimappa akuersissummik arsaarsinnaavaat.

 

  § 3.  Qimmiutilik qimmit pillugit nuna tamakkerlugu uumasunut nalunaarsuisarfimmi nalunaarsortinneqarnissaanut akisussasuusumut kommunalbestyrelsimut nalunaaruteqassaaq.

  Imm. 2.  Piginnittunut pissutsit allanngortillugit, qimmilivinnik nuussinermi qimmerluunniit toquppat, qimmiutillip tamanna ullut 30-it iluanni kommunalbestyrelsimut nalunaarutigissavaa.

 

Qimminik nakkutilliisoq

 

  § 4.  Naalakkersuisunit ilinniartinneqartussanik akuerineqartussanillu qimmilerisumik ataatsimik arlalinnilluunniit kommunalbestyrelsi toqqaassaaq. 

  Imm. 2.  Akiuussusersuinissamut, qimmip kinaassusaanut kinaassutsimut ilisarnaatinik nalunaaqutsersuinissamut, tigusinissamut toqutsinissamullu qimmilerisoq akisussaasuuvoq kiisalu qimmeqarneq pillugu inatsimmut sukkulluunniit atuuttuusumut kommunip malitsitsinissaanut attuumassutilinni kommunalbestyrelsimit pineqartup peqquneqartarnissaanut.

 

Akiuussutissiineq kinaassutsimillu ilisarnaasersuineq

 

  § 5.  Qimmilik pisussaavoq qimmini malittarisassat malillugit akiuussusersortissallugit kiisalu ID-nik nalunaaqutsersortissallugit.

  Imm. 2.  Qimmilerisup nuna tamakkerlugu uumasunut paasissutissanut katersuivimmi akiuussutissamik kapitissimaneq kinaassutsimillu ilisarnaatip normua nalunaarsussavaa. Akiuussutissamik kapitissimanermut uppernarsaataasutut nalunaarsuinerup assilineranik qimmimik piginnittoq qinnuiginninnikkut piumasinnaavoq.

  Imm. 3.  Qimmeq malittarisassat atuuttut malillugit akiuussuserneqarsimanngippat qimmillip akiligaanik qimmip pinngitsaalillugu akiuussuserneqarnissaa kommunalbestyrelsip sulissutigisinnaavaa. Tamanna pisinnaanngippat qimmeq toqunneqassaaq allamulluunniit tunniunneqassaaq.

 

Inissisimaffia

 

  § 6.  Qimmit inersimasut marluk tikillugit nammineq najukkap eqqaanut inissinneqarsinnaapput. Qimmit taakku piaraat nammineq inip eqqaanut inissinneqarsinnaapput qaammatinik arfinilinnik utoqqaassuseqalernissaasa tungaannut.  Qimmit eqqaamiorisat innuttaasulluunniit allat aqqusinernik, pisuinnaat aqqutaannik, majuartarfinnik illugisamulluunniit, suliffeqarfimmut, pisiniarfimmut, paaqqinnittarfimmut assigisaanulluunniit atuisinnaatitaaffiannut akornusersuutaassanngillat.

  Imm. 2.  Imm. 1 malillugu qimmit akornusersuutaanersut pillugit kommunalbestyrelsi aalajangiissaaq qimmimillu piginnittoq qimmit inissisimaffimmut allamut nuunneqarnissaannik peqqussuteqarsinnaalluni.

 

Tigusiniarnerit toqutsinerillu

 

§ 7.  Qimmit pitussimanngitsut tiguneqassapput aammalu kommunip qimminut inissiisarfiani qimmilerisumit paarineqarluni akunnernilu 72-ini kommunip allaffiani tamanut allagarsiinikkut aamma kommunip inuit naapittarfiisigut inuttassarsiuunneqassallutik. Qimmeq aaneqanngippat qimmiutilimmilluuunniit tigussaasumik isumaqatigiissuteqarfiup kingorna piffissaliussaq sivitsorneqarsimanngippat, qimmeq piginnittumut allamut nalunaarsorneqarsinnaavoq piginnittumulluunniit taarsiissuteqartussaatitaanngitsumik toqunneqarluni.

  Imm. 2.  Qimmeq pituussaarsimasoq tiguneqarsinnaanngippat, sivikinnerpaamik akunnerni 72-ini inuttassarsiuussereernerup kingorna piginnittumut siumut nalunaaruteqaqqaarani taarsiisussaatitaaffeqanngitsumillu qimmilerisumit toqunneqarsinnaavoq.

  Imm. 3.  Qimmeq pitussimanngitsoq kiisortuusoq imaluunnit tigussaasumik inunnut allanut navianartorsiortitsisuusoq kommunalbestyrelsip nalilerpagu, piginnittumut siumut nalunaaruteqaqqaarani taarsiisussaatitaaffeqanngitsumilu qimmeq ingerlaannartumik toqunneqassaaq.

 

Kapitali 3

Qimminik qimuttoqarfiit avataanni aalajangersakkat

 

Qimminik pitutsineq il.il

 

  § 8.  Nutaqqat arfinilinnik qaammateqalereersut tamarmik pitussimatinneqassapput, illup iluani ungalusaniluunniit mattusimatinneqassapput pituutaqartinneqassallutilluunniit.

  Imm. 2.  Illoqarfiup avataani sunngiffimmi sammisanut atorneqartuusunut qimminut sulinermi atorneqartunut politiinilluunniit atorneqartunut piumasaqaat atuutinngilaq.

  Imm. 3.  Qimmit pituutaat minnerpaamik 5 meterinik takissuseqassaaq. 

 

Kapitali 4

Qimminik qimuttoqarfiit iluanni aalajangersakkat

 

Qimmilivinnut immikkoortortat

 

  § 9.  Ileqqoreqqusamut uunga nunap assingani 1-imiit 4-mut allaaserineqartutut immikkoortuni qimmiliveqarneq akuerisaavoq. 

  Imm. 2.  Kommunip pilersaarutaani nunaannarmi immikkoortut ilaat M3 malillugit qeqertani qimmeqarfinni kommunalbestyrelsimit akuerisaasut ilaanni sikoqanngippat maajip aallaqqaataanniit septembarip 30-ata tungaanut qimmit inissinneqarsinnaapput.

  Imm. 3.  Sumiiffiit ukiup ilaani imermik qarsunneqartartut taamaalinerani qimmilivittut atorneqassanngillat.

 

Qimmilivik

 

  § 10.  Qimminut qimuttunut qimmilivimmut inissamik qinnuteqartoqarnerata kingorna kommunalbestyrelsi qimmilivissamik innersuussisarpoq kiisalu ilanngullugu qimmit nuna tamakkerlugu uumasunut nalunaarsuivimmi nalunaarsorneqartarlutik.

  Imm. 2.  Qimmilivik qimminik qimuttunik qimmilivittut tulluartuussaaq aammalu eqqaani najugaqarfinnut, suliffeqarfinnut paaqqinnittarfinnulluunniit annertuallaamik akornusersuutaassanani.

  Imm. 3.  Qimmit inuup allap illuanit minnerpaamik 7,5 meterinik ungasissuseqartumik inissinneqassapput, taamaanngippat taanna allakkatigut akuersissuteqarsimassaaq. 

  Imm. 4.  Qimmiliviit ilusilersorneqarnissaannut Kommunalbestyrelsi tullinnguuttutigut piumasaqaateqarpoq:

1) qimmilivik eqqiluitsuutinneqarlunilu torersuutinneqassaaq,

2) quit containerilluunniit inissinneqarsimasut 15 m2-mit anginerussanngillat.

  Imm. 5.  Qeqertaq qimmiliviusoq allagartarsualiinermik ersarissumik ilisarnaaserneqassaaq.

 

Qimmilivimmik arsaarinnissuteqarneq

 

  § 11.  Kommunalbestyrelsip akuersissut arsaarinnissutigisinnaavaa, ima pisoqarpat

1) qimmilivik siunertamut atorneqanngippat,

2) qimmilivimmut piumasaqaataasut atuuttuusut qimmiutilimmit malitsinneqanngippata,

3) qimmilivik atorneqarunnaarpat. Piginnittutut nalunaarsorsimasoq kommunimit attaveqarfigineqarsinnaanngippat qimmilivillu qaammatini marlunni qimmeqarsimanngippat arsaarinnissutigineqassaaq.

4) qimmilivik siunertamut allamut atorneqassappat. Taamatut pisoqarnerani sivikinnerpaamik qaammatinik marlunnik ilimasaaruteqarnikkut qimmilivik arsaarinnissutigineqartoq kommunalbestyrelsip nalunaarutigissavaa qimmilivimmillu nutaamik innersuussisoqassasoq ilutigitilluglu kalunnernut pituffinnik ikkussuinisamut quinillu, qimmit inaannik atortunillu attuumassutilinnik allanik nuutsinissamut kommuni isumaginnissasoq.

 

Qimminik pitutsineq il.il

 

  § 12.  Qimmiaqqat arfinilinnik qaammateqalereersut tamarmik pitussimatinneqassapput, mattusimatinneqassapput, ungalusaniisinneqassapput pituutaqartinneqassallutilluunniit.

  Imm. 2.  Illoqarfiup avataani sunngiffimmi sammisanut atorneqartuusunut qimminut sulinermi atorneqartunut politiinilluunniit atorneqartunut imaluunniit sikoqanngippat maajip aallaqqaataaniit septembarip 30-ata tungaanut qeqertani qimmilivinni qimmit inissinneqarsimasunut piumasaqaat atuutinngilaq.

  Imm. 3.  Qimmip pituutaa naannerpaamik 3 meterinik takissuseqassaaq.

  Imm. 4.  Qimmit ataasiakkaarlugit imaluunniit marlukkaarlugit pitoqqasut, pituutaat siaaqqatillugit, qimminut allanut akunnerat naannerpaamik 1 meteriussaaq.

  Imm. 5.  Qimmit ataasiakkaarlutik qungasianni pituutaata sukagutaa minnerpaamik ataasiarluni kaajallassinnaassaaq kiisalu pituffiani sukagutaani minnerpaamik ataasiarluni kaajallassinnaassalluni.

  Imm. 6.  Qimmimik piginnittuusup qinnuiginninneratigut qimmilerisoq qimmip kalunnerinut ikkuffissanik pilersitsisinnaavoq. Qimminut marlukkaanut ataatsimik ikkuffeqartinneqarsinnaapput.

 

Kapitali 5

Naammagittaalliutit

 

  § 13.  Qimmiliviit ilusilersorneqarnerallu qimmilivimmiluunniit pissutsit pillugit kommunalbestyrelsimut naammagittaalliortoqarsinnaavoq.

 

Kapitali 6

Nakkutilliineq

 

§ 14.  Kommunalbestyrelsi nakkutilliinermut oqartussaavoq aammalu maleruaqqusamut matumunnga naapertuuttumik aalajangiinernut atorneqartussamut paasissutissanik pissarsiniarnermut sukkulluunniit kinaanermik uppernarsaanikkut eqqartuussivimmilluunniit akuersissutitaqanngitsumik pisortanut inuinnaallu illutaannut, sumiiffinnut, angallassissutaannut allagaataannullu takunnissinnaalluni.

 

Kapitali 7

Kinguneqartitsinerit

 

  § 15.  §§ 2, 4, 5 aamma 6, imm. 1, §§ 7, 8, imm. 1 aamma imm. 3, § 9, § 10, imm. 1, 3 aamma imm. 4, §11 kiisalu § 12 imm. 1 aamma imm. 3-5-imi aalajangersakkani piumasaqaataasunut malitsitsinissamut pisariaqartuusunut peqqussummik inerteqqussummilluunniit kommunalbestyrelsi nalunaaruteqarsinnaavoq.

 

Kapitali 8

Atortuulersitsineq

 

  § 16.  Malittarisassaq una atuutilissaaq ulloq 1. aprili 2025.

  Imm. 2.  Ilutigitillugu Qeqqata Kommuniata qimmiliviit pillugit ileqqoreqqusaa 11. februar 2015-imeersoq atorunnaarsinneqarpoq.

  Imm. 3.  Maleruaqqusamik matuminnga akuersissuteqarneq ilutigalugu ileqqoreqqusamut matumunnga nunap assingi ilanngussat 1-4 atuutilersinneqarput taamaalillunilu qimilivinnik pilersinneqareersunut atorneqarsinnaassanatik. 

  Imm. 4. Qeqqata Kommuniani kommunalbestyrelsimit ulloq 31. oktobari 2024 akuersissutigineqarpoq

 

 

Taamaasilluni akuerineqarpoq Kommune Qeqqatami kommunalbestyrelsimit, ulloq 31. oktobari 2024

 

 

____________________

Malik Berthelsen (atsior.)

Borgmester

 

 

Matumuuna Kommune Qeqqatami qimmeqarnermut ileqqoreqqusaq naqissuserneqarpoq.

 

 

Kalaallit Nunaanni Namminersorlutik Oqartussat, ulloq 23. januaari 2025

 

 

_____________________

Kim Kielsen (atsior.)

Aalisarnermut Piniarnermullu Naalakkersuisoq