(Aningaaseriviit akunnermiliuttullu nalunaaruteqartussaanerat)

§ 1

Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi, Namminersorlutik Oqartussat nalunaarutaat nr. 11, 3 november 2021-meersoq, kingusinnerusukkut Inatsisartut inatsisaatigut nr. 56, 25. november 2024-meersukkut allanngortinneqartoq takuuk, imatut allannguisoqarpoq:

1.  § 35 a, imm. 1, nr. 1, oqaaseqatigiit siulliit kingorna ilanngunneqarpoq:

“Nammineq pilluni atuuttumik nalunaaruteqartussaanermi konto ataatsimut kontoonersoq taamaattoqarpallu kontomik ataatsimut piginnittut amerlassusaat pillugit paasissutissat nalunaarummi aamma ilanngunneqarsinnaapput.”

2.  § 35 a, imm. 1, nr. 1-imi oqaaseqatigiit aappat, pingajuanngortussaq ima allanneqarpoq:

“Kontomik piginnittut inuk nakkutiginnittoq ataaseq arlallilluunniit peqatigalugit immikkoortortaasut eqqarsaatigalugit, inuk taamatut nakkutiginnittoq kinaluunniit aamma pineqartup immikkoortortaqarfimmi nakkutilliisuunermi sumik sunilluunniit suliaqarnera pillugu nalunaaruteqartussaatitaanermut aamma ilanngunneqarsinnaavoq.”

3.  § 35 a, imm. 1, nr. 2-mi imatut oqaasertalerneqarpoq:

“2) Kontop suunera kontollu normua, imaluunniit kontotaqanngippat taakkununnga assingusoq.”

4.  § 35 a, imm. 1, nr. 7-imi oqaaseqatigiit aappaattut ilanngunneqarpoq:

“Nammineq pigisanit pigisat, inatsisilerinermi aaqqissuussinermi aningaasaliinermi immikkoortortaqarfimmit pigineqartut eqqarsaatigalugit, inuup nalunaarutigineqartussaasup nammineq pigisanit pigisaqarnermigut inissisimanera imaluunniit inissisimaneri pillugit paasissutissat nalunaarummi aamma ilanngunneqarsinnaapput.”

5.  § 66 a, imm. 1-imi oqaaseqatigiit aappaat imatut oqaasertalerneqarpoq:

“Naalakkersuisut akunnermiliuttup oqaaseqatigiit siulliat naapertorlugu nalunaaruteqartussaanngitsutut nalunaartup sullitaminut tamanna pillugu nalunaaruteqarnissaa pillugu malittarisassanik aalajangersaasinnaapput.”

6.  § 66 a-mi, imm. 1-ip kingorna immikkoortoq nutaaq ilanngunneqarpoq:

“  Imm. 2.  Naalakkersuisut akunnermiliuttut akileraartartullu suliamut attuumassuteqartut nalunaarutigisassamik akileraarutinik nalunaarsuinermi normut pillugit paasissutissanik katersuinissaat pillugu malittarisassanik aalajangersaasinnaapput.”

Imm. 2 tamassuma kingorna imm. 3-nngorpoq

7.  § 68 a, imm. 3 atorunnaarpoq.

§ 2

Inatsisartut inatsisaat ulloq 1. januar 2026 atuutilersinneqarpoq.

Kalaallit Nunaanni Namminersorlutik Oqartussat, ulloq 17. novemberi 2025

Jens-Frederik Nielsen (atsior.)

Naalakkersuisut Siulittaasuat