§ 1

Akileraaruserinermik ingerlatsineq pillugu Inatsisartut inatsisaat nr. 11, 2. november 2006-imeersumi, takuuk Akileraaruserinermik ingerlatsineq pillugu Inatsisartut inatsisaat pillugu Namminersorlutik Oqartussat nalunaarutaat, Inatsisartut inatsisaat nr. 12, 1. december 2021-meersumi, Inatsisartut inatsisaat nr. 20, 21. november 2023-meersumi kiisalu Inatsisartut inatsisaat nr. 65, 20. november 2023-meersumi allanngortinneqartumi makkuninnga allannguuteqartoqarpoq:

1. § 30 a-p kingorna inissinneqassaaq:

”  30 b.  Kikkulluunniit suliffimmi inunnik pissutsini, aningaasarsianit akileraarutit pillugit Inatsisartut inatsisaanni § 76, imm. 4-mi ilaasuni, atorfeqartitsisimasut, imaluunniit inunnut suliffeqartitanut taakkununnga akissarsisitsisimasut sulisorisanik atukkiussineq pillugu isumaqatigiissutip atsiornerata kingornatigut ukiumi qaammammi tulliuttumi, kingusinnerpaamik 10.-anni, sulisorisanik atukkiussinermik isumaqatigiissutip atsiorneqarfiani suliffeqarfiup nunani allaneersup, ilanngullugu Danmarkimi imaluunniit Savalimmiormiuni suliffeqarfiup suunera pillugu paasissutissanik akileraartarnermik ingerlatsivimmut nassiussaqassaaq, ilaassallutik suliffeqarfiup inuussutissarsiorfittut nalunaarsugaanerata normua pillugu paasissutissat. Paasissutissat akileraartarnermik ingerlatsiviup innersuussutaata ilusaatut qarasaasiakkut tunniunneqassapput.

  Imm. 2. Taamaattorli imm. 1-imi pisussaaffigisaq atuutissanngilaq nalunaaruteqarnissamut pisussaaffeqartoq, attuumassutilittut sianigisassanik ilanngussaqarnermigut aningaasarsianit akileraarutit pillugit Inatsisartut inatsisaanni § 76, imm. 4, oqaaseqatigiit 1-2-mi nassuiarneqartutut sulisorisanik atukkiussinerit pineqannginnerat aalajangiussimappagu. Imm. 1 malillugu nalunaaruteqarneq nalunaaruteqarnissamut pisussaaffeqartup kingusinnerusukkut akileraartarnermut ingerlatsivimmut sulisorisanik atukkiussineq pillugu pineqannginneranut akornusiinngilaq.

  Imm. 3.  Imm. 1 malillugu, nalunaaruteqarnissamut pisussaaffigisaq aningaasarsianit akileraarutit pillugit Inatsisartut inatsisaanni § 76, imm. 4, oqaaseqatigiit 1-2 malillugit inunnut suliffeqartitanut taakkununnga akissarsianit nalunaaruteqarnissamut pisussaaffilik akileraarusiisimagaangat, aamma atuutissanngilaq.”

§ 2

Inatsisartut inatsisaat 1. januar 2025-mi atuutilissaaq, aammalu ukioq isertitaqarfiusoq 2025 aallarnerfigalugu atuuppoq.

  Imm. 2.  § 1, nr. 1 aamma sulisorisanik atukkiussinernut isumaqatigiissutinut, 1. januar 2025 sioqqullugu atsiorneqarsimasunut atuuppoq, sulisorisanik atukkiussinermut isumaqatigiissut 31. december 2024-p kingorna atuuttuutillugu. Pisoqarfinni taama ittuni § 30 b, imm. 1 malillugu, kingusinnerpaamik ulloq 10. februar 2025-mi paasissutissat tunniunneqassapput.

Namminersorlutik Oqartussat, ulloq 25. novembari 2024

Múte Bourup Egede (atsior.)

Naalakkersuisut Siulittaasuat