Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni nr. 11-mi , 12. juni 2019-imeersumi § 32, imm. 4, naapertorlugu aalajangersarneqarput:

  § 1.  Nakorsaanerup tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 32, imm. 1 naapertorlugu makku pillugit aalajangiinera:

1)  napparsimasup allagarsiaa ammarneqassasoq misissorneqarlunilu, napparsimasoq pillugu nalunaarsuiffimmut allanneqassaaq.

2)  napparsimasup uninngavia ini aamma pigisai misissorneqassasut, napparsimasoq pillugu nalunaarsuiffimmut allanneqassaaq.

3)  napparsimasup timaata satsillugu misissorneqarnera pillugu, napparsimasoq pillugu nalunaarsuiffimmut allanneqassaaq.

  Imm. 2.  Taamatuttaaq suut nakorsaatinik, aanngajaarniutinik imaluunniit tigussaasunik ulorianartunik napparsimasumit eqqussisoqarsimaneranik eqqussiniartoqarneranilluunniit pasitsaassinermut tunngavilersuutaanersut, napparsimasoq pillugu nalunaarsuiffimmut nalunaarneqassapput.

  § 2.  Napparsimasup allagarsiai tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 32, imm. 1-mi taamaallaat taaneqartunik nassiussaq nakorsaatinik, aangajaarniutinik imaluunniit tigussaasunik ulorianartunik imaqarnersoq taamaallaat misissuivigineqarsinnaavoq. Allakkani allagarineqartut imarisaat atuaqqusaanngillat.

  Imm. 2.  Nalunaarummi matumani napparsimasumut nassiussat taamaallaat pineqarput. Taamaattumik allakkat nassiussallu napparsimasumit nassiunneqartut pineqanngillat.

  § 3.  Iliuuseqarnerni § 1-imi taaneqartuni arsaarinnissutigineqartut, nakorsaatit, aanngajaarniutit tigussaasullu ulorianartut, napparsimasumut tunniunneqarnissaasa illersorsinnaasutut nalilerneqarsinnaalernissaata tungaanut, immikkoortortap toqqortarissavai.

  Imm. 2.  Nakorsaatit, aanngajaarniutit tigussaasullu ulorianartut inatsisinik unioqqutitsilluni pigineqarnersut, nakorsaanerup politiinut aalajangiivigisassanngortissinnaavai. Taakkua nakorsaatit, aanngajaarniutit tigussaasullu ulorianartut arsaarinnissutigineqassanersut suujunnaarsinneqassanersulluunniit politiit aalajangersinnaavaat.

  § 4.  Nalunaarut 26. april 2024-mi atuutilerpoq.

  Imm. 2.  Tarnimikkut nappaatilinnut immikkoortortaqarfimmi napparsimasup allagarsiaanik/nassiussarsiaanik, napparsimmavimmi inigisaanik, pigisaanik, timaalu satsillugu misissuineq, kiisalu pigisanik assigisaannillu arsaarinninneq suujunnaarsitsinerlu pillugit Namminersorlutik Oqartussat nalunaarutaat nr. 14, 2. december 2013-imeersoq tamatuma peqatigisaanik atorunnaarsinneqarpoq.

Namminersorlutik Oqartussat, ulloq 23. april 2024

Agathe Fontain (atsior.)

Peqqissutsimut Naalakkersuisoq

/ Nike Berthelsen (atsior.)