Tarnimikkut nappatilinnut immikkoortortaqarfimmi napparsimasup allagarsiaanik/nassiussarsiaanik, napparsimmavimmi inigisaanik, pigisaanik, timaalu satsillugu misissuineq, kiisalu pigisanik assigisaannillu arsaarinninneq suujunnaarsitsinerlu pillugit Namminersorlutik Oqartussat nalunaarutaat
Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni nr. 24-mi, 3. december 2012-imeersumi § 29, imm. 4 naapertorlugu aalajangersarneqarput:
§ 1. Inatsisartut inatsisaanni § 29 naapertorlugu makkununnga tunngatillugu nakorsaanerup aalajangigai
1) napparsimasup allagarsiaasa/nassiussarsiaasa ammarneqarnissaat misissuivigineqarnissaallu,
2) napparsimasup uninngaviata inip pigisaasalu misissuivigineqarnissaat,
3) napparsimasup timaa satsillugu misissuivigineqarnissaa, napparsimasoq pillugu allattugaatinut nalunaarsorneqassapput.
Taamatuttaaq suut nakorsaatinik, aanngajaarniutinik imal. sakkunik ulorianartunik napparsimasumut eqqussisoqarsimaneranik eqqussiniartoqarneranilluunniit pasitsaassinermut tunngavilersuutaanersut, allattugaatinut nalunaarneqassapput.
§ 2. Napparsimasup allagarsiaanik/nassiussarsiaanik inigisaanillu misissuineq sapinngisamik napparsimasoq isigitillugu ingerlanneqassaaq. Napparsimasup nappaammik peruluuteqarnera peqataannginneranut patsisaappat, aatsaat napparsimasoq peqataatinnagu misissuinerit ingerlanneqarsinnaapput.
§ 3. Napparsimasup allagarsiai/nassiussarsiai Inatsisartut inatsisaanni § 29-mi taamaallaat taaneqartunik nakorsaatinik, aangajaarniutinik imal. sakkunik ulorianartunik imaqarnersut misissuivigineqarsinnaapput. Allagarsiani/nassiussarsiani inuttaannut allakkat atuaqqusaanngillat.
Imm. 2. Nassiussarsiat kisimik nalunaarummi matumani pineqarput. Allakkat/nassiussat napparsimasumit nassiussat pineqanngillat.
§ 4. Nakorsaatit, aanngajaarniutit sakkullu ulorianartut § 1-imi iliuuseqarnermi arsaarinnissutaasut, napparsimasumut tunniunneqarnissaasa illersorneqarsinnaalernissaata tungaanut immikkoortortami toqqortarineqassapput. Nakorsaatit, aanngajaarniutit sakkullu ulorianartut inatsisinik nalinginnaasumik unioqqutitsilluni pigineqarnersut, nakorsaanerup politiinut aalajangiivigisassanngortissinnaavai. Nakorsaatit, aanngajaarniutit sakkullu ulorianartut suujunnaarsinneqarnissaat politiit aalajangiivigisinnaavaat.
§ 5. Nalunaarut 16. december 2013 atuutilersinneqarpoq.
Namminersorlutik Oqartussat, ulloq 2. december 2013
Steen Lynge
/
Ann Birkekær Kjeldsen