Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut Inatsisaanni nr. 11, 12. juni 2019-imeersumi § 16, imm. 2, § 17, imm. 2, kiisalu § 33, imm. 2, naapertorlugit aalajangersarneqarput:

Kapitali 1

Pinngitsaaliissummik iliuuseqarnernik nalunaarsuiviit nalunaarsukkallu

  § 1.  Peqqinnissaqarfiup immikkoortuini tarnimikkut nappaatillit uninnganerannut katsorsartinnerannullu atatillugu nammineersinnaajunnaarsitsiviusinnaasuni allatullu pinngitsaaliissummik iliuuseqarfiusinnaasuni, pinngitsaaliissummik iliuuseqarnernut nalunaarsuiveqassaaq.

  Imm. 2.  Pinngitsaaliissummik iliuuseqarnernik nalunaarsuivimmi naammagittaalliorsinnaaneq pillugu ilitsersuisoqarsimanersoq, napparsimasunut siunnersortimik aggersaasoqarsimanersoq aamma qanga pisimanersoq allanneqassaaq.

  § 2. Pinngitsaaliissummik unitsitsisoqarnerani pinngitsaaliissummillu tigummigallagassanngortitsinermi pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Nammineersinnaajunnaarsitsinerup aallartinnerani ullua piffissarlu aamma tamatuma unitsinneqarnerani ulloq piffissarlu.

3)  Nammineersinnaajunnaarsitsinermut tunngavilersuutaasoq.

4)  Nakorsap nammineersinnaajunnaarsitsinermi akisussaasuusup aqqa.

5)  Nammineersinnaajunnaarsitaanerup kingorna ullut pingasut, qulit, 20-t, 30-llu qaangiunnerini, nammineersinnaajunnaarsitaanerlu atuutsillugu, tamatuma kingorna sivikinnerpaamik sap. ak. sisamakkuutaarlugit naliliivigineqarnerata kingunera.

6)  Nakorsaanerup naliliisup aqqa.

  § 3. Utertitsinermi pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Ulloq piffissarlu politiit ikiortigalugit napparsimasup utertinneqarnissaanik aalajangerneq.

3)  Nakorsaanerup aalajangiisup aqqa.

  § 4. Pinngitsaaliissummik katsorsaanermi, pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Pinngitsaaliilluni katsorsaanerup ullua piffissarlu.

3)  Katsorsaanerup suunera annertussusialu.

4)  Pinngitsaaliissummik katsorsaanermut tunngavilersuutit.

5)  Nakorsap nakorsaasiisup aqqa.

6)  Nakorsap najuuttup aqqa.

  § 5. Angerlartitaareernermi pinngitsaaliissummik malittarineqarnermi, pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Ulloq angerlartitaaffik.

3)  Ulloq angerlartitaareernermi pinngitsaaliissummik malittarinninnissamik aalajangiivik.

4)  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 19, imm. 6 naapertorlugu napparsimmavimmit angerlartitsinerup kingorna pinngitsaaliissummik malinnaanerup sivitsorneqarnissaa pillugu aalajangiinerup ullua piffissarlu.

5)  Katsorsaanerup suunera annertussusaalu.

6)  Angerlartitaareernermi pinngitsaaliissummik malittarinninnissamut tunngavilersuut.

7)  Nakorsaanerup inassuteqartuusup aqqa.

8)  Ulloq atorunnaarsitsiffik.

  Imm. 2.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 19, imm. 3 naapertorlugu napparsimasumik aallernissaq nakorsaanerup aalajangerpagu pinngitsaaliilluni iliuuseqarnernut nalunaarsuiffimmut ilanngunneqassapput:

1)  Ulloq nakorsaanerup napparsimasumik aallernissamik aalajangiivia.

2)  Nakorsap nakorsaasiisup aqqa.

3)  Ulloq politiit ikiortigalugit unitsitaanermi, peqqinnissaqarfiup immikkoortortaqarfia pinngitsaaliissummik nakorsaatitortinneqarfik.

4)  Peqqinnissakkut sullissisup najuuttup aqqa.

  § 6.  Pinngitsaaliissummik aalaakkiinermi pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Pinngitsaaliissummik iliuuseqarnerup suunera annertussusaalu.

3)  Pinngitsaaliissummik iliuuseqarnermut tunngavilersuut.

4)  Ulloq aamma piffissaq pinngitsaaliissummik iliuuseqarfik taamaatitsivillu.

5)  Nakorsap inassuteqartuusup aqqa.

6)  Sulisut akuusut aqqi.

7)  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 34, imm. 5 naapertorlugu nakorsap nutaamik nalilersuinerata ullua piffissarlu.

8)  Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut inatsisaanni § 34, imm. 5 naapertorlugu nakorsap nutaamik nalilersuisup aqqa.

  § 7. Nukersorfiginninnermi, pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Pinngitsaaliissummik iliuuseqarnerup suunera annertussusaalu.

3)  Pinngitsaaliissummik iliuuseqarnermut tunngavilersuutit, tassunga ilanngullugit sulisut akuusut tunngavilersuutaat.

4)  Ulloq aamma piffissaq pinngitsaaliissummik iliuuseqarfik taamaatitsivillu.

5)  Nakorsap nakorsaasiisup/najuuttup aqqa.

6)  Sulisut akuusut aqqi.

  § 8.  Napparsimasoq illersorniarlugu pinngitsaaliissummik aalaakkiinermi, pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup aqqa inuttullu normua.

2)  Napparsimasoq illersorniarlugu aalaakkiinerup qanoq ittuunera.

3)  Napparsimasoq illersorniarlugu aalaakkiinermut tunngavilersuut.

4)  Napparsimasoq illersorniarlugu aalaakkiinerup atorneqarsinnaaffia.

5)  Nakorsap inassuteqartuusup aqqa.

6)  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 34, imm. 4 naapertorlugu napparsimasoq illersorniarlugu aalaakkiineq atuutsillugu inassuteqarnerup ulluni pingasuni, qulini, 20-ni aamma 30-ni nangeqqinneqarnerani angusanik nalilersuinerup kingorna tamatuma nangeqqinneqarnissaa pillugu aalajangiisoqassaaq tamatumalu kingorna ikinnerpaamik sapaatit akunnerit sisamakkuutaarlugit.

  § 9. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 27 naapertorlugu nal. ak. 24-t sinnerlugit immikkut nakkutilliinermi pinngitsaaliilluni iliuuseqarnernut allattuiffimmut makku ilanngunneqassapput:

1)  Napparsimasup aqqa inuttullu normua.

2)  Pinngitsaaliissummik immikkut nakkutilliisitsinissamut tunngavilersuut.

3)  Ulloq piffissarlu pinngitsaaliissummik nakkutilliilerfik taamaatitsivillu.

4)  Nakorsap nakorsaasiisup aqqa.

  § 10. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 29 naapertorlugu immikkoortortat immikkut parnaarneqarsinnaasut ilanngullugit matunik parnaarsuinerni, pinngitsaaliissummik iliuuseqarnernut nalunaarsuiffimmut ilanngunneqassapput:

1)  Napparsimasup immikkoortortami parnaarsorsorsimasumiittup aqqa inuttullu normua.

2)  Matunik parnaarsuinernut tunngavilersuut.

3)  Ulloq piffissarlu matunik parnaarsiffik tamatuminngalu atorunnaarsitsiffik.

4)  Nakorsap nakorsaasiisup aqqa.

  § 11. Pinngitsaaliissummik iliuuseqarnernut nalunaarsuiffimmut ilanngussat allattugaatini nalunaarsugassaatitaapput.

  Imm. 2.  Pinngitsaaliissummik iliuuseqarnernut nalunaarsuiffinnik suliaqarnermi, pinngitsaaliissummik iliuuseqarnermut nalunaarsuiffimmi allagaqaatip ilanngunneqarnissaa innersuussutigineqassaaq. Pinngitsaaliissummik iliuuseqarnermut nalunaarsukkat assilineqarnerat allattugaatinut ilanngunneqassapput.

  § 12. Napparsimasoq pinngitsaaliissummik iliuuseqarnernut nalunaarsuivinni namminermut tunngasunik paasiniaanissamut pisinnaatitaaffeqarpoq.

  Imm. 2.  Napparsimasumut siunnersortissanngortitaasimasoq imm. 1-imi taaneqartumut tunngatillugu taamatulli pisinnaatitaaffeqarpoq.

Kapitali 2

Angerlartitaanermut atatillugu isumaqatigiissutit ataqatigiissaarinermullu pilersaarutit nalunaarsorneqarnerat

  § 13.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 16 naapertorlugu angerlartitsinissamik isumaqatigiissusiortoqartillugu nalunaarsorneqassapput:

1)  Napparsimasup aqqa inuttullu normua.

2)  Ulloq unitsitaaffik angerlartitaaffillu.

3)  Angerlartitaanermut atatillugu ulloq isumaqatigiissutip atuutilersinneqarfia atorunnaarsinneqarfialu.

4)  Nakorsap nakorsaasiisup aqqa.

  § 14. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 17 naapertorlugu ataqatigiissaakkamik pilersaarusiornermi makku nalunaarsorneqassapput:

1)  Napparsimasup aqqa inuttullu normua.

2)  Ulloq unitsitaaffik angerlartitaaffillu.

3)  Ulloq ataqatigiissaakkamik pilersaarusiap pilersinneqarfia.

4)  Nakorsap nakorsaasiisup aqqa.

  § 15. Angerlartitaanermi isumaqatigiissutinik ataqatigiissaakkamillu pilersaarutinik nalunaarsuinermi, napparsimasoq pillugu allattugaatini taama nalunaarsuisimaneq innersuussutigineqassaaq. Nalunaarsukkat assilineri allattugaatinut ilanngunneqassapput.

  Imm. 2.  Napparsimasumut tunngatillugu nalunaarsukkanik paasiniaanissaq napparsimasup pisinnaatitaaffigaa.

Kapitali 3

Nalunaarutiginninneq

  § 16.  Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaaneq iliuuserisanik §§ 2-10-mi , §§ 13-14-imilu pineqartunik, Nunatsinni Nakorsaaneqarfimmut nalunaaruteqartassaaq.

  Imm. 2.  Taamatuttaaq Peqqinnissamut Aqutsisoqarfimmut nalunaarutiginnittoqassaaq.

  Imm. 3.  Imm. 1 aamma 2-mi nalunaarut,§§ 2-10-mi aamma §§13-14-imilu paasissutissanik piumasaqaatigineqartunik imaqassaaq.

Kapitali 4

Atuutilersitsinermut atorunnaarsitsinermullu aalajangersakkat

  § 17.  Nalunaarut 26. april 2024-mi atuutilerpoq.

  Imm. 2.  Tamanna ilutigalugu Peqqinnissaqarfiup immikkoortuini pinngitsaaliissummik iliuuseqarnernik nalunaarsuiviit nalunaarsukkallu, pinngitsaaliilluni iliuutsinik nalunaarsuineq nalunaarutiginninneq kiisalu angerlartitsinerup kingorna malinnaanerit pillugit,  Namminersorlutik Oqartussat nalunaarutaat nr. 18, 2. december 2013-imeersoq atorunnaarsinneqarpoq.

Namminersorlutik Oqartussat, ulloq 23. april 2024

Agathe Fontain (atsior.)

Peqqissutsimut Naalakkersuisoq

/ Nike Berthelsen (atsior.)