Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugu Inatsisartut Inatsisaanni nr. 11, 12. juni 2019-imeersumi § 14, imm. 7, § 15, imm. 3, § 20 kiisalu § 31 naapertorlugit aalajangersarneqarput:

 

Kapitali 1

Pinngitsaaliissummik katsorsaanerit

 

Pinngitsaaliissummik nakorsaasiinerit

 

  § 1.  Katsorsaariaatsit allat atorsinnaanngitsutut nalilerneqarpata aatsaat pinngitsaaliissummik nakorsaasiisoqarsinnaavoq.

 

  § 2. Nakorsaasiinnginnerup kingunerisaanik napparsimasup inuunera peqqissusaataluunniit navianartorsiortinneqarnera eqqaassanngikkaanni, nakorsaasiinissap pisariaqassusaanik napparsimasup nassuiaattuaraluarnera sunniuteqanngippat, pinngitsaaliissummik nakorsaasiisoqarsinnaavoq.

  Imm. 2.  Nakorsaanerup eqqarsarfissinneqarnerup sivisussusissaanik naliliinermini ilaatigut nappaatip navianaateqarnera sivisussusaalu, napparsimasup katsorsarneqarnissamut neqoroorutigineqartumut imminnut assortuuttunik isumaqarnera, nakorsaaserneqannginnerup allatigut pinngitsaaliinikkut iliuuseqartoqartariaqalerneranik kinguneqarsinnaanera napparsimasullu qanoq naalliuuteqartiginera pingaartissavai.

  Imm. 3.  Nakorsaanerup pinngitsaaliissummik nakorsaasiinissaq pillugu aalajangiinnginnerani, napparsimasup apeqqut taanna pillugu napparsimasunut siunnersortiminik oqaloqateqarnissamut periarfissinneqarsimassaaq.

  Imm. 4.  Eqqarsarfissinneqarnermi napparsimasoq ullut tamakkiallugit nammineq piumassutsi naapertorlugu nakorsaasiinissamik neqeroorfigineqassaaq, kajumissaariniarnerlu allattugaatinut nalunaarsorneqassalluni.

  Imm. 5.  Navianaatillit imm. 1-imi taaneqartut eqqaassanngikkaanni, pinngitsaaliissummik nakorsaasiinissamut napparsimasup siunnersortaatalu nakorsaasiinerup siunertaanik, sunniutaanik kingunerluutigisinnaasaanillu tamakkiisumik paasitinneqarsimanissaat piumasaqaataavoq.

 

  § 3. Pinngitsaaliissummik nakorsaasiinermi kingunerluutaasinnaasut nakkutigeqqissaarneqassapput paasineqarniariarpatalu sapinngisamik ajunnginnerpaaq anguniarlugu akiorniarneqassallutik. Tamatumunnga atatillugu pinngitsaaliissummik nakorsaasiinerup taama annertutigiinnarnissaa eqqarsaatigeqqissaartariaqarpoq.

  Imm. 2.  Annertuallaartumik nakorsaasiisoqassanngilaq.

 

  § 4. Nakorsaatit sivisuumik sunniusimasartut sapinngisamik atornaveersaarneqassapput, nakorsaatillu napparsimasumut qanoq sunniuteqarnerat ilisimasaqarfiginngikkaanni napparsimasunik pinngitsaaliissummik nakorsaaseeqqaarnissami atorneqassanatik.

 

  § 5. Pinngitsaaliissummik nakorsaasiinerni tamatigut nakorsamik najuuttoqartassaaq.

 

Pinngitsaaliissummik nerisitsineq

 

  § 6. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 11-imi piumasaqaatit napparsimasumit eqquutsinneqarpata napparsimasullu inuunerata annaanneqarnissaanut taamaasiornissaq pisariaqarpat imaluunniit taamaasiunnginneq napparsimasup inuuneranut peqqissusaanulluunniit annertuumik navianartorsiortitsissappat, aatsaat pinngitsaaliissummik nerisitsisoqarsinnaavoq.

 

Timikkut nappaammut pinngitsaaliissummik nakorsarneqarneq

 

  § 7. Timikkut nappaatilinnut immikkoortortaqarfimmiinnermi pinngitsaaliissummik iliuuseqartoqartariaqalerpat, nammineersinnaajunnaarsitsineq allatigullu pinngitsaaliineq pillugit Inatsisartut inatsisaat naapertorlugu, nakorsaanerup tarnikkut nappaatinut immikkut ilisimasallip nakorsaanerullu timikkut nappaatinut pineqartunut immikkoortortaqarfimmeersup aalajangiinera tunngavigalugu aatsaat pisinnaavoq.

  Imm. 2. Imm. 1 naapertorlugu pinngitsaaliissummik iliuuseqarneq, tarnimikkut nappaatilinnut immikkoortortaqarfimmi peqqissaanermik suliallinnit timikkullu nappaatinut pineqartunut immikkoortortaqarfimmi peqqissaanermik sulialinnit ikioqatigiinnikkut isumagineqassaaq.

 

  § 8. Napparsimasup qanoq innera timikkullu nakorsarneqarnera apeqqutaatillugu, nakorsaanerup tarnikkut nappaatinut immikkut ilisimasallip timikkullu nappaatinut pineqartunut immikkoortortaqarfimmi nakorsaanerit isumaqatigiinnerisigut, napparsimasoq tarnimikkut nappaatilinnut immikkoortortaqarfimmut nuutsinneqassaaq.

 

Naammagittaalliorneq

 

  § 9. Pinngitsaaliissummik iliuuseqarnissamik aalajangiineq pillugu naammagittaalliuuteqarneq kinguartitsinermik kinguneqartarpoq, napparsimasup inuuneranut peqqissusaanullu annertuumik navianartorsiortitsinera pissutigalugu, imaluunniit napparsimasoq allanik timikkut peqqissutsikkullu annertuumik navialisitseqqunagu ingerlaannaq iliuuseqarnissaq pisariaqavissunngippat.

 

Kapitali 2

Angerlartitaareernermi pinngitsaaliissummik malittarineqarneq

 

  § 10. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 19 naapertorlugu piumasaqaatinik naammassinninnikkut taamaallaat angerlartitaareernermi pinngitsaaliissummik malittarinnittoqarsinnaavoq.

  Imm. 2.  Angerlartitaareernermi pinngitsaaliissummik malittarineqarnissaq pillugu nakorsaanerup aalajangiinerani nakorsartinnissaq siunertaralugu peqqinnissaqarfimmut, tassunga ilanngullugu najukkami tarnimikkut nappaatilinnik sullissivimmut, ornigunnissamik peqqussummik taamaallaat imaqassaaq.

  Imm. 3.  Unitsitsineq pineqartoq sioqqullugu tassungalu atatillugu napparsimasup angerlareernermini pisariaqartumik nakorsarneqarnermik taamaatitsinissaanut ilimaginninnermut pissutsit suut tunngavilersuutaanersut, nakorsartinnerullu taamaatinneqarnera napparsimasup peqqissusaanut qanoq kinguneqassanersoq, napparsimasut pillugit allattugaatinut nalunaarsorneqassapput. 

  Imm. 4.  Peqqinnissaqarfiup immikkoortuisa ilaannut napparsimasoq unitsinneqarluni pinngitsaaliissummik nakorsarneqartariaqarpat, qanoq annertutigisumik pinngitsaaliinikkut nakorsaasiisoqarsinnaanera katsorsarneqarnissamut pilersaarummi allassimassaaq.

 

  § 11. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 5-imi malittarisassat malillugit angerlartitaareernerup kingorna pinngitsaaliissummik malittarinninnermut atatillugu nakorsaasiineq pissaaq.

  Imm. 2.  Nakorsaasiineq atorneqartoq, tassunga ilanngullugit sivisuumik sunniusimasartuusinnaasut, sunniutaat ilisimaneqartumik napparsimasumut iluaqutaassapput.

  Imm. 3.  Angerlartitaareernermi pinngitsaaliissummik malittarineqarnermi nakorsarneqarnerup, napparsimasup peqqissusaanut pitsaasumik sunniuteqarnerata annertuallaanillu kingunerluuteqannginnerata qulakkeernissaa Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup akisussaaffigaa.

 

  § 12. Napparsimasoq nakorsaaserneqarnissaq siunertaralugu aggerfissatut isumaqatigiissutaasut naapertorlugit takkutinngippat, Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup politiit ikiorsiullugit napparsimasup peqqinnissaqarfiup immikkoortortaanut pineqartumut pinngitsaaliissummik nakorsartikkiartortinnissaa aalajangiivigisinnaavaa.

  Imm. 2.  Politiinut attaveqartinnani napparsimasumut naammaginartumik attaveqarniartoqarsimanera qulakkeerneqassaaq.

  Imm. 3.  Sapinngisaq tamaat piaartumik piffissaalluarallartillugulu politiinit ikiorserneqarnissamik qinnuteqartoqassaaq, napparsimasorlu aaneqartussaq pillugu sukumiisunik paasissutissiisoqassalluni.

  Imm. 4.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 5, imm. 3, naapertorlugu napparsimasumik aallerneq angallassinerlu pisariaqanngitsumik kanngutsatsitsisoqaqqunagu ajoqutitaqaqqunaguluunniit, sapinngisaq tamaat qajassuartumik malunnaarsaartumillu ingerlanneqassaaq. Politiit peqataasut sapinngisaq naapertorlugu inuinnartut atisaqassapput. Napparsimasoq politiit biiliinut ilaatinneqassappat sapinngisaq tamaat inuinnaat biilii suliffimmi atorneqartartut atorlugit ingerlanneqassaaq.

  Imm. 5.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut Inatsisaanni § 19, imm. 3, oqaaseqatigiit aappaat, naapertorlugu peqqinnissakkut sullissisoq politiit aallerneranni sapinngisamik peqataasussaq, ajornanngippat napparsimasumit ilisarisimaneqassaaq, napparsimasorlu nakorsartissimanera ilanngullugu, ilisimasaqarfigissallugu.

  Imm. 6.  Napparsimasup aaneqarnermut pinngitsaaliissummillu nakorsaaserneqarnermut akiuunnera, napparsimasup nakorsartinneranut periarfissaanullu kinguneqartinneqartariaqanngilaq. Aallernermi pinngitsaaliillunilu nakorsaasiinermi napparsimasup qisuariaataanik immikkut ittumik paasinninnermik takutitsisoqartariaqarpoq.

 

  § 13. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 19, imm. 6, naapertorlugu Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup napparsimmavimmit angerlareernermi pinngitsaaliissummik malittarinninnerup qaammatit pingasut pallillugit sivitsornissaa aalajangiuppagu, napparsimasoq piffissaalluarallartillugu kingusinnerpaamillu piffissaliussatut aalajangiussami malittarinninnerup naammassinissaa sap. ak. ataatsimik sioqqullugu ilisimatinneqassaaq.

  Imm. 2.  Piffissami aalajangiussami malittarineqarnermut atatillugu kingusinnerpaamik nakorsaasiinissamut kingullermut ornigunnerani nakorsaanerup napparsimasoq oqaatsitigut allakkatigullu sivitsuinissaq pillugu ilisimatissavaa.

 

  § 14. Angerlartitaareernerup kingorna pinngitsaaliissummik malittarineqarnissamik aalajangiussamut naammagittaalliuuteqarneq kinguartitsinermik kinguneqassaaq.

  Imm. 2.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 19, imm. 3, aamma imm. 6, naapertorlugit politiinit aaneqarnissap angerlartitaareernermilu pinngitsaaliissummik malittarineqarnissap sivitsornissaanik nakorsaanerup aalajangiinera pillugu naammagittaalliorneq kinguartitsinermik kinguneqarneq ajorpoq.

 

Kapitali 3

Pinngitsaaliissummik aalaakkiineq nukinnillu atuineq

 

Pinngitsaaliissummik aalaakkiineq

 

  § 15. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 21, imm. 2 naapertorlugu pinngitsaaliilluni aalaakkiineq oqaatigineqartutut taamaallaat atorneqarsinnaavoq.

  Imm. 2.  Nakorsap inassuteqaataanut napparsimasup massakkut qanoq innera tunngavigalugu pinngitsaaliissummik aalaakkiinissap pisariaqassusaanik nakorsap naliliinera allatullu iliuuseqarsinnaanerup, soorlu nakkutilliinerulernerup naammannginnerata imaluunniit naammassineqarsinnaannginnerata paasineqarsimanissaa piumasaqaataavoq.

  Imm. 3.  Qitequserlugu aalaakkiinerup saniatigut assannut isikkanullu parnaarsaatit aamma aaqqatit tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 22, imm. 2 naapertorlugu atorneqassanersut aalajangiiffigineqassaaq.

  Imm. 4.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 6 naapertorlugu imm. 3-mi taaneqartut malillugit nakorsap peqannginnerani aalajangiinerit aalajangerneqassapput.

 

  § 16. Napparsimasoq qiteruserlugu aalaakkigaq aalajangersimasumik paarsisoqassaaq.

  Imm. 2.  Aalajangersimasumik paarsisuusinnaavoq peqqissaasoq, peqqissaanermik sulialik imaluunniit allamik naapertuuttumik ilinniagalik allanik suliaqarani taamaallaat qiteruserlugit aalaakkikkanik suliakkerneqartoq.

  Imm. 3.  Napparsimasup kissaataa, ataqqinassusaa imminullu naleqartinnera ataqqillugit nakkutilliisoqassaaq.

  Imm. 4.  Napparsimasumut tunngatillugu isumannaallisaanermut ajoqutaanngippat, nammineq inuttut inuuneqarnissamut pisinnaatitaaffeqassaaq.

 

  § 17. Pinngitsaaliissummik aalaakkiineq attatiinnarneqarpat, aalaakkiinissamik aalajangiinermiit pinngitsaaliissummik qiterusiinikkut aalaakkiinerup ingerlatiinnarneqarnissaa pillugu apeqqut, pissutsit apeqqutaatillugit akulikitsunik minnerpaamilli ullup unnuallu ingerlanerani ataasiarluni nakorsamit naliliivigineqartassaaq. Nakorsap naliliinera allattugaatinut ilanngunneqassaaq.

  Imm. 2.  Peqqissaanermik suliallit pinngitsaaliissummik aalaakkiineq pisariaaruppat sukkulluunniit taamaatissinnaavaat.

 

  § 18. Napparsimasut namminneq toqqissisimanissartik siunertaralugu aalaakkerneqarnissamik kissaateqarnerat tunngavigalugu aalaakkiineq nakorsamit akuerineqarnikkut aatsaat pisinnaavoq.

  Imm. 2.  Napparsimasut imm. 1 naapertorlugu aalaakkikkat aalajangersimasumik nakkutilliisoqarnissamik neqeroorfigineqassapput.

  Imm. 3.  Qinnuteqaat aalaakkiisimanerlu napparsimasumut tunngatillugu allattugaatinut pinngitsaaliissummillu iliuuseqarnernut nalunaarsuivinnut nalunaarneqassapput.

 

Kapitali 4

Napparsimasoq illersorniarlugu aalaakkiineq

 

  § 19. Napparsimasoq illersorniarlugu aalaakkiinissaq sioqqullugu, napparsimasumik takuniaareernermi nakorsaq tamatuminnga inassuteqaqqaassaaq.

  Imm. 2.  Nakorsap napparsimasumik illersuiniarluni aalaakkiinissamut inassuteqaataani, napparsimasumik illersuiniarluni aalaakkiutip suup qanoq annertutigisumik qanorlu pisoqarnerani atorneqarnissaa taaneqassaaq.

  Imm. 3.  Napparsimasumik illersuiniarluni aalaakkiinissanik inassuteqaataasunik aqutsinerit ataasiakkaat ingerlanneqarnissaat paaqqutarinninnermik sulialinnut isumagitinneqarsinnaavoq.

 

  § 20. Napparsimasoq illersorniarlugu aalaakkiissutinut ilaapput qitequtit assigisaalluunniit napparsimasup siniffimminit issiavimminilluunniit nakkarluni imaluunniit paatsiveerusimaarluni angalanermini ajoqusernissaa pinaveersaartinniarlugu qajassuartumik atorneqartartut.

  Imm. 2.  Illersuiniarnermi siunertamut suut tulluarnerunerannik napparsimasumullu suup iluarinarnerussaneranik naliliineq tunngavigalugu suup illersuutitut atorneqarnissaa aalajangiivigineqassaaq.

 

Pinngitsoorani naliliisarneq

 

  § 21. Napparsimasumik illersuiniarluni aalaakkiinerup napparsimasumut isumannaatsuunera eqqarsaatigalugu, pisariaqartitsinermiit annertunerusumik atorneqannginnissaa inassuteqaatillu tamatuma allanngortinneqarsinnaanerata, periarfissaqarnerit tamaasa apeqquserneqartarnissaa, nakorsat peqqissaanermillu suliallit nakkutigisassaraat.

 

Kapitali 5

Inummik immikkut nakkutiginninneq aamma immikkoortortaqarfimmi matunik parnaarsuineq

 

Immikkut nakkutiginninneq

 

  § 22.  Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 27, imm.1 naapertorlugu immikkut nakkutiginninnermik atuinermi nalunaarummi tassani aalajangersaanerit imatut paasineqassapput, napparsimasoq suli nakkutigineqartoq, tassunga ilanngullugit uffarnermi perusuersariartornermilu taamaalillunilu sulisut pinasuartumik akulerunnissaminnut periarfissallutik.

  Imm. 2.  Napparsimasumik immikkut nakkutilliinissaq nakorsap napparsimasumik misissuereernermini aalajangiivigissavaa. Aalajangiineq pinngitsaaliinerit pillugit allattugaatinut aammattaaq napparsimasumut tunngatillugu allattugaatinut nalunaarneqassapput.

 

Immikkoortortaqarfimmi matunik parnaarsuineq

 

  § 23. Immikkoortortaqarfimmi matunik parnaarsuinissaq pillugu nakorsaq aalajangiissaaq.

  Imm. 2.  Napparsimasut immikkoortortaqarfimmi matunik parnaarsuinermi aalajangiinermut attuumassuteqanngitsut, immikkoortortaqarfimmi sulisunut saaffiginninnikkut sapinngisaq tamaat kissaataappallu immikkoortortaqarfimmit anisinnaanermik ingerlaannaq neqeroorfigineqassapput.

  Imm. 3.  Matunik paarnaarsinissaq aalajangiunneqariarpat imm. 2-mi aalajangersagaq naapertorlugu, tassunga ilanngullugu immikkoortortaqarfimmit aninissamut periarfissaq ilanngullugu, immikkoortortaqarfimmi napparsimasut tamarmik kalerrinneqassapput.

 

Kapitali 6

Pinngitsaaliissummik timikkut eqqiluisaartitsineq

 

  § 24. Tarnimikkut napparsimasunik nammineersinnaajunnaarsitsisarneq allatigullu pinngitsaaliissummik iliuuseqartarneq pillugit Inatsisartut inatsisaanni § 30-mik atuinermi inuttut eqqiluisaarnerit assersuutigalugu tassaasinnaapput, uffarnerit, qulinnerit, kigutigissarnerit, nanginik nalequttanillu taarsiinerit, assersuutigalugu napparsimasunut puigortunngorsimasunut, errortanik atisalersornerit il.il. Tamatumunnga nakorsaanerup aalajangiinera napparsimasut nalunaarsorneqartarfiannut ilanngunneqassaaq.

  Imm. 2.  Nakorsaanerup aalajangiinera tunngavilersuineralu imm. 1 malillugu napparsimasut nalunaarsorneqartarfiannut ilanngunneqassaaq.

  Imm. 3.  Pinngitsaaliissummik eqqiluisaartitsinerit pillugit maalaarutaasinnaasut napparsimmavimmi oqartussanut saaffiginnissutaassapput.

 

Kapitali 7

Atuutilersitsinermut atorunnaarsitsinermullu aalajangersakkat

 

  § 25.  Nalunaarut 26. april 2024-mi atuutilerpoq.

  Imm. 2.  Tamatuma peqatigisaanik Tarnimikkut nappaatilinnut immikkoortortaqarfimmi nammineersinnaajunnaarsitsinermit allaanerusumik pinngitsaaliissummik iliuuseqarneq pillugu Namminersorlutik Oqartussat nalunaarutaat nr. 20, 2. december 2013-meersoq atorunnaarsinneqarpoq.

 

 

Namminersorlutik Oqartussat, ulloq 23. april 2024

 

 

Agathe Fontain (atsior.)

Peqqissutsimut Naalakkersuisoq

 

 

/ Nike Berthelsen (atsior.)