Tarnimikkut nappaatilinnik sullissinermi nammineersinnaajunnaarsitsineq, allatigullu pinngitsaaliineq pillugit Inatsisartut Inatsisaanni nr. 24-mi, 3. december 2012-imeersumi § 12, imm. 7, § 13, imm. 3, § 18, § 28-lu naapertorlugit aalajangersarneqarput:

Kapitali 1
Pinngitsaaliissummik katsorsaaneq

Piumasaqaatit nalinginnaasut

§ 1.  Tarnimikkut nappaatilinnik nammineersinnaajunnaarsitsineq allatigullu pinngitsaaliineq pillugit Inatsisartut Inatsisaanni § 9 malillugu taamaallaat inuit Dronning Ingridip Napparsimmavissuani uninngasut pinngitsaaliissummillu nammineersinnaajunnaarsinneqartut pinngitsaaliissummik uninngatinneqarnissamut piumasaqaatit tunngavigalugit pinngitsaaliissummik katsorsarneqarsinnaapput.
Imm. 2.  Pinngitsaaliissummik katsorsaanissaq Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanermit aalajangiivigineqassaaq.
Imm. 3.  Katsorsaariaasissaq imarisaalu, Inatsisartut Inatsisaanni § 4-mi aalajangersagaq naapertorlugu annikinnerpaamik iliuuseqartoqarsinnaanerup salliunneqarnissaanik tunngaveqarluni aalajangiivigineqassapput.

Pinngitsaaliissummik nakorsaatitortitsineq taamaaqataalu.

§ 2.  Katsorsaariaatsit allat atorsinnaanngitsutut nalilerneqarpata aatsaat pinngitsaaliissummik nakorsaatitortitsisoqarsinnaavoq.

§ 3.  Nakorsaatitunnginnerup kingunerisaanik napparsimasup inuunerata peqqissusaataluunniit navianartorsiortinneqarnerat eqqaassanngikkaanni, nakorsaatitornissap pisariaqassusaanik napparsimasup nassuiaattuaraluarnera sunniuteqanngippat, pinngitsaaliissummik nakorsaatitortitsisoqarsinnaavoq.
Imm. 2.  § 1, imm. 2, naapertorlugu nakorsaanerup aalajangiinissaa sioqqullugu, napparsimasoq naammaginartumik piffissalerlugu nakorsaatitortinneqarnissamut akuersisinnaanissamut eqqarsarfissinneqassaaq. Sivisunerpaamilli ullut  pingasut napparsimasoq eqqarsarfissinneqassaaq.
Imm. 3.  Nakorsaanerup eqqarsarfissinneqarnerup sivisussusissaanik naliliinermini, imm. 2 naapertorlugu ilaatigut nappaatip navianaateqarnera sivisussusaalu, napparsimasup nakorsaatitortitaanissamut imminnut assortuuttunik isumaqarnera, nakorsaatitunnginnerullu allatigut pinngitsaaliinikkut iliuuseqartoqartariaqalerneranik kinguneqarsinnaanera napparsimasullu qanoq naalliuuteqartiginera il.il. pingaartissavai.
Imm. 4.  Nakorsaanerup pinngitsaaliissummik nakorsaatitortitaanissaq pillugu aalajangiinnginnerani, napparsimasoq apeqqut taanna pillugu siunnersortiminik oqaloqateqarnissamut periarfissinneqarsimassaaq.
Imm. 5.  Eqqarsarfissinneqarnermi napparsimasoq ullut tamakkiallugit nammineq piumassutsi naapertorlugu nakorsaatitornissaanik neqeroorfigineqassaaq, kajumissaariniarnerlu allattugaatinut nalunaarneqassalluni.
Imm. 6.  Navianaatillit imm. 1-imi taaneqartut eqqaassanngikkaanni, pinngitsaaliissummik nakorsaatitortitsinermi napparsimasup siunnersortaatalu nakorsaatitortitsinerup siunertaanik, sunniutaanik kingunerluutigisinnaasaanillu tamakkiisumik paasitinneqarsimanissaat piumasaqaataavoq.

§ 4.  Pinngitsaaliissummik nakorsaatitortitsinermi nakorsaatit misilerarneqareersut nalinginnaasumik annertussusilikkat kingunerluutikinnerpaallu atorneqassapput.
Imm. 2.  Kingunerluutaasinnaasut nakkutigeqqissaarneqassapput paasineqarniariarpatalu sapinngisamik ajunginnerpaaq anguniarlugu akiorniarneqassallutik. Tamatumunnga atatillugu pinngitsaaliissummik nakorsaatitortitaanerup taama annertutigiinnarnissaa eqqarsaatigeqqissaartariaqarpoq.
Imm. 3.  Annertuallaamik nakorsaasiisoqassanngilaq.

§ 5.  Nakorsaatit sivisuumik sunniusimasartut sapinngisamik atornaveersaarneqassapput , nakorsaatillu napparsimasumut qanoq sunniuteqarnerannik ilisimasaqarfiunngitsuni napparsimasunik pinngitsaaliissummik nakorsaaseeqqaarnissami atorneqassanatik.

§ 6.  Pinngitsaaliissummik nakorsaasiinerni tamatigut nakorsamik peqataasoqartassaaq.

§ 7.  § 1, imm. 1-imi piumasaqaatit eqquutsinneqarpata, napparsimasullu inuunerata annaanneqarnissaanut taamaasiornissaq pisariaqarpat imaluunniit taamaasiunnginneq napparsimasup inuuneranut peqqissusaanulluunniit annertuumik navianartorsiortitsissappat, aatsaat pinngitsaaliissummik nerisitsisoqarsinnaavoq.

§ 8.  § 1, imm. 1-imi piumasaqaatit napparsimasumit eqquutsinneqarpata, napparsimasup inuunera navianartorsiorpat imal. navianartorsiulersinnaappat aatsaat, qupinnguallatitsinikkut pinngitsaaliissummik katsorsaasoqarsinnaavoq.

Timikkut nappaammut pinngitsaaliissummik nakorsarneqarneq

§ 9.  Inatsisartut Inatsisaanni § 5 naapertorlugu nammineersinnaajunnaarsitaasinnaanermut piumasaqaatinik eqquutsitsisoq timikkullu nappaammut nakorsartinnissamut paasissutissinneqareernikkut akuersissuteqanngitsoq, nappaatip pineqartup inuunera peqqissusaaluunniit annertuumik navianartorsiortippagu pinngitsaaliissummik nakorsarneqarsinnaavoq.
Imm. 2.  Napparsimasoq Dronning Ingridip Napparsimmavissuani tarnimikkut nappaatilinnut immikkoortortaqarfimmut unitsitaasimanngippat, pinngitsaaliissummik nakorsarneqarnissaq sioqqullugu pinngitsaaliissummik unitsinneqarnissamut uppernarsaasiortoqarnissaa, tarnimikkullu nappaatilinnut immikkoortortami qulaani pineqartumi nakorsaanerup pinngitsaaliissummik unitsinneqarsinnaanermut piumasaqaatit eqquutsinneqarnerisa aalajangiivigereersimanissaat piumasaqaataavortaaq.
Imm. 3.  Imm. 1-imi taaneqartutut pinngitsaaliissummik timikkut nakorsartinnissamut, nakorsaaneq tarnikkut nappaatinut immikkut ilisimasalik pineqartoq timikkullu nappaatinut immikkoortortami pineqartumi nakorsaaneq aalajangiisuussapput.

§ 10.  Timikkut nappaatilinnut immikkoortortamiinnermi pinngitsaaliissummik iliuuseqartoqartariaqalerpat, nammineersinnaajunnaarsitsineq allatigullu pinngitsaaliineq pillugit Inatsisartut inatsisaat naapertorlugu, nakorsaanerup tarnikkut nappaatinut immikkut ilisimasallip nakorsaanerullu timikkut nappaatinut pineqartunut immikkoortortameersup aalajangiinerat tunngavigalugu aatsaat taama pisoqarsinaavoq.
Imm. 2.  Imm. 1 naapertorlugu pinngitsaaliissummik iliuuseqarneq, tarnimikkut nappaatilinnut immikkoortortaqarfimmi peqqissaanermik suliallit timikkullu nappaatinut pineqartunut immikkoortortaqarfimmi peqqissaanermik suliallit isumagissavaat.

§ 11.  Napparsimasup qanoq innera timikkullu nakorsarneqarnera apeqqutaatillugu, nakorsaanerup tarnikkut nappaatinut immikkut ilisimasallip timikkullu nappaatinut pineqartunut immikkoortortami nakorsaanerup isumaqatigiinnerisigut, napparsimasoq tarnimikkut nappaatilinnut immikkoortortaqarfimmut nuutinneqasaaq.

Maalaaruteqarneq

§ 12.  Napparsimasup inuuneranut peqqissusaanullu annertuumik navianartorsiortitsinera pissutigalugu,  imaluunniit napparsimasoq allanik timikkut peqqissutsikkullu annertuumik navialisitseqqunagu ingerlaannaq iliuuseqarnissaq pisariaqanngippat, pinngitsaaliissummik iliuuseqarnissamik aalajangiineq pillugu maalaaruteqarneq kinguartitsinermik kinguneqartarpoq.

Kapitali 2
Napparsimmavimmiit angerlareernermi pinngitsaaliissummik malittarineqarneq

§ 13.  Inatsisartut inatsisaanni § 17-imi piumasaqaatit eqquutsinneqarpata aatsaat napparsimmavimmiit angerlareernermi malittarinnittoqarsinnaavoq.
Imm. 2.  Napparsimmavimmiit angerlareernermi pinngitsaaliissummik malittarineqarnissaq pillugu nakorsaanerup aalajangiinerani nakorsartinnissaq siunertaralugu peqqinnissaqarfimmut, tassunga ilanngullugu najukkami tarnimikkut nappaatilinnik sullissivimmut, ornigunnissamik taamaallaat imaqassaaq.
Imm. 3.  Unitsitsineq pineqartoq sioqqullugu tassungalu atatillugu napparsimasup angerlareernermini pisariaqartumik nakorsarneqarnermik taamaatitsinissaanut ilimaginninnermut pissutsit suut tunngavilersuutaanersut, nakorsartinnerullu taamaatinneqarnera  napparsimasup peqqissusaanut qanoq kinguneqassanersoq, napparsimasut pillugit allattugaatinut nalunaarsorneqassapput. 
Imm.4.  Inatsisartut inatsisaanni § 14 imal. § 15 naapertorlugu, napparsimmavimmiit angerlartinneqarnermut atatillugu pinngitsaaliissummik malittarineqarnissami, angerlalernermut atatillugu isumaqatigiissusiornissaq, imaluunniit ataqatigiissaarinermut pilersaarusiornissaq nakorsaanerup akisussaaffigai.
Imm. 5.  Peqqinnissaqarfiup immikkoortuisa ilaannut napparsimasoq unitsinneqarluni pinngitsaaliissummik nakorsaatitortinneqartariaqarpat, qanoq annertutigisumik pinngitsaaliinikkut nakorsaasoqarsinnaanera katsorsarneqarnissamut pilersaarummi allassimassaaq.

§ 14.  Napparsimmavimmiit angerlareernermi pinngitsaaliissummik malittarineqarnermut atatillugu pinngitsaaliissummik nakorsaatitortitsineq Inatsisartut inatsisaanni § 4-mi maleruagassat naapertorlugit ingerlanneqassaaq.
Imm. 2.  Nakorsaatit atorneqartut, tassunga ilanngullugit sivisuumik sunniusimasartuusinnaasut, sunniutaat ilisimaneqartumik napparsimasumut iluaqutaassapput.
Imm. 3.  Napparsimmavimmit angerlareernermi pinngitsaaliissummik malittarineqarnermi nakorsarneqarnerup, napparsimasup peqqissusaanut pitsaasumik sunniuteqarnerata annertuallaanillu kingunerluuteqannginnerata qulakkeernissaa Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup akisussaaffigaa.

§ 15.  Napparsimasoq nakorsaatitornissaq siunertaralugu aggerfissatut isumaqatigiissutaasut naapertorlugit takkutinngippat, Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup politiit ikiorsiullugit napparsimasup peqqinnissaqarfiup immikkoortuanut pineqartumut pinngitsaaliissummik nakorsartikkiartortinissaa aalajangiivigisinnaavaa.
Imm. 2.  Politiinut attaveqartinnani napparsimasumut naammaginartumik attaveqarniartoqarsimanera qulakkeerneqassaaq.
Imm. 3.  Sapinngisaq tamaat piaartumik politiinit ikiorserneqarnissamik qinnuteqartoqassaaq, napparsimasorlu aaneqartussaq pillugu sukumiisunik paasissutissiisoqassalluni.
Imm. 4.  Napparsimasumik aallerneq angallassinerlu Inatsisartut inatsisaanni § 4, imm. 3, naapertorlugu pisariaqanngitsumik kanngutsatsitsisoqaqqunagu ajoqutitaqaqqunaguluunniit, sapinngisaq tamaat qajassuartumik malunnaarsaartumillu ingerlanneqassaaq. Politiit peqataasut sapinngisaq naapertorlugu inuinnartut atisaqassapput. Napparsimasoq politiit biiliinut ilaatinneqassappat sapinngisaq tamaat inuinnaat biilii suliffimmi atorneqartartut atorlugit ingerlanneqassaaq.
Imm. 5.  Inatsisartut Inatsisaanni § 17, imm. 3, oqaaseqatigiit aappaat, naapertorlugu peqqinnissakkut sullissisoq politiit aallerneranni sapinngisamik peqataasussaq, ajornanngippat napparsimasumit ilisarisimaneqassaaq, napparsimasorlu  nakorsartissimanera ilanngullugu, ilisimasaqarfigissallugu.
Imm. 6.  Napparsimasup aaneqarnermut pinngitsaaliissummillu nakorsaatitortitaanermut akiuunnera, napparsimasup nakorsartinneranut periarfissaanullu kinguneqartinneqartariaqanngilaq, tarnikkut nappaatilinnik sullissinermi pinngitsaaliissummik iliuuseqarnerni allanisulli napparsimasup aaneqarnermut pinngitsaaliissummillu nakorsarneqarnermut qisuariaataanut immikkut paasinnittoqartariaqarpoq.

§ 16.  Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanerup napparsimmavimmit angerlareernermi pinngitsaaliissummik malittarinninnerup Inatsisartut Inatsisaanni § 17, imm. 6, naapertorlugu qaammatit pingasut pallillugit sivitsornissaa aalajangiuppagu, napparsimasoq siuningaaniit kingusinnerpaamillu maannamut malittarinninnerup naammassinissaa sap. ak. ataatsimik sioqqullugu ilisimatinneqassaaq.
Imm. 2.  Maannamut malittarineqarnermut atatillugu kingusinnerpaamik nakorsaatitortitaanissamut kingullermut ornigunneranut atatillugu, nakorsaanerup napparsimasoq oqaatsitigut allakkatigullu sivitsuinissaq pillugu ilisimatissavaa.

§ 17.  Napparsimmavimmiit angerlareernerup kingorna pinngitsaaliissummik malittarineqarnissap maalaarutigineqarnera, aalajangiinissap tungaanut kinguartitsinermik kinguneqassaaq.
Imm. 2.  Inatsimmi § 17, imm. 3, aamma imm. 6, naapertorlugit politiinit aaneqarnissap napparsimmavimmiillu angerlareernermi pinngitsaaliissummik malittarineqarnissap sivitsornissaanik nakorsaanerup aalajangiinera pillugu maalaarutit aalajangiinissap tungaanut kinguartitsinermik kinguneqarneq ajorput.

Kapitali 3
Pinngitsaaliissummik aalaakkiineq nukersorfiginninnerlu

Pinngitsaaliissummik aalaakkiineq

§ 18.  Inatsisartut Inatsisaanni § 19, imm. 2, naapertorlugu pinngitsaaliissummik aalaakkiisoqarsinnaavoq.
Imm. 2.  Aalaakkiinermi taamaallaat qitequtit, paffinnut aamma/imaluunniit singernernut aalaakkiissutit aaqqatillu atorneqarsinnaapput.
Imm. 3.  Pinngitsaaliissummik aalaakkiinialersinnani, nakorsap napparsimasumik misissuereernerani tamatumunnga inassuteqaataa pissarsiarineqarsimasariaqarpoq.
Imm. 4.  Nakorsap inassuteqaataanut napparsimasup massakkut qanoq innera tunngavigalugu pinngitsaaliissummik aalaakkiinissap pisariaqassusaanik nakorsap naliliinera allatullu iliuuseqarsinnaanerup, soorlu nakkutilliinerulernerup naammannginnerata imaluunniit naammassineqarsinnaannginnerata paasineqarsimanera piumasaqaataavoq.
Imm. 5.  Qitequtip saniatigut paffinnut aamma/imaluunniit singernernut aalaakkiissutinik aaqqatinillu atuinissaq, Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanermit aalajangiivigineqassaaq. Nakorsaanerup peqannginnerani nakorsaq alla aalajangiisuusinnaavoq. Taamaattoqarnerata kingorna nakorsaanerup aalajangiineq piaarnerpaamik isummerfigissavaa.
Imm. 6.  Nunap immikkoortuani napparsimmavinni peqqissaavinniluunniit nal. ak. aqqaneq marluk sinnerlugit sivisussusilinnik sivisussuseqassangatitaniluunniit pinngitsaaliissummik aalaakkiinermi aalaakkiinerup sivitsorneqarnissaa Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanermit aalajangiivigineqassaaq.

§ 19.  Tassanngaannaq immikkorluinnaq ittumik pisoqartillugu napparsimasumut allanulluunniit isumannaallisaaneq  eqqarsaatigalugu aalajangiinissap kinguartinnissaa illersorneqarsinnaanngippat, peqqissaanermi suliallit namminneq qiterusiillutik aalaakkiisinnaapput.
Imm. 2.  Imm. 1 naapertorlugu iliuuseqarnissami peqqissaasoq akisussaasuusoq taassumunngaluunniit taartaasoq imaluunniit immikkut pisoqartillugu peqqissaasoq allaluunniit peqqissaaanermik suliaqartoq najuuttoq aalajangiisuussaaq.
Imm. 3.  Qiterusiilluni aalaakkiinerup kingorna ingerlaannaq nakorsaq akisussaasuusoq aggersarneqassaaq, taassumalu pinngitsaaliissutip attatiinnartariaqarsinnaanera isummerfigissavaa.

§ 20.  Napparsimasoq qiteruserlugu aalaakkigaq nakkutilliisoqassaaq.
Imm. 2.  Peqqissaasoq, peqqissaanermik sulialik imaluunniit allamik naapertuuttumik ilinniagalik qiteruserlugillu aalaakkikkanik taamaallaat suliakkerneqartoq aalajangersimasumik nakkutilliisuutitaasinnaavoq.
Imm. 3.  Napparsimasup kissaataa, ataqqinassusaa, imminullu naleqartinnera ataqqillugit nakkutilliisoqassaaq.
Imm. 4.  Napparsimasumut tunngatillugu isumannaallisaanermut ajoqutaanngippat, nammineq inuttut inuuneqarnissamut pisinnaatitaaffeqassaaq.

§ 21.  Pinngitsaaliissummik aalaakkiineq attatiinnarneqarpat, aalaakkiinissamik aalajangiinermiit pinngitsaaliissummik qiterusiinikkut aalaakkiinerup ingerlatiinnarneqarnissaa pillugu apeqqut, pissutsit apeqqutaatillugit akulikitsunik minnerpaamilli ullup unnuallu ingerlanerani ataasiarluni nakorsamit naliliivigineqartassaaq. Nakorsap naliliinera allattugaatinut ilanngunneqassaaq.
Imm. 2.  Peqqissaanermik suliallit pinngitsaaliissummik aalaakkiineq pisariaaruppat sukkulluunniit taamaatissinnaavaat.

§ 22.  Napparsimasut namminneq toqqissisimanissartik siunertaralugu aalaakkerneqarnissamik kissaateqarnerat tunngavigalugu aalaakkiineq nakorsamit akuerineqarnikkut aatsaat pisinnaavoq.
Imm. 2.  Napparsimasut imm. 1 naapertorlugu aalaakkikkat immikkut nakkutilliisoqarnissamik neqeroorfigineqassapput.
Imm . 3.  Qinnuteqaat aalaakkiisimanerlu Inatsisartut inatsisaanni § 30 naapertorlugu, napparsimasumut tunngatillugu allattugaatinut pinngitsaaliissummillu iliuuseqarnernut nalunaarsuivimmut nalunaarneqassapput.

Nukersorfiginninneq

§ 23.  Pinngitsaaliissummik aalaakkiinissamut piumasaqaatit eqquutsinneqarpata, napparsimasoq peqqinnissaqarfiup immikkoortuisa arlaanni uninngasoq uninngatinneqarsinnaavoq, pisariaqarpallu nukersorfigalugu sumiiffimmi immikkoortumut allamut nuutinneqarsinnaalluni.
Imm. 2.  Pisuni ataasiakkaani suup atorneqarnissaa, Inatsisartut inatsisaanni § 4 naapertorlugu annikinnerpaamik iliuuseqarsinnaaneq eqqarsaatigalugu aalajangiivigineqassaaq, taamatuttaaq nukersorfiginninnissap qanoq annertutiginera apeqqutaatillugu, piumasaqaatit sukannernerulersinneqassapput.

§ 24.  § 23, imm. 1, naapertorlugu nukersornissamut piumasaqaateqanngikkaluarpalluunniit, Inatsisartut inatsisaanni kapitali 3 naapertorlugu nammineersinnaajunnaarsitat immikkoortortamiiginnarnissaat qulakkeerniarlugu pisariaqarpat nukersorfigineqarsinnaapput.

§ 25.  Napparsimasup nappaatini pissutigalugu eqqissiveeqisup peqqinnerulernissaanut aalajangiisuuppat, pisariaqarpat nukersornikkut iliuusitut annikinnertut eqqissisaatitortinneqarnissaa nakorsap aalajangersinnaavaa.
Imm. 2.  Eqqississaatitortitsinermi nakorsaq peqataassaaq.

Kapitali 4
Napparsimasoq illersorniarlugu aalaakkiineq

§ 26.  Ilersuiniarluni aallaakkiineq imatut paasineqassaaq inuk imminut piaarinani annertuumik ajoqusersinnaaneranut illersorniarlugu arlaatigut pisarialimmik iliuuseqarneq.

§ 27.  Napparsimasoq illersorniarlugu aalaakkiinissaq sioqqullugu, napparsimasumik takuniaareernermi nakorsaq tamatuminnga inassuteqaqqaassaaq.
Imm. 2.  Nakorsap napparsimasumik illersuiniarluni aalaakkiinissamut inassuteqaataani, napparsimasumik illersuiniarluni aalaakkiutip suup qanoq annertutigisumik qanorlu pisoqarnerani atorneqarnissaa taaneqassaaq.
Imm. 3.  Napparsimasumik illersuiniarluni aalaakkiinissanik inassuteqaataasunik aqutsinerit ataasiakkaat ingerlanneqarnissaat peqqissaanermik sulialinnut isumagitinneqarsinnaavoq.

§ 28.  Napparsimasoq illersorniarlugu aalaakkiissutinut ilaapput qitequtit assigisaalluunniit napparsimasup siniffimminit issiavimminilluunniit nakkarluni imaluunniit paatsiveerusimaarluni angalanermini ajoqusernissaa pinaveersaartinniarlugu qajassuartumik atorneqartartut.
Imm. 2.  Illersuiniarnermi siunertamut suut tulluarnerunerannik napparsimasumullu suup iluarinarnerussaneranik naliliineq tunngavigalugu suup illersuutitut atorneqarnissaa aalajangiivigineqassaaq.

Pinngitsoorani naliliisarneq

§ 29.  Napparsimasumik illersuiniarluni aalaakkiinerup ingerlatiinnarneqarsinnaanerata nakorsamit naliliivigineqartarnera, pissutsit apeqqutaatillugit akulikitsunik minnerpaamilli iliuuseqarnissamik aalajangiinerup kingorna ullut pingasut, qulit, 20-t, 30-llu qaangiunnerini tamatumalu kingorna inassuteqaatip atuutsinneqarnera tamaat minnerpaamik sap. ak. sisamat qaangiunnerini pisassaaq.

§ 30.  Napparsimasumik illersuiniarluni aalaakkiinerup napparsimasumut isumannaatsuunera eqqarsaatigalugu, pisariaqartitsinermiit annertunerusumik atorneqannginnissaa inassuteqaatillu tamatuma allanngortinneqarsinnaanerata, periarfissaqarnerit tamaasa apeqquserneqartarnissaa, nakorsat peqqissaanermillu suliallit nakkutigisassaraat.

Kapitali 5
Immikkut nakkutilliineq immikkoortortamilu matunik parnaarsineq

Immikkut nakkutilliineq

§ 31.  Napparsimasup imminut toqunnissaa imaluunniit arlaatigut nammineq allalluunniit peqqissusaannik annertuumik ajoqusiisinnaanera imaluunniit napparsimasup uninngaqatiminik allanilluunniit malersuinissaa annertuumilluunniit ajoqusiinissaa pinaveersaartinniarlugit napparsimasup nammineq akuersissutigisimanngisaanik aatsaat immikkut nakkutilliisoqarsinnaavoq.
Imm. 2.  Immikkut nakkutilliineq imatut paasineqassaaq sulisup ataatsip arlallilluunniit nappasimasumit nigoratik nakkutilliisinneqarnerat. Nigutsaaliorneq imatut paasineqassaaq napparsimasup uffarneq perusuersarnerlu ilanngullugit nakkutigineqartuarnerani sulisut pinasuartumik iliuuseqarsinnaanerat.
Imm. 3.  Napparsimasumik immikkut nakkutilliinissaq nakorsap misissuereernermini aalajangiivigissavaa. Aalajangiineq allattugaatinut nalunaarneqassaaq.
Imm. 4.  Immikkut nakkutilliineq ataannartumik nal. ak. 24-t sinnerlugit sivisussuseqarpat, immikkut nakkutilliinissamik aalajangiineq Inatsisartut inatsisaanni § 42 naapertorlugu Tarnimikkut Nappaatillit Maalaarutaannik Aalajangiisartunut maalaarutigineqarsinnaavoq.

Immikkoortortami matunik parnaarsineq

§ 32.  Immikkoortortami napparsimasut init uninngavii, napparsimasut kapitali 3 naapertorlugu nammineersinnaajunnaarsitat, napparsimasut Inatsisartut inatsisaanni § 23 naapertorlugu piaarinatik imminnut annertuumik ajoqusersinnaasut ilanngunnagit, matunik parnaarsisoqarsinnaavoq.
Imm. 2.  Napparsimasup nammineq kissaatigippagu matunik parnaarsinissamik aamma aalajangiisoqarsinnaavoq, napparsimasulli imm. 1-imi aalajangersakkamut attuumassuteqanngitsut inaannut matut parnaarneqassanngillat. Napparsimasup piumasarippagu matu ingerlaannaq parnaarussaarneqassaaq.
Imm. 3.  Immikkoortortami matunik parnaarsinissaq nakorsamit aalajangiivigineqassaaq.
Imm. 4.  Napparsimasut imm. 1-imi aalajangersagaq naapertorlugu immikkoortortami matunik parnaarsinissamik aalajangiinermut attuumassuteqanngitsut, immikkoortortami sulisunut saaffiginninnikkut sapinngisaq tamaat kissaataappallu immikkoortortamit anisinnaanermik ingerlaannaq neqeroorfigineqassapput.
Imm. 5.  Matunik paarnaarsinissaq aalajangiunneqariarpat imm. 4-mi aalajangersagaq naapertorlugu  immikkoortortamit aninissamut periarfissaq ilanngullugu, immikkoortortami napparsimasut tamarmik kalerrinneqassapput.
Imm. 6.  Immikkoortortamut unitsitaanermut atatillugu immikkoortortap aaqqissorneqarnera immikkoortortamilu minnerusunik immikkoortortaqarpat taakku matuisa parnaarneqarsinnaanerat ilanngullugu, napparsimasoq ilisimatinneqassaaq.

Kapitali 6
Pinngitsaaliissummik timikkut eqqiluisaartitsineq

§ 33.  Tarnimigut nappaatilik nappaanni pissutigalugu timikkut eqqiluisaarnissaminik isumaginnissinnaanngitsoq, napparsimasoq nammineq, uninngaqataasut sulisulluunniit eqqarsaatigalugit pisariaqarpat, pinngitsaaliissummik eqqiluisaartinneqarsinnaavoq.
Imm. 2.  Napparsimasup pinngitsaaliissummik timimigut eqqiluisaartinneqarnissaa Dronning Ingridip Napparsimmavissuani tarnimikkut nappaatilinnut immikkoortortaqarfimmi nakorsaanermit, napparsimasup massakkorpiaq eqqiluisaarnikkut qanoq inneranik misissuineq naliliinerlu tunngavigalugit, aalajangiivigineqassaaq. Nakorsaanerup aalajangiinera tamatumunngalu tunngavilersuutaa napparsimasoq pillugu allattugaatinut nalunaarneqassapput.
Imm. 3.  Pinngitsaaliissummik eqqiluisaartitsineq assersuutigalugu tassaasinnaavoq uffarneq, qulinneq, kigutigissarneq, assersuutigalugu puiguttortuni nangernik nalequttanillu taarsiineq il.il.
Imm. 4.  Pinngitsaaliissummik eqqiluisaartitsineq, inatsimmi § 4-mi annikinnerpaaffimmiititsinissamik tunngaveqarnissamut aalajangersagaq naapertorlugu, sapinngisaq tamaat napparsimasumut pisariaqanngitsumik kanngutsatsitsinngitsumik ajoqusiinngitsumillu qajassuartumik isumagineqassaaq.
Imm. 5.  Pinngitsaaliissummik eqqiluisaartitsinerit pillugit maalaarutit napparsimmavimmi oqartussanut saaffiginnissutaassapput.

Kapitali 7
Atuutilersitsineq

§ 34.  Nalunaarut atuutilersinneqarpoq 16. december 2013.

Namminersorlutik Oqartussat, ulloq 2. december 2013

Steen Lynge

/

Ann Birkekær Kjeldsen