Kapitali 1

Atuuffia aamma taaguutit

 

  § 1.  Inatsisartut inatsisaat atortinneqarpoq Kalaallit Nunaanni filmiliortarnernut aamma piareersaasiortarnernut siuarsaanernullu kalaallit filmiliaannik Kalaallit Nunaanni nunattalu avataani. Filmiliornertut paasineqassapput ataatsimut isigaluni filmiliassamik piareersaasiorneq, filmiliorneq aamma filmiliamik suliareqqiineq.

 

  § 2.  Filmitut paasineqassapput Inatsisartut inatsisaat naapertorlugu assilissat uummaarissut - uumassusillit qanorluunniit ittut, apeqqutaatinnagu immiussinerup takutitsinerullu qanoq ittuuneri, tamatumani filmitut assilisat aamma video atorlugu sanaat, kisianni tv-kkut aallakaatitassiaanngitsut.

 

  § 3.  Kalaallinit filmiliatut paasineqassapput kalaallimik ataatsimik arlalinnilluunniit producenteqarluni suliat, annertunerusutigullu kalaallit oqaasii atorlugit immiunneqarsimasut imaluunniit eqqumiitsuliornikkut teknikkikkulluunniit suliaasut Kalaallit Nunaanni filmiliortarnermik filmimullu kulturimik siuarsaasut, taamaattoq tak. § 4, imm. 2.

  Imm. 2.  Nunani allamiunit filmiliatut paasineqassaaq filmi kalaallit filmiliarinngisaat.

  Imm. 3.  Kalaallisut filmiliortartutut paasineqassaaq:

1) inuk danskisut innuttaassusilik, Kalaallit Nunaanni najugaqartoq, ukiunilu imminnut atasunik minnerpaamik 5-ni tamanna sioqqullugu najugaqarsimasoq,

2) aktiaatileqatigiiffik imaluunniit piginneqatigiiffik, Kalaallit Nunaanni nalunaarsorsimasoq, pisortatullu ilaasortani amerlanerussuteqartut danskisut innuttaassuseqartut, Kalaallit Nunaannilu najugaqartoq, najugaqarsimallunilu minnerpaamik ukiuni 5-ni imminnut atasuni,

3) Kalaallit Nunaanni angerlarsimaffeqartoq ingerlatseqatigiiffik alla nr. 2-mi pineqanngitsoq, killeqartumik akisussaaffeqartoq, matumanissaaq aningaasaateqarfiit aamma peqatigiiffiit allat, pisortani ilaasortat amerlanerussuteqartut aamma siulersuisuni ilaasortat amerlanerussuteqartut danskisut innuttaassuseqartut, Kalaallit Nunaannilu najugaqartut, minnerpaamilu ukiuni atasuni 5-ini tamanna sioqqullugu najugaqarsimallutik,

4) aktiaatileqatigiiffik imaluunniit piginneqatigiiffik, filiaaleqartoq nalunaarsorsimasumik Inuussutissarsiornermut Ingerlatseqatigiiffinnullu Aqutsisoqarfimmi – Erhvervsstyrelsen-imi, imaluunniit ingerlatseqatigiiffik alla killeqartumik akisussaaffeqartoq, ingerlatsivimmi pineqartumi aqutsisuusoq danskisut innuttaassuseqartoq Kalaallit Nunaannilu najugaqartoq minnerpaamik ukiuni 5-ni imminnut atasuni, tamanna sioqqullugu, imaluunniit

5) ingerlatsivik pigineqarlunilu ingerlanneqartoq Namminersorlutik Oqartussanit imaluunniit kommunimit kommuninilluunniit arlaqartunit.

  Imm. 4.  Naalakkersuisut najugaqarnissamut piumasaqaammiit imm. 3-miittumiit immikkut akuersisinnaapput, pissutsit immikkut ittut tamanna pisariaqartippassuk, matumanissaaq Kalaallit Nunaata avataani najugaqartuunissamut, tamanna ilinniagaqarnermik pissuteqarsimatillugu, isumaginninnermik pissuteqarsimatillugu, Kalaallini Oqartussat peqataaffigisimasaannik, imaluunniit ilaqutariinnermik pissuteqartillugu, tamatumani sanilliullugu pineqartup imm. 3-miittut piumasaqaatit naammassinissaat qanoq qanitsiginerai.

  Imm. 5.  Filmiliortutut - producentitut nunani allamiutut paasineqassaaq filmiliortoq kalaaliunngitsoq.

  Imm. 6.  Naalagaaffimmi innuttaanermut piumasaqaat, imaluunniit najugaqarfik imaluunniit angerlarsimaffik imaluunniit Kalaallit Nunaanni nalunaarsorneqarsimaneq, imm. 3, nr. 1-3 aamma 5, naapertorlugu atorunnaassaaq nunat tamalaat akornanni isumaqatigiissutikkut Kalaallit Nunaat isumaqatigiissuteqarsimappat tapersiisimappalluunniit taamatut piumasaqaammut.

 

  § 4.  Filmilioqatigiinnertut paasineqassaaq filmiliaq nioqqutissiarineqartoq suleqatigiinnikkut nunani allamiumik allamiunilluunniit arlaqartunik peqateqarluni, minnerpaamillu kalaallimik producentimik ataatsimik peqataaffigineqartoq.

  Imm. 2.  Filmilioqatigiilluni - koproduktion - filmiliaq isigineqarsinnaavoq kalaallit suliaattut aallaavigalugu kalaallit aamma nunani allamiut aningaasaliinerisa imminnut naapertuunnerat filmiliornermilu kalaallit sunniuteqassusiat, aamma eqqumiitsuliornerup teknikkimullu tunngasut illugiissillugit naapertuunneri aallaavigalugit.

 

Kapitali 2

Kalaallit Nunaanni Filminstitutti

 

Instituttip siunertaa

 

  § 5.  Kalaallit Nunaanni Filminstituttip siunertaraa:

1)  Filmiliortarneq, filmernermi kulturi, filmertarfeqarnermi kulturi aamma Kalaallit Nunaanni filmfestivalertarnermi kulturi siuarsassallugit,

2)  ingerlatsisuussalluni nunami tamarmi filmertarnermut kommissionitut, tak imm. 3,

3)  siuarsassallugu kalaallit aamma nunani allamiut filmiliaasa nunatsinni ilisimaneqarnerat,

4)  siuarsassallugu kalaallit filmiliaasa nunani allani ilisimaneqarlutillu nioqqutigineqartarnissaat, 

5)  katersussallugit filminut tv-mullu atatillugu allaaserisat naqitertitallu, katersallu tamakku inuit tamat atorsinnaasaannik saqqumitinneqarnissaat,

6)  isumagissallugu siammasissumik isiginnaartartunut sammisunik filmit pillugit ingerlatsisoqartarnissaa,

7)  qularnaassallugu ingerlaavartumik filmiliornermik inuussutissarsiortullu oqaloqatigiinneq, tamatumani ilanngullugit Kalaallit Nunaanni Filminstituttip atuisullu pingaarutillit peqatigiinnissaat,

8)  paasissutissiisassalluni ilitsersuillunilu meeqqanut inuusuttunullu filmit naleqquttut pillugit, tamatumanissaaq filmit pineqartut meeqqanut inuusuttunullu akornutaasinnaaneri, aamma 

9)  siuarsassallugit professioneliusumik filmiliortarneq eqqumiitsuliatut aamma piginnaasanik ineriartortitsivittut.

  Imm. 2.  Kalaallit Nunaanni Filminstituttip ilanngullugit suliassarai

1) aningaasaliissutinik tapiissuteqartarnikkut tapersersussallugit allaatigisaq filmiliornermi najoqqutassaliornermi, ineriartortitsineq, nioqqutissiorneq, saqqummiisarneq, ussassaarisarneq, ilisarititsisarneq, filmertitsisarneq nassiussuisarnerlu kalaallit filmiliaannik, aamma peqatigiinnikkut filmiliat, kiisalu ingerlatsisarnerit allat filmiliornermut, filmiliornerup kulturianut aamma nunatsinni filmerarfeqarnermik kulturimik siuarsaasut, aamma

2)  suliarisassallugit Kalaallit Nunaanni filmiliorniarluni qinnuteqaatit, paasissutissanillu qitiusunik nalunaarsuisarneq filmilianik suliniutinut tunngasut, taakkualu akisussaaffigalugit. 

  Imm. 3.  Filmkommissionitut ingerlatsinermut ilaapput atortorissaarusersuisarneq aamma nunani allamiunik filmiliortartunik tv-kkullu aallakaatitassiortartunik Kalaallit Nunaannut soqutiginnilersitsiniarneq, aamma kalaallini filmiliornerup tv-kkullu aallakaatitassiornerup atortulersuuteqarnissaat. 

 

Aaqqissuussineq aamma aqutsisut

 

  § 6.  Kalaallit Nunaanni Filminstitutti tassaavoq pisortat ingerlatsiviat namminersortoq.

 

  § 7.  Kalaallit Nunaanni Filminstitutti aqunneqarpoq siulersuisunit 5-inik ilaasortalinnit, ataatsimut tamarmik filmiliornermut tunngasunik ilisimasaqarluartunik, aamma tusagassiornermik ingerlatsinermik, ussassaarisarnermik, suliffeqarfimmik ingerlatsinermik, aningaasaqarnermik aqutsinermillu ilisimasaqarluartunik. 

  Imm. 2.  Siulersuisuni ilaasortat tamarmik ataasiakkaarlutik siuliani pineqartut ilaannik arlaqartunilluunniit sinniisutut ilisimasaqartuussapput.

  Imm. 3.  Siulersuisut siulittaasuat aqutsinermik aamma inuussutissarsiornermit misilittagaqartuussaaq. 

  Imm. 4.  Kalaallit Nunaanni Filminstituttimi sulisut sinniisumik toqqaassapput, siulersuisuni ataatsimiinnermi qinerseqataasinnaanngitsutut peqataasussamik. Sulisut, ukiumut suliarisinnaasaasa naatsorsorneranni ukiup affaani sinnerluguluunniit sulisimasut, qinerneqarsinnaallutillu qinersisinnaapput.

 

  § 8.  Naalakkersuisut inassuteqaatitaqanngitsumik siulersuisuni siulittaasumik toqqaasarput. Siulersuisuni ilaasortat sinneri imatut toqqarneqartassapput:

1)  Ilaasortaq ataaseq Film.gl -imit inassuteqaat naapertorlugu.

2)  Ilaasortaq ataaseq Kalaallit Nunaanni Eqqumiitsuliornermut Aningaasaateqarfimmit inassuteqaat naapertorlugu.

3)  Ilaasortaq ataaseq isiginnaartitsisartut peqatigiiffianiit SILA-mit inassuteqarnikkut.

4)  Ilaasortaq ataaseq Sulisitsisunit NUSUKA-miillu ataatsimut inassuteqarnikkut.

  Imm. 2.  Inassuteqaataasut naapertorlugit siulersuisuni ilaasortanngortut akornannit siulersuisut siulittaasup tullissaa qinertassavaat. 

 

  § 9.  Siulersuisuni ilaasortat toqqagaanermi nalaani Kalaallit Nunaanni najugaqartuussapput, ukiunilu kingullerni 5-ini ataannartumik najugaqarsimassallutik, 18-ileereersimassallutik Inatsisartunilu, Folketingimi imaluunniit kommunalbestyrelsimi ilaasortaassanatik. Ilaasortat aamma Naalakkersuisuni ilaasortaassanngillat.

  Imm. 2.  Kalaallit Nunaanni Filminstituttimi pisortaq siulersuisunut qinerneqarsinnaanngillat. 

  Imm. 3.  Naalakkersuisut najugaqarnissamut piumasaqaammiit imm. 1-imiittumiit immikkut akuersisinnaapput, pissutsit immikkut ittut tamanna pisariaqartippassuk, matumanissaaq Kalaallit Nunaata avataani najugaqartuunissamut, tamanna ilinniagaqarnermik pissuteqarsimatillugu, isumaginninnermik pissuteqarsimatillugu, Kalaallini Oqartussat peqataaffigisimasaannik, imaluunniit ilaqutariinnermik pissuteqartillugu, tamatumani sanilliullugu pineqartup imm. 1-imiittut piumasaqaatit naammassinissaat qanoq qanitsiginerai.

 

  § 10.  Siulersuisunut ilaasortanut tamanut, siulittaasoq pinnagu ilaasortamut sinniisussamik inuttut toqqakkamik toqqaasoqareertassaaq, siulersuisuni ilaasortanngorsinnaasumik siulersuisuni ilaasortaq pineqartoq tunuassagaluarpat, tunuartinneqassagaluarpat sivisunerusumilluunniit pisinnaassanngikkaluarpat. Sinniisussat § 7, imm. 2 aamma § 9-mi piumasaqaatinik naammassinnissimassapput.

  Imm. 2.  Sinniisussatut qinerneqarsimasoq aalajangersimasumik siulersuisui ilaasortanngorpat sinniisussamik nutaamik toqqaasoqassaaq. Siulittaasup tunuarneratigut imaluunniit tunuartinneqarneratigut Naalakkersuisut siulittaasumik nutaamik toqqaassapput.

 

  § 11.  Siulersuisuni ilaasortat ukiunut 2-nut ilaasortassatut toqqarneqartassapput.

  Imm. 2.  Taamaallaat siulersuisuni ilaasortamik siornatigut toqqarneqareersimasumik toqqaannartumik ataasiarluni toqqaaqqittoqarsinnaavoq.

  Imm. 3.  Naalakkersuisut siulersuisunut ilaasortamik imaluunniit sinniisussamik tunuartitsisinnaapput, taanna siulersuisuni ilaasortatut akisussaaffimmik annertuutigut sanioqqutsisimappat imaluunniit allanik pissuteqartumik siulersuisuni ilaasortaasinnaasutut piukkunnarunnaarsimappat.

 

  § 12.  Siulersuisut suleriaasissartik namminneq aalajangersassavaat.

  Imm. 2.  Suleriaaseq malittarisassanik makkuninnga imaqassaaq:

1)  siulersuisut instituttimilu pisortap akornanni akisussaaffiit agguataarneqarnerat,

2)  ataatsimiittarnerit ingerlanneqartarnissaat aamma ataatsimeeriaaseq,

3)  taasisarnernut malittarisassat,

4)  aalajangeeqataasinnaannginneq,

5)  nipangiusimannittussaaneq aamma 

6)  imaqarniliortarneq.

 

  § 13.  Siulersuisunut ilaasortat suliaminnut ukiumoortunik honorarisiaqassapput. Honorarisinermi kingumoortumik akilerneqartassapput ukiumut qaammatini 12-ni. Sulisut sinnerlugit siulersuisuni aalajangiisinnaanani peqataasussaq honorarisiaqartassanngilaq.

  Imm. 2.  Siulersuisuni ilaasortatut qaammatip ingerlanerani ilaasortanngornermi honorarit ukiumoortumik pissarsiassat 1/365 -iattut ullormut naatsorsorneqassapput. Tamanna aamma atuuppoq siulersuisuni ilaasortamut qaammatip ingerlanerani tunuartumut.

  Imm. 3. Honorarisianut aningaasartuutit Kalaallit Nunaanni Filminstituttimit akilerneqassapput.

  Imm. 4.  Naalakkersuisut malittarisassiussapput siulersuisut honorarisiaat pillugit, tamatumani aamma taakkua annertussusissaannik akilerneqartarnerannillu.

 

  § 14.  Aningaasartuutit, matumani aamma angalanernut, nerisaqarnernut najugaqarnernullu Kalaallit Nunaanni Filminstituttimik sullissinermut atasunik siulersuisuni ilaasortanut akilerneqartassapput, Kalaallit Nunaanni Namminersorlutik Oqartussani tjenestemandinut atuuttut malittarisassat naapertorlugit. Aningaasartuutit tamakkua Kalaallit Nunaanni Filminstituttimit akilerneqassapput.

 

  § 15.  Siulersuisut Kalaallit Nunaani Filminstituttimi qullersaallutik oqartussaapput, akisussaallutillu instituttip ingerlanneqarneranut, matumani aamma aningaasaliissutinik atuinernut aamma aalajangersaasarnernut instituttip anguniagaanik.

  Imm. 2.  Siulersuisut pingaarnertut akisussaaffigaat aalajangersakkat Kalaallit Nunaanni filminstituttimut tunngasut malinneqarnissaannut, aamma instituttip ingerlatsinerata inatsisit aalajangersarneqarsimasut naapertorlugit ingerlanneqarnerat. 

 

  § 16.  Kalaallit Nunaanni Filminstituttimi ulluinnarni ingerlatsineq isumagineqassaaq pisortamit siulersuisunit atorfinitsinneqartumit.

  Imm. 2.  Pisortaq siulersuisunut akisussaavoq inatsisini aningaasaqarnikkullu killiliussat iluanni Kalaallit Nunaanni Filminstituttimut atugassarititaasut naapertorlugit ingerlanneqarnerannut.

  Imm. 3.  Pisortap atorfinitsittarlugillu soraarsittarpai Kalaallit Nunaanni Filminstituttimi sulisut.

 

  § 17.  Kalaallit Nunaanni Filminstitutti sulisunik atorfinitsitsisarnerni aamma soraarsitsisarnerni atorfeqarnermilu atugassarititaasuni allani pisussaavoq Namminersorlutik Oqartussani sulisunut malittarisassanik malinninnissamut.

 

Kapitali 3

Aningaasatigut tapiissuteqartarneq

 

  § 18.  Ukiumoortumik aningaasanut inatsisikkut aalajangersaasoqartassaaq immikkut nioqqutissiornernut atorneqartussanik, filmilianut isiginnaagassianut aamma naatsunut dokumentaaritullu filmilianut, kiisalu immikkoortunik aningaasaliissutinik Kalaallit Nunaanni Filminstituttimut tapiissutigineqartussanik.

  Imm. 2.  Tapiissutissanik tunniussaqarnissamut atatillugu atugassarititaasunik aalajangersaasoqarsinnaavoq. 

 

  § 19.  Kalaallit Nunaanni Filminstituttip aningaasaliissutissanik qinnuteqaatinik allaatigisaq filmiliornermi najoqqutassaliornermut aamma filmiliatut nioqqutissiassatut siunnersuutigineqartunut, aamma naatsunik dokumentaarinillu filmiliassatut siunnersuutigineqartunik suliaqarnermi qularnaartassavaa eqqumiitsuliatut sulianik naliliisoqartarnissaa, aamma qinnuteqaatit aningaasaqarnikkut aamma nioqqutissiornikkut teknikkimut tunngasutigut nalilersuivigineqartarnissaat.

 

  § 20.  Kalaallit Nunaanni Filminstitutti pisinnaavoq aningaasanut inatsimmi aningaasat akuersissutaasut iluanni aningaasaliinissamut aningaasartuutinut matussutissat 25 procentiannik Kalaallit Nunaanni aningaasartuutigineqarsimasunut nunani allamiut filmiliaannut, matumanissaaq malittarisassat tak. § 21 naapertorlugu.

  Imm. 2.  Aningaasanut inatsimmi aalajangersaasoqassaaq filmiliakkaartunik tapiissutigineqartut qaffasinnerpaaffigisinnaasaannik aamma appasinnerpaaffigisinnaasaannik.

 

  § 21.  Naalakkersuisut malittarisassiussapput aningaasanik tapiissuteqartarnermut aamma aningaasartuutinik matussusiisarnernut filmiliornermut atasuni, tamatumani aamma tapiissutit siunertaannik, tapiissutit annertussusiannik, akilerneqartarnerannik aamma allaffissornermut tunngasuni.

  Imm. 2.  Malittarisassat, tak. imm. 1, aamma ilaqarsinnaapput malittarisassanik pisuni immikkut ittuni § 20-imi aalajangersarneqartunik procentiliussanik aamma qaffasinnerpaaffissanik appasinnerpaaffissanillu malitassanik saneqqutsisinnaanermut,  aningaasanut inatsimmi aalajangersarneqarsimasunik filmiliornermut aningaasartuutaasimasunik, tak. § 20, aalajangersarneqartunik. 

 

  § 22.  Kommunit ikiorsiisarsinnaapput tapiissuteqarnikkut, attartortitsinikkut imaluunniit qularnaveeqqusiinikkut filmiliornissamut, filmimik attartortitsinissamut aamma filmertitsisarnermut.

  Imm. 2.  Naalakkersuisut ersarinnerusunik malittarisassiorsinnaapput kommunit tapiissuteqartarnerannut, attartortitsisarnerannut aamma qularnaveeqqusiisarnerannut filmiliornissamut, filmimik attartortitsinissamut aamma filmertitsisarnernik ingerlatsisarnernut atasuni.

 

Kapitali 4

Aningaasalersuineq, aningaasartuutissanik missingersuusiat, naatsorsuutit, kukkunersiuineq aamma aningaasaliissutinik utertitsisarneq

 

  § 23.  Kalaallit Nunaanni Filminstitutti aningaasalersorneqassaaq nunatta karsianiit tapiissutitsigut, taamaattoq tak. imm. 2 aamma 3. 

  Imm. 2.  Kalaallit Nunaanni Filminstitutti tunissuteqarfigineqarsinnaavoq kingornussanik aamma tunissutinik allanik kiisalu tapiissutissanik aamma sponsoritut tunniussanik nunatta karsiata avataaneersuniit.

  Imm. 3.  Kalaallit Nunaanni Filminstitutti suliniutinik aningaasarsiornikkut isertitsiniutaasunik aamma tapiissuteqarfigineqartarnernik aaqqissuussinernik ingerlatsisinnaavoq. 

  Imm. 4.  Kalaallit Nunaanni Filminstituttip tapiissutigineqartut aamma isertitat allat namminerisaminik atorsinnaavai, kisiannili atugassarititaasut aalajangersarneqarsimasut aamma missingersuusiornermi malittarisassat malinneqassapput.

 

  § 24.  Kalaallit Nunaanni Filminstituttimi siulersuisut ukiut tamaasa Naalakkersuisunut ukiumut tulliuttumut aningaasartuutissatut missingersuusianik siunnersuuteqartassapput, piffissap Naalakkersuisut aalajangigaata iluani. Siunnersuut imaqartassaaq missingersuusianik isertinneqartussatut aamma aningaasartuutaasussatut naatsorsuutigineqartunik.

 

  § 25. Kalaallit Nunaanni Filminstituttimi ukioq naatsorsuusiorfiusartoq tassaavoq aningaasanut inatsisip ukiuat. 

  Imm. 2.  Instituttip malitarissavai Namminersorlutik Oqartussani piffissami sumiluunniit atuuttut aalajangersakkat missingersuusiortarnermut, naatsorsuusiortarnermut aamma naatsorsuutinik suliaasimasunik saqqummiussisarnermut.

 

  § 26.  Kalaallit Nunaanni Filminstituttip ukiumoortumik naatsorsuutai Namminersorlutik Oqartussat kukkunersiuisuinit kukkunersiorneqartassapput.

  Imm. 2.  Siulersuisut saqqummiussisassapput naatsorsuutinik ukiumoortunik kukkunersiuisut oqaaseqaataannik imaqartunik akuerisaasunillu Naalakkersuisunit piffissaliussaasup iluani Naalakkersuisunut akuerineqartussanngorlugit. Naalakkersuisut tamatuma kingornagut ukiumoortumik naatsorsuutit Inatsisartunut ilisimatitsissutitut nassiuttassavaat.

  Imm. 3.  Naatsorsuutit Naalakkersuisunit akuerineqareeraangata naatsorsuutit akuerineqarsimasut siulersuisunit tamanut takusassiarineqartassapput.

 

  § 27.  Siulersuisut ukiumoortumik Kalaallit Nunaanni Filminstituttip ingerlatsisimanerat pillugu Naalakkersuisunut nalunaarusiortassapput. Nalunaarusiaq instituttip quppersagaani tamanut saqqummiunneqartassaaq.
  Imm. 2.  Siulersuisut ukiumoortumik nalunaarusiaminni nassuiaateqarfigisassavaat aningaasaliissutinik ikiorsiissutaasimasut, nalunaarsorlugit pissutsit tulliuttuniittut:
1)  Tapiissutit agguaanneqartut siunertakkaartunik immikkoortitikkat.

2)  Nalunaarlugu kina tapiiffigineqarsimanersoq, siunertaq suunersoq aningaasallu annertussusiat.
3)  Nalunaarsorlugit tapiiffigineqartuni kikkut siusinnerusukkut instituttimiit tapiiffigineqareersimanersut.
4)  Nalunaarsorlugit itigartinneqartut, taakkunanilu kikkut siusinnerusukkut instituttimiit itigartinneqareersimaneri.
  Imm. 3.  Nalunaarusiamilu aamma nassuiaateqarfigineqassapput Kalaallit Nunaanni filminstituttimi aningaasaqarnikkut aamma sulisoqarnikkut pissutsit atuuttut, aamma instituttip inatsit naapertorlugit siunertaasunik naammassinninneri qanoq innersut.

 

  § 28.  Tapiissutinik tunineqarsimasut Inatsisartut inatsisaat naapertorlugu, imaluunniit Inatsisartut inatsisaannik tunngaveqartumik malittarisassiat naapertorlugit tunniunneqartut pillugit naatsorsuusiussapput.

  Imm. 2.  Naalakkersuisut malittarisassiorsinnaapput naatsorsuusiortarnermut, matumani aamma kukkunersiuisarnermut piumasaqaatit pillugit. 

 

  § 29.  Tapiissutit aningaasaliissutigineqarsimasut tamakkiisumik imaluunniit ilaannakuusumik utertinneqarnissaannik piumasaqartoqarsinnaavoq, qinnuteqarsimasoq eqqunngitsunik paasissutissiisimappat, tapiissuteqarnissamut piumasaqaataasut naammassineqarsimanngippata, imaluunniit tapiissutigineqartut tapiissuteqarnermi siunertat sanioqqullugit atorneqarsimappata.

  Imm. 2.  Naalakkersuisut malittarisassiorsinnaapput tapiissutigineqarsimasut atorunnaartarnerinut aamma utertinneqartarnerinut.

 

Kapitali 5

Akuersissuteqartarneq aamma nalunaarsuisarneq

 

  § 30.  Nunanit allaneersut producentit tamarmik aningaasarsiutigalugu Kalaallit Nunaanni filmiliorusuttut, Kalaallit Nunaanni Filminstituttimut akuersissummik qinnuteqartassapput, tamatumunngalu atatillugu allaffissornermut aningaasartuutinut akuersissummullu matussutissamik akitsuummik akiliuteqartassallutik. Tamannali taamaattoq tusagassiortunut atuutinngilaq.

  Imm. 2.  Kalaallit Nunaanni filmiliorumalluni qinnuteqaateqartarneq pillugu, matumani ilanngullugu immikkut pisoqartillugu akuersissutit pillugit piumasaqaatinik saneqqutsisinnaaneq, qinnuteqaatip ilusissaanut, qinnuteqarnissamut piffissaliussanik aamma akiliutip akilerneqartussap annertussusissaanik Naalakkersuisut ersarinnerusunik malittarisassiussapput.

 

  § 31.  Kalaallit Nunaanni Filminstituttip Kalaallit Nunaanni filmiliornissamut akuersissummik suliaqarnermut atatillugu nalunaarsortassavai paasissutissat suliamut attuumassuteqartut pingaarnerit, aamma tamatumunnga akisussaasut.

  Imm. 2.  Kalaallit Nunaanni Filminstituttip quppersakkamini tamanut takusassiarisassavai paasissutissat akuersissutinik tunniussaqarnernut tunngasut tamaasa.

  Imm. 3.  Naalakkersuisut ersarinnerusunik malittarisassiussapput imm. 1-imi pineqartunik nalunaarsuisarnernut atatillugu, aamma paasissutissat pineqartut sorliit imm. 2 naapertorlugu tamanut takusassiarineqartassanersut pillugit.

 

Kapitali 6

Nakkutilliineq aamma naammagittaalliutit

 

  § 32.  Naalakkersuisut Kalaallit Nunaanni Filminstituttip Inatsisartut inatsisaanik tunngaveqartunik ingerlatsineranik nakkutilliisuupput.

  Imm. 2.  Naalakkersuisut Kalaallit Nunaanni Filminstituttimut piumasarisinnaavaat paasissutissat pisariaqartut nakkutilliinermi Inatsisartut inatsisaannik tunngaveqartunut atasut.

 

  § 33. Aalajangiinerit Kalaallit Nunaanni Filminstituttip aalajangiisarnerinut tunngasut allaffissornikkut oqartussanut allanut naammagittaalliutigeqqinneqarsinnaanngillat, taamaattoq takuuk imm. 2. 

  Imm. 2.  Inatsisinut tunngasut pillugit aalajangiinerit Naalakkersuisunut ingerlatsinneqarsinnaapput kingusinnerpaamik aalajangiisoqarneraniit sap. ak. 4-at qaangiutsinnagit.

  Imm. 3.  Naalakkersuisut malittarisassiorsinnaapput naammagittaalliortarnernut, naammagittaalliutinillu suliaqartarnernut.

 

Kapitali 7

Pineqaatissiissutit

 

  § 34.  § 30, imm. 1, oqaaseqatigiinnik siullernik unioqqutitsisoq, Kalaallit Nunaanni Filmiliornermut Ilisimatusarfimmit akuersissummit peqarani aningaasarsiornissaq siunertaralugu filmiliorluni Kalaallit Nunaanni Pinerluttulerineq pillugu inatsimmi malittarisassat malillugit akiligassinneqarneratigut pineqaatissinneqarsinnaavoq.

Imm. 2.  Inatsisartut inatsisaannik tunngaveqartunik malittarisassiani pineqaatissiissuteqartoqarsinnaavoq akiliisitsinikkut Kalaallit Nunaanni pinerluttulerinermut inatsit naapertorlugu.

  Imm. 3.  Inatsisartut inatsisaanni imaluunniit malittarisassiani Inatsisartut inatsisaannik tunngaveqartuni akitsuummik akiliisitsisoqarnissaanut pisinnaatitsiviusuni akiliisitsissutaasussaq inatsisit naapertorlugit inummut Kalaallit Nunaanni pinerluttulerinermut inatsimmi malittarisassanik tunngavilimmik akiliisitsisoqarsinnaavoq.

  Imm. 4.  Akiliisitsissutit Inatsisartut inatsisaannik matuminnga tunngaveqartut, imaluunniit malittarisassanik inatsimmik tunngavilimmik pineqaatissiissutigineqartut nunatta karsianut nakkartinneqartassapput.

Kapitali 8

Atortuulerfia aamma ikaarsaariarnermut aalajangersakkat

 

  § 35.  Inatsisartut inatsisaat atortuulerpoq ulloq 1. januar 2025.

  Imm. 2.  Siullermeertumik Kalaallit Nunaanni Filminstituttimi siulersuisuni ilaasortassanik toqqaaneq, tak. § 11, imm. 1, Inatsisartut inatsisaata atortuulernerata kingornagut pissaaq piffissamut 1. april 2025 -imiit 31. marts 2029 ilanngullugu atuuttumik.

  Imm. 3.  Kalaallit Nunaanni Filminstitutti pillugu malittarisassat aatsaat atortuulissapput instituttip pilersinneqarneranit, taamaattoq siusinnerpaamik ulloq 1. januar 2026 aallarnerfigalugu.

 

 

Namminersorlutik Oqartussat, ulloq 6. decembari 2024

 

 

Múte Bourup Egede (atsior.)

Naalakkersuisut Siulittaasuat